طبعاً أم مرافي ما خلت نبذ ما نبذتنا ليهو مع اني دخلت جوه بس لسه سامعه صوتها بعد شويه سمعت صوت رفقه و هي بتقول ليها رنا ما وسخه و غداره زي بتك الما نافعه ديك و انتي يا محترمه قبل ما تتكلمي في عرض الناس و تربيتها امشي شوفي المسخوته بتك ديك، اسأليها الشرطه جات ساقتها ليها، لو انتي أم بالصح من نظره وحده بتعرفي بتك بتكذب ولا لا و هسي من غير مطرود أطلعي من هنا و إلا اقسم بالله أنسى إنك أكبر مني ، أم مرافي نبذت رفقه و أهلي قدرتها و طلعت مشت بعديها طوالي رفقه جاتني و قالت لي غبيه انتي؟ ليه تسكتي ليها و تجي داخله بتخافي منها انتي؟
قبل ما اقول حاجه أمي جات داخله و وراها طوالي باقي أهلي، رزعت الباب و قالت لي بنبرة غضب في شنو ! عملت شنو كمان؟
سكته و ما رديت عليها أصلاً من يوم الحادثه الحصلت علاقتي بيها اتغيرت، بقت تتزهج فيني لأتفه الأسباب و المكان البكون قاعده فيهو ما بتعتبو ، قالت لي طرشه انتي بتكلم معاك يا زفته عملتي شنو كمان؟
محمد أخوي قال ليها أهدي يا أمي ما كدا، قالت ليهو بضيق ما كدا كيف طيب ما شايفها عامله نفسها طرشه كيف! بسألك انا جاوبيني يا.......قاطعتها رفقه و هي بتقول ليها براحه يا خالتي ما تكوركي فيها كدا! محمد جا قعد جنبي و قال لي في شنو يا رنا؟ أم مرافي دي كانت بتقول في شنو؟
سكته ساي و ما اتكلمت مع زول آخر همي انهم يعرفوا و أصلاً ما فارقه معاي و ما عندي نيه أشاركهم بحاجه بتخصني ، لما كتروا علي الأسئله و أمي بدت تجوط رفقه قالت ليها كفايه ياخ انا ح أقول ليكم الحصل مع انو ما مفروض ذاتي أحكي ليكم.....المهم رفقه حكت ليهم بالعملتو مرافي و قالت ليهم انها كانت متفقه مع مراد و واحد اسمو أحمد و هو الإغتصبها و دا كلو بسبب مرافي و حكت ليهم اننا رفعنا قضيه ضدهم التلاته و في واحد منهم انسجن و هسي الدور جاي على مرافي و مراد ، أمي ختت يدينها على راسها و قعدت في السرير و بقت تردد لا حول ولا قوة إلا بالله ....حسبي الله و نعم الوكيل ....محمد أخو كان واقف بس و بعاين لي و هو مصدوم بعد مسافه قال لي مراد دا مراد الشرطي داك؟ الكان جابك لينا و حكى لينا الحصل معاك؟
رفقه قالت ليهو ايوه دا المنافق و الكذاب ذاتو ، قال لي اقسم بالله ما أخليهو و بقتلو ليكم عديل اليوم قبل بكرا و كان حيطلع بس أنا و رفقه مسكناهو و بقى يتقالع معانا في الآخر اتفكى مننا و مشى على المطبخ شال ليهو سكين و كان حيطلع بس أمي مسكتو قالت ليهو ما عافيه ليك لو عتبت الباب دا شبر، قال ليها بتهدديني يعني؟ المره الفاتت سكتيني و قلت لي ح اقتل نفسي لو فتحت القضيه دي و هسي حتمنعيني برضو؟ أي نوع من الأمهات انتي البتهتم بالمجتمع أكتر من بتها! هسي رنا دي من يوم الحادثه حصل جيتي طليتيها أو عرفتي الحاصل بيها و العليها؟ لمن مرضت فتره و كانت بتهضرب باليل و النهار حصل جيتي وقفتي في راسها؟ لمن مرت بأصعب فتره و وصلت فيها لدرجة الإنتحار هل حاولتي تمنعيها و تمنعيها؟ حسستيها مره واحده بالأمان و الإطمئنان البتحتاج ليهو وحده حصلت ليها حاجه زي دي؟ زي ما انتي ما ادخلتي في دا كلو و قررتي تكوني بعيده عنها و عن أي حاجه بتخصها عليك الله هسي كملي معروفك دا للآخر و خليك بعيده عن كل حاجه ليها علاقه بالقضيه دي ،
مسكت محمد من يدو و جدعت منو السكين قلت ليهو ما توسخ يدك بيهو القانون حياخد لي حقك انت بس خليك واقف معاي، قال لي معاك للآخر بس زعلان منك شديد ليه ما حكيتي لي؟ صنم أنا ولا مزهريه؟ قايلاني زي أمي كنت ح أمنعك؟
قلت ليهو ما كدا بس.....قال لي لا بس لا حاجه ، جاط قدرتو و طلع خلانا واقفين ، عاينت لأبوي القاعد في الكرسي و ما قادر يتحرك أو يقول كلمه بس دموعو كانت عشره عشره ، شوفتو دي خلتني انا ذاتي أبكي معاهو، مشيت قعدت جنبو و بكينا قدرتنا .....
في اليوم البعديهو رفقه قالت لي انا طالعه مشوار قريب و ح أجي راجعه ، قلت ليها ما ماشه الجامعه؟ قالت لي لا لأنو اليوم ما عندي و بمناسبة سيرة الجامعه دي انتي ما عايزا تنزلي ولا شنو؟ نتيجتك نضيفه ياخ انزلي ساي و بعدين ياداب الناس في بداية السنه التانيه ...
قلت ليها ما عندي نيه والله و اساساً انا خليت الجامعه، هاجت فيني و جاطط قالت لي كيف يعنى تخليها أكيد انتي مجنونه ما على كيفك يا زوله، قلت ليها خلاص امشي مشوارك حتتناقش بعدين ، المهم بعد ما مشت و جات لاحظت ليها سرحانه ساي ، قلت ليها مالك في شنو؟ قالت لي ولا شي، قلت ليها علي انا؟ و بعدين مشيتي وين انتي، ما حكيتي لي في كدا ولا كدا؟
ابتسمت و قالت لي لا ماف حاجه بالشكل دا بس انا اليوم مشيت عشان اقابل مها! قلت ليها ايوا و سكته! قالت لي ما عايزاك تزعلي مني مها في النهايه صحبتي و كانت عايزا تشوفني ضروري، قلت ليها اها و في الآخر كانت عايزا شنو؟ قالت لي بس سألتني عن الحصل و كانت عايزاني أحكي ليها الحصل بأدق التفاصيل، قلت ليها و انتي حكيتي ليها صح؟ و بعدين هي عايزا تصل لشنو بالضبط ما عندها أي شغله بي و بالحصل معاي و انتي يعني أي زول بسألك طوالي تحكي ليهو؟ معناها ما كان استغرب لمن نسوان الحله عرفوا بالحصل معاي ما بعيده تكوني انتي.....قاطعتني و قالت لي بغضب مجنونه انتي؟ اذا مجنونه كلميني عشان اعرف اتصرف و ما أصرف عربي كتير، كيف يعني انا الكلمت نسوان الحله بالحصل ليك، بستفيد شنو و اساساً في شنو بيني و بينك عشان اشمت فيك و أونس بيك نسوان الحله، انا ما حكيت لزول غير مها لأني بثق فيها و متأكده انو لو الموضوع دا ما كان مهم عندها ما كانت حتسألني عنو، صح ما عارفه هي بتفكر في شنو بس واثقه فيها بس انتي شكلك مرافي دي أثرت عليك و خلتك تشكي في الحوليك ، المهم يا زوله دامك شاكه فيني حتى بعد كل القدمتو ليك و وقفتي معاك معناها قعادي في بيتكم ماف داعي ليهو و هسي لو ما الزمن اتأخر و ما عايزا ناس بيتنا يسألوني عن جيتي في زمن زي دا والله كنت ح أمشي.....
صراحه انا ذاتي زعلت من نفسي لأني قلت ليها كدا....كلامي زعلها شديد ، قلت ليها رفقه معليش والله....ما انتظرتني اكمل قامت من جنبي و طلعت برا.....
___________________________
_____________
