فوط + رايكم
#سلسلة_عشق_محرم 🔥🔥
#رغبة_محرمة 🔥🔥💔
🔱 #من_تأليفي_Macilia_ch 🔱
#الفصل_الأول : #العروس_الهاربة 👰💃
♠️ الحلقة 11: ♠️
أصبحنا و أصبح الملك لله ..
فاقت على أشعة الشمس لي ضاربة على وجهها ..حلت عيونها شوية شوية ترمش فيهم بالزربة عاقدة حواجبها ..تقعدت على السرير تخزر من و من ..شعرها داخل بعضو و عيونها مذبالة ..قامت من على السرير و دخلت للصالدوبان ...غسلت وجهها و بلت رقبتها بالماء يا دوب تصحصح شوية
كملت رتبت حالتها و خرجت ...لمحت الدريسينغ روم و خذاتها رجليها ليها ...لمحت ثياب رجال ..صبابط سوايع ..كرافطات الخ باينين تاع آدم ..اما لي لفت انتباهها تمثال ابيض محطوط فنص الغرفة ...قربت منو تتتفحص فيه بعينيها ...التمثال كان يشبه لجنية بجناحات بيضة ..مدت يدها تتلمس فيه حتى جاها صوتو الخشين ممزوج ببحة غريبة
آدم: عجبك
دورت وجهها لعندو و هزت راسها بالايجاب
لجين: يفتق
تبسم و قرب منها يمشي جهتها حتى لحق لعندها و وقف مقابل التمثال
آدم: هاذ التمثال عندو حكاية طويلة كاش نهار نحكيهالك
لجين: متشوقة نعرف حكايتها
دور يشوف فيها مركز مع عيونها بعدها حمحم يحكي
آدم: شوفي الجهة لي لهيه راح تلقاي ثيابك و اغراضك تم
لمعو عيونها واستغربت فنفس الوقت
آدم: كي تكملي اهبطي تحت للكوزينة حتى تفطري اما المرة الجاية لازم تنوضي بكري ..هاذ المرة كانت استثناء برك ..جدي مداير قوانين هنا و كل لي عايشين هنا بدون استثناء لازم يتقيدو بيها
لجين: ايه نعرف حتى حنا كانت عندنا قوانين هك
آدم: أما الظاهر نسيتيها
عقدت حواجبها مستغربة
لجين: علاه ؟
آدم: راهي قريب الحداش تاع الصباح و الفطور يكون على 8:30 ..لازم الكل يكون فايق فهاذ الوقت و قاعد حوالين الطابلة
كمشت ملامحها متأسفة
لجين: ما فقتش بروحي موالفة نوض بكري
آدم: من الأفضل تتعودي على الحياة هنا لأنك مطولة
كمل كلامو و تلفت ماشي عاطيها بظهرو
استغربت من نبرة صوتو و كلامو اللخر
لجين: واش معنتها مطولة هنا إذا قصدو على ذيك المسألة مش راح نخليها تطوال
مشات للجهة لي قالها عليها ...لقات ثيابها كل تم ..قلبت عيونها و نفخت على قصتها ...جبدت الثياب لي راح تلبسهم و دخلت للصالدوبان تبدل ...غير كملت خرجت تتسرسب بشوية لقاتو واقف عاطيها بظهرو يبربش فالتلفون ...كبست على شفافها شادة في شعرها مش عارفة منين تبدا فرد وقت تدعي داخلها انو تنجح في واش مخططة ...
فركت صوابعها ببعض متوترة لازملها حل سريع حتى تخرج من ...شافتو كي حط التلفون في جيبو ...زربت دخلت للصالدوبان حتى تبدا في خطتها
كمل مكالمتو و رجع التلفون لجيبو ...جاء خارج من الجناح حتى سمع صريخها ...وساعو عيونو و تلفت باللزربة يمشي جهة الصوت ...دز الباب لقاها قاعدة على ركايبها فالأرض حاطة يديها الزوج على كرشها تتوجع و شعرها من قدام بكلو مشمخ و تصيح على طول صوتها
لجين: كرشيييي عاونوني راهي تتقطع مش قادرة للوجع
هزت راسها لعندو كي حست بوجودو ...عيونها مذبالة و وجهها اصفر ..زرب طبس لعندها ...و شدها من كتافها يقوم فيها مش عارف شبيها
آدم: شبيك واش صرالك؟
شافت فيه عيونها حمورة تتوجع
لجين: كرشي توجع فيا حاسة روحي راح نموت ..مش قادرة حتى نوقف ...لمح لمعة الدموع في عيونها و زفر
حط يدو ورا رجليها و يد ورا ظهرها و رفدها
مشى بيها للسرير و حطها فوقو يحكي
آدم: راح نعيط للطبيب يجي يفحصك
خرجو عيونها و حست انو خطتها راح تنكشف
..صاحت بعلو صوتها متكمشة على روحها
لجين: لا مش قادرة نستناه يجي ...نزلو دموعها تترجى فيه
لجين: اديني للسبيطار مش قادرة نستحمل الوجع
عض على شفتو التحتانية و عدا يدو على وجهو منرفز
آدم: عندك الحق امشي راح نديك للسبيطار حالتك متعجبش
تبسمت بينها و بين روحها و كملت في تمثيليتها تتوجع و حالتها حالة و البوهالي لي قدامها مصدقها
عاود رفدها و نزل بيها لتحت يجري و هي مكبشة فيه بزوج يدين غارسة راسها في رقبتو مخبية ضحكتها ..خايفة تغلط و يغلبها الضحك و يفسد كلشي
خرجو النساء من غرفهم حتى يعرفوا واش صاير أولهم بشرى ..استغربوا من آدم و هو حامل لجين...جاز عليهم بالزربة و مشى خارج بيها
كبست على قبضة يدها واقفة تخزرلهم من فوق و عيونها يخرج منهم النار
حطها فالطوموبيل و غلق الباب
شافو صفوان و مشى لعندو
صفوان: واش كاين آدم؟
تلفت لعندو مفرفش مش عارف راسو من رجليه
آدم: لجين مريضة في حالة راح نديها للسبيطار
صفوان: مش من الأفضل يجي الطبيب للقصر و يفحصها ..حكيت مع جدي
آدم: لا محكيتش معاه معنديش وقت انت احكي معاه و اشرحلو لازم نروح نوصلها قبل ما تتعقد حالتها
طبس يطل عليها من الكارو ..شافها شادة كرشها بزوج يدين وجهها شاحب كابسة على شفايفها من الوجع
عدل وقفتو و شاف في آدم يحكي
صفوان: اوكي ولد العم انت الحق بيها و انا راح نشرح لجدي الوضع ..اما ما تروحش بلا حراسة
آدم : ايه اكيد ...طبطب على كتفو و حل الباب ركب في بلاصتو....شغل الطوموبيل و قلع رايح ...و زوج طوموبيلات كحلة كبيرة داخلهم البوديڨارد وراه ...تفتحت الباب كبيرة و خرجو وحدة ورا الأخرى
حط يديه في جيوبو و شيعهم بعينيه حتى رجعو ما يبانوش و نفخ على جنب
صفوان: كل الشغل الصعيب عليا الله يستر .
أنت تقرأ
♤ رغبة محرمة ♤ { من تأليف و كتابة Macilia Ch }《 Forbidden Desire》_مكتملة_
Romantikسلسلة_عشق_محرم 🔥🔥 قصة تحت عنوان رغبة محرمة 《مكتملة》 من تأليف و كتابة 🔱 #Macilia_ch 🔱 ممنوع منعا باتا النقل ❌❌ كرونيك راح تجمع بين #صراع_العشائر ، #الثأر ، #الدم ، #ثلاثي_حب ، #التضحية ، #العشق ، #الخيبة ، #الغدر ، #القتل ، و أكيد #التشويق و #ال...
