بقيت اقول ليهو اسرع ياخ ، مع انو هو ماشي بأقصى سرعه ، قال لي بعد نفاذ صبر في شنو يا بت الناس ليان مالا ؟ من قبيل بتكلم معاك افتحي خشمك دا ، قلت ليهو ما عارفه بس هي اتصلت علي و قالت لي ألحقيني و عرفت انها ورا الجامعه و الخط قطع اتصلت في تلفونها بس ما بترد!
قال لي ورا الجامعه دا وين بالضبط! جامعة افريقيا دي كبيره و مجزأه !
سكته مسافه و بقيت احاول افكر قصدها وين! وصلنا جنب بوابة الجامعه، كان حيقيف بس انا قلت ليهو لا واصل و لف بالظل داك ، لأني عرفت هي قصدها وين! قال لي طيب اتكلمي!
قلت ليهو اتحرك أول شي ، ركبنا و اتحركنا ، قال لي يعنى لازم كل مره اقول ليك اتكلمي!؟ انتي بتتكلمي بالقصد ليه ، قولي العندك كلو ....قلت ليهو لف بيجاي و اقيف جنب الشجر داك ، لمن وصلنا المكان الفيهو شجر، نزلت و قلت ليهو كنا بنقعد في المكان دا لما المواصلات تكون زحمه أو معدو......قاطعني و قال لي دا ما وقتك و دخل قبليني للمكان العباره عن شجر بس ما كتير ، مشيت وراهو و بقى ينادي على ليان ، اتصلت في تلفونها تاني بس مغلق، وقفت قصاد المكان الكنا بنقعد فيهو انا و ليان و رفقه، كان فيهو ترابيزه كبيره و كرسيين و عصير و أكل! شويه كدا و من حيث لا احتسب حسيت بزول نط فيني، غمضت عيوني و بقيت اصرخ، ما سكته إلا لما أخو ليان قال لي بنهره يا بت الناس اسكتي ياخ!
فتحت عيوني و شفت ليان قدامي، قلت ليها بلهفه كويسه انتي و الحصل ليك شنو و تلفونك ليه مغلق و ليـ....قاطعتني و قالت لي كذبت عليك!
قلت ليها شنو! قالت لي زي ما سمعتي كذبت عليك! ما حصلت لي أي حاجه ، اضايقت منها شديد طلعتني من المستشفى و جابتني من آخر الدنيا عشان تقول لي كذبت عليك! اتحركت من جنبها و انا عايزا أطق من الزعل، لحقتني و قالت لي دقيقه! ماشه وين ؟
ما رديت عليها و واصلت، سحبتني من يدي و رجعتني لمحل ما كنا واقفين، قعدتني في الكرسي و قالت لي آسفه على العملتو بس ما لقيت طريقه أجيبك بيها غير دي، كذا مره بحاول اتكلم معاك بس انتي بتصديني و لما اتصل عليك ما بتردي فـ دي كانت احسن طريقه!
أخوها قال ليها بغضب كدا: هسي جايباني من هناك عشان مقلب بايخ منك!
قالت ليهو انا ما قلت ليك تعالي و اساساً ما اتصلت عليك و اصلاً لو حصلت لي أي حاجه مستحيل أفكر اتصل عليك و أكلمك ، بعد ما قالت ليهو كدا ملامح وشو اتغيرت ، هي تاني ما اتكلمت معاهو، عاينت لي و قالت لي جبتك عشان اعتذر منك على كل شي قلتو أو عملتو ليك، معليش شديد يا مها، ما كان اشك فيك و ما كان اخرب علاقتي بيك عشان واحد حيوان و مقرف زي وليد .....سكتت و بقت تبكي و تقول لي عليك الله خلينا نرجع زي زمان، عارفه نفسي غلطت كتير في حقك و سمعتك كلام فارغ ما كان في داعي ليهو، بس دا كلو بسبب وليد و شلتو هم الخلوني اشك فيك ، هو الفهمني انك جاريه وراهو و دايماً بتتصلي و بترسلي ليهو، هو الفهمني انو انتي بتوصلي لأحمد كل حاجه انا بعملها في الجامعه و كل مشوار انا بطلعو، مع اني بعرفك أكتر منهم بس هم اقنعوني و خلوني اشكك فيك لكن في الآخر عرفت حقيقتهم ، لو عايزا ممكن تشتميني و ممكن تضربيني برضو بس في الآخر خلينا نرجع زي زمان
بقت تبكي بحرقه و دموعها كانت زي الشلل، وقفت على حيلي و جيت جنبها و قلت ليها انا ما زعلانه منك و أنسى الفات، وقفت على حيلها و ضمتني شديد و بقت تبكي، مسحت ليها دموعها و قلت ليها الموضوع ما مستاهل البكى دا كلو يا ليان، كفايه خلاص، شلت مويه و شربتها ليها و قعدت معاها عشان احنسها، شويه كدا و تلفوني رن المتصله كانت أمي، لما رديت عليها قالت لي مشيتي وين ما لاقياك انا؟ قلت ليها ما مشيت بعيد هسي بجي ، بعد ما قفلت قلت لـ ليان انا ح امشي بعد دا لأنو حبوبة في المستشفى، قالت لي سلامتها في مستشفى شنو؟ قلت ليها الله يسلمك، في مستشفى ( ) قالت لي دي نفس المستشفى الشغال فيها الفقر داك ، قلت ليها ممكن سؤال؟ قالت لي ايوه اتفضلي ، قلت ليها ليه انتي و أخوك بتتعاملو
مع بعض كدا؟ بحسكم كأنكم ما أخوان! دا بالإضافة لأنو ليه هو اسمو أحمد ميرغني و انتي اسمك ليان السيد! اتنهدت و قالت لي لأنو أخوي من أمي بس، عشان كدا هو لا بطيق أمي لا بطيقنا نحنا، قلت ليها و ليه ما يطيقكم في النهايه انتوا أخوانو! قالت لي أخوانو بالإسم بس لكن يوم واحد ما حسسنا بالحاجه دي، كلامو معانا كلو شكل و زهج و ضيق لو زول مننا قرب لحاجاتو ساي وطاتو مغربت، لا بقرب مننا و يعرفنا اكتر لا بخلينا نقرب منو، هسي لو سألتيهو اخوانك بقروا سنه كم ما حيعرفهم و ما بعيده يكون اسامينا ذاتا ما عارفها، كراهيتو لينا لحدي الآن ما لاقيه ليها مبرر ، قلت ليها استحاله زول يكره اخواني للدرجه دي لمجرد انهم أخوانو من أمو! قالت لي ما استحاله لأنو احمد فعلاً بكرهنا و شديد كمان ، قلت ليها لو كان بكرهكم ما كان هسي جا معاي و خلى كل شي وراهو، بمجرد ما قلت ليهو ألحق اختاك مع غير ما يتردد جا معاي، قالت لي لأنو لو ما عمل كدا انتي حتقولي عنو شنو! صدقيني كل شي بعملو لينا بكون مغصوب عليهو لأنو انفرض عليهو، هسي ما شفتيهو كان مضايق كيف! يا ريت لو أبوي كان حي ، كان حيعوضنا عن حاجات كتيره ناقصانا و نا ح يخلينا نعتمد على زول، المهم يا مها ما عايزا اتكلم عنو كتير لأنو الكلام ذاتو شويه و ما حيكفى عشان اصف المعانا الأنا عايشاها
عاينت ليها جوه عيونها و لأول مره قدرت اشوف الوجع و المعانة فيها، لأول مره اشوف ليان مكسوره و مجروحه للدرجه دي مع اني بعرفها ليها فتره و كنا صحبات شديد لكن أول مره اشوف الجانب المظلم من حياتها، ما حصل جابت لي سيره عن الموضوع دا و ما حصل شكت لي أو فضفضت لي عن البتمر بيهو ، قلت ليها موضوعنا ما انتهى ح امشي بس حنتلاقى تاني، انتي حترجعي للجامعه صح؟ خشي و تندسي لي طيب ! قالت لي إلا تتصلي على رفقه تتندس لينا الإتنين لأني حمشي معاك، قلت ليها تمشي وين يا بت و المحاضره! ناسيه انو الإمتحانات قربت! قالت لي حريقه في المحاضره و في الإمتحانات ذاتو، ارح ارح قلت ليك حمشي معاك معناها ح امشي، ما تناقشيني و انتهينا ، قلت ليها طيب تعالي ، قالت لي دقيقه نادت على واحد اسمو طلال و قالت ليهو شيل الأكل و الحاجات ديلك و رجع الكراسي لـ الجيلي و قول ليهو شكراً، قلت ليها عاد الجيلي دا عذبتيهو عذاب كل مره كنا نجي فيها هنا بتشيلي منو كراسي ، المهم طلعنا من المكان الفيهو الشجر و كنا حنقطع الظلط بس جات عربيه وقفت قدامنا، طلع دا أخو ليان! قايلاهو مشى من قبيل! قال لينا اركبوا، ليان قالت ليهو ما تتعب نفسك معانا، قال ليها بحزم و بنبره حاده اركبوا ، ليان قالت ليهو لا، حسيتو شويه كدا حينزل و يكفتها اصلاً هو قاعد على الهبشه بس أخلاقو ضيقه و اعصابو بايظه ، قلت لـ ليان بصوت واطي: أخوك دا كعب و زول عصبي شديد لو اتلائمتي معاهو ممكن يطقشنا الإتنين بالعربيه و يمشى من غير ما يرف ليهو جفن فالأحسن نركب انا همي نصل سريع لأنو المسافه بعيده ، قالت لي طيب ، الإتنين ركبنا ورا ، أخوها قال لينا الإتنين راكبين ورا ح آكلكم يعنى لو ركبتوا قدام؟
ماف وحده فينا ردت عليهو ، قال لينا ماشين وين؟ قلت ليهو المستششفى، سكت و اتحرك ، بعد شويه رفقه اتصلت علي، قالت لي انتي وين يا بت من قبيل بفتش عليك، قلت ليها بحكي ليك بعدين، ليان قالت لي قولي ليها تندسي لينا، قلت ليها يا رفقه عليك الله تندسي لينا في المحاضره الجايه، قالت لي انتي و منو؟
قلت ليها انا و ليان، قالت لي تاني ليان يا مها؟ طوالي قفلت الخط، ليان شكلها زي الفهمت الحصل، قالت لي زعلت صح؟ اصلاً رفقه دي ما بتطيقني كأني كتلت ليها زول، قلت ليها ما كدا بس هي شويه زعلانه من العملتيهو و الكلام القلتيهو ، قالت لي لو في زول مفروض يزعل مني شديد فهو انتي لأنو اساءاتي كلها كانت موجه ليك انتي أكتر شي هي الدخلها شنو؟ صدقيني هي زعلانه لأنها ما بتحب تشوفني معاك و بتضايق شديد لما تشوفنا ماشين مع بعض و هي بذات نفسها قالت لي كدا! قلت ليها شنو! متين دا؟
قالت لي قبل ما اتخاصم معاكم ، هي و بنات الدفعه كانوا بتكلموا عن موضوع كدا المهم قعدت معاهم و بقيت اتكلم معاهم فهي قالت لي انتي خاشه غلط نحنا ما بنتكلم عن الحاجه دي، قالتها لي بطريقه كدا ما قدرت افسرها، قلت ليها معليش خشيت غلط، قالت لي عادي ما أصلاً دا الإنتي متعوده عليهو، مرات بتخشي غلط في المواضيع و مرات بتخشي غلط بين الناس ، في البدايه ما فهمت قصدها بس لما بقت تقول لي الكلام دا كتير و كل يوم ترمي لي فيهو خاصة لما تشوفني ماشه معاك فهمت قصدها، مشيت ليها عديل و قلت ليها انتي مضايقه مني عشان صاحبت مها ؟ وجودي معاها بزعجك؟
هي شكلها كانت مقهوره شديد و عايزا الطريقه الحتخليها تطلع الجواها كلو، من دون ما تتردد قالت لي ايوه مضايقه و شديد كمان، مها قبل ما انتي تصاحبيها كانت صحبتي شديد بس انتي دخلتي بيناتنا و الزمن كلو لاصقه فيها بس خلي حاجه وحده في بالك انا صحبتها الوحيده و مستحيل تفضل زول علي و هي بلسانها قالت لي ليان دي بالنسبه لي زميله و بس و هي براها بتجيني و ما بقدر اقول ليها ما تمشي معاي ...
ما عارفه اذا القالتو صح ولا لا بس انا من اليوم داك بقيت ما بحتك بيك كتير و ما بقعد معاك كتير ، عشان كدا لما وليد و شلتو قالوا لي كلام عنك على طول انا صدقتهم زعله منك ساي خلتني اتغير عليك 180 درجه، اضايقت شديد لما رفقه قالت لي مها معتبراك زميلتها و بس
بعد ما ليان خلصت كلامها قلت ليها انا بالجد ما قلت كدا و أبداً ما كنت عارفه انك متناقشه مع رفقه لا انتي لا هي ما جبتوا لي سيره و انا مستغربه لي رفقه قالت ليك كدا، بس حصل خير يا ليان و خلينا نقفل الموضوع دا هنا و رفقه انا بتكلم معاها انتي ما تسأليها عشان علاقتكم ما تسوء زياده!
لما عاينت للمرايه ، لمحت أحمد و هو بعاين لينا الإتنين شكلو مركز شديد مع الكلام القلناهو، بعد سكوت طويل قال لـ ليان عشان تاني تتعابي الحيوان داك و شلتو، انا حذرتك منو و تاني ح احذرك منو و من غيرو كتار في الجامعه، مره وحده بس يا ليان لو شفتك واقفه مع ولد الجامعه دي تاني إلا تشوفيها في المنام، ليان قالت ليهو انت بس ما تدخل في حياتي ، ما عندك أي حق لا علي لا على أخواني مش نحنا أولاد المره البتقول ليها رقيه؟
قال ليها نبهتك انا و بس كدي اعملي عكس القلتو ليك ، قال كدا و ساق العربيه بأقصى سرعه و انا بس مستغربه في الأسره الغريبه دي! كيف اخ ممكن يكره أخوانو عشان هم من أمو بس! حاجه تحير، اتذكرت لما جيتهم في بيتهم هو كان بشاكل في أمو كأنو بشاكل ليهو في شافعه و صوتو كان مالي المكان!
______________________
______________
