فوط + رايكم
♕ #سـلسـلة_عشـق_مـحرمـ ♕
🔱 #رغــبــةّ_مـحـرمـة 🔱
#من_تأليفي_Macilia_ch
#الفصل_الثالث : شرارة عشق
الحلقة 43:
...قربت منو و قعدت جنبو تقيسلو فحرارتو
بشرى:حرارتك طالعة استنى نجيبلك كمادات باردة و نرجع ...جات تنوض وقفها كي جبدها من يدها بقوة ...اختل توازنها و طاح نصها الفوقاني عليه ...وساعو عيونها متفاجئة
جات تجبد روحها و تنوض أما هو سبقها كي جبدها مرة ثانية من ذراعها حتى رجع وجهو قريب علخر من وجهها ...بلعت ريقها ترمش بالزربة من الموقف لي تحطت فيه و قبل ما تتسرسب من بين يديه حست بشفافو فوق شفايفها ...دزاتو من عليها بالزربة حتى طاح بكلو على ظهرو يفتح فعيونو بسيف و ناضت تترنح قريب طاحت على وراها مشوكية من الوضع
بشرى: هبلت انت !!!حتى مريض و ما تراطيش
جات تلفو بكف اما تراجعت فآخر لحظة كي نطق بصوت ضعيف علخر
قصي: سامحيني مقصدتش
بشرى: باين تتفرج فأفلام تاع ### علابيها حتى و انت فالحالة ذي تتخيل
غمض عيونو بقوة حاسس بالفشلة و السخانة أثرت عليه و راسو يسطر عليه يتنفس بسيف
زمت شفافها مكرزة منو
مشات جابتلو التيزانة حطتها فوق الطابل جنبو تحكي
بشرى: هايليك اشربها و لا السم الهاري
دورت وجهها عليه و خرجت تجري من تم تسب في روحها دخلاني لأنها و بعد لي صرا مزال متحيرة عليه .
فنفس الوقت كانو لجين و آدم خارجين من المول يمشو جنب بعض و لجين قالبة وجهها و الحراس وراهم محملين بلي ساك تاع حوايج
شاف فيها آدم حاكم ضحكتو
آدم: شبيه وجهك مقلوب ؟ مزال نزيدو نرجعو
تنفضت فبلاصتها و دورت راسها تقحرلو
لجين: علاه باش تشريلي كفن!!
آدم: اللطف عليه يا روحي معجبكش لي خترناهم ؟
لجين: اكيد لا كلهم مش من ذوقي اوفر زيادة حابب ترجعني عجوزة قبل وقتي
آدم: علاه شبيهم الثياب يفتقو؟
لجين: آدم متهبلنيش دايرها بلعاني و لا ؟؟
مد يدو قرصها من خدها يدها
آدم: خلينا نتعشاو فبلاصة مزيانة منبعد كي نرجعو للقصر راح تلقاي هدية تستنى فيك
قفزت فبلاصتها فرحانة في لحظة نسات فيها و الثياب تاع العجائز لي شراهالها جبت تعيش اللحظة منبعد تشوفلهم حل
لجين: بلحق!!! نحب الهدايا المفاجئة
تمتم عبس وجهها و شافت فيه بنص عين
لجين: نتمنى تكون هدية تفرح
آدم: اكيد راح تعجبك و درك اركبي فالطومو نمشو
هزتلو براسها و مشات قبلو ركبت شدت بلاصتها و هو وراها ...شوية وقت مشى بيهم الشوفور
طول الطريق قعدت تخزر من الكارو على المناظر الليلية شادة فحرف الباب تبحلق بعيونها توحشت الخرجة فالليل و النسمة الباردة تحت ضوء القمر اما آدم قاعد شاد تلفونو يبربش فيه مركز معاه تعابير وجهو جامدة مرة على مرة يدور وجهو يخزر فيها و يتبسم
بعد ربع ساعة لحقو للريستو لي كان موقعو جنب البحر ...نزل آدم هو اللول و فتح الباب للجين ...مدلها يدو حكمت فيها و نزلت ...تقابلت نظراتهم للحظة بعدها مشاو جهة مدخل الريستو شادين يدين بعض
غير دخلو لحقهم السرفور لطابلتهم ...جبدلها آدم الكرسي قعدت و تبسمت معاه على لطافتو
مشى قعد هو مقابلها يتبسم ...حطلهم السرفور المينيو و راح ...فتحاتو تخير واش تاكل لقات كل الاكلات بحرية
لجين: العشاء هذا جاء فوقتو
هز عينو فيها يحكي
آدم: علاه ؟
شافت فيه تتبسم
لجين: عندي شحال شاهية ناكل أكل بحري
رجعلها التبسيمة يحكي
آدم: مالا اختاري واش حابة
لجين: هاي هاي
ضحكو لزوج و بداو يفدلكو بين بعض هدرة تجيب هدرة حتى جاء السارفور بطلباتهم
آدم: ايه صح نسيت محكيتلكش اليوم صباح سيرين فاقت و رحت شفتها لفترة قصيرة
لجين: اه صح حمدالله
آدم: غدوة تخرج اما حسيتها متبدلة و مش قد بعضها كي حكينا مع الدكتور قال انو ممكن الضربة أثرت عليها حتى أنها مكانتش مصحصحة مليح كانت مزال تحت تأثير المخدر
لجين: راسها خذا ضربة صحيحة اكيد مراحتش تكون مليحة من اولها
آدم: ايه صح خلينا درك نستمتعو بالليلة هاذي و غدوة يفتحها ربي
مد يدو حكم يدها
آدم: خلينا نحكو على عرسنا كيفاه حاببتيه يكون
سحبت يدها من يدو تتبسم
ذاب فتبسيمتها لي تسحر و حكم كاس الماء يرشف منو
لجين: حابة عرس يفتق مثلا حابة تجي تديني بالحصان الابيض
فجأة شرق و عيونو خرجت بقى يكح بقوة حتى حبس ...زرب هز عينو فيها يخزرلها باستغراب
أنت تقرأ
♤ رغبة محرمة ♤ { من تأليف و كتابة Macilia Ch }《 Forbidden Desire》_مكتملة_
Roman d'amourسلسلة_عشق_محرم 🔥🔥 قصة تحت عنوان رغبة محرمة 《مكتملة》 من تأليف و كتابة 🔱 #Macilia_ch 🔱 ممنوع منعا باتا النقل ❌❌ كرونيك راح تجمع بين #صراع_العشائر ، #الثأر ، #الدم ، #ثلاثي_حب ، #التضحية ، #العشق ، #الخيبة ، #الغدر ، #القتل ، و أكيد #التشويق و #ال...
