فوط + رايكم للتشجيع
#سلسلة_عشق_محرم 🔥🔥
#رغبة_محرمة 🔥🔥💔
🔱 #من_تأليفي_Macilia_ch 🔱
#الفصل_الأول : #العروس_الهاربة 👰💃
♠️ الحلقة 16: ♠️
فاقت على صوت توشويش و همسات ...حلت عيونها و أول شي قابلها زرقة السماء و الغيوم البيضاء ...رمشت عيونها مرات ورا بعض تحاول تستوعب وين راهي
تقعدت بالشوية ساندة يديها على الحشيش مضيقة عيونها فرد وقت دورت عينيها على البلاصة شافت فالعمال لي تم متخبيين يطلو نص من ورا الحيط تاع المصنع و و نص من ورا الباب...هزت راسها قرات اسم المصنع ...عقدت حواجبها مش فاهمة واش جابها لهنا كل لي متذكراتو انها كانت فالشرفة مع آدم تترشف قهوتها حتى ...وساعو عيونها كي ربطت الخيوط ببعضها ...لزت على سنانها مكرزة ترمرم بين شفافها
لجين: شاهية يوم واحد نفيق نلقى روحي في بلاصتي مش من بلاصة لبلاصة آدم حشيتهالي ذي المرة تان ...نفخت بفدة و جات تنوض من الارض على هزت راسها تسمرت في بلاصتها و الدم جمد في عروقها كي لمحت ولد عمها أحمد مع جيش تاع رجال كثر من 50 واحد يمشو جايين جيهتها ..بلعت ريقها لي شاح تهز في راسها بلا جات تنوض اما تعثرت بحجرة طاحت على الارض ...نفضت يديها من التراب و شافت من و من اذا تلقى كاش طريق تهرب منها تلفتت على صوت تاع خبطة قوية وساعو عيونها و هي تخزرلهم كيفاه رآهم يطيحو واحد ورا خوه و حتى واحد مش فاهم واش راهو صاري بعد دقايق قصيرة ولد عمها و رجالو كلهم طايحين فالارض فاقدين الوعي عاودت دارت على صوت خرخشة جاية من الغابة ..بلعت ريقها و وقفت على رجليها مركزة نظراتها جهة الغابة شوية هك و خرجت مجموعة كبيرة من الرجال ملثمين من وسط الغابة مدججين بالسلاح
قرب منها واحد منهم يمشي جيهتها ...مقدرتش تتحرك انش واحد شي من الدوخة لي حاكمتها من تأثير المنوم و شي من الفضول ....اكتفات تحرك عيونها من و من و هي تشوف فالملثم يقرب منها ...وقف قبالها و مد يدو جبد القناع لي لابسو
شهقت شهقة قوية عيونها مفتوحين على وسعهم
لجين: آدم
شدها من يدها يكركر فيها وراه و هي تحاول تفك يدها منو اما شي
لجين: فهمني واش صاير واش اللعبة الجديدة لي تلعب فيها مش على أساس تديني نشوف أمي واش جابني هنا و واش درتو لهاذو لي مرميين قتلتوهم ؟؟احكي متقعدش ساكت
حبسو قدام طوموبيل مدرعة سودة
تلفتلها يتبسم على جنب
آدم: و انا قد كلمتي راح تشوفي و بالنسبة لولد عمك و رجالو خدرناهم استعملنا اسلحة التخدير شكلهم كيما المسدس اما ما يقتلوش تشبه لمسدس الولاد الصغار كي تصوبي على هدفك و تطلقي راح يخرج سهم منوم
لجين: ما فهمت شي كيفاه قدرتو طيحوهم على خطرة كي النمل واحد ورا الآخر
شاورلها آدم بيدو حتى تركب
آدم: مش وقت الاسئلة الوقت راهو يداهم فينا اذا حابة تشوفي حركي رجليك
...زمت شفافها و مشات ركبت كل لي هامها درك تشوف امها و تشبع عيونها من شوفتها و تشم ريحتها ...توحشتها بشكل كبير فراق الام صعيب و مكانتها في قلوبنا كبيرة .....نفخت و هي تخزر للطرقات لي تربات و كبرت فيهم ...كل ما يقربو تزيد تتكمش على روحها اكثر ...شاف فيها آدم بطرف عينو و مدلها قرعة ماء ...شافت فيدو و تبسمت نص تبسيمة
لجين: واش دسيت فيها ذي المرة سم ؟
نفخ قالب عيونو فالهواء
آدم: شدي و قيليني
لجين: مناو جاي نكون نلقف و محتاجة قطرة ماء نفضل نموت و ما نشربش حاجة من ايدك
قحرلها فادد فرد وقت يفتح فقرعة الماء قدامها ...قربها لشفايفو يترشف منها ..شرب تقريبا نصها و تلفتلها
آدم: بردتي درك
نفخت في وجهو و دورت وجهها جهة الكارو تخزر للطريق
آدم : اقعدي قالبة وجهك هك لي درتو كان لصالحك منبعد راح تجي لعندي و تشكريني
طلعت حاجبها اليمين تضحك
دورت وجهها راسمة تعبير يضحك على وجهها
لجين: فوق ما خدرتني و لحتني لهيك كطعم متوقع نشكرك واو كيما وجهك الصحيح جامي شفت
آدم: وفري كلامك لمنبعد رانا وصلنا
دورت وجهها لقات صح وصلو جنب الطريق لي تدي للمر السري
آدم: هيا انزلي و خلينا نزربو
هزتلو راسها و نزلو ....مشى هو قبلها و هي وراه ...شاف آدم فالحراس لي يحرسو فالمدخل ...ضيق عيونو يستنى فرجالو يتحركو
طلت براسها وين يطل تحكي
لجين: واش رانا نستناو ؟
آدم: ناوية تبيني روحك ليهم عادي حتى يحكموك و لا تلفتي انتباه لي داخل
لجين: و انا واش قلت ؟
آدم: نكره الواحد لي يكثر اسئلة باينة كي الشمس راهو را...مكملش كلامو حتى لمح الحراس طايحين
آدم: درك نقدروا نتحركو هيا
شافت فيه مستغربة و عاودت شافت فالحراس لمحتهم طايحين على الارض نفخت و مشات وراه تعكي عليه
لجين: باينة كي الشمس راهو
آدم: امشي بلا هدرة زايدة الوقت مش لصالحنا
حبسو قدام المدخل لي جاي على شكل كهف بعيد على القصر بشوية...قربت لجين و حطت يدها على البوانيي تاع الباب فرد وقت تخزر في آدم
لجين: راح تستناني هنا؟
آدم : لا داخل معاك
أنت تقرأ
♤ رغبة محرمة ♤ { من تأليف و كتابة Macilia Ch }《 Forbidden Desire》_مكتملة_
Romanceسلسلة_عشق_محرم 🔥🔥 قصة تحت عنوان رغبة محرمة 《مكتملة》 من تأليف و كتابة 🔱 #Macilia_ch 🔱 ممنوع منعا باتا النقل ❌❌ كرونيك راح تجمع بين #صراع_العشائر ، #الثأر ، #الدم ، #ثلاثي_حب ، #التضحية ، #العشق ، #الخيبة ، #الغدر ، #القتل ، و أكيد #التشويق و #ال...
