معليش ياخ بس ما أكون عطلتك من شغلك ، ابتسم و قال لي العفو ياخ ما عطلتيني ولا حاجه و حتى لو كنت مشغول ح أفضي نفسي عشانك ..
لما مراد قال لي كدا سكته و ما قلت حاجه بيني و بين نفسي كنت بحاول اعرف هل كلامو دا حقيقه ولا تمثيليه تانيه!؟ المهم يا رنا انك تتعامل بعذر معاهم هم الإتنين، ...كنت منتظراهو يجيب لي سيرة الموضوع الفي بالي و يسألني اذا بحبو أو لا و اذا في أمل احبو لأنو هو مسبقاً عارف اني ما بحبو بس كان متأمل اني مع الزمن احبو، الحاجه الوحيده الطلبها مني اني ما أحب غيرو بس انا بحب غيرو و غيرو دا ما يستاهل حبي، لا هم الإتنين ما يستاهلوا شي مني ، المهم لما لقيتو بتونس معاي عادي و عامل فيها رايح انا كمان عملت كدا و اتونست معاهو بأريحيه، قال لي سبحان الله أبداً ما اتوقعت يجي يوم زي دا نقعد فيهو انا و انتي قصاد بعض و ننسى كل مشاغل الدنيا و نتكلم عننا الإتنين و بس ، ابتسمت و قلت ليهو أغلب الحاجات الما بنتوقعها بتحصل ، قال لي انتي آخر وحده اتوقعت نفسي معاها في مكان زي دا و قعده زي دي، قلت ليهو هه عادي برضو أغلب الناس الما بنتوقع منهم حاجه معينه في الآخر بتجي منهم ، قال لي فعلاً كلامك صح ، قلت ليهو بمناسبة كلامنا دا اتذكرت كلام قالتو لي مرافي أمبارح لما كنا بنتكلم عن مواضيع مشتته ساي ، قال لي يلي هو ، قلت ليهو كنا بنتكلم عن الصداقه فقمت قلت لمرافي انو الأصدقاء بكونوا بشبهوا بعض شديد لو ما في الملامح ففي تصرفاتهم و كلامهم و طريقة تفكيرهم فهي غالطتني و قالت لي ما ضروري تكون في حاجه مشتركه بيناتهم، و انا أصريت على كلامي و هي في الآخر قالت لي اقرب مثال ليك أحمد و مراد، قالت لي مراد انسان كويس و محترم و كلو ذوق و أدب عكس أحمد تماماً، المهم منها عرفت انو أحمد ميرغني انسان ما كويس و نسونجي و مع عدم المؤاخذه....بتاع شقق كمان، اتخيل انا ما قادره أصدق الكلام دا مع إني ما بعرف أحمد ميرغني شديد بس عشان انت صاحبو ما أظن يكون بالسوء دا صح؟
سكت مساااافه لما ظنيت انو كاشفني و عرف انو سبب اللقاء دا اني اتأكد من حقيقة أحمد ميرغني، بعد لحظات من الصمت قال ما عارف اقول ليك شنو لكن أحمد فعلاً كدا و من زمان كمان !
لما قال كدا انا زي الضربتني كهربه كنت متوقعه اسمع كلام عكس دا تماماً ، ليه الوضع بقى جايط كدا في حاجه انا ما فاهماها، أحمد و مراد متفقين علي صح! طيب شنو البخلي مراد يقول لي الكلام دا عن أحمد! و من أول سؤال كمان من غير ما أتعب نفسي و احاول اسحب منو الكلام ....امممم يمكن مراد شاكي انو أحمد معجب بي أو انا معجبه بيهو عشان كدا ما اترددت و طوالي قال القالو عن أحمد؟!!
قلت ليهو غريبه و انت مصاحبو كيف ولا ذاتك زيو؟ قال لي انا؟ أبداً والله، صح انو البعملو احمد ما صح و قذر شديد بس دا ما كان سبب يخلي اقطع علاقتو بيهو خصوصاً اني لا بعرفو من اليوم لا من أمبارح، نحنا يا رنا أصحاب من لما كنا في الأساس، بمعنى اني بعرف أحمد قبل ما يبقى بالصوره الهو عليها حالياً فهمتي؟
هزيت ليهو راسي و انا ما قادره استوعب الكلام السمعتو، واصل كلامو و قال لي أحمد بطبعو انسان بحتقر البنات شديد و شايفهم ارخص حاجه في الدنيا عشان دا بستغل اعجابهم بيهو بأبشع الطرق، انا كذا مره يا رنا حاولت أمنعو بس هو ما سمع مني، عندو شقه كامله في بحري عاملها للقذاره دي متى ما حس نفسو مضايق و قرفان و زهجان بمشى هناك و بستدرج ليهو بت! عشان كدا انا اضايقت شديد لما قلتي لي انو أحمد بتصل عليك، استغربت شديد لأني عارف احمد لا زول حب لا زول اجتماعي و علاقتو حلوه مع الناس، أحمد دا لو اتكلم كلمتين بس مع بت معناها ختاها في بالو لحاجة في نفسو أما غير كدا ما عندو حاجه للبنات، في اليوم داك ما قدرت اقول ليك احمد ما كويس و كدا و كدا ، بس أول ما رجعت اتصلت على أحمد عشان اعرف هو عايز منك شنو، فقال لي انت الدخلك شنو؟ قلت ليهو لأني عارفك كويس و احسن ليك تبعد عن رنا، ما رد علي و قفل الخط في وشي و بكدا اتأكد هو عايز منك شنو ، في النهايه عايز اقول ليك أحمد يا رنا ما زي ما انتوا شايفنوا، يمكن انا و أمو و اخوانو أكتر ناس عارفنوا على حقيقتو، ماف زول عارف احمد دا شنو و بعمل شنو! عشان كدا خليك بعيده عنو و مع انو هو صحبي بس اعملي حسابك منو و دي كلها لعبه من أحمد عشان يوقعك في شباكو
بقيت ساكته و بعاين بس لمراد ، كأني بقول ليهو كلام كذب أحمد ما كدا! بس هو بعرف أحمد اكتر مني!.....ما عارفه كيف كان شكل ونستنا بعد العرفتو دا و طول القعده ما كنت جايبه خبر لمراد بس بهز ليهو براسي و انا اصلاً ما عارفاهو بقول في شنو، بالجلاله كنت ماسكه دموعي ، معقوله احمد كان شايفني كدا و كان ناوي يستغلني! معقوله طلع قذر و مقرف للدرجه دي!
ما عارفه وصلت لـ مرافي كيف كل البتذكرو اني اترميت في حضنها و قعدت أبكي و هي حاولت تهديني و تفهم مني الحصل شنو، بعد مسافه قدرت اتمالك نفسي مسحت دموعي و حكيت ليها ، قالت لي ماف شي جديد ياها حقيقة أحمد و كويس انك عرفتيها من بدري ، استمريت في البكى و هي بتحكي لي عن أحمد و عمايلو و انا مع كل كلمه تطلع منها دموعي بتزيد ....
_______________________
_________
_____
