اليوم بديت بشغل جديد الحمد لله بعد عناء دام اشهر 😂 بزعت شكد مادورت وماكو ف اجتني فكرة انو اجيب ملابس مال بالة من الشمال وابيعهن بالموصل وجبت بضاعة من دهوك واليوم بديت رسمياً، طبعاً شعور حلو لمن تكون انت صاحب الشغل اول مرة اجرب هالشعور لان جنت اشتغل يم ناس قبل، صح لمن تكون صاحب شغل تعب اكثر بس احسن وقليل تُتاح هيچ فرصة لان ينراد راس مال وخبرة وكذا، ان شاء الله تحسون بي لمن تصيرون بزنز مان/ومن😂
المكان الي ابيع بي اروحلو بالبايسكل يبعد 10 دقايق تقريباً وهيچ مثل بالصورة افرشها بالكاع فوك چرچف چبير لان ماعندي عربانة والحمد لله الشغل زين بأول يوم لا بأس بي
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
البضاعة مشتريها جبيرة والقطعة تطلع اني مشتريها بربع دينار ف ابيعها ب500دينار والمربح ربع والاغلى هم نفس الشي مربحو ربع ف اكو ناس يجون يعاملون يكلولي وجبنه بيهن وهمه ما يدرون مسوي مربحهن ربع لان اعرف ضروف الناس وبالاخير يكولون انت ماتوجبنه ويروحون مايشترون😂 طبعا صايرة معاية قبل كومة لمن جنت ابيع ركي ولمن جنت ابيع تمر، مايعجبهم العجب لازم ينزل من سعر الحاجة يلا يشتري بس هم ماالومهم لان اكو كومة بياعين مقطاطة يستغلون العالم،
بس اني عندي طريقة امشي بيها ذولة الناس الي يحبون يعاملون مثلا الحاجة ابيعها ب500 دينار لمن اشوفو يريد يعامل اكلو ب750 عاد يكلي وجبني بيها ف اكلو تدلل خالو اخذها ب500 دينار ف هو يفرح وياخذها گبل😂واطلع هيج بايعها بالسعر الي ببالي هم سعر رخيص للمقابيل وهم اني اربح، طبعا اني افتهم بالاقتصاد والتسويق والمبيعات بس ماكو شركات تقدر 😔😂
وعلى حظي لمن بديت راح يبدأ دوامي💔🗿
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
