من جانب آخر :
يمه كلمت خالي قمر الدين و قلت ليهو عايزين نرجع و نشوف حبوبه بس هو رفض و قال لي كان مشيتوا ما ح ترجعوا تاني ...
قالت لي كلام خالك صاح لكن كمان نسوي شنو حبوبتك دي قالوا تعبت شديد و ما باقي ليها شي ، والله شينه في حقنا ما نكون معاها، هي ما قصرت معانا حتى بعد ما جينا الخرطوم لمن تلقى ليها طريقه بتتصل علينا و بتسأل عننا ، والله باقيه لي شينه كونها هناك عيانه ليها فتره و نحنا ما قادرين نوصلها .....كدي خلي خالك دا لمن يجي انا بتكلم معاهو....
للمساء كدا خالي قمر الدين جا راجع بعد ما ختينا ليهو العشا جينا انا و أمي و قعدنا جنبو، عاين لينا كدا و قال لينا خير في شنو؟
أمي قالت ليهو انت يا قمر مش عارف انو عمتي فاطمه دي تعبانه !...عندنا نيه نمشي و نشوفها والله عمتي دي ما قصرت معاي، قلبي واجعني شديد عليها، قال ليها يا ثريا والله انا ما مانعكم ساي، لكن كان مشيتوا ليها تاني الطريقه الح ترجعكم ما حتلموا فيها، ناسيه انو راجلك لسه بفتش عليكم و كم مره جا الخرطوم و وصلني لحدي بيتي دا عشان يعرف انتوا وين؟!
قالت ليهو سمح نعمل شنو طيب؟ هسي لا قدر الله كان عمتي دا يومها تم قبل ما نشوفه الببرد قلبي شنو تاني؟
قال ليها ما عارف اعمل شنو والله، مأمون دا ما بتفاهم، عندو الضرب و الكتل ديل أسهل حاجه و ماف زول من ناس الحِله بقدر يمنعوا.....كدي انتظريني فتره كدا أخلص شغلي و اسافر معاك ، أمي قالت ليهو فتره! كم يعني؟ لا لا يا قمر انا كان علي هسي دي أمشي ....طيب يا قمر يا أخوي بسافر براي، و مها دي خليها تقعد معاك عشان ما تنقطع من جامعتها، قلت ليها لا لا يا أمي انا ذاتي بمشي معاك قالت لي و الجامعه؟ ، براك عارفه القانون دا قرايتو صعبه كيف ، كل يوم تجي و تتبكي لي، قلت ليها ما بعرف بس عايزا أمشي معاك
خالي سكت مسافه بعديها قال لي لو في مشيه انتي ما حتمشي ، خلاص شغلي دا بأجلو شويه و ح اسافر معاك يا ثريا و انتي يا مها ح أشوف ليك داخليه لحدي ما نجي راجعين، قلت ليهو لكن.....قاطعني و قال كلامي و قلتو ما عايز فيهو أي نقاش ، زعلت شديد منو قمت منهم و انا بالجلاله ماسكه دموعي أول ما خشيت جوه قعدت أبكي، ياخ انا ذاتي عايزا أشوف حبوبه دي ما معقوله 5 ، 6 شهور من غير ما أشوفها مع انها بتتصل علينا مره مره من غير ما زول يعرف و بتسمعنا صوت بس دا ما كفايه عايزا أشوفها انا 💔
________________________
________________
________
مخي قرب يطق من التفكير ، اجيب قروش من وين عشان ندفع بيها لسيد البيت قبل ما يطلعنا منو ، هسي هو كان صبر علينا شويه كدا حيموت؟
قعدت و قمت ، قمت و قعدت و انا مقلقه و ما عارفه الحل شنو.....طق ، فجأه اتذكرت حاجه ، لفحت توبي و قلت لأمي ماشه لـ مرافي بجي هسي ، لما مشيت لـ مرافي حكيت ليها بالحاصل معاي و قلت ليها تعملي لي حاجه، قالت لي طوالي ، قولي ، قلت ليها ح أمليك كلام عشان تتصلي على مراد و تقوليهو ليهو، قالت لي ما فهمت، قلت ليها اسمعي:
اتصلي على مراد و بعد ما تتونسي معاهو عادي جيبي ليهو سيرتي، شويه شويه أحكي ليهو عن الوضع الإقتصادي السئ المارين بيهو لحدي قصة الإيجار دي ، في نهاية كلامك قولي ليهو ياريت لو هي قبلت بالشغل الكنت ح تقدمو ليها ، لحدي هنا ح يكون دورك انتهى و خلي الباقي علي ، عاينت لي مسافه بعديها ضحكت قالت لي والله انتي ما هينه يا رنا و بتعرفي تلعبي صح و تحققي مصالحك ، قالت لي لكن في حاجه انا ما فهمتها انتي وكت عايزا الشغل دا ليه رفضتيهو في البدايه و ليه هسي جايه جاريه عشان الشغل الرفضتيهو و ليه ما تتصلي انتي على مراد و تكلميهو بنفسك؟!!
ضحكت و قلت ليها اييييك دا كلو ما فهمتيهو!؟ مع انك صحبتي من زمان و الروح بالروح معقوله ما بتفهمي حركاتي؟!
المهم يا اسمك مراد دا ما عرض علي فكرة الشغل دي إلا لما عرف وضعي الإقتصادي و بأمانه انا اضايقت شديد أبداً ما كنت عايزاهو يعرف بوضعنا لا هو لا أحمد ميرغني ، لو كان الشغل دا جا من زول تاني كنت ح اقبلو عادي من غير ما اتردد ، لكن هو جا من مراد صاحب أحمد.....ما عارفه افهمك ليها كيف ، و ذاتي ما لاقيه كلمات مناسبه عشان اقدر افسر أو اشرح ليك ليه ما قبلت من البدايه كنت حاسه بإحراج شديد و حسيت نفسي صغيره قدامو و ياداب عرفت نفسي انا شنو ، و عشان ما يقول طوالي قبلت بالشغل القدمتو ليها رفضتو من البدايه بس هسي انا محتاجه للشغل دا شديد لكن ما عايزا مراد يعرف إني طلبت منك تتكلمي معاهو بخصوص الموضوع دا طيب؟ قالت لي طيب طلباتك أوامر يا رنا يا بتاعة الحركات ، لكن ح تعملي شنو اذا هو ما عمل حاجه بعد ما يعرف انك محتاجه للشغل دا؟ يمكن يقول ما ح أدخل تاني لأني قبل كدا عرضت عليها شغل و رفضتو ، قلت ليها جائز برضو ، اذا حصل كدا ح أفكر في فكره جديده، مش مراد دا ح أقدر ليهو، ابتسمت و قالت لي اقول ليك حاجه متأكده انو ح يصر عليك عشان تقبلي الشغل لأنو مراد احم احم، ضربتها و قلت ليها بلا احم احم معاك ، قالت لي سبحان الله أول مره اشوف لي زول برفس نعمتو هسي يا رنا مراد دا عيبو شنو؟ براي لاصقه في احمد دا و جاريه وراهو على الفاضي والله والله احمد ما شغال بيك و اصلاً ما عندو شغله بالبنات فأحسن تشيليهو من راسك و تشوفي ليك زول احسن منو، مراد يا رنا فرصه ذهبيه و جاتك و ما تكذبي على نفسك انتي حاسه زي ما انا حاسه انو بحبك أو معجب بيك المهم بفكر فيك ، قلت ليها اسكتي عليك الله و ذاتي ماشه بيتنا بعد دا و وقفت على حيلي، قالت لي لا ما تمشي خلاص ح اقفل السيره دي والله ح أقفلها لكن انتي ما تمشي ، قلت ليها لا لا ما انا اصلاً ماشه عشان قلت لأمي ما ح اتأخر هسي بتكون منتظراني عشان اعمل ليهم الغدا يلا سلام، قامت و قدمتني لحدي الباب، قبل ما أطلع قالت لي ايييك انا كيف نسيت الحاجه دي! قلت ليها حاجة شنو ؟
قالت لي أمبارح مبارك أخوي رسل لينا عبايات من قطر ما شفتيهم رهيبات كيف من أمبارح كنت عايزا أوريك ليهم و أول ما انتي جيتيني نسيت عديل ، تعالي أوريك ليهم، قلت ليها لا مره تانيه يا مرافي انتي عارفه أمي، قالت لي ما بأخرك تعالي ياخ، جرتني معاها غصب و طلعت لي العبايات بالجد طلعوا حلوات شديد و تصميم تحفه، قالت لي العبايه دي ليك انتي، قلت ليها شنو شنو؟ كيف لي انا؟ !
قالت لي ايوه ليك انتي لأني وصية مبارك على 5 عبايات وحده ليك و الأربع لينا انا و أخواتي، ما عرفت أقول ليها شنو انبسط شديد ، حضنتها بس و قلت ليها انتي احسن انسانه على وجه الكره الأرضيه بحبك شديد يا مرافي، ضحكت و قالت لي انا احسن انسانه على وجه الأرض لأنك صحبتي الحبيبه 💛
المهم بعديها اتونسنا حبه و طلعت من بيتهم ، هي كانت ماشي معاي لحدي باب بيتهم ، أول ما فتحت الباب عشان أطلع لمحت أحمد ميرغني طالع من بيت خالتو "أمل" يلي بيتهم فاتح في على الإتجاه الفيهو بيت ناس مرافي بس ما قصادو شديد، جاني احساس غريب، حسيت نفسي زي الإتكهربت، كان لابس بنطلون جينز و قميص أسود و جزمه سوداء و نظاره اظنو ماشي لـشغلو، مرافي رفعت ليهو يدها و قالت ليهو أحمد كيفك؟
قال ليها تمام الحمدلله انتوا كيف؟ قالت ليهو في نعمه، طبعاً انا ما اتكلمت و هو عاين لي بس برضو ما اتكلم معاي، اتغظت شديد مش مفروض يسلم علي حتى لو ما سلمت أو اتكلمت معاهو! ؟
طلعت و على طول مشيت على بيتنا، و في سري بقول إلا ما يجي اليوم الحتجي فيهو براك يا أحمد تسلم علي و تسألني عن أحوالي
