အမျိုးသမီးစစ်သူကြီးနှင့် အကြီးဆုံးဘုရင့်သမီးတော်လေး [ဘာသာပြန်]

Episode(3)

လကမ္ဘာသို့တိုင် လေးတင်နိုင်သည့်စွမ်းပကား

လင်ဝမ်ရွဲ့သည် လင်ယွီအားစစ်စခန်းရှိမြေကွက်လပ်ဆီသို့ခေါ်ဆောင်လာခဲ့သည်။ထိုနေရာတွင် ကျိုးပဲ့ပြီးသုံးလို့မရတော့သည့်လက်နက်အအိုအဟောင်းများစွာကို စွန့်ပစ်ထားကြပြီး လင်ဝမ်ရွဲ့ကတော့ ဤနေရာ၏ပင်တိုင်ဖောက်သည်ပင်ဖြစ်လေသည်။

သူမသည် လက်နက်ပုံကြီးအတွင်းမွှေနှောက်ရှာဖွေလိုက်ပြီးနောက် ဖောတောင်[1] တစ်လက်ကိုဆွဲထုတ်ပြီးလင်ယွီအားကမ်းပေးလိုက်သည်။

"ဟိုဘက်မှာတစ်နေရာစာရှာပြီး ကိုယ့်ဖာသာအကြိမ်တစ်ထောင် လွှဲခုတ်တာကျင့်နေလိုက်"

"ကော အဲ့မှာအဲ့တာပဲလုပ်နေရမှာလား?"

လင်ယွီမှာ အတော်လေးစိတ်ပျက်သွားခဲ့ရသည်။သူက လင်ဝမ်ရွဲ့များသူ့ကိုအထူးလျှို့ဝှက်နည်းတွေဘာတွေ သင်ပေးတော့မလားလို့ တွေးလိုက်မိတာလေ။

အရင်တိုက်ပွဲတွေတုန်းက လင်ဝမ်ရွဲ့၏အရည်အချင်းတွေကို လင်ယွီမြင်ဖူးထားသည်။ခြေကွက်နဲ့ကိုယ်ဟန် တစ်ခုချင်းစီမှာ ကြောက်လန့်စရာခွန်အားတွေနှင့် ကျွမ်းကျင်သွက်လက်ပြီးကွတ်တိကျနေခဲ့သည်။လင်ဝမ်ရွဲ့ရဲ့ ဘိုးဘေးတွေက နည်းစနစ်တစ်ချို့လက်ဆင့်ကမ်းပေးခဲ့တာဖြစ်မယ်လို့တွေးပြီးတော့ သူကဒီအထိပျော်ပျော်ကြီးလိုက်လာခဲ့ပေမယ့် အခုတော့ အဖြစ်ကတွေ့တဲ့အတိုင်းပါပဲ...

လင်ဝမ်ရွဲ့က သူလုပ်နေတာတွေကို ရပ်လိုက်တယ်။ကိုယ်ကိုပြန်မတ်လိုက်ပြီး မပျော်မရွှင်မျက်နှာနဲ့လင်ယွီကို နောက်လှည့်ကြည့်လိုက်တယ်။ရုတ်တရက် သူတွေးမိလိိုက်တာက ..တကယ်လို့ သူ့မောင်လေးဖေးရှင်းသာ ရှိနေအုန်းမယ်ဆိုရင် အခုလိုပုံစံများဖြစ်နေမလား?

ဒီလိုတွေးလိုက်မိပြီးနောက် လင်ဝမ်ရွဲ့နှလုံးသားလည်းနူးညံ့သွားခဲ့လေတယ်။သူက လင်ယွီဘေးနားသွားရပ်ကာ ပထမဆုံးအကြိမ်အနေနဲ့ရှင်းပြပေးလိုက်တယ်။

"လီနိုင်ငံက ခြေလျင်တပ်တွေမှာပုံမှန်ဆိုရင် လှံပဲသုံးကြတယ်လေ။ဒါပေမယ့် ငါ ဟန်တွေနဲ့ ပွဲတစ်ရာနီးပါးတိုက်ပြီး နှစ်နှစ်လောက်ကြာတော့ သိလာရတာက လှံတွေကစစ်မြေပြင်မှာဆို တစ်ပန်းရှုံးတယ်ဆိုတာပဲ။ဟန်တွေက ဓားကောက်သုံးတာများပြီး အနီးကပ်စစ်ထိုးရတာကိုလည်းခုံမင်ကြတယ်။ဒီလိုအနီးကပ်အကွာအဝေးတွေမှာဆို လှံကိုသုံးတာကအားနည်းချက်တစ်ခုပဲ။မြင်းတပ်နဲ့တိုက်ရင်တော့ လှံကအကျိုးသက်ရောက်မှုရှိတယ်ဆိုတာဟုတ်တယ်..တစ်ဖက်က ဟန်မြင်းတပ်မှာလည်း လက်ဆရှိတဲ့မြင်းစီးလေးသမားတွေပါတော့ သူတို့ကအမြဲတမ်း လှံကိုင်တဲ့စစ်သားတွေကိုအဝေးကတည်းက လေးနဲ့ချိန်ထားပြီးသားပဲ။လှံတွေက လေထဲကမြှားတွေကိုတော့ ဘယ်လိုလုပ်ကွက်တိပုတ်ထုတ်လို့ရပါ့မလဲ..အဲ့တာက ငါတို့ရဲ့ခြေလျင်တပ်ရင်းကစစ်သားတွေရဲ့ ကျဆုံးနှုန်း အမြဲတမ်းမြင့်တက်နေတာတောင် မထူးဆန်းရတဲ့အကြောင်းရင်းပဲ။မင်း ဖောတောင်သုံးရတာအသားကျသွားပြီဆိုတာနဲ့ ရန်သူကိုအနီးကပ်တိုက်ရမယ့်အခြေအနေရောက်ရင်တောင် မင်းမှာနိုင်ဖို့အခွင့်အလမ်းပိုများလာလိမ့်မယ်။လှံကိုပစ်ချပြီး ဖောတောင်ကို အစားထိုးသုံးလိုက်မယ်ဆိုရင်ပေါ့"