كلنا حض و طبعاً عارفين هم منو! المحامي طلع من الإستديو و دخل الواتس و مدى لينا التلفون، مسكناهو و بقينا نعاين للمحادثه الكانت بينا مرافي و أحمد، قرينا كل الرسايل الكانت مرافي بترسلها لأحمد، كانت ببتقول ليهو رنا دي بتاعة رجال و هي بت ما كويسه و حالياً هي بتلعب عليك انت و صحبك عشان تشيل قروشكم .....رسايلها كلها كانت على النهج دا و هو ما كان شغال بيها لأنو ماف ردود كتيره على كلامها بس في آخر رساله منو قال ليها رنا دي انا بعرفها أكتر من نفسي ، كويسه ولا لا دي حاجه ما بتخصك و لو اتكلمتي لي عنها من اليوم و لحدي بكرا ما حتغير شي جواي اتجاها ، بعديها شفنا سجل المكالمات، كان في ناس كتيره من اهلو حسب كلام ليان، متصلين عليهو) بس هو ما رد عليهو لما نزلنا لتحت كان في مكالمات كتيره منو لـ وحده مسجله "my love"ليان قالت لينا دي منو كمان؟ طبعاً التاريخ دا قبل شهرين ، تلاته كدا يعنى مع الزمن الحصلت فيهو الحادثه ، قلت ليها ما عارفه، رنا شالت مني التلفون و قالت لينا دا رقمي بس هو متين اتصل
علي؟......سكتت مسافه بعديها قالت لينا عرفت الحاصل، تلفوني كان مع الحيوانه الإسمها مرافي ديك فأكيد هي الكانت بترد عليهو ، ليان قالت ليهم معناها دا كان في الفتره الغاب فيها أحمد ، قلت ليهم خلونا نفتش تاني في التلفون و مره دي سبحان الله بالغلط ضغطت على رسائل الـSMS ، كان في رسايل من ناس زين و اريبا كنت ح اطلع منها بس من دون سبب نزلت لتحت و لقيت رساله من رقم رنا ، أول ما فتحتها كانت مكتوب في الرساله : لا تجيني لا عايزا أشوف خلقتك دي تاني، كفايه العملتو فيني، فإذا كان عندك ذرة احساس و ضمير ما توريني وشك دا تاني و اذا بالجد انا كنت بهمك في يوم ما تجي و تشوفه لي سمعتي أكتر من كدا، رجاء خليك بعيد عني لأني بالجد تعبت و اتأزمت 🙏
رد عليها هو بـ: اذا دا برضيك بوعدك اني ما أوريك وشي دا تاني و ح اختفي من الوجود )
كلنا بقينا نعاين لبعض ، رنا قالت لينا انا ما كتب ليهو كدا و اساساً في تلفوني ماف أي رسايل أو مكالمات منو واضح انو مرافي حذفتهم كلهم، قلت ليها المهم اننا عرفنا الحقيقه، المحامي قال لينا بكدا الأمور شبه وضحت
اولاً مرافي و مراد كان بخططوا عشان يعملوا مشاكل بين احمد و رنا ✔️
مراد جمع الأدله و هو الكان ورا دخول أحمد للسجن بالسرعه دي ✔️
عباس متفق مع مراد و الصور دي إلتقطت بأمر من مراد و مرافي و رسلوها لأحمد ✔️
أحمد زعل لمن شاف صور رنا و عباس و دا السبب الخلاهو يفتش رقم عباس و يعرف منو علاقتو شنو بـ رنا، قلت ليهو معناها اتفقو معاهو عشان يتلاقوا سوا و يعرف منو طبيعة العلاقه بينو و بين رنا يبقى السؤال ليه اتلاقوا في شقة تحديداً ؟
قال لي حنعرف الجواب بس خلينا اكمل القصه الحاولت اجمعها و اتخيلها ، أحمد اتصل على عباس و طلب يشوفو و في الآخر اتلاقوا في الشقه، و أبداً ما صدفه تجي رنا في نفس اللحظه المتواجدين فيها عباس و أحمد في الشقه بس اذا هم عايزين يثبتوا لـ رنا انو أحمد نسونجي و زول ما كويس فوجود عباس الفايده منو شنو؟
سكته مسافه و بعديها قلت ليهو خلينا نخت نفسنا مكانهم و نفكر زيهم يعني انا اذا عايزا افرق بينهم و أخلق بينهم سواء تفاهم فمفروض اخلي رنا تشوف أحمد في وضع ما كويس أو العكس بس كونها تجي الشقه و تلقى عباس دي ما قدرت أفسرها لسه في حاجه ناقصه، المحامي عاين لي و قال لي بالضبط كدا، انتي بتفكري زيي و اصلاً دا الفكرت فيهو ، ح أجاوبك وجود عباس الهدف منو يجيبوا بيهو أحمد للشقه لأنو ماف تفسير تاني للحركه دي ، قلت ليهو بس برضو في استفهام قول جابوا أحمد للشقه اها في شنو تاني! و هم ما كانوا مخططين يجيبوا رنا الشقه، يعني لو هم من البدايه مخططين كدا كان معليش بس حسب كلامهم الفي التسجيلات قالوا نحنا ما خططنا للحاجه دي، اتنهد و قال لي مها فكري كويس ، مدام عباس متفق مع مراد فأكيد اتصل عليهو و كلمو انو أحمد عايز يشوفو و اصلاً حيكونوا متوقعين كدا من أحمد خاصة بعد ما هم رسلوا ليهو الصور طبيعي يسأل علاقة عباس بـ رنا شنو، مرافي و مراد لما قالوا نحنا ما خططنا للحاجه دي قصدهم انهم ما خططوا للإغتصاب يعني في بالهم يجيبوا رنا للشقه و المفروض تشوف أحمد بوضع مخلق للأخلاق يخليها تكرهوا بس دا ما حصل و الموضوع اتقلب، معناها في شي كان مفروض يحصل بس ما حصل ، قلت ليهو اذاً باقي الأجوبه حتكون مع عباس بس نصل ليهو كيف؟عاينت لرنا الكانت سرحانه بعيد و بالجلاله ماسكه دموعها قلت ليها انتي مش جبتي عباس عشان يشهد ليك في المحكمه؟ اذاً انت عارفه هو وين صح أو بتقدري توصلينا ليهو! هزت لي براسها و بس ، قلت ليها طيب حنلقاهو وين؟ فجأه رنا قالت لينا لأنو عباس برضو واحد حيوان و بتاع شقق و أحمد شكلو عارفو عشان كدا طلب يشوفو عشان يعرف شنو العلاقه البتجمعني بواحد بتاع شقق و قذر زي عباس ....طبعاً هي من قبيل كانت ساكته و سرحانه بعيد ياداب اتكلمت، قلت ليها و انتي عرفتي من وين، قصدي.....قاطعتني و قالت لي مراد هو الحكي لي قبل أيام و دا طبعاً بعد ما الشرطه جات حققت معاهو، مراد قال لي انو احمد و عباس اصحاب من زمان و الإتنين بتاعين شقق و عمايلهم الشقه تشهد عليها.....فهمتو ليه أحمد كان عايز يشوفو و ليه مراد و مرافي اختاروا عباس تحديداً و جابوهو و ليه هم صوروني معاهو!؟
قلت ليها طيب هسي عباس وين؟ قالت لي ما عارفه و ما بعيده يكون مراد سفرو برا السودان بس رقمو معاي، ليان قالت لي اساساً هدا رقمو موجود في تلفون أحمد، رنا قالت ليها بس مراد غير ليهو الرقم و دا كان أيام جلسات المحاكمه ، قلت للمحامي لو هي اتصلت عليهو في احتمال يجيها؟
قال لي حسب السبب الهي اتصلت بيهو عشانو و مدى اقناعها ليهو ، رنا قالت لينا خلوهو علي، طلعت تلفونها و عملت اتصال ، المره الأولى ما رد و المره التانيه كمان بس لمن كررت الإتصال رد عليها، قالت ليهو عباس كيفك؟ قال ليها عايزا شنو؟
قالت ليهو انت وين في شي ضروري لازم تعرفو، قال ليها يلي هو شنو؟
قالت ليهو صحي الجبت أحمد للشقه و انت الأديتو ماده مسكره ؟ صح كنتوا انتوا و أحمد مخططين سوا عشان تغتصبوني و في الآخر تقتلوني و تبيعوا أعضائي؟ عملت ليك شنو انا يا عباس عشان تعمل فيني كدا انت و أحمد ، قال لي انتي مجنونه ولا شنو؟ انا ما عملت أي حاجه، قلت ليهو بس مراد و مرافي قالوا انو انت و أحمد كنتوا متفقين سوا و انت ذاتك كنت مخطط تعمل فيني كدا و حالياً هم الإتنين الشرطه بنحقق معاهم و تلفوناتهم مراقبه، صح انا ما بعرفك بس برضو في احساس جواي بقول لي انك ما فكرت تعمل كدا خاصة انك كنت بتحاول تمنع أحمد مني بس برضو ما قادره اشيل كلام مراد من راسي، قال لي بإنفعال ديل جنوا ولا شنو؟ اصلاً هم الإتصلوا علي و جابوني عشان تحصل مشاكل بينك و بين أحمد، لو عايزا الحقيقه انا بقولا ليك و أوعك تصدقيهم، شفتي لمن كنت بلاقيكم تحت مسمى الصدفه دي كانت خطه من مراد و مرافي و هي الكانت بتتصل علي و تقول لي نحنا ماشين للحته الفلانيه عشان اجيكم هناك و مراد يصورني جنبك عشان يرسل الصور دي لأحمد ، في اليوم الإتصل فيهو أحمد علي و قال عايز يشوفني انا اتصلت على مراد و كلمتو و نحنا من زمان عايزين طريقه نجيبوا بيها للشقه، المهم مراد اتصل على وحده من بنات الليل و هي مفروض تجي الشقه عشان انتي تشوفيها مع أحمد و عشان عارف أحمد ما حيعمل شي إلا يكون في وعيو خليتو يسكر بس لسوء الحظ شال القزازه الغلط عشان كدا ما كان قادر يتحكم في نفسو و حصل الحصل دي الحقيقه و انا ما عملت أي شي لا اغتصبتك لا فكرت اقتلك و ما تنسي اني شهدت معاك في المحكمه ، قلت ليها ما ناسيه ليك معروفك بس سؤال ليه ما قلت الكلام دا في المحكمه؟
قال لي عشان أورط نفسي؟ مراد حذرني عشان ما نتورط و بعدين أحمد هو الإغتصبك ما نحنا و مدام هو حالياً في السجن فشنو الفتح القصه دي تاني؟
قالت ليهو تقريباً ديل أهلوا و مراد دا بأي طريقه عايزا يورطك لو من البدايه اعترفت و قلت الكلام دا كان هسي حتكون مرتاح و تاني ماف زول حيسأل غيتو بعد ما اهلوا فتحوا القضيه دي تاني معناها أي زول ليهو يد حيتعاقب، قال ليها بصوت مرتعب و كلو خوف شـ شـ شنو؟
طبعاً هي كانت فاتحه الإسبيكر و كلنا كنا سامعين الحوار، قلت ليهو غيتو نبهتك لكن وقفت معاي بس برضو عتبانه عليك لأنو بسببك احمد عمل فيني كدا، قال ليها والله يا رنا ما كنت قاصد و هدفي ما كان كدا يمكن الغلط الوحيد العملتو اني سمعت كلام مراد، قالت ليهو خلاص حصل خير و قفلت على كدا، طبعاً عملت تسجيل للمكالمه دي، ليان قالت والله عباس دا طلع دلوكه و غبي ساي معقوله صدق بالسهوله دي و حكى ليك الحصل كلو بالبساطه دي ! المحامي قال ليها من شكلو واضح انو انسان غبي و خواف و سكاري ساي، اصلاً الزول البسكر دا سهل الزول يقدر يغشو و يلعب عليهو، بس سهلها علينا، قلت ليهو بس ما عرفنا هو وين حالياً ، و يا رنا كان تسأليهو، قالت لي لو سألتو حيشك خليهو كدا متأكده حيرجع لي تاني عشان يعرف الحاصل لأنو ما حيقدر يتصل على مراد أو مرافي خاصة بعد ما قلت ليهو تلفوناتهم مراقبه ......بكدا القصه بقت واضحه و عرفنا مرافي و مراد كانوا مخططين يجيبوا بت بس هي ما جات ، لمن رجعت البيت كنت مضايقه شديد و بس عايزا أبكي اصلاً من قبيل ماسكه دموعي بالجلاله قدامهم، غمضت عيوني و اتذكرت انو احمد مسجل رنا بـ "my love" و غيرها حاجات كتيره خلت قلبي يوجعني، ما عارفه كيف و متين أحمد دا دخل حياتي، ما عارفه ليه حاسه كدا و ليه أي حاجه ليها علاقه بيهو بتهمني؟
المهم بعد أسبوع المحامي عادل مشى عشان يعمل استئناف للحكم ، بعديها بيومين عباس اتصل على رنا فهي قالت ليهو انهم فتحوا القضيه تاني و قالت ليهو احسن ليك تجي تعترف قبل ما الشرطه تقبضك ساعتها ما حيرحموك ، سكت مسافه بعدها قفل الخط، المهم القضيه دي انفتحت تاني و رفعنا شكوى ضد مراد و مرافي و القاضي محمود عبد الجليل ، خالي ليان مشى شاف أحمد و اتكلم معاهو بس نحنا ما خلونا نشوفوا، بعد تعب و تقديم أدله و اثباتات و تدخل كبير للوساطات و كبار القضاة حتى قدرنا نفتح القضيه دي تاني بعد شهر بالضبط القضيه انفتحت و سمحوا لينا بإعادة النظر في الحكم و بكدا القضيه بدت من جديد ، بتذكر أول يوم لجلسة المحاكمه كنت متشوقه شديد عشان أشوف أحمد، شهرين و حاجه ما شفتو فيها، لمن جوا سايقينوا و ماشين بإتجاهنا قربت أطير من الفرح، أمو و أخوانو مشوا عليهو و قعدوا يبكوا فيهو اتمنيت لو أكون مكانهم و أقدر ألمسو بس بأي حق؟ شكلو كان متغير شديد كأنو كان مسجون مية سنه، شعرو و لحيتو كان قزار و مبشتنات شديد، حتى ملامحو كانت باهته، ليان قالت ليهو و هي بتبكي كلنا معاك يا أحمد ما حتخليك، قال ليهم انا قلت ليكم عايز أطلع من السجن؟ انا مجرم و السجن دا مكاني الطبيعي و.......سكت لما جانا صوت رنا و هي بتقول ليهو السجن للمجرمين بس انت ما مجرم يا أحمد ، طبعاً كلنا اتفاجأنا بجيتها ابداً ما اتوقعتها تجي، كنت بنحنس فيها تحنيس عشان تتنازل عن القضيه دي و عارفه نفسي هنا اتصرفت بأنانيه شديده رغم اني عارفه الموضوع حيكون صعب عليها ، بس هي ما قالت أي حاجه و دايماً بتسكت و دا أكد لي انها ما عندها نيه تتنازل يمكن لحدي أول أمبارح كنت بحنس فيها بس هي رافضه عشان كدا جيتها دي فاجأتني شديد حتى أحمد بقى يعاين ليها بخلعه و عيونو كانت فيها نظرات كدا ما مفهومه أو يمكن مفهومه بس انا العايزا اعمل نفسي غبيه، قال ليها بصوت مكسور رنا! جات ناحيتو و قالت ليهو انت مظلوم و أكيد عرفت منو الكان ورا القصه دي صح؟ هز ليها براسو و قال ليها بس دا ما بمحي حقيقة......قاطعتو و قالت ليهو ما عايزا اسمع الموضوع دا تاني، العساكر المعاهو قال ليهو كفايه بعد دا زمن الجلسه قرب و ساقوهو معاهم، خالتو رقيه و يلي هي أم أحمد مسكت في رنا و قعدت تبكي قالت ليها الله يبارك فيك يا بتي و يجبر خاطرك و يعز و يرفعك و يرحمك و يلطف بيك و يسعدك زي ما دخلتي السعاده لقلبي، لو بت تانيه كانت مكانك ما كانت حتتنازل حتى لو عرفت إنو ولدي مظلوم ، بعديها كلهم مشوا دخلوا القاعه عشان يحضروا الجلسه إلا انا، وقفت في مكاني داك و بكيت قدرتي بعدها مشيت لحقتهم و المحاكمه بدت و استمرت كدا لمدة شهرين زياده و مراد و مرافي في الآخر اعترفوا و دا طبعاً بعد ما عباس جا و اعترفوا و اصلاً اذا اعترفوا أول لا كل الصور و الفيديوهات و التسجيلات بتثبت إنهم كانوا متورطين في الحصل دا ، يوم جلسة النطق بالحكم للمره التانيه كلنا كنا مقلقين مع انو كل القضيه كانت لصالحنا و السهلها أكتر انو رنا اتنازلت عن حقها بس معروف المحاكم السودانيه جنها جرجره ، في اليوم داك انا نوم ما نمت و قلبي كان في يدي، اليوم يا فزنا للأبد يا خسرنا للأبد، اليوم دا آخر أمل و آخر نور في نهاية النفق ، جوا ناس كميه من أهل أحمد اعمامو و عماتو و حبوبتو كلهم جوا و القاعه اتملت ، كنت بهز في رجلي و بطق في أصابعي و رغم برودة الجو إلا اني كنت عرقانه، بعد شويه جابوا أحمد و الجلسه بدت و انا خلاص القعاد غلبني ، ما قدرت اقعد أكتر من كدا فقمت طلعت برا، ما عارفه قعدت كم من الزمن هناك بس أول ما مشيت على قاعة المحاكمه سمعت صوت بكى، حيلي مات و أطرافي اتجمدت شويه كدا جاني صوت زغاريد و كواريك بأعلى حس أول ما دخلت لقيت رنا في وشي، كانت بتبكي من دون ما تحس حضنتني و قالت لي طلع و أخيراً طلع ....يمكن اليوم داك كلو قضيناهو بكى ، ما قدرت امشي ليهو لأنو اهلو كانوا متلمين حولينو و ما مديين فرقه لزول في الآخر، خالهم قال لينا ارجعوا البيت، عندنا كم إجراء كدا ح اتمو و أجيب أحمد معاي، رجعنا بيتهم و انا و رنا و رفقه بدينا نضافه عشان أهلهم قالوا جايين نضفنا البيت كويس و جهزنا الأكل و أول ما خلصنا المغرب أذن و أمي اتصلت علي و قالت لي تعالي، ما كان عندي نيه أمشي بس مضطره، رنا قالت لي اذا طالعه نحنا ذاتنا حنطلع، المهم كلمت ليان اننا حنمشي و على طول طلعنا سوا و بعديها هم مشوا بطريق و انا بطريق ، ما أنسى مراد و مرافي حكموا على كل واحد فيهم بـ 7 شهور و ذاتا شويه عليهم بس خليهم يتأدبوا الكلاب مع اني متأكده انو أهل مراد حيطلعوهو بس المهم انو أحمد طلع منها، في اليوم البعديهو كان عندي جامعه فما قدرت امشي بيت ناس ليان و هي ذاتا ما جات الجامعه و أمي كانت عيانه أسبوع ممارضاها و ما لقيت طريقه امشي ليهم، في يوم قلت خلاص حأمشي اشوفو بعد دا ، لما وصلت بيتهم كان معاهم ضيوف سلمت عليهم و خالتو رقيه قالت لي ليان جوه خشي ليها، لمن دخلت غرفتها كانت قاعده معاها رفقه بتونسوا و بضحكوا مع بعض، استغربت لمن شفتها، سلمت عليهم و فعدت معاهم و انا بعاين في الباب، عايزا أشوف أحمد أو على الأقل ألمح طيفو، قلت لـ رفقه يا خاينه ليه ما قلتي لي جايه لـ ليان؟ ضحكت و قالت لي ما خنتك والله و الجيه دي ما كانت في حساباتي بس فجأه رنا قالت لي خلينا نمشي ليهم يعني انا جيت معاها و بس كالعاده دايماً بتقول لي ارح من دون ما تكلمني من بدري ، قلت ليها يعني انتوا جيتو قبل كدا؟ قالت لي تتخيلي دي المره التالته، اهااا طيب رنا وينا هي ما شايفاها؟
قالت لي مع أحمد من قبيل، غيتو التقول ليهم مية سنه ما شافوا بعض لكن ما مشكله دا الحب يخوانااااااو 😂😂
كلامها وجعني شديد و بقيت زي الزول الضربوهو كف لمن رفعت عيني لقيت ليان بتعاين لي، طبيعي تعاين لي و انا ملامح وشي اتغيرت 180 درجه ، بعد شويه جات رغد أخت ليان و قالت ليها في ضيوف تحت عايزنك، فهي استأذنت مننا و قامت و انا طوالي قمت وراها، رفقه قالت لي ماشه وين؟ قلت ليها ح أمشي البيت أني عيانه، قالت لي سلامتا ياخ لكن متين جيتي، قلت ليها بجي مره تانيه و طوالي طلعت من الغرفه و كنت ماشه على الشارع بس المحامي عادل ناداني من جوا الصالون لما مشيت ليهو اتفاجأت بناس كتيره قاعده تقريباً ديل عماتو، سلم علي و قال ليهم دا مها، المره العجوز وقفت على حيلها و سلمت علي سلام سمح كدا كلو حنيه و عماتو برضو سلموا علي و قالوا لي ما قصرتي والله عادل حكى لينا عنك، قلت ليهم دا الواجب، خالتو رقيه قالت ليهم مها دي أصلها بت ناس و طيبانه شديد و زولة حاره والله وقفت معانا وقفه جد في الوقت الفقدنا فيهو الأمل هي الوحيده الما فقدتو و مسكت في الموضوع دا لحدي ما شوفة عنكم ولدي بقى في بيتو، قالت ليها ما شكرتها يا أحمد، أول ما قالت كدا انا انخلقت و عاينت وراي، كان واقف جنب الباب و معاهو رنا، قلبي وجعني شديد قلت لـ خالتو رقيه بزعل منك والله ما محتاجه شُكر انا و بعدين دا كلو حصل بفضل ربنا و المحامي عادل برضو وقف وقفه جد في القضيه دي، خالتو رقيه قالت لي آيي والله عاد عادل دا ربنا يعليهو و ما يدليهو، قلت ليهم بالإذن يا جماعه حمشي بعد دا، قالوا لي يخسي عليك متين جيتي و.....و.....و ،قلت ليهم خليت أمي عيانه و جيت عشان طولت منكم، قالوا لي سلامتها و كان كدي خلاص امشي لكن تعالينا تاني، قلت ليهم حاضر، لمن جيت أطلع أحمد و رنا كان واقفين جنب الباب، بالشده وقفت قصادو و قلت ليهو الحمدلله على سلامتك قال لي ربنا يقبل حمدك، طوالي اتحركت و ما انتظرتو يتكلم مع انو واضح انو كان عايز يقول حاجه ، رنا ندهت علي من بعيد و قالت لي نحنا ذاتنا طالعين انتظرينا، اضطريت انتظرهم هي و رفقه، لمن جينا طالعين أحمد لحقنا و قال لينا خليني أوصلكم، رنا بخلعه قالت ليهو لا لا ما عايزين، لمن كلنا استغربنا فيها و عاينا ليها، قلت ليهو فعلاً ماف داعي ، قال لينا ماف كلام زي دا انا مُصر حأوصلكم يعني حأوصلكم.....بس رنا كانت رافضه الفكره دي رفض شديد زعلت و اضايقت لمن قربت تبكي، قلت احتمال ما عايزاهو يوصلني عشان كدا رافضه الفكره، قلت ليهم انا حمشي بعد دا ، أحمد قال لي مها دقيقه، اسمعيني يا مها بتكلم معاك انا، ما اشتغلت بيهو و ما إتلفت عشان أعاين ليهو، ما عارفاهو اذا وصل ناس رنا أو لا بس انا من اليوم داك تاني ما مشيت بيت ناس ليان ، زعلت شديد يعني رفقه و رنا كانوا بمشوا بيت ناس ليان و بتلموا هناك و ليان ما فكرت تتصل علي أو تكلمني مش تكلمني ذاتا ما اتصلت علي عشان تسألني غايبه وين ، اسبوع و حاجه و هي ما جايبه خبري و لمن امشي بيتهم ألقاها بتضحك و بتتونس مع رفقه! !
في اليوم البعديهو هي اتصلت علي بس انا ما رديت عليها و في الجامعه بقيت ما بتكلم معاها و لمن تجي تقعد جنبي بقوم من الحته الهي فيها، في يوم و انا طالعه من الجامعه لمحت أحمد متكل على عربيتو و بعاين لساعة يدو لمن شافني جا علي قال لي كيفك؟
بقيت أعاين ليهو شديد لمن هو استغرب لمن انتبهت على نفسي قلت ليهو كويسه الحمدلله ، كنت حمشي بس وقفت لمن قال لي بالجد شكراً ليك و الكلمه دي ذاتا صغيره قصاد العملتيهو ما عارف اقول شنو عشان أعبر ليك عن امتناني ليك، أطلبي أي حاجه و انا مستعد أنفذها ليك ، ابتسمت و إتلفت عليهو قلت ليهو العفو و ما عايزا حاجه، قال لي لا لا لازم اطلبي حاجه لو ما هسي ما مشكله ح أخليها ليك لقدام في أي وقت لو طلبتي مني حاجه غصب عني ح أنفذها ليك، قلت ليهو طيب، قال لي رنا وين؟ لمن عاينت ليهو قال لي قصدي ليان وين ما معاك؟ قلت ليهو لا ما معاي، و كنت حمشي بس هو وقفني و قال لي مشكلتك شنو معاها؟
قلت ليهو ماف أي مشكله ، قال لي بس ليان قالت انتي زعلانه منها و مقاطعاها ليك فتره سمعتها لمن كانت بتتكلم مع أمها، ما رديت عليهو، قال لي بغض النظر عن الحاجه الزعلتك منها حاولوا ما تخسروا بعض والله ليان دي بتحبك و بتعزك شديد و ماف سيره على لسانها غيرك ، ما عارف الزعلك منها شنو بس ليان ما بتتعوض والله، شويه كدا و ليان جات، و هو جاهو اتصال فمشى مننا بعيد قلت أكيد دي رنا ماف شك، ليان قالت لي كيفك؟
قلت ليها تمام و مشيت منها على الموقف ركبت و مشيت بيتنا و من يومها حياتي اتغيرت، اكتئبت و بكيت و اضايقت و انقهرت بس دا كلو بليل بالنهار بلملم شتاتي و بحاول اظهر متماسكه ، و كل يوم رفقه بتحكي لي عن رنا و أحمد و عن طلعاتهم مع بعض بس اتفاجأت و انقهرت شديد لمن قالت لي في احتمال انهم يتزوجوا بعد 3 شهور أو اربعه، قلت ليها ربنا يهنيهم و مشيت منها.......
و تستمر الحكايه.... أبقوا عافيه 💜🌻🤝
