بعد تفكير طويل قدرت استنتج انو أحمد بحبني! ايوه هو فعلاً بحبني ساي شكيت فيهو و قلت انو متفق مع مراد علي ما عارفه الخلاني اشك فيهو شنو و افكر بالطريقه دي المتاهه و الشربكه دي كلها بدت من اليوم القالت لي فيهو مرافي : "يمكن احمد و مراد متفقين عليك " من الجمله دي تفكيري أخد منحنى تاني، يمكن لو كان ما قالت لي كدا ما كان شكيت في احمد و عملت العملتو و قلت القلتو ، رجعت بذاكرتي لليوم الإتقابلت فيهو مع مراد و بعد اللقاء لقيت احمد لمن استغربت و قلت ليهو صدفه صح؟ ما رد علي بس قال لي اركبي و بدا يسألني كنتي وين و...و...الخ اسأله غريبه كدا بنبره ضيق و زعل ، انا ليه ما خطر على بالي انو شافني مع مراد و غار لأنو بحبني علي عشان كدا سألني الأسئله ديك كلها، القصه أبداً ما زي ما كنت متصوراها، لو بس سمعت من قلبي مره وحده ما كان وصلنا انا و أحمد للمرحله دي! بس سؤالي ليه هو ما قال لي انا بحبك؟ ....ما قالها لي بس تصرفاتو كانت بتوحي لي انو بتحبني و كانت كافيه جداً بس انا الفهمت غلط، طييب مراد؟!
بعترف انو هو كمان بحبني و مستعيد يعمل أي شي و يخسر أي زول حتى لو كان صحبو عشاني ، يا ربي مراد عارف انو أحمد بحبني! متأكده انو أحمد لو ما عارف انو مراد بحبني فهو حيكون شاكي ، بس الحاجه المفروض يعرفها احمد و يكون متيقن منها اني بحبو هو و بس و ما عندي شغله بـ الإسمو مراد داك ....
قبل ما ارتاح من التفكير اتذكرت الكلام القالوهو لي مراد و مرافي عن أحمد ميرغني انو واحد مقرف و بتاع شقق في البدايه زعلت بس تاني قلت احتمال في شي غلط، بس ليه مراد يقول كلام زي دا في أحمد اذا هو فعلاً ما كان كدا؟ حتى مرافي قالت لي كدا! في احتمالين:
يا إما احساسي كاذب و أحمد فعلاً زي ما قالوا لي عنو و اسوأ يا اما مرافي و مراد كذابين ....لا ما كذابين يمكن فاهمين غلط لأنو ماف شي بخليهم يكذبوا و يقولوا كلام زي دا خاصة مراد ، لأنو أحمد دا صاحبو شديد ، حكيت لـمرافي و رنا الإستنتاجات الطلعت بيها، مرافي قالت لي يعنى بتشككي في كلامنا انا و مراد؟ و اساساً نكذب عليك ليه و ليه نقول في أحمد حاجه ما فيهو؟
قلت ليها أهدي يا مرافي ما قصدي كدا لكن يمكن انتوا و مراد فاهمين غلط أحمد ما كدا، رفقه قالت لي اعملي البقولوا عليك قلبك و ما تسمعي من زول، قالت كدا و عاينت لـ مرافي ، مرافي قالت لي خير يا زوله اذا واثقه من أحمد فأسمعي كلام قلبك و إن شاء الله نطلع انا و مراد فاهمين غلط
في اليوم شلت تلفوني و من غير ما اتردد اتصلت على أحمد بس ما رد علي ، قريب الـ15 مكالمه لكن ما رد في آخر مكالمه فصل الخط في وشي ، رسلت ليهو رساله كان محتواها: ضروري اشوفك يا احمد في سوء تفاهم حصل، قرا رسالتي و ما رد علي ، طوالي مشيت ليهو في المستشفى ، و كالعاده لقيت هيام في وشي و بدت تشغلها لي ، جايه تشوفك خطيبك مش؟ قلت ليها ايوه وين هو؟
قالت لي شوفيهو في مكتبو ، خشيت مكتبو بس ما لقيتو، اتصلت عليهو بس ما رد ، رسلت ليهو رساله: احمد انا هسي في المستشفى وين انت؟ بفتش عليك! ، برضو قراها و ما رد ، فتشتو بس ما لقيتو جاتني هيام و قالت لي امشي شوفيهو جنب الغرفه رقم ( ) يمكن يكون هناك ، فعلاً مشيت هناك بس ما لقيتو، جنب الغرفه ( ) كان في ممر صغير و ضيق كدا قلت كدا اشوفو بوديني لـ وين، يمكن احمد يكون في حته في المكان دا ، مشيت بالممر و ياريتني ما مشيت ، شفت أحمد واقف مع بت و يمكن نفس البيت، كان بقول ليها اليوم طالعه حلوه شديد و مقرب منها شديد ، بكل الضيق الفيني قلت ليهو أحمد؟! مها؟!
هم الإتنين اتخلعوا ، و انا ذاتي انخلعت ....ايوه انخلعت لما شفت البت يلي هي كانت نفسها مها صحبة رفقه بت خالتي ، هي كمان اتفاجأت لما شافتني و اتحرجت من الموقف الكانت فيهو هي و أحمد، في اللحظه دي بالذات النار جواي ولعت و روحي حرقتني شديد ، من غير ما اتردد مشيت عليها بإندفاع و بطريقه هجوميه رفعت يدي عشان أضربها بكل قوتي بس أحمد مسك يدي و قال لي إياك تقربي منها
"إياك تقربي منها " دي نزلت على قلبي زي السيف في الجرح ، بقيت أقول ليهو بتبيعني عشانها؟ عشانها ما كنت بترد على اتصالاتي و رسايلي! عشانها يا أحمد بقيت تطنشني! اقسم بالله ما تستاهل حبي ليك ....البت اتكلمت بعد مسافه ما عارفه بس حسيتها زي الكانت مهجومه و كيف ما تتهجم بعد المنظر الشفتو قدامي ، قالت لي و هي بتقطع في الكلام انتي فف فاهمه غلط ، قلت ليها غلط بإنفعال و صوت عالي شنو الفهمتو؟
واقفين هنا و مع بعض و مقربين شديد من بعض لدرجة انو شويه كدا و حسيتكم حتبوسوا بعض ، غلط شنو الفهمتو؟
ما قدرت تقول حاجه ، عاينت لـ أحمد و كنت حتمشي من جنبنا بس مسكتها شديد من يدها و قلت ليها ماشه وين؟
ضغطها شديد من يدها و كنت ح ألويها ليها بس أحمد مسكني منها ، شكلو ما قدر يستحمل دموعها، قلت ليها انتي وحده حيوانه و قليلة أدب و بتاعة رجال شكلهم أهلك ما عرفوا يربوك يا تافهه يا منحطه يا فاكه يا......قبل ما اتم كلامي جاني كف قوي! كنت قايله دا أحمد الضربني بس كانت دي هي الضربتني ، رفعت أصبعها و قالت لي إياك تتكلمي عن بالطريقه دي فاهمه ولا لا ، في اللحظه دي غضب الدنيا كلو اتكبى فيني، كيف يعنى تضربني كف و قدام أحمد و هو ما حاول يمنعها، في كسر من الثانيه لميت غضبي كلو في يدي و ضربتها كف لمن قربت تقع و كنت ح أعدلها بواحد تاني بس أحمد مسكني و جاراني من المكان الكنا واقفين فيهو، دخلني المكتب و بقى يشاكل فيني عشان ضربتها ، قعدت في اقرب كرسي و بديت أبكي قلت ليهو انت بتحبها صح؟ عشان كدا لمن ضربتني ما حاولت تمنعها! ما بتحبني انا لكن بتحبها ، عملت ليك شنو انا! وقفت قصادو و انا ببكي و قلت ليهو متأكده انها ما بتحبك أكتر مني فاهم ولا لا ، بقى يعاين لي جوه عيوني و وشو كلو بقى علامه عن استفهامات، بعد مسافه قال لي بتحبيني. بتعرفي الحب انتي ؟
انتي غير الخيانه و الخداع ما بتعرفي حاجه عشان كدا اطلعي من الدور دا و أمشي من هنا، قلت ليهو بإنفعال ما بكذب عليك انا والله بحبك يا أحمد و كان في سوء تفاهم حاصل، انا افتكرت انك متفق مع مراد علي عشان تثبت لـ مراد اني ما كويسه و تخليهو يكرهني، حاولت اثبت ليك العكس و انو مراد هو الجاري وراي عشان كدا كنت بلاقيهو و بخليك تشوفنا ، في البدايه ما كنت متأكده اذا انت بتحبني ولا لا بس هسي انا متأكده انك بتحبني و ما تحاول تكذب علي لأنو عيونك فاضحاك .... قال لي ما ناقص كذبك هنا، قلت ليهو اقسم بالله يا أحمد ما بكذب عليك و الدليل على كلام دا عاين لي و شوف ملامحي الباهته شوفوني اتغيرت كيف كأني كنت عيانه و فعلاً كنت عيانه في الفتره الغبت فيها عن حياتي، احمد في الفتره ديك انا ما باقي لي إلا الموت، عشت أيام عصيبه و ليالي طويله، لا كنت بعرف طعم لا لأكل ولا لشراب و كلو بسببك انت
سكت و ما اتكلم ، و انا زدت زياده في البكى ، ناولني منديل و قال لي امسحي دموعك ، مسحت دموعي و قلت ليهو أحمد....قاطعني و قال لي كفايه يا رنا و كان حيطلع قلت ليهو ماشي وين؟
قال لي راجع هسي ، قعدت في كرسيهو و بقيت منتظراهو ، اتأخر شديد جاني بعد مسافه شايل معاهو أكل و بارد ، كنت ح اقوم ليهو من كرسيهو بس قال لي خليك قاعده ، قعدته و قلت ليهو أحمد لسه زعلان مني؟
ما رد علي و عمل نفسو منشغل في تطليع علب الأكل من الكيس ، ختاهم قدامي و مدا لي كرستالة مويه، قلت ليهو لا ما عايزا شبعانه انا، قال لي ياداب زمن الغدا جا شبعانه أكلتي في المواصلات ولا في الخيال؟
قلت ليهو بس قول لي لسه زعلان مني؟ اتنهد و قال لي ما عارف يا رنا، كدي خلي الموضوع دا على جنب و أكلي، ضربت ليهو التربيزه و وقفت على حيلي و قلت ليهو معناها بتحب البت الكريهه الإسمها مها ديك صح؟ دي ما أول مره اشوفك معاها، قبل كذا يوم جيت المستشفى و شفتك معاها بنفس الوضعيه بس اليوم كنتوا قريبين شديد من بعض! اساساً لو كنت ما بتحبها ما كان قلت ليها طالعه حلوه اليوم ، بقيت أبكي و اقول ليهو انت حيوان و مخادع جا ناحيتي و قال لي رنا انتي.....قاطعتو و قلت ليهو بتحبني ولا لا؟
قال لي رنا
-بتحبني ولا لا؟
سكت و ما اتكلم ، قلت ليهو جوابك وصلني و اتحركت من جنبو أول ما فتحت الباب عشان أطلع لحقني و قفلو بقيت بجر في يدو عشان افتح الباب بس ما قدرت عليهو، قلت ليهو افتح الزفت دا عشان أطلع، قال لي ما حتمشي من هنا إلا تسمعيني ، قلت ليهو ماف حاجه لازم اسمعها، الكلمه المفروض اسمعها منك ما سمعتها و بكدا فهمت اللازم افهمو و بوعدك انو ما تشوف وشي دا تاني و.....
_بكون بكذب على نفسي و عليك لو قلت ليك اني ما بحبك ، ما حبيتك لا اليوم لا أمبارح، حبيتك من أول يوم شفتك فيهو، بس ماف زول عارف بالحاجه دي، كنت بضايق شديد لما مراد يجيب سيرتك و يتكلم بإعجاب عنك عشان كدا كنت بحذرو منك لأني شايفك حاجه بتخصني انا و بس ، لكن حالياً الوضع اتغير يا رنا، برضو ح اكون كذاب لو قلت اني ما حاسس انو مراد بحبك، و على ما اظن انتي ذاتك عارفاهو بحبك، يعنى انا في موقف صعب جداً و حاسي نفسي مخنوق، اصعب احساس انك و صحبك تحبو نفس البت، دايماً في خيارين يا إما اغض نظر عن كل حب مراد ليك و ادوس على صداقتنا و اعمل نفسي رايح و اخسر صحبي و اكسبك انتي و يا إما اتنازل عنك عشانو و أدوس علي البينا و اخسرو هو و على كل الأحوال ح اخسرك واحد فيكم و الموضوع صعب علي شديد يا رنا ما بقدر اتجاهل حب مراد ليك و لهفتو لما يحكي لي عنك ، كنت بحاول اقنع نفسي انو مراد معجب بيك ساي مع انو حتى اعجابو بيك مضايقني بس هو عديل قال لي انو بحبك فكيف بعد ما سبقني و اعترف لي انو بحبك أجي اطعنو في ضهرو و اقول ليهو انا بحبها؟
دموعي كلها خلصت بسبب كلام أحمد دا ،قلت ليهو و انا ببكي طيب و انا؟ ليه ما فكرت فيني دامك فكرت في نفسك و في صحبك؟ انا ما بحب مراد و هو عارف الحاجه دي كويس و انا ما لعبه في يدك يا أحمد عشان تديني لصحبك؟
قال لي القرار قرارك في النهايه و ماف زول حيغصبك على مراد بس......قاطعتو و قلت ليهو بس انت ما حتقدر تعترف لزول انك بتحبني و ما حتقدر تخطى أي خطوه دا الكنت عايز تقولو صح؟
رسالتك وصلت و هسي لو سمحت افتحي لي الباب طالعه انا؟
قال لي بصوت مكسور ما عايزك تزعلي مني و ختي نفسك مكاني كنتي حتعملي شنو؟
قلت ليهو لو انا و صحبتي اتختينا في نفس الموقف و صحبتي كانت بتحبك و انا بحبك فإنت الحتحسم الفوضى دي كلها، لو انت طلعت بتحب صحبتي و ما بتحبني ببساطه ح اتنازل و أخليكم لبعض عشانها هي و عشانك انت أولاً أما لو حصل العكس و حبيتني انا فهي ببساطه مفروض تتنازل و تخلينا لبعض و أبداً انا ما ح اكون ندمانه أو حاسه بالذنب اتجاهها لأني كنت ح اعمل العملتو و بعدين انت براك الإخترتني انا فمفروض هي تتفهم و تنسحب
في قصتنا انا و انت و مراد الأدوار مختلفه و مفروض انا احسم الفوضى دي و اختار انا عايزا منو بس السؤال هل الإخترتو دا حيكون شجاع و يقدر يقول انو بحبني من غير ما يشل هم مشاعر زول على حساب مشاعرو؟
الموضوع بسيط و ساهل جداً يا أحمد بس انت المعقدو بس دامك اخترت كدا فخلاص و انا ما ح اسامحك لحدي ما أموت يا أحمد و عمري ما ح أنسى الكسره الكسرتني ليها،
كان منزل راسو على الأرض و بصوتو المكسور داك قال لي رنا.....قلت ليهو اسمي دا ذاتو تاني ما تنطقو بلسانك ....قلت ليهو كدا ، طلعت و قفلت الباب بكل قوتي و انفقعت بالبكى، ما عارفه كيف و متين طلعت من المستشفى، بس ما مشيت البيت، بقيت اتمشى في الشارع ساي من غير أي وجهة أو مكان محدد، بقيت زي الرايحه لي حاجه و رجعت تاني لنقطة الشكوك و أبداً ما نسيت الطريقه الكان مقرب بيها أحمد من صحبة رفقه و بتغزل فيهو و بقول ليها طالعه حلوه اليوم، هو بحبني انا فشنو البخليهو يقرب من وحده تانيه و يقول ليها كلام زي دا؟ يعنى الحاجه دي عاديه عندو؟
________________________
____________
