في اليوم البعديهو جونا ناس حبوبتي أم أمي ، اصلاً هم في قريه ما بعيده مننا ، في يوم أمي قالت لي خلينا نمشي نشوف الأرض بتاعتنا و نشوف اذا بنقدر نزرعها كلها ولا لا، قلت ليها طيب....و على طول مشينا ليها في اليوم البعدو، الشمس كانت سخنه شديد جريت لأقرب شجره و قلت لأمي فترت تعالي نرتاح تحت الشجره ديك ، قلت ليها المسافه طويله ياخ هسي لو تلفوني ما اتعطلت كنت ح أتسلى بيهو شويه و غير كدا كنت عايزا اتصل على صحباتي ، قالت لي بكرا عوض ماشي السوق أديهو تلفونك عشان يهوديهو ليك و يتصلح، قلت ليها إلا كدا ، المهم مشينا و شفنا الأرض و أمي قالت أحسن نزرعها كلها ، في اليوم البعديهو طوالي مشينا للأرض تاني دفنا البذور و من هناك مشينا لقرية "أولاد حامد " عشان نزور نمارق أختي، قالوا انها قربت للولاده و أمي قالت حنجيبها معانا ، المهم مشينا ليها و هاك يا الأحضان و البكى قعدنا معاها لحدي الساعه 4 و حاجه كنا بنحكي ليها كل العشناهو و المرينا بيهو و سألناها عن أبوي برضو قالت ما عارفاهو مشى وين، قالت لينا اسألوا منو الجيلي يمكن هو عارفو مشى وين في الآخر قالت لينا ما بقدر أمشي معاكم إلا أكلم راجلي و هسي هو ماف، أمي قالت ليها سمح لـ بكرا طيب، المهم ودعناها و طلعنا منهم ، ركبنا الكارو حقنا و أمي هي الكانت سايقاهو، مشينا بعيد من حلة ناس أختي و الدنيا خلاص ماشه تمغرب، من لعيد لمحنا خيمه ، أمي قالت لي بتكون دي خيمة الجيلي لأنو دايماً بسكن في الخلا كدي خلينا نمشي عليهو، مشينا على خيمتو نزلنا و وقفنا قصادها، أمي بقت تقول "الجيلي، السلام عليكم! " بس ماف زول رد مع إنو في صوت حركه جاي من جوه الخيمه، غيتو انا خفت شديد و بقيت أقول لأمي بصوت واطي خلينا نمشي من هنا! قلت كويس يلاااا ارح سريع، قبل ما نتحرك سمعنا صوت الجيلي و هو بنادي علينا، كان جاي من اتجاه معاكس لينا ، لما وصلنا أدنا الفاتحه و سلم علينا بحراره و بدا يسألنا عن احوالنا و اخبارنا و.......الخ، لحدي ما جبنا سيرة أبوي و برضو قال ما عارفو مشى وين، قلنا ليهو خلاص بعد دا نحنا حنمشي الوقت اتأخر، حلف ما نمشي برانا و بقى ينادي يا أحمد ، يا أحمد .....فجأه حصلت لحظات صمت لما أحمد ميرغني جا طالع من الخيمه، انا و أمي عاينا لبعض بإستغراب و رجعت عاينت ليهو هو، ملامحو كانت متغيره شديد، لحيتو كثيفه و ما مرتبه و عيونو مدفونه و لونو شاحب، كأنو ما أحمد الشفتو قبل كدا، جا سلم علينا و في حزن شديد في صوتو و ملاح وشو كئيبه! أمي قالت ليهو يا ولدي متين جيت بلدنا دي؟ بعد مسافه قال ليها طولت هنا! الجيلي قال ليها طبعاً أحمد ميرغني دا معرفه قديمه، أبوهو المرحوم كان صحبي شديد
المهم عمو الجيلي طلب من أحمد يمشى معانا، و هو ما قال أي كلمه، ركبنا و اتحركنا و طول الطريق هو ساكت و انا في راسي ألف سؤال أولهم الخلاهو يمشى من أهلو و يجي هنا من غير ما يكلمهم شنو؟
___________________
______________
_____
اتصلت على مرافي و قلت ليها مليت من قعدة البيت رايك شنو نطلع؟
بإستغراب قالت لي ما عندك مشكله لكن نمشي وين؟ قلت ليها نفس المكان الكنا بنتقابل فيهو زمان ، المهم بعد ساعه لبست عبايتي و لفيت طرحتي ، أمي كانت بتعاين لي ساي و عارفه إنها ما عايزاني أطلع، و انا كمان الطلعه دي ما عجباني و اصلاً من يوم الحصل لي بقيت تاني ما بطلع من البيت و دي كانت أول مره أفكر أطلع فيها، أمي جات و قالت لي بضيق ماشه وين؟
رفقه ادخلت و قالت ليها سايقاها معاي انا يا خالتي عايزا أغير ليها جو كفايه عليها الحصل ليها و الأيام الكئيبه القضتها وسط أربع حيطان، المهم بيجاي بيجاي رفقه قدرت تقنع أمي و طلعنا الإتنين سوا ، لما وصلت المكان المفروض نتلاقى فيهو أنا و مرافي لقيتا لسه ما جات مع إني اتأخرت، قعدت و بقيت منتظراها، بعد ربع ساعه جات و قالت لي كيفك بتردد كدا! وقفت على حيلي و حضنتها و قلت ليها كويسه الحمدلله انتي كيفك و شنو الغيبه دي؟
قالت لي مشغوله مع عرس إختي نظام أخت العروس و كدا، قلت ليها ربنا يتم ليها على خير و عقبالك يا رب، ضحكت بتردد و قالت لي آمين جمعاً، قلت ليها يا كعبه! نططت عيونها و قالت لي كـ كيف؟ قلت ليها آيي كعبه يعنى كما اتصلت عليك و طلبت أشوفك ما كنتي حتجي و تشوفي صحبتك؟
قالت لي ما كدا يا رنا العفو ياخ، ابتسمت و قلت ليها ما مشكله يا زوله عذرك معاك و انا عارفاك لو ما بالجد مضغوطه و ما لاقيه طريقه ما بتقصري مني والله ....ما في النهايه انتي صحبتي العزيزه البتحبني شديد ، حسيتها اتوترت و بقت تعاين يمين و شمال و تحت بس ما بتخت عيونها في عيوني، اتنهدت و قلت ليها جبتك عشان افضفض ليك ، أمبارح أحمد اتصل علي من رقم غريب، قالت لي بخلعه شنو شنو؟ طيب قال ليك شنو و هو مشى وين؟
قلت ليها بقى يعتذر مني و قال لي في زول خطط لـ دا كلو و طلب انو يشوفني بس انا لحدي الآن ما أديتو رد ياخ بطني طامه من شديد حتى صوتو دا بقيت أقرف منو، قلت لي بإنفعال و انتي ليه تردي عليهو اساساً، رنا أحمد دا واحد حيوان و وسخ ساي و نسونجي نسيتي العملو فيك؟ نسيتي أنك بسببو فقدتي شرفك الما حيتعوض تاني؟
بعد ما قالت لي كدا بقيت أبكي بحرقه، وقفت على حيلي و قلت ليها ح أمشي الحمام و أجي، قالت لي طيب، مشيت طولت في الحمام و لما جيت راجعه قلت ليها خلينا نمشي بعد دا، قالت لي تمام بس ما تنسي كلامي و ما تنسي العملو فيك أحمد و الأذى السببو ليك و لـ أهلك خاصة أبوك ، قلت ليها فعلاً كلامك صاح و ياريتني ما حبيتو و ما عرفتو و الله ينعلو و يكسرو زي ما كسرني، كلو بسببي انا، انا الأديتو فرصه فيني و انا الكنت جاريه وراهو يا ريتني لو ما حبتو و ما فضلتو على مراد، قالت لي شنو؟
قلت ليها يا ريت لو ما فضلت الحيوان داك على مراد و يا ريتني لو سمعت كلامك لما كنتي بتقولي لي انو مراد بحبك و مستعد يعمل أي شي عشانك ، مراد أثبت لي انو الصح و انا الغلط، وقفتو معاي دي عمري ما حنساها ليهو ما هو بس حتى انتي ما قصرت معاي، انتوا الإتنين فضلكم على كبير و ربنا يقدرني أجزيكم، قالت لي ما تقولي كدا و متى ما احتيجتيني حتلقيني قدامك.....
