အမျိုးသမီးစစ်သူကြီးနှင့် အကြီးဆုံးဘုရင့်သမီးတော်လေး [ဘာသာပြန်]

Episode(16)

လူထုဘုံအလယ်တွင် သူ၏တည်ရှိမှုကို အချိန်နှင့်အမျှရှာဖွေမိခြင်း။

(ရှင်းချိကျီ ချင်းယွီအန်း) ကျောက်စိမ်းဖျော့အိုး ကဗျာစာသား...

ဤလောက၏ အကြောင်းကိစ္စများမှာအမြဲတစေ ပြောင်းလဲလို့နေပေသည်။ဗိုလ်ချုပ်ကြီးလီမု၏ စစ်စခန်းအတွင်းလေဆင်နှာမောင်းတစ်ခု ထပ်မံတိုက်ခတ်လို့သွားပြန်ပြီ။

အချို့သောအကြောင်းအရင်းများကြောင့် လောလောလတ်လတ်ရာထူးတိုးခံလိုက်ရသည့် ထူးချွန်တပ်ရင်းမှ ခေါင်းဆောင်လင်ဖေးရှင်းနှင့် ရှေ့ပြေးတပ်မှူးလေး လင်ယွီတို့နှစ်ဦးလုံးမှာ စစ်တပ်သုံးတင်းပုတ်ဖြင့် အချက်နှစ်ဆယ်စီရိုက်နှက်ခံလိုက်ရ၏။

အပြစ်ဒဏ်ခံရသည့်နေ့တွင် လင်ယွီအားလင်ဝမ်ရွဲ့၏တဲဆီသို့ တစ်စုံတစ်ယောက်ကတွဲခေါ်လာသည်။ကုတင်ပေါ်ဝယ် ညီအစ်ကိုနှစ်ယောက်သားအံတင်းတင်းကြိတ်လျက် ခြေပစ်လက်ပစ်ပုံလဲနေကျသည်။လင်ဝမ်ရွဲ့သည်လင်ယွီထံသို့ စိတ်အနှောက်အယှက်ဖြစ်စွာ လှည့်ကြည့်လိုက်သည့်နောက် သူတို့၏မျက်လုံးချင်းဆုံသွားခဲ့ကြသည်။အချင်းချင်း စိုက်ကြည့်ရင်း..စိုက်ကြည့်နေရင်းမှ နှစ်ယောက်သားကျယ်လောင်စွာ ဝါးလုံးကွဲရယ်မောမိကြလေ၏။အဆိုပါအထိန်းအကွပ်မဲ့လှသည့် ရယ်မောသံအကြားတွင် ၄င်းတို့နှစ်ဦးအလယ်ရှိစိတ်ကသိကအောက်ဖြစ်စရာတို့မှာ မြူခိုးသဖွယ်လွင့်ပါးပျောက်ကွယ်လို့သွားလေပြီ...

အပြစ်ပေးခံရပြီးနောက်တစ်နေ့တွင် လင်ဝမ်ရွဲ့သည်အိပ်ရာထဲမှတွားသွားထွက်လာခဲ့ပြီးနောက် စခန်းကွင်းပြင်ရှိရာသို့ ပင်ပန်းကြီးစွာဖြင့်ခြေတရွတ်တိုက် သွားလိုက်သည်။သူ၏အောက်ပိုင်းလှုပ်ရှားမှုမှာနှေးကွေးနေပါသော်လည်း ဒါကရေသာခိုအပျင်းကြီးနေလို့ရသည်ဟုမဆိုလို။ ကျောတွင်အနက်ရောင်လေးကိုပိုးလျက် ကွင်းပြင်ကျယ်သို့ရောက်လာခဲ့သည်။ပစ်ကွင်းအား သူနှင့်ခြေလှမ်းငါးဆယ်အကွာတွင်ထားပေးရန် လေးသမားတို့ကိုအမိန့်ပေးလိုက်သည်။သူသည်ယခုအချိန်တွင် တပ်ရင်းခေါင်းဆောင်တစ်ယောက်ဖြစ်နေပြီမဟုတ်လား..မြားမပါသည့်လေးအားဆွဲ၍လေ့ကျင့်နေစရာ နောက်ထပ်မလိုအပ်တော့ပါလေ။သူလိုအပ်သည့်အချိန်တိုင်း လေ့ကျင့်ဖို့ရာမြားအစည်းလိုက် ယူဆောင်လာပေးမည့်ငယ်သားများအချိန်ပြည့်ရှိနေခဲ့ပြီဖြစ်၏။