فوط +رايكم
♕ #سـلسـلة_عشـق_مـحرمـ ♕
🔱 #رغــبــةّ_مـحـرمـة 🔱 #من_تأليفي_Macilia_ch #الفصل_الثالث : شرارة عشق
الحلقة 46 :
آدم: رجعيلي بوستي قبل
شافت فيه ترمش فعيونها بالزربة ...مدت يدها قرصاتو من جنبو حتى يسيبها و هذا لي صار
رخف يديه من عليها و هي جبدت روحها منو و وقفت بعيدة عليه ...قفل نص عين يمسد فبلاصة القرصة كابس على فكو
آدم: اححح تشوي واش فيها يدك!؟
لجين: تستاهل
خرجتلو لسانها تضحك
لاح يدو حتى يحكمها هربت من قدامو تجري ضحك على تصرفاتها و فرح بشوفة ضحكتها سرح فتفكيرو و هو يشوف فيها تبعد تنقز كي الفراشة ... يتذكر كل لحضاتهم مع بعض وين كانو و وين رجعو بعدما كانت تبخر بريحتو و متحملوش و لا تحمل تخزرلو بنص عين
هز راسو و آخر شي شافو قبل ما يركب فطوموبيلتو و يمشي ...شعرها الطويل لي يتحرك مع كل حركة تعملها و ضحكتها لي ما فارقتش وجهها .
نزل من طوموبيلتو يمشي بخطوات رزينة جهة المدخل تاع الكلينيك حاطط يدو في جيبو... غير دخل رحبو بيه لي تم...حط يدو جهة قلبو و رجعلهم التحية ...وقف قدام الاسانسير و ضغط على الزر هز عينو لقاه فالكابق الخامس نفخ يهز فرجلو يستنى فيه يتفتح ...بالوقت جاه رئيس الأطباء وقف توالو
رئيس الأطباء: مرحبا بيك مسيو خلفاوي عندك وقت طويل مزرتناش
آدم: كيفاه حالها ؟
رئيس الأطباء : على حالو ما تبدل شي
زفر بضيق و عدا يدو بالزربة على وجهو يمسح فيه بقلقة بالوقت تفتح باب الاسانسير دخل و رئيس الأطباء معاه يخزر فيه حل ما يجي يلمح احساس بالذنب في عيونو حتى لو ما بينش و وجهو ما كان يوحي بوالو و عارف كيفاه يخبي واش يحس بيه اما من عيونو كان يلمح احساسو الحقيقي اما المرة هاذي غير فرش كواغطو على الملأ و باين الوضع هذا مقلقو و كابس عليه النفس عرف انو تبدلت حاجة فحياتو و راهو مقلق من الوضع هذا
لحقو لباب شمبرتها لي راقدة فيها ...خذا آدم نفس طويل بعدها فتح الباب و دخل وراه رئيس الأطباء لي قاعد يحلل فردة فعلو و تصرفاتو لي صارت مكشوفة
قرب من سريرها لمحها متسطحة مغمضة عيونها بلا حركة كي عادتها الخيوط دايرين بيها و ريحة الدوايات معبقة الشمبرة تتنفس بقناع الأوكسجين
آدم: ما عطات ولا ردة فعل ؟
رئيس الأطباء : مع الاسف لا مزالها على حالها من سنين ...راهي عايشة بالأجهزة و تتنفس بقناع الأوكسجين لولاهم كانت ميتة من زمان
آدم: بعد كل هاذ السنين مش راح تفيق من الغيبوبة
رئيس الأطباء : مع حالتها و حسب التحاليل و المؤشرات الحيوية فرصة انو تنوض من غيبوبتها شبه مستحيل لازملها معجزة
كبس على فكو يخزر فيها بتأنيب الضمير
آدم: فهمت لولا الحادث كانت عايشة حياتها عادي
رئيس الأطباء : هذا قدرها... مسيو آدم عندي سؤال حابب نسألهولك من سنين البنت هاذي واش تعنيلك ؟شكونها؟
دور راسو يخزرلو بعيون تقدح نار
آدم: قالك من قبل و نعاودلك اخدم خدمتك بلا ما تحشر نيفك فحاجة ما تخصك فاااهم !!
بلع ريقو يهز في راسو كان حابب يجرب زهرو اما طلع بلا والو
رئيس الأطباء : فهمت سامحني على تطفلي
دور عيونو منو و خرج هارب من تم
تنهد بالقاوي واقف قريب منها يخزر فيها
آدم: سامحيني انا سبة حالتك ذي مش راح نسامح نفسي طول حياتي اذا مكتوبلك تقعدي عايشة على الأجهزة راح نخلصك من معاناتك و نحررك يكفي ما تعذبتي فالحياة هاذي ميرا بعد عام بالضبط اذا قعدتي على حالك راح نحررك من عذابك
تبسم و مد يدو يمسح على شعرها بحنانة بعدها مشى خارج يزرب فخطواتو هارب من احساسو بالذنب كل ما يشوفها و لا يتجبد اسمها و لا سيرة اليوم هذاك
أنت تقرأ
♤ رغبة محرمة ♤ { من تأليف و كتابة Macilia Ch }《 Forbidden Desire》_مكتملة_
Lãng mạnسلسلة_عشق_محرم 🔥🔥 قصة تحت عنوان رغبة محرمة 《مكتملة》 من تأليف و كتابة 🔱 #Macilia_ch 🔱 ممنوع منعا باتا النقل ❌❌ كرونيك راح تجمع بين #صراع_العشائر ، #الثأر ، #الدم ، #ثلاثي_حب ، #التضحية ، #العشق ، #الخيبة ، #الغدر ، #القتل ، و أكيد #التشويق و #ال...
