# ﻣﻮﺳﻢ _ ﺍﻟﺘﻮﻟﻴﺐ
# ﺟﻤﺎﻥ _ ﻓﺮﻳﺪ
# ﺍﻟﺠﺰﺀ _ ﺍﻟﺘﺎﻧﻲ
ﺗﻮﺗﻲ ﻓﻲ ﺍﻟﻐﺪﻱ ﻭﺗﺤﻂ ﻓﻴﻪ ﻉ ﺍﻟﻄﺎﻭﻟﻪ .. ﻭﻛﺎﻧﺖ ﻣﺒﺘﺴﻤﻪ ﻃﻮﻝ ﺍﻟﻮﻗﺖ ﻣﻦ ﻗﻠﺒﻬﺎ ﺍﺩﻳﺮ ﻓﻲ ﻛﻞ ﺷﻲ ... ﺑﺤﺐ ﺑﺪﻭﻥ ﻣﺎﺗﺸﻜﻲ ﻭﺗﺬﻣﺮ ﺃﺑﺪﺍ ... ﺣﻨﺎﻥ ﺑﺎﻟﻨﺴﺒﻪ ﻟﻴﻬﺎ ﺍﻷﻣﻮﻣﻪ ﺃﻋﻈﻢ ﺷﻲ ﻓﻲ ﺍﻟﺪﻧﻴﺎ ﻭﺃﻫﻢ ﻣﺴﺆﻭﻟﻴﻪ ﺗﺘﻮﻻﻫﺎ ﺍﻟﻤﺮﺃﻩ ﻭﻣﺶ ﺃﻱ ﻭﺣﺪﻩ ﺗﻘﺪﺭ ﺗﻜﻮﻥ ﺃﻡ ﺑﻜﻞ ﻣﺎﺗﻌﻨﻴﻪ ﺍﻟﻜﻠﻤﻪ ﻣﻦ ﻣﻌﻨﻰ ...
ﻟﺒﻨﻰ ﻧﺎﺯﻟﻪ ﺗﺠﺮﻱ : ﺑﺸﺎﺍﺍﺍﻣﻴﻞ ﺃﺍﺍﺍﻩ ﺍﻟﻌﺸﻖ ﺍﻷﺑﻴﺾ ...
ﺣﻨﺎﻥ ﺑﻀﺤﻜﻪ : ﺑﺎﻩ ﻗﻌﻤﺰﻱ ...
ﻟﺒﻨﻰ ﻗﻌﻤﺰﺕ : ﻧﻘﺪﺭ ﻧﻌﺸﻖ ﻓﻲ ﻣﻌﺸﻮﻗﻲ ﺑﺮﺍﺣﺘﻲ ﻭﻻﻧﺮﺍﺟﻮ ﻟﻴﻦ ﺗﺠﻲ ﺣﺒﻴﺒﺔ ﺃﻣﻬﺎ ...
ﺣﻨﺎﻥ ﻗﺮﺻﺘﻬﺎ ﻣﻦ ﺧﺸﻤﻬﺎ : ﺍﻟﺰﻭﺯ ﺣﺒﻴﺒﺎﺗﻲ .. ﻭﺑﻌﺪﻳﻦ ﻛﻠﻤﺘﻨﻲ ﻗﺒﻞ ﺷﻮﻱ ﻭﻗﺎﻟﺖ ﺑﺘﻌﻄﻞ ﺍﻋﺸﻘﻲ ﺑﺮﺍﺣﺘﻚ ..
ﺿﺤﻜﺖ ﻟﺒﻨﻰ ﻭﺑﺪﺕ ﺗﺎﻛﻞ ...
ﺃﻣﺎ ﺣﻨﺎﻥ ﻓﻜﺎﻧﺖ ﺗﻔﻜﺮ ﻓﻲ ﺍﻟﻤﻨﺎﺳﺒﻪ ﺍﻟﻠﻲ ﻳﻔﺼﻠﻬﺎ ﻋﻨﻬﺎ ﺍﺳﺒﻮﻉ ﺫﻛﺮﻯ ﺯﻭﺍﺟﻬﺎ 20 ﻫﻲ ﻭﻧﻀﺎﻝ ... ﻟﻴﻬﻢ ﻓﻮﻕ 15 ﻣﺎﺣﺘﻔﻠﻮﺵ ﺑﻴﻪ ﻭﺍﻟﺴﺒﺐ ﺳﻔﺮ ﻧﻀﺎﻝ .. ﺍﻭ ﺗﻮﺍﺟﺪﻩ ﻓﻲ ﺍﻟﺤﻘﻮﻝ ﺍﻟﻨﻔﻄﻴﻪ .. ﺑﺲ ﻫﺎﻟﻤﺮﺓ ﻣﺶ ﺣﻴﻜﻮﻥ ﻋﻨﺪﻩ ﺷﻲ ... ﺣﺘﻰ ﺧﺪﻣﺘﻪ ﻭﻟﺖ ﻓﻲ ﻃﺮﺍﺑﻠﺲ ﺑﺲ ... ﻭﻣﺶ ﺣﻴﺴﺎﻓﺮ ﺍﻟﻔﺘﺮﺓ ﺍﻟﺠﺎﻳﻪ ...
ﺣﻨﺎﻥ ﺣﺎﺳﻪ ﺑﺎﻟﻔﺘﻮﺭ ﻓﻌﻼﻗﺘﻬﻢ ﻭﺣﺎﺑﻪ ﺗﺠﺪﺩ ﻛﻞ ﺷﻲ ﺣﺘﻰ ﺩﺑﻠﺔ ﺍﻟﺰﻭﺍﺝ ﻣﺘﺎﻋﻬﺎ ﻭﻣﺘﺎﻋﻪ ﻧﺎﻭﻳﻪ ﺗﻀﻴﻒ ﻋﻠﻴﻬﻢ ﺍﺿﺎﻓﺎﺕ ﺟﺪﻳﺪﻩ .. ﻭﺗﻮﺳﻌﻬﻮﻟﻪ ﻭﺗﻜﻮﻥ ﻫﺎﺩﻱ ﻫﺪﻳﺘﻪ ...
.....
ﻣﻘﻌﻤﺰﺓ ﺗﺎﻛﻞ ﻭﻣﺮﻛﺰﺓ ﻉ ﻳﺪﻩ ﺍﻟﻴﺴﺎﺭ ﺍﻟﺪﺑﻠﻪ ﻣﻬﻨﺎﺵ .. ﻣﺎﻛﺎﻧﺶ ﺣﺘﻰ ﻭﻟﻮ ﺷﻮﻳﺔ ﻋﻨﺪﻫﺎ ﺗﺮﺩﺩ ﺗﺴﺄﻟﻪ ﻹﻥ ﺑﻄﺒﻴﻌﺘﻬﺎ ﺟﺮﻳﺌﻪ ﻓﻲ ﻛﻞ ﺷﻲ
ﻳﺎﺭﺍ : ﺑﻨﺴﺄﻟﻚ ..
ﻧﻀﺎﻝ ﻭﻫﻮ ﻳﺎﻛﻞ : ﺍﻣﻤﻤﻢ ... ﻧﺴﻤﻊ ﻓﻴﻚ .
ﻳﺎﺭﺍ ﺍﺑﺘﺴﻤﺖ : ﺩﺑﻠﺘﻚ ﻣﻬﻨﺎﺵ ..
ﻧﻀﺎﻝ ﺑﻠﻊ ﻟﻘﻤﺘﻪ ﻭﺍﺑﺘﺴﻢ ﻭﺷﺒﺢ ﻟﻴﺪﻩ ﺑﻌﺪﻳﻦ ﺷﺒﺤﻠﻬﺎ ﺑﻨﻈﺮﺓ ﻟﻴﻬﺎ ﻣﻐﺰﻯ ﻭﻗﺎﻝ : ﺍﺿﺎﻳﻘﺖ ﻋﻠﻴﺎ ﻫﻠﺒﻪ ﻣﻌﺎﺵ ﺗﻤﺸﻲ ﻣﻊ ﺻﺒﻌﻲ ..
ﻫﻲ ﻭﻛﺄﻧﻬﺎ ﺣﺴﺖ ﺍﻧﻪ ﻳﺒﻲ ﻳﻮﺻﻠﻠﻬﺎ ﺭﺳﺎﻟﻪ ﺑﺠﻤﻠﺘﻪ ﻫﺎﺩﻱ ﺍﺑﺘﺴﻤﺖ ﻭﺳﺄﻟﺖ ﺳﺆﺍﻝ ﺗﺎﻧﻲ : ﺍﻧﺘﻮﺍ ﺗﺰﻭﺟﺘﻮﺍ ﺗﻘﻠﻴﺪﻱ؟
ﻧﻀﺎﻝ ﺣﻂ ﺍﻟﺸﻮﻛﻪ ﻭﺍﻟﻤﻮﺱ ﻭﺍﺗﻜﻰ ﻉ ﺍﻟﻜﺮﺳﻲ ﻭﺷﺒﺢ ﻟﻠﺮﻭﺷﻦ : ﺗﺰﻭﺟﻨﺎ ﻋﻦ ﺣﺐ ...
ﻳﺎﺭﺍ : ﻭﻫﺎﻟﺤﺐ ﻣﺶ ﺑﺎﻳﻦ ﻧﻬﺎﺋﻲ ..
ﻧﻀﺎﻝ ﺷﺒﺤﻠﻬﺎ ﻭﺃﺑﺘﺴﻢ : ﻣﺎﻻ ﺷﻨﻮ ﺍﻟﺒﺎﻳﻦ؟
ﻳﺎﺭﺍ ﺍﺑﺘﺴﻤﺖ : ﻧﻈﺮﺓ ﻋﻴﻨﻚ ﺑﺎﺭﺩﺓ ﻭﺃﻧﺖ ﺗﺤﻜﻲ ﻋﻨﻬﺎ ..
ﻧﻀﺎﻝ ﺗﻨﻬﺪ : ﻳﺎﺭﺍ ﺍﻧﺘﻲ .. ﺻﺪﻳﻘﻪ ﻭﻟﻴﺎ ﻓﻮﻕ 8 ﺷﻬﻮﺭ ﻧﻌﺮﻓﻚ ﻭﻧﺪﻭﻱ ﺑﺄﺭﻳﺤﻴﻪ ﻣﻌﺎﻙ ... ﺍﺑﺘﺴﻢ ... ﺍﻟﺤﺐ ﻣﻊ ﺍﻟﻮﻗﺖ ﻟﻮ ﻣﺎﻓﻴﺶ ﺷﻦ ﻳﻨﻤﻴﻪ ﻭﻳﻜﺒﺮﻩ ﺣﻴﻤﻮﺕ ﺑﺮﻭﺣﻪ ..
ﻳﺎﺭﺍ : ﻋﻼﺵ ﻫﻲ ﻣﺶ ﻣﻬﺘﻤﻪ ﺑﻴﻚ ..
ﻧﻀﺎﻝ ﺑﻀﺤﻜﻪ : ﺑﺎﻟﻌﻜﺲ ﻣﻬﺘﻤﻪ ﺑﻴﺎ ﻫﻠﺒﻪ ﺑﺲ ﻣﺶ ﻣﻬﺘﻤﻪ ﺑﻨﻔﺴﻬﺎ ..
ﻳﺎﺭﺍ : ﻳﻌﻨﻲ ﺷﻜﻠﻬﺎ ﺍﻟﺨﺎﺭﺟﻲ؟
ﻧﻀﺎﻝ ﺑﻀﺤﻜﻪ : ﻣﻬﺘﻤﻪ ﺑﻨﻔﺴﻬﺎ ﻣﻦ ﻧﺎﺣﻴﻪ ﺷﻜﻠﻬﺎ ﺍﻟﺨﺎﺭﺟﻲ ﻫﻠﺒﻪ ...
ﻳﺎﺭﺍ ﺿﺤﻜﺖ ﺑﺘﻌﺠﺐ : ﻭﻳﻦ ﺍﻟﻤﺸﻜﻠﻪ؟ !!
ﻧﻀﺎﻝ ﺿﺤﻚ ﻭﺑﻌﺪﻳﻦ ﺗﻨﻬﺪ :.........
***
ﻓﻲ ﺍﻟﺠﺎﻣﻌﻪ ..
ﺭﻫﻒ : ﻣﺸﻜﻮﺭ ﺃﺳﻨﺎﻡ ... ﺑﺠﺪﻳﺎﺕ ﻣﺶ ﺣﻨﻨﺴﺎﻟﻚ ﻫﺎﻟﻤﻌﺮﻭﻑ ..
ﺃﺳﻨﺎﻡ : ﺑﻄﻠﻲ ﻳﺎﺑﻨﺖ ﺍﻟﺠﻮ ﺍﻟﻠﻲ ﺩﻳﺮﻱ ﻓﻴﻪ .. ﺍﻟﻤﻬﻢ ﺗﻮﺍ ﺭﻛﺰﻱ ﻓﻴﻬﻢ ﻛﻮﻳﺲ ... ﻭﺍﻟﻠﻲ ﻣﺄﺷﺮ ﻋﻠﻴﻪ ﺑﺎﻟﺬﺍﺕ ..
ﺭﻫﻒ ﺍﺑﺘﺴﻤﺖ : ﺣﺎﺿﺮ ..
ﻟﺆﻱ : ﻏﺪﻭﺓ ﺟﺎﻳﻪ ..
ﺭﻫﻒ : ﻣﺶ ﻋﺎﺭﻓﻪ ﺑﺼﺮﺍﺣﻪ ﺧﺎﻃﺮﻱ ﻧﻘﺮﺍ ﻓﻲ ﺍﻟﺤﻮﺵ ..
ﺃﺳﻨﺎﻡ : ﺑﻪ ﻛﻠﻤﻴﻨﻲ ﺳﻜﺎﻳﺐ ...
ﺭﻫﻒ ﺑﻀﺤﻜﻪ : ﻋﻼﺵ ..
ﺃﺳﻨﺎﻡ ﺑﺈﺣﺮﺍﺝ : ﺍﺣﻤﻢ .. ﻓﻲ ﺣﺎﻟﺔ ﻣﺎﻓﻬﻤﺘﻲ ﺷﻲ .. ﻳﻌﻨﻲ ﻛﻠﻤﻴﻨﻲ ..
ﺭﻫﻒ ﺑﻀﺤﻜﻪ : ﺍﻭﻛﻲ ... ﻳﻼﺍ ﻋﻄﻠﺖ .. ﻗﻮﻟﻮﺍ ﻟﺘﻘﻮﻯ ﺭﻭﺣﺖ ﺑﻪ .. ﻭﻟﻔﺖ ﻭﻣﺸﺖ ﻭﺑﻌﺪﻳﻦ ﺍﻟﺘﻔﺘﺖ ﻭﻗﺎﻟﺖ ... ﺑﺎﺍﺍﺍﻱ ﻭﻫﻲ ﺗﺄﺷﺮ ﺑﺈﻳﺪﻫﺎ ... ﻭﻫﻤﺎ ﺭﺩﻭﺍ ﻋﻠﻴﻬﺎ ... ﻭﻣﺸﺖ ..
ﻟﺆﻱ ﻣﺮﻛﺰ ﻉ ﺻﺎﺣﺒﻪ ﺍﻟﻠﻲ ﻋﻴﻮﻧﻪ ﻳﻠﻤﻌﻮﺍ ﻛﻞ ﻣﺎﻳﺸﻮﻓﻬﺎ ﻭﺗﺨﺘﻔﻲ ﻟﻤﻌﺘﻬﻢ ﻣﺠﺮﺩ ﻣﺎﺗﺨﺘﻔﻲ ..
ﻟﺆﻱ : ﻷﻣﺘﻰ ..
ﺷﺒﺤﻠﻪ ﺃﺳﻨﺎﻡ ؛ ﺷﻨﻮ؟؟ !!
ﻟﺆﻱ : ﺍﻧﺖ ﻓﺎﻫﻢ ﻋﻠﻴﺎ ﻟﻴﻚ ﺍﺭﺑﻌﻪ ﺳﻨﻴﻦ ﻭﺍﻧﺖ ﺳﺎﻛﺖ ﺍﻣﺘﻰ ﺑﺘﻘﻮﻟﻠﻬﺎ ﻓﻬﻤﻨﻲ ...
ﺃﺳﻨﺎﻡ ﺗﻨﻬﺪ : ﺧﻠﻴﻬﺎ ﺗﺘﺨﺮﺝ ﻗﺒﻞ ..
ﻟﺆﻱ : ﻭﻳﺠﻲ ﻭﺍﺣﺪ ﺗﺎﻧﻲ ﻭﻳﺎﺧﺪﻫﺎ ﻣﻨﻚ ﻭﺗﺒﺎﺭﻛﻠﻬﺎ ﻉ ﺍﻟﺘﺨﺮﺝ ﻭﺍﻟﺨﻄﻮﺑﻪ ﺑﺎﻟﻤﺮﻩ ..
ﺃﺳﻨﺎﻡ ﺑﻐﻀﺐ : ﻟﻠﻠﻠﺆﻱ ..
ﻟﺆﻱ : ﺗﺘﺨﺮﺝ ﺍﻧﺖ ﺍﻟﺴﻨﻪ ﻫﻴﺎ ﺑﺮﺍ ﺃﺧﻄﺒﻬﺎ ﻃﻮﻝ ﻭﻣﺎﺗﺴﺘﻨﺎﺵ ﺍﺳﻤﻊ ﻣﻨﻲ ﻳﺎﺻﺎﺣﺒﻲ ... ﻭﻟﻒ ﻭﻣﺸﻲ ﻭﺧﻼ ﺃﺳﻨﺎﻡ ﻗﻠﺒﻪ ﻣﻘﺒﻮﺽ ﻣﻦ ﺍﻟﺨﻮﻑ
ﺃﺳﻨﺎﻡ ﺳﺎﺑﻖ ﺭﻫﻒ ﺑﺴﻨﻪ ﻓﻲ ﺍﻟﻜﻠﻴﻪ ﻭﻫﻮ ﺍﻛﺒﺮ ﻣﻨﻬﺎ ﺑﺘﻼﺗﻪ ﺳﻨﻴﻦ .. ﻃﺒﻌﺎ ﺭﻫﻒ ﺯﻱ ﻣﺎﻗﻠﺖ ﻋﻨﺪﻫﺎ ﻧﺒﻮﻍ ﻭﺧﺸﺖ ﺑﻜﺮﻱ ﻓﻲ ﺍﻟﻘﺮﺍﻳﻪ ... ﺍﻟﻤﻬﻢ ﻣﻦ ﺍﻭﻝ ﻧﻈﺮﺓ ﺣﺒﻬﺎ ... ﻭﺣﺒﻪ ﻟﻴﻬﺎ ﻳﺰﻳﺪ ﻳﻮﻡ ﻋﻦ ﻳﻮﻡ ﻭﻳﺘﻌﺎﻣﻞ ﻣﻌﺎﻫﺎ ﻛﺼﺪﻳﻖ ﻭﻣﺶ ﻗﺎﺩﺭ ﻳﻌﺘﺮﻓﻠﻬﺎ ﻣﺎﻳﺒﻴﺶ ﻳﺸﻐﻠﻬﺎ ﻋﻦ ﻗﺮﺍﻳﺘﻬﺎ .. ﻓﻨﻔﺲ ﺍﻟﻮﻗﺖ ﻣﺶ ﻣﺨﻠﻲ ﺣﺪ ﻳﺠﻲ ﺟﻴﻬﺘﻬﺎ .. ﻷﻥ ﺍﻟﻜﻠﻴﻪ ﻛﻠﻬﺎ ﺷﺒﻪ ﻓﺎﻫﻤﻪ ﺍﻥ ﺭﻫﻒ ﺗﺨﺺ ﺃﺳﻨﺎﻡ .. ﻭﻹﻧﻪ ﻣﺤﺒﻮﺏ ﻫﻠﺒﻪ ﻣﺎﺣﺪ ﻓﻜﺮ ﻳﻘﺮﺏ ﻣﻦ ﺭﻫﻒ ﻟﻐﺮﺽ ﻏﻴﺮ ﺍﻟﺰﻣﺎﻟﻪ ﻉ ﺧﺎﻃﺮﻩ ... ﺍﻟﻤﺸﻜﻠﻪ ﺍﻥ ﺍﻟﻨﺎﺱ ﻛﻠﻬﺎ ﻓﺎﻫﻤﻪ ﺇﻻ ﺭﻫﻒ ...
***
ﻳﺎﺭﺍ : ﻳﻌﻨﻲ ﻣﺮﺗﻚ ﺗﻘﻠﻴﺪﻳﻪ ﻓﻲ ﺗﻔﻜﻴﺮﻫﺎ ..
ﻧﻀﺎﻝ : ﻣﺎﻛﻨﺘﺶ ﻧﺤﺴﺎﺑﻬﺎ ﻫﻜﻲ .. ﻟﻤﺎ ﺗﻌﺮﻓﺖ ﻋﻠﻴﻬﺎ ﻛﺎﻧﺖ ﺍﻧﺴﺎﻧﻪ ﻧﺎﺟﺤﻪ ﻭﻃﻤﻮﺣﻪ ﻭﻣﺘﻔﻮﻗﻪ ﻓﻜﻞ ﺷﻲ .. ﺣﺘﻰ ﺑﻌﺪ ﺗﺰﻭﺟﻨﺎ ﻭﺭﻭﺣﻨﺎ ﻫﻨﻲ .. ﺧﺪﻣﺖ ﻓﻲ ﻣﻜﺘﺐ ﻫﻨﺪﺳﻲ ﻛﺒﻴﺮ ﻭﻛﺎﻧﺖ ﺍﻫﻢ ﻣﻬﻨﺪﺳﻪ ﻓﻴﻪ .. ﻓﻠﺤﻈﻪ ﺳﻴﺒﺖ ﻛﻞ ﺷﻲ ﻭﻗﺎﻟﺖ ﺑﻨﺘﻔﺮﻍ ﻟﻠﺤﻮﺵ ﻭﺍﻟﺼﻐﺎﺭ .. ﺑﺮﻏﻢ ﺍﻧﻲ ﻗﻠﺖ ﺣﻨﺴﺎﻋﺪﻫﺎ ﺑﺲ ﻫﻲ ﺭﻓﻀﺖ ﺭﻓﺾ ﺗﺎﻡ ..
ﻳﺎﺭﺍ : ﻣﻌﻨﺎﻫﺎ ﻣﻦ ﺍﻷﺳﺎﺱ ﻣﺎﻋﻨﺪﻫﺎﺵ ﻃﻤﻮﺡ ... ﻛﺎﻧﺖ ﺑﺲ ﻣﻬﺘﻤﻪ ﺑﻜﻞ ﻣﺮﺣﻠﻪ ﺗﻌﻴﺸﻬﺎ ﻭﺧﻼﺹ ... ﻭﻣﻤﻜﻦ ﺗﻜﻮﻥ ﻣﻦ ﺍﻟﻨﻮﻋﻴﻪ ﺍﻟﻠﻲ ﺍﻟﻤﻬﻢ ﺗﺰﻭﺟﺖ ﻭﺩﺍﺭﺕ ﻋﻴﻠﻪ .. ﻳﻌﻨﻲ ﺍﻟﻤﺮﺍﺓ ﻣﺮﺟﻮﻋﻬﺎ ﻟﺤﻮﺷﻬﺎ ﻭﺻﻐﺎﺭ ... ﻭﻗﺎﻟﺘﻬﺎ ﺗﻬﻜﻤﺎ ..
ﻧﻀﺎﻝ : ﻣﻊ ﺍﻷﺳﻒ ﺍﻛﺘﺸﻔﺖ ﻫﺬﺍ ﻛﻠﻪ ﻣﺆﺧﺮﺍ ...
ﻳﺎﺭﺍ ﺷﺒﺤﺘﻠﻪ ﻫﻠﺒﻪ ﺑﻌﺪﻳﻦ ﻗﺎﻟﺖ : ﺍﺳﺘﻤﺮﻳﺖ ﻣﻌﺎﻫﺎ ﻉ ﺧﺎﻃﺮ ﺍﻟﺼﻐﺎﺭ ..
ﻧﻀﺎﻝ ﻫﺰ ﺭﺍﺳﻪ ﺑﺈﻳﺠﺎﺏ : ﺇﻳﻪ ... ﺑﻨﺎﺗﻲ ﺑﺎﻟﻨﺴﺒﻪ ﻟﻴﺎ ﺍﻫﻢ ﺷﻲ .. ﻭﻣﺎﻓﻲ ﺷﻲ ﻳﻮﺻﻞ ﻷﻫﻤﻴﺘﻬﻢ ﻋﻨﺪﻱ .. ﻓﻀﻠﺖ ﻳﺘﺮﺑﻮﺍ ﺑﻴﻨﻲ ﻭﺑﻴﻨﻬﺎ ...
ﻳﺎﺭﺍ ﺍﺑﺘﺴﻤﺖ : ﺍﻧﻲ ﻋﻜﺴﻚ ﺗﻤﺎﻣﺎ .. ﺍﻧﻲ ﺗﺰﻭﺟﺖ ﺭﺍﺟﻞ ﺃﻭﻫﻤﻨﻲ ﺍﻧﻪ ﻣﺘﺤﺮﺭ ﻭﻳﺤﺘﺮﻡ ﺍﻟﻤﺮﺍﺓ ﻭﻋﻘﻠﻴﺘﻬﺎ .. ﺑﺲ ﺑﻌﺪ ﺍﻟﺴﻨﻪ ﺍﻷﻭﻟﻰ ﻭﺗﺤﺪﻳﺪﺍ ﺑﻌﺪ ﺟﺒﺖ ﻭﻟﺪﻱ " ﺟﺒﺮ ".. ﺍﻟﻠﻲ ﺳﻤﺎﻩ ﻉ ﺍﺳﻢ ﺑﻮﻩ ... ﺑﺪﻱ ﻳﺒﻴﻨﻲ ﻧﻘﻌﻤﺰ ﻓﻲ ﺍﻟﺤﻮﺵ ﻭﻧﺮﺑﻲ ﺍﻟﺼﻐﺎﺭ ﻭﻧﻄﻴﺐ ﻭﻧﻀﻢ ﻭﺍﻟﺦ .... ﻭﺍﻧﻲ ﺭﻓﻀﺖ ﺭﻓﺾ ﺗﺎﻡ ... ﻛﺎﻥ ﻳﺒﻲ ﻳﻘﺘﻞ ﻓﻴﺎ ﻛﻞ ﺷﻲ ﺣﻠﻮ ﻭﻳﻘﺘﻞ ﻃﻤﻮﺣﻲ ﺍﻟﻠﻲ ﻣﺨﻄﻄﻪ ﻧﻮﺻﻠﻪ .. ﺻﺎﺭﺕ ﺑﻴﻨﺎﺗﻨﺎ ﻣﺸﺎﻛﻞ ﻫﻠﺒﻪ ﺣﺎﻭﻟﺖ ﻧﻐﻴﺮ ﻓﻜﺮﻩ ﺑﺲ ﻓﺸﻠﺖ .. ﺍﻭ ﻫﻮ ﺍﻟﻠﻲ ﺍﺗﻀﺤﻠﻲ ﺍﻧﻪ ﺯﻳﻪ ﺯﻱ ﺃﻱ ﺭﺍﺟﻞ ﻓﻲ ﻫﺎﻟﻤﺠﺘﻤﻊ ﺍﻟﺬﻛﻮﺭﻱ ... ﺷﺎﻳﻒ ﺍﻥ ﺍﻟﻤﺮﺍﺓ ﻟﻠﺤﻮﺵ ﻭﺑﺲ ... ﻃﻠﺒﺖ ﺍﻟﻄﻼﻕ ﺭﻓﺾ .. ﺭﻓﻌﺖ ﻋﻠﻴﻪ ﻗﻀﻴﻪ ﻭﻛﺴﺒﺘﻬﺎ ﻭﺍﻃﻠﻘﺖ ﻭﺧﺪﻳﺖ ﻛﻞ ﺣﻘﻮﻗﻲ ﺭﻏﻢ ﻋﻨﻪ .. ﻣﺶ ﻹﻧﻲ ﻣﺤﺘﺎﺟﻪ ﻻ .. ﻟﻜﻦ ﻟﻴﻌﺮﻑ ﺍﻧﻲ ﻣﺶ ﺿﻌﻴﻔﻪ ﻭﻧﻘﺪﺭﻧﺎﺧﺪ ﺣﻘﻲ ﻣﻨﻪ ﺗﺎﻟﺖ ﻭﻣﺘﻠﺖ .. ﻭﺑﺮﻏﻢ ﻣﺤﺎﻭﻟﺘﻪ ﺍﻧﻪ ﻳﻀﻐﻂ ﻋﻠﻴﺎ ﺑﻮﻟﺪﻱ .. ﺧﻠﻴﺘﻬﻮﻟﻪ ..
ﻧﻀﺎﻝ ﻣﺘﻔﺎﺟﺊ : ﺧﻠﻴﺘﻴﻪ؟ !!
ﻳﺎﺭﺍ : ﺍﻳﻪ .. ﺑﺶ ﻳﻌﺮﻑ ﺍﻧﻲ ﻣﺶ ﻣﻦ ﻧﻮﻋﻴﻪ ﺍﻟﻠﻲ ﻳﻠﺘﻮﻯ ﺫﺭﺍﻋﻬﺎ ..
ﻟﻜﻦ ﻃﺒﻌﺎ ﻣﺨﻄﻄﻪ ﺍﻧﻲ ﻧﺎﺧﺪ ﺣﻀﺎﻧﺔ ﻭﻟﺪﻱ ﺑﻌﺪ ﺍﻟﻄﻼﻕ .. ﻭﺗﻮﺍ ﺭﺍﻓﻌﻪ ﺍﻟﻘﻀﻴﻪ ..
ﻧﻀﺎﻝ ﻛﺎﻥ ﻳﺘﺄﻣﻞ ﻓﻴﻬﺎ ﻭﻓﻲ ﺍﻟﻘﻮﺓ ﺍﻟﻠﻲ ﻓﻌﻴﻮﻧﻬﺎ ﺑﺈﻋﺠﺎﺏ ﺷﺪﻳﺪ
ﻳﺎﺭﺍ ﺍﺑﺘﺴﻤﺖ : ﻭﺍﻟﻘﻀﻴﻪ ﺣﻨﺮﺑﺤﻬﺎ .. ﻹﻧﻲ ﻣﺤﺎﻣﻴﻪ ﻟﻴﺎ ﺍﺳﻢ ﻛﺒﻴﺮ .. ﻭﺯﻣﻼﺋﻲ ﺧﺪﻣﻮﻧﻲ ﻓﻲ ﻫﺎﻟﻘﻀﻴﻪ ...
ﻧﻀﺎﻝ ﺍﺑﺘﺴﻢ : ﻳﺎﺭﺍ ... ﻋﻼﺵ ﺍﺧﺘﺮﺗﻲ ﺗﻜﻮﻥ ﻣﺤﺎﻣﻴﻪ ﻓﻲ ﺍﻟﻘﻀﺎﻳﺎ ﺍﻟﺠﻨﺎﺋﻴﻪ
ﻳﺎﺭﺍ ﺍﺑﺘﺴﻤﺖ : ﺗﺤﺪﻱ ..
ﻧﻀﺎﻝ ﺑﺈﺑﺘﺴﺎﻣﻪ : ﺗﺤﺪﻱ ؟ !!
ﻳﺎﺭﺍ : ﺍﻳﻪ ﻣﺶ ﺍﻱ ﻭﺣﺪﻩ ﺗﻘﺪﺭ ﺗﻜﻮﻥ ﻣﺤﺎﻣﻴﻪ ﻓﻲ ﻫﺎﻟﻨﻮﻉ ﻣﻦ ﺍﻟﻘﻀﺎﻳﺎ .. ﻭﺍﻧﻲ ﺧﺸﻴﺖ ﻫﺎﻟﺘﺨﺼﺺ ﻭﻧﺠﺤﺖ ﻓﻴﻪ ﻫﻠﺒﻪ ﻣﻦ ﺍﻭﻝ ﻣﺎﻭﻟﻴﺖ ﻣﺘﺪﺭﺑﻪ ﺇﻟﻰ ﺍﻧﺎ ﻭﻻﻗﻀﻴﻪ ﺧﺴﺮﺗﻬﺎ ...
ﻧﻀﺎﻝ ﺷﺒﺤﻠﻬﺎ ﻫﻠﺒﻪ ﻭ ﺍﺑﺘﺴﻢ ﻭﺑﺼﻮﺕ ﻫﺎﺩﻱ : ﻳﺎﺭﺍ ... ﺇﻧﺘﻲ ﻣﺜﻴﺮﻩ ﻟﻺﻋﺠﺎﺏ ..
ﺍﺑﺘﺴﻤﺖ ﻳﺎﺭﺍ ﻭﻗﻠﺒﻬﺎ ﻳﺪﻕ ﺑﻘﻮﺓ ﻭﺷﺮﺑﺖ ﻣﻦ ﻃﺎﺳﻪ ﺍﻟﻤﻴﻪ ﺍﻟﻠﻲ ﺣﺪﺍﻫﺎ ﻭﻫﻲ ﺗﺸﺒﺤﻠﻪ ﺑﻌﺪﻳﻦ ﻗﺎﻟﺖ : ﺷﻜﺮﺍ ...
ﻧﻀﺎﻝ : ﺇﻥ ﺷﺎﺀ ﺗﺎﺧﺪﻱ ﺣﻀﺎﻧﻪ ﻭﻟﺪﻙ ﻋﻦ ﻗﺮﻳﺐ ﻭﺗﺒﺸﺮﻳﻨﻲ ..
ﻳﺎﺭﺍ ﺑﺈﺑﺘﺴﺎﻣﻪ : ﺍﻟﺠﻠﺴﻪ ﻳﻮﻡ ﺍﻹﺛﻨﻴﻦ .. ﺣﻨﺒﺸﺮﻙ ﺃﻛﻴﺪ ..
ﻧﻀﺎﻝ : ﺛﻘﺘﻚ ﺑﻨﻔﺴﻚ .. ﻣﺨﻠﻴﺘﻨﻲ ﻧﺰﻳﺪ ﺍﻋﺠﺎﺏ ﺑﻴﻚ ﺍﻛﺜﺮ ﻭﺃﻛﺜﺮ ..
ﻳﺎﺭﺍ ﺑﺨﺠﻞ : ﺍﺳﺘﺎﺫ .. ﻧﻀﺎﻝ ...
ﻧﻀﺎﻝ : ﻧﻀﺎﻝ .. ﻧﻀﺎﻝ ﻭﺑﺲ ..
ﻳﺎﺭﺍ ﺿﺤﻜﺖ ﻭﺣﻄﺖ ﺍﻳﺪﻫﺎ ﺗﺤﺖ ﺫﻗﻨﻬﺎ ﺑﺨﺠﻞ ﻭﺷﺒﺤﺖ ﻟﻠﺮﻭﺷﻦ ...
ﻧﻀﺎﻝ ﺍﺑﺘﺴﻢ ﻭﻫﻮ ﻣﺮﻛﺰ ﻉ ﺧﺠﻠﻬﺎ : ﺍﺣﻤﻢ .. ﺑﻌﺪ ﻧﻄﻠﻌﻮﺍ ﻣﻦ ﻫﻨﻲ ﻧﺒﻴﻚ ﻓﻲ ﺧﺪﻣﻪ ..
ﻳﺎﺭﺍ ﺷﺒﺤﺘﻠﻪ ﺑﺘﺴﺎﺅﻝ : ﺷﻦ ﻫﻲ ...
ﻧﻀﺎﻝ ﺑﺄﺑﺘﺴﺎﻣﻪ : ﺑﻌﺪ ﻧﻄﻠﻌﻮﺍ ﻣﻦ ﻫﻨﻲ ﻧﻘﻮﻟﻚ ..
ﻳﺎﺭﺍ ﺍﺑﺘﺴﻤﺖ ﻭﻫﻲ ﺗﺸﺒﺢ ﻟﻌﻴﻮﻧﻪ ﺑﺈﻋﺠﺎﺏ .. ﻭﻫﻮ ﻛﺬﻟﻚ .. ﺑﻌﺪﻳﻦ ﺿﺤﻜﻮﺍ ﻭﻛﻤﻠﻮﺍ ﻣﺎﻛﻠﻪ ...
***
ﻃﺎﻟﻊ ﻣﻦ ﺍﻟﺸﺮﻛﻪ ﻭﻣﻌﺎﻩ ﻣﺪﻳﺮ ﻣﻜﺘﺒﻪ ﻣﺘﻮﺟﻬﻴﻦ ﻟﻮﺯﺍﺭﺓ ﺍﻹﺳﻜﺎﻥ ..
ﺃﻳﻤﻦ : ﻓﻜﺮﺓ ﺍﻟﻤﻨﺘﺠﻊ ﻫﺎﺩﻱ ﻣﻤﺘﺎﺯﺓ ..
ﻣﻌﺎﻭﻳﻪ : ﺑﻨﺄﺟﻠﻬﺎ ﺣﺎﻟﻴﺎ ...
ﻓﺘﺤﻠﻪ ﺍﻟﺴﻮﺍﻕ ﺍﻟﺒﺎﺏ ﻭﺧﺶ ﻭﺳﻜﺮ ﺍﻟﺒﺎﺏ .. ﻭﺭﻛﺐ ﺍﻳﻤﻦ ﺟﻨﺒﻪ ﻣﻦ ﺍﻟﺠﻬﺔ ﺍﻟﺘﺎﻧﻴﻪ ..
ﺭﻛﺐ ﺍﻟﺴﻮﺍﻕ ﻭﺍﻟﺴﻴﺎﺭﻩ ﺑﺪﺕ ﺗﺘﺤﺮﻙ ..
ﺃﻳﻤﻦ : ﻋﻼﺵ ﺍﻟﺘﺄﺟﻴﻞ ..
ﻣﻌﺎﻭﻳﻪ : ﻧﻜﻤﻞ ﻣﺸﺮﻭﻉ ﺍﻟﻤﺪﻳﻨﻪ ﺍﻟﺴﻜﻨﻴﻪ ﻭﻧﻔﻀﻰ ﺑﻴﻪ ﻣﺸﺮﻭﻉ ﻛﺒﻴﺮ .. ﻧﺒﻲ ﻧﺘﻔﺮﻏﻠﻪ ﺗﻤﺎﻣﺎ ..
ﺃﻳﻤﻦ : ﻋﻨﺪﻙ ﺣﻖ ﺑﺘﻔﻜﺮ ﻓﻲ ﻛﻞ ﺷﻲ ﻓﻴﻪ ﺑﺸﻜﻞ ﻋﻤﻴﻖ .. ﺑﺎﻟﺬﺍﺕ ﺗﺼﻤﻴﻤﻪ ..
ﻣﻌﺎﻭﻳﻪ : ﻣﻦ ﺗﻮﺍ ﻓﻜﺮﻟﻲ ﻓﻲ ﻣﻬﻨﺪﺱ ﻟﻴﻪ ﺍﺳﻢ ﻛﺒﻴﺮ ﻭﺷﻐﻠﻪ ﻣﻀﻤﻮﻥ ...
ﺃﻳﻤﻦ : ﻣﺤﻠﻲ ﻭﻻ ﻣﻦ ﺑﺮﺍ ..
ﻣﻌﺎﻭﻳﻪ : ﺍﻳﻤﻦ ﻣﺎﺗﻜﺴﺮﻟﻴﺶ ﺭﻗﺒﺘﻲ ﺑﻐﺒﺎﺋﻚ ﺍﺍﻟﻠﻲ ﻳﺠﻴﻚ ﺑﻴﻦ ﻓﺘﺮﻩ ﻭﺍﻟﺘﺎﻧﻴﻪ .. ﺍﻛﻴﺪ ﻣﻦ ﺑﺮﺍ ... ﺍﻟﻠﻲ ﺩﺍﺧﻞ ﺧﻠﻴﻬﻢ ﻟﺘﺼﻤﻴﻢ ﻣﻮﻝ .. ﺍﻭ ﻋﻤﺎﺭﺓ ﺍﻭ ﺣﻮﺵ ﻋﺎﺩﻱ ﺑﺎﻟﻜﺜﻴﺮ ...
ﺍﻳﻤﻦ ﺑﻀﺤﻜﻪ : ﻓﻲ ﻣﻬﻨﺪﺳﻴﻦ ﻋﻨﺪﻧﺎ ﻧﻮﺍﺑﻎ ﻳﺎﺻﺎﺣﺒﻲ ..
ﻣﻌﺎﻭﻳﻪ ﺷﺒﺤﻠﻪ ﻭﺑﺘﻬﻜﻢ : ﻟﻤﺎ ﺗﺠﻲ ﺗﺘﺰﻭﺝ ﺟﻴﺒﻬﻢ ﻳﺼﻤﻤﻮﻟﻚ ﺣﻮﺷﻚ ..
ﺍﻳﻤﻦ ﺿﺤﻚ ﻭﺳﻜﺖ ..
***
ﺑﻌﺪ ﺍﻟﻤﻐﺮﺏ ﻛﺎﻧﺖ ﻣﻮﺗﻴﻪ ﺍﺟﻮﺍﺀ ﺣﻠﻮﻩ ﻓﻲ ﺍﻟﺤﻮﺵ ﻟﻌﻴﺪ ﻣﻴﻼﺩ ﻟﺒﻨﻰ ﺍﻟﻠﻲ ﺧﺸﺖ 18 ﺳﻨﻪ ﻓﻬﺎﻟﻴﻮﻡ .. ﻭﻛﺎﻟﻌﺎﺩﻩ ﺍﻷﺟﻮﺍﺀ ﻭﻻﺃﺭﻭﻉ ...
ﻭﻟﺒﻨﻰ ﻛﺎﻧﺖ ﻣﺘﺤﻤﺴﻪ ﻫﻠﺒﻪ ..
ﻃﻖ ﺍﻟﺒﺎﺏ ..
ﻣﺸﺖ ﺣﻨﺎﻥ ﻓﺘﺤﺖ ﻟﻘﺖ ﻋﺎﺋﺸﻪ ﻭﺟﻨﺒﻬﺎ ﻭﺍﺣﺪ ﻓﻴﺪﻩ ﺑﺎﻗﻪ ﻣﺪﺭﻕ ﺑﻴﻬﺎ ﻭﺟﻬﻪ ﻗﺎﻟﺘﻠﻪ : ﺍﻇﻬﺮ ﻭﺑﺎﻥ ﻋﻠﻴﻚ ﺍﻷﻣﺎﻥ ..
ﺍﺳﺎﻣﻪ ﺣﻮﻝ ﺍﻟﺒﺎﻗﻪ : ﺍﻳﻮﻩ ﺍﺭﺣﻤﻴﻨﻲ ﻓﻬﺎﻟﻴﻮﻡ ﻣﻦ ﻫﺰﺍﻳﺒﻚ ﺑﺲ ...
ﺣﻨﺎﻥ ﺑﻀﺤﻜﻪ : ﺍﻟﻴﻮﻡ ﺑﺲ ..
ﺿﺤﻜﻮﺍ ﺍﻟﺰﻭﺯ ...
ﺳﻠﻤﺖ ﻋﺎﺋﺸﻪ ﻉ ﺣﻨﺎﻥ ... ﻭﺧﺸﻮﺍ ...
ﺣﻨﺎﻥ : ﺷﻦ ﺟﻮﻙ ﺍﻧﺘﻲ ﻭﺍﻟﺒﻄﻞ ...
ﻋﺎﺋﺸﻪ ﺣﻄﺖ ﺍﻳﺪﻫﺎ ﻉ ﺑﻄﻨﻬﺎ : ﺍﻫﻮ ﻧﺮﺍﺟﻲ ﺍﻣﺘﻰ ﻳﻄﻠﻊ ..
ﺍﺳﺎﻣﻪ ﺑﻀﺤﻜﻪ : ﻣﺶ ﺍﻛﺜﺮ ﻣﻨﻲ ..
ﺷﺒﺤﻮﻟﻪ ﺍﻟﺰﻭﺯ ﻉ ﺟﻨﺐ :
ﺍﺳﺎﻣﻪ : ﻫﻬﻬﻬﻬﻬﻬﻬﻬﻬﻪ ..
" ﺍﺳﺎﻣﻪ ﺍﻫﺘﻤﺎﻣﻪ ﺑﻌﻤﻠﻪ ﻣﺨﻠﻴﻪ ﻫﺎﻣﻞ ﺣﻮﺷﻪ ﻫﻠﺒﻪ .. ﺍﺧﺮ ﻣﺮﻩ ﺗﻌﺒﺖ ﻋﺎﺋﺸﻪ ﺍﺗﺼﻠﺖ ﺑﻴﻪ ﻭﻣﺎﺭﺩﺵ ﻟﻴﻦ ﺍﺿﻄﺮﺕ ﺗﺘﺼﻞ ﺑﺤﻨﺎﻥ ﻓﻲ ﺍﻟﻠﻴﻞ ﺟﺘﻬﺎ ﻫﻲ ﻭﻧﻀﺎﻝ ﺭﻓﻌﻮﻫﺎ ﺍﻟﻤﺴﺘﺸﻔﻰ .. ﻭﻃﺒﻌﺎ ﻧﻀﺎﻝ ﻋﺎﺭﻙ ﺍﺳﺎﻣﻪ ﻫﻠﺒﻪ ﻟﻘﻠﺔ ﺍﻫﺘﻤﺎﻣﻪ ... ﻭﺧﺼﻮﺻﺎ ﺍﻥ ﻣﺮﺗﻪ ﺣﺎﻣﻞ ﻭﻓﻲ ﺷﻬﺮﻫﺎ ﺍﻷﺧﻴﺮ ﻻﺯﻡ ﻳﻜﻮﻥ ﻣﻬﺘﻢ ﻫﻠﺒﻪ ﻭﻻﻫﻲ ﺑﻴﻬﺎ "
ﻟﺒﻨﻲ : ﺍﻫﻼ ﻋﻤﻮ ﺍﺳﺎﻣﻪ ﻭﺧﺎﻟﺘﻮﺍ ﻋﺎﺋﺸﻪ ﻭﺳﻠﻤﺖ ﻋﻠﻴﻬﻢ ... ﻭﺭﻫﻒ ﺳﻠﻤﺖ ﻋﻠﻴﻬﻢ ..
ﺍﺳﺎﻣﻪ : ﺍﻣﺘﻰ ﻛﺒﺮﻭﺍ ﻫﺎﺩﻡ ﺑﺲ
ﺣﻨﺎﻥ : ﺣﻨﻲ ﺍﻟﻠﻲ ﻛﺒﺮﻧﺎ ...
ﻋﺎﺋﺸﻪ : ﺍﻟﻠﻬﻢ ﺑﺎﺭﻙ ﻋﻠﻴﻚ ﺍﻧﺘﻲ ﻭﻧﻀﺎﻝ ﻣﺎﺗﻜﺒﺮﻭﺵ ﺑﻜﻞ ...
ﺍﺑﺘﺴﻤﺖ ﺑﺨﺠﻞ ﺣﻨﺎﻥ ﻭﻗﺎﻟﺖ : ﺗﺴﻠﻤﻲ ...
ﺍﺳﺎﻣﻪ : ﺍﻻ ﺍﻟﺒﺎﺵ ﻣﻬﻨﺪﺱ ﻧﻀﺎﻝ ﻭﻳﻨﻪ ...
ﺍﻧﻔﺘﺢ ﺑﺎﺏ ﺍﻟﺤﻮﺵ ﻭﺧﺶ ﻧﻀﺎﻝ ﻭﻣﻌﺎﻩ ﻧﻴﺮﻭﺯ ﻳﻬﺪﺭﺯﻭﺍ ﻭﻳﻀﺤﻜﻮﺍ ..
ﺗﺸﺒﺤﻠﻪ ﺣﻨﺎﻥ ﺑﺤﺐ : ﻭﻟﺪ ﺍﻟﺤﻼﻝ ﻋﻨﺪ ﺫﻛﺮﻩ ..
ﻗﺪﻣﻮﺍ ﻫﻤﺎ ﺍﻟﺰﻭﺯ .. ﺳﻠﻢ ﻧﻀﺎﻝ ﻉ ﻋﺎﺋﺸﻪ ﻭﺃﺳﺎﻣﻪ .. ﻭﺳﻠﻤﺖ ﻧﻴﺮﻭﺯ ﻋﻠﻴﻬﻢ ....
ﻟﺒﻨﻰ ﺑﺤﻤﺎﺱ : ﺑﺎﺑﺎﺗﻲ .. ﻣﺎﻣﺘﻲ ﺗﻌﺎﻟﻮﺍ ﺑﺤﺪﺍﻱ ﻫﻴﺎ ﻭﻗﺖ ..
ﻧﻀﺎﻝ ﺑﻀﺤﻜﻪ : ﻣﺴﺘﻌﺠﻠﻪ ﻉ ﺍﻟﻬﺪﺍﻳﺎ ..
ﻟﺒﻨﻰ : ﻣﺶ ﺣﻨﻨﻜﺮ ... ﺇﻳﻪ ...
ﺿﺤﻜﻮﺍ ﻛﻠﻬﻢ ﻭﺟﻮ ﺣﺪﺍﻫﺎ ﺑﻮﻫﺎ ﻭﺃﻣﻬﺎ ﻧﻀﺎﻝ ﻉ ﻳﺴﺎﺭﻫﺎ ﻭﺣﻨﺎﻥ ﻉ ﻳﻤﻴﻨﻬﺎ ﻭﻫﻲ ﺷﺎﺩﺗﻬﻢ ﻭﺑﺪﻭﺍ ﻳﻐﻨﻮﺍ ... ﻭﺑﻌﺪﻳﻦ ﻃﻔﻮﺍ ﺍﻟﺸﻤﺎﻋﻲ ..
ﺣﻀﻦ ﻧﻀﺎﻝ ﻟﺒﻨﻰ ﺑﻘﻮﺓ ﻭﺑﺎﺳﻬﺎ ﻉ ﺭﺍﺳﻬﺎ .. ﻭﺣﻨﺎﻥ ﺣﻀﻨﺘﻬﺎ ﺑﻌﺪﻩ ﻭﺑﺎﺳﺘﻬﺎ ﻣﻦ ﺧﺪﻭﺩﻫﺎ ... ﻭﻛﺎﻧﺖ ﺍﺟﻮﺍﺀ ﺍﻷﺣﺘﻔﺎﻝ ﻭﻻﺃﺭﻭﻉ ﻭﻟﺒﻨﻰ ﻛﺎﻧﺖ ﺍﺳﻌﺪ ﻣﻦ ﺧﻠﻖ ﺭﺑﻲ ﻭﻗﺘﻬﺎ ...
***
ﻛﺎﻧﺖ ﻣﻘﻌﻤﺰﺓ ﻓﻲ ﺩﺍﺭﻫﺎ ﺍﻟﻜﺒﻴﺮﻩ ﻉ ﺳﺮﻳﺮﻫﺎ ﺍﻟﻔﺨﻢ ﻭﺗﺒﻜﻲ ﻭﻫﻲ ﺷﺎﺩﻩ ﺍﻟﺘﻘﻮﻳﻢ ﻭﺗﺸﻮﻑ ﻟﻠﺘﺎﺭﻳﺦ ..
ﻣﻬﺎ " ﻳﺎﺭﻳﺘﻨﻲ ﻣﺎﺟﻴﺖ ﻟﻬﺎﻟﺪﻧﻴﺎ .. ﻋﻼﺵ ﺟﻴﺖ ﻛﺎﻧﻲ ﺑﻨﻌﻴﺶ ﺑﺮﻭﺣﻲ ﻛﺎﻥ ﻣﺎﻋﻨﺪﻱ ﺣﺪ ﻳﺬﻛﺮ ﻳﻮﻡ ﺯﻱ ﻫﺬﺍ ... ﻣﺎﻣﺎ ﻭﻣﺎﺗﺖ ﻗﺒﻞ ﻟﻨﺸﻮﻓﻬﺎ ﻭﺍﻟﻠﻲ ﻣﻔﺮﻭﺽ ﻧﻘﻮﻟﻪ ﺑﺎﺑﺎ ﻣﺶ ﻣﺬﻛﺮ ﻭﺟﻮﺩﻱ ﺃﺻﻼ .. ﻳﺎﺭﺏ ﻧﻤﻮﺕ ﻭﻧﺮﺗﺎﺡ ﻳﺎﺭﺏ "...
ﻃﻖ ﺑﺎﺏ ﺩﺍﺭﻫﺎ ..
ﻣﻬﺎ ﻣﺴﺤﺖ ﺩﻣﻮﻋﻬﺎ ﺑﺄﻣﻞ ﺍﻥ ﻳﻜﻮﻥ ﻫﻮ ﺍﺫﻛﺮ ﻫﺎﻟﻤﺮﻩ ﻭﺑﺼﻮﺕ ﻳﺮﻋﺶ : ﺗﺘﻔﻀﻞ ...
ﺍﻧﻔﺘﺢ ﺍﻟﺒﺎﺏ ﻭﺧﺸﺖ ﺍﻟﻤﺮﺑﻴﻪ ﻣﺘﺎﻋﻬﺎ ﺍﺳﻤﻬﺎ ﻣﺮﻳﻢ ﻭﻓﻴﺪﻫﺎ ﻃﻮﺭﻃﺎ ﺑﺎﻟﺸﻤﺎﻋﻲ .. ﻭﻣﻌﺎﻫﺎ ﺍﻟﺨﺪﻡ ... ﺑﺮﻏﻢ ﺧﻴﺒﺔ ﺃﻣﻠﻬﺎ ﻟﻜﻨﻬﺎ ﻓﺮﺣﺖ ﻟﻬﺎﻟﻤﻔﺎﺟﺄﺓ ...
ﻣﺮﻳﻢ ﺍﻟﻤﺮﺑﻴﻪ ﺣﻄﺖ ﺍﻟﻄﻮﺭﻃﻪ ﻉ ﻃﺎﻭﻟﺔ ﺗﺘﻮﺳﻂ ﺍﻟﺪﺍﺭ ...
ﻣﺮﻳﻢ : ﺗﻌﺎﻟﻲ ﺣﺒﻴﺒﺘﻲ ...
ﻗﺮﺑﺖ ﻣﻬﺎ ﻭﻫﻲ ﻣﺒﺘﺴﻤﻪ ﻭﺩﻣﻮﻋﻬﺎ ﺗﻨﺰﻝ .. ﻭﻗﻔﺖ ﺑﻴﻨﺎﺗﻬﻢ ﻭﺑﺪﻭﺍ ﻳﻐﻨﻮﻟﻬﺎ .. ﻫﻲ ﺗﺸﺒﺤﻠﻬﻢ .. ﻓﺮﺣﺎﻧﻪ ﺑﺲ ﻓﺮﺣﺘﻬﺎ ﻣﻤﺰﻭﺟﻪ ﺑﺤﺴﺮﺓ ... ﺑﺪﻝ ﻣﺎﺗﺤﺘﻔﻞ ﺑﻤﻨﺎﺳﺒﻪ ﺯﻱ ﻫﺎﺩﻱ ﺑﻴﻦ ﺑﻮﻫﺎ ﻭﺃﻣﻬﺎ ﻭﺍﺻﺤﺎﺑﻬﺎ ﻭﻧﺎﺳﻬﺎ ﻗﺎﻋﺪﻩ ﺗﺤﺘﻔﻞ ﻣﻊ ﺍﻟﺨﺪﻡ ... ﻣﻊ ﻫﺬﺍ ﺣﺒﺖ ﺗﻬﺮﺏ ﻣﻦ ﻭﺍﻗﻌﻬﺎ ﻭﺣﺎﻭﻟﺖ ﺗﺴﺘﻤﺘﻊ ﺑﻮﻗﺘﻬﺎ ﺷﻮﻱ ﻣﻌﺎﻫﻢ ﻭﺗﻨﺴﻰ ﻟﻠﺤﻈﺎﺕ ﻣﺮﺍﺭﺓ ﺣﻴﺎﺗﻬﺎ ..
***
ﻳﺎﺍﺍﺍﺍﻩ ﻳﺎﻣﺎﻣﺎ ﻳﻬﺒﺒﺒﺒﻞ
ﺣﻀﻨﺘﻬﺎ ﺣﻨﺎﻥ : ﺍﻫﻢ ﺷﻲ ﺍﻧﻪ ﻋﺠﺒﻚ ..
ﻟﺒﻨﻰ : ﺍﻛﻴﺪ ﻣﺎﻣﺎ ﻳﻌﺠﺒﻨﻲ ﺍﻟﺒﻮﺕ ﻫﺬﺍ ﻗﺪﺍﺵ ﻟﻴﺎ ﻧﺒﻲ ﻧﺸﺮﻳﻪ ..
ﻧﻀﺎﻝ : ﻭﻋﻼﺵ ﻳﺎﺑﺎﺑﺎ ﻣﺎﻗﻠﺘﻴﺶ ..
ﻟﺒﻨﻰ : ﻗﻠﺖ ﺧﻞ ﻳﺨﺶ ﺍﻟﺸﺘﻲ ﻣﺰﺑﻮﻁ ..
ﻧﻀﺎﻝ ﺿﺤﻚ ﻭﻗﺮﺻﻬﺎ ﻣﻦ ﺧﺪﻫﺎ ﻭﻃﻠﻊ ﻣﻦ ﺟﻴﺒﻪ ﻫﺪﻳﺘﻪ ﻭﻋﻄﺎﻫﺎﻟﻬﺎ ...
ﻟﺒﻨﻰ ﺧﺪﺕ ﺍﻟﻬﺪﻳﻪ ﺍﻟﻠﻲ ﻛﺎﻧﺖ ﻓﻲ ﻛﻴﺴﻪ ﻓﺘﺤﺘﻬﺎ ﻟﻘﺖ ﻓﻴﻬﺎ ﺑﺎﻛﻮ ﻓﺘﺤﺎﺗﻪ ﻟﻘﺖ .. ﺳﻠﺴﻠﻪ ﺫﻫﺐ ﺗﻌﻠﻴﻘﺘﻬﺎ ﻓﺮﺍﺷﻪ ﻭﻛﺎﻧﺖ ﺣﻠﻮﻩ ﻭﻧﺎﻋﻤﻪ ﺑﺎﻟﻤﺮﻩ ..
ﻟﺒﻨﻰ ﺑﻔﺮﺣﻪ ﺷﺪﻳﺪﻩ : ﺗﻬﺒﺒﺒﺒﺒﺒﺒﻞ ﺑﺎﺑﺎ ﻭﺣﻀﻨﺎﺗﻪ ﻭﻫﻮ ﺣﻀﻨﻬﺎ ﻭﻳﻀﺤﻚ ﺑﻌﺪﻳﻦ ﺍﺑﺘﺴﻢ ﻭﻫﻮ ﻳﺬﻛﺮ ﻛﻴﻒ ﺧﺪﺍﻫﺎ ...
ﻓﻼﺵ ﺑﺎﻙ
ﺍﻭﺻﻔﻠﻲ ﺑﻨﺘﻚ ..
ﻧﻀﺎﻝ ﺑﻀﺤﻜﻪ : ﻋﻼﺵ ..
ﻳﺎﺭﺍ : ﺑﺶ ﻧﻌﺮﻑ ﻧﺨﺘﺎﺭ ﻫﺪﻳﻪ ﺗﻨﺎﺳﺒﻬﺎ ..
ﻧﻀﺎﻝ ﺍﺑﺘﺴﻢ : ﺑﻨﺘﻲ ﻫﺎﺩﻱ ﺍﺣﻠﻰ ﺑﻨﺖ ﻓﻲ ﺍﻟﺪﻧﻴﺎ ... ﻣﺸﺎﻏﺒﻪ ﻭﺣﻴﻮﻳﻪ .. ﻭﺣﺮﻛﻴﻪ ﻭﻫﻲ ﺭﻭﺡ ﺍﻟﺤﻮﺵ ﻭﺗﻠﻘﻴﻬﺎ ﺩﻳﻤﺎ ﺗﻀﺤﻚ ﻭﺿﺤﻚ ﻓﻴﻨﺎ ..
ﻳﺎﺭﺍ ﺍﺑﺘﺴﻤﺖ : ﻓﺮﺍﺷﻪ .. ﺍﺷﺮﺗﻠﻪ ﺑﺴﺒﺎﺑﺘﻬﺎ ﻉ ﺳﻠﺴﻠﺔ ﻓﻴﻬﺎ ﺗﻌﻠﻴﻘﺔ ﻓﺮﺍﺷﻪ ..
ﻧﻀﺎﻝ ﺍﺑﺘﺴﻢ ﻭﺷﺒﺤﻠﻬﺎ : ﻋﻨﺪﻙ ﻋﻠﻢ ﺍﻧﻚ ﺭﺍﺋﻌﻪ ...
ﺷﺒﺤﺘﻠﻪ ﻭﺍﺑﺘﺴﻤﺖ ﺑﺨﺠﻞ ﻭﺷﺒﺤﺖ ﻟﻠﺴﻠﺴﻠﻪ ..
ﺍﻟﻮﻗﺖ ﺍﻟﺤﺎﺿﺮ ..
ﻧﻴﺮﻭﺯ : ﺣﻠﻮﺓ ﺑﺎﻟﻤﺮﺓ ﺑﺲ ﻛﻴﻒ ﺧﻄﺮﺕ ﻓﻲ ﺑﺎﻟﻚ ..
ﻧﻀﺎﻝ ﺑﺮﺑﻜﻪ : ﻓﻜﺮﺕ ﻓﻲ ﺷﻲ ﻳﺸﺒﻪ ﻟﻠﺒﻮﻧﺘﻲ ..
ﻟﺒﻨﻰ : ﻳﺎﺭﻭﺣﻲ ﺍﻧﻲ .. ﻭﺑﺎﺳﺎﺗﻪ ﻣﻦ ﺧﺪﻩ ﻭﻫﻮ ﺿﺤﻚ ...
ﺭﻫﻒ : ﺑﺎﺑﺎ ﻋﻴﺪ ﻣﻴﻼﺩﻱ ﺑﻌﺪ 4 ﺷﻬﻮﺭ ﻓﻜﺮ ﻣﻦ ﺗﻮﺍ ...
ﻟﺒﻨﻰ : ﻟﻮ ﺑﻴﺠﻴﺒﻠﻚ ﺷﻲ ﻳﺸﺒﻬﻚ ﻳﺎﺟﻤﺠﻤﻪ ﻳﺎﻫﻴﻜﻞ ﻋﻈﻤﻲ ﺑﺶ ﺗﻘﺮﻱ ﺑﻴﻬﻢ ..
ﻛﻠﻬﻢ : ﻫﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻪ
ﺭﻫﻒ :
ﻭﻗﻌﺪﻭﺍ ﻛﻞ ﺍﻟﺤﺎﺿﺮﻳﻦ ﻳﻌﻄﻮﺍ ﻓﻲ ﻫﺪﺍﻳﺎﻫﻢ ﻟﻠﺒﻨﻰ ..
ﺣﻨﺎﻥ ﻛﺎﻧﺖ ﻣﺮﻛﺰﺓ ﻉ ﻓﺮﺣﺔ ﺑﻨﺘﻬﺎ ﻭﻣﺮﻛﺰﻩ ﻉ ﻧﻀﺎﻝ ﺍﻟﻠﻲ ﻛﺎﻥ ﻓﺮﺣﺎﻥ ﻭﻫﻮ ﻳﺸﻮﻑ ﻟﺒﻨﺘﻪ ..
ﺣﻨﺎﻥ " ﺯﻋﻤﻪ ﻓﻜﺮ ﺷﻦ ﻳﻬﺪﻳﻨﻲ ﻓﻲ ﻣﻨﺎﺳﺒﺘﻨﺎ ﺍﻟﺠﺎﻳﻪ ... ﻣﺘﺤﻤﺴﻪ ﺑﺠﺪ " ﻭﺿﺤﻜﺖ ﻉ ﺍﻟﺨﻔﻴﻒ ...
***
ﺍﻟﺴﺎﻋﻪ 12 ﻟﻴﻼ ..
ﺧﺶ ﻟﻠﻘﺼﺮ ﻣﺘﺎﻋﻪ ...
ﻛﺎﻥ ﺗﺎﻋﺐ ﻫﻠﺒﻪ ﻭﻳﺒﻲ ﻳﺮﻗﺪ ﻭﺧﻼﺹ .. ﺭﻛﺐ ﺍﻟﺪﺭﻭﺝ ﺍﻟﺨﺎﺹ ﺑﺎﻫﻞ ﺍﻟﻘﺼﺮ ..." ﻫﻮ ﻭﺑﻨﺘﻪ " ... ﻭﻭﺻﻞ ﻟﻠﺪﻭﺭ ﺍﻟﻠﻲ ﻓﻴﻪ ﺍﻟﺪﻳﺎﺭ
ﻳﻤﺸﻲ ﻓﻲ ﺍﻟﻤﻤﺮ ﺍﻟﻠﻲ ﻳﺮﻓﻊ ﻟﺪﺍﺭﻩ ﻭﻛﺎﻧﺖ ﻓﻴﻪ ﺩﺍﺭ ﺑﻨﺘﻪ ﺧﻄﻢ ﻣﻦ ﺣﺪﺍﻫﺎ ﺑﻌﺪﻳﻦ ﻭﻗﻒ ... ﻭﺧﺮ ﺧﻄﻮﺗﻴﻦ ﻟﻴﻦ ﻭﺻﻞ ﻓﻲ ﺍﻟﺒﺎﺏ ﻓﺘﺤﻪ ﺑﺎﻟﺸﻮﻳﻪ ﺧﺶ ﺷﺒﺤﻬﺎ ﺭﺍﻗﺪﻩ ﻭﻋﺎﻃﻴﻪ ﺑﺎﻟﻈﻬﺮ ... ﻛﺎﻥ ﻣﺬﻛﺮ ﻛﻮﻳﺲ ﺍﻥ ﺍﻟﻴﻮﻡ ﻋﻴﺪ ﻣﻴﻼﺩﻫﺎ ﻋﻤﺮﻩ ﻣﺎﻧﺴﺎﻩ ﺍﺻﻼ ﺑﺲ ﻛﺎﻥ ﻳﺘﻌﻤﺪ ﻳﺘﻨﺎﺳﺎﻩ ... ﺷﺒﺢ ﺍﻟﻤﺎﺿﻲ ﺧﻄﻢ ﻗﺪﺍﻣﻪ ﻭﺧﻼﻩ ﻳﺬﻛﺮ ﺣﺎﺟﺎﺕ ﻳﺘﻤﻨﻰ ﻟﻮ ﺗﻨﻤﺴﺢ ﻣﻦ ﺫﺍﻛﺮﺗﻪ ..
ﻓﻼﺵ ﺑﺎﻙ ..
ﻛﺎﻥ ﻃﻔﻞ ﻋﻤﺮﻩ 7 ﺳﻨﻮﺍﺕ ﻭﺍﻗﻒ ﺣﺪﺍ ﺑﺎﺏ ﺩﺍﺭ ﺑﻮﻩ ﻭﺃﻣﻪ ﻭﻳﺴﻤﻊ ﻓﻲ ﻧﻘﺎﺷﻬﻢ
ﺍﻣﻪ : ﻭﻟﺪﻙ ﻳﺒﻲ ﻣﻨﻚ ﺍﻫﺘﻤﺎﻡ ﻳﺎﻋﺒﺪﺍﻟﻌﺰﻳﺰ ... ﻣﺎﻋﻨﺪﻧﺎﺵ ﻏﻴﺮﻩ ..
ﻋﺒﺪﺍﻟﻌﺰﻳﺰ : ﺑﺎﻟﻠﻪ ﻳﺎﻓﺎﻃﻤﻪ ﺍﻹﺳﻄﻮﺍﻧﻪ ﺍﻟﻤﺸﺮﻭﺧﻪ ﻫﺎﺩﻱ ﻓﻜﻴﻨﻲ ﻣﻨﻬﺎ ..
ﻓﺎﻃﻤﻪ : ﻟﻤﺎ ﻧﻘﻮﻟﻚ ﺍﻫﺘﻢ ﺑﻮﻟﺪﻙ ﺍﺳﻄﻮﺍﻧﻪ ﻣﺸﺮﻭﺧﻪ ﻫﺎﺩﻱ ...
ﻋﺒﺪﺍﻟﻌﺰﻳﺰ : ﺍﻧﻲ ﺗﺎﻋﺐ ﻭﻧﺒﻲ ﻧﺮﺗﺎﺡ ﺍﺟﻠﻲ ﺍﻟﻨﻜﺪ ﻣﺘﺎﻋﻚ ﻟﻐﺪﻭﺓ ..
ﻓﺎﻃﻤﻪ : ﺣﺮﺍﻡ ﻋﻠﻴﻚ .. ﺍﻟﻮﻟﺪ ﺍﻟﻴﻮﻡ ﻋﻴﺪ ﻣﻴﻼﺩﻩ ﻃﻮﻝ ﺍﻟﻮﻗﺖ ﻳﺴﺄﻝ ﻋﻠﻴﻚ ..
ﻧﺎﺽ ﻭﻋﻴﻮﻧﻪ ﻳﻘﺪﺡ ﻣﻨﻬﻢ ﺷﺮﺍﺭ ﺍﻟﻐﻀﺐ : ﻋﻴﺪ ﻣﻴﻼﺩ !!! ؟ﻣﻦ ﺍﻣﺘﻰ ﻧﺪﻳﺮﻭﺍ ﻓﻲ ﺍﻟﺒﺪﻉ ﻭﻋﺎﺩﺍﺕ ﺍﻟﻜﻔﺎﺭ ﻫﺎﺩﻱ ..
ﻓﺎﻃﻤﻪ ﺑﺨﻮﻑ : ﺍﻟﻮﻟﺪ ﺷﺪ ﻓﻴﺎ ﻣﺎﻗﺪﺭﺗﺶ ﻧﻜﺴﺮ ﺑﺨﺎﻃﺮﻩ ..
ﻋﺒﺪﺍﻟﻌﺰﻳﺰ : ﻭﻛﺴﺮﺗﻲ ﻓﻠﻮﺳﻲ ﻓﻲ ﺍﻟﺤﺮﺍﻡ ﻳﺎﻣﺼﻴﺒﻪ !! ﺍﻟﻠﻬﻢ ﺍﻧﻚ ﺍﺑﺘﻠﻴﺘﻨﻲ ﺑﻤﺮﺍﺓ ﻣﺎﺗﺴﺎﻋﺪﺵ ﻓﻴﺎ ﻉ ﻃﺎﻋﺘﻚ ﺍﻟﻬﻤﻨﻲ ﺍﻟﺼﺒﺮ ﻋﻠﻴﻬﺎ ﻗﺒﻞ ﻧﺘﻬﻮﺭ ﻭﻧﺪﻳﺮ ﻓﻴﻬﺎ ﺣﺎﺟﻪ .. ﺟﺎﻱ ﺑﻴﻄﻠﻊ ﻣﻦ ﺍﻟﺪﺍﺭ .. ﻣﻌﺎﻭﻳﻪ ﻫﺮﺏ ﻭﺑﻮﻩ ﻃﻠﻊ ﻭﺗﻮﺟﻪ ﻟﺪﺍﺭ ﺗﺎﻧﻴﻪ ﻳﺮﻗﺪ ﻓﻴﻬﺎ ﻭﺧﻼ ﻓﺎﻃﻤﻪ ﺗﺒﻜﻲ ...
ﺍﻣﺎ ﻣﻌﺎﻭﻳﻪ ﻣﺎﺑﻜﺎﺵ ﻟﻜﻦ ﻗﻠﺒﻪ ﺍﻟﺼﻐﻴﺮ ﺍﻟﻠﻲ ﻣﻔﺮﻭﺽ ﻳﺘﻌﻠﻢ ﺍﻟﺤﺐ ﺑﺪﻱ ﻳﺘﻌﻠﻢ ﺍﻟﻜﺮﻩ ﻟﺸﺨﺺ ﻣﻦ ﺍﻟﻤﻔﺮﻭﺽ ﻳﺤﺒﻪ ﻫﻠﺒﻪ ....
ﺍﻟﻮﻗﺖ ﺍﻟﺤﺎﺿﺮ ...
ﻣﻌﺎﻭﻳﻪ ﺑﻤﻼﻣﺤﻪ ﺍﻟﻤﺘﺠﻬﻤﻪ ﻟﻒ ﻭﻃﻠﻊ ﻣﻦ ﺍﻟﺪﺍﺭ ﻭﺳﻜﺮﻫﺎ ﺑﻬﺪﻭﺀ ﻭﻣﺸﻲ ﻟﺪﺍﺭﻩ ...
***
ﺣﻨﺎﻥ : ﺧﺎﻳﻔﻪ ﻉ ﻋﺎﺋﺸﻪ ﺗﺠﻴﺐ ﻭﻫﻮ ﻣﺶ ﻣﻌﺎﻫﺎ ..
ﻧﻀﺎﻝ ﺧﺶ ﻟﺴﺮﻳﺮﻩ : ﻣﺎﺗﺨﺎﻓﻴﺶ ﻣﻦ ﺍﺧﺮ ﻣﺮﻩ ﺣﺲ ﺑﻐﻠﻄﻪ ..
ﺣﻨﺎﻥ : ﺇﻥ ﺷﺎﺀ ﺍﻟﻠﻪ ..
ﻧﻀﺎﻝ : ﺗﺼﺒﺤﻲ ﻉ ﺧﻴﺮ ..
ﺣﻨﺎﻥ ﺑﻀﻴﻖ : ﻭﺃﻧﺖ ﻣﻦ ﺃﻫﻠﻪ ... ﺧﺸﺖ ﻟﻠﺴﺮﻳﺮ ﻭﺭﻗﺪﺕ ﺑﻌﺪ ﻃﻔﺖ ﺍﻟﻀﻲ .. ﻭﻗﻌﺪﺕ ﺗﺸﺒﺤﻠﻪ ... ﺣﺎﺳﻪ ﺇﻥ ﺍﻟﻤﺴﺎﻓﻪ ﺑﻴﻨﺎﺗﻬﻢ ﻛﺒﺮﺕ ﻫﻠﺒﻪ ﻫﻠﺒﻪ ﻭﺗﻔﻜﺮ ﻛﻴﻒ ﺗﺮﺩ ﻛﻞ ﺷﻲ ﺯﻱ ﻣﺎﻛﺎﻥ ﻗﺒﻞ 15 ﺳﻨﻪ ...
ﺍﻣﺎ ﻫﻮ ﻓﻜﺎﻥ ﻋﺎﻃﻴﻬﺎ ﺑﺎﻟﻈﻬﺮ ﻭﻛﺎﻥ ﺗﻔﻜﻴﺮﻩ ﻛﻠﻪ ﻓﻲ ﺍﻟﻤﺮﺃﻩ ﺍﻟﻠﻲ ﺷﺎﻏﻠﻪ ﻗﻠﺒﻪ ﻭﻋﻘﻠﻪ ﻳﺬﻛﺮ ﻓﻲ ﻳﻮﻣﻪ ﻛﻴﻒ ﻛﺎﻥ ﻣﻌﺎﻫﺎ ﻭﻣﺒﺘﺴﻢ .. ﻭﻣﺘﻨﺎﺳﻲ ﺗﻤﺎﻣﺎ ﺍﻟﻤﺮﺍﺓ ﺍﻟﻠﻲ ﺭﺍﻗﺪﻩ ﺟﻨﺒﻪ ﻭﻫﻮ ﺑﺲ ﺍﻟﻠﻲ ﺷﺎﻏﻞ ﻋﻘﻠﻬﺎ ﻭﺗﻔﻜﻴﺮﻫﺎ ....
... ﻳﺘﺒﻊ
