عاينت لي مسااافه بعدها قالت لي نعم؟ قصدك شنو؟ يعني نحنا جايين لحد هنا علشان نتفرج؟
قلت ليها يمكن ما معروف ، سيد المكتبه قال لي معليش يا أخ طيب قول لي عايز شنو؟ هي إدخلت و قالت ليهو انا جيت قبليهو فكيف تمشيهو قبليني؟ البت التانيه المعاها مسكتها من يدها و قالت ليها مها خليهو يمشيهو ما مشكله، قالت ليها لا مشكله ، لو كان زول غيرو ما عندي مانع لكن دا بالذات ما ح أرضى يمشيهو قبليني، ابتسمت ليها ببرود و قلت ليها شكلها القروش الكان رميتها ليك في وشك ما كفتك ، عايزا ليك موضوع بأي طريقه عشان تخليني انفعل و اتصرف زي ما عملت قبل كدا ، ارمي فيك قروش يعني ؟ ا! قالت لي بضيق: انت ما بتفكر في حاجه غير القروش؟! هسي دا علاقتو شنو بالموقف الفات؟
_علاقتو في انك بتصنعي شي من لا شي هسي في داعي للقصه دي كلها و للإعتراض دا كلو؟
=ايوه في داعي ، و بعدين انت ليه متكبر و شايف نفسك كدا و مبسوط بقروشك دي؟ ....اهاااا ما بلومك والله ، ما ياها دي حركات أولاد ميكي المدلعين ، شغلتكم شنو غير تفرحوا بقروش أهلكم و تفتكروا انو كل الناس جاريه وراكم عشان الكم قرش ديل! حركات الشفع دي خليها عليك الله و افرح بقروشك دي بعييد مني 👋
يمكن لو ما استهديت بالله ما كنت عارف نفسي ح اعمل شنو بعد كلامها المستفز دا ، سيد المكتبه قال لي خلاص يا حبيب ح امشيها سريع و بعديها امشيك انت ، ما اتكلمت معاهو و على طول اتحركت من جنبهم على باب المكتبه قبل ما أخطى أول خطوة برا عتبة المكتبه سمعتها قالت لي ، كلامي حرقك صااااح؟
إتلفت عليها و رسمت ابتسامه مزيفه و بارده على وشي و قلت ليها لا بس ما عندي زمن اضيعو مع شافعه بتاعة ونسات و حركات زيك ، طبعاً هي فهمت قصدي شنو ، اضايقت و اتغاظت شديد تاني لحدي ما وصلت عربيتي ما سمعت صوتها، ركبت و ربطت حزام الأمان و انا بنعل في الصدف البتجمعني بـ البت دي، تقريباً دي المره الـ3 نتلاقى فيها، لكن أول مره كانت وين؟ ....بعد دقايق اتذكرت إني شفتها في قريه من القرى النزلت فيها لمن كنت بفتش على العم صلاح ، في اليوم داك كنت واقف و منتظر العم صلاح يصلني في المكان الوصفتو ليهو، فجأه هي طلعت في وشي سلمت علي و رديت عليها السلام، افتكرت إنها رايحه و عايزا تسألني عن مكان، لكن فاجأتني لمن قالت لي انت الزول؟ عاينت ليها من فوق لتحت و قلت ليها نعم؟!قالت لي الزول الزول! كلامها الغبي زيها خلاني اشمئز منها ، قلت أكيد دي حركات منها عشان تتظارف معاي، لما ما أتجاوبت معاها كتير قالت لي انت مش الزول الرسلك خالي قمر الدين عشان تسوقني لـ .... ما متذكر المكان القالتو لي اسمو شنو، نفيت ليها كلامها و قلت ليها اصلاً انا ما بعرف زول بالإسم دا بس هي كانت مصره تذكرني بزول انا لا بعرفو لا حصل سمعت بيهو و بي كدا اتأكدت انها بالجد مستهبله و دي حركات منها ساي بس خاب ظني لما جا راجل و قال ليها انتي بت....تقريباً قال ليها انتي بت مأمون و هي طوالي ردت عليهو و قالت إنها بتو، بس برضو قلت ما بعيده تكون حركات منها و ظرافه زايده عشان تتكلم معاي ما ياهو حال البنات! قالت لي معليش شكلي لخبطه ما رديت عليها ركبت و دورت عربيتي، دي كانت أول مره اشوفها فيها، تاني مره كانت لما كنت سايق بأقصى سرعه و قربت اضربها هي و المره الكانت معاها بالعربيه لو ما وقفت في آخر لحظه اتناقشت معاي كتييير في اليوم داك ، آخر شي عملتو جدعت ليها كم قرش كدا في وشها و مشيت خليتهم و هسي دي المره الـ3 ألاقيها و شكلها عايزا نفس الموقف يتكرر ، ما عارف ليه بلاقي اشكال زي دي، قرويه فرحانه و متخلفه ساي ، بقيت اشتمها في سري لحدي ما وصلت للقسم الشغال فيهو مراد ، بركنت العربيه و اتصلت عليهو و قلت ليهو انا واقف ليك برا، اطلع، قال لي دقايق يا أحمد عندي مشكله بحلها و بطلع ليك قلت ليهو تمام ، انتظرتو مسافه و لمن زهجت دخلت ليهو جوه، سمعت صوتو و هو بتناقش مع ناس لما قربت منهم سلمت عليهو و عاينت للمعاهو كانوا أولاد يادابهم في مرحلة المراهقه قلت ليهو الشباب ديل مالهم ؟! قال لي ديل مشتبه فيهم في تهمة المتاجره بالمخدرات و هسي عايزني اطلعهم بكل بساطه بحجة إنو أهلهم صعبين و هم خايفين من ردة فعلهم ، اتخيل! !
واصل كلامو و نادى على واحد من العساكر و قال ليهو رجعهم للحراصه لحدي ما نشوف أهلهم وين، واحد من الشباب ديل بكى عديل بدموعو و قال ليهو ما تكلم أهلي عليك الله ما تكلمهم، مراد قال ليهو ما أكلم أهلك معناها ح تقعد معانا هنا لمن تعفن، و بعدين انت ليه ما شلت هم لأهلك لما فكرت تعمل كدا و تسلك الطريق دا ؟
الولد قال ليهو بصوت مكسور و ضعيف كنت مضطر، تجارة المخدرات دي كانت بالنسبه لي مصدر رزق و ضوء في آخر النفق ، من خلالها كنت ح اعيش أهلي احسن عيشه ، مراد قال ليهو مشى الحال يا شاب و نحنا قدرنا نصل لـ فرد من أفراد اسرتك و هم لو مهتمين مفروض حالياً يكونوا هنا متواجدين بيناتنا، الولد قال ليهو بخلعه شنو؟ اتصلت بمنو؟
قبل ما مراد يرد عليهو جانا صوت بت بتقول: محمد؟ !!
كلنا عاينا للناحيه الجاي منها الصوت.....شكل البت ما غريب علي و لمن وصلت عرفتها و اتفاجأت و مراد ذاتو اتفاجأ قال ليها رنا؟ بتعرفي الشاب دا؟
ردت عليهو و هي لسه بتعاين بخلعه للولد الإسمو محمد ايوه دا...دا أخوي .....حصلت لحظات صمت كنا فيها بنعاين لـ بعض بـ حيره و استغراب ، كسر الصمت دا صوت كف في كل الأرجاء ، ما كان كف واحد ، البت دي ضربت أخوها كف و اتنين و قبل ما ترفع يدها و تديهو الـ3 مراد مسكها و قال ليها ما كدا يا رنا ، قالت ليهو و هي بتبكي طيب كيف لو ما كدا؟ عاينت لأخوها و قالت ليهو عارف أمي و أبوي ح يعملوا فيك شنو لو عرفوا؟ قربت منو و مسكتو و بقت تهز فيهو و تقول ليهو شنو البخليك تعمل كدا شنو الوصلك للحاله دي و خلاك تفكر تتاجر بالمخدرات، محمد انت واعي للكنت ح تعملو؟ واعي انت؟ بقت ترغي و ترغي و تهز في اخوها الكان ببكي ، في الآخر اتفك منها و قال ليها بزهج و صوت عالي : شنو الوصلني للحاله دي؟ ما عارفه يعني؟ ما تقولي لي شنو الخلاك تعمل كدا و شنو الوصلك للحاله دي قولي لي شنو الما وصلك للحاله دي ! اديني سبب واحد يخليني ما افكر اتاجر بالمخدرات !، قالت ليهو أمي، أبوي ،أخوانك دا ما سبب كافي؟ قال ليها دا ما سبب كافي، عارفه ليه؟ عشان انا عملت كدا عشانكم عشانكم بس يا رنا، فكرك شوفة أبوي كل يوم و هو طالع من الصباح و داخل المسا دي عاجباني؟ ولا أخواني الما لاقين ابسط احتياجاتهم ولا أمي الـ.....قاطعتو و قالت ليهو لكن دا ما سبب يخليك تمشي و تتاجر بالمخدرات تحديداً، في اشغال كتيره كان ممكن تشتغلها من غير ما تدخل نفسك و تدخلنا معاك في متاهات لو هدفك تساعد أبوي ، ابتسم على الخفيف كدا و قال ليها لو عارفه المخدرات دي بتجيب قروش قدر شنو كنتي انتي ذاتك ح تتاجري فيها و ما كنتي ح تقولي كلامك دا ، سكتت و بقت تعاين ليهو و بتبكي، مراد قال ليهم اهدوا يا جماعه و يا رنا عشانك و عشان أهلك ح اطلعو المره دي لكن اعملوا ليهو حساب و راقبوا تصرفاتو و خلوا بالكم منو ، عاين لـ الولد و قال ليهو لـ حسن حظك انو رنا طلعت أختك.....مراد مشى و بعد مسافه جا راجع و قال ليها بعد دا بتقدروا تمشوا من هنا ، قالت ليهو و هي بتمسح في دموعها شكراً ليك يا مراد ، قال ليها العفو ما عملت حاجه، عاين لـ أخوها و خت يدو على كتفو و قال ليهو ما عايز اشوفك تاني هنا تمام؟ الولد كان منزل راسو و اكتفى بإنو يهز راسو بمعنى حاضر ، بعد ما هم طلعوا قلت لـ مراد سبحان الله القروش دي بتخلي الواحد يعمل المستحيل! قال لي ما القروش يا احمد قول الظروف، ياخي ما شفت كمية الوجع و الهموم الكانت باينه على ملامح الولد دا؟ صغير في عمرو لكن شايل هموم سنين و سنين ،ما بقول انو العملو صح و يمكن هو ماشي بمبدأ أو بمقولة"الغاية تبرر الوسيلة " قلت ليهو لكن منو الح يبرر ليهو الغاية دي خاصة انو سلك ليها طريق ما كويس ؟ قال لي المهم بتمنى انو ما يرجع للشغله دي تاني و كويس انو ما دخل في الغريق بس كان مشتبه بيهو، لكن اتفاجأت شديد لمن عرفت إنو أخو رنا، معقوله؟!
قلت ليهو ايوه معقوله المستحيل شنو؟ و رنا دي ذاتا تطلع شنو عشان ما تقدر تصدق انو أخوها أو تتفاجأ بالحاجه دي ؟قال لي لا ما كدا لكن البشوفها بقول......قاطعتو و قلت ليهو: بقول هي بت ناس مرطبه و أمورهم كلها تمام التمام صح؟
قال لي ايوه بالضبط ، قلت ليهو اصلاً انا من البدايه عرفت هي شنو و جايه من أي بيئه و دا كان واضح من خفتها و حبها للظهور و حركاتها البايخه زيها غير كدا انا حصل شفت بيتهم و عرفت انهم ناس بساط و قدر حالهم ، قال لي متين الكلام دا و ليه مشيت بيتهم؟ قلت ليهو الموضوع ما مهم جيت بيتهم عشان حاجه و بس و اصلاً ما كنت عارف إنها ساكنه هناك، المهم يا فرده البنات كلهم واحد ، كلهم شنو؟ وااااحد ، مراد ضحك و قال لي عمرك ما ح تتغير يا صحبي ، صدقني رنا ما كدا، قلت ليهو ما رنا بس كل البنات كدا خفيفات و منافقات و بتاعات مصالح، المره دي ضحك شديد و قال لي انت البنات ديل متين قعدت ليهن لما تقول كلامك دا؟ من وراي يا ميرغني؟ قلت ليهو لا وراك لا قدامك ، كلهن كدا و دا واضح ما محتاج إني اقرب منهن عشان اعرف و اقرب مثال البت اللقيتا قبل شويه اسمها مها ولا زفت دي و......قاطعني و قال لي أكيد حاولت تتظارف معاك و لو ما عملت كدا معناها حاولت تخلق ليها موضوع معاك عشان شويه شويه تصاحبك و تسحب منك قروش و تستغلك صح؟
بقيت أعاين ليهو بإستغراب قلت ليهو عرفت كيف؟ قال لي ما دا كلامك البتقولوا لي دايماً عن البنات 🤣🤣 أي وحده بتتكلم معاك بتفتكر إنها عايزا تستغلك ، قلت ليهو جد و دا الحاصل، قال لي غيتو يا أبو حميد الله يعينك ، خلينا نتحرك بعد دا ، قلت ليهو يلاااا.........
