أول ما وصلني قال لي رنا كيفك؟ قلت ليهو تمام الحمدلله ، سكتنا مسافه بعديها قال لي بالنسبه لـ......قاطعتو و قلت ليهو انا شاكره ليك جداً يا مراد لكن انا ما محتاجه للشغل دا و ما طلبت منك تفتش لي شغل، قال لي انتي ليه رافضه الشغل دا؟ ....إياك تفتكري انها شفقه مني أو أي حاجه بالشكل دا، كل القصه انو صحبي قال لي عندو مكان شاغر في الشغل و عايز زول يملى ليهو الخانه فـ على طول اتذكرتك انتي و بما اني بعرفك حتى لو عِرفه سطحيه فـ قلت انتي أولى بيهو ، قلت ليهو و اشمِعنى من بين كل الناس اتذكرتني انا؟ ...مراد بالجد مشكور لكن أنسى الفكره دي، قال لي طيب على راحتك و خلاص ح اقفل السيره دي و.....قبل ما يتم كلامو أحمد جا ، قال لي السلام عليكم و ما انتظرني أرد إتلفت على مراد و قال ليهو مشيت وين انت يا زول؟ لفيت السوق دا كلو عشانك ، اخرتني على شغلي! مراد ضحك و قال ليهو معليش معليش، عاين لي و قال لي يلااا يا رنا ح نمشي بعد دا، هزيت ليهو راسي و بس أما احمد فـما اتكلم و اتحرك قدامو، مراد خطى خطوتين و رجع قال لي اتذكرت، يوم الجمعه الجايه دي عرس أخوي و انتي معزومه طبعاً ولازم تشرفينا ، كلمت مرافي ما عارفها اذا كلمتك أو لا المهم انك تجي ماشي؟ قلت ليهو نشوف، قال لي لا ماف حاجه اسمها نشوف يا تجي يا تجي! ضحكت و قلت ليهو حاضر، فجأه كدا جانا صوت أحمد و هو بقول لـ مراد بضيق مراد يااااخ خلصنا! قلت ليهو امشي يا مراد احسن ما صحبك المنفسن دا يجي و يضربك عديل، قال لي ههههه مش احمد دا بعملها والله! المهم ودعني و مشى و انا مغيوظه من حركة أحمد ميرغني دي، كل شي ليهو حدود إلا غرورو و أسلوبو الفظ ، هه اصلاً اتوقع شنو من واحد ما عندو احترام لا للناس لا لـ أمو ، كلامو و معاملتو ليها زي الزفت ؟!!
أول ما رجعت البيت جاني اتصال من مرافي، رديت عليها و اتكلمت معاها مسافه آخر حاجه قالت لي انو يوم الجمعه عرس أخو مراد و هو عزمنا نحنا الإتنين ، قلت ليها ما ح امشي يا مرافي و اصلاً اقول لـ ناس بيتنا شنو؟ و بعدين مراد دا من معرفة متين ؟انا ما بعرفو ولا هو فكيف ح امشي للعرس دا؟ قالت لي ماهو علشان تعرفيهو و يكون واحد من معارفك لازم تمشي العرس دا و إلا ح يفضل طول عمرو غريب بالنسبه ليك، و ما تنسي اني بعرفو معرفه شديده و على الأساس دا ح امشي و عايزاك تمشي معاي و بالنسبه لأهلك خليهم علي ، قلت ليها ما عارفه والله و ما عندي نيه امشي للعرس دا، قالت لي حيييييا انا منك ياخ، عليك الله يا رنا امشي معاي بليييز بليييز انا مش صحبتك و حبيتك و رفيقتك يا رنا انا مش سنـ......قاطعتها و قلت ليها خلاص خلاص ح امشي و أهلي خليتهم عليك انتي، اذا خلوني ما عندي مشكله، قالت لي بحببببك يا عسل انتي، طيب بكرا ح اجيك علشان نختار فساتين نمشي بيها لازم نكون متشيكين آخر شياكه ...
______________________
_هسي انت يا احمد مالك سايق العربيه دي سريع كدا؟
قلت ليهو لأني اتأخرت على المرضى يا مراد قايل كل الناس رمتاله و فاضيه زيك كدا؟ ضحك و قال لي بس عشان وقفت مع رنا طلعتني فاضي و رمتالي ساي؟! قلت ليهو هسي انا جبت سيرة بت الناس دي؟ و بعدين تعال هنا مالك بقيت الزمن كلو مجنني رنا رنا بس ما يكون حـ......قاطعني و قال لي أبداً يا زولي ماف كلام زي الفي بالك دا ، رفعت ليهو حاجبي و قلت ليهو بعد دا كلو و ماف حاجه؟! لكن اعمل حسابك يا فرده و ما تتغشى بالبنات ديل و.....قال لي خلاص خلاص يا أحمد فهمت! كل القصه اني حبيت اساعدها و بس ما يروح فكرك لـ بعيد، ابتسمت ليهو و قلت ليهو الحمدلله لأنو البت دي ما بتناسبك......سكته مسافه و بعديها قلت ليهو ليه عزمتها عرس أخوك مروان؟ قال لي ما فيها حاجه يا ميرغني برضو عزمت مرافي صحبتها، المشكله وين؟ و انت مالك مع البت دي؟
قلت ليهو لأني بعرف حركات البنات كويس و البت دي بالذات ما راكبه لي في راسي، ضحك و قال لي ماف زول قال ليك خليها تركب في راسك و ماف زول قال ليك قرب منها ح اعمل حسابي للحاجه دي في عرس مروان بحيث انها تكون بعيده كل البعد عنك، بمعنى انك لو واقف في الشرق ح أخليها تقيف في الغرب و هكذا كدا قصرت معاك؟
______________________
