فوط + رايكم للتشجيع💜
♤ #سـلسـلة_عشـق_مـحرمـ ♤
🔱 #رغــبــةّ_مـحـرمـة 🔱
#من_تأليفي_Macilia_ch
#الفصل_الرابع : ذئاب لا تعرف الرحمة
الحلقة 55:لحقت بشرى بالوقت و شافت المشهد هذاك ...لجين طايحة فالأرض دايرة حالة بالبكاء صوتها يسمع من برا السبيطار و آدم محضنها ...تعلقت عيونها فيهم مش قادرة تهزهم تخزر فأمها الميتة...خمنت من حالة لجين انو أمها خلاص ماتت ..مكانتش حابة تصدق ...الصدمة شلتها من داخل و برا ...غمضت عيونها حاكمة دموعها مش حابة تصدق ...هزت راسها بلا شحال من خطرة كابسة على شفافها ....بالوقت حست بحد جبدها و غرس راسها فصدرو..من ريحتو عرفاتو...لعنت روحها كي عرفاتو من ريحتو ...صفوان صعب انو تتجاوزو بسهولة حتى لو ما رجعتش تحبو و قلبها ما يدقش بحبو المرة هاذي
صفوان: عظم الله أجركم ربي يرحمها
على كلامو نزلو دموعها تبكي بالساكت....حس بدموعها السخونة على شوميزتو لي لابسها ...تنهد بشوية ساخفاتو حالتها ....فراق بعد فراق ...خسارة بعد خسارة...خيبة و وجع واحد ورا الثاني
نزل يدو يربت على ظهرها بالشوية مخليها تبكي و تفرغ لي فقلبها ...يعرفها مليح كيف تتصرف
فالمواقف ذي مش راح تخلي حد يشوفها و هي تبكي دايمن كانت قوية و مزالها هك ....يعرف انو راح تحاول تبين روحها قوية علاجال أختها و تواسيها و تكون جنبها و هذا لي داراتو ...تبسم فسرو وقت سحبت روحها منو تمسح فدموعها ...تلفتت لعند اختها و مشات طبست لعندها تهدي فيها ....عاونها آدم يرفدوها من الأرض و قعدوها فالفوتاي الصغير لي تم...خرج آدم مع صفوان مخليهم يودعو أمهم قبل ما يدوها لمصلحة حفظ الجثث .غدوة من داك كانو غسلو أمهم و كفنوها و قعدو يستقبلو فالناس لي جاية تعزي ...الجنازة تقامت فدار بشرى ...جاو عايلة خلفاوي و الجيران لي تم حتى عايلة أمهم أمينة جاو من خالاتها و لي يقربولهم من بعيد و لا قريب ما عدا عايلة رضوان ما جاتش حتى من راجلها مراد ما تعبش روحو و جاء لجنازة مرتو ...الشي لي خلا بشرى تتقلق ...خاب أملها فباباها اما واش راح تستنى منو حتى فموت أمها خلا الناس تحكي عليها و يسقسيو علاه راجلها و عايلتو ما كاشهم و بزاف أسئلة ...أما لجين كانت مزالها مصدومة ...غلقت على روحها فشمبرة أمها و قعدت تبكي فوق فراشها ...جاء الوقت لي يدو فيه أمينة و يدفنوها...بشرى وقتها مقدرتش تخبي نزلو دموعها تشهق ...قلبها متقطع و روحها تبكي ...أمها لي مشبعتش منها ماتت و خلاتها ...كان في قلبها بزاف كلام تقولهولها و بزاف حاجات ما داروهاش من قبل يديروها و يجربوها ...ندمت على كل لحظة ضيعتها و ما استغلتهاش حتى تكون قريبة من أمها و تجوز معاها وقت أكثر ولا حتى تحكيلها شحال تحبها و تعزها و فخورة أنو عندها أم كيفها .....دخلو الرجال حتى ياخذوها ...حطوها فالصندوق و خرجو بيها رايحين يدفنوها ...شيعتهم بعيونها المعمرين دموع حتى خرجو و رجعو ما يبانوش وقتها انهارت على الأرض كأنو درك حتى استوعبت انو أمها ماتت و مش راح تزيد تشوفها
طبست لعندها سيرين و صفية يهدو فيها و يمسحولها فدموعها
أنت تقرأ
♤ رغبة محرمة ♤ { من تأليف و كتابة Macilia Ch }《 Forbidden Desire》_مكتملة_
Romanceسلسلة_عشق_محرم 🔥🔥 قصة تحت عنوان رغبة محرمة 《مكتملة》 من تأليف و كتابة 🔱 #Macilia_ch 🔱 ممنوع منعا باتا النقل ❌❌ كرونيك راح تجمع بين #صراع_العشائر ، #الثأر ، #الدم ، #ثلاثي_حب ، #التضحية ، #العشق ، #الخيبة ، #الغدر ، #القتل ، و أكيد #التشويق و #ال...