فوط + رايكم
♕ #سـلسـلة_عشـق_مـحرمـ ♕
🔱 #رغــبــةّ_مـحـرمـة 🔱
#من_تأليفي_Macilia_ch
#الفصل_الثالث : شرارة عشق
الحلقة 38 :
وصلو كلهم للقصر ما عدا صفوان و ناصر و صفية قعدوا مع سيرين
راحو قعدو فالصالة و لجين طلعت لفوق بالوقت نزلت سهام تعدات من جنبها تڨحرلها بعيونها لي يقدحو نار ...لجين ما شافتش فيها حتى كل تفكيرها فالكلام لي قالو مراد
دخلت للجناح تتهز و تتحط بدنها كل يفيبري احاسيسها و عقلها داخل في حيط رمات ساكها فوق السرير تمشي رايحة جاية فالشمبرة مرة على مرة تعدي يدها على شعرها معصبة
لجين: واش ندير يا ربي لازم نتأكد فنفس الوقت مستحيل نخضع لمراد و للعايلة ذيك لازمني نتأكد ..ضرب في مخها كلامو كي قال بتحليل تقدر تعرف اذا تحمل نفس دم عايلة خلفاوي ...بلعت ريقها ترجف من الفكرة نفضت راسها من الأفكار لي هاجمتها فجأة وقفت في بلاصتها كي جات امها في بالها...ضربت جبهتها تلعن فغبائها
لجين: وين كان عقلي من الاول كان لازم نعيطلها اكيد راح تخبرني بالحقيقة
خطفت الساك من فوق السرير و جبدت تلفونها كومبوزات رقمها و حطاتو في وذنها تستنى ترد
تخطفت فبلاصتها قلبها يدق بالزربة قلبت الشاشة ظهر اسم لجين تعيطلها بلعت ريقها و شافت فيه قاعد مقابلها حاط رجل على رجل يلعب بعكازتو مثبت نظراتو فيها
مراد: ايه ردي واش تستناي ؟؟؟ هي لي تعيط مش هك ؟ ردي هياااا
أمينة: علاه حكيتلها !!
مراد: تساليلي !! جاية تحاسبيني و لا انا مسمعتش مليح؟
أمينة: مش راح نجاوب حتى إذا جاوبتها مش راح نقلها الصح
مراد: اه بون ؟؟
وقف بطولو و مشى لعندها يتسحب يخزر فيها بنظرات نارية
بلعت ريقها و جبينها بدا يعرق تكمشت فوق الكرسي لي قاعدة فوقو كابسة على التلفون في يدها
طبس لعندها محاصرها بيديه مطلع حاجبو يقحرلها
مراد: درك تجاوبيها كي الشاطرة اذا مش حابة تاكلي طريحة تاع موت الليلة هاذي بيك و لا بلا بيك راح تعرف الحقيقة
أمينة: واش حابين منها ما شافتش نهار مليح فحياتها اخطوها
مراد: تجاوبي و لا لا!!
حطت عينها فعينو تتحداه تحكي بحزم
أمينة: مش راح نقوللها الحقيقة اذا عرفت راح تنفتح بواب جهنم عليها مش راح نعرضها للخطر هي بنتي انا !!! انا لي ربيتها و سهرت عليها مش مهم تعرف شكون امها الحقيقية اذا عرفت حياتها راح تتخرب و راح تلقى روحها عاشت كذبة الشي لي راح يخليها تنهار
قهقه بصوت عالي يضحك في وجهها
مراد: و انا آخر همي واش راح يصرالها فاهمة !! جاوبي على ق#### و هنيني
أمينة: مش راح نجاوب
مراد: هك مالا
هز يدو راح يضربها و هي ما تحركتلها حتى شعرة عرف وقتها انو مهما واش دارلها حتى لو ضربها و قتلها مش راح تتزحزح و لا تحكي و هو يسحقها حتى تخبر لجين
رجع خطوات للور يخزر فيها و يتبسم
مراد: اذا هك خيري اما تخبري لجين و لا تلقاي جثة بنتك بشرى غدوة فالقصر
شهقت حاطة يدها على فمها فاتحة عيونها على وسعهم
أمينة: بشرى بنتك ؟؟؟ كيفاه تقول هك
مراد: تعرفيني نديرها و تعرفي انو ميهمنيش بيها حتى لو كانت بنتي خصوصي درك كي طلقت واحد ما يجيب خبرها
أمينة: طلقت!!!! كيفاه و ولادها !!
مراد:ماتو و اليوم لقاو وين متخبية وغدوة يجيبوها مالا خيري درك و ما تضيعيش وقتي لجين و لا بشرى
زمت شفافها و دموعها هبطو لزوج بناتها كيفاه راح تخير وحدة فيهم تعرف انو راجلها يديرها و يقتلها اما الشي لي دخلها فحيط علاه طلقت و وقتاه و كيفاه ماتو ولادها !! علاه معندهاش خبر !!!
مراد: مزاااال خفيييي معنديش وقتتتك
تخطفت على صياحو ترجف فبلاصتها
مراد: سكوتك يدل على انو خيرتي لجين على بنتك لي جبتيها اوكي كيما تحبي
تلفت رايح متركز على عكازتو
امينة: خلاص راح نخبر لجين
تبسم على جنب و دارلها
مراد: عاودي عيطيلها و جاوبيها على اسئلتها هيا خفي
هزتلو براسها و حكمت تلفونها ترعش تبربش على رقم لجين
عاود رجع قعد مقابلها يراقبها بعيونو لي كلها حقد
لجين وقتها كانت تغلي من الزعاف ما لقات بيها وين و لي كمل عليها كي ما جاوبتش عليها امها زادت تحيرت اكثر عليها قعدن فوق السرير حاطة وجهها بين يديها فادة لحظات حتى سمعت تلفونها يرن فوق حجرها ...تنفضت فبلاصتها و عدلت روحها كي شافت اسم امها يلمع فالشاشة ..بالوقت جاوبت عليها ملهوفة
لجين: امي لباس ؟؟ انتي مليحة تقلقت عليك كي ما جاوبتيش
امينة: انا مليحة حمدالله خليت التلفون لفوق و انا كنت تحت نعاون فالعشاء
خذات نفس و زفراتو مرتاحة
لجين: ارتحت درك
أمينة: خير يا بنتي صرات شي حاجة
لجين: لا كلشي تمام هو حبيت
قصت عليها كلامها تحكي
أمينة: و بشرى واش حوالها؟
بلعت ريقها معرفتش واش تقول ما حبتش تخبرها بلي صرالها وعدت بشرى انو كي تلقى وقت هي راح تخبرها
لجين: هي مليحة ما تقلقيش روحك عليها
غمضت عيونها بخيبة تحكي بصوت غالب عليه البكية
أمينة: ايه علاه عيطتيلي صرات حاجة !!
لجين: ايه هو حبيت نسقسيك سؤال
أمينة: اي اكيد بنتي سقسي واش تحبي
لجين: هو جاء مراد اليوم عندي قصدي بابا جاء عندي و خبرني حوايج متدخلش للراس حسيت روحي صراحة كاني عايشة ففيلم
نزلت راسها تضحك باستهزاء اما عيونها يحكو شي ثاني تبدلت نبرة صوتها و عيونها تملاو دموع خذات نفس طويل تحاول تتمالك اعصابها
لجين: امي !!
كبست على التلفون لي فيدها مغمضة عيونها من صوتها عرفت انو راح تسقسيها السؤال هذاك و هي مضطرة تجاوب عليها
أمينة: يا روح امك
لجين: هو قالي انو نتي مش امي و امي البيولوجية هي بنت الجد رشيد خلفاوي قوليلي انو كلامو مش صح حابة نسمع الحقيقة منك الكلام لي قالو مش صحيح مش هك؟
أنت تقرأ
♤ رغبة محرمة ♤ { من تأليف و كتابة Macilia Ch }《 Forbidden Desire》_مكتملة_
Romantizmسلسلة_عشق_محرم 🔥🔥 قصة تحت عنوان رغبة محرمة 《مكتملة》 من تأليف و كتابة 🔱 #Macilia_ch 🔱 ممنوع منعا باتا النقل ❌❌ كرونيك راح تجمع بين #صراع_العشائر ، #الثأر ، #الدم ، #ثلاثي_حب ، #التضحية ، #العشق ، #الخيبة ، #الغدر ، #القتل ، و أكيد #التشويق و #ال...
