♕ #سـلسـلة_عشـق_مـحرمـ ♕
🔱 #رغــبــةّ_مـحـرمـة 🔱
#من_تأليفي_Macilia_ch
#الفصل_الثالث : شرارة عشق
الحلقة 41:
هزت راسها بالشوية تخزر فيهم بطرف عينها بعدها شافت فيه بعيون القطة مبحلقة فيه
بشرى: خبيني منهم
قصي: من شكون نخبيك
بشرى: منهم
شاورتلو براسها جهة الرجال لي واقفين قدام باب دارها يستناو و عاودت خبات راسها في صدرو
دور راسو مضيق عيونو يخزر فالرجال هاذوك و نزل راسو ليها ينفخ فادد
قصي: شكون هاذوك؟ و علاه هاربة منهم؟
طلعت راسها تخزر فيه بعيونها الذابلين
بشرى: حكاية طويلة مش وقتو خلينا نروحو من انا منعرفش الحي مليح و لا وين نروح و لا وين نتخبى و خايفة نمشي وحدي فذا الليل و
قاطعها يحكي
قصي: خلاص فهمت شحال ترغي بسلامتك
بشرى: مش وقتو الكلام هذا
قصي: فهمت فهمت امشي قدامي
هزتلو راسها و دورت راجعة منين جاو و هو وراها مرة على مرة يدور راسو يخزر فالرجال هاذوك مضيق عيونو
خذاها لبلاصة بعيدة على الحي وين يسكنو بلاصة هادية فوق تلة تتوسطها شجرة كبيرة موالف يجي ليها
قعدت على الأرض ساندة ظهرها على الشجرة ترتاح ..حلت ساكها خرجت تلفونها و كمبوزات رقم لجين
وقف قدامها حاطط يدو في جيبو مركز نظراتو فيها
نزل راسو شوية شوية لمستواها فنفس الوقت قاعد يقرب شفايفو من شفايفها ببطئ ناوي يلعب على أعصابها
لجين: آدم
آدم: يا روح آدم
بلعت ريقها و هزت عيونها فيه شفايفهم قراب من بعض
لجين: الحياة قصيرة و متعرف واش راح يصرا فيها الشي لي عشتو الفترة اللخرة خلاني نعاود حساباتي حتى مشاعري مش فاهمتهم على هك حابة نتأكد من مشاعري آدم
لزها ليه اكثر و شاف فيها بنظرة ذوبتها يحكي
آدم: روحو
لجين: خلينا ننساو حكاية ال 90 يوم خلينا نتزوجو فأقرب وقت تعرف انو زواجنا من سبع سنين مش معتبراتو زواج و
آدم: نعرف
زمت شفافها تخزر فيه عينو فعينها
لجين: خلينا نتزوجو فأقرب وقت انا مش قادرة نصبر
غير حكات جملتها نزلت راسها حشمانة خدودها رجعو حمر قريب يطرشقو من السخانة ....وقتها تخلطت احاسيسو و معرفش يعبر ...الفرحة لي مبينة من وجهو ...لمعة عيونو يديه لي يرجفو ...قلبو لي زادت دقات قلبو بينت فرحتو من كلامها
ضحك على جيه يتبسم
آدم: ناوية تكملي عليا اليوم ا طفلة
جبدت روحها منو و تراجعت خطوات للور تتبسم ببلاهة
زرب مد يدو جهتها سحبها من وسطها ملسقها فيه
آدم: لوين ناوية تهربي بعدما قلتيلي الكلام هذاك
تركزت على صدرو تلعب بقفالي الشوميز
لجين: ما عندي وين نهرب
ركزت عيونها في عيونو تتبسم
طار مخو من كلامها و تلميحاتها حسب روحو راهو يحلم مزالو مش مصدق لي تحكي فيه
حرك يدو لي كانت على خصرها يتحسس ظهرها طالع لرقبتها نزل راسو لمستواها و طبس عليها راح يبوسها وقت رن تلفونها قاطعهم و قص عليهم تركيزهم
سحبت روحها منو بسيف حاكمة ضحكتها عليه من شكل وجهو المكشر يبان كي الولد الصغير لي نحاولو الحلوة تاعو
جبدت تلفونها من ساكها تشوف شكون يعيطلها لقاتها بشرى ....جاوبت عليها بلخف تحكي بلهفة
لجين: بشرى وينك!! عندي شحال و انا نحاول نوصللك
بشرى: لجين ساعديني
لجين: واش صرالك وينك انتي؟
بشرى: يبدو رجال العايلة جاو يدوني مش حابة نروح راهم واقفين برا داري و باين مش راح يتزحزحوا من تم الا و انا معاهم مهما قعدت هاربة راح يلقاوني
لجين: اهدي راح نتصرف وينك انتي
بشرى: راح نبعتلك العنوان احكي مع آدم غيش اختي قوليلو يتصرف
لجين: ايه ايه اكيد ابعتيلي العنوان راح نحكي معاه
سكرت الخط و شافت فآدم تحاول تجمع الكلمات
آدم: صرات حاجة مع بشرى اقعدي و احكي برياحة
قعدها فوق السرير حاكم يديها
لجين: هو رجال العايلة واقفين برا دار بشرى ناويين ياخذوها معاهم اعمل حاجة و بعدهم من تم
آدم: ايه اهدي راح نتصرف
نزلت راسها لتلفونها وقت جاها ميساج
لجين: راهي بعتتلي عنوانها اديني لعندها
آدم: ايه راح نديك بعدما نعمل تلفون جهزي روحك
لجين: باهي
ناض من جنبها رايح للصالة هز تلفونو و كمبوزا رقم مراد
غير جاوبو شعل فيه
آدم: واش حكيتلك من قبل احكيييي حاب نطلع بروحك و نخسر عليك رصاصة ؛!!
مراد: واش كاين فهمني بشوية
آدم: قول لكلابك يرجعو منين جاو و يخطو جرة بشرى و الا نعرف شغلي معاك
لبو العرق يبلع فريقو و يعاود
مراد: راح نخبرهم يرجعو
آدم: احكي مع عايلتك قلهم ينساو بشرى و يخطو جرتها و ما يجربوش زهرهم و لو محاولة انو يتدخلوا فحياتها راهي تحت حمايتي و لي يدنى ليها من اليوم و رايح راح يلقاني فوجهو فاهم !! ما نفهم لا فالعادات و لا شي فهمت
مراد: اما هي بنتي و بما انو طلقت لازم عليها ترجع لقصر العايلة
آدم: مراااااد متهبلنيش لا نجيك احكي مع كلابك درك درك يمشو و المرة الجاية مراحش نحكي معاك بالسياسة راح نفعل فيك
مراد: فهمت حاضر
سكر عليه الخط يغلي ...فوت يدو على وجهو ينفخ فادد
بعدما سكرت الخط على لجين بعتتلها ميساج وين تسكن و رجعت التلفون لساكها ...هزت راسها وقت شمت ريحة دخان شافت فقصي لقاتو واقف بعيد عليها شوية و يتكيف
ناضت من الارض حاكمة ساكها و مشات لعندو
بشرى: سامحني وجعتلك راسك و تعبتك معايا
نفخ الدخان فالهواء و تلفتلها
قصي: شكون هاذوك و واش حبو منك؟
بشرى: حكاية طويلة كيما قتلك
قصي: هممم فهمت مش حابة تحكي
بشرى: يعني حابة ننسى منين جيت
ركز معاها لقاها مدورة وجهها تخزر للتحت ضامة يديها لصدرها ترعش من البرد
بشرى: المنظر يهبل منا
طيش الڨارو فالارض و عفسو برجلو ...نحا الفاست لي لابسها و حطها على كتافها
شافت فيه بالوقت مقطبة حواجبها
بشرى: و انت راح تمرض هك
قصي: نتحمل بدني قوي مش كيفك خليها
هزتلو راسها موافقة اصلا كانت تحتاجها البرد نخر عظامها ...نحاتها من فوق كتافها و لبستها كيما يلزم جاتها كبيرة عليها غطست فيها بكلها و فرد وقت دفاتها ...بالوقت دخلت لنيفها ريحتو لي على الفاست غمضت عينيها تستحلى ريحتو
فنفس اللحظة جاها تلفون من لجين ....بعدت على قصي و جاوبتها
بشرى: لجين واش صرا؟
لجين: طمني بالك آدم تصرف و الرجال يكونو انسحبوا درك
تنفست براحة تحكي
بشرى: بالحق !!!حمدالله خفت انو ياخذوني
لجين: متخافيش مش راح ياخذوك لبلاصة راني جاياتك مع آدم مش راح يهدالي بال حتى نشوفك
بشرى: ما تجيش درك خلي غدوة صباح و ارواحي
لجين: لا مش راح نقدر نصبر حتى نشوفك و نطمن عليك
بشرى: عيش اختي ديري لي قتلك عليه ياك بعتلك عنواني غدوة و ارواحي و اذا صرا شي نعيطلك و نخبرك
زفرت بالقاوي تحكي بقلة حيلة
لجين: باهي راح ناخذ برغبتك غدوة صباح راح تلقايني فخليقتك
ضحكت بشوية حاطة يدها على فمها
بشرى: نستناك غدوة مالا تصبحي على خير
لجين: و انتي بخير كي توصلي لدارك ابعتيلي ميساج و طمنيني راح نستناك
بشرى: اوكي باي
سكرت عليها الخط تتسم و تلفتت عند قصي
تمشى لعندها يخزر فيها بحدة
قصي: لواش راكي مخططة راح نبقاو الليل بطولو هنا إذا ضايقوك الرجال هاذوك الافضل نروحو للشرطة
بشرى: لا بلاها تحلت المشكلة نقدرو نرجعو للحي درك
قصي: متأكدة مش راح تروحي للشرطة و اذا رجعو ؟
بشرى: مش راح يرجعو متأكدة اصلا حتى الشرطة مش راح تقدرلهم
تبسمت بسخرية دافنة روحها فالفاست تاعو تمشي نازلة من التلة و هو وراها
قصي: حسستيني انك من عايلة مافيا
ضحكت على طول صوتها و دورت لعندو
بشرى: هههه لا مش مافيا اما تقدر تقول عايلتي تشبهلهم
قصي: فهمت امشي نرجعو مالا
رجعو للحي و وصلها حتى قدام دارها ...طمنت بشرى كي ما لقاتهمش بعثت ميساج للجين و تلفتت لعندو
بشرى: مرسي تعبتك معايا اليوم
قصي: عادي درك ادخلي خليني نطمن عليك للخر
تبسمت معاه اما هو قابلها بوجهو الجامد و عيونو لي تخزر فيها بحدة
بشرى: تصبح على خير
قصي: و انتي من أهلو
مشات دخلت و غلقت الباب بإحكام راحت تأكدت من باقي البيبان و الشبابك و غلقتهم مليح ...طلت من التاقة لي طل على دار قصي لمحت الضوء شاعل عرفاتو دخل ...تبسمت بينها و بين روحها مشات تبدل ثيابها لقات انو نسات تمدلو الفاست تاعو ...نحاتها من عليها و حطتها على جنب ناوية ترجعهالو غدوة.
أنت تقرأ
♤ رغبة محرمة ♤ { من تأليف و كتابة Macilia Ch }《 Forbidden Desire》_مكتملة_
Romanceسلسلة_عشق_محرم 🔥🔥 قصة تحت عنوان رغبة محرمة 《مكتملة》 من تأليف و كتابة 🔱 #Macilia_ch 🔱 ممنوع منعا باتا النقل ❌❌ كرونيك راح تجمع بين #صراع_العشائر ، #الثأر ، #الدم ، #ثلاثي_حب ، #التضحية ، #العشق ، #الخيبة ، #الغدر ، #القتل ، و أكيد #التشويق و #ال...
