فوط+ رايكم
♕ #سـلسـلة_عشـق_مـحرمـ ♕
🔱 #رغــبــةّ_مـحـرمـة 🔱
#من_تأليفي_Macilia_ch
#الفصل_الثالث : شرارة عشق
الحلقة 36 :
فاقت لجين عطشانة فنفس الليلة ...دورت على جنبها و حطت يدها على بلاصة آدم لقاتو مكاشو ...تقعدت على السرير مستغربة تحك في شعرها ..حست بكرشها بدات توجع فيها و الوجايع بدات تقطع فيها من داخل
لجين: اوفف مش وقتو خلاصلي الدواء و نسيت نروح لعند الطبيبة للفحص
زيرت على كف يدها و ناضت لبست فرجليها
لاحت على روحها حاجة خفيفة و مشات نزلت للتحت و هي نازلة فالدروج حست بحركة غريبة من وراها ....دارت مفزوعة فوتت نظراتها ما لقات حد ...خذات نفس و كملت نازلة للكوزينة ...قلبت على دواء تاع سطر مؤقتا حتى ترجع لعند الطبيبة ...حطت حبة في فمها و فرغت كاس ماء شرباتو على نفس واحد ...مسحت فمها بكف يدها و رجعت طلعت رقدت
فاقت صباح نفس الشي ما لقاتش آدم ...نفخت بالقوي و ناضت للدوش بللت وجهها و بدلت ثيابها طلعت شعرها لفوق ربطاتو على شكل كعكة و نزلت للتحت فطرت معاهم
رشيد: آدم و أيهم وينهم ؟
هز راسو جبل مركز مع كلامو
أدهم: منعرف
رشيد: بنتي لجين وينو راجلك
بلعت ريقها معرفتش واش تقول اما حست أو لازمها تكذب و تغطي عليه
لجين: هو ناض بكري و خرج قال عندو شغل مهم
رشيد: اه فهمت الشغل تراكم عليه اليامات هاذو
جبل: و انا واش راني ندير هنا جدي علاه الشغل قاع على آدم و حنا واش هو محلنا من الاعراب
رشيد: آدم قديم فالدومان و انت لازملك وقت حتى توالف الريتم
جبل: مالا نتعلم بالخف حتى نواكب آدم
رشيد: مالا اول شي ديرو تنوض بكري كيفو و تمشي لخدمتك انت الاول و تخرج انت الآخر بالريتم تاعك مش راح تواكبو
تبسمت لجين في سرها تضحك عليه و تخزر فيه بشماتة
تبسم جبل تبسيمة صفرة و كمل شرب قهوتو مش هامو كلام جدو ...حط الفنجان يحكي مع روحو راسم تبسيمة صفرة على وجهو
جبل: عجوز الشر ناوي نجيب آخرتك على قريب استنى عليا و تشوف
رشيد: ايه سيرين كيفاه راكي مع تحضيرات العرس ؟
شافت فيه قالبة خليقتها
سيرين: منعرف آخر همي
رشيد: واش الكلام هذا ؟
نغزتها صفية من كتفها تهمس
صفية: راجعي كلامك واش راكي تقولي ؟
سيرين: خبكت يدها على الطابلة و ناضت مكرزة حتى جيحت الكرسي لي كانت قاعدة فوقو على الأرض
سيرين: بطلت مش حابة نتزوج و لي مش عاجبو يخبط راسو للحيط كرهتتتتت
قحرت لجبل لي قاعد يشرب فقهوتو بكل دم بارد و مشات هزت روحها طلعت تجري لجناحها
صفية: كبيرنا ما ديرش عليها الاحداث اللخرة أثرت عليها
رشيد: مش راح نسيف عليها تتزوج اذا مش حابة
سهام: الكل هبل فالعايلة هاذي ما بقاش واحد عاقل غيري
أدهم: سهام اسكتي
سهام: قلت الحق
رشيد: لي كمل فطور ينوض تسرسبو يا الله منبعد نتصرف مع كل واحد فيكم ظهرت راخف الخيط الفترة اللخرة
ناضت لجين هي اللولة تسرسبت من قدامهم خارجة مخليتهم وراها ياكلو فبعض
جبدت تلفونها من صاكها تعيط لآدم رنة زوج تكوبا ..بعدت الفون من وجهها مستغربة
لجين: شبيه هذا تان !! علاه فصل الخط
👤 : مدام تفضلي
هزت راسها على صوت الحارس
لجين: ما عندكش فكرة وينو معلمك؟
👤: لا
نفخت بالصوت و مشات ركبت
لجين: اديني للمشفى قبل منبعد للكابيني
👤: حاضر
أنت تقرأ
♤ رغبة محرمة ♤ { من تأليف و كتابة Macilia Ch }《 Forbidden Desire》_مكتملة_
Romanceسلسلة_عشق_محرم 🔥🔥 قصة تحت عنوان رغبة محرمة 《مكتملة》 من تأليف و كتابة 🔱 #Macilia_ch 🔱 ممنوع منعا باتا النقل ❌❌ كرونيك راح تجمع بين #صراع_العشائر ، #الثأر ، #الدم ، #ثلاثي_حب ، #التضحية ، #العشق ، #الخيبة ، #الغدر ، #القتل ، و أكيد #التشويق و #ال...
