အမျိုးသမီးစစ်သူကြီးနှင့် အကြီးဆုံးဘုရင့်သမီးတော်လေး [ဘာသာပြန်]

Episode(9)

ဖြောင့်တန်းသော မခကိုင်း၏ရှင်သန်ခြင်း။

နွေဦးတွင် ပျိုးတစ်ခါကျဲက၊ ဆောင်းဦးတွင် ထောင်ချီရိတ်သိမ်းအံ့...

အချိန်ကာလတို့ တစ်တိတိတိုက်စားကာ မျက်စိတစ်မှိတ်အတွင်းမှာပင် ကောက်နှံရိတ်သိမ်းသည့်ဆောင်းဦးရာသီသို့ဝင်ရောက်ခဲ့လေပြီ။သည်တစ်ခေါက် ဆောင်းကုန်လျှင်လင်ဝမ်ရွဲ့တစ်ယောက် ဤစစ်စခန်းသို့ဝင်ခဲ့သည်မှာသုံးနှစ်ပြည့်ပြီဖြစ်သည်။

လီနိုင်ငံတွင်းရှိသောင်းနှင့်ချီသော ယာလုပ်ငန်းမိသားစုတို့အတွက် တစ်နှစ်တာ၏ကောက်ပဲသီးနှံရိတ်သိမ်းရာဆောင်းဦးကာလသည် အရေးအပါဆုံးဖြစ်၏။သီးနှံထွက်နှုန်းပေါ်မူတည်၍ ထိုနှစ်၏ကျန်ရှိနေသောလများအတွက် ဘဝအခြေအနေမှာပြောင်းလဲသွားနိုင်သည်။

ဆောင်းရာသီရိတ်သိမ်းကာလသည် လီနိုင်ငံ၏ နန်းမြို့တော်အတွက်လည်းအရေးကြီးသော အချိန်တစ်ရပ်ဖြစ်သည်။တောင်ယာလယ်သမားမိသားစုတို့မှ အတော်မြင့်မားသည့်အခွန်ပမာဏကို ဆက်သရသောကြောင့်ပင်။

ထို့အတူ ဤကာလသည် ဟန်တို့အတွက်လည်းထပ်တူထပ်မျှအရေးပါလှ၏။ရှည်ကြာသောဆောင်းနှင့်အတူ နေထိုင်သည့် ဟန်တို့မှာဘယ်သောအခါမှထွန်ယက်စိုက်ပျိုးခြင်းအမှုကိုမပြု၊ ဆောင်းဦးသီးနှံရိတ်သိမ်းကာလအတွင်း လုယက်တိုက်ခိုက်၍ ရိက္ခာစုဆောင်းကြကာ ၄င်းတို့၏ကြာမြင့်သောဆောင်းဥတုအားဖြတ်သန်းလေ့ရှိသည်။

လင်ဝမ်ရွဲ့သည် လှံကိုလက်တွင်ကိုင်ထားပြီး လက်နက်အဟောင်းပုံမှရှာဖွေလာသော အနက်ရောင် လေးကို ကျောတွင်ပိုးလျက် သယ်လာခဲ့သည်။ဖောတောင်တစ်လက်ကိုလည်း ခါးတွင်ချိတ်ထားသေးကာ လီနိုင်ငံနယ်စပ်ဒေသ၏ ကုန်းတွင်းပိုင်းဆီသို့တဖြည်းဖြည်းတိုးကာ နေရာရွေ့ပြောင်းနေကြသော တပ်သားအုပ်စုတန်းအနောက်မှ လိုက်ပါလာခဲ့သည်။

ဗိုလ်ချုပ်ကြီးလီမုသည် အနောက်ရှိလယ်သမားပြည်သူတို့အတွက်စဉ်းစားကာ ပိုမိုကျယ်ပြန့်သော စနစ်ကျသည့်တိုက်ပွဲဇုန်ကိုဖန်တီးရန်ရည်ရွယ်ပြီး ရှေ့တန်းတပ်စုများကို အရှေ့သို့မိုင်တစ်ရာခန့်တိုးကာစခန်းချဖို့ဆုံးဖြတ်လိုက်သည်။