#موسم_التوليب🌷
#جمان_فريد💗💗
#الجزء_الرابع 💕
تاني يوم
الروتين الصباحي المعتاد...توجه كل حد منهم لحاله..وهي كملت صبحها زي ماتعودت...بس هالمره فكرت تمشي تزور عائشه وتهدرز عليها...
***
في الجامعه ..
مقعمز يستنى فيها ع نار...ماسد ماشفهاش أمس لاكلمها ولاقدر يوصل فيها...مافتحتش نت...وتليفونها مصكر...
شافها خاشه ناض طول ...هي شافته ابتسمت وقدمتله..
رهف بإبتسامه: صباح الخير..
أسنام بغضب: وينك ..معقوله تليفونك طول النهار مصكر..وحتى النت مصكر...
رهف بإستغراب: النت مافتحتاش لأني كنت نقرا...والتليفون تم شحنه ماشحنتاش لأني ماعندي ماندير بيه..
أسنام : رهف ماتحطيش في بالك اني في حد يخاف عليك يسأل عليك يدورك...
رهف بضحكه: مانحسابش اني درت مشكله كبيره لما انقطعت عن العالم...
أسنام ضحك ووزع نظره ع المكان بعدين شبحلها: رهف..انتي تهميني هلبه..لو مانهمكش ومانجيش في بالك تسألي عليا..اني العكس اتجاهك..
رهف بضحكه: بجد زي مايقولوا انت خوي اللي ماجبتاش امي..
أسنام "والله ماني عارف علاش نابغه في كل شي إلا في فهم تصرفاتي معاك يارهف"..
رهف : هووو أسنام..وين مشيت...
أسنام تنهد: قاعد معاك والله العظيم..
رهف ضحكت...ع جية صاحبتها تقوى..
تقوى: صباحو...
الزوز ردوا: صباح الخير...صباح الورد...
تقوى: تعالي رهوفي كورس مهاب قريب يبدا..
رهف : فكيني منه معاش بنحضرله..
أسنام مركز معاهم...
تقوى : علاش..
رهف : انتي عارفه..
تقوى بضحكه: ماهو غبيه في وحده طول يعجب بيها مهاب واطنشه..
أسنام: شن هو...
تقوى بإبتسامه: ايه يبيها وكلمني وقالي كلميها وهي سكرت طول..
أسنام بعصبيه: وانتي تبيها تقول لواحد زي هذا باهي..
تقوى : وين المشكله هو كويس ويبيها بجديه مش لعب..
رهف : لعب ولاجديه الدوة هادي مش فبالي بكل توا نتخرج ويصير خير..
اسنام شبحلها: قصدك انتي حتوافقي عليه بعد التخرج!!؟
رهف بضحكه: لا طبعا...مش هاضماته اساسا...
تقوى: لكن والله يهبل..
اسنام بغضب: تقوى خيررر عمممك..
رهف انصدمت..
تقوى بمكر: ماخيره شي مسكين..غير اني نبيلها الخير الولد طول كلمها وقال بيخطب...
اسنام : صحيتي ياتقوى...ومشي وخلاهم...
تقوى شاده ضحكتها..
رهف تشبحله : علاش تعفرت هكي هو...
تقوى بنفاذ صبر: ماه حاشاك طاح في حمارة ماتفهمش..
رهف : كيف يعني..حييي...قصدك اسنام يحب..من هي تقوى؟!!
تقوى: قتلك حماااااااارة ...هيي بتمشي ولالا..
رهف: لا..
تقوى : اقعدي مالا...ومشت..
رهف: خيرهم هادم...صبح...وخشت داخل...
***
طلعت من المحكمه وع وجهها ابتسامه النصر ..في الطرف المقابل طليقها دكتور معروف...قدملها ..هي شبحتله بتحدي وع وجهها ابتسامه مستفزة...
إلياس: حطي في بالك ان هادي مش الجوله الأخيرة وإن ولدي أني مستحيل نخليه يتربى عند مراة زيك ..وغمز بعينه ..وإنتي فاهمه قصدي ..وضحك بهزوة ولف ومشي ركب سيارته وطلع...
وخلاها واقفه مصدومه وخايفه في نفس الوقت رن تليفونها ..شافت الإسم ابتسمت وطول ركبت سيارتها ردت ..
يارا بأبتسامه: خديتها...
نضال بفرحه: مباااارك مباااارك...بهالمناسبه اعزميني ع مكان حلو ويشبهلك..
يارا ضحكت بعدين تنهدت: نضال اني محتاجه نشوفك توا..
نضال بخوف: خيرك...
يارا ابتسمت وغمضت عيونها وحكت جبهتها : لامافي شي نبي نشوفك بس..
نضال بأبتسامه:ابعتيلي اللوكيشن ..
يار بإبتسامه : أوكي..باي...وصكرت...تنهدت وتفكرت كلام طليقها...حركت شعرها للوراء بعصبيه وتحركت طول...
***
واقفه عند الإشاره وهي تفكر ..قطع تفكيرها..طقة الروشن ..بنيه صغيره تبيع في الكينيكس..ابتسمت حنان وشرت منها والبنت مشت...التفتت حنان ع الجهة التانيه جت عينها فعين وحده ابتسمتلها حنان التانيه ردتلها الإبتسامه من فوق نفسها ..حنان تجاهلت وشبحت القدام..رن تليفون حنان ردت ..
حنان : اهلا نضال..
نضال : حنان بنقولك ماتحسبينش في الغدي بنعطل..
حنان بضيق مخفي : تمام...ربي يعاون..
سكت نضال شويه بعدين قال : تسلمي..مع السلامه وصكر..
هيا حولت التليفون من ع وذنها وقعدت تشبحله...تنهدت ووزعت نظرها ع المكان شبحت جنبها لقت المراة تتكلم بالتليفون ومبتسمه قعدت تشبحلها...
تعالوا نمشوا للسيارة اللي جنبها ونشوفوا المراة من هي..
بجديااات يعني النهار كله معاك!!..
نضال : بنحتفل بيك..وليك..
يارا ابتسمت : شكرا بجد...
نضال : ماتشكرينيش ع شي ..يللانتلاقوا ...سوقي بحذر..
يارا بضحكه : حاضر...يللا باي الإشارة ولت خضرا..
نضال ابتسم : تمام ...وصكر..
يارا صكرت وبدت تحرك في سيارتها شبحت جنبها لقت حنان تشوفلها..ابتسمتلها وتلفتت القدام وتحركت...
وحنان تحركت وهي مبتسمه وتقول في نفسها"شكلهم كانوا متزاعلين ورضاها .."
***
ماشي في الممر وهي معاه..
إقبال: هي شاده فيا هلبه وتقولي خيرك ماتقوليش لمعاويه يجي يتغدا عندنا ولانكسبوه حتى ع فنجان قهوة ..
معاويه بإبتسامه: حنفضي نفسي يوم ونزوركم اني ومها...
إقبال : يااااريت..استاحشتها"كذابه ماطيقهاش"...
معاويه هز راسه بإيجاب وهو يضحك..
إقبال : ايه حقه مافكرتش فالحفله اللي تبي اديرها...
معاويه: فكرت وخططت..انتي حتشرفي ع كل شي..
إقبال بفرحه: بجد معاويه!!
معاويه بضحكه: وجد الجد...
طلعوا برا الشركه...
فتح السواق الباب لمعاويه ركب..ومافتحاش لإقبال وجاي بيركب ...
إقبال : أننننتتتت...
السواق تلفت :نعم...
إقبال: شنو اعمى ماتشوفش..افتحلي الباب....
السواق شبح لمعاويه هز راسه معاويه بالموافقه ومشي فتحلها الباب..مشت بعصبيه وركبت والسواق صكر الباب وركب وتحرك بالسياره..
إقبال : عكرلي مزاجي الزفت هذا..
معاويه شبحلها ع جنب: إقبااال..
إقبال: سوري بس حركته غلط ياريت تنبهه يامعاويه..
معاويه بحزم: اني منبهه انه مايخدش أوامر من حد غيري ومايتصرفش أي تصرف إلا بإذني...
إقبال ابتسمت ع خفيف وسكتت...
"معاويه قري جامعته برا وطبعا الظروف اللي طلع فيها معاويه برا مش طبيعيه..طالع هارب من بوه اللي شدد عليه الخناق..امه كانت عارفه ان يوم زي هذا حيجي كانت بالدرقه ع راجلها تأمن في مبلغ لولدها وحولاته ع حساب فتحاته برا بمساعدة اقاربها برا ...وهرب معاويه ومالقاش قدامه ألا ولد خال أمه "عبدالله" أب إقبال ساعده هلبه لين استقر غادي وكمل قرايته وتفوق في إدارة الأعمال خدي ماجستير وبعد وفاة بوه روح لليبيا وهو متزوج بنت واحد من اكبر رجال الأعمال الليبين برا...وطبعا هو الوريث الوحيد لبوه استلم كل شي وبني إمبراطوريه كبيره تخصه فعالم المال والأعمال..لكن مانساش فضل عبدالله عليه بعد توفى روح بعيلته لليبيا وقعدوا تحت رعايته...زوج بنات عبدالله الزوز وقعدت اصغرهم إقبال بدون زواج لإنها تبيه رغم انها صغيره عليه بس فعلا كانت تحبه بجنون وماتبيش غيره"
***
وصلت للبحر لقاته واقف يستنى فيها ابتسمت وقلبها يدق بقوة نزلت من السياره ومشتله طول...
يارا : نضال..
نضال تلفت بلهفه وارتسمت ع وجهه ابتسامه حب: عطلتي..
يارا بإبتسامه: زحمة الطريق...
نضال : مش مهم المهم انك فرحانه ومرتاحه..
يارا تشبح لعيونه : اني مهمه عندك هلبه ؟
نضال وهو يشبح لعيونها : فوق ماتتصوري...
يارا بدون مقدمات حضنت نضال بقوة وهي مغمضه عيونها ..هو مصدوم وقلبه يدق بعنف وماباش يحضنها قعد واقف جامد في مكانه...
يارا وهي حاضناته: نحس معاك بأمان غير عادي مجرد تمشي يمشي معاك..
نضال متلخبط هلبه ومش عارف شن يدير ولاشنو يقول..
يارا ركزت ع نفسها وخرت بالشويه وبعدت وقعد تشبحله بنظرة حب..وهو هايم فيها بنفس النظرة..عيونها تعبوا دموع وخرت خطوتين وهربت تجري ركبت سيارتها ومشت بسرعه..
أما هو قاعد مصموت في مكانه مشاعره هايجه وقلبه بيطلع من صدره ...شبح للبحر هلبه وقف مقابله وقعد يستجمع في نفسه خدي شهيق وزفير وهو مغمض عيونه وقال: نحبها❤
***
والله تعبتي روحك..
حنان : لاتعبت روحي ولاشي..قلت للبنات يجوا حتى هما نتغدوا مع بعض..
عائشه بفرحه: احسن حاجه...
حنان تشوف شن عندها بش ادير الغدي...وعائشه مقعمزة تشوفلها..
عائشه "ماريتش احن منك في الدنيا احن عليامن كل الناس اللي عرفتهم فحياتي..عارفاتك خايفه عليا وشغلك حالي..مش جايه تغيرلي جوي وتساعديني زي ماقلتي ..ربي يعطيك ع قيس نيتك يااارب"..
حنان: رز مسقي..شن رايك..
عائشه ابتسمت: كويس أسامه يحبه هلبه..
حنان : هذا علاش فكرت فيه قلت لما تقوليله الغدي رز مسقي يجي جري...
عائشه : ههههههههههههه...
***
طالعه بتروح من الجامعه...وهو يشبحلها لين ركبت سيارتها وكالعاده مشي بش يطلع وراها يوميا يدير هكي وهي طبعا لوح مش حاسه بشي 😂...
لؤي وهو يشوفله: قاهرني قسما بالله..
تقوى: حاولت نستفزه بالك يعترف ونرتاحو ...وهي تحس عليه...شي شي ..
لؤي : مش فاهم علاش هي مش شايفه ومش فاهمه..
تقوى : رهف بنت عمليه ..الحب والجو هذا مادورش فيه بكل..برغم ان هلبه يحاولوا يتقربولها مش غير أسنام لكن هي مطنشه ومسكره بابها بقفل مصدي...
لؤي: تصدقي بدي همي الوحيد نلم هالزوز ع بعض...
تقوى : هههههههههههه حتى أني...
***
واقفة تستنى في اختها تجيها قدام المدرسه وعيونها ع مها اللي كانت مقعمزة بروحها وتستنى..لين جت سيارة فخمه ...
طلع منها سواق فتح الباب وركبت وسكر الباب وركب هو ومشوا...
المشهد اللي يراقبو فيه يوميا زميلاتها بعيون حاسده..
ربى: شايفه روحها بالعز اللي عايشه فيه..
رانيا: والله ماتنلام ...اللي زيها يليق عليهم يشوفوا رواحهم..
لبنى تشبحلهم: لاشايفه روحها ولاشي ...معقوله مش ملاحظين انها حزينه وعيونها ديمه منفوخات!!!
رانيا : ابدا مالاحظتش...
ربى : ولاأني..
لبنى شافت سيارة اختها: افتحوا عيونكم وشوفوا كويس...وناضت ومشت لأختها..
ربى: ع أساس انتي خير منها..
رانيا : صدقتي ..ديما وهي بابا دارلي وبابا جابلي...
***
روحت لحوشها خشت وسكرت وراها الباب...لوحت شنطتها وارتمت ع الكنبه ورقدت وسندت رجليها ع يد الكنبه وهي تشبح فوق وتذكر في اللي صار ومغمضه عيونها تذكر فيه في كلامه في نظراته في اسلوبه فشخصيته فجاذبيته في وسامته وفنفسها كيف حضناته ضحكت وقالت : نحبه❤
بعدين ملامح وجهها تغيرت للضيق لما اذكرت انه متزوج ...تأففت وناضت وركبت فوق بش تاخد دوش وترقد...
كلمت عائشه اسامه وجي جري بعد عرف الغدي ومنو مدايره ماكلة حنان مايقدرش يقاومها...تغدوا كلهم مع بعض ..خشوا البنات يغسلوا في الماعين وناضت معاهم عائشه بإصرار منها بش ادير شاهي باللوز...
هني حنان استفردت بأسامه...
حنان: أسامه..
اسامه شبحلها ع جنب: شنو..
حنان: اسامه انت مركز مع عائشه تابع معاها في فوضعها..
أسامه ابتسم : ايه اطمني حنان...
حنان : به بالله عليك ياأسامه ارجوك رد بالك عليها البنيه ماعندها حد غيرك بعد ربي اللي زيها حطها فوسط عيونك...
أسامه ابتسم بألم وغمض عيونه وفتحهم بمعنى باه...
وحنان في داخلها قاعده ماأرتاحتش...لين جت عائشه هي والبنات بالشاهي واللوز...
"قصة أسامه وعائشه قصة صعبه...أسامه كان دكتور ام عائشه وكانت لما تجي مراجعات أو تبات في المستشفى تكون معاه..اعجب بيها اسامه وهي كذلك ومع كثرة اللقاءات حبوا بعض هلبه...لعند جي اليوم اللي خطب فيه أسامه عائشه من أهلها رفضوه ولزوه زياده..لأنه من أصول غير ليبيه وغيرهكي قاعد بروحه في ليبيا واهله ولوا لبلادهم..اسامه انولد في ليبيا وكمل حياته فيها وماباش يسيبها ..المهم بعد رفضوا اهلها خشت عائشه في حاله نفسيه لأنها تعشقه بجنون..لين جي يوم وهربت من حوش أهلها وجاته في المستشفى وقالتله مستعده نتزوجك ونهربوا...في الأول رفض بس بعدين خاف عليها هلبه من ردة فعلهم ..تزوجها وهرب بيها ..وقعدوا برا 4سنين وبعدين روحوا وكانوا اهل عائشه متبريين منها وهادرين دمها بس القانون والشرطه حموها...امها ماتت بالحسره عليها ويوم عزاها تهورت عائشه ومشتلها وكانت حتموت وقتها لومالحقوش عليها راجلها ونضال وهربوا بيها بعد حزوا الناس خوتها عنها..اسامه برغم انه مهمل بس يحبها هلبه وهي تعشقه ومش نادمه ابدا ع اللي داراته"...
***
العشيه...
متوجهه لمكتب بوها بعد بعتلها مع الخدم طالب يشوفها ..ترعش مع بعضها..لين وصلت في مكتبه طقت الباب خشت بعد أذنلها بالدخول...لقاته لابس نظاراته ولاهي باللاب توب ..وقفت قدام المكتب تراجيه يقوللها قعمزي..
شبحلها وحول نظارته وقال: قعمزي...
قعمزت مها وعيونها لوطا..
معاويه : حالك مش عاجبني..وفي تصرفات بديتي اديري فيها مش مريحتني..مش كان قاعد برا اغلب اليوم معناها مانعرف شي..مش غافل عنك بكل...
مها ترعش وساكته..
معاويه: عدلي نفسك وتصرفاتك وماتجبرنيش نلجأ لأستخدام اساليب تانيه معاك..
مها ساكته ولاحرف..
معاويه بصوت عالي: ساااامعه..
مها هزت راسها بإيجاب..
معاويه : غدوة بنمشو نتغدوا في حوش اهل اقبال...
مها قامت راسها : علااش.
معاويه : عزموني ومانقدرش نردهم...
مها بضيق شديد: باه...
معاويه : توا نوضي انصرفي ..
ناضت مها بقلب مكسور وطلعت من حداه وهو ولا لبس نظاراته ولهي بخدمته كالعاده...
***
بعد العشا...
مقعمزة في الدار وتستنى فيه يروح ...خش للدار..وهي وقفت..
حنان : وين كنت خوفتني عليك..
نضال شبحلها: قلت بنعطل..
حنان : بس مش هكي..وتليفونك مصكر..قداش خطر عليا من خاطر..
نضال: خلاص اهو روحت قدامك مافيا شي...توجه لدولابه طلع حوايجه ..وتوجه للحمام بش يدوش ..
اما هي فكانت مستغربه فيه وفحاله اللي تبدل هلبه الأيام هادي...
شويه وطلع وهو ينشف في شعره...
حنان : تتعشا..
نضال : تس...حط الفوطا ع الكرسي وخش سريره..
حنان : بترقد من توا..
نضال بنفاد صبر: طالع من الصبح مروح في الليل..يعني من طبيعي نكون مروح تاعب. جهدي طايح..حيلي مهدود..راسي مصدع...شحني..بححح تممم..خيرك حنان معاش مركزة ..كبرتي ولاكيف !!؟
حنان انصدمت فيه وانجرحت هلبه من كلمته الأخيره وعيونها تعبوا دموع وقالت بصوت يادوب طالع: خلاص اسفه..تصبح ع خير وطلعت من حداه وصكرت الباب...
اما هو تأفف وناض صكر الضي وولارقد وحط عليه الغطا...
***
حنان طلعت للبالكونه ودموعها ينزلوا"انتي مراة ياحنان وحالة راجلك مفروض ماتغبيش فيها واحساسك عمره مايخيب...بس مش قادرة نستوعب..مستحيل نضال مستحيل...حنان تعوذي من الشيطان..هو عنده الحق راجل مروح وتاعب وانتي ماقدرتيش تعبه..يعني هو مضغوط اي كلمه يقولها في لحظه الغضب ماينلامش عليها...اهدي حنان"
وقعدت تقرأ في اية الكرسي والمعوذات وسورة الشرح بش ترتاح وتطرد الوساوس من راسها..الوساوس اللي قلبها مصدقها وبقوة...
...يتبع...
