ﺍﻟﺘﺎﻟﻲ
# ﻣﻮﺳﻢ _ ﺍﻟﺘﻮﻟﻴﺐ
# ﺟﻤﺎﻥ _ ﻓﺮﻳﺪ
# ﺍﻟﺠﺰﺀ 20_
ﻃﻠﻊ ﻣﻦ ﺍﻟﻤﺴﺘﺸﻔﻰ ... ﻣﺘﻮﺟﻪ ﻟﺴﻴﺎﺭﺗﻪ ﺭﻛﺐ .. ﺧﺪﻱ ﺗﻠﻴﻔﻮﻧﻪ ﺩﺍﺭﻩ ﻉ ﺍﻟﻌﺎﻡ ... ﻭﻃﻠﻌﻠﻪ ﺍﻟﺘﺎﺭﻳﺦ ﻉ ﺍﻟﺸﺎﺷﻪ ﺍﺑﺘﺴﻢ .. ﻣﺎﺯﺍﻝ ﻉ ﻋﻴﺪﻣﻴﻼﺩﻫﺎ 3 ﺍﻳﺎﻡ .. ﻣﻦ ﺍﻭﻝ ﻣﺎﺧﺶ ﺍﻟﺸﻬﺮ ﺍﻟﻠﻲ ﻓﻴﻪ ﺫﻛﺮﻯ ﻣﻴﻼﺩﻫﺎ ﻭﻫﻮ ﻳﻔﻜﺮ ﺷﻦ ﻳﻬﺪﻳﻬﺎ ... ﺣﻂ ﺗﻠﻴﻔﻮﻧﻪ ﻭﻭﻟﻊ ﺍﻟﺴﻴﺎﺭﻩ ﻭﺗﺤﺮﻙ ..
***
ﻋﻴﺪ ﻣﻴﻼﺩ ﺭﻫﻒ !
ﻟﺒﻨﻰ : ﺍﻳﻪ .. ﻣﺶ ﻋﺎﺭﻓﻪ ﻛﻴﻒ ﻧﺪﻳﺮﻭﺍ ﻫﺎﻟﻤﺮﻩ ﺍﻟﻮﺿﻊ ﻏﻴﺮ .. ﺭﻫﻒ ﺑﺎﻟﺬﺍﺕ ﻋﻴﺪ ﻣﻴﻼﺩﻫﺎ ﻣﻬﻢ ﻋﻨﺪ ﺑﺎﺑﺎ ﻭﻣﺎﻣﺎ ﻫﻠﺒﻪ ..
ﻣﻬﺎ : ﺑﺎﻫﻲ .. ﻭﻳﻦ ﺍﻟﻤﺸﻜﻠﻪ ﺩﻳﺮﻭﻩ ﻭﺑﻮﻙ ﻳﺠﻴﻜﻢ ﻫﻜﻲ ﻭﻻﻫﻜﻲ ..
ﻟﺒﻨﻰ : ﺍﺧﺮﻣﺮﻩ ﺻﺎﺭ ﺑﻴﻦ ﻣﺎﻣﺎ ﻭﺑﺎﺑﺎ ﻣﺸﻜﻠﻪ ﺳﻤﻌﻨﺎ ﺻﻮﺍﺗﻬﻢ ﻋﺎﻟﻴﻪ ﻭﻫﻤﺎ ﻳﺘﻨﺎﻗﺸﻮﺍ .. ﺧﺎﻳﻔﻪ ﺑﺎﺑﺎ ﻣﺎﻳﺠﻴﺶ ..
ﻣﻬﺎ : ﻣﺴﺘﺤﻴﻞ ﺣﻴﺠﻲ ﻉ ﺧﺎﻃﺮ ﺭﻫﻒ ..
ﻟﺒﻨﻰ : ﺇﻥ ﺷﺎﺀ ﺍﻟﻠﻪ ...
ﻣﻬﺎ : ﺍﻟﻤﻬﻢ ﺗﻮﺍ ﻏﺪﻭﺓ ﻻﺯﻡ ﺗﺠﻮﺍ ﺍﻧﺘﻢ ﻭﺧﺎﻟﺘﻲ ﺣﻨﺎﻥ ..
ﻟﺒﻨﻰ : ﺍﻭﻛﻲ ﺗﻮ ﻧﻘﻮﻝ ﻟﻤﺎﻣﺎ ...
ﻣﻬﺎ : ﺗﺠﻮﺍ ﻳﻌﻨﻲ ﺗﺠﻮﺍ ﻭﻭﺍﻟﻠﻪ ﺣﻨﺰﻋﻞ .. ﺍﺳﺎﺳﺎ ﺍﻧﻲ ﺣﻨﻜﻠﻢ ﺧﺎﻟﺘﻲ ﺣﻨﺎﻥ ﺑﺮﻭﺣﻲ ..
ﻟﺒﻨﻰ ﺑﻀﺤﻜﻪ : ﺑﺎﻫﻲ ﻛﻠﻤﻴﻬﺎ ..
ﻣﻬﺎ ﺑﻀﺤﻜﻪ : ﺍﻳﻪ ﺍﺣﻜﻴﻠﻲ ﺷﻦ ﺩﺭﺗﻮﺍ ﻓﻲ ﺳﻔﺮﺗﻜﻢ ..
ﻭﺑﺪﺕ ﻟﺒﻨﻰ ﺗﻬﺪﺭﺯ ﻫﻲ ﻣﻬﺎ ﻉ ﺍﻟﺘﻠﻔﻮﻥ ﻋﺎﻻﺣﺪﺍﺙ ﺍﻟﻠﻲ ﺻﺎﺭﺕ ﻓﺴﻔﺮﺗﻬﻢ ﺑﺲ ﻗﺼﺖ ﺟﺰﺀ ﺑﺪﺭ ...
***
ﺑﻌﺪ ﺍﻟﻈﻬﺮ ...
ﻃﺎﻟﻊ ﻣﻦ ﻣﻜﺘﺒﻪ ﻣﺘﻮﺟﻪ ﻟﻤﻜﺘﺐ ﺻﺪﻳﻘﻪ ﻭﻗﻒ ﻓﻲ ﺍﻟﺒﺎﺏ ..
ﻧﻀﺎﻝ : ﻭﺍﺋﻞ ﺗﺘﻐﺪﺍ ..
ﻭﺍﺋﻞ ﺑﻤﺰﺡ : ﻛﺎﻥ ﻉ ﺣﺴﺎﺑﻚ ﻣﺎﻋﻨﺪﻳﺶ ﻣﺸﻜﻠﻪ ..
ﻧﻀﺎﻝ : ﺑﺎﻫﻲ ﻏﻴﺮ ﻧﻮﺽ ..
ﻭﺍﺋﻞ ﺣﺲ ﺇﻥ ﻓﻲ ﺷﻲ : ﺗﻤﺎﻡ .. ﺧﺪﻱ ﺗﻠﻴﻔﻮﻧﻪ ﻭﻣﻔﺎﺗﻴﺤﻪ ﻭﻃﻠﻊ ﻭﺭﺍﻩ ..
ﻃﻠﻌﻮﺍ ﻫﻤﺎ ﺍﻟﺰﻭﺯ ﻭﻣﺸﻮﺍ ﻟﻤﻄﻌﻢ ﻗﺮﻳﺐ ﻣﻦ ﻣﻘﺮ ﺍﻟﻌﻤﻞ .. ﻧﻀﺎﻝ ﻛﻞ ﻭﻗﺘﻪ ﺳﺎﺭﺡ ﻭﻭﺍﺋﻞ ﻣﺮﻛﺰ ﻋﻠﻴﻪ ..
ﻭﺍﺋﻞ : ﻣﺎﺗﻘﻮﻟﺶ ﺍﻟﻠﻲ ﻓﺒﺎﻟﻲ ﺻﺎﺭ ..
ﻧﻀﺎﻝ ﺷﺒﺤﻠﻪ : ﺷﻨﻮ ﺍﻟﻠﻲ ﻓﺒﺎﻟﻚ ..
ﻭﺍﺋﻞ : ﺍﺳﺘﺎﻗﻀﺖ ﻟﻨﻔﺴﻚ .. ﺑﺎﺱ ﺑﻌﺪ ﻓﺎﺕ ﺍﻟﻔﻮﺕ ..
ﻧﻀﺎﻝ ﻗﺪﻡ ﻭﺣﻂ ﺍﻳﺪﻳﻪ ﻉ ﺍﻟﻄﺎﻭﻟﻪ ﻭﻗﺎﻝ : ﺑﺎﻩ ﻣﺶ ﺍﻧﺖ ﺻﺎﺣﺒﻲ ﻣﺶ ﻣﻔﺮﻭﺽ ﺍﻧﺖ ﺍﻟﻠﻲ ﺗﻨﺒﻬﻨﻲ .. ﺗﻮﻋﻴﻨﻲ ﺗﻮﺭﻳﻨﻲ ..
ﻭﺍﺋﻞ : ﻧﻀﺎﻝ ﺍﻧﺖ ﻣﺎﺯﺍﻟﻚ ﺷﻬﺮ ﻭﺗﺨﺶ 50 ﺗﺒﻲ ﻣﻦ ﻳﻮﻋﻴﻚ؟ﺧﻴﺮﻙ ﻫﻜﻲ ﻣﻮﻟﻲ ﻣﻠﺨﺒﻂ ﻭﻣﺶ ﻋﺎﺭﻑ ﺭﻭﺣﻚ ﺷﻦ ﺗﺒﻲ؟ !!
ﻧﻀﺎﻝ ﻭﺧﺮ ﺍﻟﻜﺮﺳﻲ ﻭﻫﻮ ﻣﻀﺎﻳﻖ ﻉ ﺍﻵﺧﺮ : ﺭﺍﺣﺖ ﻣﻨﻲ ﺧﻼﺹ .. ﺣﺴﻴﺖ ﺭﻭﺣﻲ ﺯﻱ ﺍﻟﻠﻲ ﻛﺎﻥ ﺣﺎﻳﺰ ﻋﻨﺪﻩ ﺣﺠﺮ ﻛﺮﻳﻢ ﺷﺎﻓﻪ ﺣﺼﻮﺓ ﻭﻟﻮﺣﻪ ﻉ ﻃﻮﻝ ﺍﻳﺪﻩ ...
ﻭﺍﺋﻞ ﺑﻀﺤﻜﻪ ﻣﺘﻬﻜﻤﻪ : ﻣﺎﻩ ﺍﻧﻲ ﻗﺘﻠﻚ ﻗﺒﻞ ﻣﺮﺗﻚ ﻣﺎﻓﻴﺶ ﻣﻨﻬﺎ .. ﺑﺲ ﺍﻧﺖ ﺑﻄﺮﺕ ﻉ ﻧﻌﻤﺔ ﺭﺑﻚ ... ﻭﻗﻌﺪﺕ ﺗﺘﻜﻠﻢ ﻓﻲ ﺣﺎﺟﺎﺕ ﻓﺎﺭﻏﻪ .. ﻧﻘﻮﻟﻚ ﻋﻼﺵ .. ﻷﻧﻚ ﺍﻧﺴﺎﻥ ﻣﻠﻮﻝ ﻣﻠﻴﺖ ﻣﻦ ﺣﻴﺎﺗﻚ ﻣﻊ ﺣﻨﺎﻥ ﻣﺶ ﻷﻧﻬﺎ ﻣﻤﻠﻪ ﺑﺲ ﻷﻧﻚ ﻃﻠﻌﺖ ﻭﺷﻔﺖ ﻭﺧﺎﻟﻄﺖ ﺍﺷﻜﺎﻝ ﻭﺃﻟﻮﺍﻥ ﺧﻼﺗﻚ ﺗﺸﻮﻑ ﻟﺤﻨﺎﻥ ﻉ ﺍﻧﻬﺎ ﻋﺎﺩﻳﻪ ﺟﺪﺍ ... ﻣﺎﻓﻴﻬﺎ ﺷﻲ ﻣﻤﻴﺰ .. ﺣﻄﻴﺖ ﺣﺠﺞ ﻣﺎﻟﻬﺎﺵ ﻣﻌﻨﻰ ﺑﺶ ﺗﺒﺮﺭ ﻟﻨﻔﺴﻚ ﺍﻟﻠﻲ ﺑﺪﻳﺮﻩ ... ﻳﺎﺭﺍ ﻋﺠﺒﺎﺗﻚ .. ﺑﺲ ﻛﺎﻥ ﺍﻋﺠﺎﺑﻚ ﺑﻴﻬﺎ ﺯﻱ ﺍﻋﺠﺎﺑﻚ ﺑﻬﻠﺒﻪ ﺧﺎﻟﻄﺘﻬﻢ ﻭﻋﺮﻓﺘﻬﻢ .. ﺑﺲ ﻳﺎﺭﺍ ﻓﺮﻗﺖ ﻣﻌﺎﻙ .. ﺍﻭﻻ ﺍﻧﻬﺎ ﻟﻴﺒﻴﻪ ﺗﺎﻧﻴﺎ ﻗﺮﻳﺒﻪ ﻋﻠﻴﻚ ﻓﻲ ﺍﻟﻌﻤﺮ ﻭﺍﺧﻴﺮﺍ ﻓﻴﻬﺎ ﺻﻮﺭﺓ ﻟﺸﻜﻞ ﺍﻟﻤﺮﺍﺓ ﺍﻟﻐﺮﺑﻴﻪ ﺍﻟﻠﻲ ﺑﻬﺮﻙ ﻫﻠﺒﻪ ...
ﻧﻀﺎﻝ : ﺑﺎﻩ ﻣﺎﺩﺍﻡ ﻫﺬﺍ ﻛﻠﻪ ﻛﻨﺖ ﺷﺎﻳﻔﻪ ﻋﻼﺵ ﻣﺎﻗﻠﺘﺎﺵ ..
ﻭﺍﺋﻞ : ﻷﻧﻚ ﻣﺶ ﺣﺘﺴﻤﻊ ﻻﻧﻚ ﻣﻨﻘﺎﺩ ﻭﺭﺍ ﺭﻏﺒﺘﻚ ﻭﺯﺍﻳﺪ ﻧﺎﻗﺺ ﺗﺒﻲ ﺍﺩﻳﺮ ﺍﻟﻠﻲ ﻓﺮﺍﺳﻚ ﺍﻱ ﻛﻼﻡ ﻧﻘﻮﻟﻬﻮﻟﻚ ﻭﻗﺘﻬﺎ ﻣﺶ ﺣﻴﻨﻔﻊ ..
ﻧﻀﺎﻝ ﺳﻜﺖ ..
ﻭﺍﺋﻞ : ﺧﻼﺹ ﺳﻠﻢ ﻟﻸﻣﺮ ﺍﻟﻮﺍﻗﻊ ﺣﻨﺎﻥ ﻣﺶ ﻣﻤﻜﻦ ﺗﺮﺟﻌﻠﻚ ﻭﻻﺗﺮﺟﻌﻠﻬﺎ ..
ﻧﻀﺎﻝ ﺷﺒﺤﻠﻪ ﺑﻌﺪﻳﻦ ﺗﻨﻬﺪ ﻭﺳﻜﺖ ... ﻭﻫﻮ ﻣﺶ ﻣﻘﺘﻨﻊ ﻭﻻﻗﺎﺑﻞ ﻳﺴﻠﻢ ...
***
ﻓﺎﺕ ﺑﺎﻗﻲ ﺍﻟﻴﻮﻡ ﻋﺎﺩﻱ ..
ﻓﻲ ﺍﻟﻠﻴﻞ ..
ﺣﻨﺎﻥ : ﻏﺪﻱ ﻭﻻﻋﺸﻲ .. ﺷﻦ ﻧﻈﺎﻣﻬﻢ ﻳﻌﻨﻲ ...
ﻟﺒﻨﻰ : ﻗﺎﻟﺘﻠﻲ ﻋﺰﻭﻣﺔ ﻋﺸﻲ ﺑﺲ ﻃﺒﻌﺎ ﻣﺎﻣﺎ ﻣﺶ ﺗﻘﻠﻴﺪﻳﻪ ..
ﺣﻨﺎﻥ : ﻛﻴﻒ ﻳﻌﻨﻲ ﻣﺨﺘﻠﻄﻪ ..
ﻟﺒﻨﻰ : ﺍﻳﻪ ..
ﺣﻨﺎﻥ : ﻫﻲ ﻛﻠﻤﺘﻨﻲ ﻭﺍﻧﻲ ﻗﻠﺖ ﺗﻮﻧﺸﻮﻑ .. ﺍﻟﺤﻖ ﺍﻧﻲ ﻣﺶ ﻣﺤﺒﺬﻩ ﺍﻟﻤﺸﻴﻪ ﻏﺎﺩﻱ ..
ﻟﺒﻨﻰ : ﻭﺧﻴﺮﻫﺎ ﻫﻲ ﺗﺠﻴﻨﺎ ..
ﺣﻨﺎﻥ : ﺍﻳﻪ ﺍﻧﺘﻢ ﺗﻤﺸﻮﺍ ﺑﺲ ﺍﻧﻲ ﻧﺤﺲ ﻓﻴﻬﺎ ﻣﺶ ﺣﻠﻮﺓ ..
ﻟﺒﻨﻰ : ﻭﻳﻦ ﺍﻟﻤﺸﻜﻠﻪ ﻣﺎﻣﺎ ﻋﺎﺩﻱ ..
ﺣﻨﺎﻥ ﻣﻄﺖ ﺷﻮﺍﺭﺑﻬﺎ ﻭﻗﻌﺪﺕ ﺗﺘﻔﺮﺝ ﻉ ﺍﻟﺘﻠﻔﺰﻳﻮﻥ ..
ﺍﻣﺎ ﺭﻫﻒ ﻓﻜﻴﻒ ﻓﺘﺤﺖ ﺍﻟﻨﺖ ... ﻟﻘﺖ ﺭﺳﺎﻳﻞ ﻉ ﺍﻟﻔﺎﻳﺒﺮ .. ﺧﺸﺖ ..
ﻟﻘﺖ ﺍﺳﻨﺎﻡ ﻳﻬﺪﺭﺯ ﻣﻊ ﻟﺆﻱ ﻓﺮﺣﺖ ﻫﻠﺒﻪ ﻟﻴﻪ ﻭﻗﺖ ﻃﻮﻳﻞ ﻣﺎﺧﺸﺶ ..
ﺭﻫﻒ ( ﺍﻟﺴﻼﻡ ﻋﻠﻴﻜﻢ )
ﺍﺳﻨﺎﻡ ﻗﺮﻳﺐ ﻃﺎﺭ ﻣﻦ ﺍﻟﻔﺮﺣﻪ ﻟﻤﺎ ﺷﺎﻑ ﺭﺳﺎﻟﺘﻬﺎ ﻟﻴﻪ ﻣﺪﻩ ﻣﺎﻓﺘﺤﺶ ﻭﺃﻭﻝ ﻣﺎﻳﻔﺘﺢ ﻳﻠﻘﺎﻫﺎ .. ﺍﺣﺘﺎﺭ ﻳﺮﺩ ﻭﻻ ﻻ ﻭﻓﻲ ﺍﻷﺧﻴﺮ ﻗﺎﻝ ﻓﻰ ﻧﻔﺴﻪ " ﺍﻟﺴﻼﻡ ﻟﻠﻪ "
ﺍﺳﻨﺎﻡ ( ﻭﻋﻠﻴﻜﻢ ﺍﻟﺴﻼﻡ )
ﻫﻲ ﺍﺑﺘﺴﻤﺖ ﻻﺇﺭﺍﺩﻳﺎ ...
ﻟﺆﻱ ( ﺍﻭﻭﻭﻭﻭ ... ﻭﻋﻠﻴﻜﻢ ﺍﻟﺴﻼﻡ ﺭﻫﻮﻓﻪ ﺣﻤﺪ ﻟﻠﻪ ﻉ ﺍﻟﺴﻼﻣﻪ )
ﺭﻫﻒ ( ﺍﻟﻠﻪ ﻳﺴﻠﻤﻚ ﻟﺆﻱ ﺷﻦ ﺍﺧﺒﺎﺭﻙ )
ﻟﺆﻱ ( ﻣﺎﺷﻴﻪ ﺍﻟﺤﻤﺪ ﻟﻠﻪ .. ﺷﻦ ﺟﻮ ﺍﻟﻬﺪﻳﻪ .. ﺍﺍﺍﻩ ﻗﺼﺪﻱ ﺍﻟﺴﻔﺮﻩ )
ﺭﻫﻒ ( ﺣﻠﻮﺓ ﺍﻟﺴﻔﺮﺓ ﺍﺍﺍﻩ ﻗﺼﺪﻱ ﺍﻟﻬﺪﻳﻪ (
ﺗﻘﻮﻯ ( ﻭﺍﻧﻲ )
ﻟﺆﻱ ( ﺑﺴﻢ ﺍﻟﻠﻪ ﺍﻟﻌﻈﻴﻢ )
ﺭﻫﻒ ( )
ﺍﺳﻨﺎﻡ ( )
ﺭﻫﻒ " ﻟﻤﺎ ﻧﺒﻌﺖ ﺍﻧﻲ ﻣﺎﻳﺮﺩﺵ "
ﺗﻘﻮﻯ ( ﻗﻮﻟﻴﻠﻲ ﺭﻫﻮﻓﺘﻲ ﺷﻦ ﺟﺒﺘﻴﻠﻲ )
ﺭﻫﻒ ( ﻧﺘﻼﻗﻮﺍ ﻏﺪﻭﻩ ﻭﻧﻮﺭﻳﻬﺎﻟﻚ ﺇﻥ ﺷﺎﺀ ﺍﻟﻠﻪ )
ﻟﺆﻱ ( ﺍﺑﻌﺘﻴﻠﻲ ﻣﻌﺎﻫﺎ ﻫﺪﻳﺘﻲ )
ﺭﻫﻒ ( ﺣﺎﺿﺮ ﺍﺻﻼ ﻛﻠﻜﻢ ﻣﺤﺴﻮﺑﻴﻦ )
ﺍﺳﻨﺎﻡ ﺍﺑﺘﺴﻢ ..
ﺭﻫﻒ " ﻣﺎﻳﺒﻴﺶ ﻳﺘﻜﻠﻢ .. ﺑﺎﻩ ﺍﻧﻲ ﺗﻮ ﻧﺒﺪﺍ ﺑﺎﻟﺼﻠﺢ "
ﺭﻫﻒ ( ﻭﻳﻨﻚ ﺍﺳﻨﺎﻡ )
ﺍﺳﻨﺎﻡ " ﻳﺎﺭﻭﺡ ﺭﻭﺣﻪ ﺍﻧﺘﻲ .. ﻭﻳﻨﻲ ﺍﻧﻲ ﺩﻳﻤﺎ ﻣﻌﺎﻙ "
ﺍﺳﻨﺎﻡ ( ﺍﻫﻼ ﻛﻴﻒ ﺣﺎﻟﻚ )
ﺭﻫﻒ ﺍﺿﺎﻳﻘﺖ " ﺧﻴﺮﻩ ﺷﻦ ﺩﺭﺗﻠﻪ ﺑﺲ ! ؟ "
ﺭﻫﻒ ( ﺍﻟﺤﻤﺪ ﻟﻠﻪ .. ﻣﺒﺎﺭﻙ ﺍﻟﺨﻄﻮﺑﻪ .. )
ﺍﺳﻨﺎﻡ ( ﺍﻟﻠﻪ ﻳﺒﺎﺭﻙ ﻓﻴﻚ ﻋﻘﺒﺎﻟﻚ )
ﺭﻫﻒ ﻋﻴﻮﻧﻬﺎ ﺗﻌﺒﻮﺍ ﺩﻣﻮﻉ " ﻣﻌﻨﺎﻫﺎ ﺣﻖ !! ؟ "
ﻟﺆﻱ ﻭﺗﻘﻮﻯ ﻉ ﺍﻟﺨﺎﺹ ..
ﻟﺆﻱ ( ﻫﺬﺍ ﺧﻴﺮﻩ ﻋﻤﻪ )
ﺗﻘﻮﻯ ( ﻣﺶ ﻋﺎﺭﻓﻪ ﻛﻴﻒ ﻳﻔﻜﺮ )
ﻓﻲ ﺍﻟﻘﺮﻭﺏ ..
ﺭﻫﻒ ( ﺗﺼﺒﺤﻮﺍ ﻉ ﺧﻴﺮ ) .. ﻭﺻﻜﺮﺕ ﻭﻧﺎﺿﺖ ﻣﻦ ﺣﺪﺍ ﺍﻣﻬﺎ ﻭﺍﺧﺘﻬﺎ ..
ﺣﻨﺎﻥ ﺗﺸﺒﺢ ﻓﻴﻬﺎ ﻛﻴﻒ ﺗﺮﻛﺐ : ﻣﺶ ﻋﺎﺟﺒﺘﻨﻲ ﺭﻫﻒ ﺑﻜﻞ ..
ﻟﺒﻨﻰ : ﻣﺎﺗﺨﻤﻤﻴﺶ ﻳﺎﻣﺎﻣﺎ ﻣﺎﻓﻲ ﺷﻲ ﻣﻬﻢ ..
ﺣﻨﺎﻥ : ﻳﻌﻨﻲ ﺍﻧﺘﻲ ﺗﻌﺮﻓﻲ ..
ﻟﺒﻨﻰ ﺷﺒﺤﺘﻠﻬﺎ ﻭﻗﻌﺪﺕ ﺳﺎﻛﺘﻪ ..
ﺣﻨﺎﻥ : ﺗﻤﺎﻡ .. ﺍﻭﻛﻲ .. ﻣﺶ ﺣﻨﺼﺮ ﺑﺎﻟﺴﺆﺍﻝ .. ﻟﻜﻦ ﻟﻮ ﺯﺍﺩ ﺍﻟﻮﺿﻊ ﻋﻦ ﺣﺪﻩ ﺣﻨﻌﺮﻑ ... ﻭﺣﺘﻘﻮﻟﻮﺍ ... ﻭﻟﺖ ﺗﺘﻔﺮﺝ ﻉ ﺍﻟﺘﻠﻔﺰﻳﻮﻥ ...
ﺭﻥ ﺗﻠﻴﻔﻮﻧﻬﺎ ﻛﺎﻥ ﺃﺳﺎﻣﻪ ﺧﺎﻓﺖ ﻟﻴﻜﻮﻥ ﻣﺤﻤﺪ ﺻﺎﺭﺗﻠﻪ ﺣﺎﺟﻪ .. ﺭﺩﺕ ﻃﻮﻝ ..
ﺣﻨﺎﻥ ﺑﺨﻮﻑ : ﺍﻟﻮﻭﻭ
ﺍﺳﺎﻣﻪ ﺍﺑﺘﺴﻢ : ﺍﻟﺴﻼﻡ ﻋﻠﻴﻜﻢ ..
ﺣﻨﺎﻥ : ﻭﻋﻠﻴﻜﻢ ﺍﻟﺴﻼﻡ .. ﺷﻦ ﻓﻲ؟ !
ﺍﺳﺎﻣﻪ ﺑﻀﺤﻜﻪ : ﺧﻴﺮﻙ ﻣﺤﻤﺪ ﻛﻮﻳﺲ ﻣﺎﻓﻴﻪ ﺷﻲ ..
ﺣﻨﺎﻥ : ﺍﻛﻴﺪ؟ !
ﺍﺳﺎﻣﻪ : ﻭﺍﻟﻠﻪ ﻣﺎﻓﻴﻪ ﺣﺎﺟﻪ ..
ﺣﻨﺎﻥ : ﺍﻟﺤﻤﺪ ﻟﻠﻪ .. ﻣﺎﻻ ﺧﻴﺮﻙ ﻣﺘﺼﻞ ..
ﺍﺳﺎﻣﻪ ﺍﺑﺘﺴﻢ : ﻋﺎﺭﻑ ﺭﻭﺣﻲ ﺍﺗﺼﻠﺖ ﻓﻮﻗﺖ ﻣﺘﺄﺧﺮ ﺑﺲ ﻣﻀﻄﺮ ... ﺍﻣﻲ ﻭﺍﺧﺘﻲ ﺷﺪﻭﺍ ﻓﻴﺎ ﻧﻌﺰﻣﻚ ﻏﺪﻭﺓ ﻉ ﺍﻟﻌﺸﻲ ..
ﺣﻨﺎﻥ ﺷﺒﺤﺖ ﻟﻠﺒﻨﻰ : ﻏﺪﻭﺓ ؟ !
ﺃﺳﺎﻣﻪ : ﺍﻳﻪ ..
ﺣﻨﺎﻥ ﻟﻘﺖ ﺍﻥ ﻣﻦ ﺍﻷﻧﺴﺐ ﺗﻤﺸﻲ ﻟﻌﺰﻭﻣﺔ ﺍﻫﻞ ﺍﺳﺎﻣﻪ ﺍﻭﻝ ﺷﻲ ﺿﻴﻮﻑ ﻉ ﺍﻟﺒﻼﺩ ﻣﻔﺮﻭﺽ ﻫﻲ ﺗﻌﺰﻣﻬﻢ ﻣﺶ ﻫﻤﺎ ﻭﺣﺴﺖ ﺑﺎﻹﺣﺮﺍﺝ : ﺑﺮﻏﻢ ﺍﻥ ﻣﻔﺮﻭﺽ ﺍﻟﻌﺰﻭﻣﻪ ﺗﺠﻲ ﻣﻨﻲ ﺍﻧﻲ ﻣﺶ ﻣﻨﻬﻢ ﻫﻤﺎ ..
ﺍﺳﺎﻣﻪ : ﻫﻤﺎ ﺩﺍﺭﻭﻫﺎ ﻣﻦ ﺑﺎﺏ ﺍﻟﺸﻜﺮ ﻟﻴﻚ ﺍﻧﻚ ﺍﻫﺘﻤﻴﺘﻲ ﺑﺤﻔﻴﺪﻫﻢ .. ﺳﻜﺖ ﺷﻮﻳﻪ ﻭﻗﺎﻝ .. ﻭﻭﻟﺪﻫﻢ ..
ﺣﻨﺎﻥ ﺍﺑﺘﺴﻤﺖ : ﻫﺬﺍ ﻭﺍﺟﺒﻲ ﻣﺤﻤﺪ ﻧﻌﺘﺒﺮ ﻓﻴﻪ ﻭﻟﺪ ﺧﻮﻱ ﻭﻭﻟﺪ ﺍﺧﺘﻲ ﻓﻲ ﻧﻔﺲ ﺍﻟﻮﻗﺖ ﻭﻣﺎﻓﻴﺶ ﺟﻤﻴﻞ ﺑﻴﻦ ﺍﻷﻫﻞ ..
ﺃﺳﺎﻣﻪ ﺍﺑﺘﺴﻢ ﺑﻀﻴﻖ : ﺍﻟﻤﻬﻢ ﻏﺪﻭﺓ ﺑﺘﺠﻲ ﻭﻻﻻ؟
ﺣﻨﺎﻥ : ﺑﺈﺫﻥ ﺍﻟﻠﻪ ﺟﺎﻳﻪ ﻣﺶ ﺣﻨﺮﻓﺾ ﻋﺰﻭﻣﻪ ﺍﻫﻞ ﺍﻟﺸﺎﻡ ..
ﺍﺳﺎﻣﻪ : ﻫﻬﻬﻬﻬﻬﻬﻪ .. ﺑﺎﻫﻲ ﻛﻮﻳﺲ .. ﻓﻲ ﺍﻧﺘﻈﺎﺭﻙ ..
ﺣﻨﺎﻥ : ﺇﻥ ﺷﺎﺀ ﺍﻟﻠﻪ ... ﺳﻠﻤﻠﻲ ﻉ ﺍﻻﻫﻞ ﻭﻣﺤﻤﺪ ..
ﺍﺳﺎﻣﻪ ﺍﺑﺘﺴﻢ : ﻳﻮﺻﻞ ﺗﺼﺒﺤﻲ ﻉ ﺧﻴﺮ ..
ﺣﻨﺎﻥ : ﻭﺍﻧﺖ ﻣﻦ ﺍﻫﻠﻪ ... ﺻﻜﺮﺕ ..
ﻟﺒﻨﻰ : ﺷﻨﻮ ﻣﺎﻣﺎ ﻭﻳﻦ ﻣﺎﺷﻴﻪ ﻏﺪﻭﺓ ..
ﺣﻨﺎﻥ : ﺍﻫﻞ ﻋﻤﻚ ﺍﺳﺎﻣﻪ ﻋﺰﻣﻮﻧﻲ ﻉ ﺍﻟﻌﺸﻲ .. ﻣﺎﻗﺪﺭﺗﺶ ﻧﺮﺩﻫﻢ ..
ﻟﺒﻨﻰ : ﻭﻣﻬﺎ؟
ﺣﻨﺎﻥ : ﺍﻧﻲ ﻣﺎﻋﻄﻴﺘﻬﺎﺵ ﻛﻠﻤﻪ ﺍﻛﻴﺪﻩ .. ﻣﺎ ﻧﺒﻴﺶ ﻧﻜﺴﺮ ﺑﺨﺎﻃﺮﻫﺎ ﺑﺲ .. ﺍﻭﻻ ﻳﺎﺑﻨﺘﻲ ﻣﺸﻴﺘﻲ ﻏﺎﺩﻱ ﺭﺯﻳﻨﻪ ﻣﺎﻓﻴﺶ ﺻﻔﻪ ﻧﻤﺸﻲ ﺑﻴﻬﺎ ﻏﺎﺩﻱ ﻻﺍﻧﻲ ﻋﻤﺘﻬﺎ ﻭﻻﺧﺎﻟﺘﻬﺎ .. ﻭﺗﺎﻧﻴﺎ ﺍﻫﻞ ﻋﻤﻚ ﺍﺳﺎﻣﻪ ﺟﺎﻳﻴﻦ ﻣﻦ ﺑﺮﺍ ﻭﺟﻴﻪ ﺑﻌﺪ ﻭﻳﻴﻦ ﺗﺤﺸﻤﺖ ﻧﺮﺩﻫﻢ ....
ﻟﺒﻨﻰ : ﺍﻣﻤﻢ .. ﻛﻼﻣﻚ ﻣﻘﻨﻊ ...
ﺣﻨﺎﻥ ﺍﺑﺘﺴﻤﺖ : ﺍﻋﺘﺬﺭﻭﻟﻲ ﻣﻨﻬﺎ ..
ﻟﺒﻨﻰ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ..
***
ﺗﺎﻧﻲ ﻳﻮﻡ ..
ﻛﻠﻪ ﺷﻲ ﻭﺍﺗﻲ ..
: ﺍﻳﻪ ﻛﻞ ﺷﻲ ﺯﻱ ﻣﺎﺗﺒﻲ ..
ﻣﻌﺎﻭﻳﻪ : ﻛﻮﻳﺲ ... ﺑﺮﺍ ﺗﻮﺍ ...
ﻃﻠﻊ ﺍﻟﺮﺍﺟﻞ ﻭﺧﺸﺖ ﻣﻬﺎ ...
ﻣﻬﺎ : ﺻﺒﺎﺡ ﺍﻟﺨﻴﺮ ﺑﺎﺑﺎ .
ﻣﻌﺎﻭﻳﻪ ﺑﺄﺑﺘﺴﺎﻣﻪ : ﺻﺒﺎﺡ ﺍﻟﺨﻴﺮ ..
ﻣﻬﺎ : ﺍﻟﺪﻧﻴﺎ ﻣﻘﻠﻮﺑﻪ ﺑﺮﺍ ..
ﻣﻌﺎﻭﻳﻪ : ﺣﺘﻰ ﻫﻲ ﺑﻨﺘﻰ ﺍﻟﻠﻲ ﺭﻭﺣﺖ ﻣﻦ ﺍﻟﻌﻤﺮﻩ ...
ﻣﻬﺎ ﺑﻀﺤﻜﻪ : ﻳﺴﻠﻤﻠﻲ ﺍﻹﻣﺒﺮﺍﻃﻮﺭ ..
ﻣﻌﺎﻭﻳﻪ ﺿﺤﻚ : ﺍﻳﻪ ﻗﻮﻟﻴﻠﻲ ﻣﻦ ﺑﻴﺠﻲ ..
ﻣﻬﺎ : ﺯﻣﻴﻼﺗﻲ ﻛﻠﻤﻮﻧﻲ ﻭﻗﺎﻟﻮﺍ ﺑﻴﺠﻮﺍ ﻭﺍﺑﻼﺕ ﻣﻌﺎﻫﻢ ..
ﻣﻌﺎﻭﻳﻪ ﺣﻚ ﺣﺎﺟﺒﻪ : ﺍﺣﻤﻢ .. ﻭﻣﻦ ﺗﺎﻧﻲ ..
ﻣﻬﺎ ﺑﺈﺳﺘﻌﺒﺎﻁ : ﺍﻳﻪ ﻳﻌﻨﻲ ﻣﻦ ﻋﻨﺪﻱ ﺗﺎﻧﻲ ...
ﻣﻌﺎﻭﻳﻪ ﻫﺰ ﺭﺍﺳﻪ ﺑﺈﻳﺠﺎﺏ : ﺗﻤﺎﻡ ..
ﻣﻬﺎ ﻟﻔﺖ ﻭﺑﺘﻄﻠﻊ ﻭﻫﻲ ﺷﺎﺩﻩ ﺿﺤﻜﺘﻬﺎ ﺑﻌﺪﻳﻦ ﺍﻟﺘﻔﺘﺖ ﻭﻗﺎﻟﺖ : ﺍﺍﺍﻩ ﺍﻳﻪ ﻭﻟﺒﻨﻰ ﺻﺎﺣﺒﺘﻲ ﻭﺍﺧﺘﻬﺎ ..
ﻣﻌﺎﻭﻳﻪ ﺗﻠﻘﺎﺋﻴﺎ : ﻭﺍﻣﻬﺎ؟
ﻣﻬﺎ ﺭﻓﻌﺖ ﺣﻮﺍﺟﺒﻬﺎ ﻭﻫﻲ ﺗﺒﺘﺴﻢ ...
ﻣﻌﺎﻭﻳﻪ ﺑﺮﺑﻜﻪ؛ ﻳﻌﻨﻲ .. ﺍﻣﻬﻢ ﺣﺘﺠﻲ ﻣﻌﺎﻫﻢ ﻭﻻ ..
ﻣﻬﺎ ﺿﺤﻜﺖ ﻭﻫﺰﺕ ﺭﺍﺳﻬﺎ ﺑﺈﻳﺠﺎﺏ ..
ﻣﻌﺎﻭﻳﻪ ﻓﺮﺡ ﺑﺲ ﺍﻇﺎﻫﺮ ﺑﺎﻟﺒﺮﻭﺩ ...
ﻣﻬﺎ ﻟﻔﺖ ﻭﻃﻠﻌﺖ ﺑﻌﺪ ﺷﺎﻓﺖ ﺑﻮﻫﺎ ﻛﻴﻒ ﻳﻬﺮﺏ ﻣﻦ ﻧﻈﺮﺍﺗﻬﺎ .. ﻫﻲ ﺣﺎﺳﻪ ﺍﻥ ﺍﻟﺘﻐﻴﻴﺮ ﺍﻟﻠﻲ ﺻﺎﺭﻟﻪ ﻟﻴﻪ ﺳﺒﺐ ﺣﺘﻤﺎ .. ﻭﻟﻤﺎ ﺭﺑﻄﺖ ﺍﻷﺣﺪﺍﺙ ﺑﺒﻌﺾ ﻭﺭﺍﻗﺒﺖ ﺑﻮﻫﺎ ﻭﺷﺎﻓﺖ ﻭﺭﺩ ﺍﻟﺘﻮﻟﻴﺐ ﺍﻟﻤﺤﻄﻮﻁ ﺑﺤﺪﺍ ﺑﺎﺏ ﺍﻟﻘﺼﺮ ﺍﻟﺪﺧﻼﻧﻲ ﻓﻲ ﻧﻔﺲ ﺍﻟﻤﻜﺎﻥ ﺍﻟﻠﻲ ﺗﺤﻂ ﻓﻴﻪ ﺣﻨﺎﻥ ﺍﻟﻮﺭﺩ ﻓﻲ ﺣﻮﺷﻬﺎ .. ﺗﺄﻛﺪﺕ ﻣﻦ ﺷﻜﻮﻛﻬﺎ .. ﻭﺍﺛﺒﺘﺘﻬﻢ ﺑﺄﺧﺘﺒﺎﺭﻫﺎ ﺍﻷﺧﻴﺮ ﻟﺒﻮﻫﺎ ...
ﻓﺎﺕ ﺍﻟﻮﻗﺖ ﺑﺮﻭﺗﻴﻦ ﻣﻌﺘﺎﺩ ...
ﺑﻌﺪ ﺍﻟﻤﻐﺮﺏ ...
ﺣﻨﺎﻥ ﻻﺑﺴﻪ ﻫﻲ ﺑﻨﺎﺗﻬﺎ ﻭﺑﻴﻄﻠﻌﻮﺍ ...
ﺣﻨﺎﻥ : ﺍﻋﺘﺬﺭﻭﻟﻲ ﻣﻨﻬﺎ ﻫﻠﺒﻪ ...
ﺭﻫﻒ : ﺑﺎﻫﻲ ﻣﺎﻣﺎ .. ﻭﺑﻌﺪﻳﻦ ﻫﻲ ﺣﺘﻌﺬﺭﻙ ﻣﺶ ﺣﺘﺰﻋﻞ ..
ﺣﻨﺎﻥ ﺍﺑﺘﺴﻤﺖ : ﺗﻤﺎﻡ ... ﺭﺩﻭﺍ ﺑﺎﻟﻜﻢ ﻣﻦ ﺍﺭﻭﺍﺣﻜﻢ .. ﻣﺸﺖ ﻟﺴﻴﺎﺭﺗﻬﺎ ...
ﻭﻫﻤﺎ ﺭﺍﻓﻌﻬﻢ ﺭﺿﺎ ﻷﻥ ﺍﻟﺪﻧﻴﺎ ﻟﻴﻞ ﻭ ﺍﻟﻤﺴﺎﻓﻪ ﺑﻌﺾ ﺍﻟﺸﻲ ﻃﻮﻳﻠﻪ ﻣﻦ ﺣﻮﺷﻬﻢ ﻟﻠﻘﺼﺮ ...
ﻣﻘﻌﻤﺰﺓ ﺗﺨﺪﻡ ﻉ ﺍﻟﻼﺏ ﻭﺗﺸﺒﺤﻠﻪ ﻛﻴﻒ ﺳﺮﺣﺎﻥ .. ﻣﺘﻐﻴﺮ ﻫﻠﺒﻪ ﻣﻦ ﻟﻤﺎ ﺭﻭﺡ ﻭﻭﻻ ﺑﻌﻴﺪ ﻋﻠﻴﻬﺎ ﺍﻛﺜﺮ .. ﺣﺘﻰ ﺍﻟﻠﻲ ﺻﺎﺭ ﺑﻴﻨﻬﻢ ﻟﻤﺎ ﺭﻭﺡ ﻣﺎﺣﺴﺘﺶ ﺑﻴﻪ ﺯﻱ ﻗﺒﻞ .. ﻣﺎﻓﻴﺶ ﺣﺐ .. ﺷﻲ ﻭﺻﺎﺭ ﻭﺧﻼﺹ .. ﺣﺎﻃﻪ ﻓﻲ ﺑﺎﻟﻬﺎ ﺍﻥ ﺣﻨﺎﻥ ﻗﺎﻋﺪﻩ ﺗﺨﻄﻂ ﺗﺮﺩ ﺭﺍﺟﻠﻬﺎ ﻭﻣﺴﺘﺨﺪﻣﻪ ﺑﻨﺎﺗﻬﺎ ﻓﺨﻄﺘﻬﺎ ... ﻣﺎﺗﺒﻴﺶ ﺗﺤﺴﺴﻪ ﺑﺸﻲ ﺧﺎﻳﻔﻪ ﻳﺰﻳﺪ ﻳﻨﻔﺮ ﻣﻨﻬﺎ ﻣﺨﻠﻴﺎﺗﻪ ﺑﺮﺍﺣﺘﻪ .. ﻣﻦ ﻏﻴﺮ ﺷﻲ ﺧﺎﻳﻔﻪ ﺍﻧﻬﺎ ﺗﺨﺴﺮﻩ ﻹﻧﻬﺎ ﻓﻌﻼ ﺗﺤﺒﻪ
ﻭﺻﻠﺖ ﺣﻨﺎﻥ ﻟﺤﻮﺵ ﺍﺳﺎﻣﻪ ﻭﺍﺳﺘﻘﺒﻠﻮﻫﺎ ﺍﻣﻪ ﻭﺍﺧﺘﻪ ﺍﺳﺘﻘﺒﺎﻝ ﺣﻠﻮ ... ﺧﻨﻘﺘﻬﺎ ﺍﻟﻌﺒﺮﻩ ﻟﻤﺎ ﺧﺸﺖ ﻟﻠﺤﻮﺵ ... ﻗﺎﻋﺪﻩ ﺭﻳﺤﺔ ﻋﺎﺋﺸﻪ .. ﺟﺖ ﻋﻴﻨﻬﺎ ﻉ ﺍﻟﻤﻜﺎﻥ ﺍﻟﻠﻲ ﻟﻘﺖ ﻓﻴﻪ ﻋﺎﺋﺸﻪ ﻣﻘﻌﻤﺰﺓ ﻓﻲ ﺍﺧﺮ ﻳﻮﻡ ﻟﻴﻬﺎ ﻓﻲ ﺍﻟﺪﻧﻴﺎ ﻟﻤﺎ ﻛﺎﻧﺖ ﺗﻮﺻﻲ ﻓﻴﻬﺎ ﻳﺴﻤﻮﻭﻟﺪﻫﺎ ﻣﺤﻤﺪ .. ﺷﺪﺕ ﺩﻣﻌﺘﻬﺎ ﺑﻘﻮﺓ .. ﺟﺎﺑﻠﻬﺎ ﺍﺳﺎﻣﻪ ﻣﺤﻤﺪ ﻭﻓﺮﺣﺖ ﻫﻠﺒﻪ ﻟﻤﺎ ﺷﺎﻓﺎﺗﻪ ﻭﺧﺪﺍﺗﻪ ﻓﻲ ﺣﻀﻨﻬﺎ ..
ﻟﻴﻠﻴﺎﻥ ﺍﺧﺖ ﺍﺳﺎﻣﻪ : ﺣﻜﺎﻟﻨﺎ ﺍﺳﺎﻣﻪ ﻋﻨﻚ ﻛﺘﻴﺮ ﺑﺲ ﻣﺎﺋﺎﻝ ﺇﻧﻚ ﺣﻠﻮﺓ ﻛﺜﻴﺮ ﻫﻴﻚ ..
ﺷﺒﺤﻠﻬﺎ ﺍﺳﺎﻣﻪ ﻭﺍﺑﺘﺴﻢ ..
ﻭﻫﻲ ﺗﺤﺸﻤﺖ ﻭﻗﺎﻟﺖ : ﺷﻜﺮﺍ .. ﻋﻴﻮﻧﻚ ﺍﻟﺤﻠﻮﺓ ..
ﺑﺪﻳﻌﻪ ﺍﻡ ﺍﺳﺎﻣﻪ : ﻛﺜﻴﺮﺍ ﺍﻧﺒﺴﻄﻨﺎ ﺑﺸﻮﻓﺘﻚ ﺣﺒﻴﺒﺘﻲ .. ﻭﺍﻧﻚ ﺋﺒﻠﺘﻲ ﺍﻟﻌﺰﻳﻤﻪ ...
ﺣﻨﺎﻥ : ﻣﻔﺮﻭﺽ ﺍﻧﻲ ﺍﻟﻠﻲ ﻧﻌﺰﻣﻜﻢ ﺍﻧﺘﻢ ﺿﻴﻮﻓﻨﺎ .. ﺑﺠﺪﻳﺎﺕ ﻣﻨﺤﺮﺟﻪ ﻣﻨﻜﻢ ..
ﺑﺪﻳﻌﻪ : ﺷﻮ ﻫﺎﻟﺤﻜﻲ ﺣﺒﻴﺒﺘﻲ ﻣﺎﻓﻲ ﻓﺮﻕ ... ﻭﻧﺤﻨﺎ ﻋﺸﻨﺎ ﺑﻬﺎﻟﺒﻠﺪ ﻋﻤﺮ ﻃﻮﻳﻞ ﻣﺎﻧﺎ ﻏﺮﺏ ﻋﻨﺎ ﺍﺑﺪﺍ ...
ﺣﻨﺎﻥ ﺍﺑﺘﺴﻤﺖ ..
ﻭﺍﺳﺎﻣﻪ ﻳﺸﻮﻓﻠﻬﺎ ﻭﺍﺧﺘﻪ ﻣﺮﻛﺰﺓ ﻋﻠﻴﻪ ...
***
ﻓﻲ ﺍﻟﻘﺼﺮ ..
ﻣﻌﺎﻭﻳﻪ ﻣﺸﻐﻮﻝ ﺑﻀﻴﻮﻓﻪ ﺍﻟﻠﻲ ﻣﺴﺘﻐﺮﺑﻴﻦ ﻓﻲ ﺗﻐﻴﻴﺮﻩ ﺍﻟﻤﻔﺎﺟﺄ .. ﻫﻤﺎ ﻓﺎﻟﻨﻬﺎﻳﻪ ﻣﺶ ﻣﻬﻢ ﻋﻨﺪﻫﻢ ﻣﺘﺪﻳﻦ .. ﻋﻠﻤﺎﻧﻲ .. ﻣﻠﺤﺪ .. ﺍﻟﻤﻬﻢ ﻣﺼﺎﻟﺤﻬﻢ ﻭﺷﻐﻠﻬﻢ ﺍﻟﻠﻲ ﻣﺎﺷﻲ ﻣﻌﺎﻩ ﻭﺍﻷﺳﺘﻔﺎﺩﺓ ﺍﻟﻠﻲ ﻣﺤﺼﻠﻴﻨﻬﺎ ﻣﻦ ﻭﺭﺍﻩ .. ﻭﻫﻮ ﻋﺎﺭﻑ ﻫﺎﻟﺸﻲ ﻛﻮﻳﺲ ﺟﺪﺍ ..
ﻭﺻﻠﻮﺍ ﺍﻟﺒﻨﺎﺕ ﻭﻓﺮﺣﺖ ﻣﻬﺎ ﺑﺸﻮﻓﺘﻬﻢ ﻭﺑﻌﺪ ﺳﻼﻡ ﻭﺃﺣﻀﺎﻥ ..
ﻣﻬﺎ : ﻋﻼﺵ ﻫﻜﻲ؟
ﻟﺒﻨﻰ : ﺍﻧﺤﺮﺟﺖ ﻣﻦ ﺍﻫﻞ ﻋﻤﻮ ﺃﺳﺎﻣﻪ ﻣﺎﻗﺪﺭﺗﺶ ﺗﺮﺩﻫﻢ ..
ﺭﻫﻒ : ﻣﻌﻠﻴﺸﻲ ﻣﻬﻮﺷﻪ ﻫﻲ ﺧﺎﻃﺮﻫﺎ ﻋﻨﺪﻙ ﻭﺗﻮﺻﻲ ﻓﻴﺎ ﺍﻛﺜﺮ ﻣﻦ ﻣﺮﺓ ﺍﻋﺘﺬﺭﻭﻟﻲ ﻣﻨﻬﺎ ..
ﻣﻬﺎﺍﺑﺘﺴﻤﺖ : ﻣﺎﻓﻴﺶ ﻣﺸﻜﻠﻪ ﺑﺮﻏﻢ ﺍﻧﻲ ﻣﺴﺘﺎﺣﺸﺘﻬﺎ ﻭﺧﺎﻃﺮﻱ ﺗﺠﻴﻨﻲ ﻫﻨﻲ ﻟﻜﻦ ﺍﻟﺠﺎﻳﺎﺕ ﺍﻛﺜﺮ ﻣﻦ ﺍﻟﺮﺍﻳﺤﺎﺕ ﺇﻥ ﺷﺎﺀ ﺍﻟﻠﻪ ..
ﺍﻗﺒﺎﻝ ﻛﺎﻧﺖ ﺗﺸﻮﻑ ﻓﻴﻬﻢ ﻣﻦ ﺑﻌﻴﺪ ﺣﺪﺍﻫﺎ ﺍﻣﻬﺎ ..
ﺳﻤﻴﻪ : ﻣﻌﺎﻭﻳﻪ ﻣﺘﻐﻴﺮ ﻫﻠﺒﻪ ﻳﺎﺑﻴﺒﻮ ..
ﺍﻗﺒﺎﻝ ﺳﺎﻛﺘﻪ ﻭﺗﻐﻠﻲ .. ﻋﺎﺭﻓﻪ ﻭﻣﺘﺄﻛﺪﻩ ﺍﻥ ﺍﻟﻠﻲ ﻏﻴﺮﻩ ﺣﻨﺎﻥ ... ﻭﺧﺎﻳﻔﻪ ﻟﻮ ﺍﻟﻠﻲ ﻓﺒﺎﻟﻬﺎ ﻳﻜﻮﻥ ﺻﺢ ﻭﺍﻧﻪ ﻓﻌﻼ ﻣﺎﻳﻠﻠﻬﺎ ﺃﻭ ﻳﺤﺒﻬﺎ ... ﻗﻌﺪﺕ ﺍﺩﻭﺭ ﻓﻴﻬﺎ ﺑﻌﻴﻮﻧﻬﺎ ﻣﺎﻟﻘﺘﻬﺎﺵ .. ﻣﺶ ﻫﻲ ﺑﺲ ﺍﻟﻠﻲ ﺍﺩﻭﺭ ﻓﻴﻬﺎ .. ﻣﻌﺎﻭﻳﻪ ﻳﺪﻭﺭ ﻓﻴﻬﺎ ﻭﻫﻮ ﻛﺎﻥ ﻳﺴﺘﻨﻰ ﻉ ﻧﺎﺭ ... ﻟﻴﻦ ﺷﺎﻑ ﺑﻨﺎﺗﻬﺎ ... ﻭﺍﺳﺘﻐﺮﺏ ﺍﻧﻬﻢ ﺟﻮ ﺑﺮﻭﺣﻬﻢ ...
ﻭﺣﺪﻩ ﻣﻦ ﺍﻟﻤﻌﺎﺯﻳﻢ : ﻫﺎﻩ ﻳﺎﺳﻮﻣﻪ ﺷﻦ ﺻﺎﺭ ﻓﻲ ﺇﻗﺒﺎﻝ ﻣﻊ ﻣﻌﺎﻭﻳﻪ ..
ﺳﻤﻴﻪ : ﺷﻦ ﺑﻨﻘﻮﻟﻚ ﻣﺤﻠﻚ ﺳﺮ ..
ﺭﺩﺕ ﻭﻫﻲ ﺗﺸﺒﺢ ﻟﻤﻌﺎﻭﻳﻪ : ﺭﻳﺘﻴﻪ ﻛﻴﻒ ﻃﺎﻟﻊ ﺑﺎﻟﻌﺮﺑﻲ ﻏﺰﺍﻝ ﻣﺎﺗﻘﻮﻟﺶ ﺑﻴﺨﺶ 50 ﺑﻜﻞ ..
ﺳﻤﻴﻪ ﺑﻬﻤﺲ : ﻟﻮ ﻛﺎﻥ ﺍﻛﺒﺮ ﺷﻮﻳﻪ ﺑﺲ ..
: ﻫﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻪ
***
ﻣﺎﺷﺎﺀ ﺍﻟﻠﻪ ﺗﺴﻠﻢ ﺍﻳﺪﻳﻜﻢ ..
ﺑﺪﻳﻌﻪ : ﺻﺤﺘﻴﻦ ﻭﻫﻨﺎ ﺣﺒﻴﺒﺘﻲ .
ﻟﻴﻠﻴﺎﻥ : ﻋﺠﺒﻚ ﺷﻴﺦ ﺍﻟﻤﺤﺸﻲ .. ﻋﻤﺎﻳﻞ ﺍﻳﺪﻳﻲ
ﺣﻨﺎﻥ ﺑﻀﺤﻜﻪ : ﻛﻠﻪ ﺑﺼﺮﺍﺣﻪ ﻣﺎﻛﻠﺘﻜﻢ ﺧﻔﻴﻔﻪ ﻭﺣﻠﻮﺓ ... ﻣﺶ ﺣﺘﺮﻭﺣﻮﺍ ﻟﻴﻦ ﺍﺿﻘﻮﺍ ﻣﻦ ﻣﺎﻛﻠﺘﻨﺎ ..
ﺑﺪﻳﻌﻪ : ﺑﻌﺮﻑ ﺍﻟﻌﺼﺒﺎﻥ .. ﻭﺍﻟﺒﺎﺯﻳﻦ .. ﻭﺍﻛﻠﺘﻦ ﻛﻤﺎﻥ .. ﺷﻲ ﺧﺮﺍﻓﻲ ..
ﺍﺳﺎﻣﻪ : ﻣﺎﻛﻠﺔ ﺣﻨﺎﻥ ﻏﻴﺮ ﻳﺎﺍﻣﻲ ..
ﺣﻨﺎﻥ ﺍﺑﺘﺴﻤﺖ ﺑﺨﺠﻞ : ﻣﺎﺗﺒﺎﻟﻐﺶ ..
ﺍﺳﺎﻣﻪ : ﻻ ﻭﺍﻟﻠﻪ ﻣﺎﻛﻠﺘﻚ ﻻﺗﻘﺎﻭﻡ ..
ﻟﻴﻠﻴﺎﻥ : ﺍﻧﺎ ﺗﺤﻤﺴﺖ ﻟﻠﻌﺰﻳﻤﻪ ﻣﻦ ﻫﻸ ..
ﺣﻨﺎﻥ : ﺍﻟﺠﻤﻌﻪ ﻫﺎﺩﻱ ﺑﺈﺫﻥ ﺍﻟﻠﻪ .. ﺷﻦ ﺭﺍﻳﻜﻢ ..
ﺍﺳﺎﻣﻪ ﺷﺒﺢ ﻷﻣﻪ ﻭﺍﺧﺘﻪ ..
ﺑﺪﻳﻌﻪ : ﺍﻟﺠﻤﻌﻪ ﻣﻨﻴﺢ ..
ﺍﺳﺎﻣﻪ : ﺧﻼﺹ ﺍﻟﺠﻤﻌﻪ ...
ﺣﻨﺎﻥ ﺍﺑﺘﺴﻤﺖ ﻣﺮﺣﺒﺘﻴﻦ ﺑﻴﻜﻢ ...
***
ﻋﻄﺖ ﻣﻬﺎ ﺍﻟﺒﻨﺎﺕ ﻫﺪﺍﻳﺎﻫﻢ ﻭﻫﺪﻳﺔ ﺍﻣﻬﻢ ﻭﻣﻌﺎﻫﻢ ﻣﻴﺔ ﺯﻣﺰﻡ .. ﻃﻠﻌﺖ ﺳﻘﺪﺗﻬﻢ ...
ﺭﻫﻒ : ﻭﻳﻨﻪ ﻗﺎﻝ ﻭﺻﻞ ..
ﻟﺒﻨﻰ : ﺍﻫﻮﺍ ..
ﻗﺪﻣﺖ ﺍﻟﺴﻴﺎﺭﺓ ﻭﺩﺭﺳﺖ ﺣﺪﺍﻫﻢ .. ﻣﻬﺎ ﻟﻤﺎ ﺷﺎﻓﺘﻪ ﺗﻔﺎﺟﺌﺖ ﻭﻫﻮ ﺷﺒﺢ ﻟﺒﻨﺎﺕ ﺍﺧﺘﻪ .. ﺷﺎﻓﻬﺎ ﺍﺑﺘﺴﻢ ﻭﻫﻲ ﺭﺩﺗﻬﺎﻟﻪ ﺑﺨﺠﻞ .. ﻫﻮ ﺩﺍﺭﻟﻬﺎ ﺣﺮﻛﻪ ﺑﺨﺸﻤﻪ .. ﻫﻲ ﺿﺤﻜﺖ ﻭﺧﺸﺖ ﻃﻮﻝ .. ﻭﻫﻮ ﺿﺤﻚ ..
ﻟﺒﻨﻰ ﺷﺎﻓﺘﻪ : ﺷﻨﻮ ﻳﺎﺧﺎﻟﻮ ..
ﺭﺿﺎ ﺑﻀﺤﻜﻪ : ﺍﺳﻜﺘﻲ ﻳﺎ ﻗﻨﺘﺸﻪ ..
ﺭﻫﻒ : ﻫﻬﻬﻬﻬﻬﻬﻬﻬﻬﻬﻬﻬﻬﻪ
ﻟﺒﻨﻰ : ﻣﺎﺻﺪﻗﺘﻲ
ﺭﺿﺎ ﺿﺤﻚ ﻭﺗﺤﺮﻙ ﻃﻮﻝ ..
***
ﺭﻭﺣﺖ ﺣﻨﺎﻥ ﻭﻗﻌﺪﺕ ﺗﺮﺍﺟﻲ ﻓﺒﻨﺎﺗﻬﺎ ﺍﻣﺘﻰ ﻳﺮﻭﺣﻮﺍ .. ﺷﻮﻳﻪ ﻭﻭﺻﻠﻮﺍ .. ﺭﻛﺒﻮﺍ ﻏﻴﺮﻭﺍ ﺣﻮﺍﻳﺠﻬﻢ ﻭﻧﺰﻟﻮﺍ ﻛﻤﻠﻮﺍ ﺍﻟﺴﻬﺮﺍﻳﻪ ﻫﻤﺎ ﻭﺃﻣﻬﻢ ﻳﺤﻜﻮﺍ ﻉ ﺟﻮ ﺍﻟﻌﺰﺍﻳﻢ ﺍﻟﻠﻲ ﻛﺎﻧﻮﺍ ﻓﻴﻬﺎ ..
ﺣﻨﺎﻥ : ﻟﻬﺠﺘﻬﻢ ﻋﺴﻞ ... ﻭﻣﺎﻛﻠﺘﻬﻢ ﺍﺣﻠﻰ ..
ﻟﺒﻨﻰ : ﻳﺎﺭﻳﺘﻨﻲ ﻣﺸﻴﺖ ﻣﻌﺎﻙ ..
ﺣﻨﺎﻥ : ﻋﻼﺵ ﻣﺎﻋﺠﺒﻜﻤﺶ ﺍﻟﺠﻮ ﻏﺎﺩﻱ ..
ﻟﺒﻨﻰ : ﺍﻟﺼﺮﺍﺣﻪ ﺍﻳﻪ ﺍﻟﺠﻮ ﺭﺳﻤﻲ ﻭﻣﺶ ﻣﺮﻳﺢ ..
ﺭﻫﻒ : ﺻﺢ ﻭﺣﺴﻴﺖ ﻣﻬﺎ ﺣﺘﻰ ﻫﻲ ﻣﺶ ﺣﺎﺑﻪ ﺍﻟﺠﻮ ﻫﺬﺍ ﻋﻼﺵ ﺧﻠﺘﻨﺎ ﻓﺪﺍﺭﻫﺎ ﺃﻏﻠﺐ ﺍﻟﻮﻗﺖ .
ﺣﻨﺎﻥ : ﺍﻟﺒﻴﺌﻪ ﻫﺪﻳﻜﺎ ﻣﺎﺗﺸﺒﻬﺶ ﺑﻴﺌﺘﻨﺎ .. ﺗﻌﺘﻤﺪ ﻉ ﺍﻟﺮﺳﻤﻴﻪ ﻭ ﺍﻟﻤﺠﺎﻣﻼﺕ ﺍﻟﺰﺍﻳﺪﻩ ﺃﻭﺍﻟﻨﻔﺎﻕ ﺑﻤﻌﻨﻰ ﺍﺻﺢ .. ﻫﺬﺍ ﻋﻼﺵ ﺍﻧﺘﻢ ﻣﺎﺣﺒﻴﺘﻮﺵ ﺍﻟﺠﻮ ﻭﻻﻣﻬﺎ ﺗﻘﺒﻼﺗﻪ ﻻﻧﻬﺎ ﻣﺎﺗﺸﺒﻬﻠﻤﺶ ..
ﻟﺒﻨﻰ ﺑﺘﻔﻜﻴﺮ : ﺻﺢ ..
ﺭﻫﻒ : ﻟﻜﻦ ﺑﻮﻫﺎ ﻳﺎﻣﺎﻣﺎ ﺧﻴﺎﻟﻲ ﺍﻟﺮﺍﺟﻞ ﻫﺬﺍ ﻻﺑﺲ ﻋﺮﺑﻲ ﻃﺎﻟﻊ ﻣﺶ ﻋﺎﺩﻱ ﻫﻮ ﻣﻦ ﻗﺒﻞ ﺟﺬﺍ ﺏ ﻭﻳﻘﺘﻞ ﻳﺎﺑﺎﻝ ﻟﺒﺲ ﻋﺮﺑﻲ ..
ﻟﺒﻨﻰ : ﻣﻬﺎ ﻗﺎﻟﺘﻠﻲ ﺍﻭﻝ ﻣﺮﺓ ... ﺭﻛﺰﺕ ﻉ ﺍﻟﻨﺴﺎﻭﻳﻦ ﻓﻲ ﺍﻟﺤﻔﻠﻪ ﻛﺒﺎﺭ ﻭﺻﻐﺎﺭ ﻗﺮﻳﺐ ﻛﻠﻮﻩ ﺑﻌﻴﻮﻧﻬﻢ ...
ﺣﻨﺎﻥ ﺣﺴﺖ ﻟﺤﻈﺘﻬﺎ ﺍﻥ ﻋﻨﺪﻫﺎ ﺭﻏﺒﻪ ﺗﺸﻮﻓﻪ ﻛﻴﻒ ﻛﺎﻥ ﻃﺎﻟﻊ ... ﻓﻲ ﻫﺪﻳﻜﺎ ﺍﻟﻠﺤﻈﻪ ﺗﻤﻨﺖ ﻟﻮ ﻣﺸﺖ ﻣﻌﺎﻫﻢ .. ﺑﺲ ﺑﻌﺪﻳﻦ ﻓﻴﺴﻊ ﻣﺎ ﺍﺳﺘﺎﻗﻀﺖ ﻟﻨﻔﺴﻬﺎ ﻭﺗﻌﻮﺫﺕ ﻣﻦ ﺍﻟﺸﻴﻄﺎﻥ ﻓﺴﺮﻫﺎ ..
***
ﻛﺎﻧﺖ ﺣﺘﺮﻗﺪ ﻟﻮﻻ ﻃﻘﺔ ﺍﻟﺒﺎﺏ ﻧﺎﺿﺖ ﻗﻌﻤﺰﺕ ..
ﻣﻬﺎ : ﺗﻔﻀﻞ ..
ﺍﻧﻔﺘﺢ ﺍﻟﺒﺎﺏ ﻭﺧﺶ ﺑﻮﻫﺎ .. ﻫﻲ ﻛﺎﻧﺖ ﻋﺎﺭﻓﻪ ﻣﻦ ﻣﻼﻣﺢ ﻭﺟﻬﻪ ﻋﻼﺵ ﺟﺎﻱ ..
ﻣﻌﺎﻭﻳﻪ ﺑﺄﺑﺘﺴﺎﻣﻪ : ﻋﺠﺒﻚ ﺍﻟﺠﻮ ﺍﻟﻴﻮﻡ ..
ﻣﻬﺎ ﺑﺈﺑﺘﺴﺎﻣﻪ : ﺍﻳﻪ ﻛﺎﻥ ﻛﻞ ﺷﻲ ﺣﻠﻮ ﺑﺎﺑﺎ ..
ﻣﻌﺎﻭﻳﻪ : ﺍﻣﻢ .. ﻛﻮﻳﺲ .. ﻭﺯﻉ ﻧﻈﺮﻩ ﻉ ﺍﻟﺪﺍﺭ ﺑﻌﺪﻳﻦ ﺷﺒﺤﻠﻬﺎ .. ﺣﻚ ﺣﺎﺟﺒﻪ ﻭﻗﺎﻝ ... ﺻﺎﺣﺒﺘﻚ ﺟﺖ؟
ﻣﻬﺎ ﺍﺑﺘﺴﻤﺖ : ﺍﻳﻪ ﻫﻲ ﻭﺍﺧﺘﻬﺎ .. ﺑﺶ ﺧﺎﻟﺘﻲ ﺣﻨﺎﻥ ﺍﻋﺘﺬﺭﺕ ..
ﻣﻌﺎﻭﻳﻪ : ﻋﻼﺵ؟ !!
ﻣﻬﺎ : ﻋﻤﻮ ﺃﺳﺎﻣﻪ ﺗﻌﺮﻓﻪ ﺍﻫﻠﻪ ﺟﺎﻳﻴﻦ ﻣﻦ ﺑﺮﺍ .. ﻭﻫﻤﺎ ﺍﻟﻠﻲ ﻋﺰﻣﻮﻫﺎ ﻉ ﺍﻟﻌﺸﻲ ﻳﺒﻮﺍ ﻳﺘﻌﺮﻓﻮﺍ ﻋﻠﻴﻬﺎ ﻭﻳﺸﻜﺮﻭﻫﺎ ﻉ ﺭﻋﺎﻳﺘﻬﺎ ﻟﺤﻔﻴﺪﻫﻢ ﺍﻧﺤﺮﺟﺖ ﻭﻣﺸﺘﻠﻬﻢ ..
ﻣﻌﺎﻭﻳﻪ " ﺍﻫﺎ ﺍﺳﺎﻣﻪ .. ﻭﺃﻣﻪ ﻭﺍﺧﺘﻪ ... ﻭﻳﺘﻌﺮﻓﻮﺍ ﻋﻠﻴﻬﺎ ..": ﺗﻤﺎﻡ ... ﺗﺼﺒﺤﻲ ﻉ ﺧﻴﺮ .. ﻟﻒ ﻭﻃﻠﻊ ﻭﺳﻜﺮ ﺍﻟﺒﺎﺏ
ﻭﻣﻬﺎ ﺍﺿﺎﻳﻘﺖ ﻉ ﺧﺎﻃﺮﻩ ...
***
ﻓﺎﺗﻮﺍ ﻳﻮﻣﻴﻦ ﻛﺎﻧﺖ ﺣﻨﺎﻥ ﺗﺨﺪﻡ ﻉ ﻣﺠﺴﻢ ﻟﻠﺘﺼﻤﻴﻢ ﻣﺘﺎﻉ ﺍﻟﻤﺸﺮﻭﻉ ﺑﺶ ﻳﻌﺮﺿﻮﻩ ﻉ ﺍﻟﻤﺴﺎﻫﻤﻴﻦ ﻓﻲ ﺍﻟﻤﺸﺮﻭﻉ ..
ﻓﻬﺎﻟﻴﻮﻡ ﻣﺎﺷﻴﻪ ﻟﻠﺸﺮﻛﻪ ﺑﺶ ﻳﺤﻄﻮﻩ ﻓﻲ ﻏﺮﻓﺔ ﺍﻹﺟﺘﻤﺎﻋﺎﺕ ﺍﻟﻜﺒﻴﺮﻩ .. ﺗﺄﻫﺒﺎ ﻟﻺﺟﺘﻤﺎﻉ ﺍﻟﻠﻲ ﺣﻴﻨﻌﻘﺪ ﺍﺧﺮ ﺍﻷﺳﺒﻮﻉ ..
ﺧﺸﺖ ﻟﻠﻘﺎﻋﻪ ﺑﻌﺪ ﻭﺻﻠﻬﺎ ﺃﻳﻤﻦ ... ﻭﻛﺎﻧﻮﺍ ﻣﻌﺎﻫﻢ ﻋﻤﺎﻝ ﺩﺧﻠﻮﺍ ﺍﻟﻤﺠﺴﻢ ...
ﺍﻳﻤﻦ : ﺑﺠﺪﻳﺎﺕ ﻣﺘﺤﻤﺲ ﻟﻠﺘﻨﻔﻴﺪ ..
ﺣﻨﺎﻥ ﺑﺈﺑﺘﺴﺎﻣﻪ : ﺣﻴﺎﺧﺪ ﻭﻗﺖ ﻃﻮﻳﻞ ﻉ ﻣﺎﻳﻮﻟﻲ ﻫﺎﻟﻤﺠﺴﻢ ﺣﻘﻴﻘﺔ ﻭﺍﻗﻌﻪ ..
ﺍﻳﻤﻦ ﺑﻀﺤﻜﻪ : ﺣﻴﻮﻟﻲ ﺣﻘﻴﻘﻪ ﻭﺍﻗﻌﻪ ..
ﺑﻌﺪ ﻛﻤﻠﻮﺍ ﻃﻠﻌﻮﺍ ﻫﻤﺎ ﺍﻟﺰﻭﺯ ﻣﺘﻮﺟﻬﻴﻦ ﻟﻤﻜﺘﺐ ﺭﺋﻴﺲ ﻣﺠﻠﺲ ﺍﻹﺩﺍﺭﺓ ﺳﻤﻌﻮﺍ ﺻﻮﺕ ﺩﻭﺷﻪ ..
ﻣﻌﺎﻭﻳﻪ ﺑﺼﻮﺕ ﻋﺎﻟﻲ : ﻛﻴﻴﻴﻒ ﻣﻠﻒ ﺯﻱ ﻫﺬﺍ ﺗﻨﺴﻴﻪ ﻛﻴﻒ ..
ﺍﻟﺴﻜﺮﺗﻴﺮﻩ ﻭﻫﻲ ﺗﺮﻋﺶ : ﻭﺍﻟﻠﻪ ﺍﻟﻌﻈﻴﻢ .. ﺭﻭﺣﺖ .. ﺑﺶ ﻧﻜﻤﻠﻪ ﻓﻲ ﺍﻟﺤﻮﺵ .. ﻣﺶ ﻋﺎﺭﻓﻪ ﻛﻴﻒ ﻭﺍﻧﻲ ﻃﺎﻟﻌﻪ ﻧﺴﻴﺘﻪ ..
ﻣﻌﺎﻭﻳﻪ ﺑﻌﺼﺒﻴﻪ : ﺍﺳﺘﻬﺘﺎﺍﺍﺭ .. ﻻﻣﺒﺎﻻﺓ ... ﻭﺍﺧﺪﺗﻴﻬﺎ ﻫﻴﺪﻗﺎ ..
ﺍﺳﻤﻌﻲ .. ﺗﻮﺍ ﺗﻠﻤﻲ ﺣﺎﺟﺘﻚ ﻭﺗﻤﺸﻲ ﻟﻠﺸﺆﻭﻥ ﺍﻟﻤﺎﻟﻴﻪ ﺗﺎﺧﺪﻱ ﻣﺴﺘﺤﻘﺎﺗﻚ ﻭﻭﺟﻬﻚ ﻫﻨﻲ ﻣﻌﺎﺵ ﻧﺒﻲ ﻧﺸﻮﻓﻪ ..
ﺍﻳﻤﻦ ﻭﺣﻨﺎﻥ ﻛﺎﻧﻮﺍ ﻳﺘﻔﺮﺟﻮﺍ ﻉ ﺍﻟﻤﻮﻗﻒ ﻭﻫﻮ ﻛﺎﻥ ﻋﺎﻃﻲ ﺑﺎﻟﻈﻬﺮ ﻣﺎﺷﺎﻓﻬﻤﺶ ..
ﺍﻟﺴﻜﺮﺗﻴﺮﻩ ﻭﻫﻲ ﺗﺒﻜﻲ : ﺍﺭﺟﻮﻙ ﺑﺎﻟﻠﻪ ﻋﻠﻴﻚ ﻋﻄﻴﻨﻲ ﻓﺮﺻﻪ .. ﺍﻭﻝ ﻣﺮﺓ ﺗﺼﻴﺮ ...
ﻣﻌﺎﻭﻳﻪ : ﻭﺍﻧﻲ ﻣﺶ ﻣﺴﺘﻌﺪ ﻧﺮﺍﺟﻲ ﺍﻣﺘﻰ ﺗﺒﻊ ﻫﺎﺍﻻﻭﻝ ﻣﺮﺓ ﺗﺎﻧﻴﻪ ﻭﺗﺎﻟﺘﻪ ﻭﻋﺎﺷﺮﻩ .. ﻳﻼ ﻣﺎﺗﻨﺎﻗﺸﻴﺶ .. ﻭﺟﻲ ﺑﻴﻤﺸﻲ ﺷﺪﺕ ﺍﻳﺪﻩ ﻭﺑﺘﺒﻮﺳﻬﺎ .. ﻫﻮ ﻧﻔﻀﻬﺎ ﻃﻮﻝ ﻭﻗﺎﻝ ..
ﻣﻌﺎﻭﻳﻪ ﺑﺈﺯﺩﺭﺍﺀ : ﺷﻦ ﺟﻮ ﺍﻟﺸﺤﺎﺗﻴﻦ ﻫﺬﺍ ﺷﺒﺢ ﻷﻗﺒﺎﻝ .. ﺗﺼﺮﻓﻲ ..
ﺍﻟﺴﻜﺮﺗﻴﺮﺓ ﺑﺘﻨﻬﺎﺭ : ﻭﺭﺍﺱ ﺑﻨﺘﻚ ﺗﺮﺑﺢ ..
" ﻣﺎﺫﻟﻴﺶ ﻧﻔﺴﻚ ﻟﺤﺪ "..
ﻫﻮ ﺍﻟﺘﻔﺖ ﺷﺒﺤﻠﻬﺎ ...
ﻗﺪﻣﺘﻠﻬﺎ ﺣﻨﺎﻥ : ﺍﻟﺮﺍﺯﻕ ﺭﺑﻲ ﻣﺶ ﻫﻮ .. ﺍﻧﺘﻲ ﺧﻼﺹ ﻣﺎﻟﻴﻜﺶ ﻗﺴﻢ ﻫﻨﺎﻳﺎ ﻭﻟﻴﻚ ﻓﻤﻜﺎﻥ ﺗﺎﻧﻲ ﺍﻛﻴﺪ ﺗﺮﺟﻲ ﺭﺑﻲ ﻭﺍﻧﺬﻟﻴﻠﻪ ﻫﻮ ﻣﺶ ﻟﻠﺨﻠﻖ ..
ﺍﻟﺴﻜﺮﺗﻴﺮﺓ ﻭﻃﺖ ﺭﺍﺳﻬﺎ ﻭﻫﻲ ﺗﺒﻜﻲ ﺷﺪﺕ ﺣﻨﺎﻥ ﻣﻦ ﻳﺪﻫﺎ : ﺗﻌﺎﻟﻲ ﻣﻌﺎﻱ . ﺧﺪﺗﻬﺎ ﻣﻦ ﻳﺪﻫﺎ ﻭﻣﺸﻮﺍ ...
ﺍﻣﺎ ﻫﻮ ﺍﻟﻠﻲ ﻛﺎﻥ ﻳﺸﻮﻓﻠﻬﺎ ﻭﻗﻠﺒﻪ ﻣﺤﺮﻭﻕ ﻟﻒ ﻭﻣﺸﻲ ﻟﻤﻜﺘﺒﻪ ﻭﻫﻮ ﻓﻲ ﻗﻤﺔ ﺍﻟﻐﻀﺐ ﻭﺳﻜﺮ ﻭﺭﺍﻩ ﺍﻟﺒﺎﺏ ﺑﻘﻮﺓ ...
ﺇﻗﺒﺎﻝ ﺑﺘﻬﻜﻢ : ﺗﺘﺼﻨﻊ ﻓﻲ ﺍﻟﻤﺜﺎﻟﻴﻪ ..
ﺍﻳﻤﻦ : ﺗﺘﺼﻨﻊ ﻓﻲ ﺍﻟﻤﺜﺎﻟﻴﻪ ؟؟ﻋﻨﺪﻙ ﺣﻖ ﺍﻟﺤﺎﺟﺎﺕ ﻫﺎﺩﻱ ﺍﻧﺘﻲ ﺟﺎﻫﻠﻪ ﻓﻴﻬﺎ .. ﻭﻣﺸﻲ ﻭﺧﻼﻫﺎ ﻭﻫﻲ ﻛﺎﻧﺖ ﺗﺸﺒﺤﻠﻪ ﺑﺈﺯﺩﺭﺍﺀ ﻭﺷﻘﻠﺒﺖ ﻋﻴﻮﻧﻬﺎ ...
ﻗﻌﻤﺰﺕ ﻫﻲ ﻭﺍﻟﺴﻜﺮﺗﻴﺮﻩ ﻓﻲ ﻛﺎﻓﻲ ﺍﻟﺸﺮﻛﻪ ..
ﺍﻟﺴﻜﺮﺗﻴﺮﻩ : ﺍﻧﺘﻲ ﻣﺎﺗﻌﺮﻓﻴﺶ ﺍﻟﻤﻌﺎﺵ ﺷﻦ ﻣﺪﺍﻳﺮ ﻭﻉ ﻛﻢ ﺷﺨﺺ ﻳﺼﺮﻑ .. ﺍﻟﺴﻴﺪ ﻣﻌﺎﻭﻳﻪ ﺑﺮﻏﻢ ﻗﺴﻮﺗﻪ ﻟﻜﻨﻪ ﻛﺮﻳﻢ ﻭﺳﺨﻲ ﻉ ﺍﻟﻤﻮﻇﻔﻴﻦ .. ﻭﺍﻟﺮﺍﺗﺐ ﺍﻟﻠﻲ ﻳﻌﻄﻲ ﻓﻴﻪ ﻟﻮ ﺧﺪﻣﺖ ﺧﺪﻣﺘﻴﻦ ﻣﻊ ﺑﻌﺾ ﻣﺎﻣﺤﺼﻠﻪ ﺭﺑﻌﻪ ..
ﺣﻨﺎﻥ : ﻓﺎﻫﻤﻪ ﻋﻠﻴﻚ .. ﺑﺲ ﻣﻬﻤﺎ ﻛﺎﻥ ﻣﺎﺫﻟﻴﺶ ﻧﻔﺴﻚ ﻟﺤﺪ ..
ﺍﻟﺴﻜﺮﺗﻴﺮﻩ : ﻧﺬﻟﻬﺎ ﻉ ﺧﺎﻃﺮ ﺍﻣﻲ ﺍﻟﻠﻲ ﺗﻐﺴﻞ ﻓﻲ ﺍﻟﻜﻼﻭﻱ ﻭﺍﺧﺘﻲ ﺍﻟﻠﻲ ﺗﻮﺗﻲ ﻟﻌﺮﺳﻬﺎ .. ﻭﺧﻮﻱ ﺍﻟﻠﻲ ﻳﻘﺮﺍ ﻓﻲ ﺍﻟﻄﺐ ...
ﺣﻨﺎﻥ : ﻻﺣﻮﻝ ﻭﻻﻗﻮﺓ ﺇﻻ ﺑﺎﻟﻠﻪ ..
ﺍﻟﺴﻜﺮﺗﻴﺮﻩ : ﻟﻴﺎ 7 ﺳﻨﻴﻦ ﻫﻨﻲ ﻭﺍﻟﻠﻪ ﻭﻻﻣﺮﺓ ﻏﻠﻄﺖ ... ﻉ ﻣﺮﺓ ﻭﺣﺪﻩ ﻧﺴﻴﺖ ﻓﻴﻬﺎ ﻭﺳﻬﻴﺖ ﻳﻠﺰﻧﻲ ﻭﻳﻘﻄﻊ ﺭﺯﻗﻲ . ؟ ! ﻟﻜﻦ ﻣﺎﻋﻨﺪﻱ ﻣﺎﻧﻘﻮﻝ ﻏﻴﺮ ﺣﺲ ..
ﻗﺎﻃﻌﺘﻬﺎ ﺣﻨﺎﻥ ﻭﺷﺪﺕ ﻉ ﻳﺪﻫﺎ ﺑﺎﻟﻘﻮﺓ : ﺑﺎﻟﻠﻪ ﻋﻠﻴﻚ ﻣﺎﺗﺪﻋﻴﺶ ﻋﻠﻴﻪ ﺍﺭﺟﻮﻙ .. ﺍﺳﻤﻌﻴﻨﻲ ﺍﻧﻲ ﺣﻨﺴﺎﻋﺪﻙ ﻭﺑﻌﻮﻥ ﺍﻟﻠﻪ ﺣﻴﺮﺩﻙ ﻟﻠﺨﺪﻣﻪ ..
ﺍﻟﺴﻜﺮﺗﻴﺮﺓ ﺑﺒﻜﻲ : ﻭﻛﺎﻥ ﻣﺎﺭﺩﻧﻴﺶ؟
ﺣﻨﺎﻥ : ﺍﻧﺘﻲ ﺍﺩﻋﻲ ﺑﺲ ... ﺧﻠﻴﻚ ﻫﻨﻲ .. ﻧﺎﺿﺖ ﻭﻣﺸﺖ ..
ﻭﺍﻟﺴﻜﺮﺗﻴﺮﻩ ﺣﻄﺖ ﺭﺍﺳﻬﺎ ﺑﻴﻦ ﺍﻳﺪﻳﻬﺎ ﻭﻗﻌﺪﺕ ﺗﺒﻜﻲ ..
ﻋﻨﺪ ﻫﻮ ..
ﻛﺎﻥ ﻣﺶ ﺭﺍﺿﻲ ﻉ ﺍﻟﻠﻲ ﺩﺍﺭﻩ ﺑﺲ ﻫﻮ ﻣﻦ ﻳﻮﻡ ﺍﻟﻌﺰﻭﻣﻪ ﺍﻟﻠﻲ ﺣﻨﺎﻥ ﻣﺎﺟﺘﺶ ﻓﻴﻬﺎ ﻭﻋﺮﻑ ﺳﺒﺐ ﻋﺪﻡ ﺟﻴﺘﻬﺎ ﻭﻫﻮ ﻣﻀﺎﻳﻖ ﻭﻋﺼﺒﻲ ﺑﺰﻳﺎﺩﻩ .. ﻃﻖ ﺍﻟﺒﺎﺏ ..
ﻣﻌﺎﻭﻳﻪ ﺑﺤﺪﻩ : ﺍﻟﺰﻓﺖ ﻭﻻ ﺍﻟﺰﻓﺘﻪ ﺍﻟﻠﻲ ﻳﻄﻖ ﻳﻤﺸﻲ ﺧﻴﺮﻟﻪ ..
ﺣﻨﺎﻥ ﺗﺸﺠﻌﺖ ﻭﻓﺘﺤﺖ ﺍﻟﺒﺎﺏ ﻛﺎﻥ ﻭﺍﻗﻒ ﻉ ﺍﻟﺮﻭﺷﻦ ﻭﻋﺎﻃﻲ ﺑﺎﻟﻈﻬﺮ ﺗﻠﻔﺖ ﻭﻛﺎﻥ ﻧﺎﻭﻱ ﻳﻔﺼﻞ ﻟﻤﺎ ﺷﺎﻓﻬﺎ ﺟﻤﺪ ..
ﺣﻨﺎﻥ ﻗﺪﻣﺘﻠﻪ : ﻣﻌﻠﻴﺸﻲ ﻧﻘﺪﺭ ﻧﻜﻠﻤﻚ .
ﻣﻌﺎﻭﻳﻪ ﺗﻠﻔﺖ ﺑﺠﺴﻤﻪ ﻗﺒﺎﻟﺘﻬﺎ ﻭﺍﻳﺪﻳﻪ ﻓﺠﻴﻮﺑﻪ ﻭﺑﻨﻈﺮﻩ ﺣﺎﺩﻩ ﻣﻤﺰﻭﺟﻪ ﺑﺎﻟﻐﺮﻭﺭ : ﻟﻮ ﻉ ﻣﻮﺿﻮﻉ ﺍﻟﺴﻜﺮﺗﻴﺮﻩ ﻣﺎﺗﻌﺒﻴﺶ ﺭﻭﺣﻚ ...
ﺣﻨﺎﻥ : ﺍﻟﻠﻲ ﻋﺮﻓﺘﻪ ﻋﻨﻬﺎ ﺍﻧﻬﺎ ﺳﻜﺮﺗﻴﺮﻩ ﻣﻤﺘﺎﺯﺓ ﻣﻌﺎﻙ ﻣﻦ ﺳﺒﻌﻪ ﺳﻨﻴﻦ ﻭﻫﺎﺩﻱ ﺍﻭﻝ ﻏﻠﻄﻪ ﻟﻴﻬﺎ ﻛﻴﻒ ﺗﻔﺮﻁ ﻓﻴﻬﺎ ﻫﻜﻲ .. ﻏﻴﺮﻫﺎ ﻏﻠﻄﺎﺗﻬﻢ ﻛﻮﺍﺭﺙ ﻭﺗﻤﺸﻲ ﻭﺗﺘﻌﺪﺍ ..
ﻣﻌﺎﻭﻳﻪ : ﺍﻧﻲ ﻣﺎﻧﻌﺪﻳﺶ ..
ﺣﻨﺎﻥ : ﻳﻌﻨﻲ ﻟﻮ ﺟﺎﻙ ﻳﻮﻡ ﻭﻏﻠﻄﺖ ﻣﺶ ﺣﺘﺤﺘﺎﺝ ﻳﻌﺪﻭﻟﻚ ..
ﻣﻌﺎﻭﻳﻪ : ﻣﺎﻓﻲ ﺣﺪ ﻧﻐﻠﻂ ﻓﻴﻪ ﺑﺶ ﻳﻌﺪﻳﻠﻲ ﻓﺤﻴﺎﺗﻲ ﺍﻟﻜﻞ ﻳﺨﺎﻓﻮﺍ ﻳﻐﻠﻄﻮﺍ ﻣﻌﺎﻱ ..
ﺣﻨﺎﻥ : ﺭﺑﻚ؟
ﻣﻌﺎﻭﻳﻪ ﺍﻧﺼﺪﻡ ..
ﺣﻨﺎﻥ : ﻣﺎﻏﻠﻄﺶ ﻓﻲ ﺣﻘﻪ ﺑﻜﻞ ... ﻣﺴﺘﺤﻴﻞ ﻣﺎﻓﻲ ﺣﺪ ﻓﻴﻨﺎ ﺧﺎﻟﻲ ﻣﻦ ﺍﻟﺬﻧﻮﺏ ﺑﺲ ﻛﻠﻨﺎ ﻧﺘﻤﻨﻮﺍ ﻟﻮ ﺭﺑﻲ ﻳﻌﺪﻳﻬﺎ ... ﻫﻮ ﻳﻌﻄﻴﻨﺎ ﻭﻗﺖ ﻧﺼﻠﺤﻮﺍ ﺑﺮﻏﻢ ﻗﻮﺗﻪ ﻭﺳﻠﻄﺎﻧﻪ ﻭﻋﻈﻤﺘﻪ ﻳﻤﻬﻞ ﻓﻴﻨﺎ ﻭﺻﺎﺑﺮ ﻋﻠﻴﻨﺎ ﺑﺮﻏﻢ ﻓﻲ ﺍﻟﻠﻲ ﻧﺎﻛﺮ ﻓﻀﻠﻪ ﻭﻳﻌﺼﻲ ﻓﻴﻪ ﺑﻨﻌﻤﻪ .. ﻫﻮ ﻳﻌﻄﻲ ﻓﺮﺻﻪ ﻭﻳﻌﺪﻱ .. ﺍﻧﺖ ﻣﻨﻮ ﺑﺶ ﻣﺎﺗﻌﺪﻳﺶ ...
ﻣﻌﺎﻭﻳﻪ : ﺗﺤﺒﻲ ﺗﻠﻘﻲ ﻣﺤﺎﺿﺮﺍﺕ ﻫﻠﺒﻪ ...
ﺣﻨﺎﻥ : ﺍﻫﺰﺍ ﺑﺮﺍﺣﺘﻚ ﺑﺲ ﻻﺯﻡ ﺗﻌﺮﻑ ﺍﻥ ﺩﻋﻮﺓ ﻭﺣﺪﻩ ﻣﻨﻬﺎ ﻛﻔﻴﻠﻪ ﺗﻬﺪ ﺍﻟﻠﻲ ﺑﺎﻧﻴﻪ ﻛﻠﻪ ﻉ ﺭﺍﺳﻚ ... ﻷﻧﻪ ﻋﺪﺍﻟﻚ ﻫﻠﺒﻪ ﻭﻣﻤﻜﻦ ﻫﺎﻟﻤﺮﺓ ﻣﺎﻳﻌﺪﻳﺶ ....
ﻣﻌﺎﻭﻳﻪ : ﻛﻤﻠﺘﻲ .. ﺍﺷﺮﻟﻬﺎ ﺑﻴﺪﻩ ﻉ ﺍﻟﺒﺎﺏ ... ﺗﻮﻛﻠﻲ ..
ﺣﻨﺎﻥ ﻃﺎﺭﺗﻠﻬﺎ ﻣﻨﻪ ﺧﺎﻃﺮﻫﺎ ﺗﻀﺮﺑﻪ ﻣﻐﺮﻭﺭ ﻭﻣﺘﻜﺒﺮ .. ﻭﻣﺘﻐﻄﺮﺱ .. ﻟﻔﺖ ﻭﻃﻠﻌﺖ ﻭﺳﻜﺮﺕ ﺍﻟﺒﺎﺏ ..
ﺍﻣﺎ ﻫﻮ ﺷﻮﻳﻪ ﻭﺍﺭﺗﺴﻤﺖ ﻉ ﻭﺟﻬﻪ ﺍﺑﺘﺴﺎﻣﻪ ﺧﻔﻴﻔﻪ ﻭﺗﻨﻬﺪ .
ﻓﺎﺕ ﻫﺬﺍ ﺍﻟﻴﻮﻡ ﻭﺟﻲ ﺍﻟﻴﻮﻡ ﺍﻟﻠﻲ ﺑﻌﺪﻩ ﻳﻮﻡ ﺍﻹﺟﺘﻤﺎﻉ ..
ﻭﺻﻠﺖ ﺣﻨﺎﻥ ﻉ ﻭﻗﺘﻬﺎ ﻟﻘﺖ ﻓﻲ ﺍﻟﻘﺎﻋﻪ ﺍﻟﻜﺮﺍﺳﻲ ﻣﺘﺎﻉ ﻃﺎﻭﻟﺔ ﺍﻹﺟﺘﻤﺎﻋﺎﺕ ﺗﻌﺒﺖ ﻗﻌﺪﺕ ﻭﺍﻗﻔﻪ .. ﺗﺮﺍﺟﻲ ﻟﻴﻦ ﺷﺎﻓﺖ ﺍﻟﺴﻜﺮﺗﻴﺮﺓ ﺧﺸﺖ ﻣﻦ ﺍﻟﺒﺎﺏ ﻭﻓﻴﺪﻫﺎ ﻣﻠﻔﺎﺕ ﺷﺒﺤﺖ ﻟﺤﻨﺎﻥ ﺍﺑﺘﺴﻤﺖ ﻭﻏﻤﺰﺗﻠﻬﺎ .. ﺣﻨﺎﻥ ﺿﺤﻜﺖ ﺑﻔﺮﺣﻪ ﻭﺭﺩﺕ ﻧﻔﺲ ﺍﻟﻐﻤﺰﺓ ...
ﺧﺶ ﻫﻮ ﺑﻌﺪﻫﺎ ﻭﻣﻌﺎﻩ ﺍﻳﻤﻦ ﺍﻗﺒﺎﻝ ... ﺗﺸﺒﺤﻠﻪ ﻛﻴﻒ ﻳﻤﺸﻲ ﺑﻐﺮﻭﺭ ﻭﻛﺎﻥ ﻛﻌﺎﺩﺗﻪ ﻓﻜﺎﻣﻞ ﺍﻧﺎﻗﺘﻪ ﻭﻓﻐﺎﻳﻪ ﺍﻟﻮﺳﺎﻣﻪ ﻗﺎﻟﺖ ﻓﻲ ﻧﻔﺴﻬﺎ " ﺳﻨﻔﻮﺭ ﺍﻟﻤﻐﺮﻭﺭ " ﺿﺤﻜﺖ ﺿﺤﻜﻪ ﺧﻔﻴﻔﻪ ﻭﻗﺪﻣﺖ ﻭﻗﻌﻤﺰﺕ ﻓﻤﻜﺎﻧﻬﺎ ..
ﻗﻌﻤﺰ ﻉ ﻛﺮﺳﻴﻪ ﺷﺎﻓﻬﺎ ﻗﺎﻣﺖ ﺭﺍﺳﻬﺎ ﺟﺖ ﻋﻴﻨﻬﺎ ﻓﻌﻴﻨﻪ ﺷﺒﺤﺘﻠﻪ ﺑﺤﺪﻩ ﻭﻏﻴﺮﺕ ﻋﻴﻮﻧﻬﺎ ...
ﻫﻮ ﺍﺑﺘﺴﻢ ﻉ ﺧﻔﻴﻒ .. ﻭﺑﺪﻭﺍ ﺍﺟﺘﻤﺎﻋﻬﻢ ﺍﻟﻠﻲ ﻃﺎﻝ ﺳﺎﻋﺘﻴﻦ .. ﺗﻜﻠﻤﻮﺍ ﻓﻴﻬﺎ ﻫﻠﺒﻪ ﻛﻼﻡ .. ﻭﺣﻨﺎﻥ ﺷﺮﺣﺘﻠﻬﻢ ﻉ ﺍﻟﺘﺼﻤﻴﻢ ﺍﻟﻠﻲ ﺍﺛﺎﺭ ﺍﻋﺠﺎﺑﻬﻢ ﺑﺸﺪﻩ .. ﺍﻟﻨﻈﺮﺍﺕ ﺍﻟﻤﻌﺠﺒﻪ ﻛﺎﻥ ﻳﻠﻘﻰ ﻳﻔﻘﺺ ﻋﻴﻮﻥ ﺻﺎﺣﺎﺑﻬﺎ ﺧﺼﻮﺻﺎ ﺍﻥ ﻃﻠﺘﻬﺎ ﺍﻟﻴﻮﻡ ﻛﺎﻧﺖ ﺣﻠﻮﺓ ...
ﺍﺗﻔﻘﻮﺍ ﻉ ﻛﻞ ﺷﻲ ﺑﻌﺪ ﺗﻨﺎﻗﺸﻮﺍ ﻓﻲ ﺑﻨﻮﺩ ﺍﺟﺘﻤﺎﻋﻬﻢ .. ﺗﻢ ﺍﻹﺟﺘﻤﺎﻉ ﻭﻛﺎﻥ ﻓﻲ ﺍﺷﺨﺎﺹ ﻣﻦ ﺍﻟﻤﺴﺎﻫﻤﻴﻦ ﺟﻮﻫﺎ ﻳﺘﻌﺮﻓﻮﺍ ﻋﻠﻴﻬﺎ .. ﺍﻟﻠﻲ ﻳﻤﺪ ﺍﻳﺪﻳﻪ ﻳﺴﻠﻢ ﻛﺎﻧﺖ ﺗﺮﺩ ﻓﻴﻪ ﺑﻠﺒﺎﻗﻪ ﻟﻬﺬﺍ ﺑﺮﻏﻢ ﺍﻹﺣﺮﺍﺝ ﻣﺎﺧﺪﻭﺵ ﻣﻨﻬﺎ ﻣﻮﻗﻒ .. ﺑﺲ ﻫﻮ ﺍﻟﺤﺮﻛﻪ ﻫﺎﺩﻱ ﺗﻬﺒﻞ ﻓﻴﻪ ﺑﺰﻳﺎﺩﻩ ﺛﺒﺎﺗﻬﺎ ﻉ ﻣﺒﺪﺃﻫﺎ ﻭﺛﻘﺘﻬﺎ ﺇﻥ ﺍﻟﻠﻲ ﺩﻳﺮ ﻓﻴﻪ ﺻﺢ ﻭﻣﻘﺘﻨﻌﻪ ﺑﻴﻪ ﻣﺨﻠﻴﻬﺎ ﺗﻜﺒﺮ ﻓﻲ ﻋﻴﻨﻪ ﻟﺤﻈﻪ ﻭﺭﺍ ﻟﺤﻈﻪ ..
ﻓﻀﺖ ﺍﻟﻘﺎﻋﻪ ﻭﻣﻌﺎﻭﻳﻪ ﻛﺎﻥ ﺑﺮﺍ ﻣﻊ ﺃﻗﺒﺎﻝ ﻭﻭﺍﺣﺪ ﻣﻦ ﺍﻟﻤﺴﺎﻫﻤﻴﻦ ..
ﻭﻟﺪﺍﺧﻞ ﺣﻨﺎﻥ ﻭﺃﻳﻤﻦ ﻭﺃﻣﻨﻪ ﻭﺍﻟﺴﻜﺮﺗﻴﺮﻩ ...
ﺁﻣﻨﻪ : ﻧﻬﻨﻴﻚ ..
ﺣﻨﺎﻥ : ﺷﻜﺮﺍ ...
ﺍﻳﻤﻦ : ﺍﻧﺘﻲ ﻣﻜﺴﺐ ﻟﻴﻨﺎ ..
ﺣﻨﺎﻥ ﺑﻀﺤﻜﻪ : ﺧﻼﺹ ﻳﺎﺟﻤﺎﻋﻪ ﺗﺸﺒﻌﺖ ﻣﺪﺡ ﺍﻟﻴﻮﻡ ﻟﻴﻦ ﺯﻫﻘﺖ ﻛﺒﺪﻱ .. ﺿﺤﻜﻮﺍ ﻛﻠﻬﻢ ..
ﺍﻟﺴﻜﺮﺗﻴﺮﻩ : ﺑﺲ ﺍﺳﺘﺎﺫﻩ ﺍﻗﺒﺎﻝ ﺍﻋﺘﺮﺿﺖ ﻉ ﺑﻌﺾ ﺍﻟﺤﺎﺟﺎﺕ ..
ﺍﻳﻤﻦ : ﻣﺎﺩﻭﺭﻳﻬﺎﺵ ﺗﻲ ﻣﺎﻋﺎﺭﻓﻪ ﻭﻻﻓﺎﻫﻤﻪ ﻓﻴﻬﺎ ﺣﺎﺟﻪ ﻗﺎﻋﺪﺗﻠﻨﺎ ﺯﻱ ﺍﻟﻬﻢ ﻏﻴﺮ ﺗﺤﻔﺮﻟﻨﺎ ﻋﻨﺪﻩ ﻭﺧﻼﺹ .. ﻋﻘﺮﺏ ﺍﻟﺸﻤﺲ ..
ﻛﻠﻬﻢ : ﻫﻬﻬﻬﻬﻬﻬﻬﻬﻬﻬﻬﻬﻪ ..
ﺣﻨﺎﻥ ﺑﻀﺤﻜﻪ : ﺭﺑﻲ ﻳﻬﺪﻳﻚ ﻳﺎﺃﻳﻤﻦ .. ﺍﺳﺘﻐﻔﺮ ﺍﻟﻠﻪ .. ﻓﻜﻮﻧﺎ ﻣﻦ ﺍﻟﻘﺮﻣﻪ ﺑﺎﻟﻠﻪ ..
ﺍﻟﺴﻜﺮﺗﻴﺮﻩ ﺑﻀﺤﻜﻪ ؛ ﺍﻳﻪ ﻭﺍﻟﻠﻪ ﻣﺶ ﻻﻗﻴﻪ ﺣﺴﻨﺎﺗﻲ ﻓﻲ ﺍﻟﺸﺎﺭﻉ .. ﺧﻞ ﻧﺎﺧﺪ ﺍﻟﻤﻠﻔﺎﺕ ﻧﺤﻄﻬﻢ ﻉ ﻣﻜﺘﺐ ﺍﺳﺘﺎﺫ ﻣﻌﺎﻭﻳﻪ ..
ﺣﻨﺎﻥ : ﺭﺍﻙ ﺗﻨﺴﻲ ﺣﺎﺟﻪ ﻳﻔﺼﻞ ﻋﻠﻴﻚ ﺳﻨﻔﻮﺭ ﺍﻟﻤﻐﺮﻭﺭ ﻭﻣﻌﺎﺵ ﻧﺨﻠﺼﻮﺍ ..
ﺍﻳﻤﻦ : ﻫﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻪ .. ﻗﻮﻳﻪ ﻭﺣﻖ ﺭﺑﻲ ... ﺍﻋﺘﻤﺪﺕ ﻭﺍﻟﻠﻪ ..
ﺍﻣﻨﻪ ﺑﻀﺤﻜﻪ : ﻧﻬﺎﺭ ﺍﺣﺮﺵ ﻛﺎﻥ ﻳﺴﻤﻊ ...
ﺣﻨﺎﻥ ﺑﻀﺤﻜﻪ : ﻗﻮﻟﻮﻟﻲ ﻫﺬﺍ ﻭﻳﻦ ﺍﻧﺘﻲ ﻣﻦ ﺑﻜﺮﻱ ﺗﺘﻜﻠﻤﻲ ﻉ ﺍﻟﻘﺮﻣﻪ ..
ﺿﺤﻜﺖ ﺍﻟﺴﻜﺮﺗﻴﺮﺓ : ﻛﻴﻒ ﺟﻴﺖ ﺑﻨﻘﻮﻟﻬﺎ
ﻭﻫﻤﺎ ﻳﻀﺤﻜﻮﺍ ﺧﺶ ﻋﻠﻴﻬﻢ ﻭﻣﻌﺎﻩ ﺍﻗﺒﺎﻝ .. ﺭﻗﻴﺘﻠﻪ ﻟﻤﺎ ﻟﻘﺎﻫﺎ ﺗﻀﺤﻚ ﻣﻊ ﺍﻳﻤﻦ ..
ﻣﻌﺎﻭﻳﻪ : ﺷﻦ ﺍﻟﻤﻬﺰﻟﻪ ﻫﺎﺩﻱ .. ﻫﻴﺎ ﻛﻞ ﺣﺪ ﻟﺨﺪﻣﺘﻪ ... ﻭﺍﻧﺘﻲ ﻳﺎﺑﺎﺵ ﻣﻬﻨﺪﺳﻪ ﻛﻤﻠﺘﻲ ﺷﻐﻠﻚ ﺗﻘﺪﺭﻱ ﺗﺘﻔﻀﻠﻲ ... ﺍﻳﻤﻦ ﺗﻌﺎﻟﻰ ..
ﻃﻠﻊ ﻭﻟﺤﻘﻪ ﺍﻳﻤﻦ ﻭﺍﻟﺴﻜﺮﺗﻴﺮﻩ ..
ﻭﺣﻨﺎﻥ ﻗﺎﻋﺪﻩ ﻭﺍﻗﻔﻪ ﻣﺼﺪﻭﻣﻪ ﻓﺄﺳﻠﻮﺑﻪ ﺍﻟﻤﻬﻴﻦ ﺍﻟﻠﻲ ﻛﻠﻤﻬﺎﺑﻴﻪ ..
ﺃﻣﻨﻪ : ﻫﻮ ﻫﻜﻲ ﺭﻩ ﻫﺬﺍ ﻃﺒﻌﻪ ﻭﺃﺳﻠﻮﺑﻪ ..
ﺣﻨﺎﻥ ﻭﻻﻛﻠﻤﻪ ﻣﺸﺖ ﺑﺘﻄﻠﻊ ﻟﻘﺖ ﺍﻗﺒﺎﻝ ﻗﺪﺍﻣﻬﺎ ﺷﺒﺤﺘﻠﻬﺎ ﻣﻦ ﻓﻮﻕ ﻟﻠﻮﻃﺎ ﻭﻫﻲ ﻣﺒﺘﺴﻤﻪ ﺑﻨﺼﺮ .. ﺣﻔﺘﻬﺎ ﺣﻨﺎﻥ ﻭﻃﻠﻌﺖ ﻭﻫﻲ ﺷﺎﺩﻩ ﺩﻣﻌﺘﻬﺎ ﺣﺴﺖ ﺑﻜﺮﺍﻣﺘﻬﺎ ﺍﻧﺠﺮﺣﺖ ﻗﺪﺍﻡ ﻣﺠﻤﻊ ﻛﻠﻤﻬﺎ ﺑﻬﺎﻷﺳﻠﻮﺏ ﻭﻛﺄﻧﻬﺎ ﺧﺪﺍﻣﻪ ﻋﻨﺪﻩ ﻃﻠﻌﺖ ﻣﻦ ﺍﻟﺸﺮﻛﻪ ﻭﺭﻛﺒﺖ ﺳﻴﺎﺭﺗﻬﺎ ﻭﺗﻮﺟﻬﺖ ﻟﻠﺤﻮﺵ ..
ﻋﻨﺪﻩ ﻫﻮ ..
ﻣﻌﺎﻭﻳﻪ ﻣﻀﺎﻳﻖ ﻣﻦ ﻧﻔﺴﻪ ﻫﻠﺒﻪ ... ﻣﺶ ﻗﺎﺩﺭ ﻳﺮﻛﺰ ﺑﻜﻞ ..
ﻣﻌﺎﻭﻳﻪ ﺣﻂ ﺍﻳﺪﻩ ﻉ ﺟﺒﻬﺘﻪ : ﺍﻳﻤﻦ ﺑﺮﺍ ﺷﻮﻓﻠﻲ ﺍﻟﻤﻬﻨﺪﺳﻪ ﺑﺴﺮﻋﻪ ..
ﺍﻳﻤﻦ : ﺣﺎﺿﺮ ... ﻉ ﺧﺸﺖ ﺍﻗﺒﺎﻝ ..
ﺍﻗﺒﺎﻝ : ﺍﺣﺴﻦ ﻣﺎﺩﺭﺕ ﻫﻜﻲ ﺣﻄﻴﺘﻠﻬﺎ ﺣﺪ ...
ﺍﻳﻤﻦ : ﻉ ﻣﻦ ﺗﺘﻜﻠﻤﻲ ﺍﻧﺘﻲ ..
ﺍﻗﺒﺎﻝ ﺑﺘﻬﻜﻢ : ﺍﻟﻤﻬﻨﺪﺳﻪ ﺍﻟﻤﺜﺎﻟﻴﻪ .. ﺭﻭﺣﺖ ﻭﺩﻣﻌﺘﻬﺎ ﻓﻌﻴﻮﻧﻬﺎ .
ﻣﻌﺎﻭﻳﻪ ﻗﻠﺒﻪ ﺍﻧﻘﺴﻢ ﻧﺼﻴﻦ .. ﺍﺿﺎﻳﻖ ﻣﻦ ﻧﻔﺴﻪ ﺍﻛﺜﺮ ﻭﺍﻛﺜﺮ ..
ﺍﻳﻤﻦ : ﻭﺗﻘﻮﻟﻲ ﻓﻴﻬﺎ ﻭﺍﻧﺘﻲ ﺣﺎﻟﻪ ﻛﺸﺨﺘﻚ ﻫﻜﻲ ﻋﻼﺵ ..
ﺍﻗﺒﺎﻝ : ﺗﻜﻠﻢ ﻛﻮﻳﺲ .
ﻣﻌﺎﻭﻳﻪ ﺑﺼﻮﺕ ﻋﺎﻟﻲ : ﺑﺮﺍﺍﺍﺍﺍﺍﺍﺍﺍﺍﺍﺍﺍﺍﺍ ..
ﺍﻟﺰﻭﺯ ﺍﻧﺘﻔﻈﻮﺍ ﻭﻃﻠﻌﻮﺍ ﺑﺴﺮﻋﻪ ...
ﺍﻣﺎ ﻫﻮ ﺍﺗﻜﻰ ﻉ ﺍﻟﻜﺮﺳﻲ ﻭﻏﻤﺾ ﻋﻴﻮﻧﻪ ﻭﺍﺫﻛﺮ ﺷﻦ ﻗﺎﻟﻠﻬﺎ ... ﻣﺴﺢ ﺑﺈﻳﺪﻩ ﻉ ﻭﺟﻬﻪ ﻭﺯﻓﺮ ﺑﻘﻮﺓ ...
... ﻳﺘﺒﻊ
٢٣ / ١٠ / ٢٠٢٠ · Facebook for Android · ﺭ
