# ﻣﻮﺳﻢ _ ﺍﻟﺘﻮﻟﻴﺐ
# ﺟﻤﺎﻥ _ ﻓﺮﻳﺪ
# ﺍﻟﺠﺰﺀ _ ﺍﻟﺴﺎﺩﺱ
ﻭﺍﻗﻔﺔ ﻣﺼﺪﻭﻣﻪ ﻉ ﻓﺮﺣﺎﻧﻪ ﺗﺸﺒﺢ ﻟﻌﻴﻮﻧﻪ ﺑﺤﺐ ﻭﻟﻬﻔﻪ ﻉ ﻃﻮﻝ ﻭﺑﺪﻭﻥ ﺗﺮﺩﺩ ﺣﻀﻨﺎﺗﻪ ﻭﻗﺎﻟﺖ : ﻣﻮﺍﻓﻘﻪ ..
ﻫﻮ ﺑﻴﻬﺒﻞ ﻋﻠﻴﻬﺎ ﺑﺲ ﻣﺘﻤﺎﻟﻚ ﻧﻔﺴﻪ ﻣﺎﺑﺎﺵ ﻳﺒﺎﺩﻟﻬﺎ ﻟﻜﻦ ﻛﺎﻥ ﻣﻐﻤﺾ ﻋﻴﻮﻧﻪ ﻭﻣﺒﺘﺴﻢ ..
ﻳﺎﺭﺍ ﻟﻠﺤﻈﻪ ﺍﺫﻛﺮﺕ ﻣﺴﺄﻟﻪ ﻣﻬﻤﻪ ﻧﻀﺎﻝ ﻣﺘﺰﻭﺝ !!!
ﺑﻌﺪﺕ ﻋﻨﻪ ﻭﻗﺎﻟﺖ : ﻭﻣﺮﺗﻚ .. ؟
ﻧﻀﺎﻝ ﺗﻨﻬﺪ ﻭﻗﺎﻝ : ﺧﻼﺹ ﻣﺶ ﻣﻜﺘﻮﺑﻠﻨﺎ ﻧﻜﻤﻠﻮﺍ ﻣﻊ ﺑﻌﺾ ﺃﻛﺜﺮ .. ﺣﻨﻄﻠﻘﻬﺎ ..
ﻳﺎﺭﺍ ﻓﺘﺤﺖ ﻋﻴﻮﻧﻬﺎ ﻉ ﻭﺳﻌﻬﻢ ﻭﻓﻤﻬﺎ ﺑﺼﺪﻣﻪ ﺑﺲ ﻛﺎﻧﺖ ﻓﺮﺣﺎﻧﻪ ﻫﻠﺒﻪ ...
***
ﻳﺎﻧﻬﺎﺭ ﺍﺣﺮﺵ ﻳﻄﻠﻖ ﺣﻨﺎﻥ ﻭﻳﺘﺰﻭﺝ ﻏﻴﺮﻫﺎ؟ !!
ﻭﺍﺋﻞ " ﺻﺪﻳﻖ ﻧﻀﺎﻝ " ﻗﻌﻤﺰ ﻉ ﺍﻟﺴﺮﻳﺮ : ﺇﻳﻪ ..
ﻭﺻﺎﻝ : ﻣﺶ ﻣﺼﺪﻗﻪ ... ﺣﻨﺎﻥ ﻭﺍﻟﻠﻪ ﻣﺎﺗﺴﺘﺎﻫﻞ ﻣﺮﺍﺓ ﻣﺤﺘﺮﻣﻪ ﻭﺟﻤﻴﻠﺔ ﻣﺜﻘﻔﻪ ﻭﺯﻭﺟﻪ ﻣﻤﺘﺎﺯﺓ ﻭﺍﻡ ﺑﻜﻞ ﻣﻌﻨﻰ ﺍﻟﻜﻠﻤﻪ ﺩﺍﺭﺕ ﺃﺳﺮﻩ ﺳﻌﻴﺪﻩ ﻭﻭﻓﺮﺗﻠﻬﻢ ﺍﻟﻤﻨﺎﺥ ﺍﻟﻤﻨﺎﺳﺐ ﺑﺶ ﻳﻜﻮﻧﻮﺍ ﺍﺣﺴﻦ ﺍﻟﻨﺎﺱ ﺳﻮﺍ ﻣﻨﻪ ﻫﻮ ﻭﻻﻣﻦ ﺑﻨﺎﺗﻬﺎ ... ﺍﻧﻲ ﻣﺶ ﻣﺼﺪﻗﻪ ﻧﻀﺎﻝ ﻳﻄﻠﻊ ﻫﻜﻲ ...
ﻭﺍﺋﻞ : ﺃﻧﻲ ﻭﺍﻟﻠﻪ ﻣﺎﻧﻔﻜﺮ ﺇﻻ ﻓﺎﻟﺒﻨﺎﺕ ﺍﻟﻤﺘﻌﻠﻘﺎﺕ ﺑﻴﻪ ﻛﻴﻒ ﺣﺘﻜﻮﻥ ﺭﺩﺓ ﻓﻌﻠﻬﻢ .. ﻛﻼ ﺣﻨﺎﻥ ﻣﺶ ﺧﺎﻳﻒ ﻋﻠﻴﻬﺎ ﻣﺮﺍﺓ ﻗﻮﻳﻪ ﻭﻣﺘﺪﻳﻨﻪ ﺣﺘﺘﺨﻄﺎ ﻫﺎﻷﺯﻣﻪ ..
ﻭﺻﺎﻝ : ﻣﻬﻤﺎ ﻛﺎﻧﺖ ﻳﺎﻭﺍﺋﻞ ﺍﻟﻤﺮﺍﺓ ﺣﺎﺟﻪ ﺯﻱ ﻫﺎﺩﻱ ﺻﻌﺒﻪ ﻋﻠﻴﻬﺎ ﻫﻠﺒﻪ ..
ﻭﺍﺋﻞ ﺑﻴﺮﻗﺪ : ﺻﻌﺒﻪ .. ﺑﺲ ﺻﺪﻗﻴﻨﻲ ﺣﻨﺎﻥ ﺣﺘﺘﺨﻄﺎﻫﺎ ..
ﻭﺻﺎﻝ : ﻳﺎﺍﺍﺭﺏ .. ﺷﺒﺤﺘﻠﻪ ... ﺍﻧﺖ ﻻﺯﻡ ﺗﻘﻄﻊ ﻋﻼﻗﺘﻚ ﺑﻴﻪ ..
ﻭﺍﺋﻞ ﺑﻀﺤﻜﻪ : ﻋﻼﺵ ..
ﻭﺻﺎﻝ : ﻭﻳﻦ ﻧﻨﺪﺭﻱ ﻣﺮﺍﺕ ﻳﺄﺛﺮ ﻋﻠﻴﻚ ..
ﻭﺍﺋﻞ : ﻫﻬﻬﻬﻬﻬﻬﻬﻪ ... ﺍﺭﻗﺪﻱ ﻳﺎﻫﺒﻠﻪ ﺍﺭﻗﺪﻱ .. ﺗﻐﻄﺎ ..
ﻭﺻﺎﻝ ﺑﻘﻠﻖ : ﻋﺎﺭﻓﺎﺗﻚ ﺍﻧﻲ ﺣﺪﻳﺮ ﺯﻳﻪ ... ﺍﻧﻲ ﻣﺶ ﺯﻱ ﺣﻨﺎﻥ ﺭﻩ .. ﻃﻮﻝ ﺣﻨﻘﺘﻠﻚ ﻭﻧﻘﺘﻠﻬﺎ ..
ﻭﺍﺋﻞ ﺣﻮﻝ ﺍﻟﻐﻄﺎ ﻭﺍﻟﺘﻔﺘﻠﻬﺎ ﺑﻌﻴﻮﻥ ﻣﻔﻨﺼﻪ ...
***
ﺍﻟﺴﺎﻋﻪ 12
ﺭﻭﺡ ﻟﻠﺤﻮﺵ ﺍﻟﻠﻲ ﻛﺎﻥ ﺷﺒﻪ ﻣﻈﻠﻢ ﻭﻫﺎﺩﻱ ﺭﻛﺐ ﻓﻮﻕ ﻭﻫﻮ ﻓﻌﺎﻟﻢ ﻏﻴﺮ ﺍﻟﻌﺎﻟﻢ ﻣﺒﺘﺴﻢ ﻭﻓﺮﺣﺎﻥ ﻭﻫﺎﻳﻢ .. ﻭﺻﻞ ﻓﻲ ﺩﺍﺭ ﺍﻟﻨﻮﻡ ﻓﺘﺢ ﺍﻟﺒﺎﺏ ﺑﺎﻟﺸﻮﻳﻪ ﻟﻘﺎﻫﺎ ﺭﺍﻗﺪﻩ ﻭﻋﺎﻃﻴﻪ ﺑﺎﻟﻈﻬﺮ ﻓﺮﺡ ﺇﻧﻬﺎ ﻣﺶ ﻧﺎﻳﻀﻪ ... ﻟﻜﻦ ﻭﺍﻗﻒ ﻟﻠﺤﻈﺎﺕ ﻳﺸﻮﻓﻠﻬﺎ ﻭﻳﻔﻜﺮ ﻛﻴﻒ ﺣﻴﺨﺒﺮﻫﺎ ...
ﺗﻨﻬﺪ ﻭﺗﻮﺟﻪ ﻟﺪﻭﻻﺑﻪ ﻓﺘﺢ ﻓﻼﺵ ﺍﻟﺘﻠﻴﻔﻮﻧﻪ ﻭﻃﻠﻊ ﻣﻨﻪ ﺣﻮﺍﻳﺞ ﺧﺶ ﻟﻠﺤﻤﺎﻡ ﺑﺪﻝ ﻭﻃﻠﻊ ...
ﻭﺧﺶ ﻟﻔﺮﺍﺷﻪ ﺑﻬﺪﻭﺀ ﻭﺣﻂ ﺭﺍﺳﻪ ﻉ ﺍﻟﻤﺨﺪﻩ ﻭﻫﻮ ﻳﻔﻜﺮ ﻓﻲ ﺍﻟﻠﻲ ﺻﺎﺭ ﺍﻟﻴﻮﻡ ﻭﻏﻤﺾ ﻋﻴﻮﻧﻪ ﻟﻤﺎ ﺍﺫﻛﺮ ﺣﻀﻦ ﻳﺎﺭﺍ ﻭﻫﻮ ﻣﺒﺘﺴﻢ .. ﻓﻲ ﺍﻟﺠﻬﺔ ﺍﻟﺘﺎﻧﻴﻪ ﻣﻦ ﺍﻟﺴﺮﻳﺮ ﻛﺎﻧﺖ ﺣﻨﺎﻥ ﺗﻨﺰﻝ ﻓﻲ ﺩﻣﻮﻉ ﺯﻱ ﺍﻟﺴﻴﻞ ... ﺍﻟﻤﺮﺃﺓ ﻓﻲ ﺍﻷﻣﻮﺭ ﻫﺎﺩﻱ ﻗﻠﺒﻬﺎ ﺩﻟﻴﻠﻬﺎ ﺑﺎﻟﺬﺍﺕ ﻟﻮ ﺑﺎﻧﺖ ﻉ ﺭﺍﺟﻠﻬﺎ ﺑﻌﺾ ﺍﻟﻌﻼﻣﺎﺕ .. ﺑﺲ ﻣﻊ ﻫﺬﺍ ﻛﺎﻧﺖ ﺗﺘﺼﺎﺭﻉ ﻫﻲ ﻭﻫﺎﻹﺣﺴﺎﺱ ﻭﺗﻘﻮﻝ ﻓﻲ ﻧﻔﺴﻬﺎ " ﻣﺎﺗﺨﺮﺑﻴﺶ ﺍﻟﻠﻲ ﻣﺨﻄﻄﻴﻠﻪ ﻏﺪﻭﻩ ﺃﻛﻴﺪ ﺣﻴﺘﻐﻴﺮ ﻛﻞ ﺷﻲ ﻭﺗﻄﻠﻌﻲ ﺗﺘﻮﻫﻤﻲ ﻳﺎﺣﻨﺎﻥ " ﻣﻊ ﻫﺬﺍ ﻗﻠﺒﻬﺎ ﻛﺎﻥ ﻣﻘﺒﻮﺽ ﻫﻠﺒﻪ ...
...
ﻳﺎﺭﺍ ﻛﺎﻧﺖ ﺣﺎﺿﻨﻪ ﺟﺒﺮ ﻭﺍﻟﻔﺮﺣﻪ ﻣﺶ ﺳﺎﻳﻌﺘﻬﺎ ... ﻧﻀﺎﻝ ﺍﻟﺮﺍﺟﻞ ﺍﻟﻮﺣﻴﺪ ﺍﻟﻠﻲ ﺣﺒﺎﺗﻪ ﻣﻦ ﻗﻠﺒﻬﺎ ﻭﻋﺮﻓﺖ ﻣﻌﺎﻩ ﻣﻌﻨﻰ ﺍﻟﺤﺐ ﻭﻣﺶ ﻣﺼﺪﻗﻪ ﺇﻧﻬﺎ ﺣﺘﺘﺰﻭﺟﻪ ﺣﺘﻜﻮﻥ ﻣﻌﺎﻩ ﻏﻤﻀﺖ ﻋﻴﻮﻧﻬﺎ ﻭﺭﻗﺪﺕ ﻭﻫﻲ ﻓﺮﺣﺎﻧﻪ ﻭﺗﺮﺍﺟﻲ ﺍﻣﺘﻰ ﻳﺠﻲ ﺍﻟﻴﻮﻡ ﺍﻟﻠﻲ ﺗﻮﻟﻲ ﻓﻴﻪ ﻣﻊ ﻧﻀﺎﻝ ...
***
ﺗﺎﻧﻲ ﻳﻮﻡ ﺍﻟﺼﺒﺢ ...
ﻳﻄﻖ ﻉ ﺩﺍﺭ ﺑﻨﺎﺗﻪ : ﺑﻨﺎﺗﻲ ﺍﻟﺤﻠﻮﺍﺕ ..
ﻓﺘﺤﺖ ﻟﺒﻨﻰ ﺍﻟﺒﺎﺏ ﻃﻮﻝ ﻭﺣﻀﺎﺗﻪ ﺑﻘﻮﺓ ﻭﻫﻮ ﻳﻀﺤﻚ ..
ﺭﻫﻒ ﺑﻀﺤﻜﻪ : ﻋﻄﻴﻨﻲ ﻓﺮﺻﻪ ﺣﻮﻟﻲ ﻣﺶ ﺑﻮﻙ ﺑﺮﻭﺣﻚ ..
ﺧﺪﺍﻫﺎ ﻧﻀﺎﻝ ﻓﺤﻀﻨﻪ ﺣﻀﻨﻬﻢ ﺑﻘﻮﺓ ﻭﺑﺎﺳﻬﻢ ﻉ ﺭﻭﺳﻬﻢ ﻭﻫﻮ ﻳﻔﻜﺮ ﻛﻴﻒ ﺣﺘﻜﻮﻥ ﺭﺩﺓ ﻓﻌﻠﻬﻢ ﻟﻤﺎ ﻳﻌﺮﻓﻮﺍ ... ﻫﻞ ﺣﻴﻘﻌﺪﻭﺍ ﻳﺘﻌﺎﺭﻛﻮﺍ ﻉ ﺣﻀﻨﻪ ﺯﻱ ﺗﻮﺍ؟ !!
ﻧﻀﺎﻝ : ﻫﻴﺎﺍﻧﺰﻟﻮﺍ ﺍﻓﻄﺮﻭﺍ .. ﺍﻧﻲ ﺍﻟﻴﻮﻡ ﺩﺭﺕ ﺍﻟﻔﻄﻮﺭ ..
ﺭﻫﻒ ﻟﺒﻨﻰ ﻣﺘﻔﺎﺟﺂﺕ : ﺃﻭﻭﻭﻭﻭﻭﻭﻭﻭﻭﻭ ...
ﻧﻀﺎﻝ ﻣﺸﻲ ﻭﺗﻠﻔﺘﻠﻬﻢ : ﻭﺭﻭﻧﻲ ﻣﻦ ﺍﻟﻠﻲ ﺗﺴﺒﻖ ﻭﺗﻘﻌﻤﺰ ﺟﻨﺒﻲ ﻧﺰﻟﻮﺍ ﻳﺠﺮﻭﺍ ﻭﻫﻮ ﻳﻀﺤﻚ ﻋﻠﻴﻬﻢ ﻭﻃﺒﻌﺎ ﻟﺒﻨﻰ ﺣﺎﺯﺕ ﺍﻟﻜﺮﺳﻲ ...
ﻃﺒﻌﺎ ﻫﻮ ﻳﻘﻌﻤﺰ ﻉ ﺭﺍﺱ ﺍﻟﻄﺎﻭﻟﻪ ﻉ ﻳﻤﻴﻨﻪ ﻭﺣﺪﻩ ﻣﻦ ﺑﻨﺎﺗﻪ ﻭﻉ ﻳﺴﺎﺭﻩ ﺣﻨﺎﻥ ..
ﻗﻌﻤﺰﻭﺍ ﻣﻦ ﻫﻨﻲ ﺧﺸﺖ ﺣﻨﺎﻥ ﻣﻦ ﻫﻨﻲ ﻭﺗﻔﺎﺟﺂﺕ ﺑﺴﻔﺮﺓ ﺍﻟﻔﻄﻮﺭ ﺍﻟﻮﺍﺗﻴﻪ ..
ﺣﻨﺎﻥ ﻗﺪﻣﺖ : ﺻﺒﺎﺡ ﺍﻟﺨﻴﺮ ..
ﻛﻠﻬﻢ ﺭﺩﻭﺍ ﻋﻠﻴﻬﺎ ﺑﺄﺻﻮﺍﺕ ﻣﺘﻘﻄﻌﻪ : ﺻﺒﺎﺡ ﺍﻟﺨﻴﺮ .. ﺻﺒﺎﺡ ﺍﻟﻮﺭﺩ .. ﺻﺒﺎﺡ ﺍﻟﻌﺴﻞ ..
ﺣﻨﺎﻥ ﺑﺈﺑﺘﺴﺎﻣﻪ : ﻣﻦ ﺩﺍﺭ ﻫﻜﻲ ..
ﻟﺒﻨﻰ ﺑﻀﺤﻜﻪ : ﺯﻭﺟﻚ ﺍﻟﺠﻤﻴﻞ ...
ﺷﺒﺤﺘﻠﻪ ﺣﻨﺎﻥ ﺑﻨﻈﺮﺓ ﺣﺐ ﻭﺗﻘﻮﻝ ﻓﻲ ﻧﻔﺴﻬﺎ " ﻳﺎﺭﺑﻲ ﺷﻜﻠﻬﺎ ﻃﻠﻌﺖ ﻭﺳﺎﻭﺱ ﺻﺢ ﻭﺍﻛﻴﺪ ﻣﺬﻛﺮ ﺗﺎﺭﻳﺦ ﺍﻟﻴﻮﻡ ﻭﺍﻟﻠﻪ ﺃﻋﻠﻢ ﻣﻤﻜﻦ ﺩﺍﻳﺮﻟﻲ ﻣﻔﺎﺟﺂﻩ "...
ﺍﻣﺎﻫﻮ ﺷﺒﺤﻠﻬﺎ " ﻧﺘﻤﻨﻰ ﺇﻧﻚ ﺗﺘﻘﺒﻠﻲ ﺍﻟﻠﻲ ﺣﻨﺨﺒﺮﻙ ﺑﻴﻪ ﻭﺗﻜﻮﻧﻲ ﻋﺎﻗﻠﻪ ﺯﻱ ﻣﺎﻋﺮﻓﺘﻚ "..
ﻧﻀﺎﻝ ﺑﺈﺑﺘﺴﺎﻣﻪ : ﻫﻴﺎ ﻗﻌﻤﺰﻱ ...
ﺣﻨﺎﻥ ﺣﻄﺖ ﺷﻜﺎﺭﺓ ﺍﻟﺒﺮﻳﻮﺵ ﻭﻗﻌﻤﺰﺕ ﻭﺑﺪﺕ ﺗﻔﻄﺮ ﻭﻗﻠﺒﻬﺎ ﻳﺮﻗﺺ ﻣﻦ ﺍﻟﻔﺮﺡ ﺗﺘﺄﻣﻞ ﻓﺄﻏﻠﻰ 3 ﻋﻨﺪﻫﺎ ﻓﻲ ﻫﺎﻟﺪﻧﻴﺎ ﻭﻣﺒﺘﺴﻤﻪ ﺑﺮﺍﺣﻪ ...
***
ﻳﻔﻄﺮ ﻓﻲ ﻣﻜﺘﺒﻪ ﻭﻳﺘﺄﻣﻞ ﻓﻲ ﺍﻟﺴﻤﻲ ﺍﻟﻤﺴﺤﺒﻪ ﺍﻟﻠﻲ ﻳﺸﻮﻑ ﻓﻴﻬﺎ ﻣﻦ ﺍﻟﺠﺪﺍﺭ ﺍﻟﺰﺟﺎﺟﻲ ﺍﻟﻠﻲ ﻣﻘﻌﻤﺰ ﺑﺤﺪﺍﻩ ﻭﺍﻟﻠﻲ ﻳﻄﻞ ﻉ ﺍﻟﺨﺎﺭﺝ ...
ﻃﻖ ﺍﻟﺒﺎﺏ ...
ﻣﻌﺎﻭﻳﻪ : ﺧﺶ ..
ﺧﺸﺖ ﻣﺮﻳﻢ ﻣﺮﺑﻴﺔ ﻣﻬﺎ : ﻋﻔﻮﺍ ﺃﺳﺘﺎﺫ ﻣﻌﺎﻭﻳﻪ ..
ﺷﺒﺤﻠﻬﺎ ﺑﺮﻓﻌﺔ ﺣﺎﺟﺐ : ﺷﻦ ﻓﻲ
ﻣﺮﻳﻢ : ﻏﻴﺮ ﻗﻠﺖ ﺑﻨﺨﺒﺮﻙ ﺃﻣﺲ ﺟﺪﺓ ﺍﻷﻧﺴﻪ ﻣﻬﺎ ﺍﺗﺼﻠﺖ ﻭﻗﺎﻟﺖ ﺗﺒﻲ ﺗﺸﻮﻓﻬﺎ ﻣﺎﻗﺪﺭﺗﺶ ﻧﺨﺒﺮ ﺣﻀﺮﺗﻚ ﻷﻧﻚ ﺭﻭﺣﺖ ﻣﺘﺄﺧﺮ ..
ﻣﻌﺎﻭﻳﻪ ﻫﺰ ﺭﺍﺳﻪ ﺑﺈﻳﺠﺎﺏ ﻭﻗﺎﻝ : ﺑﺮﻱ ﻣﻌﺎﻫﺎ ..
ﻣﺮﻳﻢ : ﺣﺎﺿﺮ .. ﺣﻴﺎﺗﻪ ﺑﺈﻧﺤﻨﺎﺀﻩ ﺑﺴﻴﻄﻪ ﻭﻟﻔﺖ ﻭﻃﻠﻌﺖ .
ﻭﻫﻮ ﻗﺎﻋﺪ ﺣﺎﻁ ﺭﺟﻞ ﻉ ﺭﺟﻞ ﻭﻳﺘﺄﻣﻞ ﻓﻲ ﺍﻟﺠﻮ ... ﻓﺠﻮ ﺯﻱ ﻫﺬﺍ ﺻﺎﺭﺕ ﻓﺎﺟﻌﻪ ﻛﺒﻴﺮﻩ ﻓﻲ ﺣﻴﺎﺓ ﻣﻌﺎﻭﻳﻪ .. ﻛﺎﻥ ﺣﺎﺳﺲ ﺑﻀﻴﻖ ﺷﺪﻳﺪ ﻭﻣﺎﺧﺎﻃﺮﺍﺵ ﻳﻤﺸﻲ ﻟﻠﺸﺮﻛﻪ ﺣﺎﻟﻴﺎ ...
***
ﻃﻠﻌﻮﺍ ﺍﻟﺒﻨﺎﺕ ﺍﻟﻠﻲ ﻟﺠﺎﻣﻌﺘﻬﺎ ﻭﺍﻟﻠﻲ ﻟﻤﺪﺭﺳﺘﻬﺎ ...
ﺭﻛﺒﺖ ﺣﻨﺎﻥ ﻓﻮﻕ ﺗﻔﺎﺟﺌﺖ ﻟﻤﺎ ﺷﺎﻓﺖ ﺷﻨﻄﺔ ﺳﻔﺮ ﺻﻐﻴﺮﻩ ﻟﻨﻀﺎﻝ ...
ﺧﺶ ﺑﻌﺪﻫﺎ ﻭﺭﻛﺰ ﻋﻠﻴﻬﺎ ﻭﻳﻦ ﺗﺸﺒﺢ ﻭﻗﺎﻝ : ﺑﻨﺴﺎﻓﺮ ﺍﻟﻴﻮﻡ ﺑﻌﺪ ﺍﻟﻈﻬﺮ ﻝ ***** ﻓﻲ ﺍﺟﺘﻤﺎﻉ ﻋﺎﺩﻱ ﻟﻤﻨﻈﻤﺔ ﺃﻭﺑﻚ ﻭﻛﻠﻔﻮﻧﻲ ﻧﺤﻀﺮﻩ ..
ﺍﻧﺼﺪﻣﺖ ﺣﻨﺎﻥ ﻳﻌﻨﻲ ﺍﻟﻠﻲ ﻣﺨﻄﻄﻠﻪ ﻛﻠﻪ ﻣﺶ ﺻﺎﻳﺮ ﻣﻨﻪ ..
ﺍﻟﺘﻔﺘﻠﻪ : ﻻﺯﻡ ﺍﻟﻴﻮﻡ ..
ﻧﻀﺎﻝ ﺑﺈﺑﺘﺴﺎﻣﻪ : ﻻﺯﻡ ﻃﺒﻌﺎ ...
ﺣﻨﺎﻥ ﻋﻴﻮﻧﻬﺎ ﺗﻌﺒﻮﺍ ﺩﻣﻮﻉ : ﺑﺎﻫﻲ ﺗﻤﺸﻲ ﻭﺗﺠﻲ ﺳﺎﻟﻢ ..
ﻧﻀﺎﻝ : ﺍﺣﻤﻢ .. ﺣﻨﺎﻥ ﺑﻨﻄﻠﻊ ﺳﺎﻋﻪ ﻭﺟﺎﻱ ..
ﺣﻨﺎﻥ ﺷﺒﺤﺘﻠﻪ : ﺑﺎﻩ .. ﻫﻮ ﻃﻠﻊ .. ﻭﻫﻲ ﻗﻌﻤﺰﺕ ﻉ ﻛﺮﺳﻲ ﺍﻟﺰﻳﺎﻧﻪ ﺑﺨﻴﺒﺔ ﺃﻣﻞ .. ﺷﺒﺤﺖ ﻟﺸﻨﻄﺘﻬﺎ ﻭﺧﺪﺗﻬﺎ ﻓﺘﺤﺘﻬﺎ ﻭﻃﻠﻌﺖ ﻣﻨﻬﺎ ﻛﻴﺴﻪ ﻓﻴﻬﺎ ﺯﻭﺯ ﺑﺎﻛﻮﺍﺕ ﻓﻴﻬﻢ ﺩﺑﻠﺘﻬﺎ ﻭﺩﺑﻠﺘﻪ ﺟﺪﺩﺗﻬﻢ ﻭﺩﺍﺭﺗﻠﻬﻢ ﺇﺿﺎﻓﺎﺕ ﺣﻠﻮﻩ ﻭﻛﺎﻧﺖ ﻧﺎﻭﻳﻪ ﻟﻤﺎ ﻳﺤﺘﻔﻠﻮﺍ ﺍﻟﻴﻮﻡ ﻳﻠﺒﺴﻮﻫﻢ ﻟﺒﻌﺾ ﻭﻳﺠﺪﺩﻭﺍ ﻓﻴﻬﻢ ﻋﻼﻗﺘﻬﻢ .. ﺑﺲ ﻣﻊ ﺍﻷﺳﻒ ﻣﺶ ﺣﻴﺼﻴﺮ ﺷﻲ ﻣﻦ ﺍﻟﻠﻲ ﺧﻄﺘﺘﻠﻪ ...
***
ﻓﻲ ﺍﻟﺠﺎﻣﻌﻪ
ﺗﻘﻮﻯ : ﻣﺤﻼﻩ ﺑﻮﻙ ﺑﺠﺪﻳﺎﺕ ..
ﺭﻫﻒ : ﻧﺘﻤﻨﻰ ﺭﺑﻲ ﻳﻌﻄﻴﻨﻲ ﻓﻬﺎﻟﺪﻧﻴﺎ ﺭﺍﺟﻞ ﺯﻳﻪ ... ﺷﺒﺤﺘﻠﻬﻢ .. ﺑﻌﺪ ﻫﺎﻟﻴﻮﻡ ﻗﺮﺭﺕ ﻳﺎﻧﺎﺧﺪ ﺯﻱ ﺑﺎﺑﺎ ﻳﺎﺑﻼﺵ ﻣﻨﻪ ﺍﻟﺰﻭﺍﺝ ﻣﺮﺓ ﻭﺣﺪﻩ ..
ﺃﺳﻨﺎﻡ ﺍﺑﺘﺴﻢ : ﺧﻴﺮ ﻣﻨﻪ ﺇﻥ ﺷﺎﺀ ﺍﻟﻠﻪ ..
ﺷﺒﺤﻮﻟﻪ ﺗﻘﻮﻯ ﻭﻟﺆﻱ ..
ﺭﻫﻒ : ﺷﻨﻮ؟ !!
ﺃﺳﻨﺎﻡ ﺑﺮﺑﻜﻪ : ﺭﺑﻲ ﻳﻌﻄﻴﻚ ﺧﻴﺮ ﻣﻨﻪ ..
ﺭﻫﻒ ﺑﺈﺑﺘﺴﺎﻣﻪ : ﻣﺎﺃﻇﻨﻴﺶ ﻓﻲ ﺭﺍﺟﻞ ﺯﻱ ﺑﺎﺑﺎ ﻓﻮﻗﺘﻨﺎ ﻫﺬﺍ ﺑﺶ ﻳﻜﻮﻥ ﻓﻲ ﺧﻴﺮ ﻣﻨﻪ ..
ﻟﺆﻱ ﻳﺸﺒﺢ ﻷﺳﻨﺎﻡ : ﻻﻓﻲ ﻓﻲ ﺍﻧﺘﻲ ﺭﻛﺰﻱ ﺣﻮﺍﻟﻴﻚ ﺷﻮﻳﻪ ﻭﺣﺘﻠﻘﻲ ..
ﺭﻫﻒ ﺑﻀﺤﻜﻪ : ﻣﺎﻋﻨﺪﻳﺶ ﻭﻗﺖ ﻧﺮﻛﺰ ﻓﻴﻪ ﻉ ﺣﺎﺟﺎﺕ ﺯﻱ ﻫﺎﺩﻱ .. ﺗﻮﺍ ﺍﻹﻣﺘﺤﺎﻧﺎﺕ ﻳﺎﺑﺎﺷﺎ ﻫﻤﺎ ﺍﻷﻭﻟﻰ ..
ﺍﺳﻨﺎﻡ ﺗﻨﻬﺪ ﻭﺑﺘﻠﻘﺎﺋﻴﻪ : ﻳﺎﺭﻳﺘﻨﻲ ﺃﻣﺘﺤﺎﻥ ..
ﺷﺒﺤﻮﻟﻪ ﺗﻼﺛﻪ ﺑﺼﺪﻣﻪ ..
ﺃﺳﻨﺎﻡ ﺭﻛﺰ ﻉ ﺭﻭﺣﻪ : ﺑﺶ ﻳﺮﻛﺰﻭﺍ ﻓﻴﺎ .. ﻗﺼﺪﻱ ﻳﻌﻨﻲ .. ﺑﺶ ﻳﻬﺘﻤﻮﺍ ﺑﻴﺎ .." ﺧﺸﺖ ﺑﻌﻀﻬﺎ "
ﺭﻫﻒ ﺑﻀﺤﻜﻪ : ﻓﺎﻫﻤﻪ ﻋﻠﻴﻚ ﻭﺯﺍﺑﻄﺎﺗﻚ ..
ﺷﺒﺤﻮﻟﻬﺎ ﺑﺼﺪﻣﻪ ﺣﺘﻰ ﻫﻲ ..
ﺃﺳﻨﺎﻡ ﺑﻠﻊ ﺭﻳﻘﻪ؛ ﺷﻦ ﻓﺎﻫﻤﻪ ..
ﺭﻫﻒ : ﺍﻧﺖ ﺗﺤﺐ ﺑﻨﻴﻪ ﻭﻫﻲ ﻣﺶ ﻣﺪﻭﺭﺍﺗﻚ ﻭﻻ
ﺍﺳﻨﺎﻡ ﻳﺸﺒﺢ ﻭﻫﻮ ﻣﻔﻨﺺ ﺑﺼﺪﻣﻪ ..
ﻟﺆﻱ : ﻛﻴﻒ ﻋﺮﻓﺘﻲ ؟ !!
ﺭﻫﻒ : ﺗﻘﻮﻯ ﻗﺎﻟﺘﻠﻲ ﻳﻮﻣﻬﺎ ﻭﺑﺎﻟﻌﻼﻣﻪ ﻗﺎﻟﺖ ﻋﻠﻴﻬﺎ ﺣﻤﺎﺭﺓ ﻫﻬﻬﻬﻬﻬﻬﻬﻪ
ﺗﻘﻮﻯ ﺍﺫﻛﺮﺕ ﺷﻦ ﻗﺎﻟﺖ ﻫﺬﺍﻛﺎ ﺍﻟﻴﻮﻡ ﻭﻟﺆﻱ ﻭﺃﺳﻨﺎﻡ ﺷﺒﺤﻮﻟﻬﺎ ..
ﺭﻫﻒ : ﻟﻜﻦ ﻭﺍﻟﻠﻪ ﺯﻋﻼﻧﻪ ﻣﻨﻚ ﺑﺠﺪ ﻣﺶ ﺍﻧﻲ ﺍﻗﺮﺑﻠﻚ ﻣﻨﻬﺎ .. ﻋﻼﺵ ﻗﻠﺘﻠﻬﺎ ﻭﻣﺎﻗﻠﺘﻠﻴﺶ ﻛﻨﺖ ﺳﺎﻋﺪﺗﻚ ﺣﺘﻰ ..
ﺃﺳﻨﺎﻡ ﺍﺑﺘﺴﻢ : ﻓﻮﺗﻲ ﻣﺎﺗﻌﺒﻴﺶ ﺭﻭﺣﻚ .. ﺗﻮ ﻟﻤﺎ ﻧﺒﻴﻬﺎ ﺗﻌﺮﻑ ﺣﻨﻘﻮﻟﻠﻬﺎ ﺑﺮﻭﺣﻲ ..
ﺭﻫﻒ : ﻭﺻﺪﻗﻨﻲ ﺣﺘﻤﻮﺕ ﻣﻦ ﻓﺮﺣﺘﻬﺎ .. ﻭﺍﺣﺪ ﺯﻳﻚ ﺍﻧﺖ ﻏﺒﻴﻪ ﺍﻟﻠﻲ ﺗﺮﻓﻀﻪ ..
ﺗﻘﻮﻯ : ﻣﺮﺍﺭﺭﺭﺗﻲ ..
ﻟﺆﻱ : ﻭﺍﻧﻲ ﻓﻢ ﻛﺒﺪﻱ ﻧﺎﺽ ﻋﻠﻴﺎ .. ﻧﺎﺽ .. ﻫﻲ ﻧﻮﺿﻲ ﻧﺎﺧﺪﻭﺍ ﺣﺎﺟﻪ ﺗﻬﻔﺖ ﻋﻠﻴﻨﺎ ﺷﻮﻳﻪ ...
ﺗﻘﻮﻯ ﻧﺎﺿﺖ : ﺍﺣﺴﻦ ﺷﻲ .. ﺷﺒﺤﺘﻠﻬﻢ .. ﺍﻧﺴﺘﻮﺍ ﺑﻌﺾ .. ﻭﻣﺸﻮﺍ ﻭﺧﻠﻮﻫﻢ ..
ﺭﻫﻒ ﺷﺒﺤﺘﻠﻬﻢ ﺑﺈﺳﺘﻐﺮﺍﺏ ﺑﻌﺪﻳﻦ ﺷﺒﺤﺖ ﻷﺳﻨﺎﻡ : ﻫﺎﺩﻡ ﺧﻴﺮﻫﻢ ..
ﺍﺳﻨﺎﻡ ﻫﺎﻳﻢ ﻓﻴﻬﺎ ﺑﺈﺑﺘﺴﺎﻣﻪ : ﻣﺎﺩﻭﺭﻳﻬﻤﺶ ... ﺗﻌﺎﻟﻲ ﻧﻘﺮﻳﻚ ..
ﺭﻫﻒ : ﻻ ﺍﻟﺤﻤﺪﻟﻠﻪ ﻛﻞ ﺷﻲ ﻣﻔﻬﻮﻡ ﻋﻨﺪﻱ .. ﺑﺲ ﺷﻦ ﺭﺍﻳﻚ ﻧﻮﺿﻮﺍ ﻧﺘﻤﺸﻮﺍ ﻗﺒﻞ ﺗﺒﺪﺍ ﻣﺤﺎﺿﺮﺗﻲ ..
ﺃﺳﻨﺎﻡ ﻧﺎﺽ ﻭﻫﻮ ﻣﺒﺘﺴﻢ : ﺍﻟﻠﻲ ﺗﺒﻴﻪ ..
ﻣﺪﺗﻠﻪ ﻳﺪﻫﺎ : ﺑﺎﻟﻠﻪ ﻧﻮﺿﻨﻲ ..
ﺍﺑﺘﺴﻢ ﻭﻗﺪﻡ ﺷﺪ ﻳﺪﻫﺎ ﻭﻧﻮﺿﻬﺎ ﺑﺎﻟﻘﺼﺪ ﺟﺒﺪﻫﺎ ﻟﻴﻪ ﻫﻲ ﺍﻧﺼﺪﻣﺖ ﻭﻛﺎﻧﺖ ﻗﺮﻳﺒﻪ ﻋﻠﻴﻪ ﻭﻋﻴﻮﻧﻬﻢ ﻑ ﺑﻌﺾ ..
ﺭﻫﻒ ﺣﺴﺖ ﺑﺸﻌﻮﺭ ﻏﺮﻳﺐ ﻫﻠﺒﻪ ﻭﻫﻲ ﺗﺸﻮﻑ ﻟﻌﻴﻮﻧﻪ ﺍﻟﺰﺭﻕ .. ﻭﻫﻮ ﻛﺎﻥ ﻉ ﻭﺷﻚ ﺍﻹﻧﻬﻴﺎﺭ ﺍﻟﺘﺎﻡ ﻭﺍﻹﻋﺘﺮﺍﻑ ... ﻟﻴﻦ ﻫﻲ ﺑﻌﺪﺕ ..
ﺭﻫﻒ ﻭﺟﻬﻬﺎ ﺍﺣﻤﺮ : ﻫﻴﺎ ﻧﻤﺸﻮﺍ ..
ﺃﺳﻨﺎﻡ ﺍﺑﺘﺴﻢ ﻟﺨﺠﻠﻬﺎ : ﻫﻴﺎ ...
ﻣﺸﻮﺍ ﻣﻦ ﺑﻌﻀﻬﻢ ﻭﺍﻟﺰﻭﺯ ﻛﺎﻧﻮﺍ ﺗﺤﺖ ﺗﺄﺛﻴﺮ ﺍﻟﻤﻮﻗﻒ .. ﻫﻲ ﻛﺎﻧﺖ ﺗﺮﻋﺶ ﻣﺶ ﻋﺎﺭﻓﻪ ﻋﻼﺵ .. ﻭﻫﻮ ﻉ ﺭﺍﺱ ﻟﺴﺎﻧﻪ ﻛﻠﻤﺖ ﻧﺤﺒﻚ .. ﺑﺲ ﺭﺍﻓﺾ ﻓﻤﻪ ﻳﻄﻠﻌﻬﺎ ..
***
ﺑﻌﺪ ﺳﺎﻋﻪ ﺑﺎﻟﺰﺑﻂ ﺭﻭﺡ ﻧﻀﺎﻝ ﻟﻘﻲ ﺣﻨﺎﻥ ﻣﻘﻌﻤﺰﺓ ﺗﻘﺮﺍ ..
ﻧﻀﺎﻝ ﻗﻌﺪ ﻳﺸﺒﺤﻠﻬﺎ ﻭﻫﻲ ﻛﺬﻟﻚ ...
ﻧﻀﺎﻝ : ﺍﺣﻤﻢ .. ﺣﻚ ﺣﺎﺟﺒﻪ .. ﺣﻨﺎﻥ ﻧﻮﺿﻲ ﺍﻟﺒﺴﻲ ﺑﺴﺮﻋﻪ ﺑﻨﻄﻠﻌﻮﺍ ﻣﺸﻮﺍﺭ ...
ﻫﻲ ﺗﻔﺎﺟﺌﺖ ﻭﻗﻌﺪﺕ ﺗﺸﺒﺤﻠﻪ ..
ﻧﻀﺎﻝ ﺑﺮﺑﻜﻪ : ﻫﻴﺎ ﺣﻨﺎﻥ ﻣﻌﺎﺵ ﻓﻲ ﻭﻗﺖ ..
ﺣﻨﺎﻥ ﻫﺰﺕ ﺭﺍﺳﻬﺎ ﺑﺄﻳﺠﺎﺏ ﻭﻫﻲ ﻣﺘﻔﺎﺟﺌﻪ : ﺑﺎﻫﻲ ... ﻃﻮﻝ ﺭﻛﺒﺖ ﻓﻮﻕ ﻭﺗﻘﻮﻝ ﻓﻲ ﻧﻔﺴﻬﺎ " ﺷﻜﻠﻪ ﻣﻮﺗﻴﻠﻚ ﻣﻔﺎﺟﺄﺓ ﻳﺎﺣﻨﺎﻥ ﻭﺍﻧﺘﻲ ﻣﺎﺗﻨﺪﺭﻳﺶ ﻳﺎﻧﺎﺭﻱ ﺣﺒﻴﺒﻲ ﻭﺍﻧﻲ ﻃﻮﻝ ﺍﻟﻮﻗﺖ ﻧﻔﻜﺮ ﺍﺗﺠﺎﻫﻪ ﻓﻲ ﺍﻓﻜﺎﺭ ﻣﺶ ﺣﻠﻮﺓ "...
ﻟﺒﺴﺖ ﻋﺒﺎﻳﻪ .. ﻭﺍﺩﻭﺭ ﻉ ﻭﺷﺎﺡ ﻣﺶ ﻻﻗﻴﻪ ﺑﻌﺪﻳﻦ ﺍﺫﻛﺮﺕ ﺍﻥ ﻛﻠﻬﻢ ﻏﺎﺳﻠﺘﻬﻢ ﻣﺎﻋﺪﺍ ﻭﺷﺎﺡ ﺃﺳﻮﺩ .. ﺧﺪﺍﺗﻪ ﻃﻮﻝ ﻟﺒﺴﺎﺗﻪ ﺷﺒﺤﺖ ﻟﻠﻤﺮﺍﻳﻪ ﺍﺿﺎﻳﻘﺖ ﺍﻧﻬﺎ ﻻﺑﺴﻪ ﺍﺳﻮﺩ ﻓﺄﺳﻮﺩ ﻣﺎﺩﻭﺭﺗﺶ .. ﺧﺪﺕ ﺍﻟﺸﻨﻄﻪ .. ﻭﺟﺖ ﻃﺎﻟﻌﻪ ﻫﻮ ﺧﺶ ﻣﺎﺍﻧﺘﺒﻬﻠﻬﺎﺵ ﺷﻦ ﻻﺑﺴﻪ ﻋﻘﻠﻪ ﻓﻲ ﺷﻲ ﺗﺎﻧﻲ ﺍﻫﻢ ﻋﻨﺪﻩ ..
ﺧﺶ ﺧﺪﻱ ﺷﻨﻄﺘﻪ ﻭﻫﻲ ﺗﺸﺒﺤﻠﻪ ..
ﻧﻀﺎﻝ : ﺍﻟﻄﺎﻳﺮﻩ ﻣﺎﺯﺍﻝ ﻋﻠﻴﻬﺎ ﺳﺎﻋﺘﻴﻦ ﻧﻜﻤﻠﻮﺍ ﻣﺸﻮﺍﺭﻧﺎ ﻭﺑﻨﺘﻮﺟﻪ ﻟﻠﻤﻄﺎﺭ ...
ﺣﻨﺎﻥ ﺍﺑﺘﺴﻤﺖ ﻭﻫﺰﺕ ﺭﺍﺳﻬﺎ ﺑﺈﻳﺠﺎﺏ ...
ﻧﺰﻟﻮﺍ ﺍﻟﺰﻭﺯ ﻣﻦ ﺍﻟﺪﺭﻭﺝ ﻭﻛﻴﻒ ﺟﺎﻳﻴﻦ ﺑﻴﻄﻠﻌﻮﺍ ﺷﺒﺤﺖ ﺣﻨﺎﻥ ﻟﻮﺭﺩ ﺍﻟﺘﻮﻟﻴﺐ ﺍﻟﻤﻮﻑ ...
ﻧﻀﺎﻝ : ﻫﻴﺎ ﺣﻨﺎﻥ ..
ﺣﻨﺎﻥ ﺷﺒﺤﺘﻠﻪ ﻭﺍﺑﺘﺴﻤﺖ : ﻫﻴﺎ ..
ﻃﻠﻌﻮﺍ ﺍﻟﺰﻭﺯ .. ﻫﻮ ﺣﻂ ﺍﻟﺸﻨﻄﻪ ﻓﻲ ﺍﻟﻜﻮﻓﻨﻲ ﻭﺭﻛﺐ ﻭﻫﻲ ﺭﻛﺒﺖ ﻭﺗﺤﺮﻛﻮﺍ ﻃﻮﻝ ..
***
ﻣﻌﻨﺎﻫﺎ ﻫﺬﺍ ﻳﺤﺒﻚ ﺑﺼﺪﻕ ..
ﻳﺎﺭﺍ ﺑﺈﺑﺘﺴﺎﻣﻪ : ﻣﺶ ﻗﺘﻠﻚ .. ﻫﻮ ﺍﺧﺘﺎﺭ ﺍﻧﻪ ﻳﻄﻠﻘﻬﺎ ﺑﺶ ﺗﺸﻮﻑ ﺣﻴﺎﺗﻬﺎ .. ﺷﻔﺘﻲ ﻛﻴﻒ ﻳﻔﻜﺮ ..
ﺩﺍﻟﻴﺎ : ﻣﺶ ﻋﺎﺭﻓﻪ ﺷﻦ ﻧﻘﻮﻟﻚ .. ﺑﺲ ﻧﺘﻤﻨﻰ ﻣﻦ ﻗﻠﺒﻲ ﺗﺘﻬﻨﻲ ﻭﺗﻜﻮﻧﻲ ﺳﻌﻴﺪﻩ ..
ﻳﺎﺭﺍ : ﻳﺎﺍﺍﺍﺭﺏ ..
ﺩﺍﻟﻴﺎ : ﻭﺍﻣﺘﻰ ﺣﺘﺘﺰﻭﺟﻮﺍ ...
ﻳﺎﺭﺍ : ﻫﻮ ﻗﺎﻟﻲ ﻗﺮﻳﺐ .. ﻭﻃﺒﻌﺎ ﺣﻨﺘﺰﻭﺟﻮﺍ ﺑﺈﺣﺘﻔﺎﻝ ﺧﺎﺹ ﺑﻴﻨﺎ ﺣﻨﻲ ﺑﺮﻭﺣﻨﺎ ﺑﻌﻴﺪ ﻋﻦ ﺍﻟﺪﻭﺷﻪ ..
ﺩﺍﻟﻴﺎ ﺑﻀﺤﻜﻪ : ﺍﻛﻴﺪ ﺍﻗﺘﺮﺍﺣﻚ ..
ﻳﺎﺭﺍ ﺑﻀﺤﻜﻪ : ﺍﻳﻪ ...
***
ﻭﺻﻠﻮﺍ ﻟﻤﻄﻌﻢ ﻣﻄﻞ ﻉ ﺍﻟﺒﺤﺮ ...
ﻧﻀﺎﻝ : ﺍﻧﺰﻟﻲ ﻫﻲ ..
ﻋﺠﺒﻬﺎ ﺣﻨﺎﻥ ﺍﻟﻤﻜﺎﻥ ﻭﻧﺰﻟﺖ ...
ﺭﺍﺟﺎﺗﻪ ﻟﻴﻦ ﻧﺰﻝ ﻭﺧﺸﻮﺍ ﻣﻊ ﺑﻌﺾ ... ﻛﺎﻥ ﺣﺎﺟﺰ ﻓﻲ ﻃﺎﻭﻟﻪ ﻓﻲ ﺃﺧﺮ ﺍﻟﻤﻄﻌﻢ ﻣﻄﻠﻪ ﻉ ﺍﻟﺒﺤﺮ ﻭﺻﻠﻬﻢ ﻟﻴﻬﺎ ﺍﻟﺠﺮﺳﻮﻥ ..
ﺣﻨﺎﻥ ﻗﻌﻤﺰﺕ ﻭﻫﻲ ﺑﻄﻴﺮ ﻣﻦ ﺍﻟﻔﺮﺣﻪ ﻭﻗﻌﻤﺰ ﻣﻘﺎﺑﻠﻬﺎ ﻧﻀﺎﻝ ...
ﻃﻠﺒﻮﺍ ﻋﺼﻴﺮ ﻃﺒﻴﻌﻲ ﺍﻟﺰﻭﺯ ...
ﺣﻨﺎﻥ : ﺍﻟﺠﻮ ﻫﺬﺍ ﺣﻠﻮ .. ﺍﻟﺴﻤﻲ ﻣﺴﺤﺒﻪ ﻭﺍﻟﺒﺤﺮ ﺯﻳﺎﺩﻩ ..
ﻧﻀﺎﻝ ﻳﺸﺒﺤﻠﻬﺎ : ﻋﺎﺭﻓﻚ ﺗﺤﺒﻴﻪ ...
ﺣﻨﺎﻥ ﺷﺒﺤﺘﻠﻪ : ﺍﻣﺘﻰ ﻟﺤﻘﺖ ﺗﺤﺠﺰ ..
ﻧﻀﺎﻝ : ﻣﻦ ﺳﺎﻋﻪ ..
ﺣﻨﺎﻥ ﺍﺑﺘﺴﻤﺖ : ﺍﻫﺎ ..
ﺟﻲ ﺍﻟﻄﻠﺐ ﻭﺣﻄﻪ ﺍﻟﺠﺮﺳﻮﻥ ﻭﻣﺸﻲ ..
ﺷﺮﺑﺖ ﺣﻨﺎﻥ ﺃﻭﻝ ﺭﺷﻔﻪ ﻭﻫﻲ ﺗﺸﺒﺢ ﻟﻠﺒﺤﺮ .. ﺍﻣﺎ ﻫﻮ ﺷﺮﺏ ﺍﻭﻝ ﺭﺷﻔﻪ ﻭﻫﻮ ﻳﺸﺒﺤﻠﻬﺎ ﻭﻳﺒﻲ ﻳﺘﻜﻠﻢ .. ﺣﻂ ﺍﻟﻄﺎﺳﻪ ﺍﻟﻄﺎﻭﻟﻪ ..
ﻧﻀﺎﻝ : ﺣﻨﺎﻥ ... ﺭﻛﺰﻱ ﻣﻌﺎﻱ ..
ﺣﻨﺎﻥ ﺣﻄﺖ ﻃﺎﺳﺘﻬﺎ ﻭﻗﻌﺪﺕ ﺗﺸﺒﺤﻠﻪ : ﻣﻌﺎﻙ ..
ﻧﻀﺎﻝ ﺷﺒﺢ ﻟﻠﺒﺤﺮ ﺑﻌﺪﻳﻦ ﺷﺒﺤﻠﻬﺎ : ﻣﻦ ﺃﻭﻝ ﻳﻮﻡ ﺷﻔﺘﻚ ﻓﻴﻪ ﺍﻋﺠﺒﺖ ﺑﻴﻚ .. ﺟﻤﻴﻠﻪ ﻣﺘﻔﻮﻗﻪ ﻣﺜﻘﻔﻪ ﻭﻣﺤﺎﻓﻈﻪ .. ﻛﻨﺘﻲ ﻣﺮﺍﺓ ﻣﻤﻴﺰﺓ ﻫﻠﺒﻪ ﻓﻨﻈﺮﻱ .. ﻭﻣﺸﺎﻋﺮﻱ ﺍﺗﺠﺎﻫﻚ ﻗﻮﺕ ﻫﻠﺒﻪ ﻭﺣﺒﻴﺘﻚ ..
ﺣﻨﺎﻥ ﺗﺴﻤﻊ ﻭﻋﻴﻮﻧﻬﺎ ﻣﻌﺒﻴﺎﺕ ﺩﻣﻮﻉ ﻭﻣﺒﺘﺴﻤﻪ ﻭﻓﻲ
ﺑﺎﻟﻬﺎ ﺍﻧﻪ ﻳﻘﻮﻝ ﻓﻲ ﺍﻟﻜﻼﻡ ﻫﺬﺍ ﻣﻘﺪﻣﻪ ﻟﺸﻲ ﺣﻠﻮ ﺣﻴﻔﺎﺟﺌﻬﺎ ﺑﻴﻪ ﻓﻲ ﻫﺎﻟﻤﻨﺎﺳﺒﻪ ﻣﺮﻭﺭ 20 ﺳﻨﻪ ﻉ ﺯﻭﺍﺟﻬﻢ ..
ﻧﻀﺎﻝ : ﻓﺮﺣﺖ ﻫﻠﺒﻪ ﻟﻤﺎ ﻃﻠﻌﺘﻲ ﻣﺒﺎﺩﻟﺘﻴﻨﻲ ﻧﻔﺲ ﺍﻟﺸﻌﻮﺭ ﻃﻠﺒﺘﻚ ﻟﻠﺰﻭﺍﺝ ﻭﺍﻓﻘﺘﻲ .. ﻭﺩﺭﻧﺎ ﻣﻊ ﺑﻌﺾ ﺍﺳﺮﺓ ﺣﻠﻮﺓ ﻫﻠﺒﻪ ﻭﻛﻨﺘﻲ ﻓﻌﻼ ﻧﻌﻤﻪ ﺍﻟﺰﻭﺟﻪ ﻭﻧﻌﻢ ﺍﻷﻡ .. ﻭﻣﺴﺘﺤﻴﻞ ﻧﻨﻜﺮ ﻓﻀﻠﻚ ﻋﻠﻴﺎ ﻣﻦ ﺑﻌﺪ ﺍﻟﻠﻪ ﻃﻮﻝ ﺍﻟﺴﻨﻴﻦ ﺍﻟﻠﻲ ﻓﺎﺗﻮﺍ ﻫﻴﺌﺘﻴﻠﻲ ﻛﻞ ﺷﻲ ﺑﺶ ﻧﻨﺠﺢ ﻓﻲ ﺷﻐﻠﻲ ﻭﻓﻜﻞ ﺷﻲ ﻧﺤﺒﻪ ﻭﻧﻮﺻﻞ ﻟﻠﻲ ﻭﺻﻠﺘﻠﻪ ﺍﻟﻴﻮﻡ ..
ﺣﻨﺎﻥ ﻣﺎﺗﺒﻴﺶ ﺗﻘﺎﻃﻌﻪ ﺑﻜﻞ ﻉ ﻗﺪ ﻣﺎﻛﺎﻥ ﻛﻼﻣﻪ ﺣﻠﻮ ﻭﻓﺮﺣﻬﺎ ..
ﻧﻀﺎﻝ ﺷﺒﺢ ﻟﻠﺒﺤﺮ : ﻟﻬﺬﺍ ﺍﻧﻲ ﻣﺎﻧﺒﻴﺶ ﻧﻈﻠﻤﻚ ﻣﻌﺎﻱ ﻭﻧﻜﻮﻥ ﺇﻧﺴﺎﻥ ﺃﻧﺎﻧﻲ .. ﻭﻻﻧﺒﻲ ﻧﻐﺪﺭ ﺑﻴﻚ ..
ﺣﻨﺎﻥ ﺍﺳﺘﻐﺮﺑﺖ ﺷﻮﻱ ..
ﻧﻀﺎﻝ ﺑﻘﻮﺓ : ﺣﻨﺎﻥ ﺍﻧﻲ ﻧﺤﺘﺮﻣﻚ ﻭﻧﻘﺪﺭﻙ ﻫﻠﺒﻪ ﻹﻧﻚ ﺗﺴﺘﺤﻘﻲ ﻭﻷﻧﻚ ﺍﻡ ﺑﻨﺎﺗﻲ .. ﻟﺬﻟﻚ ... ﺍﻧﻲ ﺣﻨﻘﻮﻟﻚ .. ﺍﻧﻲ ﺣﻨﺘﺰﻭﺝ ﻭﺣﻨﻄﻠﻘﻚ ...
ﺭﻳﺘﻮﺍ ﺍﻟﻠﻲ ﻳﻜﻮﻥ ﺭﺍﻗﺪ ﻭﻳﺤﻠﻢ ﺑﺤﻠﻢ ﺣﻠﻮ ﻫﻠﺒﻪ ﻭﻳﻔﻴﻘﻮﻩ ﻣﻨﻪ ﺑﺴﻄﻞ ﻣﻴﺔ ﻣﺜﻠﺠﻪ ﻓﻲ ﻋﺰ ﺍﻟﺼﻘﻊ ... ﻫﺬﺍ ﻫﻮ ﺷﻌﻮﺭ ﺣﻨﺎﻥ ﻓﻲ ﺍﻟﻠﺤﻈﻪ ﻫﻜﻲ ﺻﺎﺭﻟﻬﺎ ﺑﺎﻟﺤﺮﻑ ...
ﺍﺑﺘﺴﺎﻣﺘﻬﺎ ﺗﻼﺷﺖ ﻭﻗﻌﺪﺕ ﺗﺸﺒﺤﻠﻪ ﺑﺼﺪﻣﻪ ...
ﻧﻀﺎﻝ ﺷﺒﺢ ﻟﻠﺒﺤﺮ ﻫﺮﺑﺎ ﻣﻦ ﻧﻈﺮﺗﻬﺎ : ﺍﻟﻤﺸﺎﻋﺮ ﻣﺶ ﺑﺈﻳﺪﻳﻨﺎ .. ﻭﺍﻧﻲ ﻟﻴﺎ ﻓﺘﺮﻩ ﻃﻮﻳﻠﻪ ﻫﻠﺒﻪ ﻳﺎﺣﻨﺎﻥ ﻣﻌﺎﺵ ﻧﺤﺲ ﺇﺗﺠﺎﻫﻚ ﺑﻤﺸﺎﻋﺮ ﺍﻟﺤﺐ ﺍﻟﻠﻲ ﺣﺴﻴﺘﻪ ﻣﻦ ﺯﻣﺎﻥ ... ﻭﻣﻦ ﺳﻨﻪ ﺗﻘﺮﻳﺒﺎ ﺧﺸﺖ ﺣﻴﺎﺗﻲ ﻣﺮﺍﻩ ﺗﺎﻧﻴﻪ ﻭﺣﺒﻴﺘﻬﺎ ﻭﻗﺮﺭﺕ ﺍﻧﻲ ﻧﺘﺰﻭﺟﻬﺎ .. ﻭﻣﺎﻧﺒﻴﺶ ﻧﻈﻠﻤﻚ ﻣﻌﺎﻱ ﻭﻻﻧﻘﻴﺪﻙ ﺣﺘﻰ ﺇﻧﺘﻲ ﻣﻦ ﺣﻘﻚ ﺗﺸﻮﻓﻲ ﺣﻴﺎﺗﻚ .. ﻟﺬﻟﻚ ﻧﺒﻲ ﻧﻄﻠﻘﻮﺍ ﺑﻬﺪﻭﺀ ..
ﺣﻨﺎﻥ ﺗﺸﺒﺤﻠﻪ ... ﻓﻠﺤﻈﺘﻬﺎ ﻛﺎﻥ ﻧﻘﻮﻟﻠﻜﻢ ﻓﺸﻦ ﻓﻜﺮﺕ ﻭﺷﻦ ﺟﻲ ﻓﺒﺎﻟﻬﺎ .. ﺑﻨﺎﺗﻬﺎ .. ﺑﻨﺎﺗﻬﺎ ﺍﻟﻠﻲ ﻋﺎﻳﺸﻴﻦ ﻃﻮﻝ ﻋﻤﺮﻫﻢ ﻓﻲ ﺑﻴﺌﻪ ﻣﺴﺘﻘﺮﺓ ﻭﻫﺎﺩﻳﻪ ﻛﻠﻬﺎ ﺣﺐ .. ﺑﻨﺎﺗﻬﺎ ﺍﻟﻠﻲ ﻣﺘﻌﻠﻘﺎﺕ ﺑﺒﻮﻫﻢ ﻷﺑﻌﺪ ﺣﺪ ﻛﻴﻒ ﺣﻴﻜﻮﻥ ﻭﻗﻊ ﺍﻟﻠﻲ ﺣﻴﺼﻴﺮ ﻋﻠﻴﻬﻢ ... ﺧﺎﻓﺖ ﻋﻠﻴﻬﻢ ﻫﻠﺒﻪ .. ﺑﻌﺪ ﻃﻮﻝ ﺻﻤﺖ ﻗﺮﺭﺕ ﺗﺘﻜﻠﻢ ..
ﺷﺪﺕ ﺩﻣﻮﻋﻬﺎ ﻭﺭﺳﻤﺖ ﻉ ﻭﺟﻬﻬﺎ ﺇﺑﺘﺴﺎﻣﻪ ﻭﻗﺎﻟﺖ : ﺭﺑﻲ ﻣﺶ ﻛﺎﺗﺐ ﻧﻜﻤﻠﻮﺍ ﻣﻊ ﺑﻌﺾ ... ﻫﺬﺍ ﺣﺪ ﺍﻟﻨﺼﻴﺐ ﺑﻴﻨﺎﺗﻨﺎ .. ﻭﻣﻬﻤﺎ ﺩﺭﺕ ﻣﺶ ﺣﻨﻐﻴﺮ ﻣﻦ ﺍﻟﻤﻜﺘﻮﺏ ﻭﻟﻮ ﺣﺮﻑ ﻭﺍﺣﺪ .. ﺍﻧﺖ ﺍﻧﺴﺎﻥ ﻛﻮﻳﺲ ﻭﻣﺎﺭﻳﺘﺶ ﻣﻨﻚ ﺇﻻ ﻛﻞ ﺧﻴﺮ .. ﻛﻮﻥ ﺍﻧﻚ ﺧﻼﺹ ﻣﻌﺎﺵ ﺗﺤﺒﻨﻲ .. ﻭﻗﻠﺒﻚ ﻣﺎﻝ ﻟﻐﻴﺮﻱ .. ﻫﺬﺍ ﻟﻬﻮ ﺑﻴﺪﻱ ﻭﻻﺑﻴﺪﻙ ... ﺍﻟﻠﻪ ﻏﺎﻟﺐ .. ﺳﻜﺘﺖ ﺷﻮﻳﻪ ﻭﺷﺒﺤﺖ ﻟﻠﺒﺤﺮ ..
ﻭﻫﻮ ﻳﺸﺒﺤﻠﻬﺎ ﻭﻣﺘﻔﺎﺟﻰﺀ ﻓﺮﺩﺓ ﻓﻌﻠﻬﺎ ..
ﺣﻨﺎﻥ ﻛﻤﻠﺖ : ﻣﺶ ﺣﻨﻘﻮﻝ ﻏﻴﺮ .. ﻗﺪﺭ ﺍﻟﻠﻪ ﻭﻣﺎﺷﺎﺀ ﻓﻌﻞ .. ﺷﺒﺤﺘﻠﻪ .. ﺑﺲ ﻓﻲ ﺣﺎﺟﻪ ﻣﻌﺘﺮﺿﻪ ﻋﻠﻴﻬﺎ ..
ﻧﻀﺎﻝ : ﺷﻨﻮ؟
ﺣﻨﺎﻥ : ﺍﺣﻤﻢ .. ﺍﻧﻲ ﻣﻦ ﺭﺃﻳﻲ ﻟﻮ ﻧﺄﺟﻠﻮﺍ ﺍﻟﻄﻼﻕ .. ﻟﻴﻦ ﺗﺘﺨﺮﺝ ﺭﻫﻒ ﻭﺗﻄﻠﻊ ﻟﺒﻨﻰ ﻣﻦ ﺍﻟﺜﺎﻧﻮﻳﻪ .. ﻧﻀﺎﻝ ﺍﻧﺖ ﺍﻛﺜﺮ ﻭﺍﺣﺪ ﺗﻌﺮﻑ ﻗﺪﺍﺵ ﺑﻨﺎﺗﻚ ﻳﺤﺒﻮﻙ .. ﻭﺍﻛﻴﺪ ﻣﺘﺨﻴﻞ ﺣﺠﻢ ﺍﻟﺼﺪﻣﻪ ﺍﻟﻠﻲ ﺣﻴﻜﻮﻧﻮﺍ ﻓﻴﻬﺎ .. ﺍﻧﻲ ﺧﺎﻳﻔﻪ ﻟﻮﻃﻠﻌﺖ ﻣﻦ ﺣﻴﺎﺗﻬﻢ ﻫﻜﻲ ﺑﺴﺮﻋﻪ ﺍﻭ ﺑﻤﻌﻨﻰ ﺍﺧﺮ ﻣﺶ ﺣﺘﻮﻟﻲ ﻣﻌﺎﻫﻢ ﺯﻱ ﻗﺒﻞ .. ﻳﺄﺛﺮ ﻉ ﻧﻔﺴﻴﺎﺗﻬﻢ ﻭﻣﺎﺗﻨﺴﺎﺵ ﺑﻨﺎﺗﻚ ﻓﻲ ﺳﻦ ﺧﻄﻴﺮ ﺑﺎﻟﺬﺍﺕ ﻟﺒﻨﻰ .. ﻧﺒﻴﻬﻢ ﻳﺘﺄﻗﻠﻤﻮﺍ ﻉ ﺍﻟﻮﺿﻊ ... ﻭﻭﻗﺖ ﻟﻤﺎ ﻧﺤﺲ ﺍﻧﻬﻢ ﺗﻘﺒﻠﻮﺍ ﺍﻷﻣﺮ ﺍﻟﻮﺍﻗﻊ ... ﻧﻄﻠﻘﻮﺍ ...
ﻧﻀﺎﻝ ﻓﻜﺮ ﻓﻲ ﻛﻼﻣﻬﺎ ﻭﺍﻗﺘﻨﻊ ﺑﻴﻪ ﻷﻧﻪ ﻓﻌﻼ ﻛﺎﻥ ﺧﺎﻳﻒ ﺃﻛﺜﺮ ﺷﻲ ﻉ ﺑﻨﺎﺗﻪ ..
ﻧﻀﺎﻝ ﻫﺰ ﺭﺍﺳﻪ ﺑﺈﻳﺠﺎﺏ : ﻋﻨﺪﻙ ﺣﻖ .. ﻹﻧﻲ ﻓﻌﻼ ﻧﻔﻜﺮ ﻛﻴﻒ ﺣﻨﺨﺒﺮﻫﻢ ﺍﺻﻼ .
ﺣﻨﺎﻥ : ﺍﻧﻲ ﺣﻨﻘﻮﻟﻠﻬﻢ ... ﺗﺠﻲ ﻣﻨﻲ ﺍﺣﺴﻦ ﻣﺎﺗﺠﻲ ﻣﻨﻚ ... ﺑﺲ ﺣﻨﺨﺒﺮﻫﻢ .. ﺑﻌﺪ .. ﻭﻗﺎﻟﺘﻬﺎ ﻭﺣﺴﺖ ﺭﻭﺣﻬﺎ ﺑﺘﻄﻠﻊ .. ﺑﻌﺪ ﺗﺘﺰﻭﺝ ..
ﻧﻀﺎﻝ ﺑﺈﺳﺘﻐﺮﺍﺏ : ﻋﻼﺵ ..
ﺣﻨﺎﻥ : ﺑﺶ ﻳﻜﻮﻧﻮﺍ ﺗﺤﺖ ﺍﻷﻣﺮ ﺍﻟﻮﺍﻗﻊ .. ﻭﻣﺎﺗﻠﻘﺎﺵ ﻧﻔﺴﻚ ﺗﺤﺖ ﺍﻟﻀﻐﻂ ...
ﻧﻀﺎﻝ ﻣﺘﻔﺎﺟﻰﺀ ﻫﻠﺒﻪ ﻓﻴﻬﺎ ﻭﻣﺶ ﻣﺴﺘﻮﻋﺐ ﺍﻟﻠﻲ ﻳﺴﻤﻊ ﻓﻴﻪ ﻣﻨﻬﺎ ﻗﺎﻋﺪﻩ ﺗﺴﻬﻠﻪ ﺣﺘﻰ ﻓﻲ ﺣﺎﺟﻪ ﺯﻱ ﻫﺎﺩﻱ ﻣﺶ ﻓﺎﻫﻢ ﻋﻼﺵ ﻫﻜﻲ ﻛﺎﻧﺖ ﺭﺩﻩ ﻓﻌﻠﻬﺎ .. ﺑﺲ ﺧﺎﻑ ﻟﻮ ﻳﻜﻮﻥ ﻓﻲ ﻣﻦ ﻭﺭﺍﻫﺎ ﺷﻲ ...
ﺣﻨﺎﻥ ﻓﻬﻤﺎﺗﻪ ﻣﻦ ﻣﻼﻣﺢ ﻭﺟﻬﻪ ﻭﻫﻮ ﻳﺸﺒﺤﻠﻬﺎ ﻓﺸﻨﻮ ﻳﻔﻜﺮ : ﻣﺎﺗﺨﺎﻓﺶ ... ﺍﻃﻤﻦ .. ﻭﺍﺑﺘﺴﻤﺖ .
ﻫﻮ ﺍﺑﺘﺴﻢ ﻭﻗﺎﻝ : ﺑﺠﺪﻳﺎﺕ ﺍﻧﺘﻲ ﺍﻧﺴﺎﻧﻪ ﻋﺎﻗﻠﻪ ﺟﺪﺍ ﻳﺎﺣﻨﺎﻥ ..
ﺣﻨﺎﻥ : ﺷﻜﺮﺍ ..
ﻧﻀﺎﻝ ﻧﺎﺽ : ﻭﻗﺖ ﻉ ﺍﻟﻄﻴﺎﺭﻩ ...
ﺣﻨﺎﻥ ﻧﺎﺿﺖ ﻭﻫﻲ ﺗﺸﺒﺤﻠﻪ ... ﻫﻮ ﻃﻠﺐ ﺍﻟﺤﺴﺎﺏ .. ﻭﻃﻠﻌﻮﺍ ﺍﻟﺰﻭﺯ ... ﻣﺎﺷﻴﻪ ﺟﻨﺒﻪ ﺗﺒﺎﻥ ﺛﺎﺑﺘﻪ ﻭﻗﻮﻳﻪ .. ﻟﻜﻦ ﻳﻌﻠﻢ ﺭﺑﻲ ﺑﺲ ﺑﺎﻟﻠﻲ ﻓﺪﺍﺧﻠﻬﺎ .. ﻛﺎﻧﺖ ﺗﻌﻴﻂ ﻣﻦ ﺩﺍﺧﻞ .. ﻛﺎﻥ ﻗﻠﺒﻬﺎ ﻳﺒﻜﻲ ﻣﻦ ﻗﻮﺓ ﺍﻷﻟﻢ ... ﻛﺎﻧﺖ ﺭﻭﺣﻬﺎ ﺗﺮﻛﺐ ﻭﺗﻨﺰﻝ ... ﻣﺶ ﻋﺎﺭﻓﻪ ﻫﻲ ﺍﺻﻼ ﻣﻨﻴﻦ ﺟﺘﻬﺎ ﺍﻟﻘﻮﺓ ﺍﻟﻠﻲ ﺧﻠﺘﻬﺎ ﺗﺎﺑﺘﻪ ﻫﻜﻲ .. ﻭﻗﺎﻋﺪﻩ ﺗﻤﺸﻲ ﻉ ﺭﺟﻠﻴﻬﺎ .. ﻭﺻﻠﻮﺍ ﻓﻲ ﺍﻟﺴﻴﺎﺭﻩ ...
ﺣﻨﺎﻥ : ﺗﻮﺻﻞ ﺑﺎﻟﺴﻼﻣﻪ ..
ﻧﻀﺎﻝ ﺑﺈﺳﺘﻐﺮﺍﺏ : ﻣﺶ ﺣﺘﺮﻛﺒﻲ ..
ﺣﻨﺎﻥ ﻫﺰﺕ ﺭﺍﺳﻬﺎ ﺑﺎﻟﻨﻔﻲ : ﻧﺒﻲ ﻧﺘﻤﺸﻰ ﺷﻮﻳﻪ ﻉ ﺍﻟﺒﺤﺮ ...
ﻧﻀﺎﻝ ﺍﺑﺘﺴﻢ : ﻉ ﺭﺍﺣﺘﻚ ... ﺍﺑﺘﺴﻤﺖ ﻫﻲ ﻭﺍﻟﺘﻔﺘﺖ ﻭﻣﺠﺮﺩ ﻣﺎﻋﻄﺎﺗﻪ ﺑﺎﻟﻈﻬﺮ ﻃﺎﺣﻮﺍ ﺩﻣﻮﻋﻬﺎ ... ﺣﻄﺖ ﺍﻳﺪﻫﺎ ﻉ ﻗﻠﺒﻬﺎ ﺍﻟﻤﻮﺟﻮﻉ ﻭﺣﺎﺳﻪ ﺭﻭﺣﻬﺎ ﺗﻤﻮﺕ ﺑﺎﻟﻌﺮﻕ ..
ﺍﻣﺎ ﻫﻮ ﻗﻌﺪ ﻭﺍﻗﻒ ﻟﺤﻈﺎﺕ ﻳﺸﻮﻓﻠﻬﺎ ﺍﺑﺘﺴﻢ ﺑﺄﺭﺗﻴﺎﺡ ﺍﻧﻬﺎ ﻋﺪﺕ ﻉ ﺧﻴﺮ ﻭﺗﻮﺍ ﻳﻔﻜﺮ ﻛﻴﻒ ﺑﻴﻘﻨﻊ ﻳﺎﺭﺍ ﺑﻌﺪ ﻣﺎﻳﺮﻭﺡ ﻣﻦ ﺍﻟﺴﻔﺮ ﺑﺘﺄﺟﻴﻞ ﺍﻟﻄﻼﻕ ... ﺭﻛﺐ ﺳﻴﺎﺭﺗﻪ ﻭﻣﺸﻲ .. ﻭﻣﺶ ﻫﺎﻣﻪ ﺍﺑﺪﺍ ﺷﻦ ﺍﻟﺤﺎﻟﻪ ﺍﻟﻠﻲ ﻓﻴﻬﺎ ﺣﻨﺎﻥ ﺣﺎﻟﻴﺎ ... ﻣﺴﻜﻴﻦ .. ﻣﺎﻛﺎﻧﺶ ﻋﺎﺭﻑ ﺍﻥ ﺿﻴﻊ ﻧﻌﻤﻪ ﻋﻈﻴﻤﻪ ﻣﻦ ﺑﻴﻦ ﺍﻳﺪﻳﻪ .. ﺑﺲ ﺳﺒﺤﺎﻧﻪ .. ﻟﻤﺎ ﺍﺻﺒﺢ ﻧﻀﺎﻝ ﻻﻳﺴﺘﺤﻖ ﻫﺎﻟﻨﻌﻤﻪ .. ﺧﺪﺍﻫﺎ ﻣﻨﻪ ﻭﺣﻴﻬﺪﻳﻬﺎ ﻟﺤﺪ ﺗﺎﻧﻲ ﻫﻮ ﺑﺄﻣﺲ ﺍﻟﺤﺎﺟﻪ ﻟﻴﻬﺎ ﻭﺣﺘﻜﻮﻥ ﻫﻲ ﺍﻛﺒﺮ ﺳﺒﺐ ﻓﻲ ﻧﺠﺎﺗﻪ ...
***
ﺃﺳﺘﺎﺫ ﻣﻌﺎﻭﻳﻪ ﻋﻨﺪﻙ ﻣﻮﻋﺪ ﺍﻟﻴﻮﻡ ﻣﻊ ﻭﺯﻳﺮ ﺍﻹﺳﻜﺎﻥ ..
ﻣﻌﺎﻭﻳﻪ ﻭﻫﻮ ﻳﺸﺒﺢ ﻟﻠﺮﻭﺷﻦ : ﺍﻟﺴﺎﻋﻪ ..
ﺍﻟﺴﻜﺮﺗﻴﺮﻩ : 2... ﻏﺪﺍﺀ ﻋﻤﻞ ..
ﻣﻌﺎﻭﻳﻪ : ﺗﻤﺎﻡ ..
ﺍﻟﺴﻜﺮﺗﻴﺮﻩ ﺣﻴﺎﺗﻪ ﻭﻃﻠﻌﺖ ..
ﻫﻮ ﺍﻟﺘﻔﺖ ﻣﺸﻲ ﺟﻬﺔ ﺍﻟﺸﻤﺎﻋﻪ ﺧﺪﻱ ﺑﺎﻟﻄﻮﻩ ﻭﻃﻠﻊ ...
***
ﻛﺎﻧﺖ ﻭﺍﻗﻔﻪ ﻉ ﺍﻟﺒﺤﺮ ﻭﺣﺎﺿﻨﻪ ﻧﻔﺴﻬﺎ .. ﺻﻘﻊ .. ﺻﻘﻊ ﻫﻠﺒﻪ .. ﻛﺎﻧﺖ ﺍﻟﺒﺮﺩ ﻳﺘﺴﻠﻞ ﻟﺠﺴﺪﻫﺎ ﺍﺷﺒﻪ ﺑﺎﻟﺒﺮﺩ ﺍﻟﻠﻲ ﻳﺼﺎﺣﺐ ﺍﻟﻤﻮﺕ ...
ﺗﺒﻜﻲ ﻭﺗﺒﻜﻲ ﻭﺗﺒﻜﻲ .. ﺑﺎﻟﻌﺒﺮﻩ ... ﻣﺶ ﻗﺎﺩﺭﻩ ﺗﺼﺪﻕ ﻭﻻﺗﺴﺘﻮﻋﺐ ﺷﻲ ﺑﻜﻞ ... ﻣﺶ ﻓﺎﻫﻤﻪ ﻛﻴﻒ ﺻﺎﺭ ﻫﻜﻲ .. ﺑﺲ ﻓﻲ ﻛﻞ ﻣﺮﻩ ﻛﺎﻧﺖ ﺗﻮﺻﻞ ﻟﻨﺘﻴﺠﻪ ﻭﺣﺪﻩ " ﻧﺼﻴﺐ ﻣﻘﺪﺭ ﻭﻣﻜﺘﻮﺏ "..
ﺍﺭﻋﺪﺕ .. ﺷﺒﺤﺖ ﻟﻠﺴﻤﻲ .. ﻟﻘﺖ ﺍﻟﻐﻴﻮﻡ ﺳﻮﺩﺍ ﺛﻘﻴﻠﻪ ﻫﻠﺒﻪ ... ﻋﺮﻓﺖ ﺍﻥ ﻣﻄﺮﻩ ﻗﻮﻳﻪ ﺟﺎﻳﻪ ... ﻟﻔﺖ ﻭﻫﻲ ﺗﻤﺴﺢ ﻓﺪﻣﻮﻋﻬﺎ ﻭﻣﺸﺖ ﺑﺼﻌﻮﺑﻪ ﺷﺪﻳﺪﻩ .. ﻟﻴﻦ ﻭﺻﻠﺖ ﻓﻲ ﺍﻟﻄﺮﻳﻖ ﻭﻗﻔﺖ ﺗﺎﻛﺴﻲ ﻭﺭﻛﺒﺖ ... ﻭﺗﺤﺮﻙ ﻃﻮﻝ ...
***
ﻭﺻﻞ ﻟﻠﻤﻘﺒﺮﻩ ﻧﺰﻝ ﻣﻦ ﺳﻴﺎﺭﺗﻪ ﻗﺪﻡ ﺑﺨﻄﻮﺍﺕ ﺑﻄﻴﺌﺔ ﻟﻘﺒﺮ ﺯﻭﺟﺘﻪ ﺍﻟﺴﺎﺑﻘﻪ ... ﺍﻟﻠﻲ ﻋﻤﺮﻩ ﻣﺎﺣﺒﻬﺎ .. ﻭﻛﺎﻥ ﻳﺸﻮﻑ ﻓﻲ ﺯﻭﺍﺟﻪ ﻣﻨﻬﺎ ﺻﻔﻘﻪ ﻗﻮﺕ ﺷﻐﻠﻪ ﻭﻗﺖ ﻛﺎﻥ ﺑﺮﺍ .. ﻗﺪﻣﻠﻪ ..
ﺟﺖ ﺑﻴﻦ ﻋﻴﻮﻧﻪ ﺧﻄﻒ ﻭﻣﻴﺾ ﻣﻦ ﺫﻛﺮﻯ ﺍﻟﻔﺎﺟﻌﻪ .. ﻃﺮﻳﻖ .. ﺳﻴﺎﺭﺓ ﺗﺠﺮﻱ ... ﺣﺎﺩﺙ ...
ﺻﺪﺭﻩ ﺿﺎﻕ ﻧﻔﺾ ﻋﻨﻪ ﻫﺎﻟﺬﻛﺮﻯ ... ﻭﻓﺠﺄﻩ ﺣﺒﺎﺕ ﺍﻟﻤﻄﺮ ﺑﺪﺕ ﺗﻨﺰﻝ ﻭﺭﺍ ﺑﻌﻀﻬﺎ ... ﺗﻮﺟﻪ ﻃﻮﻝ ﻟﺴﻴﺎﺭﺗﻪ ﻭﺭﻛﺐ ﻭﺗﺤﺮﻙ ﺑﺴﺮﻋﻪ ..
***
ﻭﻗﻔﺖ ﺍﻟﺘﺎﻛﺴﻲ ﻗﺪﺍﻡ ﺣﻮﺵ ﺍﻷﻧﺴﺎﻧﻪ ﺍﻟﻮﺣﻴﺪﻩ ﺍﻟﻠﻲ ﻓﻜﺮﺕ ﺗﻤﺸﻴﻠﻬﺎ ﻭﻗﺘﻬﺎ ...
ﻋﻄﺖ ﻟﻠﺴﻮﺍﻕ ﺃﺟﺮﺗﻪ .. ﻭﻧﺰﻟﺖ ... ﻭﺻﻠﺖ ﻓﻲ ﺍﻟﺒﺎﺏ ﻭﻃﻘﺖ ... ﻭﺍﻟﻤﻄﺮ ﺑﺎﺩﻳﻪ ﺗﺼﺐ ... ﺷﻮﻳﻪ ﻭﺍﻧﻔﺘﺢ ﺍﻟﺒﺎﺏ ...
ﺍﻧﺼﺪﻣﺖ ﻋﺎﺋﺸﻪ ﺑﻤﻨﻈﺮﻫﺎ : ﺣﻨﺎﺍﺍﻥ !!... ﺧﺸﻲ ﺑﺴﺮﻋﻪ ﺧﺸﻲ ...
ﺧﺸﺖ ﺣﻨﺎﻥ ﺍﻟﻠﻲ ﺷﺒﻪ ﺍﻧﺒﻠﺖ .. ﻭﺧﺸﺸﺘﻬﺎ ﻋﺎﺋﺸﻪ ﺑﺴﺮﻋﻪ ...
ﺧﺸﻮﺍ ﻟﺪﺍﺧﻞ ﻭﺻﻜﺮﺕ ﻋﺎﺋﺸﻪ ﺍﻟﺒﺎﺏ .. ﻭﺍﺻﻮﺍﺕ ﺍﻟﻤﻄﺮ ﻭﺍﻟﺮﻋﺪ ﺍﻟﺴﺎﺋﺪﻩ ﻓﻲ ﺍﻟﻤﻜﺎﻥ ... ﻗﻌﻤﺰﺕ ﺣﻨﺎﻥ ﺑﺼﻌﻮﺑﻪ ﻉ ﺍﻟﻜﻨﺒﻪ ...
ﻭﻗﻌﻤﺰﺕ ﺣﺪﺍﻫﺎ ﻋﺎﺋﺸﻪ ﻭﻫﻲ ﺗﺸﺒﺢ ﻟﻌﻴﻮﻧﻬﺎ ﺍﻟﻤﻨﻔﻮﺧﺎﺕ ﻣﻦ ﺍﻟﺒﻜﻲ ..
ﻋﺎﺋﺸﻪ ﺑﺨﻮﻑ : ﺣﻨﺎﻥ ﺧﻴﺮﻙ ..
ﺣﻨﺎﻥ ﺷﺒﺤﺘﻠﻬﺎ : ﻧﻀﺎﻝ ...
ﻋﺎﺋﺸﻪ : ﺧﻴﺮﻩ ...
ﺣﻨﺎﻥ ﺑﺘﻮﻫﺎﻥ : ﻗﺎﻟﻲ ﺍﻧﻪ ﻳﺤﺐ ﻭﺣﺪﻩ ﺗﺎﻧﻴﻪ ... ﻭﺣﻴﺘﺰﻭﺟﻬﺎ ..
ﻋﺎﺋﺸﻪ ﺑﺼﺪﻣﻪ : ﺷﻨﻮﻭﻭﻭﻭﻭ
ﺣﻨﺎﻥ : ﻗﺎﻟﻲ ﺣﻨﻄﻠﻘﻚ ﻭﻋﻴﺸﻲ ﺣﻴﺎﺗﻚ .. ﻗﺎﻟﻬﺎ ﻋﺎﺩﻱ ... ﻋﺎﺩﻱ ﺟﺪﺍ
ﻣﻌﻘﻮﻟﻪ .. ﻛﻨﺖ ﻋﻤﻴﺎ ﻟﻬﺎﻟﺪﺭﺟﻪ ﻭﻣﺶ ﺷﺎﻳﻔﻪ ﻛﻴﻒ ﺍﻧﻪ ﺧﻼﺹ ﻣﻌﺎﺵ ﻳﺤﺒﻨﻲ ... ﻧﺰﻟﻮﺍ ﺩﻣﻮﻋﻬﺎ ..
ﻋﺎﺋﺸﻪ ﺑﻌﺪﻡ ﺗﺼﺪﻳﻖ : ﺷﻦ ﺗﺨﺮﻓﻲ ﻳﺎﺣﻨﺎﻥ ..
ﺣﻨﺎﻥ ﺑﻀﺤﻜﻪ ﻣﺘﻬﻜﻤﻪ ﻭﺩﻣﻮﻋﻬﺎ ﺗﻨﺰﻝ : ﻳﺎﺭﻳﺘﻨﻲ ﻧﺨﺮﻑ ﻳﺎﻋﺎﺋﺸﻪ ﻳﺎﺭﻳﺖ ... ﻳﺎﺭﻳﺖ ... ﻭﻗﻌﺪﺕ ﺗﺒﻜﻲ ﺑﻌﺒﺮﺗﻬﺎ .. ﺣﻀﻨﺘﻬﺎ ﻋﺎﺋﺸﻪ ﻭﺗﺒﻜﻲ ﻣﻌﺎﻫﺎ ﻭﻣﺶ ﻣﺼﺪﻗﻪ ﺑﻜﻞ ﺍﻟﻠﻲ ﺻﺎﺭ ... ﺗﺘﺄﻟﻢ ﻛﻞ ﻣﺎﺗﺴﻤﻊ ﻋﺒﺮﺓ ﺣﻨﺎﻥ ﻭﻫﻲ ﺗﺒﻜﻲ ... ﻗﻬﺮﺓ ﻭﺣﺴﺮﺓ ..
ﺑﻌﺪ ﺷﻮﻱ ﻧﺎﺿﺖ ﻭﻗﺎﻟﺖ : ﻣﻌﻠﻴﺸﻲ ... ﻋﺎﺋﺸﻪ .... ﻧﻘﺪﺭ ﻧﺮﻗﺪ .. ﻓﻲ ﺩﺍﺭﻙ ..
ﻋﺎﺋﺸﻪ ﻧﺎﺿﺖ : ﺍﻛﻴﺪ ...
ﻣﺸﺖ ﻫﻲ ﻭﻳﺎﻫﺎ ﻭﺣﻨﺎﻥ ﺟﺜﺘﻬﺎ ﺗﻤﺸﻲ ﺑﺎﻟﺴﻴﻒ ﺩﺧﻠﺘﻬﺎ ﻟﻠﺪﺍﺭ .. ﺧﺸﺖ ﺣﻨﺎﻥ ﻟﻠﺴﺮﻳﺮ .. ﻏﻄﺘﻬﺎ ﻋﺎﺋﺸﻪ ﻭﺑﺎﺳﺖ ﻉ ﺭﺍﺳﻬﺎ ﻭﺩﻣﻮﻋﻬﺎ ﺗﻨﺰﻝ ...
ﻭﺷﺒﺤﺘﻠﻬﺎ ﻛﻴﻒ ﺗﺸﺒﺢ ﻓﻲ ﺍﻟﻔﺮﺍﻍ ﻭﺩﻣﻮﻋﻬﺎ ﻳﻨﺰﻟﻮﺍ ...
ﺧﻠﺘﻬﺎ ﻭﻟﻔﺖ ﻭﻃﻠﻌﺖ ﻣﻦ ﺍﻟﺪﺍﺭ ﻭﻫﻲ ﺗﺸﻮﻓﻠﻬﺎ ﺑﻘﻬﺮﻩ ﻭﺳﻜﺮﺕ ﺍﻟﺒﺎﺏ ...
***
ﺍﻟﺴﺎﻋﻪ 3 ﺑﻌﺪ ﺍﻟﻈﻬﺮ ...
ﻣﻘﻌﻤﺰﺍﺕ ﻳﺘﻐﺪﻭﺍ ﺑﻌﺪ ﻃﻠﺒﻮﺍ ﻣﻦ ﺑﺮﺍ ﻭﺟﺒﺎﺕ ﺳﺮﻳﻌﻪ ..
ﻟﺒﻨﻰ : ﺗﻠﻘﻴﻬﻢ ﺗﻮﺍ ﻋﺎﻳﺸﻴﻦ ﺍﻟﺤﺐ ﻭﺍﻟﺮﻭﻣﺎﻧﺴﻴﻪ ..
ﺭﻫﻒ ﺑﻀﺤﻜﻪ : ﺗﺤﺸﻤﻲ ﻳﺎﻛﻠﺒﻪ ..
ﻟﺒﻨﻰ : ﻫﻬﻬﻬﻬﻬﻬﻬﻬﻬﻪ ... ﻣﺎﻳﻄﻠﻊ ﻣﻨﻪ ﻫﺎﻟﻨﻀﺎﻝ .. ﺩﺍﺭ ﺟﻮ ﻭﺣﺮﻛﺎﺕ ﻭﻓﻄﻮﺭ ﺑﺶ ﻳﺴﻘﺪﻧﺎ ﻭﻳﺨﻄﻔﻬﺎ ..
ﺭﻫﻒ : ﺇﻥ ﺷﺎﺀ ﺍﻟﻠﻪ ﻣﺎﻳﻌﻄﻠﻮﺵ ﻧﺒﻲ ﻧﻌﻄﻴﻬﻢ ﻫﺪﻳﺘﻲ ﻗﺒﻞ ﻟﻨﺮﻗﺪ ..
ﻟﺒﻨﻰ : ﺣﺘﻰ ﺃﻧﻲ .. ﺿﺤﻜﺖ ﻭﻗﺎﻟﺖ ... ﻫﺬﺍ ﺍﺫﺍ ﺭﻭﺣﻮﺍ ﺍﻟﻠﻴﻠﻪ ...
ﺭﻫﻒ : ﻫﻬﻬﻬﻬﻬﻬﻬﻬﻬﻬﻬﻬﻬﻪ ﻣﻌﻔﻨﻪ ..
****
ﺣﻨﺎﻥ ... ﺣﻨﺎﻥ ... ﺣﻨﻮ ..
ﻧﺎﺿﺖ ﺣﻨﺎﻥ ﺷﺒﺤﺖ ﻋﺎﺋﺸﻪ ﻭﺍﻗﻔﻪ ﻓﻮﻕ ﺭﺍﺳﻬﺎ ﻭﻣﺒﺘﺴﻤﻪ : ﺣﺒﻴﺒﺘﻲ ﻧﻮﺿﻲ ﺻﻠﻲ ﺍﻟﻈﻬﺮ ﻓﺎﺕ ﻭﺗﻌﺎﻟﻲ ﺗﻐﺪﻱ ...
ﺣﻨﺎﻥ ﺍﺳﺘﺎﻗﻀﺖ ﺍﻧﻬﺎ ﻣﺎﺻﻠﺘﺶ ﻧﺎﺿﺖ ﻗﻌﻤﺰﺕ ﺣﻄﺖ ﺍﻳﺪﻫﺎ ﻉ ﺭﺍﺳﻬﺎ : ﻋﻨﺪﻙ ﺑﻨﺎﺩﻭﻝ ...
ﻋﺎﺋﺸﻪ : ﺗﻠﻘﻴﻪ ﻓﻲ ﺍﻟﻘﺠﺮ ﺍﻷﻭﻝ ﺧﻞ ﻧﻤﺸﻲ ﻧﺠﻴﺒﻠﻚ ﺍﻣﻴﻪ ﻭﻃﻠﻌﺖ ﻣﻦ ﺣﺪﺍﻫﺎ ..
ﻧﺎﺿﺖ ﺣﻨﺎﻥ ﺑﺼﻌﻮﺑﻪ ﻭﺭﺍﺳﻬﺎ ﺑﻴﺘﻔﺠﺮ ﻓﺘﺤﺖ ﺍﻟﻘﺠﺮ ﺍﻷﻭﻝ ﺍﺩﻭﺭ ﻉ ﺍﻟﺒﻨﺎﺩﻭﻝ .. ﺗﻔﺎﺟﺌﺖ ﺑﻤﻠﻒ ﻃﺒﻲ ﻣﻦ ﻣﺴﺘﺸﻔﻰ ﺍﻟﻘﻠﺐ .. ﻃﻠﻌﺎﺗﻪ ﻭﻗﻌﺪﺕ ﺗﻘﺮﺃ ﻓﻴﻪ ﻭﺍﻧﺼﺪﻣﺖ ﺻﺪﻣﻪ ﻗﻮﻳﻪ ﻫﻠﺒﻪ ﻓﻮﻕ ﺻﺪﻣﺘﻬﺎ ﺍﻟﺼﺒﺢ ...
ﻋﺎﺋﺸﻪ ﻓﻲ ﻫﺎﻟﻮﻗﺖ ﺧﺸﺖ ﺷﺎﻓﺘﻬﺎ ﻃﺎﺣﺖ ﻣﻨﻬﺎ ﺍﻟﻄﺎﺳﻪ ﺗﻜﺴﺮﺕ ...
ﺣﻨﺎﻥ ﻗﺎﻣﺖ ﺭﺍﺳﻬﺎ ﺗﺸﺒﺤﻠﻬﺎ ﺑﺼﺪﻣﻪ ﻭﺩﻣﻮﻋﻬﺎ ﻧﺰﻟﻮﺍ : ﻋﺎﺋﺸﻪ ... ﻫﺬﺍ .. ﺷﻨﻮ !!
..... ﻳﺘﺒﻊ
١٣ / ١٠ / ٢٠٢٠ · Facebook for Android ·
