أبداً ما جاني نوم اليوم كلو بتقلب يمين و شمال و بسأل نفسي الكاتل دا منو؟ و شنو الخلاهو يكتل أبوي و العلاقه بيناتهم شنو؟ سؤال ورا سؤال لحدي ما جاتني غفوه و نمت ...
_______________________
_______________
أول ما طلعت من الجامعه جاتني مكالمه من رقم غريب ، أول ما رديت جاني صوت مراد و هو بقول لي آلو رنا كيفك؟
قلت ليهو مراد؟ ....تمام الحمدلله، انت كيفك؟ قال لي كويس الحمدلله في الجامعه ولا طلعتي؟
قلت ليهو يادوبي طالعه من الجامعه، قال لي خلاص ما تمشي جاي عليك انا ، عملت نفسي مستغربه و قلت ليهو في شنو؟
قال لي لمن أصلك ح تعرفي، بعد ما قفل بقيت ابتسم و أقول خطتي نجحت ، اتصلت على مرافي و قلت ليها تعاليني جنب بوابة الجامعه، طبعاً نحنا في نفس الجامعه بس مجالاتنا مختلفه انا اقتصاد و هي بنوك ، أول ما وصلتني حضنتها و قلت ليها شكراً ليك هسي مراد اتصل علي و قال ح يجيني شكلو ح يحاول يقنعي بالشغل الأنا اصلاً عايزاهو، قالت لي العفو ، امبارح أول ما كلمتو و عرف ظروفك قال لي ح احاول اتكلم معاها و إن شاء الله المره دي تقتنع، قلت ليها يلا عايزاك تكوني معاي لمن هو يجي عشان تقعدي تقنعي فيني قدامو و إياك تخليني امشي إلا لمن أوافق على الشغل و.....قاطعتني ، ضحكت و قالت لي اسكتي اسكتي الحركات دي انا بعرفها كويس ما محتاجه شرح منك، نسيتي اني صحبتك من زمان! و الإتنين بنفهم حركات بعض و المطلوب مننا من غير شرح! ؟
بعد ربع ساعه كدا مراد وصلنا سلم علينا و قال لينا أركبوا، مشينا مطعم قريب من الجامعه ، قلت ليهو في شنو يا مراد ما تقلقني، قال لي هسي انا جعان خلينا نتغدا و بنتفاهم بعد شويه.....بعد ما اتغدينا و طلب لينا عصير عاين لساعة يدو و قال لي ح ادخل ليك توش في الموضوع، انا المره الفاتت عرضت عليك شغل عند صحبي و.....قاطعتو و قلت ليهو و انا رفضت صح؟
قال لي ما تستعجلي يا رنا و بعدين نفسي اعرف انتي رافضه الشغل دا ليه؟ ولا ما عايزا أي حاجه من طرفي؟ قلت ليهو لا ما كدا يا مراد بس ما بقدر، قال لي و السبب شنو؟
ما اتكلمت، مرافي قالت لي والله يا رنا ما شايفه أي سبب يخليك ترفضي الشغل دا، انا ذاتي عايزا اعرف انتي ليه رافضه؟
مراد قال لي الناس ظروف و عمرو الفقر ما كان عيب و عمرو طلب المساعده أو قبولها من زول ما كان مذله و عيب، انا فاهمك يا رنا عشان كدا ما تعقدي نفسك دي ما شفقه مني يعني انا بس دليتك على مكان شغل و انتي مطلوب منك تمشي ليهو و بس! رجاءً ما اقبلي و إلا ح أزعل منك و ما ح اتكلم معاك تاني ولا كأني بعرفك، قلت ليهو مراد ....مرافي قالت لي عليك الله وافقي لو عندي عندك معزه يا رنا توافقي و إلا ح اقطع علاقتي بيك ليوم الدين و تاني لا بعرفك لا بتعرفيني و انا جاده ، من جواي انبسطت شديد و عاينت لـ مرافي الكانت بتتبسم ساي ، اتنهدت و قلت ليهو طيب ح اقبل، فرح و قال لي الله عليك ، طيب عشان مستعجل دا رقم صحبي سيد المصنع انا اتصلت عليهو قبل كدا و كلمتو عنك و لحسن حظك لسه في فرصه المهم اتصلي عليهو و هو ح يفهمك كل شي، قلت ليهو طيب، ركبنا معاهو و وصلنا لحدي نص المسافه عشان هو ح يمشي بشارع تاني ، بعد ما هو مشى انا و مرافي ضربنا كفة يدينا مع بعض و قلنا بصوت واحد نجحنااااا .....المهم بعد ما رجعت البيت و ارتحت شويه اتصلت على صاحب مراد بعد مسافه ، و فهمني طريقة الشغل ، قال لي عندو شركه و مصنع بس صعب اشتغل في الشركه لأني لسه ما ااتخرجت، لكن ممكن اشتغل معاهم في مصنع مأكولات في الشجره يعني ما بعيده شديد من نوباتيا........
_______________________
_________________
