ملمومين كلهم في بيت ناس ريم والفرحة باينة ع وشوشهم ❤️وائل كان متوتر جدا لانو م اتكلم مع ريم ولا حتى عبر ليها عن مشاعرو وادم كان واقف جنبو وبقول ليهو اليشوفك بتقول لايهم م تتوتر م يشوفك هسة ي ابني اثبت ياخ يقطع الحب وسنينو😂وائل قال ليهو م وقتك نهائي انت في عرسك كنت مسترخي علشان عارف زولتك بتريدك ومحنك معاها ليكم زمن م تشغلا لي هسة😂،،قطع كلامهم صوت ماجد وزياد
ماجد: بطلو نقة خلاص
زياد:البت شوية وتجي طالعة خلو الكلام الكتير
مزن وشادن كالعادة ماسكين الدبل وواقفين😂❤️لحد م ريم جات نازلة وهي لابسة فستان عنابي ضيق لحد الخصر ومن تحت منفوش مطقماهو باكسسوار رمادي وشبط كعب رمادي غامق وخاتة الطرحة من نص راسها وعاملة ميك اب هادي فضل سرحان فيها وادم بيلكزو بي ايدو وماجد وزياد بيضحكو 😂❤️..جات وقفت جنب وائل وهي مدنقرة راسها شادن كانت جنبها قرصتها في ايدها وقالت:اتلحلحي ي بت م تدنقري كدة🌚رفعت راسها وظاهر الخجل في ملامحها ،،ماجد اتصل لي ناس ايهم مكالمة فيديو وكانو متابعين تفاصيل الخطوبة ،،وائل مسك الدبلة والمحبس من مزن ولبسهم لي ريم وريم كانت متوترة وشالت دبلة وائل من شادن ولبستا ليهو ..اهلهم بقو يزغردو وجو باركو ليهم .. وماجد مد التلفون لي وائل وريم وايهم واسيل باركو ليهم ❤️
بعد خلصو من مراسم الخطوبة وائل كان طالع مع ريم وقال للشباب:م تنسو بكرة بعد ايهم واسيل يجو زي م اتفقنا حنمشي المزرعة
ساق ريم وطلعو ع العربية وصلو مطعم ظريف وهادي نزلو وقعدو ووائل بدا في الكلام:ريم صح نحنا م لقينا زمن نتكلم فيهو قبل الموضوع م يبقى رسمي بس انا م كنت حابب اتكلم معاك قبل م يكون في رابط حقيقي بيناتنا ،،لاني شايف قصص الحب من غير خطوة جادة حاجة مرهقة وبتستنزف مشاعرنا طبعا اكيد حتفهمي انو كلامي ناتج من تجربة فاشلة بس بعيدا عن دة كلو انا بحبك ي ريم بحبك وم كنت عايز اخاطر بخسارتك علشان كدة اتقدمت ليك ع طول❤️
ابتسمت والخجل باين ع ملامحها:وانا م عندي مانع ي وائل
ابتسم ع خجلها وقال:وافقتي ليه؟
ريم:مم ااا لانو
وائل:لانو شنو؟
ريم:كدة لاني برضو عايزاك❤️
ابتسم ع طريقة خجلها ولعبها باصبع ايدينها وقال:م مشكلة حتتعودي علي مع الايام كفاية انك حاليا معاي❤️
ــــــــــــــــــــــــــــــــــــــــــــــــــــــــــــــــــــــــ
ايهم واسيل قاعدين في الكافيه
اسيل:ي الله كانو حلوين شديد ي ايهم ي ريت لو حضرناها معاهم
ايهم:ولا يهمك ي قلبي راجعين بكرة خلاص وحنعمل موضوع معاهم
اسيل:طيب تمام
ايهم وقف ع حيلو ومد لاسيل ايدو : بم انو الليلة اخر يوم خلينا نستمتع اكتر ❤️
مسكت ايدو وفضلو لافين مسافة اخر حاجة رجعو ونامو صحو الصباح بدري اخدو كذا جولة وبعدها ركبو المركب ورجعو ..وصلو شقتهم ودخلو اسيل اتعلقت في ضهر ايهم من ورا
اسيل:ايهم انا بحبك شديد ع فكرة❤️
ايهم لفاها لحد م جات قدامو ضماها عليهو وقال: وانا بحبك جدا ي قلب ايهم انتي
اسيل:ربنا يخليك لي🥲❤️
ايهم:ويخليك حبيبي يلا نفطر علشان انا تعبان وعايز انوم
اسيل: تمام يلا
جهزو الفطور وبعد خلصو دخلو نامو ..ايهم صحى صلى الضهر وصحا اسيل صلت وجهزو نفسهم اسيل كانت لابسة بنطلون ابيض وقميص منقاوي غامق لبست اسبورت ابيض ورفعت شعرها لفوق بمشبك وخلت الباقي نازل ع اكتافا ..ايهم لبس بنطلون جينز وفنيلة بيضاء وجكت جينز ولبس اسبورت ابيض ..وقف مع اسيل واتصورو كتير اخر حاجة لمو شنطهم وطلعو ع العربية ختو الشنط واتحركو ع المطار لقا الشباب الوصلوهم منتظرين سلمهم مفتاح الشقة ومفتاح العربية ودخلو صالة المغادرة ❤️..
ــــــــــــــــــــــــــــــــــــــــــــــــــــــــــــــــــــــــ
قاعدين في صالة بيتهم وبيتكلمو
عبد الحميد:حسن دة عازمنا عندهم بعدين لانو ايهم واسيل حيجو الليلة
ايمن:واخيرا اشتقت ليها ياخ
محمد:كلنا والله
عبد الحميد:وخلاص تبدو تجهزو موضوع العرس وكدة
ايمن:ان شاء الله
محمد: الحيمشي ليهم في المطار منو؟
ايمن:والله هم طيارتهم كانت الساعة 1 يعني حيصلو حوالي الساعة 6 كدة ووائل قال انو حيمشي ليهم
محمد: طيب تمام
ايمن:وفي موضوع المزرعة بتاع يوم الخميس دة
محمد: اي ادم كان حكى لي
عبد الحميد:طيب حلو عندكم مواضيع وكدة
ايمن:م حتمشو معانا ي حاج
عبد الحميد :لالا دي مواضيع شباب انا حامشي لي حسن بس
ايمن :طيب يلا لي بعدين
ــــــــــــــــــــــــــــــــــــــــــــــــــــــــــــــــــــــــ
محمد وصل الشركة ودخل مكتب لين وصفاء ولقاهم بيتكلمو في موضوع جية اسيل
محمد : ,اسيل دي الترند بتاع اليوم 😂
صفاء:اشتقنا ليها والله
لين:لو م كانو حيصلو بالليل كنا جينا ليهم طوالي
محمد:م مشكلة طالعين المزرعة اساسا نقعد فيها كم يوم
صفاء:ظابط جدا
لين:بعد بكرة صح؟
محمد:اي بعد بكرة
بعد م محمد طلع صفاء قالت لي لين :يعني كدة خلاص حنحدد موعد العرس ؟
لين بضحكة:ايي بطلي التوتر دة
صفاء:ليك حق تكوني ريلاكس كدة مخطوبة من قبل العرس بفترة وامورك واضحة
لين:وانتي الم واضح بالنسبة ليك شنو م واثقة من مشاعرك؟
صفاء:لا ياخ م كدة بس متوترة ي لين
لين:حتكوني مع محمد ي بتي عايزة شنو تاني😂
صفاء:اساسا احلى حاجة اني حاكون معاهو 🙈❤️
لين;اخخخ ي كلبه
صفاء: احساس انك م فرحانة لانك حتكوني مع ايمن 🌚
لين:دة كلامك طبعا فرحانة جدا❤️بالمناسبة نهاية الدوام حيجيني مصر يعلمني السواقة
صفاء: اي حلو احسن ليك
ــــــــــــــــــــــــــــــــــــــــــــــــــــــــــــــــــــــــ
كلهم ملمومين في بيت حسن وبيجهزو لاستقبال ايهم واسيل
هبة:واخيرا ياخ اشتقت لاسيل ❤️
اميرة:اي والله اشتقنا ليهم شديد
شادن:وائل قال اتحرك عليهم
مزن:يعني شوية كدة ويصلو حاقطع الكيك
اميرة:هبة امشي ارتاحي ي بتي
هبة:لالا انا كويسة ي خالتو م بيحتاج
جهزو الكيك وطلعو قعدو في الصالة لحد م وائل جا داخل ووراهو ايهم واسيل شادن جرت اتعلقت في ايهم وسلمت ع اسيل كلهم سلمو عليهم بي شوق
حسن:نورتو ي اولادي والله ❤️
اسيل جرت ع ابوها وحضنتو :اشتقت ليك
عبد الحميد:جدا ي بتي والله
ايمن:اميرة ديزني الحلوة❤️
اسيل:ايموني حبيبي انا😂
محمد:حبيبة اخوها اشتقنا ليك
اسيل: اووو ي عريس كتير والله
ايمن:م انا كمان عريس🌚
اسيل:انت معروف من زمان 😂
بعد م سلمو ع بعض قعدو كلهم وشربو الشاي مع بعض واتونسو مسافة لحد م ناس عبد الحميد ودعوهم وطلعو وعبد الحميد قال لاسيل :اتفقي مع اخوانك ديل وحددو لينا العرس ❤️
بعد طلعو اميرة قالت :اطلعو ارتاحو ونتم الونسة الصباح
ايهم ساق اسيل وطلع غرفتو :شقتنا فاضل فيها شوية وتنتهي فحنقعد هنا الفترة دي
اسيل:حلو جدا ولو ممكن نقعد هنا طوالي ❤️
ايهم جراها من ايدها ووقفا قدامو :حنجي ليهم ع طول بس م حنقعد هنا وبعدين قبيل ليه تقولي لايمن حبيبي؟
اسيل:م هو حبيي فعلا 🌚
ايهم وهو بقرصا من انفها:لا ي فالحة انتي عندك حبيب واحد واللي هو انا
اسيل:م انت حبيبي وهو حبيبي برضو😂
ايهم:لا يا زولة م ينفع 🙂
اسيل:خلاص ي ايهم انا تعبانة ياخ عايزة انوم
ايهم:طيب خلاص يلا ارح 😂
كانو تعبانين فنامو طوالي صحو الصباح وعملو الروتين اليومي ونزلو شربو الشاي مع بعض بعدها اسيل وايهم استاذنو علشان يطلعو ع الشركة ويسلمو ع لين وصفاء بالمرة
ادم:طيب جهزو نفسكم بكرة حنمشي المزرعة بتاعت ناس وائل بم انكم م حضرتو الخطوبة وكدة
اسيل:حلو طيب ❤️
ايهم:تمام موضوع ظابط
حسن:هسة انت نازل شغل طوالي ي ايهم
ايهم:لا ي ابوي اسيل طالعة تسلم ع البنات وانا حامشي اسلم ع ناس الشركة ونرجع
حسن:اي احسن
ايهم واسيل دخلو جهزو نفسهم واتحركو وصلو شركة ناس ايهم بالاول ودخلو مكتب وائل بعد م سلمو على الموظفين
وائل:اووو العرسان منورين ❤️
اسيل:العريس المنتظر بنورك والله😂❤️
ايهم:اها عامل كيف مع بت عمتي دي
وائل:كلو تمام جدا بس هي خجولة شويتين بس حتتعود علي🌚❤️
ايهم :هوووي م تخربا لينا 😂
اسيل:بتتكلم ع اساس انك عاقل يعني 🙂
ايهم:وانتي شفتي مني حاجة غير العقلانية؟
اسيل:ايهم م تضحكني عليك الله 😂
وائل: خليهو ي اسيل عايش الدور شديد
ايهم:حتقيفي معاهو ضد راجلك؟
وائل:في النهاية انا صحبها ولا شنو ي اسيل😉
اسيل:اكييد طبعا😂❤️
ايهم:هووي يلا ارح نسلم علي ناس لين وصفاء🙂
وائل:عان بغير مني😂
اسيل:م تشتغل بيهو كتير
ايهم وقف ومسك اسيل من ايدا :طالعين نفطر برة من باب الزوق حاعزمك😂
وائل:كان نفسي والله بس الشغل ضاغط وانت ليك زمن صايع🙂
ايهم:خلاص ي ابني م تتجرس بداية الاسبوع حانزل يلا سلام😂
طلعو من مكتب وائل وايهم ماسك ايد اسيل
اسيل: ايهم كانك بتبالغ في حركات الغيرة تبعك دي😂
ايهم:ابدا ي ستي انتي حاجة بتخصني انا وبس❤️
اسيل:م اختلفنا بس برضو ايمن هو اخوي ووائل اخوك انت وصحبي انا فعادي يعني
ايهم:اي نعم هو عادي بس برضو بغير ❤️انتي عارفة نفسي في شنو؟
اسيل:شنو؟
ايهم;نفسي اشوفك بي حجاب ❤️
اسيل:وانا كان في بالي اني اتحجب ،،يعني بعد م البيئة اتغيرت علي وكذا لفت انتباهي وحبيتو ❤️
ايهم:طيب ي ستي اقرب فرصة نمشي السوق وتشتري اليعجبك❤️
اسيل:طيب ان شاء الله❤️
وصلو شركة عبد الحميد وايهم دخل لعبد الحميد وكان معاهو محمد واسيل اتحركت ع مكتب البنات وقفت قدام الباب وعاينت ليهم كل وحدة كانت ماسكة ملف وقدامها اوراق
اسيل:اشتقنااااااا
لين وصفاء وقفو ع حيلهم وكل وحدة جدعت الاوراق الفي ايدا وجرو عليها وهو بصرخو:اسيييييللل😂❤️
صفاء:قسما بالله اشتقنا
لين:شوق م طبيعي
اسيل زحت منهم وهي بتضحك:حريم اخواني السمحات😂❤️
لين:احم احم
صفاء:سمحة انتي واخوانك والله😂
اسيل:م قاعدة تتخجلي لينا زي لين كويس جدا😂
لين:م تشوفي طولة لسانا دي متجرسة شديد علشان العرس حيتحدد
اسيل:ياخ فرحت ليكم بالجدد ربنا يتم ع خير ❤️
لين وصفاء:امييين
لين:جيتي براك؟
اسيل:لا ايهم في المكتب التاني مع ناس ابوي
طلعو من مكتب صفاء ولين واتلاقو مع محمد وايهم في الممر
محمد:سولا ي سولا❤️
اسيل:حمادة الحلو 😂❤️
البنات سلمو ع ايهم وطلعو كلهم علشان يفطرو في مطعم برة
اثناء م هم قاعدين وبيتونسو
ايهم:ها م نفسكم تحددو العرس وتفرحونا
محمد:كنا منتظرين الاخت دي بس بعد كدة نقدر نحدد
ايهم: لالا تمام ربنا يسهل ❤️
خلصو من الفطور ومحمد والبنات رجعو الشركة وايهم واسيل كانو راجعين ع البيت لحد م تلفون ايهم ضرب وكان وائل
ايهم:ها ي وائل مالك؟كيف ومتين الكلام دة؟طيب انا جايي
اسيل:في شنو ي ايهم؟
ايهم:الشباب كانو طالعين مع بعض وحسام عمل حادث هسة هم في المستشفى
اسيل:لا حولا طيب ارح
وصلو المستشفى ودخلو مستعجلين لقو وائل منتظرهم
ايهم:ها وضعهم كيف؟
وائل:والله كلهم جروح سطحية بس حسام دة عندو كسر في اليد بس كويس الحمد لله
ايهم:لا حولا ارح ليهم طيب
اتحركو ع الغرفة الفيها حسام لقو الشباب ومعاهم كذا بت برا والبنات ظاهر عليهم الخوف وكانهم بيبكو
وائل:ي جماعة اهدو عدت ع خير الحمد لله
روان اول م شافت ايهم جات جارية عليهو وقبضت في ايدو:ايهم انت م شفت منظر العربية وحسام حسام اتضرب شديد وكانت بتبكي
ايهم:روان قولي بسم الله هو كويس حاليا م تخافي
وائل عاين لاسيل الباين من ملامحا انو الموضوع م عجبا
وائل:اي اهدو ياخ هسة الدكتور حيلف ليهو ايدو ويطلع
رائد:ايهم ي حبيبنا باللخمة والله نسينا نسلم عليكن انت والمدام حمد لله ع السلامة ياخ ❤️
ايهم:الله يسلمك ي رائد ولا يهمك ياخ
رائد:مرة اخوي ازيك؟
اسيل ابتسمت بالغصب وقالت ليهو:حمد لله والله وكفارة ليكم
ايهم انتبه ياداب ع روان الواقفة جنبو لسه زح منها ورجع وقف جنب اسيل من غير م زول يتكلم مع التاني
بعد مسافة الدكتور جا طالع وقال ليهم تقدرو تدخلو ليهو بعد كدة والف سلامة ليهو
كلهم دخلو ولقوهو راقد وايدو ملفوفة
ايهم:شنو ي ابو الشباب ياخ الف سلامة عليك
حسام:العريس الله يسلمك يارب
كلهم حمدلو ليهو السلامة
حسام :يعني مشية المزرعة راحت علي
وائل:ولا يهمك قوم بالسلامة انت واظبط ليك اجمد طلعة 😂❤️
روان:حاصور ليك لايف ولا يهمك وايهم زاتو حيعزك بالصور
ايهم:اي ي باشا م بنقصر منك
رائد:ي جماعة بالهجمة زاتو م فطرنا انا حانزل اجيب اكل
ايهم :خليك قاعد انا حانزل اجيب واجي
روان; دقيقة ي ايهم انا نازلة معاك عايزة موية ورصيد علشان اضرب لي ناس البيت
ايهم عاين لاسيل الكانت رافعة حاجب واحد وهي بتلعب بتلفونا بين ايديها
وائل جاهو اتصال من الشركة واستاذن منهم علشان يطلع
اسيل:وائل استنى انا طالعة معاك وصلني الشركة لي ناس لين وعاينت لحسام حمد لله ع السلامة والف لا بأس عليك
وائل كان بعاين لاسيل مرة ومرة لايهم واسيل طلعت قدامو من غير م تتكلم مع ايهم وصلت العربية وركبت وهي بتتنفس بسرعة غمضت عيونا واتكت ع المقعد لحد م وائل جا
وائل:اسيل ليه طلعتي كدة من غير م تتكلمي مع ايهم
اسيل:والله هو لو فاضي كان اتكلم معاي
وائل:اسيل انا فاهم انك متضايقة من حركات روان بس لو لاحظتي هي الفارضة نفسها يعني ايهم م عندو دخل
اسيل:م عارفة ي وائل بس م قدرت اقعد زيادة لاني كنت ممكن اخنقا عادي
وائل:شرسة شديد انتي😂
اسيل:اسكت مني ياخ
وصلا الشركة وقبل م تنزل قال ليها:م تظلمي ايهم ساي وروقي تمام
اسيل:طيب تمام
نزلت من العربية وهي داخلة رفعت تلفونا ولقت كذا مكالمة من ايهم والتلفون كان صامت رجعت الصوت و م رجعت ليهو ودخلت المكتب تبع البنات
لين:شنو يا ليه جيتي راجعة ؟
اسيل قعدت ع الكرسي وقالت :اصحابو عملو حادث مشينا ليهم في المستشفى وانا رجعني وائل
لين:لا حولا وهم كويسين؟
اسيل:اي الحمد لله بس واحد ايدو مكسورة
صفاء:سلامتهم ياخ وانتي ليه جيتي ؟م كنتي تقعدي وترجعي مع ايهم
اسيل:روان الكريهة دي مبارية ايهم من مكان للتاني وانا زهجت منها وجيت
لين;عويرة انتي تخلي ليها راجلك؟
صفاء:اسيل جنيتي؟من متين وانتي بتتنازلي عن حاجاتك لم تتنازلي عن راجلك؟
اسيل:هو لو عايز كان قدر يبعدا عنو اتدخل ساي انا ؟
لين:الموضوع م محتاج انك تتصرفي بكبرياء عادي تزحيها وتمسكي راجلك عليك
اسيل:لو هو كان ابدا ردة فعل كنت انا وقفتها عن حدها لكن م حاتدخل ساي وهو عاجبو لصيقها فيه
صفاء:تمام يمكن معاك حق في حتة ردة الفعل دي بس الود بكون مخلوع من الحادث وخايف ع صحابو عادي م تركزي مع البت دي ايهم بيحبك ي اسيل❤️
اسيل:طيب انسونا من دة عايزة امشي السوق ووصلوني بيتنا بعد كدة
صفاء:م حترجعي بيت ناس ايهم
اسيل:لا اشتقت لي ناس بيتنا
لين:راسك قوي ي اسيل اها عايزة تشتري شنو؟
اسيل:طرح وباندانات وكذا يعني
صفاء:ي الله حلو ❤️
لين:واخيرا ليك زمن كل م ارسل ليك صورتي بتقولي لي اللون دة عجبني والحجاب دة ظابط وبتاع😂❤️
اسيل:اي يلا نطلع طيب
اتحركو ووصلو السوق واختارت كذا طرحة ومعاها باندانة طقم معاها بعدها البنات وصلوها بيتهم ودعتهم ودخلت طلعت غرفتها واترمت ع السرير تلفونا رن عاينت ولقتو ايهم
اسيل:اهلين
ايهم:اسيل وين انتي هسة؟
اسيل:في بيتنا ليه؟
ايهم:بيتكم؟ومن غير م تكلميني ي اسيل؟
اسيل:لو كنت مركز معاي كنت كلمتك بس معلش م انت م فاضي
ايهم:م فاضي بتلمحي لشنو انتي؟لو قصدك روان فانتي شفتي براك كانت مخلوعة وم قدرت اقول ليها حاجة وهي القالت نازلة البقالة م انا السقتها معاي
اسيل:لو كنت عايز تبعدا عنك كنت اتصرفت ي ايهم م تبرر لي
ايهم:انتي شايفة شنو يعني انا عاجبني قربها وحركاتا؟
اسيل:انت ادرى والله بس تصرفاتك م بتدل ع غير كدة
ايهم:تمام ي اسيل اي مرتاح ليها وبحبها كمان في حاجة تاني؟
اسيل;ابدا تتهنو
وقفلت الخط في وشو
جدعت التلفون في السرير ودخلت الحمام وهي زعلانة جدا طلعت واترمت ع السرير حاولت م تبكي وقالت:انا مافي زول بلعب معاي روان حسابا عندي وايهم خليهو يستنى حاوريه يحبها كيف
رفعت تلفونا وضربت لي لين وصفاء وحكت ليهم
صفاء:زعلتي الود منك ي مسيخة
لين:م كنتي تتبايخي كدة ي بت
اسيل:م علينا المهم البت دي بكرة طالعة معانا المزرعة
لين;الوسخة الما عندها دم
صفاء:فكوها لي وانا اديها علقة ظابطة
اسيل:والله لو قلت ادبا انا الحادقها خليها تستنى بس🙂
لين:م حتتكلمي مع ايهم ؟
اسيل:لا م حاتكلم
صفاء:قاسية ياخ😂
قفلت من البنات ودخلت المطبخ علشان تجهز الغدا لحد م اهلها يجو
لها بقيـة
