" كنت كل يوم اغرق فيك ي جميلتي حتما انني وصلت للقاع..كنت ادماني الذي لا يسعدني الشفاء منه ،،احبك حتى النخاع❤️"ايهم
لاحظت لاسيل كانت خاته ايدها ع راسها ومفتحة بالعافية ،،الكل كان مركز ع المباركة ومشغولين وم انتبهو ليها ،،بس انا اصلا عيني م فارقتها ،،انتبهت ليها وهي طالعة وخطواتا م متوازنة لحقتها وفي اخر لحظه مسكتها قبل م تقع وتحصل الارض ،،كنت خايف عليها جدا وقلت ليها بلهفة :اسيل فتحي عيونك انتي سامعاني؟
فتحت عيونها براحة وقالت لي راسي لافي بي م قادرة اقيف ،،سندتها وركبت العربية واتحركت ع المستشفى وانا قلبي في يدي كنت كل شوية بعاين ليها واقول ليها اسيل شوية وحنصل ،،وصلنا وم كانت قادرة تمشي زي الناس فضلت مثبتة لحد م دخلنا والدكتور طلب ليها فحوصات ودخلنا غرفة علشان اسيل ترتاح ،،بعد مسافة جا شايل النتيجة وقال ليها انتي الليلة اكلتي حاجة؟هزت راسها بمعنى لا ،،قال ليها فقدتي سوائل وجسمك مرهق جدا وحتى دمك ضعيف حاليا حاديك دربات وفيتامينات تاخديها علشان م تتعبي تاني لي قدام ،، الممرضة جات وعلقت ليها السيروم وانا متابعة بي نظراتي ،،كانت تعبانة شديد حتى انها غفت من غير م تشعر ،،تلفوني ضرب وكان محمد سالني انت واسيل وين م ظاهرين حكيت ليهو وقال لي انتو في ياتو مستشفى؟ وصفت ليهو وطلعت من المستشفى
ــــــــــــــــــــــــــــــــــــــــــــــــــــــــــــــــــــــــــــــــ
اسيل:
فتحت عيوني ولقيت الناس دي كلها حواليني ،،ابوي وعمو حسن وعم عبد الله وخالتو اميرة وسوسن لين وصفاء ومحمد وايمن وادم وهبة وحتى ناس شادن ،،عيوني كانت بتفتش عليهو بس م كان في م ممتذكرة انا نمت متين وهو طلع متين ،،كلهم كانو مخلوعين وابوي قال لي كدة ي اسيل تتعبي نفسك للدجة دي؟قلت ليهو بس انا كويسة محمد قال لي ليه م قلتي انك م اكلتي حاجة ينفع تتعبي روحك كدة؟ قلت ليهم والله انا كويسة م تخافو ،،كلهم حمدلو لي السلامة وبعد مسافة ايهم جا داخل وفي ايدو اكياس ختاهم وقال للباقين ارجعو ارتاحو الدرب شوية ويخلص انا حارجعا البيت ،،ادم ساق ناس ابوهو وطلع ومحمد طلع يوصل ابوي وايمن مشى يوصل ناس لين ،،جا قعد جنبي وفتح الاكياس،كان جايب فيها اكل قلت ليهو ايهم م لي نفس والله ،،قال لي م هو م ع كيفك ي ستي حتاكلي يعني حتاكلي ،،قعد وبقى ياكل فيني لانو يدي معلق فيها السيروم ،،قلت ليهو كفاية شبعت طلع لي عصير جوافة وقال لي اشربيهو ،،اهتمامو بي عجبني جدا وزاد مدى حبي ليهو ❤️بعد الدرب خلص كنت احسن من زمان وقدرت اقيف ع حيلي اتحركنا ع العربية وركبنا في الطريق قال لي م تجي ع نفسك اكتر من اللازم وخلي بالك من اكلك م ممكن تكوني مهملة للدرجة دي والشيلة دي بتموها ناس امي م تطلعي تاني ،،هزيت ليهو راسي واتكيت ع الكرسي فضلت مغمضة لحد م وصلنا البيت ناولني كيس قلت ليهو دة شنو؟قال لي حاجات بتحبيها❤️دخل معاي البيت وانا طلعت غرفتي وبعدها هو اتحرك ،،فتحت الكيس لقيتو جايب لي شيبس وشوكلاتات ابتسمت وختيتو ودخلت غيرت ملابسي ،،بعدها ابوي ومحمد وايمن جوني في الغرفة وكل واحد بيعاتب فيني بجهة بعد م اقتنعو اني كويسة حتى طلعو 😂❤️
شلت تلفوني ورسلت لايهم " شكرا لانك كل مرة بتهتم بتفاصيلي وشكرا شديد لانك بتسعدني بالحاجات الانا بحبها ❤️وشكرا ي سيدي لانك كنت معاي قبيل وساعدتني ممنونة ليك جدا ي ايهم حقيقي انت انسان لطيف شديد وشكرا لانك في حياتي ❤️" بعد مسافة دخل وقرا رسالتي ورد علي "انا لو بيدي م اخلي السعادة تفارقك ،،وي ستي انا الممنون ليك لانو في انسانة جميلة زيك في حياتي،،ويسعدني جدا اني اهتم بتفاصيلك لانو انتي اسيل ي اسيل❤️" فضلت اقرا الرسالة دي اكتر من مرة وفي النهاية قلت ليهو ربنا يخليك 💕قال لي ويخليك ي رب ،،نومي بعد كدة م تتعبي نفسك،،رديت ليهو بي كويس تصبح ع خير قال لي تلاقي الخير ي ستهم❤️قفلت التلفون ونمت وانا مبسوطة بوجودو في،حياتي ❤️✔️
الصباح صحيت بصوت لين وصفاء وهم بقولو لي ي بت قومي انتي عروس،،فتحت عيوني وقعدت في نص السرير وقلت ليهم :نعسانة زحو لي انوم
لين قالت لي بطلي ي بت وقومي ادخلي الحمام وانزلي تحت امي معانا ومنتظرنك وبعد شوية نسيبتك حتجي فقومي 😂❤️
قمت ودخلت الحمام استحميت ولفيت شعري ونزلت سلمت على خالتو سوسن وبدو موضوع الدخان وكدة
ــــــــــــــــــــــــــــــــــــــــــــــــــــــــــــــــــــــــــــــــــــــ
ايهم:
صحيت الصباح لبست وطلعت لقيت امي وهبة طالعين قلت ليهم ماشين وين؟قالو لي لي اسيل نظام الحبس والامور المعتادة دي قلت ليها ي امي بس اسيل دي عيانة م تخلوها تتعب والامور دي مافي ليها داعي هبة بقت تضحك وتلعب لي بحواجبا😂وامي قالت لي م تخاف مرتك م بتجيها عوجة والامور دي عادات وتقاليد معروفة واسيل م اقل من زول علشان م تتعمل ليها،،ضحكت وقلت ليهم تمام وطلعت ع الشركة ،،بالي كان معاها فكرت اتصل ليها بس تاني قلت م استعجل واتصل ليها بعدين دخلت مكتبي كان عندي اوراق في ايدي خلصتها فقدت وائل لانو دايما كان بجي وبتونس معاي ويعمل حركاتو ،،طلعت من مكتبي ومشيت مكتبو لقيتو متكي ع الكرسي ومغمض عيونو
ايهم:السيد وائل شنو لكن مختفي كدة ؟
فتح عيونو وحاول يبتسم بس،باين الالم ع ملامحو : اهلين ي ايهم تعال اقعد
ايهم: في شنو ي باشا
وائل :مافي شي ي ايهم تعبان شوية
ايهم:لسه الموضوع القديم داك ؟
وائل وهو بتنهد :للاسف ي ايهم
ايهم:حتتجاوز متاكد شيل الصبر بس
وائل:باذن الله ي صحبي ❤️ها اسيل بقت كيف ؟بعد امس
ايهم: احسن الحمد لله 💕
وائل: طولت منها حاتصل ليها بعدين وحركات الغيرة دي بعيد مني بالله😂
ايهم:لا ي باشا عادي😂
ــــــــــــــــــــــــــــــــــــــــــــــــــــــــــــــــــــــــــــــ
قاعدين في الفصل وباين الزهج ع ملامحهم م صدقو الفسحة جات واتحركو ع محل الفطور ،،قعدو في بينشات وهم بياكلو
مزن:قلتي لي الليلة حبسة اسيل يخ يلعن المدرسة دي بس
شادن:اسكتي بس انا زاتي ممغوصة خليت امي وهبة بيجهزو علشان يطلعو ليها
مزن:م حنك بنتسداهو في العرس
شادن:لازم لازم
مزن: هي اسيل دي امها ماتت قبل 3 سنة كدة ؟شادن:اي تقريبا ع الرغم من انها محتاجة زول يواسيها بس دايما بتقيف مع الكل
مزن:ربنا يسعدها ي رب❤️
خلصو كلامهم،وتمو باقي اليوم وفي النهاية اتلاقو مع ماجد وزياد اصلا مدارسهم قريبة لبعض ركبو الترحيل بتاعهم ورجعو بيوتهم وشادن من وصلت من تعب اليوم نامت صحت لقت الشغالة جهزت الاكل وامها وهبة لسه م جو قعدت مع ابوها واخوانا وهي زعلانة
شادن:يعني ي ايهم عرسك دة جا في وقت كعب عديل🥲
ايهم:اخخخ م تزعلي ياخ بتعوض😂❤️
ادم:كانت ناوية تمشي معاهم الليلة شكلها بس م لقت طريقة
حسن:ركزي في قرايتك الباقي ملحوق وبتعوضي ايام العرس اجتهدي هسة علشان ايام العرس تاخدي ريست
شادن: مم تمام
خلصو من الاكل والعصر كدة شالت كتبها ومشت لمزن علشان تقرا معاها
شادن:اتخيلي لحد هسة ناس امي م جو
مزن:رفاهيات وحركات 🥲
شادن:ونحنا محرومين بس م حنك ع قول ابوي نجتهد هسة ونرفه ايام العرس
مزن فتحت تلفونا واتصلو لماجد وزياد اتاكدو من انهم بقرو سوا وم صايعين مع الشباب😂وبعدها هم زاتهم بدو يقرو
ـــــــــــــــــــــــــــــــــــــــــــــــــــــــــــــــــــــــــــــــــــــــــــ
اسيل:
اليوم كان جميل شديد بلمة الناس البحبهم ووقفتهم معاي❤️..خالتو سوسن واميرة قعدوني في الدخان وعملو لي كركم وخلطات وخالتو ليلى ام هبة برضو جات وعملت لي مديدة دخن وامور كدة كانت جديدة علي،،صفاء ولين كانو بعاينو لي ويضحكو لانو الدخان دة ضايقني جدا وم قدرت اقعد كتير،،خالتو اميرة قالت لي كفاك خلاص ي بتي قومي اصلا انتي تعبانة وايهم دا موصي عليك😂❤️،،وقتها خجلت وم عرفت ارد عليها والبنات يشيلو ويعملو لي في حركاتهم🙂ع قدر جمال اليوم دة ع قدر م فقدت امي 💔كان نفسي تكون هنا واجرب كل اللحظات دي في وجودا ،،كالعادة م حبيت ابين ضعفي قدام زول ،،بس بعد م كلهم ودعوني وطلعو دخلت الحمام علشان اخد دش بس بكيت مسافة وطلعت كل الجواي💔طلعت من الحمام اترميت في السرير ودموعي م راضية تقيف ،،بعد مسافة الباب اتفتح وكان ايمن ومعاهو محمد
جو لقو ملامحي متغيرة
ايمن: اسيل مالك ي قلبي؟
محمد:فيك حاجة تعبانة لسه؟
اسيل: لالا انا كويسة
محمد: طيب وليه البكا؟
اسيل:نفسي امي تكون هنا 💔
من قلت كدة جو قعدو جنبي
ايمن:اسيل حبيبتي دي حكمة ربنا ونحتا م بنقدر نعترض م علينا الا بالدعاء بس
محمد:امنا هسة في محل احسن من هنا ربنا بيحبها وم غالية ع ربها كلنا اشتقنا ليها بس ربنا يرحمها ويجمعنا بيها في الجنة ❤️
الاتنين حضنوني وسمعنا صوت ابوي :مافي مجال لي؟
فتحنا ليهو،ايادينا وجا علينا حاوطنا كلنا❤️
عبد الحميد:امك فقد حار ي بتي بس دة القدر ودي سنة الحياة كدة ربنا يرحمها وم حننساها اكيد ..بس كتري من دعاءك ليها❤️
بعد كلام ابوي وايمن ومحمد ارتحت شوية ،،نزلت المطبخ عملت قهوة لاني صدعت من البكا 💔وطلعت غرفتي فتحت الواتس ونزلت استوري "الى البعيدة جسدا والقريبة روحا رغم بعدك م زلتي تستوطنين يسار صدري رحمك الله بقدر فقدي واشتياقي لك❤️" قفلت النت وقعدت اشرب في القهوة فجاة تلفوني اتصل عاينت لقيتو وائل
وائل : اسيل ازيك
اسيل: عافية والله وانت
وائل:حمد لله والله ها بقيتي كيف ايهم كان حكى لي انو امس تعبتي
اسيل:لالا احسن الحمد لله
وائل:حمد لله شفت الاستوري بتاعك ربنا يرحمها يارب
اسيل:امين يارب بعدين عايزة اسألك
وائل : اسألي
اسيل:انت مالك اخر فترة ؟م كنت ظاهر ولمن ظهرت البرو بتاع الواتس عاملو خلفية سوداء وونستك قلت وبقيت م تمام حاساك
وائل: لاني حقيقي م تمام ي اسيل
اسيل:ليه؟وبعدين كلو بهون ي صحبي م تشيل هم
وائل: حاحكي ليك لاني تقريبا محتاج احكي
اسيل: وانا سامعاك
على لسان وائل:
انا وايهم كنا اصحاب من نحنا صغار وحتى الجامعة دخلنا نفس الجامعة ،،كنا مرحين واجتماعيين شديد صاحبنا الدفعة سريع وعملنا شلة في وقت وجيز اغلب الدفعة بعرفونا ونحنا بنعرفهم كنا انا وايهم وحسام ومودة ووحدة اسمها الاء شلة في الاول لحد م اتعرفنا ع ناس تانين وكان من ضمنهم روان ومآب ،،روان ومآب كانو اكتر اتنين في الشلة بيحبو المظاهر روان كانت مصاحبة ايهم وبتقشر بيهو ايام الجامعة ومآب كانت صحبتي ،،ايهم كان معتبر روان صحبتو بس انا م قدرت اعتبر مآب صحبتي حبيتها وهي كمان كانت بتحبني ،،الكلام دة ونحنا كنا في 2 جامعة وطول فترة الجامعة كنا سوا بنتشاكل بس دايما بنرجع كنت بحبها وم نفسي تضيع من يدي،،بس بعد م خلصنا جامعة معاملتها اتغيرت وكاني كنت فترة بتاعت جامعة بس وكانت عايزة تقشر بي وتقضي وقت 💔كنت متحمل برودها وتصرفاتا الساذجة جدا وصابر عليها لاني جد كنت بريدا شديد اخر حاجة سافرت لندن مع اهلها من غير م تكلمني حتى وبعد م سافرت اتصلت لي وقالت لي معليش ي وائل نحنا م ينفع نكمل مع بعض انا حاليا في لندن وولد صاحب ابوي طلب يدي وابوي وافق ،،كلماتها نزلت علي وكانها سهم طعني في قلبي 💔م عرفت ارد عليها بي شنو قالت لي وائل علاقتنا م ليها مستقبل انت دفعتي وعمرنا قدر بعض م ينفع استناك تشتغل وتكون نفسك علشان كدة معليش ،،كل العملتو اني قفلت الخط فيها حتى الكلمات م كانت حتوصف احساسي في اللحظة ديك ولا كنت حاقدر اوصل ليها مقدار الانكسار الكان جواي ،،طلعت من حالتي الحزينة ديك بي سبب ايهم كان دايما معاي وم فارقني حتى سافرنا الامارات وعملنا شغلنا هناك ،،هي لو صبرت كنت حاكافح علشانا م هو انا م حبيتا من فراغ ي اسيل اكيد كنت حاعمل جهدي علشان اخليها مبسوطة بس هي كانت بتهتم بالشكليات والمظاهر عمرها م حبتني ،،واهو ي ستي اخر فترة اتذكرت الماضي ،،عارفة ي اسيل انا م زعلان عليها وع خسارتا انا زعلان من نفسي ومن اختياري الكان الغلط ،،لو ملاحظة الكل م بيحب روان لانها زيها وزي مآب همها الاول والاخير المظاهر همها انها تقشر وتلبس احسن لبس وتركب عربية اخر موديل وتطلع مع ولد حلو وعاجب كل البنات علشان مدى اعجاب الناس بيها يزيد ياريت لو كنت بشوف الامور زمان زي م انا بشوفا هسة م كنت سمح لقلبي يحبها 💔
اسيل كانت سامعاهو واتاثرت جدا: حقيقي يعني دايما ورا كل شخصية مرحة بكون في جانب تاني ،،وائل ربنا بيحبك شديد لانو زحاها من طريقك ،،واكيد حيعوضك بالاحسن منها حيعوضك بالبتحبك انت لذاتك م بتحبك علشان مظهرك وقروشك ❤️ربنا لم يبعد عننا حاجة خليك واثق انو حيعوضنا ،،وطعم العوض نساااي ي وائل ❤️حتنسى كل حاجة مرت عليك حتنسى الخذلان العشتو وحتتجاوز اختيارك الكان الغلط ،،صح انا فقدت امي بس ربنا عوضني ب 3 امهات خالتو سوسن واميرة وليلى ❤️عارفة انو الام مكانتا خاصة وم في زول بلحقا بس ربنا عوضني بيهم ،،وانت حيجيك عوضك فم تشيل هم ❤️
وائل:ونعم بالله ارتحت شديد بعد الكلام معاك شكرا ليك❤️
اسيل :ولو ي وائل م بيناتنا❤️
ــــــــــــــــــــــــــــــــــــــــــــــــــــــــــــــــــــــــــــــ
ايهم:
كنت قاعد في الحديقة الخلفية بتاعت بيتنا وانا بقرا في كتاب ومعاي الدفتر والقلم الملون الجابتو اسيل ❤️تلفوني ضرب وكان وائل ختيت الكتاب ورديت عليهو قال لي ي باشا انت وين انا في البيت وم شايفك ،،قلت ليهو تعال في الحديقة الخلفية جا لقاني ماسك الكتاب بقى يتبسم قال لي اسيل خلتك ترجع تصلح علاقتك بالكتب تاني 😉❤️قلت ليهو ممم حاجة بالشكل دة 😂،،قال لي طيب خلي القراية ع جنب حاليا وارح نطلع نلف شوية قلت ليهو شايف مزاجك رايق ،،ابتسم وقال لي الفضل لي زولتك❤️قلت ليهو كيف؟قال لي اتصلت ليها وسالتني مالي متغير وكدة وحكيت ليها وكلامها كان مريح قالت لي طعم العوض نساي ❤️وانا ايقنت انو ربنا حيعوضني وحافضل منتظر العوض دة 🥀🖤 ،،قلت ليهو ونعم بالله وكويس انو مزاجك راق 💛،،قال لي اسيل دي انت محظوظ بيها جدا،،ضحكت وقلت ليهو دة راي الكل باتفاق الفقهاء والعلماء مع بعض😂❤️ضحك وقال لي لانها فعلا زولة حنينة جدا وكلها ايجابية بتعرف تواسيك وهي لي نفسها محتاجة زول يواسيها ،،انا شفت استوري هي خاتاهو عن امها ولم اتصلت ليها متاكد من انها كانت حزينة بس خلت حزنها ع جنب وواستني انا❤️قلت ليهو م شفت الاستوري بس اسيل دايما بتبسط الحوالينها وزي م انت قلت انا محظوظ بيها ❤️قمت وغيرت ملابسي وطلعت مع وائل وانبسطت وانا شفتو بيرجع يعمل حركاتو ويهظر تاني 💛اخدنا لفتنا ورجعت البيت وكنت بفكر في اسيل فتحت الواتس وشفت الاستوري بتاعا ورديت عليهو بي ربنا يرحمها ويغفر ليها ويجعل مأواها الجنة 💕م كانت داخلة فاتصلت ليها ردت بعد كذا جرس
ايهم :البت الانا محظوظ بيها م اكون صحيتك؟
اسيل: لا صاحية بس كنت برة ولم دخلت الغرفة لقيت التلفون بضرب وبعدين مين قال انك محظوظ بي😂
ايهم:كل الناس وحتى انا شايفين كدة 🌚💛
اسيل:ي بختي طيب💛
ايهم :ي بختي انا والله ،،المهم كيف كان يومك م تكوني تعبتي؟
اسيل:لا ابدا م تعبت كان يوم ظريف
ايهم: تمام م تنسي تاخدي حبوبك وتاكلي كويس اهتمي بنفسك لحد م تجي بيتنا واهتم بيك انا واضح انك مهملة شديد
اسيل:مم حاضر ي سيدي حاهتم بنفسي💛
ايهم:طيب يلا في امان الله❤️
اسيل قفلت من ايهم وهي بتضحك ،،كانت بتغكر معقولة يكون بحبها؟ ولا بيتعامل معاها كدة لانها صحبتو شديد وم عايز يخسرها بس م لازم تبني احتمالات من عندها لو هم م اعترف ليها بحبو ،،بطلت تفكير وغمضت عيونا واستسلمت للنوم ❤️
"يوما ما ستاتي اللحظة الذي يخبرك فيها احدهم بمدى حبه لك..سيخبرك انه لطالما كنت احد امنياته التي يتمنى تحققها ،،سيخبرك احدهم انك جئت ع نفس الهيأة التي تمنى ان يجد فيها شخصه المفضل.. يوما ما 🏹🧡"
لها بقية💕
