فوط+ رايكم
♕ #سـلسـلة_عشـق_مـحرمـ ♕
🔱 #رغــبــةّ_مـحـرمـة 🔱
#من_تأليفي_Macilia_ch
#الفصل_الثالث : شرارة عشق
الحلقة 35 :
رمشت عيوني مرات ورا بعض نستوعب فالموقف لي طحت فيه
كي ما جاوبتوش مدلي يدو حتى نحكم فيها و نوض
عضيت شفتي نلعن فزهري للمرة الألف ...لملمت كرامتي المتبعثرة فالأرض و تشجعت مديت يدي حكمت فيدو ...حسيت بكبسة صوابعو على يدي طبس لعندي و حكني بيدو الثانية من ذراعي و نوضني من الارض عاود طبس يجمع فثيابي من الأرض
عدلت روحي ننفض فروحي من الغبرة ...تشرعو عيوني على وسعهم كي لمحت ثيابي الداخلية مفرشين فالارض زربت طبست حكمتهم و كورتهم فيدي و حشيتهم وسط الثياب و غلقت الفاليز بنطرة حتى خليت الراجل يوقف مش فاهم
خرجت لساني و بللت شفايفي الشايحين نحكي بلا ما نشوف فيه متعمدة نخزر فكلشي يتحرك ما عداه هو حاشمة منو اكيد يكون لمحهم و لا شافهم
انا: يعطيك الصحة كثر خيرك وقت نروح بالسلامة
تلفتت طالعة فالدروج وجهي احمر حتى وقفني كلامو
قصي: و الفاليز ؟
عضيت لساني من داخل و عاود هبطت منزلة راسي حكمت الفاليزة حتى نرفدها مقدرتش قريب طلعت روحي حتى باه نكركرها فالدروج مكاش كيفاه و لا راح تعاود طيح كيما صرا قبيل
حسيت بيه وقت شد الفاليز طلقتها بنطرة قريب طيحتها ...شاف فيا مستغرب يرمرم بين شفايفو مقدرتش نسمع واش قال
هويت كتافي بلا مبالاة و طلعت وراه فالدروج
حط الفاليز قدام الباب و دار لعندي فجأة ..شهقت مصدومة جيت نطيح على ورايا حتى حسيت بيديه لقفوني شدني من ظهري بيد وحدة و جبدني لعندو ...ضرب صدري في صدرو بقوة ...حسيت بكورون ضرب فيا ...هزيت راسي تقابلت عيني بعينيه
بلعت ريقي نبحلق فيه ...جبد روحو و رجع خطوات للور يحمحم بصوت مسموع
قصي: انتي جديدة هنا
حركت راسي بايه بلا ما نحكي و قبل ما يزيد يستفسر مخليتلوش مجال
فتحت الباب و كركرت الفاليز لداخل نحكي بالزربة
انا: مرسي على تعبك مشكور باي
شاف فيا عاقد حواجبو و قبل ما يستوعب و لا يحكي شي غلقت الباب فوجهو و تسندت عليه نلهث حاطة يدي على قلبي نحاول نجبد فالنفس بسيف شوية
تبسم على الموقف ...ترسمت تبسيمة صغيرة على ثغرو خلات ملامحو تحلى اكثر عدا يدو على شعرو بالزربة و هبط من الدروج تلفت للحظة يخزر فالدار ...عدا عيونو عليها بالزربة و مشى رايح .
وقت هديت مشيت فتحت التواقي حتى تتهوى الحالة نستنى فالحاجات لي شريتها توصل ...بعدت الفاليزات من قدام الباب و قعدت على وحدة منهم نستنى
بعد نص ساعة سمعت الباب يصوني عرفتهم وصلو ...فتحتلهم الباب دخلو المستلزمات تاع الدار لي شراتهم كيما فوتاي تلفزيون فريجيدار و غيرهم
غير كملو غلقت الباب من وراهم بالمفتاح راحت شمرت على يديها عدلت الدار و حطت كل حاجة فبلاصتها بعد نص نهار كانت كملت فرزت الحالة ...مشات لشمبرتها بعدما غلقت قاع تواقي الدار و ظلمت الحالة ...تسطحت على سريرها جبدت الغطاء عليها وغفات .
أنت تقرأ
♤ رغبة محرمة ♤ { من تأليف و كتابة Macilia Ch }《 Forbidden Desire》_مكتملة_
Storie d'amoreسلسلة_عشق_محرم 🔥🔥 قصة تحت عنوان رغبة محرمة 《مكتملة》 من تأليف و كتابة 🔱 #Macilia_ch 🔱 ممنوع منعا باتا النقل ❌❌ كرونيك راح تجمع بين #صراع_العشائر ، #الثأر ، #الدم ، #ثلاثي_حب ، #التضحية ، #العشق ، #الخيبة ، #الغدر ، #القتل ، و أكيد #التشويق و #ال...
