فوط + رايكم للتشجيع 🤍
♤ #سـلسـلة_عشـق_مـحرمـ ♤
🔱 #رغــبــةّ_مـحـرمـة 🔱
#من_تأليفي_Macilia_ch
#الفصل_الرابع : ذئاب لا تعرف الرحمة
الحلقة 49 :
مشاو نازلين للتحت ...اليد فاليد ..فرحتهم مش واسعتهم ...عيونهم تلمع من بعيد..كبست لجين على باقة الورد تمشي بخطوات واثقة قلبها يضرب فالألف
غير لمحوهم المعازيم و العايلة بداو يصفقوا بحرارة و يرموا عليهم الورود و هوما يهبطو من الدروج درجة درجة و الضحكة ما فارقتش شفايفهم أما وقت طاحت عينهم عليه واقف فوسط الصالة يتبسملهم باستفزاز تقلبت وجوههم ...و شكون من غير سي كرافس جبل مفسد اللحظات...كبست لجين على يد آدم ...دور وجهو شاف فيها حاكمة روحها على شعرة من وجهها باين راح تطرشق من شوفتو ...خذات نفس طويل تحاول تهدي فؤوجها و رسمت ضحكة كبيرة على فمها مش راح تخلي شي يعكرلها مزاجها فذا الليلة بالذات ...شافت فآدم بحنية تحكي بهمس
لجين: حبي مش راح نسمحو لحتى حد يعكر علينا الليلة ذي مش هك !
ترخاو ملامحو للحظة و تبسملها يحكي
آدم : أكيد يا روحي
مشاو هبطو مع تصفيق المعازيم و العيلتين لي يتشاوفو فيما بيناتهم مضيقين عيونهم يقحرو لبعض مش طايقين بعضهم البعض ...الكل راح خذا بلاصتو و قعد فطابلتو
تبسم جبل باستهزاء و هو يتبع بعينيه آدم و لجين يبعدو منو رايحين يعقدو زواجهم للمرة الثانية ...مشى شد طابلة مطرفة بعيد عليهم و على العايلة ..هز يدو يطبل فوق الطابلة بصباعو معوج فمو يخمم...دور وجهو على غفلة لمح سيرين تخزر فيهم و وجهها ميتفسرش ...لمعو عيونو و ضحك
جبل: هذي مزال فاقدة ذاكرتها ظهر راسها هش
كبست على طرف روبتها لي لابستها و مشات خارجة تجري من الصالة مش حاملة تشوف الراجل لي حباتو من سنين يتزوج من وحدوخرا و هي تشوف بعينيها ...تسارعت ضربات قلبها مع كل خطوة تخطيها ...شعرها يضرب ورا ظهرها و هي تجري ...نزلو دموعها على خدها تبكي و تشهق بكل قوتها ...كانت رايحة جهة المصعد حتى تطلع للسطح اما بدلت رايها و خذات الدروج ...مش حابة يشوفها حد بحالتها هاذي و يشفق عليها ...وصلت للسطح بشق الأنفس...رجليها يسطكو ببعض ...وجهها احمر مبلبز بالدموع ...كحل عينيها سايح على طول خدها ...هزت يدها تبعد فشعرها لي لاصق على وجهها و دزت الباب ...ضربتها نسمة قاوية خلاتها تقفل عيونها و تعاود تفتحهم ... طلقت الباب تغلق وراها و تمشات خطوات للقدام ..عاودو دمعو عيونها من جديد و طلقت العنان لدموعها لي انسابت على خدودها ...هزت يدها حطتها على قلبها تضرب فيه تمشي بخطوات مايلة ثواني حتى طاحت على ركايبها وسط سطح الاوتيل البارد ....مكمشة شفافها تحاول تمنع صيحتها المقهورة انو تخرج
كان واقف مغمض عيونو على حافة السطح يحاول يستمتع بالنسمة الباردة لي تلفح في وجهو ...حاط يديه على الباروداج ...ثواني حتى خرج من سرحتو فاتح عيونو ينفخ على صوت باب السطح و هو يتغلق...نفخ بفدة و رجع على وراه نازل للتحت هو بطبيعتو ميحبش الأجواء هاذي خصوصي التجمعات ... تمسمر فبلاصتو وقت طاحت عينو عليها ...طايحة على ركايبها و مكمشة على روحها تضرب على صدرها بالشوية زامة على شفافها تحاول تمنع صوت شهقاتها انو يخرجو
ضيق عينيه فيها و نفخ بفدة ..قرب منها بخطوات ثقيلة و وقف وراها ...نحا الفاست ديالو و حطها على كتافها ...تنفضت من بلاصتها وقت تحطت الفاست عليها .. ناضت مخطوفة تخزر فيه ترمش فعيونها بالزربة صدرها طالع هابط
سيرين: من وقتاه انت هنا !!! كنت تبع فيا !
ضحك ضحكة مخلطة بالدموع قارن حواجبو
أيهم: لا هذاك لي خص
مسحت دموعها بالزربة تخزر فيه بحدة
سيرين: مالا !! واش راح دير هنا !!
أيهم: شكون نتي باش نبررلك!! ما تخافيش متبعتكش مانيش ميت عليك
قلب عيونو منها و مشى نازل مخليها وراه
سيرين: واش حاسب روحو هذا !!! اععععع مغرور مخلانيش حتى نحزن بغرضي و نفرغ واش داخلي الله لا تربحك يا ####
شدت الفاست ديالو لي على كتافها و رماتها على اللرض بغزول
أنت تقرأ
♤ رغبة محرمة ♤ { من تأليف و كتابة Macilia Ch }《 Forbidden Desire》_مكتملة_
Romanceسلسلة_عشق_محرم 🔥🔥 قصة تحت عنوان رغبة محرمة 《مكتملة》 من تأليف و كتابة 🔱 #Macilia_ch 🔱 ممنوع منعا باتا النقل ❌❌ كرونيك راح تجمع بين #صراع_العشائر ، #الثأر ، #الدم ، #ثلاثي_حب ، #التضحية ، #العشق ، #الخيبة ، #الغدر ، #القتل ، و أكيد #التشويق و #ال...
