في اليوم البعديهو رفقه قالت لي زي السمعه انو مرافي رجعت بيتهم، قلت ليها و اصلاً دا الحيحصل لأنهم عايزين يحققوا معاهم و بس لكن مهما قالوا و مهما نكروا الأدله معاي ، و أبداً ما حيقدروا ينكروا حقيقة انهم بعرفوا عباس الكان موجود يوم الحادثه 💔
بعد شويه سمعنا صوت ضرب على الباب و فجأه جانا صوت صراخ و كواريك لما طلعنا برا لقينا أهلي كلهم واقفين في الحوش و في نصهم منى أم مرافي و معاها كم نفر كدا، كانت بتجوط عشان الحصل أمبارح لبتها لما شافتني اتعصبت زياده جات مندفعه علي عشان تضربني بس محمد أخوي مسكها بقت تتصارع معاهو عشان تحصلني لما ما قدرت قالت لي اسمعيني هنا يا تافه يا وسخه بتي دي أوعك تدخليها في مصايبك و عفانتك، عملت ليك شنو عشان تتهميها اتهام زي دا! بدل ما تمشي تشوفي القرف اللفيتي معاهو داك جايه تورطي بتي! عشان طلعت أشرف منك و ما عملت القرف العملتيهو! غيرانه منها صح؟ يلا موتي بغيرتك و اصلاً شبهك ما شبه صُحبه ما عارفه مرافي دي صاحبتك من أي ناحيه ياخ تف عليك و على اليوم الجمعنا بيكم ، خليتها بتنبز فينا ساي و دخلت جوه.....
_________________
_________
كنت في بيت ناس ليان بتكلم مع خالها المحامي كان اسمو عادل ، قلت ليهو متأكده في حاجه غلط أحمد ما بعمل كدا يعنى ماف طريقه نطلعو بيها من السجن؟
مسح وشو بيدينو و قال لي برضو حاسس نفس احساسك انا محامي و ما حصل لاقتني حكم اتحكم بالسرعه دي خاصة في القضايا الزي دي ، دي أكتر قضايا بتحتاج زمن طويل و اثباتات قويه ، قلت ليهو فعلاً في شي غلط و في حاجه ما مفهومه! يعنى بنقدر نعمل ليهو حاجه عشان يطلع من السجن؟
قال لي ممكن نعمل استنئاف للقضيه و نبدا فيها تاني من جديد ، سكته مسافه بعديها قلت ليهو نبدا من الصفر كدي نمسك القضيه دي وحده وحده ، رنا قالت انها مشت ليهو في الشقه و هو هناك اغتصبها....و لما انت سألتها مشت الشقه ليه، قالت ليك ما مهم و دا ما بديهو حق عشان يغتصبني، قال لي و لما أصريت عليها قالت هي بتعرف أحمد و مشت بس عشان تشوفو، قال لي قانوناً برضو ما عندو حق يغتصبها حتى لو مشت ليهو برجلينها، خليك منها شفت "العاهره "و معليش على الكلمه، لو مشت اشتكت و قالت في زول اغتصبها القانون بجيب ليها حقها، قلت ليهو يعنى انت شاكك انو أحمد اغتصبها؟ قال لي ما شاكي انا متأكد بس السؤال البطرح نفسو اغتصبها ليه؟ و هو اساساً بيعرفها من وين؟ في المحكمه قالت انهم اصحاب و بعرفو بعض، قلت ليهو هم ما أصحاب و بس......و سكته مسافه و هو فهم قصدي ، قلت ليهو خلينا نرجع للقضيه، الأدله الجابتها رنا كانت التقرير الطبي و تحليل الـ DNA و ......و.......و.........و.........قال لي دا كلو كوم و اعتراف أحمد كوم تاني، اها بعد الشفتيهو و السمعتيهو دا كلو ما مصدقه انو أحمد اغتصبها؟ قلت ليهو يمكن مزورين الأوراق دي كلها و......قاطعني و قال لي تحليل الـDNA ما بكذب و فوق دا كلو هو اعترف و دا بحد ذاتو بكون كافي خاصة بعد ما المحكمه عملت فحوصات لأحمد عشان تتأكد انو كويس و ما عندو مشاكل نفسيه أو عقليه خليتو يعترف بحاجه زي دي ، قلت ليهو طيب الشاهد الإسمو عباس دا ما ممكن يكون كذاب ساي؟ غيتو شاكه في كلامو قال انو حاول يمنع أحمد بس هو ما سمع منو ، و لمن انت سألتو قلت ليهو ليه ما حاولت تستعين بزول و تطلب المساعده قال ليك اتصلت على الشرطه و هم فعلاً جوهو على راسهم الشرطي داك كان اسمو منو؟
جات ليان و قالت لي اسمو مراد ، اتخيلي دا صاحب أحمد من لمن كانوا صغار! قادره تستوعبي معاي انو خان صحبو و وقف ضدو! مراد دا أخر واحد ممكن اتوقع منو حاجه زي دي ، لمن شفتو واقف في المحكمه و بشهد قدامنا كلنا تضد أحمد قربت امشي أخنقو لحدي ما يموت ! من غير ما يخجل و يخت قيمه للشي الكان جامعوا بـ أحمد و بينا ياخ أمي دي كانت بتعتبرو زي ولدها عشان هو صاحب أحمد، حسبي الله و نعم الوكيل فيهو و ربنا ينتقم منو و يعذبو في الدنيا قبل الآخره ، قلت ليها بخلعه صاحبو! خالها عاين لي و سكت و اظن نفس السؤال الكان في بالي كان في بالو، ليه صاحب يشهد ضد صاحبو و ليه من البدايه كان مختفي و ما كنا عارفين انو هو الداهم الشقه! المحامي سكت مسافه بعديها قال لي لو افترضنا انو هو شرطي شريف و العملو دا كلو عشان يقيف مع الحق مش ممكن برضو!؟ قلت ليهو طيب ليه ما جا كلمنا ليه كان مدسي مننا لو هو فعلاً كان صادق كان وقف قدامنا و قال لينا الحاصل كدا و كدا ، و بعدين هو ما بعرف رنا فشنو البخليهو يشهد ليها ! اتذكر يا عمو انو في المحكمه قال انو الشقه دي اصلاً مشبوهه و أحمد كان بجيب فيها البنات و بستغلهم مع انو ماف زول سألو من الحاجات دي بس هو قصداً كان عايز يوقع أحمد بدليل انو ما اكتفى بالشافو و بس بالعكس نكت حاجات من زمان و شِهد بيها ضد أحمد ، عاين لي و قال لي اذاً سؤالنا حيكون علاقة مراد بـ رنا شنو؟
قلت ليهو في احتمالين ، يا إما في عداوه حصلت بين مراد و أحمد و هو عايز ينتقم منو و استغل الفرصه دي يا إما هو بعرف رنا و اتفق معاها، قال لي أو يكون هو الخططت لـ دا كلو ، بس نقطة الإغتصاب دي عامله لينا حاجز لأنو اذا أحمد اغتصب رنا معناها ماف زول خططت للحاجه دي، إلا اذا كان هو ما اغتصبها بس أحمد اعترف!
قلت ليهو بس ليه اعترف و الجبرو شنو!؟ ليان قالت لينا قولو الخلاهو يعمل فيها كدا شنو ! حسب علمي و علمك يا مها انو هم بحبو بعض صاح! معليش يا خالو على الكلام دا،ابتسم و قال ليها قولي عادي اصلاً نحنا محتاجين لأدق التفاصيل عشان كدا خلونا نكسر حاجز الخجل دا ما تعتبروني أكبر منكم و تخجلوا تقولوا قدامي كدا تمام؟ قلنا ليهو تمام ، قال لينا يلا احكوا لي علاقة أحمد بـ رنا شنو؟ ليان قالت ليهو شكلهم بحبو بعض و دي أول مره احمد يحب ليهو بت كل البنات الكان بعرفهم ما كان جادي معاهم، ما عارفه الحصل شنو بينو و بين رنا و خلاهو يعمل فيها كدا ، قلت ليها في اسئله كتيره في بالي و المحاكمه دي ذاتا فيها شي غريب يعني ما معقوله يصدروا حكم بالسرعه دي! المحامي عادل قال لينا مراد صاحب أحمد دا اسمو الكامل منو و ساكن وين؟
ليان قالت ليهو اسمو مراد منصور عبد الجليل ، ساكن في المنشيه ، خالها قال ليها أحكي لي عنو أكتر......بعد ما ليان حكت ليهو عن مراد ، قلت ليهم رايكم شنو اقابل رفقه صحبتي و بت خالة رنا عشان اعرف منها الحصل بالتفصيل! قال لي ايوه ممكن بس ما تجيبي ليها سيرة اننا عايزين نستأنف الحكم ، قلت ليها طيب ، في نفس اليوم اتصلت على رفقه في البدايه ما ردت علي بس لما كترت عليها الإتصال ردت و قالت لي خير؟
قلت ليها رفقه كيفك ممكن أشوفك؟ قالت لي ما فاضيه و كانت حتقفل الخط ، قلت ليها عليك الله ما تقفلي الخط عايزا أشوفك ضروري يا رفقه ، والله الموضوع مهم ، رجاء رجاء يا رفقه خلينا نشوف بعض، بعد مسافه قالت لي في شنو؟ قلت ليها لمن نتلاقى ح أحكي ليك، قالت لي طيب نتلاقى وين و متين ؟ قلت ليها بكرا في ( )قالت لي طيب و قفلنا على كدا ، رجعت البيت أول ما دخلت لقيتو فاضي ، اتصلت على أمي و قلت ليها انتي وين ليه البيت فاضي؟
قالت لي في بيت ناس سعاد و هسي جايه على البيت ، انتظرتها شويه كدا لمن جات قلت ليها ليه البيت دا مقفل كدا؟ قالت لي اعمامك و ياسر قبيل كانوا هنا، قلت ليها تاني! ياخ ديل ما عايزين يخلونا في حالنا! لمتين نحنا يا أمي كل ما نسمع إنهم جاين الخرطوم نطلع من البيت عشان نتدس منهم؟ قالت لي ولا حيخلونا في حالنا غيتو اعمامك ديل الله يكفينا شرهم غيتو كما خالك قمر الدين اتصل و كلمني كان جوا و لقوني قاعده في البيت......لحدي المسا كدا خالي قمر الدين جا داخل ، أمي قالت ليهو غيتو أعمامها ديل جننونا عديل ، خالي قال ليها قبيل اتقابلت معاهم و اتناقشنا، أمي قالت ليهو سجمي ديل ما بفهموا ليك نقاش، قال ليها المهم انا حذرتهم و بالحرف قلت ليهم دي أختي و دي بتها و ماف زول فيكم يحاول يقرب منهم و بيتي دا تاني ما أشوفكم تعتبوهو ، قالت ليهو قايلهم بسمعوا الكلام ؟ قال ليها لو ما سمعوهو فـ الشرطه حتكون بيناتنا و هم عارفين الحاجه دي!
المهم انا ليلي داك بقى طويل حتى النوم غلبني ، بقيت أعد في الدقايق عد و انا منتظره بكرا دا متين يجي، رقدت في سريري و عاينت للسقف ، اتخيلي حال أحمد و هو في السجن، يا ربي حيكون كيف! ماكل و شارب! حالياً حيكون صاحي ولا نايم! هه ينوم ؟! ما قادره اتخيل كمية الوجع و الخذلان الحيكون حاسي بيهو ، كل ما أغمض عيني و اتذكرو قلبي بوجعني و من دون ما أحس دموعي جات نازله ، ما عارفه كيف قدرت أنوم وسط الوجع الكنت حاسه بيهو.....
في اليوم البعديهو اصلاً ما كان عندي جامعه و رفقه دي ذاتا بقيت ما بشوفها كتير في الجامعه مع اننا في قاعه واحده قدر ما اقول عايزا ألاقيها و اتكلم معاها بقولوا لي طلعت قبيل ، المهم اتصلت عليها و مشينا للمكان الإتفقنا نتلاقى فيهو ، لمن وقفت قصادها سلمت علي سلام بارد كدا و قالت لي اختصري ، قلت ليها انتي زعلانه مني في شنو؟ رفقه نحنا مش صحبات؟ عملت ليك شنو انا ليه بتتعاملي معاي بالطريقه دي؟
قالت لي ئهه صحبات؟ مها انتي صحبة ليان و بس بدليل انك وقفتي معاها لمن أخوها الحيوان اغتصب بت خالتي ما حصل جيتي عشان تشوفيها و ما حصل سألتيني الحاصل شنو همك كلو كان ليان ، ليان و بس ، في أصعب اللحظات انتي ما وقفتي معاي فهسي عايزا مني شنو كمان! ؟ قلت ليها بالجد انا غلطانه و هسي جيت أصلح غلطي و اعرف منك الحصل شنو بالضبط؟ قالت لي ئهه لشنو و بعد شنو؟ من الآخر كدا قولي لي عايزا شنو؟ بعد مسافه قلت ليها متأكده انو في شي غلط ، في حلقه ناقصه و يمكن في زول خطط لـ دا كلو ، قالت لي بالله! يعنى في زول خطط عشان الحيوان داك يغتصب بت خالتي؟ اااا يعنى في زول خت ليهو سلاح على راسو و قال ليهو لازم تغتصبها دا قصدك صح؟
قلت ليها لا ما قصدي كدا بس في حاجه ما مفهومه، أحمد و رنا مش كانوا......مش كانوا بحبوا بعض؟ طيب الوصلهم للحته دي شنو؟
قالت لي "كانوا " يعنى زمان و الوصلهم للحته دي شهوات الحيوان القذر داك ، قلت ليها طيب مراد علاقتو شنو بـ رنا؟ بعرفها من وين؟
قالت لي هه ما دا صاحب الحيوان داك و نفس القذاره الفي داك في دا و الإتنين اتفقوا على بت خالتي و دمروا ليها حياتها ، قلت ليها دقيقه دقيقه انتي بتقولي في شنو؟ كيف يعنى هم متفقين مع بعض!؟ بالمنطق كدا اذا مراد كان متفق مع أحمد فشنو البخليهو يشهد ضدو في المحكمه؟ قالت لي بضيق عشان يطلع نفسو ! قلت ليها يطلع نفسو من شنو؟ عمل شنو هو؟
قالت لي كيف يعنى عمل شنو! اقول ليك كان متفق مع أحمد و عباس تقولي لي عمل شنو؟
صلحت قعدتي و قلت ليها دقيقه يا رفقه وحده وحده متأكده انو حنقدر نكشف الحصل بس انتي ما تضايقي و اتساهلي معاي، قالت لي نكشف شنو؟ في شنو تاني عشان ينكشف؟
قلت ليها خلينا نكمل ، كدي جاوبيني ليه مراد يتفق مع أحمد و عباس عشان احمد يغتصب رنا هدفو شنو ؟ و عباس دا ذاتو موقعو شنو! دي شنو الجوطه دي! قالت لي ما حصلاً دا شغلهم و كلهم ما نافعين ، قلت ليها برضو ما جاوبتيني ، اتنهدت و قالت لي اصلاً هم الإتنين كانوا بلعبوا على رنا و كان بستدرجوا فيها و كل واحد بحاول يوقعها و مراد عامل نفسو بحبها و الحيوان داك ما عارفه اذا بالجد كان بحبها أو لا بس البعرفو انو اغتصبها و دمرها.....سكتت مسافه و قعدت تبكي ، قمت من مكاني قعدت جنبها و ضميتها علي و بقيت أهدي فيها ، أديتها مويه و قلت ليها اذا ما قادره تحكي اقيفي و خلينا نمشي من هنا، قالت لي انتي مش عايزا تعرفي الحصل بالتفصيل؟ ما عارفه عايزا تعرفي ليه بس ح أحكي ليك ، قعدت و بقيت أسمع فيها، منها استنتجت انو أحمد و مراد الإتنين كانوا بحبو رنا و في نفس الوقت البت الإسمها مرافي كانت بتحب أحمد، منها عرفت بالتسجيلات و العملوهو مرافي و مراد و هنا فهمت ليه مراد شهد ضد أحمد ، بس ما قدرت أوصل لمعلومه ممكن تفيدني أو نقدر نطلع بيها أحمد من السجن ماف أي دليل أو مؤشر بقول انو أحمد ما عمل كدا في رنا ، بعد ما رفقه حكت لي قعدنا شويه بعديها رفقه قالت لي بعد دا انا ح أمشي، قلت ليها طيب بس ممكن نكون على تواصل؟ انتي صحبتي يا رفقه و انا ما مستعده أخسرك لأي سبب من الأسباب فرجاء ما تخلي مجرد سوء تفاهم ينهي الصداقه البيناتنا ، قالت لي بس انتي يا مها.....قاطعتها و قلت ليها قلتها ليك و ح أقولها ليك تاني انتي و ليان بالنسبه لي زي بعض و انا مستحيل أفضل وحده على التانيه، و انا ما جيت سألتك و ما اطمنت على بت خالتك لأني ما كنت عارفه الحصل و أبداً ما كان عندنا علم بإنو هي نفس البت الرفعت شكوه على أحمد ، ناسيه اننا بس شفناكم يوم المحكمه ! برضو ما خطر على بالي انو ممكن تكون رنا هي نفس البت يومها كنت عايزا اتكلم معاك بس انتي ما سمحتي لي و اصلاً علاقتك بي في الفتره الأخيره بقت زي الزفت و انا ما قادره افهم السبب ، معناها دا السبب الكان خلاك تطلعي من بيتنا ببالطريقه ديك لما كان عزمتكم انتي و ليان! لأنو في يومها عرفتي انو أحمد أخو ليان! طيب ليه ما حكيتي لي و فضلتي انك تسكتي! الفرق يا رفقه بينك و بين ليان انو هي بتحكي لي عشان كدا انا بقيف معاها بس انتي دايماً بتختاري السكوت متأكده لو انك حكيتي لي ما كنت ح أقصر منك، قالت لي بس الموضوع كان حساس و ما قدرت اقولو ليك، قلت ليها حصل خير، المهم نحاول ما نخسر بعض يا رفقه و انا متى ما احتجتيني حتلقيني قدامك ، والله ما مستعده أخسرك و ما عايزا أخسرك ، قالت لي و انا كمان ما عايزا أخسرك يا مها ، حضنا بعض و قلت ليها صافيه لبن؟ قالت لي أكيد
المهم من مكاني داك مشيت بيت ناس ليان بس خالها المحامي ما كان موجود ليان قالت لي احكي لي الحصل شنو، قلت ليها خلينا ننتظر خالك لمن يجي ، قالت لي طيب ح اتصل عليهو عشان يجي سريع ، شالت تلفونها و اتصلت عليهو قال ليها قريب من البيت هسي ح أجي، بعد نص ساعه بالضبط خالها جا سلم علي و قعد قلت ليهو في حاجات ضروري اقولها ليك، قال لي و انا ذاتي عندي معلومه عايزا أقولها ليكم......
يتبع......
