طبعاً بقيت قاعده و منتظره مكالمه من أحمد بعد ما قلت ليهو لو ما عملت حاجه ح اقبل بالزول الإتقدم لي ، انتظرت و انتظرت بس مروا يومين و هو ما اتصل ، زعلت شديد و قربت أبكي ، جات رفقه قالت لي لسه قاعده و متمحنه؟ زولك دا خليهو عليك الله دام انتي ما فارقه معاهو ، المهم عايزاك تمشي معاي لصحبتي حبوبتها اتوفت ، قلت ليها صحبتك منو؟ ما تقولي لي الإسمها مها ديك؟
قالت لي آيي هي ذاتا ، قلت ليها بضيق رفقه نسيتو القلتو ليك عنها؟ قالت لي ما نسيت لكن اظن في شي بيناتهم مها ما حصل جابت لي سيرة واحد اسمو أحمد ميرغني و اساساً هي ما بتعرف زول بالإسم دا! قلت ليها كيف يعنى ما بتعرفو! اقول ليك شفتهم مرتين بعض و كانوا قراب شديد من بعض و تقولي لي ما بتعرفو؟
قالت لي ما عارفه يمكن في سوء تفاهم، بس عايزاك تمشي معاي ليها ، قلت ليها ما ماشه و ما عندي بيها شغله كان ماتت حبوبتها أو ماتت هي ذاتا و سيرتها دي تاني ما تجيبيها لي فاهمه ولا لا؟
رفقه اضطرت تمشي براها بعد ما أنا رفضت ، مسكت تلفوني و بقيت أعاين ليهو بعد صراع شديد اتصلت على أحمد ميرغني ما رد علي إلا بعد مسافه أول ما فتح الخط قال لي بضيق عايزا شنو كمان؟
قلت ليهو للدرجه دي انا ما مهمه بالنسبه ليك! للدرجه دي كان التخلى عني ساهل! اقسم بالله خيبة ظني فيك و اصلاً دا كلو كان.....قاطعني و قال لي بنبره حاده وقفي البتعملي فيهو دي! متين حتبطلي لعب و تمثيل ما بتتعبي انتي يا بت الناس ولا الجري ورا القروش ما بتعب؟ من البدايه كان تقولي لي عايزا قروش و بس احسن من بحبك و شنو ما بعرف ، من البدايه كان اقولي لي انو وحده بتاعة مصالح و همي الأول و الآخير اني آخد قروش ، تاني إياك تتصلي علي و خلقتك دي انا ما عايز أشوفا....قال كدا و قفل الخط في وشي و خلاني ما قادره استوعب شي ، رجعت في رقمو تاني بس ما خش معاي حاولت كتير بس بدون فايده ، قلت لازم اشوفو و افهم منو ولازم اقول ليهو ماف زول حيتقدم لي و اني قلت ليك كدا عشان احسسك انك حتفقدني و تحاول تعمل حاجه، أكيد هو افتكر انو الزول الإتقدم لي مقرش و انا ح اقبل بيهو عشان القروش و هو في الحقيقه ماف ولا زول اتقدم لي و حتى لو في زول كنت ح ارفضو عشانو ، من مكاني داك قلت لناس البيت ماشه لـ مرافي و على طول طلعت و مشيت للمستشفى عشان اشوفو بس ما لقيتو و قالوا انو ليهو يومين ما جا، ما عرفت ألقاهو وين و انا بيتو ما بعرفو، اتصلت على مرافي و سألتها اذا بتعرف بيتو وين! قالت لي ما حتلقيهو في بيتو! قلت ليها طيب هو وين؟
قالت لي ما عارفه اقولا ليك كيف، بس حسب كلام مراد هو الفتره دي في شقتو الفي بحري و أكيد ما محتاجه اقول ليك بعمل شنو هناك، قلت ليها مستحيل ما بصدق حاجه زي دي ، قالت لي دي الحقيقه يا رنا و اذا ما مصدقه امشي و شوفي بنفسك ، قلت ليها طيب انتي عارفه شقتو دي وين في بحري بالضبط؟
قالت لي ايوه بس بنصحك انك ما تمشي ، قلت ليها أديني العنوان، قالت لي رنا.....قاطعتها و قلت ليها بس أديني ليهو ، قالت لي طيب على راحتك و أدتني العنوان ، على طول مشيت للموقف و ركبت مواصلات بحري....
