♤ #سـلسـلة_عشـق_مـحرمـ ♤
🔱 #رغــبــةّ_مـحـرمـة 🔱
#من_تأليفي_Macilia_ch
#الفصل_الرابع : ذئاب لا تعرف الرحمة
الحلقة 54:
صفوان: كيفاه طاوعك قلبك تعمليها !!! كيفاااااه اه!!!... كيفاه طاوعك قلبك تجهضي الجنين لي كان يكبر داخلك كيفاه قدرتي تقتلي روح بلا حول و لا قوة
ضحكت باستهزاء تحكي بسخرية
مايا: انت لزيتني للشي هذا انت ...مفكر راح نجيبو حتى يتمرمد و نتمرمد معاه...مفكر اني راح نبقى معاك و نتا مش دايرلي قيمة حتى... لي يهمك لي فكرشي برك بعدها بعد ما ينولد ترميني على طول يدك و تفكهولي لا و الف لاااا انا مش كيف مرتك الاولى مش راح نقبل الذل ليا و لولدي مكاش ام و لا مرا تقدر تفرط فكبدتها بالساهل ...سكتت تحاول تسترجع فأنفاسها ...دمعو عيونها وقت تفكرت لي عملتو القرار مكانش ساهل عليها اما هذا ما يبررش لي عملاتو
مايا: ما كنتش حابة نربط روحي بيك من اليوم و طالع مش قادرة نتنفس و انت فحياتي قلت راح تتسقم بعدما تزوجنا و اخيرا و راح يكون عندنا ولد يملي علينا حياتنا اما انت ما تستاهلش حتى المحاولة ضيعت نص عمري نستنى فيك و تخدعت بكلامك المعسل وثقت فيك اما انت مكنتش قد الثقة و انا مش مجبورة نضيع لي بقى من عمري معاك انت ما تستاهلش ..واحد اناني يهمو روحو و مصلحتو ...حكيت مع محامي و رفعت دعوى خلع مش راح نزيد نقعد دقيقة وحدة تحت اسمك
قحرتلو و مشات تلم فثيابها
تسمر صفوان فبلاصتو ...الصدمة كانت قوية عليه كان مستني الولد هذاك بفارغ الصبر بعدما ماتو اولادو من بشرى أما بعملتها خلاتو يتبكم و يتشل خصوصي من كلامها اللخر نفس الكلام لي قالتو بشرى عليه اناني يحب مصلحتو و يحب روحو برك ...فاق من سرحتو وقت ضربت كتفو خارجة بفاليزتها فيدها ...تنفض من بلاصتو يجري جهتها كأنو كان فغيبوبة و درك فاق
شدها من ذراعها بقوة و دورها لعندو
صفوان: راح تروحي بالساهل بعد لي درتيه احكيييي ...صاح عليها بقوة قريب طرشق العرق لي فراسو ....خزر فيها بخزرة باردة و عيون فارغة هايج مايج داخلو يغلي غليان و الدم يفور في عروقو
بلعت مايا ريقها خايفة منو لحظتها خوف مش طبيعي مكانتش حاسبة الحساب هذا خصوصي اول مرة تشوف صفوان فالحالة هاذي
مد يدو لرقبتها يخنق فيها ...توسعو عيونها مرعوبة ...فلتت فاليزتها من يدها طاحت على الأرض...هزت يديها تحاول تنحي يديه لي ظاغطين على رقبتها اما والو مش قادرة
صفوان: في ميزك نخليك تروحي هكاك بعد الشي لي درتيه اااااه حاسبة روحك شاطرة ...تجي ترمي قنبلة فوجهي و تروحي كأنو ما درتي والو ...تؤ تؤ تؤ غالطة راح ناخذ روحك هنا قتلك من قبل قتللللك بلاكي على لي فكرشك اما انتي واش درتي رحتي و قتلتيه بكل دم بارد ...الاناني هنا شكون انتي مش انا ...تحكي عليا و ناسية روحك ....تخنقت مش قادرة تتنفس ...وجهها رجع احمر و عيونها مفتوحين على وسعهم ...حاولت تتملص من قبضتو مقدرتش
صفوان: انتي ما تستاهليش تعيشي موتييييي
زير على رقبتها اكثر و اكثر راح يخنقها ...تقطع عليها النفس و وجهها رجع ازرق...قعد يخزر فيها كيف قاعدة تتخبط بين يديه كيف الجاجة المذبوحة اما فآخر لحظة رجع لعقلو وقت جات بين عيونو بشرى...فلتها من بين يديه و تراجع للور
صفوان: ما تستاهليش نوسخ يدي بيك
طاحت فالارض تشهق تحاول تاخذ نفس بسيف....بدنها كلها يرعش و يرجف ... تحاملت على روحها و ناضت تجري خارجة من تم قبل ما يحكمها من جديد
.
أنت تقرأ
♤ رغبة محرمة ♤ { من تأليف و كتابة Macilia Ch }《 Forbidden Desire》_مكتملة_
Storie d'amoreسلسلة_عشق_محرم 🔥🔥 قصة تحت عنوان رغبة محرمة 《مكتملة》 من تأليف و كتابة 🔱 #Macilia_ch 🔱 ممنوع منعا باتا النقل ❌❌ كرونيك راح تجمع بين #صراع_العشائر ، #الثأر ، #الدم ، #ثلاثي_حب ، #التضحية ، #العشق ، #الخيبة ، #الغدر ، #القتل ، و أكيد #التشويق و #ال...
