♤ رغبة محرمة ♤ { من تأليف و كتابة Macilia Ch }《 Forbidden Desire》_مكتملة_

♤ البارت 51 ♤

   فوط + رايكم للتشجيع

            ♤  #سـلسـلة_عشـق_مـحرمـ ♤
                 🔱  #رغــبــةّ_مـحـرمـة 🔱
               #من_تأليفي_Macilia_ch
         #الفصل_الرابع : ذئاب لا تعرف الرحمة
                          الحلقة 51 :

مشى آدم داخل للقصر رافد لجين بين يديه و هي مغطسة راسها فحضنو مكبشة في رقبتو بزوج يدين ....وقتها الجد و ولادو الزوج سمير و أدهم كانو معاه فوق فمكتبو يتناقشو ...اما صفية و سهام كانو مع بعض برا فالجنينة يشربو فقهوتهم ....أما صفوان فقعد فالسبيطار يستنى بشرى توصل و يحكي معاها  ....أيهم رجع مع آدم فطوموبيلتو و سبقهم داخل قبلهم رايح يشوف بنتو أما سيرين كانت تدور فالقصر كي الزربوط هنا و لهيك فادة   مش لاقية واش دير بما انو منعو عليها الخرجة بسبة الشي لي صرا فالعرس

بعدما ما لقاتش واش تدير جات تطلع لجناحها ...فادة و الملل واصل معاها للنخاع... كانت فوقت الازمات لي كيف هاذ و تتحبس فالقصر تجبد بشرى و يقصرو كيفكيف نهار بطولو و ما يجيبوش خبر للوقت ...أما درك الحالة تبدلت و  بقات وحدها  تخزر فالحيوط خصوصي و هي فاقدة ذاكرتها و مش متفكرة ال 3 الشهور اللخرة من حياتها و واش دارت فيهم الشي لي زعجها اكثر ...حتى الشي لي قلقها اكثر انو مقدرتش تواسي بشرى و تخفف عليها و لا تكون معاها لانها معتبرتها صحبتها و كيف أختها بعدما سمعت بلي صرالها  و الشي لي دارو خوها صفوان و لي خلاها تعيشو و فقدانها لولادها مقدرتش تصدق التغيير لي صرا و لا فالأصل مكانتش متوقعة انو علاقة خوها و بشرى راح يصرا فيها شرخ كبير كيف هاذ لانو هي اكثر وحدة عارفة انو صفوان كان يحب بشرى أما مش مبين بسبة كبريائو لي تجرح وقت تزوج سيف عليه و انو مقدرش يكسر كلمة الجد ...مقدرش يتجاوز الشي لي صرا

تنهدت بضيق تجر فرجليها ....وقت جات تدور و تطلع لجناحها ...وقفت فبلاصتها و وساعو عيونها وقت لمحت آدم عاطيها بظهرو طالع فالدروج رافد لجين بين يديه ....جمد الدم فعروقها و قريب فقدت توازنها زربت شدت فالحيط ....شاحت بعيونها للجهة الثانية زامة شفافها مش حابة تشوف فيهم و يوجعها قلبها أكثر من ما هو واجعها ...وقفت تم مدة مليحة تبحلق بعيونها فالفراغ حاكمة بكيتها ...صعب انو تحب واحد مش حاس بيها و لا معبرها و معتبرها كيف اختو مهما حاولت فالسنين لي فاتو مقدرتش تخليه يشوف فيها بطريقة مختلفة و لا تخليه يعتبرها اكثر من بنت عم ....بالوقت أيهم كان نازل من الدروج بعدما رقد بنتو ...وقت كان خارج من جناحو لمح آدم محمل لجين بين يديه عاطيه بظهرو ...كمل نازل يدور فعينيه حتى لمح فجأة سيرين ساندة يدها على الحيط منزلة راسها  مع هك قدر يلمح وجهها المقلوب لي قريب يطرطق ...تمتم فهم حالتها  ..نفخ بصوت عالي و توجه رايح ليها ...وقت حست بخطوات رجلين يقربو منها ...زربت دارت تغطي فوجهها بيديها و تخبي فعيونها المدمعين مش قادرة تجاوب على حتى واحد لذا سقساها شبيها حالتها احتمال كبير تطرطق و تشهق بالبكاء في وجهو و تزيد الطين بلة و تفضح روحها  و ترجع مثيرة للشفقة اكثر من قبل اصلا يكفي فقدانها لذاكرتها