❤️ تزوجت_ابنة_عرشي ❤️

28

28

نزلو لتحت حطو لفطور بعد ما جا بوها و خواتها ... طبعا محمد سلم عليها من فوق القلب ... تعدات عشوية حلوة..تفرهدت فيها اريناس .. بعد ما نسات الضحكة من وقت سمعت بعرسها ......
عمار :. اي وينهو راجلك مجاش يفطر ...
اريناس : يكون لاهي بالخدمة بابا ...
عمار: قوم كلمو خليه يجي ...من يوم العرس مريتوش ..
اريناس باهي بابا .... قامت هزت تلفونها ..وطلعت لبيتها .... كلمت يسر .
يسر: عسلامة اختي ...
اريناس : اهلا يسر .... خيتي لحقيقة ..حاجتي بنومروه لاسد ... ولاد نجمة خربولي في تلفون . ملقيتش رقمو
يسر: باهي اختي ... تو نبعثهولك .. (طبعا التلفونات متاع بكري لي يوصل الهدرة كهو )
ستنات شوي و لحقها نومروه ... ..
خذات نفس ..و دقتلو ... شوي وقت ورد ..
الو ؟؟
حست لسانها تعقد ... دم تدفق في عروقها .. حست السخانة طلعتها .. شبيها شنيا لي قاعد يصير معاها .. خي لهاذ الدرجة تخاف منو ...أو نقولو شعور آخر منجمتش تفسرو ..
أسد: ألو تكلم شكون معايا..
اريناس : ا.. أنا أسد .. اريناس ..
بعد تلفون على وذنو ورجعو يثبت ..
اريناس : بابا طالبك تجي تفطر حذانا ... رانا نستناو فيك ..
أسد: .....
اريناس: أسد ..تسمع فيا .
أسد : سمعتك .. شوي ونجي ..
علق عليها و تبسم على جنب . أول تلفون منها .. محلاه صوتها .. رجع حرك راسو و مشى لدار عمو.