فوط +رايكم
#سلسلة_عشق_محرم 🔥🔥
#رغبة_محرمة 🔥🔥💔
🔱 #من_تأليفي_Macilia_ch 🔱
#الفصل_الثاني : ⚔️ #صراع_الأخوة ⚔️
♠️ الحلقة 23: ♠️
تسارعت دقات قلبها شي من قربو و شي من كلامو ....كانو قراب لبعض لدرجة كبيرة
لجين دخلت بعضها نزلت راسها و سكتت ما لقات شي تحكيه ... عم السكات بيناتهم ...عيونو قعدو يتحركو فكل انش من وجهها يستنى فردها
ثواني حتى استجمعت شجاعتها و هزت راسها تخزر فيه
لجين: علاه بالضبط 90 يوم ؟
تبسيمة كبيرة ترسمت على وجهو ...جبد روحو عليها و عدا وقفتو يحكي
آدم: بعد 90 نهار لي تصادفنا أول مرة وقت تلاقات عيونك بعيوني يا تحبيني و تكون بداية جديدة لينا يا يصرا العكس و نطلقك و تاخذي حريتك
كمشت حواجبها مش فاهمة
لجين: نهار لي تلاقينا فيه ؟ وقتاه تلاقينا اصلا؟
تبسيمتو زادت وساعت و هو يخزر فيها
آدم:يكفي اني متذكر
لجين: فذي الايام اللخرة مش فاهماتك بلمرة ...ضربت راسك فكاش بلاصة ولا ؟
آدم: لا لقيت سبة نعيش علاجالها
لجين تحكي :
كلامو دخلني بعضي ماعرفتش واش نحكي و لا كيفاه نرد عليه ...تفتح الباب بالوقت و دخلت الفرملية مرة ثانية ...قاستلي ضغطي و شافتلي الجرح ...حاولت جاهدة نتجاهل نظرات آدم و تبسيمتو لي ما فارقتش وجهو و ما نشوفش فيه
شافت الممرضة فآدم تحكي
الممرضة: لازم المدام تاخذ قسط كبير من الراحة لغدوة
آدم: باهي
الممرضة: و انت تان
قص عليها بالزربة يحكي
آدم: ايه فهمت
هزتلو راسها مش فاهمة ردة فعلو هاذيك ...حتى انا كيفها
عاودت شافت فيا و تبسمتلي و خرجت
آدم: مالا ريحي روحك غدوة عمليتك صعيبة
انا: على سيرتها لقيتولي متبرع فوقت قصير
آدم: ايه من حظك
عوجت شفافي مضيقة عيوني فيه نحكي
انا: و شكونو ؟
آدم: منعرفش من الجلبة لي صرات نسيت نعرف شكون ...المهم انتي ريحي روحك اذا احتجتي شي راني برا
حسيتو حاب يتلفني ...ختم كلامو بتبسيمة باهتة و خرج من الشمبرة
ما حاولتش نركز فتصرفاتو عدلت روحي على السرير ساندة راسي على المخدة نخزر فالسقف ...ما جازتش مدة طويلة حتى هدت عليا أمي و معاها بشرى
شدتني من وجهي تبوس فيا و تعاود ...بعدت وجهها شوية تخزر في وجهي و الدموع ماليين عيونها
امينة: خوفتيني عليك
انا: خرجت منها سلامات حمدالله
شفت في بشرى لي واقفة بعيد تخزر فينا برك
قلبت عيوني منها و ركزت في أمي
امينة: حمدالله طول الطريق حاطة يدي على قلبي
شديتلها يديها و تبسمتلها نحاول نطمن فيها
انا: هاني قدامك سالمة
حسيت ببشرى وقت وقفت جنبي ...هزيت راسي نخزر فيها بنص عين ...ترمات عليا حضنتني وساعو عيوني من حركتها المفاجئة متوقعتهاش منها الصراحة طول المدة الفايتة كانت تتجنب فيا و تعامل فيا ببرود اما درك واش تبدل لاني كنت راح نموت انبها ضميرها على اختها و لا كيفاه ؟ ...هو صح منحسوش بقيمة العبد و لا الشي لي عندنا و فحياتنا حتى نفقدوه
جبدت روحها تمسح في دمعتها لي خانتها و تسرسبت بين شفارها
بشرى: الحمدالله على سلامتك اختي خوفتينا عليك
تسارعت دقات قلبي و رجفت في بلاصتي ...كلمة اختي خلات دموع الفرحة يتجمعوا في جفوني ...كلمة وحدة قدرت تنوض بركان احاسيس ومشاعر كانت مدفونة كلمة وحدة كانت كفيلة تذوب الجليد لي بيناتنا مقدرتش ناخذ موقف منها مهما كابرت انا تبقى اختي ..اختي لي نحبها ...تبسمتلها و شديتلها يدها هي الأخرى ..نزلو دموعي يحرقو على خدي و اخيرا قدرنا نتجمعو بعد هاذي السنين بلا خوف ولا رهبة ...حسيت روحي كأني رجعت سنين للور وين كان أكبر همي اني نعيش مع امي و اختي بعيد على كلشي يقيد حريتنا .
أنت تقرأ
♤ رغبة محرمة ♤ { من تأليف و كتابة Macilia Ch }《 Forbidden Desire》_مكتملة_
Romanceسلسلة_عشق_محرم 🔥🔥 قصة تحت عنوان رغبة محرمة 《مكتملة》 من تأليف و كتابة 🔱 #Macilia_ch 🔱 ممنوع منعا باتا النقل ❌❌ كرونيك راح تجمع بين #صراع_العشائر ، #الثأر ، #الدم ، #ثلاثي_حب ، #التضحية ، #العشق ، #الخيبة ، #الغدر ، #القتل ، و أكيد #التشويق و #ال...
