هاي حبيباتي ان شاء الله تكونوا ملاح راني رجعت من جديد و راح نكمل الكرونيك منين حبست محتاجة دعمكم و تشجيعاتكم حتى نكمل خصوصي رايكم على كل بارت و الأحداث نحبكم ❤
Macilia_ch 🌺🖤
فوط + رايكم ♡
♕ #سـلسـلة_عشـق_مـحرمـ ♕
🔱 #رغــبــةّ_مـحـرمـة 🔱
#من_تأليفي_Macilia_ch
#الفصل_الثالث : شرارة عشق
الحلقة 47 :
وقفت بشرى قدام التاقة راح تغلقها وقت طاحت عينها على مرا داخلة دار قصي
استغربت عاقدة حواجبها فرد وقت حست بفوارة داخلها كابسة عليها كأنو مش عاجبها لي شافتو ...هزت كتافها كأنو ميهمهاش الشي لي شافتو و ما يعنيلها شي و جبدت الريدو معصبة حركاتها وحدهم دليل على تناقضها ظاهريا مش هاممها اما من داخل تغلي و الفضول قاتلها تعرف شكون المرا ذيك و واش جابها فالليل هذا عندو ...بلعت ريقها تتهز وحدها و قعدت حذا أمها تتفرج معاها و تشغل بالها بالمسلسل اما بالها بعيد
بالوقت دخلت لجين و غلقت الباب تتبسم من الشق للشق ..لمحتها يماها و خنزرت فيها بطرف عينها
أمينة: خير يا عصفورة واش حكاية الضحكة ذي ؟
عدلت روحها و حمحمت تتبسم ببلاهة
لجين: شي أمي
أمينة: ايه صح فهميني فحكاية تجديد زواجك هاذي و وقتاه
شبكت صوابعها و راحت قعدت حذاها تشرحلها
لجين: هو قررنا انا و آدم نجددو عرسنا لانو للعرس الاول ميتسماش عرس ما جازش كيما نحب و مكانش يتسمى اصلا عرس
تنهدت بالقاوي تحكي
أمينة : عندك حق يا بنتي فهاذي كلش جاز بلخف ما تقوليش عليه عرس بالأصل اما فرحانة انو العريس مش كيفهم و يحبك و يقدرك و مديلك قيمة
حكمت يدها و كبست عليها تحكي
لجين: نعرف آدم مكاش كيفو
تبسمتلها و دورت وجهها عند بشرى لقاتها سارحة تتفرج اما بالها بعيد
لجين: بشرى بشرى
كمشت ملامح وجهها و ناضت قعدت توالها تنقز فيها
تخطفت تخزر فيها بنص عين
بشرى: شبيك علاه تقرصي فيا ؟!
لجين: ناديتلك ما جاوبتيش
بشرى: كنت نتفرج و مندمجة مع المسلسل
أمينة: من بكري عقلك مدي كونجي كاين حاجة مقلقاتك يا بنتي
بشرى: لا والو
لجين: بالمناسبة اول جلسة طلاق بعد اسبوعين جاهزة
شافت فيها مدة تفرق فنظراتها بحيرة بعدها نطقت
بشرى: اكيد واجدة صفوان صفحة و تطوات من حياتي يبقى نطلق منو قضائيا و يفض كلشي
أمينة : بنتي ولا
لجين: اخخ نعست واش رايكم نوضو نرقدو راح الحال ...شافت فأمها تأشرلها بعينيها انو متجبدش موضوع ولادها قدامها مش وقتو
أمينة : ايه صح راح الحال وقت النوم
بشرى: حتى انا نروح نرقد غدوة نخدم
أمينة: فأقرب فرصة نحكو فحكاية خدمتك
لجين: ايه صح عندي قعدة معاك بخصوص الموضوع هذا
بشرى: علاه شفيها ؟
لجين: علاه تخدمي و نتي عندك دراهم فالكونت
بشرى: مش حابة نمسهم هاذوك و فوقها حابة نتكل على روحي منتساوش راح نكمل قرايتي و الدراهم هاذوك يجي نهار و يخلاصو
لجين: الكلام مع راسك اليابس هذا مستحيل اما الهدرة ذي مش وقتها غدوة نحكو فيها مطولا
أنت تقرأ
♤ رغبة محرمة ♤ { من تأليف و كتابة Macilia Ch }《 Forbidden Desire》_مكتملة_
Romanceسلسلة_عشق_محرم 🔥🔥 قصة تحت عنوان رغبة محرمة 《مكتملة》 من تأليف و كتابة 🔱 #Macilia_ch 🔱 ممنوع منعا باتا النقل ❌❌ كرونيك راح تجمع بين #صراع_العشائر ، #الثأر ، #الدم ، #ثلاثي_حب ، #التضحية ، #العشق ، #الخيبة ، #الغدر ، #القتل ، و أكيد #التشويق و #ال...
