_اتكلمي ما تسكتي ياخ! بتحبي مراد؟
قالها لي بضيق و زهج كدا لمن خلعني و ما عرفت اقول شنو بقيت بين نارين، لو قلت ليهو ايوه بحبو ، حيكلم مراد و يورطني معاهو و انا بالجد ما بحب مراد ، بحب......أحمد ميرغني ...و لو قلت ليهو لا ما بحبو كدا بكون أثبت صحة الكلام القالو أحمد لـ مراد عني، في نظرهم الإتنين ح أكون مخادعه و انو انا كنت جاريه ورا مراد عشان قروشو ، و بكدا حتكون نجحة خطتهم و بكون أحمد قدر يثبت لـ مراد انو انا فعلاً كدا .....بقيت أفكر اقول شنو؟! حتقولي شنو يا رنا! فجأه و من غير ما أفكر كتير قلت ليهو كذبت علي ليه؟
قال لي ببرود ما تتهربي من السؤال كلامي واضح فـ رجاءً خلي حركاتك دي!
قلت ليهو جوابني أول، ليه كذبت علي و وصلت لي احساس انك معجب بي و يمكن بتحبني؟ عشان شنو بس؟! عشان تثبت لـ مراد اني انسانه ما كويسه و جاريه وراهو عشان قروشو؟
نزل نظارتو و قال لي بتقولي في شنو انتي؟
طوالي انفقعت بالبكى و قلت ليهو انا لا بحبك انت لا بحب مراد ، و عملت كدا انو مراد هو الجاري وراي ما أنا، لعبت نفس اللعبه الإنت لعبتها علي بالإتفاق مع مراد ، كنتوا عايزين تعرفوا نهايتي وين و تمسكوني من اليد البتوجعني صح؟
لكن انا رنا دي لا هينه لا لينه و زي ما عملتوا فيها شفاته و لعبتوا بي انا كمان عملت كدا و ما محتاجه أي قرش لا منك لا من صحبك الكنت بتحذرو مني و بتقول ليهو خليك بعيد من البت دي ، وقفت على حيلي و قلت ليهو ما انا البنخت تحت الضغط و ما انا البنهزم بسؤال ، اصلاً تعبت من الحاصل دا كلو، و يلا قبل ما أمشي قول لصحبك انو ما بحبو و أهم شي تقول ليهو اني عارفه باللعبه العملها من وراي ، قلت كدا و اتحركت من جنبو فجأه وقف و جارني بالقوه من يدي و قعدني قصادو ، عيونو كانت زي الشرار شويه كدا حسيتو ح يضربني كف، ما أكذب للحظات خفت منو و قربت أقوم من مكاني و أجري لأنو معالم وشو ما كانت بتتفسر، قال لي بنبره حاده ما أعيد كلامي تاني بتتكلمي عن شنو انتي؟
قلت ليهو ئهه عليك الله ما تعمل لي نفسك رايح و ما عارف حاجه، أكيد ما محتاج أكلمك بحاجه انت عارفه، المخليك تستغرب شنو؟ ااااا مستغرب من حتة إني كشفتكم صح و لعبت عليكم؟
ايوه لعبت عليكم، قصداً اتلاقيت مع مراد و رسلت ليك عشان تجي و تشوفنا سوا ، صحبك ما بقصر مستعد يلبي لي أي طلب بدليل انو أو ما قلت ليهو يجي خلى شغلو و كل شي وراهو و جا لحد عندي حتى لما انت صحبو المقرب و العزيز اتصلت عليهو كذب عليك و قال ليك انا مشغول في حين انو كان قاعد معاي، عارف ليه؟
لأنو ما عايزك تدخل في حياتو و تخربها ليهو لأنو عارفك حتقول ليهو رنا زوله ما كويسه و شنو ما بعرف و تحاول تغسل ليهو مخي عشان كدا إعجابو بي دي الحاجه الوحيده الما حب يشاركك بيها و ما حب انك تعرف أي شي بخصوص الموضوع دا.
بقى ساكت و بعاين لي بإستغراب ، بعد مسافه قال لي دا كلو كان لعبه منك؟ كنتي بتلعبي بينا انا و مراد عشان تعملي مشاكل بيناتنا؟يعنى انتي الكنتي بترسلي لي في كل مره كنتوا بتتلاقوا فيها ما مرافى ؟!
ليه؟ عشان كنتي مفتكره اننا متفقين عليك؟ جبتي الكلام دا من وين انتي؟ على أي اساس رسمتي الحاجه دي في خيالك و صدقتيها! انا و مراد ما اتفقنا على أي زول و اصلاً ما عندي علم انو في شي بيناتكم أو انتوا بتتلاقوا مع بعض إلا لما براك كنتي بترسلي لي على اساس انك مرافي عشان أجي و أشوفكم مع بعض! و....
قاطعتو و قلت ليهو يعنى انت ما كنت بتحذر مراد مني و بتقول ليهو انا ما كويسه و جاريه وراهو عشان قروشو؟
سكت و ما اتكلم، قلت ليهو الجواب وصلني! قبل ما أقوم من مكاني قال لي فعلاً انا قلت ليهو كدا بس......قاطعتو و قلت ليهو ما عايزا اسمع ولا كلمه منك و اعتبر نفسك انتصرت و قدرت تثبت لـمراد اني وحده بتاعة مصالح و فعلاً انا كدا و دي حقيقتي ارتحت!؟ و من اليوم لا انت لا صحبك ما تجوا بجنبي فاهم! قلت كدا و على طول طلعت من المكان و خليتو متحير، مشيت سريع عشان ما يوقفني تاني، طلعت منو و انا مقهوره و بالجلاله ماسكه دموعي، ياريتك لو تعرف انا حبيتك قدر شنو بس حتى لو عرفت حتقول إني بتقرب منك عشان قروشك و اساساً مستحيل تفكر في وحده زيي .....من مكاني داك مشيت بيت ناس مرافي و حكيت ليها الحصل كلو من البدايه للنهايه و رجعت ليها شريحتها و قعدت أبكي، حضنتني عليها و قالت لي كدا احسن، اصلاً انا من البدايه حذرتك من أحمد ميرغني و قلت ليك مستحيل يحبك دا بلعب ببنات الناس ساي و شايفهم رخيصات يا. رنا لازم تعرفي انو أحمد زول نسونجي ساي و تافهه و قليل أدب يمكن دي الحاجه الوحيده الما حكيتها ليك عنو، هو ياما كان بجيب بنات في شققو و كل مره جايب وحده جديده، تفكيرو كلو وسخ و قذر و انتي مفروض تحمدي ربنا انو ما وقعك فيهو ، صدقيني أحمد كان ممكن يستغلك عادي و يوديك شقتو لو كان عرف انك بتحبيهو و ميته عليهو ...
أول ما قالت كدا انصدمت شديد ، رفعت راسي و بقيت أعاين ليها بإستغراب، قلت ليها لا لا أحمد ما بيعمل كدا هو ما سيئ للدرجه دي، قالت لي انت بس ما عارفه عنو حاجه، يا رنا أحمد انا بعرفو من زمان و مصايبو دي كلها انا عارفاها ما انا بس حتى ندى بت خالتو أمل عارفاهو كان بعمل في شنو و مراد كمان عارف و كذا مره حاول يمنعو بس أحمد ما بسمع من زول و شايف البنات ديل حاجه رخيصه ، كان بقول لمراد لمن يحاول يمنعو هن براهن بجن لحدي عندي فأكيد ما ح أقصر منهن ، و اذا ما مصدقاني يا رنا اسألي مراد و ما أظن في شي يخليهو يكذب عليك و يتهم صاحبو في حاجه باطله و عايزا اقول ليك ما أطن مراد دا متفق مع أحمد لأنو مراد بالجد بحبك حتى انو قبل شويه اتصل و سألني منك قال انتي ما بتردي على تلفونك ، قلت معناها عايز يتأكد من الكلام الأنا قلتو لأحمد قبيل ....
