هلو اغاتي ♡
اكو عادات وتقاليد ماشيّن عليها من زمان اغلب اهالينا او بالأحرى مجتمعنا..
هالعادات اغلبها دمار لأساس ابنائهم او اخوانهم(بنات وولد) ويفوتهم بدوامة ضلمة ممكن انو تسببلهم امراض نفسية او عقلية او صحية والمصيبة انو اغلب الناس متأقلمين ويا هالشي بعضه مجبورين وبعضهم مرتاحين للجهل هذا بسبب اساس تربيتهم،
قبل ماتبدأون اذا عدكم احد مهتم بهالاشياء او متأذي منها سوو تاك حتى يستفاد
اول شي واهم شي هوَ تربية الاهل لطفلهم بصورة بشعة
مثلاً ضرب ورزايل واهانات مستمرة، عود شنو حتى يخاف ويتعلم ويكوم يسمع الكلام وكذا، من زمان ولحد الان اغلب العوائل متخذين هذا الاسلوب لتربية اطفالهم
اول مايكبرون يضربوهم اذا سوو اتفه غلطة (علاساس حتى مايعيد الغلط)وهذا الشي راح يطلع نتائج سلبية
او 'الشتيمة والاهانة' اي غلطة يسويها طفلهم او اخوهم هذا الصغير راح يشبع شتايم وكلام سلبي يحطم النفسية، وهاي الطرق مال التربية بالاخير راح تنتج شخص محطم نفسياً وكرامتو منتهية من ورا الرزايل والاهانات والضرب، راح يطلع شخص مو طبيعي وهاي نتيجة اتخاذ اساليب تربية متخلفة بالتربية مثل (الضرب والاهانات والشتيمة)
ثاني شي تقييد اطفالهم او اخوانهم الاصغر منهم وهالشي يتعرضون الو اكثر شي البنات لان بنضرهم هيه عورة وكذا مثلا مايخلونها تلبس ملابس ملونة حتى لاتجذب الانظار ويتحرشون بيها العالم، والاسلوب الاقذر هوا تشويه وجوه البنات وضربهن حتى لحد يدحك على وجهها ويتحرش بيها (اي بيبي لاتستغرب اكو كومة هيج حالات)
والفعل الاشنع هوَ قتل البنت تحت تسمية(تنظيف الشرف)او (غسل العار) لانها غلطت غلطة وحدة وبدال مايوعونها يكتلونها!
والشي الاشنع انو ماكو اي قانون يردع الافعال الي ذكرتهن فوك لأن نظام العشائر مسيطر عالمجتمع اكثر من القانون واحكام الدستور وهذا الشي منطي للناس المتخلفة كامل الحرية حتى يمارسون قذارتهم ويا اهلهم او اقاربهم.
ثالث شي منع اختلاط البنت والولد، اول مايكبرون الولد والبنت الاهل يشوهون تفكيرهم يكولولهم تصير بينكم اشياء حرام والشيطان يوزكم...والى اخره من الافكار الوصخة، وبهذا الكلام حتى لو الولد والبنت مو بنيتهم شي مو حلو راح يتلوث تفكيرهم ويدحكون على بعض بنظرة مختلفة عن قبل ويخافون من بعض بسبب تفكير اهلهم.
رابع شي نصائح الاهل لابنهم المتزوج الجديد:
"'اضربها حتى لا تتجاوز عليك او تطول لسانها بالمستقبل'''
'''اكسر عينها من البداية حتى لاتاخذ عليك'''
'''احجي وياها بخشونة حتى تكول هذا رجال شهم'''(الشهامة كاعدة بزاوية وتلطم)
'''لاتخلي المصروف بين ايديها حتى لاتاخذ الفلوس'''
'''لمن ماتسمع كلامك هددها بالطلاق او بزواج الثانية'''
'''فتش موبايلها يومية ترا بنات هالوكت مايتأمنلهن'''
وبعد هاي النصائح راح ينتجون عريس مليان افكار سلبية ووصخة ويمشي على نهج اهلو وتستمر سلسلة تخلفهم...
