بقيت اصرخ على هيام و بقول ليها نادي لي دكتور هيثم ، حسيت روحي حتطلع مني ، أول ما هيام اتحركت من جنبي على الباب عشان تنادي دكتور هيثم ، سمعت صوت رنا و هي بتضحك! قعدت في نص السرير و زادت في ضحكها ، بقت تضحك و تقول لي صدقتني صح؟ كنت خايف علي للدرجه دي ، واصلت في ضحكها و أبداً ما وقفت حتى بعد ما شافت الحاله الكنت فيها ، بقيت أعاين ليها بضيق و عدم استيعاب و هي داخله في نوبه من الضحك قالت لي بقيت أبكم ولا شنو؟ قلت ليها بزهج كان مقلب؟ قالت لي ايوه ايوه و واصلت ضحكها، قلت ليها تمام و طلعت من غرفتها و انا مضايق و ما شايف قدامي ، دخلت مكتبي قعدت شويه و بعديها لملمت حاجاتي المهمه و رجعت البيت و أمي كالعاده ليه اتأخرت و ليه بقيت تقعد مدة طويله في المستشفى و أكلت ولا لا و و. و.....الخ بقابل اسئلتها دي كلها بالسكوت و لو فتحت خشمي بشاكلها و انا في اليوم دا تحديداً ما كان عندي نفس عشان اتجادل مع زول ، دخلت استحميت و صليت العصر و رقدت في السرير و بضيق بقيت أعاين للسقف و انا بتذكر في حالتي الدخلت فيها بسبب المقلب العملتو رنا، لمره واحده بس ح أكون صريح مع نفسي و اعترف اني بحبها و خفت أفقدها و ما يكون ليها أثر في حياتي، ما عارف شكل حياتي ح يكون كيف اذا هي اختفت منها ....
مروا أسبوعين كنت فيهم بمشي المستشفى بس ما بدخل لـ رنا بس متابع حالتها من بعيد و الحمدلله بقت احسن و احسن ، كذا مره هي بترسل لي هيام عشان أجيها لما هيام زهجت منها قالت لي بهظار انا ممرضه ولا خدامه لخطيبتك دي، مشاكلكم حلوها براكم ما تدخلوني فيها ياخ فترت من المراسيل الكتيره، ضحكت و قلت ليها انتي ما مجبوره تنفذي كلامها اعملي نفسك رايحه بس ، قالت لي إلا كدا ، يوم كنت في المكتب و بتناقش مع دكتور هيثم عن عمليه مهمه ح نعملها لمريضه بعد يومين ، قطع كلامنا صوت طرق على الباب، أول ما قلت اتفضل شفت رنا قدامي ، عاينت ليها مسافه كأني أول مره أشوفها ، عاينت لدكتور هيثم و قالت لي اذا مشغول بجي بعدين ، أبداً ما حاولت أمنعها و اساساً ما اتكلمت معاها و واصلت كلامي مع دكتور هيثم و هي. شكلها زعلت من حركتي دي عشان كدا قفلت الباب وراها بقوه ، دكتور هيثم ضحك و قال لي شكلها الكذبه قلبت جد ، قلت ليهو احسن نتكلم عن موضوعنا ....
بعد ما دكتور هيثم طلع فكرت أمشي و أشوفها بس اتراجعت ، و عدوا 3 أيام بقيت مشغول فيها شديد حتى حالتها ما بقيت متابعها و سلمتها لدكتور هيثم، مره جيت ماري بغرفتها و الباب كان فاتح اتفاجأت لما شفت مريضه في مكانها، مشيت لـهيام و سألتها عنها، قالت لي بإستغراب خطيبتك خرجوها من المستشفى قبل يومين و انت ما عارف؟
اضايقت شديد من نفسي بس لمتها هي لأنها البدت في الحركات دي ، هسي كان في داعي للمقلب العملتو داك؟! لا و فوقها عامله فيها زعلانه ، بعد دا على كيفها ، مشيت من هيام و انا زهجان و قرفان شديد ما عارف من شنو بالضبط المهم اني ما مرتاح.....
______________________
______________
دقيقه دقيقه يا رنا ، خليني استوعب شويه، دا كلو كان حاصل بينك و بين أحمد ميرغني و انا آخر من يعلم؟ بس برضو ما قادره أصدق انو احمد ميرغني المفترى و المغرور و الما عندو حاجه لزول ممكن يتصرف كدا ، لا انتي أكيد فاهمه غلط يا رنا لأنو أحمد ....
قاطعتها و قلت ليها بعد دا كلو و فاهمه غلط؟ كدي بينك و بين نفسك البخلي أحمد يعمل لي دا كلو شنو؟ هل انا البت الوحيده في الدنيا دي؟
قالت لي بإستنكار كيف يعنى احمد ميرغني بحبك ياخ الفكره ذاتا ما راضيه تدخل في راسي ، وقفت على حيلها و بقت تقول أحمد؟ أحمد ميرغني الواحد دا بحبك يا رنا؟ قلت ليها ايوه بس حالياً زعلان مني بسبب المقلب حكيتو ليك داك ، ياريتك لو كنتي موجوده و شفتي كمية الخواف الخافو علي لمن عملت كدا ، اصلاً قصداً كنت بقول ليهو حاسه نفسي ح أموت عشان أشوف ردة فعلو، و أخيراً اتأكدت، مش قلت ليك ح أخليهو يحبني؟ اها حصل ولا ما حصل؟
قالت لي حصل و طلعتي ما هينه يا رنا و كل يوم بتفاجئيني ضحكت و قلت ليها ما صحبتك في النهايه و تربيتك لكن مالك زعلانه كدا؟
بعد مسافه قالت لي بفكر في مراد المسكين ح يعمل شنو لما يكتشف انو صحبو بحب حبيبتو ، جد يا رنا ما كان يحصل كدا ما ينفع انتي و أحمد تحبو بعض، فكرتي معاي ح يحصل شنو بين أحمد و مراد؟ انتي بحركه وحده ح تخلي علاقه ليها سنين تخرب و تدمر، اتنهدت و قلت ليها طيب و انا؟! الح يفكر فيني و في مصلحتي منو؟ ليه ما أفضل نفسي على الناس و بعدين هل انا قلت لـ مراد حبني و عملت ليهو حركات عشان يتعلق فيني براهو من عدم شغلتو و فراغو عمل فيها روميو و منتظرني أحبو، بعترف انو انسان كويس و ألف بت بتتمناهو بس انا ما من الألف ديل و ما مستعده أضحى بحاجه عشان زول انا لا مشيت ليهو لا عشمت في حاجه، ليهو كذا يوم بتصل علي و انا ما برد و اذا رديت بختصرو في المكالمه كلو عشان يفهم اني ما بحب و ما ح أحبو ، قالت لي بالجد انتي أنانيه يا رنا ما اتخيلتك كدا، قلت ليها بضيق و الأنانيه في دا شنو؟ زول و انا ما عايزاهو اذاً المشكله وين؟ أنانيه دي تقوليها لي في حالة اني جريت ورا مراد و حاولت أوقعو و أعلقو فيني لكن يا مرافي انا في مكاني و في صمة خشمي هو حباني في الحاله دي انا أعمل شنو يعني؟ ؟
قالت لي ما عارفه اقول ليك شنو لكن مراد بالجد ما يستاهل الخذلان دا كلو، ما شفتيهو كان خايف عليك كيف لما كنتي في المستشفى يوم واحد رجلو ما وقفت من بيتكم و المستشفى و أهلك ديل شاهدين عليهو بس انتي واحده انانيه و نكاره للجميل ، قالت كدا و طوالي طلعت من بيتنا و انا على طول مسكت تلفوني و اتصلت على مراد ، رد علي من أول جرس كأنو كان منتظر مكالمه مني، قال لي بلهفه آلو رنا انتي كويسه؟
اتنهدت و أخدت نفس عميق حتى قلت ليهو ممكن أشوفك؟ الموضوع ضروري، قال لي جداً حددي الموعد و المكان و بإذن الله حتلقيني قدامك قلت ليهو خلاص نتلاقى بكرا بعد الجامعه الساعه في () أول ما أخلص بتصل عليك، قال لي تمام يا زوله ، و عشان عارفاهو ح يسألني اذا ح اقفل الخط قلت ليهو حاسه نفسي نعسانه و عايزا نوم ، نتلاقى بكرا، قال لي نوم الهنا و بكرا أكيد في الموعد ،، قالها بطريقه حماسيه شديد لدرجة اني حسيت بالذنب بس خليت الإحساس دا يتلاشى سريع و قلت انا ما لي علاقه في دا كلو ، و مراد دا بكرا بخت ليهو النقاط على الحروف
__________________________
__________________
