أول ما رجعت البيت و دخلت سمعت أصوات كواريك و جوطه شديده ،هه كالعاده ديل أخواني بتشاكلوا ،مسكت اقرب خرطوش و دخلت عليهم و على طول ضربت الباب ضربه شديده بالخرطوش لمن هم انخلعوا ، محمد أخوي قال لي بزهج كدا مالك انتي كمان هسي ضاربه الباب كدا مالك يا زفته ؟! قلت ليهو محمد احسن ليك تتكلم معاي بإحترام ما قدرك أنا تمام ؟طبعاً أنا أكبر وحده بعديني طوالي محمد في أولى جامعه بعديهو طوالي روان في تانيه ثانوي ،آخر اتنين توأم ولد و بت هم ماجد و رؤى في سنه تامن ، عاينت لـ روان و قلت ليها مالكم في شنو ليه جايطين كدا ؟قالت لي محمد شال مننا قروشنا و حالف ما يرجعها لينا ،قلت ليهو سريييع يا محمد رجع ليهم قروشهم و أصلاً تشيلا منهم ليه ؟روان قالت لي كذب علينا و قال لينا أرح نلم قروش و لما تصل لـ 6 أو 7 ألف نشتري بيها أكل جاهز من المطعم الفتحوه جديد قال لينا أنا البمسك ليكم القروش و نحنا صدقناهو و مسكناهو القروش و لمن المبلغ اكتمل و جينا ليهو قال لينا أرح نخلي الفكره دي و أبى يرجع لينا القروش قال إنها هسي ما معاهو ، عاينت لـ محمد و قلت ليهو ليه كدا ؟ليه تغشهم؟و بعدين انت عايز تعمل بالقروش دي شنو ؟اتكلم يا محمد وديت قروشهم وين ؟
قال لي ما عارف ليكم أي قروش و كان ح يطلع بس مسكتو من قميصو و قفلت باب الغرفه قلت ليهو لو ما طلعت القروش دي شبر واحد ما ح تخطيهو من هنا ،قال لي بزهج احسن ليك تفكي الزفت دا يا رنا ، قلت ليهو ح افكك بس لمن تطلع القروش ، اتزهج فيني و قال لي ما بطلعها ياخ ما تكرهوني و اعتبروها دين لمن ألقى قروش برجعها ليكم ،قلت ليهو طيب قول لي عملت بيها أو ناوي تعمل بيها شنو ؟
قال لي ما عندك شغله بي فك يدي من قميصو بزهج و طلع من الغرفه ،عاينت لـ أخواني لقيتهم زعلانين ،قلت ليهم ما مشكله عندي الحل ،من مكاني داك طلعت و مشيت المطعم الهم قاصدنوا و اشتريت ليهم النفسهم فيهو مع إني كنت محتاجه القروش دي شديد لكن اعمل شنو !!شلت هم اجيب قروش تاني من وين و هل الوضع ح يسوء لسه ولا ح يخف و...و....غيرو كتير من الهموم الإتراكمت فيني بس كلو اتلاشى لما شفت ضحكت أخواني و الفرحه الظهرت عليهم لما جبت ليهم النفسهم فيهو ،روان قالت لي جبتي قروش من وين ؟بس ما يكون من حقات المواصلات أو الجامعه ؟!قلت ليها لا دي كنت خاتاها ساي على جنب للحاجات الزي دي المهم أكلوا و خلوا لـ أمي و أبوي.....قالت لي و انتي ما عايزا ولا شنو ؟قلت ليها ايوه ما عندي نفس المهم أكلوا انتوا...... نسيت ما سألتك أمي مشت وين ؟
قالت لي مشت بيت ناس حاجه سواكن قالت عندهم قعدت صندوق ،قلت ليها اهااا ،قالت لي هييي اتذكرت إنتي ليه قبيل ما شلتي قروش المواصلات من أبوي ؟بعد ما طلعتي سأل منك و كان عايز يديك ليهم ،قلت ليها أبوي الفيهو مكفيهو ،عارفاهو بتعب قدر شنو عشان بس يطلع لينا مصروف يوم نمشي بيهو حالنا ، والله بضايق شديد و بحس نفسي مخنوقه لمن اشوفو واقف قدامي و مادي لي قروش امشي بيها يومي ،حتى الجامعه دي أنا كرهتها و كذا مره قلت لـ ليكم عايزا أخليها لكن أبوي ما سمح لي 💔
قالت لي أبوي عايزك تقري يا رنا عشان نفسك و عشانّا ما عايزنا في المستقبل نعيش نفس المأساة العايشنها هسي ما عايزنا نحتاج لـ زول في يوم أو نكون زي المقطوعين من شجره ،التعليم يا رنا ،التعليم دا الح تقدري تضمني بيهو مستقبلك شهادتك هي سلاحك و سر نجاحك ،عشان كدا إياك ثم إياك تفرطي في التعليم و شيلي فكرة انك تسيبي الجامعه دي من بالك و ما تخلي تعب أبوي يضيع هباءً منثورا ،بعد كلامها دا سكت و بقيت أعاين ليها بس ،روان في كل مره بتفاجئني بكلامها و طريقة تفكيرها و نظرتها للعالم من حولها مرات كتيره بحس إنو هي الكبيره ما أنا ،ما شاء الله كلامها واعي و بتقدر تقنعك بأبسط الكلمات ، المهم مشيت استحميت و دخلت المطبخ عشان أعمل لـ نفسي كباية شاي انتبهت إنو في "جركانة زيت" مركونه على الجنبه ناديت رؤى و قلت ليها أبوي نسى جركانة الزيت دي ولا شنو ؟قالت لي ايييك معناها نساها دقيقه أنادي ماجد عشان يجي و يلحقها ليهو ، قلت ليها اسرعي طيب هسي شغلو ح يكون اتعطل بسبب الجركانه دي ،جرت نادت ماجد و هو على طول جا و شالا عشان يلحقها لأبوي قلت ليهو ح تمشي بـ شنو ؟قال لي برجليني قلت ليهو لا المسافه ما بتتمشي ليك و انت شايل جركانه كبيره زي دي و مليانه زيت شوف مضوي ولد خالتو سحر بكون طالع لـ شغلو زي الزمن دا و خليهو يوصلك معاهو و اذا ما لقيتو تعالني راجع عشان اشوف ليك حل غيرو قال لي تمام و طلع ، و تاني ما جا راجع قلت معناها لقى مضوي و وصلو معاهو ، ما قلت ليكم أبوي شغال "بتاع طعميه" في سوق ما هو قريب مننا ولا بعيد ، بالطعميه دي نحنا ممشين حالنا و صابرين أو خليني اقول أهلي الصابرين لأني أنا أبداً ما عاجباني العيشه دي و أصلاً عٖيشه زي دي ما بتعجب زول ، دائماً بقارن حياتي مع غيري و بقول هم احسن مننا في شنو ليه هم عندهم و نحنا لا ليه صحباتي و زميلاتي الفي الجامعه كل يوم بـ لبس و شكل غير و أنا لا ليه حياتنا بتختلف. عنهم ليه نحنا ما زيهم ليه نحنا بالذات الكُتب علينا الشقى و الإبتلى ليه ما من حقنا نضوق طعم الحياة دي و ننوم ليله واحده مرتاحين البال من غير ما نفكر في بكرا و في الح يحصل فيهو فترت والله فترت من كترة الهموم و شلت هم للراجينا لـ قدام و الوضع كل ما ليهو ماشي للأسوأ و كل يوم أضلم من القبليهو 💔
استغفرت و قلت يا رنا احمدي الله انو عندك مكان تنومي فيهو و مخده تسندي راسك بيها حالك احسن من حال ناس كتيره لافه في الشوارع و ما عارفه على وين و تشكي لـ منو ،انا صح بقول كدا و بحاول اصبر نفسي بالكلام دا بس كلو كلو ما متقبله التصبيره دي لمتين ح نتصبر كدا لمتين ؟!
بعد العصر أمي جات داخله بتجوط ساي و بتقول أصلي ما عافيه ليها الفقر الكريها ، قلت ليها خير في شنو يا أمي مالك مضايقه ، قالت لي من وين يجينا الخير طول ما المره الأنانيه الإسمها نجود دي عايشه بيناتنا ؟!! قلت ليها عملت شنو نجود دي ؟قالت لي الإسبوع الفاتت كانت الصرفه علي أنا جات لحد عندي و حنستني عشان أديها صرفتي بـحجة إنها محتاجه ليها شديد و قالت لي شيلي صرفتي البعد اسبوع و لو ما جاتني لحدي البيت و نقت لي كتير ما كنت ح أديها ليها و الليله كانت صرفتها المفروض اشيلها أنا لما مشيت لـ سهام عشان اشيل القروش اتفاجأت إنها جات و شالتها !مشيت ليها في بيتها لكن ما لقيتا و حسبي الله و نعم الوكيل فيها ، قلت ليها فعلاً نجود دي انانيه و كريها و انتي ذاتك يا أمي ما تتعاملي مع الناس ديل بحسن نيه و أوعك تخلي ليهم حقك ، النسوان ديل لقنّك مسكينه عشان كدا بستغلن فيك ، قالت لي خليتن لـ الله ...
بعد ما دخلت جوه و قعدت شويه سألتني عن ماجد قلت ليها مشى يلحق أبوي جركانة الزيت لأنو شكلو نساها على سيرة ماجد هو طوالي جا داخل قلت ليهو اهااا قبيل لقيت مضوي و وصلك معاهو ؟قال ليا لقيتو و وصلني معاهو و قبل شويه في واحد وصلني لحدي البيت أظنو ببقى لـ ناس خالتو آمال أو من معارفهم اتلاقيت معاهو في السوق فـ طوالي ناداني و قال لي ماشي راجع بيتكم فـ قلت ليهو آيي راجع قال لي طيب اركب أوصلك معاي ،قلت ليهو و هو بعرفك من وين و من وين عارف بيتنا عشان يقول ليك : راجع بيتكم ؟! قال لي عشان كذا مره شفنا بعض في ميدان الكوره الورانا هو ما ساكن هنا لكن دائما بجي لـ ناس خالتو آمال ، أمي قالت ليهو معناها دا ولد خالتهم الدكتور لأنو دائما بجيهم ، في سري قلت أكيد دا احمد ميرغني ، بعد شويه سمعنا صوت الباب قلت لـ ماجد امشي افتحو قال لي فتران ما ماش ياخ و هسي خاشي المطبخ آكل لي حاجه ، لبست توبي و مشيت فتحت الباب...حصلت لي لحظة سكون كدا غريب بقيت مبحلقه عيوني في الزول الواقف قدامي و هو ذاتو شكلو اتفاجأ لما شافني بس عمل نفسو رايح قال لي احم الشافع الدخل هنا قبل شويه نسى الأكياس دي فـي عربيتي اذاً هي تابعه ليكم و مداها لي ، بعد 5 ثواني انتبهت على نفسي و قلت ليهو اتفضل ، قال لي شكراً و اتحرك من جنبي بقيت أعاين ليهو لحدي ما مشى بعيد مني و اتحرك بـ عربيتو لكن اتغظت شديد من برودو و غرورو بس فيهو حاجه غريبه كدا بتخليك غصباً عنك تنجذب ليهو ، تلقائياً ابتسمت بس اتلاشت الإبتسامه دي ىمن اتذكرت انو شافني هنا و أكيد عرف وضعنا كيف بعد دا من سابع المستحيلات يفكر فيني أنا لا مستواهو لا بيئتي الإتربيت فيها بتشبه البيئه الهو جاي منها دا كلو من حظنا الزفت و من العيشه الفقر الإحنا عايشين فيها دي ، دخلت جوه و أمي طوالي قالت لي منو الكان في الباب و دي شنو الأكياس الفي يدك دي ؟ماجد انتبه لي و قال اييييك نسيتهم عدييل الأكياس ديل ، أبوي اشترى لينا حاجات الغد و أداني ليهم عشان اجيبهم معاي للبيت و شكلي نسيتهم في عربية ود الناس 🙆🏻♂️معناها دا هو الكان في الباب ، أمي قالت ليهو و انت عقلك كان وين لما نسيتهم؟إتلفتت علي و قالت لي ليه ما قلتي ليهو يتفضل ما كان تخليهو يمشي !قلت ليها شكلو مستعجل و أصلاً ما ظنيتو يدخل في بيوت زي دي، قالت لي كيفن يعني ، أجي يا بتي!؟
بعد اسبوع من الكلام دا في يوم محمد أخوي جا داخل من غير ما يسلم كان ح يدخل من دون ما يعاين لينا أو يتكلم لكن أمي وقفتو و قالت ليهو تعال هنا، من بعيد قال ليها عايزا مني شنو ياخ، قلت ليهو بضيق دي قلة أدب جديده منك مش؟ كمان بقيت ترفع صوتك على أمك؟ قال لي قفلي انتي التانيه لأني ما سألتك ، عايزا اتكلم كدا أمي قالت لي انتي اسكتي لأني بتكلم معاهو هو، نادتو تاني و قالت ليهو كدي تعالني هنا ، وصلها و هو بتأفأف و صاري وشو قال ليها اها جيتك في شنو؟
قالت ليهو في شنو مالك يا ولدي؟ قال ليها مالي ؟ طبعاً كلامو غاظني ، قلت ليهو احترم نفـ.......سكته لمن أمي رفعت لي يدها بمعنى اسكتي ، واصلت كلامها و قالت ليهو : شايفاك الفتره دي ما تمام طلعاتك كترت و بقيت تجي داخل البيت في ساعات متأخره من الليل والله لا انا لا أبوك غالبنا نحرمك من الطلعه و نتعامل معاك بالطريقه البتريحنا لكن انت زول كبير و ما اظنك محتاج لـ اساليب زي دي عشان تعرف الصح من الغلط، و هسي بـ أمانه كدا قول لي كنت بتمشي وين و مع منو و لشنو؟ قال ليها بضيق مع اصحابي يا أمي مع اصحابي يعني ح اكون وين؟ قالت ليهو بنبره حاده وطي صوتك و إياك تتكلم معاي بالأسلوب دا انا ما بغلبني اقوم عليك و أربيك من جديد و أوعك تقول سكوتي دا خوف منك سألتك سؤال واضح بكل هدوء و روقه فـمفروض انك تجاوب بنفس الطريقه الإنسألت بيها، اتنهد و قال ليها كنت بطلع مع اصحابي و.. ، قاطعتو و قالت ليهو اصحابك منو؟ قال ليها ناس عمرو ياخ، و كل البنعملوا اننا بنقعد في ضل اقرب حيطه او شجره و بنتونس و بس، قالت ليهو متأكد؟ قال ليها خلاص بكرا ارح معانا عشان تعرفيني اذا متأكد أو لا ، قبل ما يقوم قلت ليها بالمناسبه يا أمي محمد دا غشى ناس روان و شال منهم قروشهم اسأليهو وداهم وين و عمل بيهم شنو، محمد طوالي حمر لي لمن قلت كدا ، أمي قالت ليهو الكلام دا صح؟ سكت و ما اتكلم، قالت ليهو سريع تخش تطلع ليهم قروشهم دي ، قال ليها و هو منزل راسو لكن انا اتصرفت بيها، قالت ليهو كيف يعني اتصرفت بيها عملت بيهم شنو؟ ....احسن ليك تتكلم، قال ليها ياخ عزمت بيهم اصحابي يعني الزول ما يعزم اصحابو؟ أمي وقفت على حيلها و قالت ليهو بنبره حاده للمره الميه وطي صوتك دا احسن ما افقدك ليهو، المناسبه شنو عشان تعزم اصحابك؟ في زول مفلس بعمل ليهو حالة عزومه؟ العزومه دي كانت ضروريه عشان تغش اخوانك و تشيل منهم قروشهم و تتصرف بيهم على كيف كيفك؟ قال ليها يا أمي هم دايماً بعزموني و كل يوم دافعين لي قروش لـ مره وحده بس حاولت اكون زيي و زي الناس و اعزمهم ، قالت ليهو لكن انت ما عندك قروش و ما......قاطعها و قال ليها اصلاً ياتو يوم بقى عندي قروش؟ ما دايماً مفلسين و ديون في ديون لا بنشبه الناس لا عايشين زيهم، اقسم بالله دي ما عيشه دي، انعل ابو دي حياة ، قال كدا و دخل طوالي، لكن كلامو لسه بتردد جواي و قدرت احس بنفس احساسو كنت مفتكره إني الوحيده المن بين اخواني المتأزمه من وضعنا المعيشي و محمد دا آخر واحد اتوقعت انو حاجه زي دي تفرق معاهو لأنو حياتو دي كان عايشها بالطول و العرض و محسسنا انو ماف شي فارق معاهو، بس هو من جوه عكس كدا تماماً، عملت لينا شاي و شلت كبايه مشيت بيها لـ محمد و لأول مره اشوفو بالحاله الكان فيها عيونو كانت محمره شديد و ما بستبعد انو كان ببكي، قلبي وجعني شديد لما شفتو كدا ختيت الكبايه قدامو و جيت قعدت جنبو و هو على طول لف وشو مني ،قلت ليهو ابكي اذا عايز تبكي و ما تدس دموعك ، والله نفس الماري بيهو انت انا ماره بيهو و نفس الإحساس الحاسي بيهو انت انا حاسه بيهو لكن نعمل شنو؟ أبوي دا شنو الما عملو عشان يحسن بيهو حياتنا؟! كل يوم بطلع من الصباح و ما بنشوفو إلا بـ ليل تعبان، مهموم و مرهق، لو نحنا متأزمين من الوضع دا يا محمد فـ أبوي متأزم اكتر مننا، أبوي اكتر واحد وضعنا دا مؤثر عليهو و محسسو انو مقصر في حقنا فياريت ما نزيدها عليهو بصرة وشوشنا دي و ضيقنا المستمر، عشان كدا انا قلت ليك ابكي، ابكي قدامي، ابكي قدام اختي، ابكي براك لكن إياك ثم إياك تنزل دموعك قدام أبوي، اوعك تحسسو انو نحنا ما متقبلين العيشه دي و متأزمين منها، الفيهو مكفيهو، قال لي بصوت مبحوح لكن لمتين يا رنا؟ جربتي احساس انو اصحابك دايماً يدفعو ليك في كل طلعه بتطلعوها عشان ما معاك قروش؟ ولا جربتي.....قاطعتو و قلت ليهو جربت يا محمد جربت بس ربك كريم، اقفل الموضوع دا و هاك اشرب الشاي دا ما يبرد، طلعت منو و انا بالجلاله ماسكه دموعي، قلت ليهو كلام انا ذاتي ما مقتنعه بيهو و رافضاهو لكن ما بنكر حقيقة انو ابوي شقيان شديد عشانا 💔
___________________________
__________
آلو ايوه يا مراد .....لا ما اتأجلت في موعدها........لا ياخ ليه ما حتقدر تجي؟.........لا يا زول ما بقبل عذرك المره دي، يعني نحنا لينا قريب الإسبوعين او اكتر ما طلعنا طلعه مع الشباب.....لا ما تقول لي ماف طريقه هسي ح اغشاك في القسم و نتحرك سوا ، بعد ما قفلت من مراد ، ركبت و دورت العربيه، في طريقي مريت بمكتبه و اتذكرت اني عايز كتاب مهم شديد بالنسبه لي فـ بركنت العربيه و نزلت و على طول دخلت المكتبه، كانوا في بنتين واقفين قدامي و بتاع المكتبه واقف بتظارف معاهم، أشرت ليهو عشان يمشيني، قال لي دقيقه هسي بجيك و الدقيقه دي بقت دقيقتين و تلاته ، اضايقت شديد و قلت ليهو ياخ ما معقوله معاك ، صنم انا ياخ؟ ما تمشينا و بعدها اقعد اتظارف براحتك، قال لي براحه يا حبيبنا ما شايف البنات ديل؟ ديل جوا قبليك ، قلت ليهو ايوه نعم جوا قبليني و واضح انهم ما عايزين يشتروا، إتلفتت علي وحده من البنتين، أول ما شفتها عاينت ليها مسافه و هي ذاتا عاينت لي بنفس النظرات...بيني و بين نفسي قلت تااااني؟!!!
يتبع....
