❤️ تزوجت_ابنة_عرشي ❤️

21

21

قامت نص ليل ... حاسة روحها عطشانه .. طلعت على دبوزة لي عند راسها لقاتها فارغة ... قامت باش تشعل الضو لقاتو قص ....طبيعي في الدشرة ....
لوجت على الشمعة شعلتها و مشات حلت الباب وهبطت مع دروج وهي تقرا في القران ... من وقت كانت صغيرة تخاف الظلمة ... كانت لابسة سروال بيجاما بلون و خلعة نوار .. هابطة حافية . شعرها مسدول على كتافها ... .. لحقت للكوجينة ... حلت دبوزة الماء شربت ... أما كرشها عصرت عليها ..حاسة بالجوع .. حطت الشمعة على جنب و حلت فريجيدار ... جبدت فطاير و حكة الجبن و قعدت تاكل وتتبنن ... غارسة راسها في الصحن تقولش عليها عام مكلاتش ...
كان قاعد وسط الصالون يتكيف ...وقت قصت الكهرباء .. سند راسو فماش ما يرتاح شوي ... النوم هجرو والبيت متاعو خانقة عليه.... حس عليها أول ما نزلت .. لحقها من غير ما تحس ....وقف عند باب الكوجينة يتفرج فيها كفاش تاكل ...تي الطفلة مجاعة. ..لا و زيد تلطخ كيف لولاد الصغار .... كاتم ضحكتو عليها ....مبعد رجع ملامح الجدية ..
أسد: شتعمل هوني..
وعلى سؤالو تفجعت وبدات تعيط وتصرخ .... من غير شي مرعوبة من الظلام وتو هو كمل عليها ... كيف شافها مش باش تسكت تنطر لجيهتها سكرلها فمها بيديه و يد وحدة عداها ورا ظهرها لزها ليه .... بقاو كان عينيهم مغروسين في بعض ..... ... ..
اسد: ششششش ... باش نجبد يدي رد بالك تصرخ ...
حركتو براسها ..وهو فلتها ... وخر للتالي وهي هزت دبوزة الماء تشرب فرد مرة ...
اريناس: باش نطلع نرقد ..
أسد: استنى ...
تلفتت ليه ..
أسد: مش قتلك منحبش نسمع حسك في دار ...
اريناس: سمحني في بالي فيك راقد نزلت ...
أسد: مرة أخرى تعمل حسابك قبل ما تدخل من الحوش ... لانك وقتها تشد بيتك و متطلعش منها ...
هزت عينيها فيه ..دموع بدات تتجمع ... أما متنجم تحكي شي ... لي يعمل فيه متنجمش تحاسبو ...
تصبح على خير قالت كلمتها وطلعت تجري لبيتها ... أما هو فهز دبوزة الماء متاعها وشرب منها ... سند روحو جانب فيه يقلو قاعد تظلم فيها ..و جانب آخر يقلو تستهل ... عدى يديه على شعرو و طلع يرقد .