طبعاً رنا أول ما شافتني صرت وشها ما عارفه ليه عملت كدا و مشكلتها معاي شنو بالضبط! المهم سلمت عليهم و قعدت ، قالت لي أنجزي عايزا تشوفيني ليه؟
قلت احسن أخش ليها طوالي في الموضوع قبل ما تزهج و تمشي ، قلت ليها عباس الشِهِد معاك في المحكمه بتعرفيهو من وين و أصلاً هو علاقتو شنو بأحمد؟
قالت لي بس عايزا اعرف انتي الدخلك شنو و عايزا تصلي لشنو ؟
اتنهدت و قلت احسن احكي ليها، بعد مسافه قلت ليها انا شاكه انو الحصل دا كلو في زول كان مخطط ليهو يعني.....قاطعتني و قالت لي بضيق، خطه؟ قصدك في زول خطط عشان أحمد يغتصبني؟ عويره انتي؟ كيف تكون خطه و الحيوان داك من تلقاء نفسو اغتصبني! ايوه في خطه و طبعاً أحمد مشارك فيها و اذا خلصتي نحنا حنمشي بعد دا و رجاءً ما ترجعي و تفتحي معاي الموضوع دا ولا اقول ليك اساساً ما تحاولي تتواصلي معاي بأي صوره.....أول ما هي وقفت على حيلها رفقه جرتها و قعدتها قالت ليها خلينا نعرف هي عايزا تقول شنو، رنا قالت ليها بس! رفقه قاطعتها و قالت ليها ما بس ولا حاجه اسمعيها للآخر ، رفقه عاينت لي و قالت لي قصدك شنو يا مها و كيف في زول خطط للحاجه دي و شنو الخلاك تفكري كدا؟
قلت ليها أولاً لأنو أحمد مستحيل يعمل كدا و.....قاطعتني رنا و هي بتقول لي بغضب و شنو البخليك تقولي مستحيل و تدافعي عنو! كنت موجوده معانا انتي؟
رفقه قالت ليها رنا! خليها تكمل كلامها للآخر ، عاينت لـ رنا جوه عيونها و قلت ليها ايوه متأكده أحمد مستحيل يعمل كدا بأكد ليك انو في زول ورا القصه دي و ما بعيده يكونوا هم مرافي و مراد ، أول ما قلت ليها كدا هي رفعت راسها و عاينت لي بخلعه لأنها مستغربه انا ليه قلت هم تحديداً و انا أصلاً ما بعرفهم! قالت لي قلتي شنو! قلت ليها زي ما سمعتي احتمال كبير يطلعوا مرافي و مراد هم الخططوا للحصل، قالت لي انتي ما بتفهمي يا بت الناس؟ اقول ليك أحمد هو الإغتصبني بغض النظر عن الناس المتفق معاهم، قلت ليها لو شكلتي كلمة متفقين ديل من راسك حتقدري تشوفي الكنتي ما شايفاهو.....رنا ركزي معاي، مراد و مرافي اصلاً من البدايه هدفهم كان انو يعملوا مشاكل بينك و بين أحمد و طبعاً انتي عارفه الحاجه دي! ، قالت لي اها و بعديها؟
قلت ليها بس ردي لي على السؤال دا، بتعرفي عباس من وين؟
قالت لي بغيظ و ضيق ما بعرفو معرفه شخصيه بس اتلاقينا معاهو أكتر من مره ، قلت ليها قبل الحادثه ولا بعديها؟ قالت لي بعديها.....سكته مسافه بعدها قلت ظهور عباس في حياتكم فجأه كدا مش حاجه غريبه؟ يعني تتلاقوا معاهو كذا مره و في الآخر يطلع بعرف أحمد و يكون موجود في يوم الحادثه؟
قالت لي انتي ليه بتناقضي في نفسك؟ في البدايه قلتي أحمد مستحيل يعمل كدا و تاني رجعتي و قلتي لي يوم الحادثه، حتكون حادثة شنو يعني لو أحمد ما عمل فيني كدا؟
قلت ليها طيب انا معاك و مصدقه كل حرف قلتيهو بس ما سألتي نفسك شنو الخلاهو ي.....قالت لي ماف أي سبب أو مبرر يخليهو يتقاذر و يدمر لي حياتي، قلت ليها رنا عليك الله حاولي تفهمي الكلام البقولو ليك، رفقه قالت لي قصدك انو في حاجه خلت أحمد يعمل كدا؟ بس يا مها زي ما قالت رنا ماف سبب أو مبرر للعملو إلا انو واحد حيوان و قذر ، أخدت نفس عميق بعديها قلت ليها ، أحمد مظلوم ، حتى محاكمتو ما كانت زي أي محاكمه عادله، ما استغربتوا من الحكم الصدر بالسرعه دي! اقول ليكم ليه؟ ببساطه لأنو القاضي هو عم مراد الكان نفسو يشوف أحمد مدمر و نفسو يشيلو من طريقو عشان يصل ليك، افهمي انو مراد مستعد يعمل المستحيل و يصل لدرجة انو يغدر بصحبو عشان يصل ليك انتي و ما بعيده يكون خطط لدا كلو، حصلت لحظات صمت بعد ما قلت ليهم كدا، رنا قالت لي لو الحكم صدر بدري أو متأخر في النهايه دا الكان حيحصل بغض النظر عن القاضي منو و قريب منو!
قلت ليها برضو ما راضيه تقتنعي صح ، طيب وحده وحده، يوم كنتي ماشه لأحمد في شقتو اتصلتي على مرافي و هي الوصفت ليك الشقه صح؟ ما تسأليني عرفت كيف لأنو رفقه حكت لي.....بعد ما حصل الحصل ما سألتي نفسك ليه عباس و مرافي و مراد كانوا موجودين في الشقه و مراد ذاتو عرف من وين! قالت لي لأني عارفه الجمعهم شنو كلهم اتفقوا علي ....قلت ليها بنفاد صبر انتي بتتكلمي ساي ولا شنو! كيف يعني متفقين عليك و اساساً هدفهم حيكون شنو من العمله دي وليه يجوا بذات نفسهم و يودوك للمستشفى و اساساً ليه مراد يتفق مع أحمد ضدك و أحمد ذاتو ما بعمل كدا فعليك الله ما تتكلمي ساي! سكتت و بقت تعاين لي لأنها عارفه انو كلامها ما منطقي، قلت ليها انتي أحكي لي أول ما وصلتي الشقه الفتح ليك منو و الحصل شنو قبل الحادثه؟ رجاءً يا رنا احكي لي عشان نعرف نتصرف و نكشف المستور .....بعد مسافه قالت لي فتح لي عباس و استغربت شديد لما شفتو في وشي و منظرو أبداً ما عجبني قلت ليهو عباس؟! قال لي ايوه كيفك يا رنا!؟ خفت شديد منو و كنت ح أرجع بس سمعت صوت أحمد و هو بقول لي رنا!؟
إتلفت عليهو و قبل ما أعاين ليهو كويس ضربني كف و عدلني بواحد تاني ، و رجع لورا و هو بعاين لي بنظرات غريبه و انا مهجومه و مستغربه هو ليه ضربني ، اتجادلت معاهو و شاكلتو عشان ضربني من غير سبب و للمره التالته ضربني كف ، قال لي طلعتي تافهه و حقيره و قليلة أدب و......كلام كتير قذر ما بقدر أقولو ، كنت مستغربه شديد و ما فاهمه حاجه ، في الآخر قال لي دامك واحده عاهره و حيوانه و بتسلي الرجال مقابل قروش رايك شنو تسليني انا كمان ....من غير ما اتردد ضربتو كف و هو مع الكف دا جراني بالغصب من يدي و........سكتت و قعدت تبكي ، عارفه الموضوع صعب عليهو و صعب ترجع تحكيهو تاني بس لازم نعرف الحقيقه، بعد ما هديناها و أديناها مويه قلت ليها معليش يا رنا بس ضروري تكملي، قالت لي بعصبيه احكي ليك شنو تاني! قلت ليها ما فهمت الحاله الكان فيها عباس قصدك بيها شنو؟ مالو يعني؟ بعد مسافه قالت لي ما عارفه يمكن سكران، هنا يداب بديت اجمع و خطر على بالي احتمال انو أحمد يمكن كان سكران بس هل دا حيفيدنا كتير بعد ما هو اغتصبها؟
قلت ليها طيب و أحمد؟ عاينت لي مسافه و شكلها ياداب بتدت تجمع و تفهم الحاصل، قالت لي برضو زي عباس، قلت ليها السؤال البطرح نفسو، أحمد ضربك ليه و ليه قال عنك حقيره و قليلة أدب و غيرها.....دا بوصلنا لنقطة إنو أحمد انقال ليهو كلام ما كويس عنك أو شاف حاجه ما كويسه بتخصك ، قالت لي قصدك انا عاقره و حقيره زي ما هو قال؟ شايفاني شنو قدامك و.......قاطعتها و قلت ليها أبداً والله ما قصدت كدا، هو يمكن شاف أو عرف حاجه ما كويسه عنك و عادي تكون مزيفه بس في زول قصد يشكك أحمد فيك لسبب كلنا عارفنوا و دا بالتأكيد بخلينا نشير أصبع الإتهام على مرافي و مراد، في التسجيلات العندك مرافي قالت إنهم ما خططوا للإغتصاب دا، و دا معناهو انهم خططوا لحاجه تانيه و يلي هي تشويه صورتك قدام أحمد و الله اعلم هم قالوا ليهو شنو عنك ، بقت تعاين لي جوه عيوني و هي بتحاول تستوعب في كلامي، سكتت مسافه بعدها قالت لي بس هو أغتصبني يا مها و بدت تبكي بحرقه، قلت ليها ما عارفه بس ممكن يكون شرب ليهو حاجه! أو خليني اقول في زول أداهو حاجه؟!قالت لي حتى ولو دا ما بمحي الحقيقه و ما بصلح الإتكسر ، سكته و قلت ليها بس هو ما قصد يعمل فيك كدا ما ببر ليهو بس السكران في ذمة الواعي، وقفت على حيلها و قالت لـ رفقه انا حأمشي انتي لو عايزا اقعدي، و على طول اتحركت، رفقه قالت لي بتصل عليك بعدين و طوالي مشت وراها...
____________________
____________
