"يكفينا من نعيم الحياة ان نحيا بقرب من نحب بقرب من اختارهم قلبنا عمن سواهم🥀🖤"
ادم قاعد مع هبة وهو بحاول يقنع فيها انو لازم يسافرو بعد عرس ايهم ويستقرو في دبي علشان شغلو
ادم:هبة انتي ليه م عايزة تفهميني لازم نرجع عشان انا شغلي هناك
هبة:دة م كان اتفاقنا ي ادم انت وعدتني انو حتنقل شغلك وحنستقر هنا
ادم: حاولت ي هبة بس حاليا م ينفع الامور جايطة وانا لازم اسافر واجلت السفر عشان عرس ايهم عارفك حتقولي عايزة تحضريهو
هبة:م عارفة ي ادم بس انا م حاسافر اي محل عايزة اقعد هنا مع اهلي واهلك انا زاتي عندي شغلي ي ادم وم حاخليهو
اصواتهم علت وفجاة ادم رفع يدو علشان يضربا بس غمض عيونو ونزل ايدو
هبة كانت بتتكلم والدموع في عيونا:عايز تضربني ي ادم؟
م انتظرتو يرد وطلعت من الشقة وهي بتبكي نزلت تحت واميرة وشادن ما فاهمين حاجة وبينادو فيها ،،طلبت ترحال واترددت انها تمشي بيتهم فاتصلت لي اسيل وقالت ليها انها حتجيها
وصلت بيت اسيل حاسبت بتاع الترحال ونزلت ضربت الجرس واسيل فتحت ليها
اسيل:هبة بسم الله في شنو؟
حضنت اسيل وهي بتبكي ،،دخلو جوا واسيل عملت ليها موية وعصير
اسيل: اهدي ي هبة وروقي ووريني مالك ؟
هبة:ادم
اسيل:مالو
هبة:مصر انو نرجع دبي وانا م عايزة امشي هو م اتفق معاي ع كدة ولما اتناقشنا رفع ايدو كان عايز يضربني ي اسيل🙂💔
اسيل: الحياة الزوجية م بتخلو من المشاكل ي هبة خليك صبورة واقعدي معاهو واتفاهمو
هبة:بعد العملو م حاقعد معاهو ولا عايزة اتفاهم خليهو يسافر هو لو عايز انا برضو شغلي هنا الصيدلية بتاعتي فتحتها وانا متحمسة ابدا اشتغل يجي يقول لي نرجع
اسيل:روقي وبطلي ركوب راس حتتحلا اكيد
اثناء م هم قاعدين تلفون اسيل ضرب وكانت شادن
شادن:اسيل هبة دي معاك؟طلعت من البيت زعلانة وم اعتقد انها حتمشي لاهلها
اسيل:اي معاي ي شادن خلوها تروق وتتفاهم معاكم
شادن:طيب تمام
هبة:اسيل عايزة اقعد معاك فترة الحبس لو م عندك مانع م نفسي ارجع
اسيل: مانع شنو ي بت تنوريني ع طول❤️بس اقعدي واتفاهمي مع ادم اول
هبة:طيب عايزة امشي بيتنا اجيب حاجاتي الهناك واسوق عربيتي علشان لم انزل الشغل وكدة
اسيل: طيب العصر نتحرك هسة نومي وارتاحي
طلعتها غرفتها فوق وخلتها ترتاح ونزلت تحت عملت عصير ودخلتو التلاجة ،،طلعت غرفتها ونامت جنب هبة صحت بصوت تلفونا وهو بضرب وكانت لين
لين:اسيل😭💔
اسيل:بسم الله ي لين مالك؟
لين: ابوي مصر ع زواجي من ود عمتي قال لي طالما مافي زول في حياتك وجاك بالباب عديل يبقى ود عمتك م حتلقي احسن منو وم عايز نقاش في الموضوع دة 💔
اسيل:اهدي ي لين انا حاتصرف انتي في بيتكم هسة؟
لين:اي
اسيل: طيب حاضرب لي صفاء تجيك انا حاليا هبة معاي وعندها شوية مشاكل لحد المغرب كدة بصلك
لين:طيب ي اسيل شكرا ليك❤️
اسيل: م بيناتنا ي بت ❤️
قفلت من لين واتصلت لصفاء وحكت ليها وصفاء قالت ليها خلاص حامشي ليها
العصر اذن قامت صلت وصحت هبة علشان تصلي بعدها اتغدو واسيل دخلت لبست ليها بنطلون وطونك واتحركو ع بيت ناس هبة اسيل قالت ليها اعملي فيها انك جاية من بيتك عادي ومافي داعي تحسسي اهلك بمشاكلكم انا عندي مشوار مهم ماشة لي لين صحبتي لم تكوني عايزة ترجعي ع البيت رني لي وبفهمك بعدين هبة قالت ليها طيب تمام نزلت من العربية ودخلت بيت اهلها لقت امها في الصالة بتحضر في التلفزيون من شافتها جرت عليها وحضنتها
هبة;اشتقت ليك
ليلى:كتير ي بتي❤️كويسة انتي؟
هبة:اي تمام الحمد لله ابوي وين؟
ليلى:طلع قبل شوية وبعدين ادم ليه م جا معاك؟
هبة:تعبان شوية فخليتو نايم وجيت اسلم عليكم وبالمرة اشيل حاجاتي واسوق عربيتي علشان حانزل شغل وكدة
ليلى:طيب تمام
دخلت غرفتها وهي بتحاول تمسك دموعا نزلت شنطة ولمت فيها ملابسها قعدت في السرير وفتحت تلفونا وبقت تتفرج ع صورهم بتاعت العرس كانت بتفكر ليه يقسى عليها بالطريقة دي ولدرجة يرفع ايدو عليها يعني معقول بطل يحبها؟مسحت دموعا وطلعت لقت ابوها جا سلمت عليهو وقعدت تتونس معاهم
عند اسيل :
وصلت بيت ناس لين ولقت سوسن قاعدة سلمت عليها وسوسن قالت ليها: في وحدة محبوسة ي بتي بتطلع كدة؟بشيلو نورتك لمن العرس
اسيل بقت تضحك وقالت ليها:م ركزت ي خالتو والله وم بعرف للمواضيع دي
سوسن:اصبري ي بتي انا حاجي احبسك وم في داعي تطلعي من البيت زاتو
اسيل ابتسمت وقالت ليها :م بتقصري والله❤️عمو عبد الله وين؟انا عايزاكم في موضوع
سوسن: في دكانو تحت ي بتي خير ؟
اسيل:لالا خير ان شاء الله
سوسن:طيب حاتصل ليهو يجي
بعد مسافة عبد الله جا داخل سلم على اسيل وقعد
اسيل: معليش ي عمي عطلتك بس عايزة اقول ليكم حاجة وي ريت تفهموني
عبد الله:اتفضلي ي بتي احكي
اسيل: نحنا عايزين بتكم لين لي ايمن ي عم عبد الله
عبد الله وسوسن سكتو مسافة بعدها سوسن قالت ليها:ايمن هو عايزها؟
اسيل:اي والله ي خالتو اساسا هو مؤجل الجية ليكم وكدة علشان عرسي منتظر نخلص من الموضوع دة وكدة فلم لين حكت لي بموضوع ود عمتها قررت اجي واتكلم معاكم
عبد الله:نتشرف بيكم والله ي بتي بس اديني مهلة اشوف لين واتكلم معاها
اسيل: عادي اخدو راحتكم❤️
بعدها دخلت لي لين وصفاء
اسيل: افرديها عليك الله م تتنفسني لينا
لين:والما بخليني اتنفسن شنو؟
اسيل:انو انا اتكلمت مع اهلك وحجزناك لي اخوي ❤️
صفاء:وبعلي منك ي اسيل 😭❤️
لين:كذابة؟ انتي عارفة انا بحبك ❤️
اسيل:اي اي عارفة😂❤️
صفاء :وهم قالو شنو؟
اسيل: م ابدو اي اعتراض وحيفكرو وكدة
لين:ي الله ي اسيل م عارفة انا من غيرك حاعمل شنو😭
اسيل:بطلي ي بت م بينا الشغل دة
صفاء:اسيل انتي محبوسة ي بت البخليك تطلعي عادي كدة شنو؟
اسيل:انا م بعرف للحاجات دي ياخ وبعدين م عايزة اقعد دخان وحركات كفاية كريمات وخلطات
لين;هبلة انتي؟
صفاء:واضح والله
لين:حاسوق امي ونجيك ي زولة الحركات دي م حبابا
فضلو يتونسو لحد م هبة رنت لاسيل واسيل استاذنت منهم وقالت ليهم هبة دي قاعدة معاي وطلعت
............................................................................
ايهم:كيف يعني ترفع ايدك عليها ي ادم ؟
ادم:م عارف ي ايهم ياخ غصبا عني م كنت قاصد
ايهم: انت اتفقت معاها ع انكم حتعيشو هناا حاجة طبيعية انها تزعل لمن فجأة تغير رايك كنت تهدي اعصابك شوية
اميرة: مش دي نفسها هبة الكنت تموت وتعرسا حصل شنو ي ادم علشان تخليها تطلع من بيتها وهي بتبكي ؟
حسن:صلح غلطك ي ولدي وراضي مرتك عيب في حقك انتو لسه تعتبرو عرسان جدد
ادم:طيب ان شاء الله
طلع من الصالة وقعد في الحديقة خت راسو بين ايدينو وفضل مدنقر لحد م ايهم جا وقعد جنبو وخت ايدو في كتفو
ايهم:حاول راضيها ي ادم م تخليها تنوم وهي زعلانة منك م تحسسها انو زعلها هان عليك
ادم:ولا عمرو حيهون علي ي ايهم والله دي هبة وانت عارف اني بحبها قدر شنو
جاهم صوت شادن :بتحبها بس زعلتها ي اخوي
عاينو باتجاه صوتها لقوها شايلة كبابي عصير وجات قعدت جنبهم
شادن:اول حاجة اشرب العصير دة وروق ي ادم وانت ي ايهم اشرب ساي قلت م اخليك واجيب ليك معاهو😂
ايهم:طول عمرك بتاعت واجب 🌚
شادن: اصلا ي باشا😂المهم ي ادم روق وامشي اعتذر ليها واعمل ليها مفاجأة وكدة ❤️
ايهم:انا حاتصل لي اسيل واخليها تطلعا ليك برة وانت اتصرف
ادم:طيب م قصرتو ربنا م يحرمني منكم
شادن:عيب عليك نحنا اخوان😂❤️
ايهم اتصل لي اسيل وادم ركب عربيتو واتحرك
...................................................... .........
قاعدة في غرفتها وبتحكي لي هبة عن موضوع لين وايمن
هبة:حلو ربنا يسعدهم ياخ💕
اسيل:متضايقة صح؟
هبة:اشتقت ليهو ي اسيل وهو ولا فكر يتصل لي حتى
اسيل;حيكون زعلان ي هبة اديهو وقت
قاطع كلامهم صوت ايمن وهو بنادي اسيل طلعت ومشت ليهو في غرفتو
ايمن:عارفة انك احلى اخت في الدنيا دي❤️
اسيل: ممم حاجة بالشكل دة 😂❤️
ايمن:لين حكت لي ومبسوط منك جدا ربنا يخليك لي❤️
اسيل:ويخليك حبيبي بس ي ايمن لازم تاخد خطوة جادة وتمشي تخطبا م ظريفة لحد عرسي وكدة خصوصا لاني فاتحتهم في الموضوع
ايمن:بالجد طيب خلاص تمام حاكلم ابوي
اسيل: اي حلو ❤️✔️
طلعت من غرفة ايمن تلفونا ضرب وكان ايهم
اسيل:ايهم ي ايهم
ايهم:اسيل ي اسيل ازيك
اسيل:تمام الحمد لله وانت
ايهم:بخير وعافية عايني عايزك في حاجة
اسيل:سامعاك
ايهم:ادم جاي علشان يراضي هبة طلعيها الحديقة برة لحد م يصل
اسيل;طيب لمن يصل رن علي ووريني
ايهم:تمام
طلعت غرفتها وقالت لهبة انها زهجانة واحسن يطلعو يقعدو في الحديقة طلعو وقعدو في القعدات
هبة:بكون بعمل في شنو هسة ؟حيكون اكل ؟حينوم عادي كدة وانا زعلانة منو ؟من غير م تحس دموعا نزلو وتلفون اسيل رن
اسيل:هبة م تبكي ثواني وجاياك
دخلت البيت وفجاة هبة جاها صوت ادم وقال :ويجيني كيف النوم وانتي م معاي؟
اتلفتت ع صوتو فضلت تعاين ليهو وهي ساكتة
ادم;م اشتقتي لي؟
هبة:لا
ادم جا وقعد جنبها ومسك ايدها :م تكوني قاسية كدة
هبة: انا هنت عليك ي ادم ودي الحاجة الحارقة قلبي💔
ادم:عمرك م تهوني علي ي قلبي اوعي تفكري كدة ❤️وعلشان ترضي علي ي ستي بلاهو السفر طالما بزعلك كدة ❤️
هبة:متاكد وشغلك؟
ادم:انتي اهم من اي حاجة في الدنيا ي هبة ❤️والشغل حاسافر وارجع قبل عرس ايهم واكون جهزت كل حاجة وننتقل هنا خلاص❤️
هبة:بحبك ي ادم😭❤️
ادم وهو بضمها عليهو:وانا اكتر ي روح ادم❤️
بعدها هبة دخلت ولقت اسيل منتظراها في الصالة
اسيل:جاية تودعيني؟
هبة; كنتي عارفة صح 😂
اسيل:اي اي😂
هبة:طيب ي ستي مع السلامة وهدومي والعربية حاخليهم هنا اصلا حاجيك راجعة😂❤️
ودعت اسيل وطلعت ركبت مع ادم لقتو جايب ليها شكلاتات وبوكيه ورد❤️🌹رجعت معاهو البيت وهي مبسوطة جدا ....سلمت على اميرة وحسن واعتذرت على تصرفا وكلهم قالو ليها دي غلطة ادم 😂❤️بعدها شادن عملت جلسة ظريفة في الحديقة وقعدو يتونسو
هبة:اسيل دي شخصية جميلة جدا ي بختك بيها ي ايهم ❤️
ايهم:ممم عارف عارف😂❤️
هبة:لازم تكون عارف😂كانت بتخفف علي وتقول لي ادم بيحبك وفي نفس الوقت لين صحبتها كان عندها مشكلة وقفت معانا الاتنين يعني هي انسانة رهيبة بمعنى الكلمة وقلبها ابيض❤️
شادن:اصلا هي قلبها كبير ربنا يسعدها🌹❤️
ادم:وعرفت تختار ي اخوي😂🌹❤️
فضلو يتونسو مسافة وبعدين دخلو
اسيل:
اليوم كان كئيب كبداية ..مشكلة هبة من جهة وبعدين موضوع لين ،،كنت بحاول اخفف عن هبة واقول ليها انو ادم بيحبها لانو حقيقي واضح حبو،ليها لمعة عيونو وهو بتكلم معاها لحظة العقد كفيلة بانها تقنعني بحبو ليها ❤️وكنت متاكدة من انو حيراضيها بطريقة ما ❤️كلماتي وانا بحاول اخفف عن هبة واثقة تماما اني لو كنت محلها م كنت حاقتنع ،،لانو المشكلة لم تحصل للانسان بيفكر بقلبو م بعقلو وانا وقتها كنت حاتصرف نفس تصرف هبة واحتمال بزيادة لانو اكعب حاجة انك تزعل من زولك البتريدو والبتهرب ليهو من كل حاجة مضايقاك فما بتعرف تهرب لمنو من بعدو 💔وانا قاعدة في الغرفة وبلعب بالتلفون فجأة ايهم اتصل لي ..
ايهم;اسيل شكرا لانك في حياتنا كلنا ❤️
اسيل: عفوا بس السبب ايه😂❤️
ايهم: لانك بتكوني موجودة متى م احتجنا ليك وبتنقذي الموقف💜
اسيل : ولو م وقفت مع اصحابي حاقيف مع منو🥀❤️
ايهم:ولا زول..خليك موجودة دايما نحنا م بنبقى بدونك🖤✔️
اسيل:انا موجودة دايما ي ايهم 💕
ايهم:
كنت مبسوط وانا بسمع في كلام هبة وشايف حب كل عيلتي ليها❤️دايما كانت بتسيطر ع المواقف بطريقة بسيطة وتخلي الحواليها مبسوطين❤️احتمال بساطتها دي هي الخلت الكل يحبها وخلتني اقع ليها بالطريقة دي.. لم اتصلت ليها واثناء الكلام قالت لي لو م وقفت مع اصحابي حاقيف مع منو اتوجعت جدا لمجرد انها بتفكر فيني كصديق؟طيب حاتحمل كيف بعد م تكون،معاي وتعاملني بنفس الطريقة،،بس كلو يهون قصاد شوفتها قدامي كل يوم❤️كان نفسي اقول ايها انا م ببقى بدونك بس كالعادة كنت متحفظ ع مشاعري وم عايز اطلعها في الوقت الغلط عشان م اخرب كل حاجة ..كنت مشتاق لشوفتها جدا فنمت وانا بعاين لصورتها بتاعت يوم الخطوبة❤️
........................... ..............................................
صحت الصباح بتلفونها وهو بضرب ردت وهي مغمضة
اسيل:هممم الو
اميرة:سولا حبيبتي صحصحي معاي
اسيل:اي ي خالتو
اميرة:عايزين نبدا الشيلة وبتاع وانا لسه مصرة انك تجي معانا وتختاري حاجاتك بي نفسك
اسيل;حاضر ي خالتو حاجهز نفسي وانتو اغشوني
اميرة: يحضر ليك الخير حبيبتي❤️
قفلت من اميرة وجهزت نفسها كانت لابسة جيب شورت واسع اسود وقميص شك اسود ولبست جزمة كبدية عملت شعرها كعكعة وطلعت لي اميرة وهبة وشادن لم،جوها
هبة:اسيل بعد ادم يسافر انا حاجي اقعد معاك شايفاك م شغالة بموضوع الحبس دة 🙂
اسيل: تنوري طوالي ،،عماتي برة السودان وكدة فحيجو قريب العرس وانا المواضيع دي م بعرف ليها
اميرة:انا زاتي حاجيك اصلا انتي زاتك بتي❤️
لفو،في السوق مسافة بعدها رجعو ،،لم وصلت البيت من التعب تاني طلعت نامت استمرو في موضوع الشيلة لحد م ايمن كلم ابوهو بي لين وابوهو،م كان عندو مانع وطلبو يد لين من عبد الله واداهم موافقتو فتاني اسيل كانت بتمشي السوق مع ايمن علشان تختار حاجات الخطوبة
كانت ايام متعبة جدا ليها بس رغم كدة كانت مبسوطة ❤️
ايمن ولين طلعو واختارو دبلهم وفستان الخطوبة كان هدية من اسيل 💕
اسيل رفضت انها تبدا قعدة الدخان قبل خطوبة لين وايمن لانها كانت مصرة انها تحضرا😂❤️
ويوم الخطوبة من الصباح كانت شغالة تجهز في الحاجات ولفت في السوق مسافة لحد م لقت ليها فستان هادي اسود بي رمادي ،،وشوز واطي اسود ،،رجعت البيت كانت جعانة وتعبانة ففضلت انها تنوم،،صحت ع صوت محمد البقول ليها يا بت قومي حنتاخر ،،فتحت عيونها واستوعبت انها حتى م صحت للغدا من التعب ،،فدخلت جهزت نفسها وعملت شعرها كعكة مرخية وفي خصل كانت نازلة ع جبينها عملت ميك اب خفيف وطلعت لقت العربات واقفة برة ،،هي كانت حتركب مع ايهم فركبت وكلهم اتحركو
وصلو بيت ناس،لين الكان مرتب بطريقة جميلة ،،قعدو مسافة لحد لين جات نازلة بفستان لونو بني غامق فيهو اشكال بفوق ومن تحت منفوش شوية وجزمة كعب افتح من درجة الفستان🤎شعرها كان مسرح بطريقة جميلة ولابسة تاج صغير ع راسها ،،كانت حلوة جدا وايمن كان بعاين ليها وعيونو بتلمع بي حب❤️اسيل كانت مراقباهم وبتضحك وايهم مراقبة وهو مبتسم 💕
لحد م ايمن ولين لبسو الدبل وايمن همس ليها بحاجة في اضانا وهي كانت بتتخجل ،،كلهم باركو ليهم وكانو مبسوطين جدا،،اسيل حست بلفة راس فجاة وم كانت قادرة تقيف ايهم كان مركز معاها وانتبه لترنح خطواتا وهي بتطلع من الباب من غير م حد يلاحظ ليها لحقها وفي اخر لحظة حاوطا بايدينو قبل م تصل الارض..❤️
"مدينون نحن لمن كانو في كل مرة بمثابة حبل نجاة انتشلنا بعد ان كاد الغرق يهلكنا 🥀🖤"
لها بقية💕
