❤️ تزوجت_ابنة_عرشي ❤️

02

الحلقه 2
واقف في وسط حوش الدار ....يديه مرجعهم ورا ظهرو تحت برنوصو ... الجوجمة والحس .. البارود وصهيل الخيل ة... أما مقاعد يسمع في شي ... حاسس روحو مخنوق ..حاسس روحو فادد ..العرس هذا مكانش عاملو حساب .. كان ينجم يرفض ... كان ينجم يقلهم معينيش بالعرس .... أما بنت عمو شذنبها ....لو هو يبطل عليها .. الأعراف مش باش ترحمها ... خير انو يسلم امرو لربي ...ولي كاتبو ربي مرحبا بيه ... صحيح معينو لا في العرس لا في الزواج لا في الحب... هو تو ضحى بروحو باش اسم عمو و بنت عمو ميتلطخش بلوحل ... ..
ملامحو هادئة عكس الحرب لي صايرة داخلو .... هز عينيه للباب وقت راه بدا يتفتح. .. و قابلوه رجلين بيض حفيانين ... عاملين رنة بالخلخال لي لابستو .... ريحة الياسمين لي فاوحة منها .... الحايك الأبيض لي مغطيها مخليها تتمشى كيف لحمامة ... وصلت لعندو حتى شي ما يبان منها كان رجليها و يديها ... لي هازة بيهم صينية صغيرة فيها تمر وحليب .... عادت العرش انو لمرا تقسم التمرة مع راجلها وتوكلو بيدها .. هزت التمرة و قربتها منو .. بحكم انو طويل عليها منمجتش تشوف فمو لين نزل لمستواها .. عظ منها طريف و ردت الباقي لفمها كلاتو ..ورجعت شربتو لحليب ... و هزت التمرات لي بقاو في الصحن رماتهم وراها .. العادة انو الطفلة لي تلقى التمر مبعد هي لي تعرس وراها. . . هز براسو لعمو سي عمار ... وتلفت و هي لحقتو .. دموعها سبالة .. تدعي في ربي انو لي قاعد يصير مجرد حلم .. . مفاقت كان وقت يدو لتفت على خصرها .. وفي لمحة بصر هزها وحطها فوق الفرس .. و ركب هو وراها كانت متوترة من كل شي و من قربو أكثر حاجة ... بدات لفرس تتمشى و هي مش شادة كان في الحايك متاعها .. .. جات باش طيح لقفها بيديه وتكلم بصوتو الرجولي .. لي كان أول مرة تسمعو ... معرفتش إذا تفرح أو تخاف. .أو تحزن أو شلازم تحس .. .
شد مليح هوني ... منجمتش تجاوبو اكتفات انها اشد وين نعتلها .. لين لحقو للحوش متاع دار بوه ولي كانت كيف لقصر كبيرة برشا .. حوش كبير قاسم لقصر لثلاث جيهات .. جيهة متاع الخدم والضياف. . وجيهة متاع سي علي .. بو اسد .. و جيهة متاع اسد ..