# ﻣﻮﺳﻢ _ ﺍﻟﺘﻮﻟﻴﺐ
# ﺟﻤﺎﻥ _ ﻓﺮﻳﺪ
# ﺍﻟﺠﺰﺀ _ ﺍﻟﺨﺎﻣﺲ
ﻃﻠﻌﺖ ﺍﻟﺼﺒﺢ ﻛﻌﺎﺩﺗﻬﺎ ﺍﺩﻳﺮ ﻓﻲ ﺍﻟﻠﻲ ﺩﻳﺮ ﻓﻴﻪ ﻛﻞ ﻳﻮﻡ .. ﺑﺲ ﻛﺎﻧﺖ ﺇﺑﺘﺴﺎﻣﺘﻬﺎ ﻏﺎﻳﺒﻪ ﻭﻗﻠﺒﻬﺎ ﺍﻟﻄﻴﺐ ﻣﺠﺮﻭﺡ ﻣﻦ ﺍﺣﺐ ﺍﻟﻨﺎﺱ ﻟﻴﻪ ... ﺧﺸﺖ ﻟﻠﻜﻮﺷﻪ ﺧﺪﺕ ﺑﺮﻳﻮﺵ ﻭﺧﺒﺰﺓ ... ﻣﺸﺖ ﻟﺤﻮﺵ ﻟﻤﺮﺍﺓ ﺣﻄﺘﻠﻬﺎ ﺍﻟﺨﺒﺰﺓ ﻭﻣﺸﺖ ... ﻛﻤﻠﺖ ﻃﺮﻳﻘﻬﺎ ﻭﻫﻲ ﺳﺎﺭﺣﻪ ﻓﺎﺗﺖ ﻣﺤﻞ ﺍﻟﻮﺭﺩ ﻭﺍﻟﻌﻢ ﻣﺴﻌﻮﺩ ﺃﺳﺘﻐﺮﺏ ﻧﺎﺩﺍﻫﺎ ..
ﺍﻟﻌﻢ ﻣﺴﻌﻮﺩ : ﺣﻨﺎﻥ ﺑﻨﺘﻲ .. ﻳﺎﺣﻨﺎﻥ ..
ﺣﻨﺎﻥ ﺍﺳﺘﺎﻗﻀﺖ ﻭﺍﻟﺘﻔﺘﺖ ﻭﺍﺑﺘﺴﻤﺖ ﻣﺠﺎﻣﻠﻪ : ﺻﺒﺎﺡ ﺍﻟﺨﻴﺮ ﻋﻤﻲ ﻣﺴﻌﻮﺩ ..
ﺍﻟﻌﻢ ﻣﺴﻌﻮﺩ : ﺻﺒﺎﺡ ﺍﻟﺨﻴﺮﺍﺕ ﻳﺎﺑﻨﺘﻲ .. ﺧﻴﺮﻙ ﺇﻥ ﺷﺎﺀ ﺍﻟﻠﻪ ﺧﻴﺮ؟ !
ﺣﻨﺎﻥ ﺑﺈﺑﺘﺴﺎﻣﻪ : ﺧﻴﺮﻧﻲ ﻛﻮﻳﺴﻪ ﻣﺎﻓﻴﺎ ﺷﻲ ..
ﺍﻟﻌﻢ ﻣﺴﻌﻮﺩ ﺍﺑﺘﺴﻢ : ﺍﺳﺘﻐﺮﺑﺖ ﻛﻴﻒ ﻣﺎﺳﻠﻤﺘﻴﺶ ﻋﻠﻴﺎ ﻭﺧﺸﻴﺘﻲ ﺗﻔﺮﺟﺘﻲ ﻉ ﺍﻟﻮﺭﺩ ..
ﺣﻨﺎﻥ : ﺳﺎﻣﺤﻨﻲ ﺷﺮﺩﺕ ﺷﻮﻳﺔ ..
ﺍﻟﻌﻢ ﻣﺴﻌﻮﺩ : ﻣﻌﻠﻴﺸﻲ .. ﺟﺎﻳﺒﻠﻚ ﺣﺎﺟﻪ ﺍﻟﻴﻮﻡ ...
ﺣﻨﺎﻥ : ﺷﻦ ﻫﻲ ؟
ﺍﺑﺘﺴﻢ ﺍﻟﻌﻢ ﻣﺴﻌﻮﺩ ﻭﺧﺶ ﻟﻠﻤﺤﻞ ﺷﻮﻳﻪ ﻭﻃﻠﻊ ﻭﻓﻴﺪﻩ ﺑﺎﻗﻪ ﺗﻮﻟﻴﺐ ﻓﻴﻬﺎ 4 ﻭﺭﺩﺍﺕ ﻟﻮﻧﻬﻢ ﺑﻨﻔﺴﺠﻲ ..
ﺣﻨﺎﻥ ﺍﺑﺘﺴﻤﺖ ﺑﺬﻫﻮﻝ : ﺣﻠﻮﺍﺕ ﻫﻠﺒﻪ ...
ﺍﻟﻌﻢ ﻣﺴﻌﻮﺩ ﻣﺪﻫﻮﻟﻬﺎ : ﻃﺒﻌﺎ ﻫﺪﻳﻪ ﻣﺶ ﻟﻠﺒﻴﻊ ..
ﺧﺪﺗﻬﻢ ﻭﺍﺑﺘﺴﻤﺖ : ﺭﺑﻲ ﻳﻄﻮﻝ ﻓﻌﻤﺮﻙ ﻉ ﻃﺎﻋﺘﻪ .. ﺗﺴﻠﻢ ﻳﺎﻋﻤﻲ ..
ﺍﻟﻌﻢ ﻣﺴﻌﻮﺩ : ﺍﻧﺘﻲ ﺯﻱ ﺑﻨﺘﻲ ﻳﺎﺣﻨﺎﻥ ﻭﺗﺴﺘﺎﻫﻠﻲ ﻛﻞ ﺧﻴﺮ ..
ﺣﻨﺎﻥ ﺍﺑﺘﺴﻤﺖ ﻭﻋﻴﻮﻧﻬﺎ ﺗﻌﺒﻮﺍ ﺩﻣﻮﻉ : ﺑﺎﺭﻙ ﺍﻟﻠﻪ ﻓﻴﻚ ..
ﺍﺳﺘﺄﺫﻧﺖ ﻣﻨﻪ ﻭﻣﺸﺖ ﻧﺰﻟﻮﺍ ﺩﻣﻮﻋﻬﺎ ﻟﻮﻫﻠﻪ ﺟﻲ ﺑﻮﻫﺎ ﻗﺪﺍﻡ ﻋﻴﻮﻧﻬﺎ ﺣﺴﺖ ﺭﻭﺣﻬﺎ ﻣﺤﺘﺎﺟﺘﻠﻪ ﻫﻠﺒﻪ .. ﻣﺴﺤﺖ ﺩﻣﻮﻋﻬﺎ ﻭﻭﺻﻠﺖ ﻟﺤﻮﺷﻬﺎ ﺧﺸﺖ ﻭﺳﻜﺮﺕ ﺍﻟﺒﺎﺏ .. ﻭﺯﻋﺖ ﻧﻈﺮﻫﺎ ﻉ ﺍﻟﺤﺪﻳﻘﻪ ﺑﻌﺪﻳﻦ ﻛﻤﻠﺖ ﻃﺮﻳﻘﻬﺎ ﻟﻠﺒﺎﺏ ﺍﻟﺪﺧﻼﻧﻲ ﻭﺻﻠﺖ ﻭﻗﻔﺖ ﻗﺪﺍﻣﻪ ﺑﻄﻠﻊ ﺍﻟﻤﻔﺘﺎﺡ .. ﺷﺒﺤﺖ ﻟﻠﺒﺎﻗﻪ ...
ﺣﻨﺎﻥ " ﺍﻟﻠﻮﻥ ﻫﺬﺍ ﻳﻘﻮﻟﻮﺍ ﻋﻠﻴﻪ ﻟﻮﻥ ﺣﺰﻥ ﻭﻓﺮﺍﻕ ..." ﻗﻠﺒﻬﺎ ﻭﺟﻌﻬﺎ .. ﺗﻨﻬﺪﺕ ﻭﻓﺘﺤﺖ ﺍﻟﺒﺎﺏ ﻭﺧﺸﺖ .. ﺣﻄﺖ ﺍﻟﺒﺎﻗﻪ ﻉ ﺍﻟﻄﺎﻭﻟﻪ ﻭﻣﺎﻋﺮﻓﺘﺶ ﻭﻳﻦ ﺍﺩﻳﺮ ﺍﻟﻮﺭﺩ ﻷﻥ ﺍﻟﻔﺎﺯﺍﺕ ﻣﻌﺒﻴﺎﺕ ... ﺗﻮﺟﻬﺖ ﻟﻠﺸﻤﺎﻋﻪ ﺣﻮﻟﺖ ﺍﻟﻌﺒﺎﻳﻪ ﻭﺍﻟﻮﺷﺎﺡ ﻭﺧﺸﺖ ﻟﻠﻤﻄﺒﺦ ﺍﺩﻳﺮﻟﻪ ﻓﻲ ﺍﻟﻘﻬﻮﺓ ..
" ﺻﺒﺎﺡ ﺍﻟﺨﻴﺮ "..
ﺗﺄﻟﻤﺖ ﻣﻦ ﻧﺒﺾ ﻗﻠﺒﻬﺎ ﺍﻟﻠﻲ ﻛﺎﻥ ﻣﺘﺴﺎﺭﻉ ... ﻭﺭﺩﺕ : ﺻﺒﺎﺡ ﺍﻟﺨﻴﺮ ..
ﻧﻀﺎﻝ : ﻣﺎﺩﻳﺮﺵ ﻗﻬﻮﺓ .. ﺍﻟﻴﻮﻡ ﺑﻨﻤﺸﻲ ﻟﻠﺤﻘﻮﻝ ﺍﻟﻨﻔﻄﻴﻪ ﺑﻨﻘﻌﺪ ﺗﻼﺗﻪ ﺍﻳﺎﻡ ﻭﺑﻨﺮﻭﺡ ﺇﻥ ﺷﺎﺀ ﺍﻟﻠﻪ ﺍﻟﺠﻤﻌﻪ ﺍﻟﻌﺸﻴﻪ ...
ﺷﺒﺤﺘﻠﻪ : ﻣﺎﻗﻠﺘﺶ ﻗﺒﻞ ..
ﻧﻀﺎﻝ : ﻛﻞ ﺷﻲ ﺻﺎﺭ ﺃﻣﺲ ... ﻭﺍﻧﺘﻲ ﻣﺎﻋﻄﺘﻨﻴﺶ ﻓﺮﺻﻪ ﻧﻘﻮﻟﻚ ..
ﺣﻨﺎﻥ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ﻭﺳﻜﺘﺖ ..
ﻧﻀﺎﻝ : ﺑﻮﺳﻴﻠﻲ ﺍﻟﺒﻨﺎﺕ ﻋﺎﺭﻓﺘﻨﻲ ﻣﺎﻧﺤﺒﺶ ﻧﺴﻠﻢ ﻋﻠﻴﻬﻢ ﻭﺍﻧﻲ ﻣﺴﺎﻓﺮ ..
ﺣﻨﺎﻥ ﺑﺄﻟﻢ : ﺑﺎﻫﻲ ...
ﻧﻀﺎﻝ : ﻣﻊ ﺍﻟﺴﻼﻣﻪ .. ﻭﻟﻒ ﻭﻣﺸﻲ ﻓﺘﺢ ﺍﻟﺒﺎﺏ ﻭﻃﻠﻊ ﻭﺳﻜﺮﻩ ﻭﺭﺍﻩ ..
ﺣﻨﺎﻥ ﻧﺰﻟﺖ ﻣﻦ ﻋﻴﻨﻬﺎ ﺩﻣﻌﻪ ﻻﺳﻠﻢ ﻋﻠﻴﻬﺎ ﻛﻮﻳﺲ ﻭﻻﺃﻋﺘﺬﺭ ﻣﻨﻬﺎ ﻉ ﺍﻟﻠﻲ ﻗﺎﻟﻪ ﺃﻣﺲ ... ﻧﻀﺎﻝ ﺻﺢ ﻟﻴﻪ ﻣﺪﻩ ﻃﻮﻳﻠﻪ ﻣﺶ ﺯﻱ ﻧﻀﺎﻝ ﺍﻟﻠﻲ ﺣﺒﺎﺗﻪ ﻣﻦ ﺳﻨﻴﻦ ﻟﻜﻦ ﺍﻟﻔﺘﺮﻩ ﺍﻷﺧﻴﺮﻩ ﺗﻐﻴﺮ ﻫﻠﺒﻪ ﻫﻠﺒﻪ ...
ﺳﻤﻌﺖ ﺩﻭﺷﻪ ﺑﻨﺎﺗﻬﺎ ﻧﺎﺯﻻﺕ ﻣﻦ ﻓﻮﻕ ﻣﺴﺤﺖ ﺩﻣﻮﻋﻬﺎ ﺑﺴﺮﻋﻪ ﻭﺗﺼﻨﻌﺖ ﺇﺑﺘﺴﺎﻣﻪ ... ﻭﺗﺖ ﺍﻟﻔﻄﻮﺭ ...
ﻟﺒﻨﻰ ﺑﺎﺳﺘﻬﺎ ﻣﻦ ﺧﺪﻫﺎ : ﺻﺒﺎﺣﻮ ﻳﺎﺳﻤﺢ ...
ﺣﻨﺎﻥ ﺑﻀﺤﻜﻪ : ﺻﺒﺎﺡ ﺍﻟﻮﺭﺩ ﻉ ﺣﻠﻮﺗﻲ ..
ﺭﻫﻒ : ﺻﺒﺎﺡ ﺍﻟﺨﻴﺮ ﻣﺎﻣﺎ ..
ﺣﻨﺎﻥ ﺍﺑﺘﺴﻤﺖ : ﺻﺒﺎﺡ ﺍﻟﺨﻴﺮﺍﺕ ﻭﺍﻟﻮﺭﺩﺍﺕ ﻉ ﺣﺒﻴﺒﺘﻲ ...
ﻟﺒﻨﻰ : ﺑﺎﺑﺎ ﻃﻠﻊ ..
ﺣﻨﺎﻥ ﺑﻀﻴﻖ ﻣﺨﻔﻲ ﺑﺈﺑﺘﺴﺎﻣﻪ : ﺍﻳﻪ ﻣﺎﺷﻲ ﻟﻠﺤﻘﻮﻝ ﻭﻗﺎﻟﻲ ﺑﻮﺳﻴﻬﻤﻠﻲ .. ﺑﺎﺳﺘﻬﻢ ﺍﻟﺰﻭﺯ ﻭﻃﻠﻌﺖ ﺍﻟﺼﻮﺍﻧﻲ ﺣﻄﺘﻬﻢ ﻉ ﺍﻟﻄﺎﻭﻟﻪ .. ﻟﺤﻘﻮﻫﺎ ..
ﻟﺒﻨﻰ : ﺍﻣﺘﻰ ﻣﺮﻭﺡ ...
ﺣﻨﺎﻥ ﻭﻫﻲ ﻻﻫﻴﻪ ﺑﺎﻟﻄﺎﻭﻟﻪ : ﻗﺎﻝ ﺇﻥ ﺷﺎﺀ ﺍﻟﻠﻪ ﺍﻟﺠﻤﻌﻪ ﺍﻟﻌﺸﻴﻪ ..
ﻟﺒﻨﻰ : ﻳﻌﻨﻲ ﻣﺶ ﺣﻴﻜﻮﻥ ﻣﻌﺎﻧﺎ ﻓﻲ ﺣﻮﺵ ﺟﺪﻱ ﺍﻟﺠﻤﻌﻪ ﻫﺎﺩﻱ ﻭﻳﺤﻀﺮ ﺍﻟﻤﻔﺎﺟﺄﺓ ﺍﻟﻠﻲ ﺩﺭﻧﺎﻫﺎ ﻟﺤﻨﺎﻱ ...
ﺣﻨﺎﻥ : ﻣﺮﺍﺕ ﻳﻠﺤﻖ ... ﻫﻴﺎ ﻗﻌﻤﺰﻭﺍ ﺃﻓﻄﺮﻭﺍ ...
ﻗﻌﻤﺰﻭﺍ ﺍﻟﺒﻨﺎﺕ .. ﺑﺲ ﻋﻴﻦ ﺭﻫﻒ ﻛﺎﻧﺖ ﻉ ﺃﻣﻬﺎ ﺣﺎﺳﻪ ﺇﻥ ﻓﻲ ﺷﻲ ﺍﻣﻬﺎ ﻋﻴﻮﻧﻬﺎ ﻧﻈﺮﺗﻬﻢ ﺣﺰﻳﻨﻪ ﻭﻧﺒﺮﺓ ﺻﻮﺗﻬﺎ ﻣﺨﻨﻮﻗﻪ ﺑﻌﺾ ﺍﻟﺸﻲ .. ﻓﻀﻠﺖ ﺍﻟﺴﻜﻮﺕ ...
***
ﻃﺎﻟﻊ ﻭﺑﻨﺘﻪ ﻣﻌﺎﻩ ﺷﺒﺤﻠﻬﺎ ﻛﻴﻒ ﻣﻮﻃﻴﻪ ﺭﺍﺳﻬﺎ ﻭﺳﺎﻛﺘﻪ ..
ﻣﻌﺎﻭﻳﻪ : ﻣﺎﺗﻨﺴﻴﺶ ﻏﺪﻱ ﺍﻟﻴﻮﻡ ...
ﻣﻬﺎ : ﺣﺤﺎﺿﺮ ..
ﺗﻮﺟﻪ ﻣﻌﺎﻭﻳﻪ ﻟﺴﻴﺎﺭﺗﻪ ﻓﺘﺤﻠﻪ ﺍﻟﺴﻮﺍﻕ ﺍﻟﺒﺎﺏ ﻭﺭﻛﺐ ﻭﺻﻜﺮﻩ ﻳﺸﺒﺢ ﻟﺒﻨﺘﻪ ﻣﻦ ﻭﺭﺍ ﻧﻈﺎﺭﺍﺗﻪ ﺍﻟﺴﻮﺩ ﻟﻴﻦ ﺭﻛﺒﺖ .. ﺑﻌﺪﻳﻦ ﻗﺎﻝ ﻟﻠﺴﻮﺍﻕ ﻳﺘﺤﺮﻙ ... ﻭﺗﺤﺮﻙ .. ﻃﻠﻊ ﻫﻮ ﺍﻷﻭﻝ ﻭﺑﻨﺘﻪ ﺑﻌﺪﻩ ...
ﻭﻫﻮ ﻓﺎﻟﺴﻴﺎﺭﻩ ..
ﺭﻥ ﺗﻠﻴﻔﻮﻥ ﻣﻌﺎﻭﻳﻪ ﺣﻮﻝ ﻧﻈﺎﺭﺍﺗﻪ ﻭﺍﺑﺘﺴﻢ ﻟﻤﺎ ﺷﺎﻑ ﺍﻹﺳﻢ ﻭﺭﺩ ...
ﻣﻌﺎﻭﻳﻪ : ﺍﻳﻮﻩ ﻳﺎﺑﺮﻭﻑ ...
ﻛﺮﻳﻢ : ﺍﻫﻼ ﻳﺎﻗﻠﻴﻞ ﺍﻟﺨﻴﺮ ... ﻻﺗﺘﺼﻞ ﻻﺗﺴﺄﻝ ﻻﺩﻭﺭ ..
ﻣﻌﺎﻭﻳﻪ ﺑﻀﺤﻜﻪ : ﻳﺎ ﻇﺎﻟﻤﻨﻲ ... ﻛﻨﺖ ﺟﺎﻳﻚ ﺍﻟﻤﺪﻩ ﺍﻟﺠﺎﻳﻪ .. ﻏﻴﺮ ﺍﻧﺖ ﺷﻜﻠﻚ ﺳﺒﻘﺖ ..
ﻛﺮﻳﻢ : ﺍﻣﺲ ﺑﺲ ﺟﻴﺖ ﻟﻠﻴﺒﻴﺎ ... ﻭﻗﺎﻋﺪ ﻓﺤﻮﺷﻲ ..
ﻣﻌﺎﻭﻳﻪ : ﻧﺨﻄﻢ ﻋﻠﻴﻚ ﺑﻌﺪ ﺍﻟﻤﻐﺮﺏ ... ﻏﻴﺮ ﻓﻲ ﺍﻟﻨﻬﺎﺭ ﻣﺮﺗﺒﻂ ﺑﻤﻮﺍﻋﻴﺪ ..
ﻛﺮﻳﻢ : ﺇﻥ ﺷﺎﺀ ﺍﻟﻠﻪ ﻏﻴﺮ ﻓﻲ ﺑﻴﻨﺎﺗﻬﻢ ﻣﻮﻋﺪ ﻏﺮﺍﻣﻲ ...
ﻣﻌﺎﻭﻳﻪ ﺑﻀﺤﻜﻪ : ﺧﻠﻴﺘﻬﻮﻟﻚ ﺃﻧﺖ ...
ﻛﺮﻳﻢ : ﻫﻬﻬﻬﻬﻬﻬﻬﻬﻬﻬﻬﻬﻬﻬﻬﻪ ... ﺗﺎﻓﻪ ﻳﺎﺻﺎﺣﺒﻲ ..
ﻣﻌﺎﻭﻳﻪ ﺑﻀﺤﻜﻪ : ﻗﺎﻝ ﺍﻟﺸﺎﻋﺮ ﺍﻧﺖ ﻣﻌﻠﻢ ﻭﺣﻨﺎ ﻣﻨﻚ ﻧﺘﻌﻠﻢ ..
ﻛﺮﻳﻢ ﺑﻀﺤﻜﻪ : ﺑﺎﻫﻲ ﻳﺎﺇﻣﺒﺮﺍﻃﻮﺭ ﻧﺸﻮﻓﻚ .. ﺳﻼﻡ ..
ﻣﻌﺎﻭﻳﻪ : ﺗﻢ .. ﺳﻼﻡ ﻭﺻﻜﺮ ...
" ﻛﺮﻳﻢ ﺍﻟﺼﺪﻳﻖ ﺍﻟﻮﺣﻴﺪ ﻟﻤﻌﺎﻭﻳﻪ ﺗﻌﺮﻑ ﻋﻠﻴﻪ ﻓﻲ ﺍﻟﻐﺮﺑﻪ .. ﻛﺮﻳﻢ ﻟﺨﺒﺎﻁ ﺷﻮﻳﻪ ﻳﺸﺮﺏ .. ﻭﻣﺘﺎﻉ ﻧﺴﺎﻭﻳﻦ .. ﺑﺲ ﻃﻴﺐ ﻭﺟﺪﻉ ... ﻭﻋﻨﺪﻩ ﻫﻠﺒﻪ ﻣﻮﺍﻗﻒ ﻛﻮﻳﺴﻪ ﻣﻊ ﻣﻌﺎﻭﻳﻪ ﻓﻲ ﺃﺻﻌﺐ ﺍﻟﻈﺮﻭﻑ ﻛﺮﻳﻢ ﻛﺎﻥ ﻣﻌﺎﻩ ... ﻟﺬﻟﻚ ﺗﻤﺴﻚ ﺑﺼﺤﺒﺘﻪ ... ﻛﺮﻳﻢ ﻣﺘﺨﺼﺺ ﻓﻲ ﺍﻟﺠﺮﺍﺣﻪ ﺍﻳﻪ ﺻﺢ ﺩﻛﺘﻮﺭ ﻟﻜﻦ ﻳﺸﺮﺏ .. ﻭﻫﻠﺒﻪ ﺯﻳﻪ "...
***
ﻓﻲ ﺳﻴﺎﺭﺗﻬﺎ ﺗﺴﻮﻕ ﻭﻓﺮﺣﺎﻧﻪ ﺑﻄﻴﺮ ﺍﻟﻴﻮﻡ ﺣﺘﺎﺧﺪ ﻭﻟﺪﻫﺎ ... ﻟﻜﻦ ﻓﻲ ﻧﻔﺲ ﺍﻟﻮﻗﺖ ﻣﻀﺎﻳﻘﻪ ... ﺣﺎﺳﻪ ﺭﻭﺣﻬﺎ ﻣﺴﺘﺎﺣﺸﻪ ﻧﻀﺎﻝ ﻫﻠﺒﻪ ﻟﻜﻦ ﻣﺶ ﻗﺎﺩﺭﻩ ﺗﻜﻠﻤﻪ ... ﻓﻲ ﺣﻮﺍﺟﺰ ﻛﺒﻴﺮﻩ ﺑﻴﻨﺎﺗﻬﻢ .. ﻭﺗﺒﻲ ﺗﺘﺨﻄﺎﻫﺎ ... ﺗﺒﻲ ﺗﻮﺻﻞ ﻓﻴﻪ ﻭﺑﺲ ...
ﻻﺯﻡ ﻋﻠﻴﻬﺎ ﺗﺎﺧﺪ ﺍﺳﺘﺸﺎﺭﺓ ﺻﺪﻳﻖ .. ﻭﻗﻔﺖ ﺍﻟﺴﻴﺎﺭﻩ ﻉ ﺗﺮﻛﻴﻨﻪ ﻭﺑﻌﺘﺖ ﻣﺴﺞ ﻟﺼﺪﻳﻘﻪ ﻣﻘﺮﺑﻪ ﻟﻴﻬﺎ ... ﺍﺳﺘﻨﺖ ﻟﻴﻦ ﺭﺩﺕ ﻋﻠﻴﻬﺎ ﻗﺮﺕ ﺍﻟﺮﺩ ﻭﺍﺑﺘﺴﻤﺖ .. ﻭﺣﺮﻛﺖ ﺳﻴﺎﺭﺗﻬﺎ ﻃﻮﻝ ...
***
ﻓﻲ ﺍﻟﺠﺎﻣﻌﻪ ..
ﻣﻘﻌﻤﺰﺓ ﺗﺤﺖ ﺷﺠﺮﻩ ﻭﺗﻘﺮﺍ ... ﺟﺘﻬﺎ ﺻﺎﺣﺒﺘﻬﺎ ...
ﺗﻘﻮﻯ : ﺻﺒﺎﺣﻮ ..
ﺭﻫﻒ ﺑﺈﺑﺘﺴﺎﻣﻪ : ﺻﺒﺎﺡ ﺍﻟﻮﺭﺩ ...
ﺗﻘﻮﻯ : ﻭﺍﺍﺍﺍﺍﻙ ﺗﻌﺒﺖ ﻣﻦ ﻗﺮﺍﻳﺔ ﺍﻟﺸﻴﺎﻃﻴﻦ ... ﺗﺼﻮﺭﻱ ﺍﻣﺲ ﻛﺴﻮﺓ ﺑﻨﺖ ﺧﺎﻟﺘﻲ ﻭﻣﺎﻣﺸﻴﺘﺶ ..
ﺭﻫﻒ : ﺯﻳﻚ ﺣﺘﻰ ﺃﻧﻲ ﻗﺪﺍﺵ ﻓﺎﺗﺖ ﻣﻨﺎﺳﺒﻪ ﻓﻤﻨﺎﺳﺒﻪ ﻣﺎﺣﻀﺮﺕ ﺣﺎﺟﻪ .. ﻟﻜﻦ ﺗﻮﺍ ﻣﺴﻜﺮﺓ ﺭﺍﺳﻲ ... ﺍﻗﺮﺏ ﻋﺮﺱ ﻳﻌﺰﻣﻮﻧﺎ ﻋﻠﻴﻪ ﻟﻤﺎ ﻧﺤﻀﺮ .. ﻭﻃﺰ ﻓﻲ ﺍﻟﻘﺮﺍﻳﻪ ﻭﺳﻨﻴﻨﻬﺎ ...
ﺗﻘﻮﻯ ﺑﻀﺤﻜﻪ ﻭﺣﻤﺎﺱ : ﻫﻮ ﺩﻩ ... ﻣﻌﺎﻙ ﻳﺎﺻﺎﺣﺒﺘﻲ .. ﻭﻃﺰ ﻣﺮﺓ ﺗﺎﻧﻴﻪ ﻓﻲ ﺍﻣﺮﻳﻜﺎ ﻭﺑﺮﻳﻄﺎﻧﻴﺎ ..
ﺭﻫﻒ : ﻫﻬﻬﻬﻬﻬﻬﻬﻬﻬﻬﻬﻪ
ﻳﺸﺒﺢ ﻓﻴﻬﺎ ﻛﻴﻒ ﺗﻀﺤﻚ ﻭﻗﻠﺒﻪ ﻳﺮﻓﺮﻑ ...
ﻟﺆﻱ ﻳﺸﺒﺤﻠﻪ : ﺻﺤﻴﺖ ﻳﺎﻭﺟﺪﻱ ﻣﻨﻮﺭ ..
ﻭﺟﺪﻱ ﻭﻟﺪ ﻳﻘﺮﺍ ﻣﻌﺎﻫﻢ ﻭﺍﻗﻒ ﻋﻠﻴﻬﻢ ﺍﻟﺰﻭﺯ ﻭﻣﺮﻛﺰ ﻉ ﺃﺳﻨﺎﻡ : ﻭﻻﻳﻬﻤﻚ ﻳﺎﺻﺎﺣﺒﻲ ﻏﻤﺰ ﻟﻠﺆﻱ ﻭﺷﺒﺢ ﻷﺳﻨﺎﻡ ..
ﻟﺆﻱ : ﻉ ﺣﻄﺖ ﺇﻳﺪﻙ ...
ﺿﺤﻜﻮﺍ ﺍﻟﺰﻭﺯ ﻭﺃﺳﻨﺎﻡ ﻭﻻﻫﻮ ﻫﻨﺎ ...
ﻭﺟﺪﻱ : ﻫﻲ ﺍﻧﺴﺘﻮﺍ ﺑﻌﻀﻜﻢ .. ﻭﺳﻠﻢ ﻉ ﻟﺆﻱ ...
ﻟﺆﻱ : ﺧﻠﻴﻨﺎ ﻧﺸﻮﻓﻮﻙ ...
ﻭﺟﺪﻱ : ﺇﻥ ﺷﺎﺀ ﺍﻟﻠﻪ .. ﺳﻴﻴﻴﻤﻮ ..
ﺍﻟﺘﻔﺘﻠﻪ : ﺷﻨﻮ ..
ﻭﺟﺪﻱ ﺑﻀﺤﻜﻪ : ﺳﻼﻣﻪ ﻗﻠﺒﻚ ... ﺍﻧﻲ ﻣﺎﺷﻲ ..
ﺃﺳﻨﺎﻡ ﺑﺄﺣﺮﺍﺝ : ﻓﻲ ﺍﻣﺎﻥ ﺍﻟﻠﻪ ... ﻭﺳﻠﻢ ﻋﻠﻴﻪ ..
ﻣﺸﻲ ﻭﺟﺪﻱ ...
ﻟﺆﻱ : ﻫﻴﺎ ﻧﻤﺸﻮﺍ ﻟﻠﺒﻨﺎﺕ ..
ﺍﺳﻨﺎﻡ ﻣﺸﺎﻟﻬﻢ ﻣﻦ ﻗﺒﻞ ﻣﺎﻟﺆﻱ ﻳﻜﻤﻞ ﻛﻠﻤﺘﻪ .. ﻣﺸﻲ ﻭﺭﺍﻩ ﻳﻀﺤﻚ ..
ﺍﺳﻨﺎﻡ ﺑﺈﺑﺘﺴﺎﻣﻪ : ﺻﺒﺎﺡ ﺍﻟﻮﺭﺩ ...
ﺭﺩﻭﺍ ﺍﻟﺰﻭﺯ : ﺻﺒﺎﺡ ﺍﻟﺨﻴﺮ ...
ﻗﻌﻤﺰ ﺃﺳﻨﺎﻡ ﺣﺪﺍﻫﺎ ﻭﻟﺆﻱ ﺣﺪﺍ ﺗﻘﻮﻯ ...
ﺭﻫﻒ : ﺟﻴﺖ ﻭﺭﺑﻲ ﺟﺎﺑﻚ .. ﻭﺭﺗﻠﻪ ﺍﻟﺸﻴﺖ ... ﺍﻟﻔﻘﺮﺓ ﻫﺎﺩﻱ ﻣﺶ ﻓﺎﻫﻤﻪ ﻣﻨﻬﺎ ﺣﺎﺟﻪ ..
ﺍﺳﻨﺎﻡ ﺍﺑﺘﺴﻢ ﻭﺭﺑﻊ ﺭﺟﻠﻴﻪ : ﺭﻛﺰﻱ ﻣﻌﺎﻱ ﻛﻮﻳﺲ ...
ﺭﻫﻒ ﺑﻀﺤﻜﻪ : ﻣﺮﻛﺰﺓ ﻣﻌﺎﻙ ﻫﻠﺒﻪ ..
ﺍﺳﻨﺎﻡ ﺗﻨﻬﺪ : ﻣﺶ ﺑﺎﻳﻦ ..
ﺷﺪﻭﺍ ﺿﺤﻜﺘﻬﻢ ﻟﺆﻱ ﻭﺗﻘﻮﻯ ...
ﺭﻫﻒ : ﻋﻴﻨﻚ ﻣﻦ ﺍﻣﺘﻰ ﺍﻧﻲ ﻣﺶ ﻣﺮﻛﺰﺓ ﺣﺘﻰ ﻗﻮﺓ ﺍﻟﻤﻼﺣﻈﻪ ﻋﻨﺪﻱ ﻗﻮﻳﻪ ﺑﺎﺑﺎ ﻭﻣﺎﻣﺎ ﻳﻘﻮﻟﻮﻟﻲ ﻓﻴﻬﺎ ﺩﻳﻤﻪ ...
ﺗﻘﻮﻯ ﺑﻀﺤﻜﻪ : ﻭﺍﻧﻲ ﻧﺸﻬﺪ ..
ﻟﺆﻱ : ﻫﻬﻬﻬﻬﻬﻬﻬﻪ ﻭﺍﻧﻲ ﻣﻌﺎﻫﺎ ..
ﺭﻫﻒ ﺍﺷﺮﺕ ﻋﻠﻴﻬﻢ : ﻫﺎﻩ ﺷﻔﺖ ..
ﺃﺳﻨﺎﻡ ﺷﺒﺤﻠﻬﻢ : ﺷﻬﻮﺩ ﺯﻭﺭ ..
ﺭﻫﻒ : ﻭﺍﺍﺍﻙ ﺍﺳﻨﺎﻡ ... ﻫﻴﺎ ﻣﺎﺿﻴﻌﺶ ﺍﻟﻮﻗﺖ ...
ﺗﻨﻬﺪ ﻣﻦ ﻭﺳﻂ ﻗﻠﺒﻪ : ﺑﺎﻫﻲ ...
ﻭﺑﺪﻱ ﻳﺸﺮﺣﻠﻬﺎ ﻭﻗﻠﺒﻪ ﻗﺮﻳﺐ ﻳﻔﺮ ﻣﻦ ﻗﺮﺑﻪ ﻟﻴﻬﺎ ﻧﻈﺮﺍﺗﻪ ﺗﺤﻜﻲ ﻓﻲ ﺍﻟﺤﺐ ﻳﺸﺮﺣﻠﻬﺎ ﺑﺲ ﻳﺘﻤﻨﻰ ﻟﻮ ﻗﺪﺭ ﻳﺸﺮﺣﻠﻬﺎ ﺑﺄﺭﻳﺤﻴﻪ ﻫﻜﻲ ﻋﻦ ﺣﺒﻪ ﻟﻴﻬﺎ ﻭﻣﺸﺎﻋﺮﻩ ﺍﺗﺠﺎﻫﻬﺎ ... ﺑﺲ ﻫﻲ ﻣﻊ ﺍﻷﺳﻒ ﻭﻻﺣﺎﺳﻪ ﻭﻻﻓﺎﻫﻤﻪ ﻭﻻﻣﺨﻠﻴﺎﺗﻪ ﻳﺘﺸﺠﻊ ﻭﻳﺤﻜﻲ ...
***
ﻣﺘﺰﻭﺝ !!!! ؟
ﻳﺎﺭﺍ ﺑﺄﺳﻒ : ﺇﻳﻪ ...
ﺩﺍﻟﻴﺎ : ﻳﺎﺭﺍ ﻣﻨﻚ ﺟﺪ ﺍﻧﺘﻲ ﻛﻴﻒ ﺗﻔﻜﺮﻱ ﺑﻬﺎﻟﻄﺮﻳﻘﻪ ﻛﻴﻒ ﺍﺩﻳﺮﻱ ﻫﻜﻲ ..
ﻳﺎﺭﺍ ﺗﻨﻬﺪﺕ : ﻣﺶ ﺑﺈﻳﺪﻱ ﻳﺎﺩﺍﻟﻴﺎ ﻣﺎﻗﺪﺭﺗﺶ ﻧﻤﻨﻊ ﻗﻠﺒﻲ ﻭﻻﻣﺸﺎﻋﺮﻱ ﺍﻗﻮﻯ ﻣﻨﻲ ...
ﺩﺍﻟﻴﺎ : ﻟﻤﺎ ﺍﺭﺗﺒﻄﻲ ﺑﺈﻟﻴﺎﺱ ﻣﺎﺧﻠﻴﺘﻴﺶ ﻟﻘﻠﺒﻚ ﻓﺮﺻﻪ ﺣﺴﻴﺒﺘﻬﺎ ﺑﺎﻟﻌﻘﻞ ..
ﻳﺎﺭﺍ : ﻭﺷﻔﺘﻲ ﻧﺘﻴﺠﺔ ﺣﺴﺎﺑﺎﺕ ﺍﻟﻌﻘﻞ ...
ﺩﺍﻟﻴﺎ : ﺑﺲ ﻫﺬﺍ ﻣﺘﺰﻭﺝ ﻳﺎﺭﺍ ﻳﻌﻨﻲ ﻋﻨﺪﻩ ﺣﻮﺵ .. ﻭﺍﻧﺘﻲ ﺣﺘﺨﺮﺑﻴﻪ ..
ﻳﺎﺭﺍ ﺑﺘﻬﻜﻢ : ﻫﻮ ﺧﺎﺭﺏ ﺃﺻﻼ .. ﻫﻮ ﺣﻜﺎﻟﻲ ﺍﻧﻪ ﻣﺎﻳﺤﺴﺶ ﻧﺎﺣﻴﺘﻬﺎ ﺑﺄﻱ ﺷﻲ ... ﻭﺍﻧﻪ ﻗﺎﻋﺪ ﻣﻌﺎﻫﺎ ﻉ ﺧﺎﻃﺮ ﺑﻨﺎﺗﻪ ..
ﺩﺍﻟﻴﺎ : ﻉ ﺧﺎﻃﺮ ﺑﻨﺎﺗﻪ !! ﺑﺎﻫﻲ ﺗﻮﺍ ﺷﻦ ﺍﻟﻠﻲ ﺟﺪ ﺑﻨﺎﺗﻪ ﺗﺰﻭﺟﻮﺍ؟
ﻳﺎﺭﺍ : ﻻ ﻣﺎﺯﺍﻝ ﻋﻠﻴﻬﻢ ...
ﺩﺍﻟﻴﺎ ﺑﺘﻌﺠﺐ : ﻳﻌﻨﻲ ﻛﻴﻒ ؟ !!! ﻫﻮ ﺣﻴﻘﻌﺪ ﻣﻊ ﻣﺮﺗﻪ ﻉ ﺧﺎﻃﺮﻫﺎ ﻭﺍﻧﺘﻲ ﺷﻨﻮ ﺣﻴﻜﻮﻥ ﻭﺿﻌﻚ ... ﻋﺸﻴﻘﻪ؟ !
ﻳﺎﺭﺍ ﺑﻌﺼﺒﻴﻪ : ﺩﺍﻟﻴﺎﺍﺍﺍ ..
ﺩﺍﻟﻴﺎ : ﻫﺎﺩﻱ ﺍﻟﺤﻘﻴﻘﻪ .. ﺭﻛﺰﻱ ﻛﻮﻳﺲ ... ﻫﺬﺍ ﺣﻴﻘﻌﺪ ﻣﻊ ﻣﺮﺗﻪ ﻭﺍﻧﺘﻲ ﺑﺎﻟﻨﺴﺒﻪ ﻟﻴﻪ ﺣﺘﻜﻮﻧﻲ ﻋﺸﻴﻘﻪ ﻻﺃﻛﺜﺮ ..
ﻳﺎﺭﺍ ﺑﻀﻴﻖ : ﻣﺎﻓﻜﺮﺗﺶ ﻫﻜﻲ ﺑﻜﻞ ..
ﺩﺍﻟﻴﺎ : ﻓﻜﺮﻱ ﻫﻜﻲ ﻣﻦ ﺗﻮﺍ ﻭﺣﻄﻲ ﻋﻘﻠﻚ ﻓﻲ ﺭﺍﺳﻚ .. ﺣﻨﻲ ﺍﻟﻠﻲ ﻃﻮﻝ ﺍﻟﻮﻗﺖ ﻧﺪﺍﻓﻌﻮﺍ ﻋﻦ ﺑﻨﺎﺕ ﺟﻨﺴﻨﺎ ﻭﺣﻘﻮﻗﻬﻢ ﻭﻧﺤﺎﺭﺑﻮﺍ ﻓﻲ ﺍﻟﺮﺟﺎﻟﻪ ﺍﻟﻠﻲ ﻣﻦ ﻧﻮﻋﻴﺔ ﺍﻷﻓﻨﺪﻱ ﺍﻟﻠﻲ ﺗﺤﻜﻲ ﻋﻠﻴﻪ .. ﻧﻮﺿﻮﺍ ﻧﺪﻳﺮﻭﺍ ﻋﻜﺲ ﻣﺒﺎﺩﺋﻨﺎ !! ؟ ..
ﻳﺎﺭﺍ : ﻗﺘﻠﻚ ﻣﻴﻪ ﻣﺮﻩ ﻫﻮ ﻣﺎﻳﺤﺒﻬﺎﺵ ﻫﻮ ﻣﺎﻳﺒﻴﻬﺎﺵ ...
ﺩﺍﻟﻴﺎ : ﺣﺘﻰ ﻟﻮ ... ﻫﻲ ﻣﺮﺗﻪ ﻭﺃﻡ ﺑﻨﺎﺗﻪ ...
ﻳﺎﺭﺍ ﻃﺎﺭﺗﻠﻬﺎ ﻭﻧﺎﺿﺖ ﺧﺪﺕ ﺷﻨﻄﺘﻬﺎ ﻭﻃﻠﻌﺖ ..
ﺩﺍﻟﻴﺎ " ﺻﻜﺮﺗﻲ ﺭﺍﺳﻚ ﺧﻼﺹ "...
***
ﺍﻟﻮﺍﺣﺪﻩ ﻇﻬﺮﺍ ️ ...
ﺑﻌﺪ ﻛﻤﻞ ﻣﻌﺎﻭﻳﻪ ﺧﺪﻣﺘﻪ ﺗﻮﺟﻪ ﻟﻠﻘﺼﺮ ... ﺧﺪﻱ ﺑﻨﺘﻪ ﻭﻣﺸﻮﺍ ﻟﺤﻮﺵ ﺃﻫﻞ ﺇﻗﺒﺎﻝ ... ﺍﻟﻤﺸﻴﻪ ﻉ ﻗﻠﺐ ﻣﻬﺎ ﺯﻱ ﺍﻟﻬﻢ ﻣﺎﻃﻴﻘﺶ ﺍﻟﻌﻴﻠﻪ ﺑﻜﻞ ﺑﺎﻟﺬﺍﺕ ﺧﻮ ﺇﻗﺒﺎﻝ ﻭﺍﺣﺪ ﺻﺎﻳﻊ ﻭﺣﺎﻁ ﻋﻴﻨﻪ ﻋﻠﻴﻬﺎ ..
ﻭﺻﻠﻮﺍ ... ﻧﺰﻟﻮﺍ ﻣﻌﺎﻭﻳﻪ ﻭﺑﻨﺘﻪ ﻭﻛﺎﻧﺖ ﻓﻲ ﺇﺳﺘﻘﺒﺎﻟﻬﻢ ﺳﻤﻴﻪ ﻭﺃﻗﺒﺎﻝ .. ﺳﻠﻤﻮﺍ ﻉ ﻣﻌﺎﻭﻳﻪ ﺑﺎﻟﺨﺪ ﻭﻣﻬﺎ ﻛﺬﻟﻚ ﻭﺧﺸﻮﺍ ﺩﺍﺧﻞ ..
ﻛﺎﻧﻮﺍ ﻳﻬﺪﺭﺯﻭﺍ ﻭﻳﻀﺤﻜﻮﺍ ﻭﻣﻬﺎ ﺗﺠﺎﻣﻞ ﺑﺎﻟﺴﻴﻒ ...
ﺍﻟﺨﺪﺍﻣﻪ : ﺍﻟﻐﺪﻱ ﻭﺍﺗﻲ ﻣﺪﺍﻡ ﺳﻤﻴﻪ ..
ﺳﻤﻴﻪ ﻧﺎﺿﺖ؛ ﻫﻴﺎ ﺗﻔﻀﻠﻮﺍ ..
ﻣﻌﺎﻭﻳﻪ : ﻳﺰﻳﺪ ﻓﻀﻠﻚ ...
ﻗﻌﻤﺰﻭﺍ ﻉ ﻃﺎﻭﻟﺔ ﺍﻷﻛﻞ ﻣﻌﺎﻭﻳﻪ ﺟﻨﺒﻪ ﺍﻗﺒﺎﻝ .. ﻭﺳﻤﻴﻪ ﺟﻨﺒﻬﺎ ..
ﻣﻬﺎ ﻛﺎﻧﺖ ﺗﺮﺍﻗﺐ ﻓﻲ ﺃﻗﺒﺎﻝ ﻛﻴﻒ ﺗﺘﻠﺼﻖ ﻉ ﺑﻮﻫﺎ ﻭﻗﺮﻳﺐ ﺗﻤﻮﺕ .. ﺧﺎﻳﻔﻪ ﻟﻮ ﺑﻮﻫﺎ ﻳﺎﺧﺪ ﺇﻗﺒﺎﻝ ﺑﻌﺪﻳﻦ ﺗﻄﺒﻞ ﻋﻠﻴﻬﺎ ﺭﺳﻤﻲ ..
ﺳﻤﻴﻪ : ﻛﻮﻟﻲ ﺣﺒﻴﺒﺘﻲ ﻣﻬﺎ ..
ﻣﻬﺎ ﺑﻤﺠﺎﻣﻠﻪ : ﻧﺎﻛﻞ ...
ﺇﻗﺒﺎﻝ : ﺗﺒﻲ ﺣﺎﺟﻪ ﺣﺒﻴﺒﺘﻲ ﻣﻦ ﻋﻨﺪﻱ ﻧﻌﻄﻴﻬﺎﻟﻚ ..
ﻣﻬﺎ : ﺷﻜﺮﺍ ..
ﺇﻗﺒﺎﻝ : ﻭﻻﻳﻬﻤﻚ ﻏﻼﻭﺗﻚ ﻋﻨﺪﻱ ﻛﺒﻴﺮﻩ ﺭﻩ ...
ﻣﻬﺎ ﺍﺑﺘﺴﻤﺖ ﺑﺎﻟﺴﻴﻒ : ﺷﻜﺮﺍ ...
ﺳﻤﻴﻪ : ﺑﻨﺘﻚ ﻫﺎﺩﻳﻪ ﻫﻠﺒﻪ ﻳﺎﻣﻌﺎﻭﻳﻪ ﻋﻜﺲ ﺑﻨﺎﺕ ﺟﻴﻠﻬﺎ ..
ﻣﻌﺎﻭﻳﻪ : ﻫﺬﺍ ﺍﻟﻠﻲ ﻧﺒﻴﻪ .. ﻣﺎﻧﺒﻴﻬﺎﺵ ﺗﻜﻮﻥ ﻭﺣﺪﻩ ﺗﺎﻓﻬﻪ ﺯﻱ ﺑﻨﺎﺕ ﻫﺎﻟﻮﻗﺖ ..
ﺁﻗﺒﺎﻝ : ﺑﺲ ﻫﻲ ﺻﻐﻴﺮﻩ ﻣﻦ ﺣﻘﻬﺎ ﺗﻌﻴﺶ ﺳﻨﻬﺎ ..
ﻣﻌﺎﻭﻳﻪ : ﺗﻌﻴﺶ ﺳﻨﻬﺎ ﻣﺎﻋﻨﺪﻳﺶ ﻣﺸﻜﻠﻪ ﺑﺲ ﺑﻌﻴﺪ ﻋﻦ ﺍﻟﺪﻭﺓ ﺍﻟﻔﺎﺿﻴﻪ ...
ﺇﻗﺒﺎﻝ ﺑﻀﺤﻜﻪ : ﻋﺎﺩ ﺍﻧﺖ ﻋﻘﻠﻴﺘﻚ ﺷﻮﻳﻪ ﺻﻌﺒﻪ ... ﻣﺎﻧﻌﺮﻓﻮﺵ ﻧﻘﻨﻌﻮﻙ ..
ﻣﻌﺎﻭﻳﻪ : ﻣﺶ ﻻﺯﻡ ﺗﻘﻨﻌﻴﻨﻲ ﺑﺸﻲ ﺍﻧﻲ ﺷﺎﻳﻔﻪ ﻏﻠﻂ ..
ﺍﺑﺘﺴﻤﺖ ﻭﺷﺒﺤﺖ ﻷﻣﻬﺎ ﻭﺃﻣﻬﺎ ﺍﺑﺘﺴﻤﺖ ... ﻭﺳﻜﺘﻮﺍ ﻭﻛﻤﻠﻮﺍ ﻣﺎﻛﻠﻪ .. ﻭﻣﻬﺎ ﺗﺒﻠﻊ ﻓﻲ ﻟﻘﻤﺘﻬﺎ ﺑﺎﻟﺴﻴﻒ ...
ﻛﻤﻠﻮﺍ ﻏﺪﺍﻫﻢ ... ﻭﻧﺎﺿﻮﺍ ... ﻣﺸﻲ ﻣﻌﺎﻭﻳﻪ ﺑﻴﻐﺴﻞ ﺍﻳﺪﻳﻪ ﻭﺍﻗﺒﺎﻝ ﻟﺤﻘﺎﺗﻪ ..
ﻣﻬﺎ ﺷﺒﺤﺘﻠﻬﺎ ﺑﺘﻔﻨﻴﺺ .. ﻭﺭﻛﺰﺕ ﻋﻠﻴﻬﺎ ﺳﻤﻴﻪ ..
ﺳﻤﻴﻪ : ﺗﻌﺎﻟﻲ ﺣﺒﻴﺒﺘﻲ ﻧﻮﺭﻳﻚ ﻭﻳﻦ ﺗﻐﺴﻠﻲ ..
ﻣﻬﺎ ﻣﺸﺖ ﻣﻌﺎﻫﺎ ﺑﺎﻟﺴﻴﻒ ..
ﻋﻨﺪ ﻣﻌﺎﻭﻳﻪ ﻭﺇﻗﺒﺎﻝ ..
ﻃﻠﻊ ﺑﻌﺪ ﻏﺴﻞ ﺍﻳﺪﻩ ﻭﻛﺎﻥ ﻳﻤﺴﺢ ﻓﻴﻬﻢ ﺑﺎﻟﻜﻨﻴﻜﺲ ..
ﺇﻗﺒﺎﻝ ﻗﺪﻣﺘﻠﻪ : ﻋﺠﺒﻚ ﺍﻟﻐﺪﻱ ..
ﻣﻌﺎﻭﻳﻪ ﺑﻀﺤﻜﻪ : ﻣﺎﺗﺼﺪﻣﻨﻴﺶ ﻭﺗﻘﻮﻟﻲ ﺍﻧﺘﻲ ﺍﻟﻠﻲ ﺩﺭﺗﻴﻪ ..
ﺇﻗﺒﺎﻝ ﺷﺪﺕ ﺇﻳﺪﻩ : ﻣﺒﺮﺩﻙ ﻣﻌﺎﻭﻳﻪ ﻋﺎﺭﻓﻨﻲ ﻧﻄﻴﺐ ﺍﻧﻲ ..
ﻣﻌﺎﻭﻳﻪ : ﻫﻬﻬﻬﻬﻬﻬﻪ ..
ﻗﺪﻣﺖ ﺃﻛﺜﺮ ﻣﻨﻪ : ﺑﺲ ﻟﻮ ﺗﺒﻴﻨﻲ ﻧﺘﻌﻠﻢ ﻋﺎﺩﻱ ..
ﻣﻌﺎﻭﻳﻪ ﺍﺿﺎﻳﻖ : ﺷﻦ ﻋﻼﻗﺘﻲ ﻫﺬﺍ ﺷﻲ ﻳﺨﺼﻚ ..
ﻗﺮﺑﺖ ﺍﻛﺜﺮ ﻭﺑﺪﻟﻊ ﺷﺪﺕ ﻳﺎﻗﺔ ﺳﻮﺭﻳﺘﻪ ﻭﻗﺎﻟﺖ : ﻭﺃﻧﻲ ﻧﺒﻲ ﺍﻟﻠﻲ ﻳﺨﺼﻨﻲ ﻳﺨﺼﻚ ..
ﻧﻈﺮﻩ ﻋﻴﻦ ﻣﻌﺎﻭﻳﻪ ﻭﻟﺖ ﺗﺨﻮﻑ ﺷﺪ ﻳﺪﻫﺎ ﻣﻦ ﺍﻟﺮﺳﻎ ﺑﻘﻮﺓ ﻭﺣﻮﻟﻬﺎ ﻭﻗﺎﻝ : ﺇﻗﺒﺎﻝ ﺇﻧﺘﻲ ﻓﻲ ﻧﻈﺮﻱ ﺍﺧﺘﻲ ﺍﻟﺼﻐﻴﺮﻩ ﻭﺑﺲ .. ﻓﻲ ﺃﻛﺜﺮ ﻣﻦ ﻫﻜﻲ ﻣﺎﺗﻔﻜﺮﻳﺶ ... ﺑﻌﺪﻫﺎ ﻭﺍﺑﺘﺴﻢ .. ﻫﻴﺎ ﻧﻤﺸﻮﻟﻬﻢ ﺍﻛﻴﺪ ﻳﺴﺘﻨﻮﺍ ﻓﻴﻨﺎ .. ﻣﺸﻲ ﻭﻫﻲ ﻭﺭﺍﻩ ﻗﺮﻳﺐ ﺗﺘﻔﺠﺮ ﻭﺻﻞ ﻓﻲ ﺍﻟﺼﺎﻟﻪ ﻟﻘﻲ ﻗﺼﻲ ﺧﻮ ﺇﻗﺒﺎﻝ ﻣﻘﻌﻤﺰ ﺣﺪﺍ ﻣﻬﺎ ﻭﻣﻬﺎ ﺧﺎﺷﻪ ﻓﻲ ﺃﺧﺮ ﺍﻟﻜﻨﺒﻪ ﻭﻣﺘﻘﺰﺯﺓ ﻣﻨﻪ ﻭﻫﻮ ﻳﺸﺒﺤﻠﻬﺎ ﺑﻨﻈﺮﻩ ﺧﺒﻴﺜﻪ ..
ﻣﻌﺎﻭﻳﻪ ﺑﺮﻓﻌﺔ ﺣﺎﺟﺐ : ﻛﻴﻒ ﺍﻟﺤﺎﻝ ﻗﺼﻲ ..
ﻗﺼﻲ ﺷﺒﺤﻠﻪ ﻭﻧﺎﺽ ﺳﻠﻢ ﻋﻠﻴﻪ : ﺗﻤﺎﻡ .. ﺍﻧﺖ ﻛﻴﻒ ﺣﺎﻟﻚ ..
ﻣﻌﺎﻭﻳﻪ ﻗﺪﻡ ﻭﻗﻌﻤﺰ ﺣﺪﺍ ﺑﻨﺘﻪ ﻭﺣﻂ ﺭﺟﻞ ﻉ ﺭﺟﻞ : ﺍﻟﺤﻤﺪ ﻟﻠﻪ ...
ﺳﻤﻴﻪ ﺍﺿﺎﻳﻘﺖ ﻭﺷﺎﻓﺖ ﻟﺒﻨﺘﻬﺎ ﻟﻘﺘﻬﺎ ﻣﻘﻌﻤﺰﺓ ﻭﺗﻬﺰ ﻓﺮﺟﻠﻬﺎ ..
ﻗﻌﻤﺰ ﻗﺼﻲ .. ﻫﺪﺭﺯﻭﺍ ﺷﻮﻳﻪ .. ﺑﻌﺪﻳﻦ ﻧﺎﺽ ﻣﻌﺎﻭﻳﻪ ﺷﻜﺮﻫﻢ ﻉ ﺍﻟﻌﺰﻭﻣﻪ ﻭﻣﻬﺎ ﺷﻜﺮﺗﻬﻢ ﻭﻃﻠﻌﻮﺍ ...
ﺳﻤﻴﻪ ﻭﻫﻲ ﺗﺴﻘﺪ ﻓﻴﻬﻢ ﺑﺮﺍ ﻭﺗﺸﺒﺢ ﻓﻲ ﺳﻴﺎﺭﺗﻬﻢ ﻛﻴﻒ ﺗﺘﺤﺮﻙ ﺣﻴﺘﻬﻢ ﺑﺈﻳﺪﻫﺎ ﻭﻗﺎﻟﺖ : ﻗﺎﻋﺪ ﺯﻱ ﻗﺒﻞ ..
ﺇﻗﺒﺎﻝ : ﺑﻜﻜﻞ ﻳﺎﻣﺎﻣﺎ ﺍﻟﻠﻲ ﻧﻌﺮﻓﻪ ﺍﻧﻪ ﻣﺎﻛﺎﻧﺶ ﻳﺤﺐ ﺳﺎﻣﻴﻪ ﻋﻼﺵ ﻣﺎﻳﺒﻴﺶ ﻳﺮﺗﺒﻂ ﺑﻌﺪﻫﺎ ..
ﺷﺒﺤﺖ ﻟﺒﻨﺘﻬﺎ : ﻣﺎﻩ ﺍﻧﺘﻲ ﺣﻮﺑﻪ .. ﺍﺍﺍﺍﻩ ﺑﺲ ﻟﻮ ﻛﺎﻥ ﺃﻛﺒﺮ ﺷﻮﻱ ﻣﺎﻓﻠﺘﺎﺵ ﻣﻦ ﻳﺪﻱ ...
ﺇﻗﺒﺎﻝ ﻗﺪﻣﺘﻠﻬﺎ : ﻣﺎﺍﺍﺍﻣﺎ .. ﻣﻌﺎﻭﻳﻪ ﻟﻴﺎ ﺃﻧﻲ ﻭﺑﺲ .. ﺧﻠﻴﻚ ﻓﻲ ﺍﻟﻠﻲ ﻋﻨﺪﻙ .. ﻏﻤﺰﺗﻠﻬﺎ ﻭﺧﺸﺖ ..
ﻭﺳﻤﻴﻪ ﺭﻓﻌﺖ ﺣﺎﺟﺒﻬﺎ ﻭﺧﺸﺖ ﻭﺭﺍﻫﺎ ...
***
ﻓﺎﺗﻮﺍ ﻳﻮﻣﻴﻦ ..
ﻣﺎﻓﻴﺶ ﺟﺪﻳﺪ .. ﻏﻴﺮ ﺇﻥ ﺣﻨﺎﻥ ﺑﺮﻏﻢ ﺯﻋﻠﻬﺎ ﻣﻦ ﻧﻀﺎﻝ ﻗﺎﻋﺪﻩ ﺗﻮﺗﻲ ﻓﻲ ﻣﻔﺎﺟﺌﺘﻬﺎ ﻭﻋﻨﺪﻫﺎ ﺃﻣﻞ ﻳﺘﻐﻴﺮ ﻛﻞ ﺷﻲ ...
ﺍﻣﺎ ﻧﻀﺎﻝ ﻭﻫﻮ ﻓﻲ ﺍﻟﺤﻘﻮﻝ .. ﺍﻏﻠﺐ ﺍﻟﻮﻗﺖ ﻳﻔﻜﺮ ﻭﻛﺎﻥ ﻳﺒﻲ ﻳﻮﺻﻞ ﻟﻘﺮﺍﺭ ﻗﺒﻞ ﻟﻴﺮﻭﺡ ..
ﻭﻳﺎﺭﺍ ﺗﺘﺼﺎﺭﻉ ﻣﻊ ﻣﺸﺎﻋﺮﻫﺎ ﻫﻠﺒﻪ ﻭﺗﺤﺎﻭﻝ ﺗﻠﻬﻲ ﻧﻔﺴﻬﺎ ﻣﻊ ﻭﻟﺪﻫﺎ ﺍﻟﻠﻲ ﻋﻤﺮﻩ 5 ﺳﻨﻮﺍﺕ ... ﻛﺎﻧﺖ ﻣﺴﺘﺎﺣﺸﺘﻪ ﻫﻠﺒﻪ ﻭﻓﻀﺖ ﻧﻔﺴﻬﺎ ﻉ ﺧﺎﻃﺮﻩ ...
ﺍﻣﺎ ﻣﻌﺎﻭﻳﻪ ﻣﺎﺷﻴﻪ ﺣﻴﺎﺗﻪ ﻉ ﻧﻔﺲ ﺍﻟﻨﻤﻂ ﻭﻣﺎﺗﻐﻴﺮ ﺷﻲ ﻏﻴﺮ ﺍﻧﻪ ﻗﺎﻋﺪ ﻳﺨﻨﻖ ﻓﻲ ﻣﻬﺎ ﻭﺧﻼﺹ ..
ﻳﻮﻡ ﺍﻟﺨﻤﻴﺲ ﻓﻲ ﺍﻟﻠﻴﻞ ...
ﻛﺎﻧﺖ ﻣﻘﻌﻤﺰﺓ ﺗﺘﻌﺸﺎ ﻣﻊ ﺑﻨﺎﺗﻬﺎ ..
ﻟﺒﻨﻰ : ﺍﻟﺪﻧﻴﺎ ﺻﻘﻌﺖ ..
ﺣﻨﺎﻥ : ﺍﺑﺪﻭﺍ ﻏﻴﺮﻭﺍ ﻟﺒﺴﻜﻢ ﺑﺎﻟﺘﺪﺭﻳﺞ ..
ﻟﺒﻨﻰ : ﺇﻥ ﺷﺎﺀ ﺍﻟﻠﻪ ﺑﺎﺑﺎ ﻣﺎﻳﻤﺮﺿﺶ .. ﻗﺎﻟﻲ ﻏﺎﺩﻱ ﺍﻟﺠﻮ ﺻﻘﻊ ﺳﻢ ..
ﺭﻫﻒ : ﺣﺘﻰ ﺍﻧﻲ ﻗﺎﻟﻲ ﺟﺎﻳﻜﻢ ﺻﻘﻊ ﻗﻮﻱ ﻣﻦ ﻫﻨﻲ ..
ﺣﻨﺎﻥ ﻣﺼﺪﻭﻣﻪ .. ﻛﻠﻢ ﺑﻨﺎﺗﻪ ﻭﻣﺎﻛﻠﻤﻬﺎﺵ ﺑﻜﻞ ﻭﻻﻋﺒﺮﻫﺎ ﻭﻫﻲ ﻭﻳﻦ ﺗﺘﺼﻞ ﺑﻴﻪ ﻣﺎﻳﺮﺩﺵ ﻋﻠﻴﻬﺎ .. ﻳﻌﻨﻲ ﻣﻦ ﺍﻟﻠﻲ ﺟﺮﺡ ﺍﻟﺘﺎﻧﻲ ﺍﺧﺮ ﻣﺮﺓ ﻫﻮ ﻭﻻﻫﻲ !! ؟ﻣﻦ ﻣﻔﺮﻭﺽ ﻳﺰﻋﻞ ﻫﻮ ﻭﻻﻫﻲ؟ !! ﻫﻲ ﺍﺻﻼ ﺗﻐﺎﻇﺖ ﻭﻋﻄﺎﺗﻪ ﻋﺬﺭ !!... ﻋﻼﺵ ﻳﺪﻳﺮ ﻫﻜﻲ ﻣﻌﺎﻫﺎ ﻟﻮﻳﻦ ﻳﺒﻲ ﻳﻮﺻﻞ؟ !!..
ﻟﺒﻨﻰ : ﻣﺎﺍﺍﻣﺎﺍ ..
ﺣﻨﺎﻥ ﺍﺳﺘﺎﻗﻀﺖ : ﻫﺎﺍﺍﻩ ..
ﻟﺒﻨﻰ : ﻭﻳﻨﻚ ﻣﻦ ﺑﻜﺮﻱ ﻧﻜﻠﻢ ﻓﻴﻚ ! ؟
ﺭﻫﻒ ﺑﻀﺤﻜﻪ : ﺳﺮﺣﺖ ﻓﻲ ﺣﺒﻴﺐ ﺍﻟﻘﻠﺐ ﺧﺎﻓﺖ ﻋﻠﻴﻪ
ﻟﺒﻨﻰ ﺑﻀﺤﻜﻪ : ﻣﺎﺗﺨﺎﻓﻴﺶ ﻋﻠﻴﻪ ﻫﺪﺭﺯﻱ ﺍﻧﺘﻲ ﻭﻳﺎﻩ ﻓﻲ ﺍﻟﻠﻴﻞ ﺗﻮ ﻳﺪﻓﺎ ..
ﺣﻨﺎﻥ : ﻟﺒﻨﺎﺍﺍﺍﺍﺍ ...
ﻟﺒﻨﻲ : ﻫﻬﻬﻬﻬﻬﻬﻬﻬﻬﻬﻬﻬﻪ .. ﺑﺎﻫﻲ ﻗﻮﻟﻴﻠﻲ ﺍﻣﺘﻰ ﺑﻨﻤﺸﻮﺍ ﻟﺤﻮﺵ ﺟﺪﻱ ﻏﺪﻭﺓ ...
ﺣﻨﺎﻥ : ﻣﻊ ﺍﻟﺴﺎﻋﻪ 10.. ﻧﺎﺿﺖ .. ﺭﻫﻒ ﻟﻤﻲ ﺍﻟﻤﺎﻋﻴﻦ ﻭﺍﻏﺴﻠﻴﻬﻢ ... ﺗﺼﺒﺤﻮﺍ ﻉ ﺧﻴﺮ .. ﻭﻣﺸﺖ ﺭﻛﺒﺖ ﻓﻮﻕ ﻭﺑﻨﺎﺗﻬﺎ ﻣﺴﺘﻐﺮﺑﺎﺕ ..
ﺭﻫﻒ : ﻣﺎﻣﺎ ﻣﺶ ﻋﺎﺟﺒﺘﻨﻲ ﺍﻷﻳﺎﻡ ﻫﺎﺩﻱ ..
ﻟﺒﻨﻰ : ﺑﺎﻟﻌﻜﺲ ﻋﺎﺩﻳﻪ ..
ﺭﻫﻒ : ﺗﺴﺘﺲ ... ﻣﺶ ﺯﻱ ﻗﺒﻞ ﻳﺎﻟﺒﻨﻰ ..
ﻟﺒﻨﻰ ﺧﺎﻓﺖ ﺑﺲ ﺍﻇﺎﻫﺮﺕ ﺑﺎﻟﻌﻜﺲ : ﺍﻧﺘﻲ ﺭﺍﻛﺒﻚ ﺍﻟﻮﻫﻢ ﻣﻦ ﻗﺮﺍﻳﺘﻚ 24 ﺳﺎﻋﻪ ﻭﺍﻧﺘﻲ ﺗﻘﺮﻱ ﺟﺎﺗﻚ ﺣﺎﻟﻪ ﻧﻔﺴﻴﻪ ..
ﺭﻫﻒ : ﺑﺎﻟﻠﻪ
ﻟﺒﻨﻰ ﺿﺤﻜﺖ ﻭﻧﺎﺿﺖ : ﻳﻠﻼ ﺍﻏﺴﻠﻲ ﺍﻟﻤﺎﻋﻴﻦ ﺑﺴﺮﻋﻪ
ﺭﻫﻒ ﺣﺪﻓﺘﻬﺎ ﺑﺎﻟﻜﺸﻴﻚ ﺧﻮﺍﺗﻪ ﻭﻫﺮﺑﺖ ﺗﻀﺤﻚ ﻭﺭﻛﺒﺖ ﻓﻮﻕ ..
ﺭﻫﻒ ﺑﻌﺪ ﺿﺤﻜﺖ ﻧﺎﺿﺖ ﺗﻠﻢ ﻓﻲ ﺍﻟﻤﺎﻋﻴﻦ ﻭﻗﻌﺪﺕ ﺗﻔﻜﺮ ﻓﻲ ﺃﻣﻬﺎ ﻭﻗﻠﺒﻬﺎ ﻣﺶ ﻣﺮﺗﺎﺡ ...
***
ﺯﻱ ﻣﺎﺍﻧﻲ ﻋﺎﻳﺶ ﻓﻲ ﺣﺮﻳﻪ ﻭﻣﺮﺗﺎﺡ ...
ﻣﻌﺎﻭﻳﻪ : ﻣﺮﺍﺕ ﻧﺤﺴﺪﻙ ﻉ ﺣﺮﻳﺘﻚ ﻫﺎﺩﻱ ..
ﻛﺮﻳﻢ : ﻭﺍﻧﺖ ﺷﻨﻮ ﻋﻨﺪﻙ ﻣﻘﻴﺪﻙ ..
ﻣﻌﺎﻭﻳﻪ ﺷﺒﺤﻠﻪ : ﺷﻨﻮ ﻧﺎﺳﻲ ﺍﻥ ﻋﻨﺪﻱ ﺑﻨﺖ ...
ﻛﺮﻳﻢ : ﺑﻨﺖ ﺯﻱ ﺍﻟﻌﺴﻞ ﻣﺎﺷﺎﺀ ﺍﻟﻠﻪ ﻋﻠﻴﻬﺎ ..
ﻣﻌﺎﻭﻳﻪ ﺗﻨﻬﺪ : ﺍﻟﻤﺸﻜﻠﻪ ﻓﻴﺎ .. ﺍﻧﻲ ﻣﺎﻧﻨﻔﻌﺶ ﻧﻜﻮﻥ ﺃﺏ ... ﺯﻱ ﻣﺎﻧﻨﻔﻌﺶ ﻧﻜﻮﻥ ﺯﻭﺝ ..
ﻛﺮﻳﻢ : ﻣﺸﻜﻠﺘﻚ ﻗﺎﻋﺪ ﻣﺶ ﻗﺎﺩﺭ ﺗﺘﺨﻄﺎ ﺍﻟﻤﺎﺿﻲ ﻭﺗﻨﺴﺎﻩ ..
ﻣﻌﺎﻭﻳﻪ : ﻛﻴﻒ ﻧﻨﺴﺎﻩ ﻭﻫﻮ ﺍﻟﻠﻲ ﺷﻜﻞ ﺷﺨﺼﻴﺘﻲ ﻭﺧﻼﻧﻲ ﻣﻌﺎﻭﻳﻪ ﺍﻟﻠﻲ ﺗﻌﺮﻓﻪ ... ﺍﻧﻲ ﻣﺎﻧﻌﺮﻓﺶ ﻭﻻﻧﻘﺪﺭ ﻧﺤﺐ .. ﻃﺒﻌﻲ ﻗﺎﺳﻲ ﻭﺃﻧﺖ ﻋﺎﺭﻑ ...
ﻛﺮﻳﻢ : ﻗﺮﺍﺭﺍﺕ ﺧﺪﻳﺘﻬﺎ ﻻﺯﻡ ﺗﺘﺤﻤﻞ ﻣﺴﺆﻭﻟﻴﺘﻬﺎ .. ﻗﺒﻞ ﻟﺘﺘﺰﻭﺝ ﺳﺎﻣﻴﻪ ﺍﻟﻠﻪ ﻳﺮﺣﻤﻬﺎ ﺣﺬﺭﺗﻚ ﻭﻗﺘﻠﻚ ﺍﻧﺖ ﺣﺘﺘﺰﻭﺝ ﺑﻨﺖ ﺣﺴﺎﺳﻪ ﻭﻣﺤﺎﻭﻃﻪ ﺑﺎﻟﺤﺐ ﻭﺍﻹﻫﺘﻤﺎﻡ .. ﺍﻧﺖ ﻣﺶ ﺣﺘﻘﺪﺭ ﺗﻌﻄﻴﻬﺎ ﺷﻲ ﻣﻦ ﺍﻟﻠﻲ ﻛﺎﻧﺖ ﻋﺎﻳﺸﻪ ﻓﻴﻪ .. ﺑﺲ ﻛﺎﻧﺖ ﻋﻨﺪﻙ ﺣﺴﺎﺑﺎﺕ ﺗﺎﻧﻴﻪ ﻭﻷﻧﻚ ﺭﺟﻞ ﺃﻋﻤﺎﻝ ﻓﻜﺮﺕ ﻓﻴﻬﺎ ﺑﺎﻟﺒﺰﻧﺲ ﻭﺑﺲ ..
ﻣﻌﺎﻭﻳﻪ : ﺧﻼﺹ ﺗﻮﺍ ﺍﻟﻜﻼﻡ ﻓﻲ ﺍﻟﻠﻲ ﻓﺎﺕ ﻣﺎﻓﻴﺶ ﻣﻨﻪ ﻓﺎﻳﺪﻩ ..
ﻛﺮﻳﻢ : ﻭﻫﺪﺍ ﺍﻟﻠﻲ ﻧﺒﻴﻪ ﻣﻨﻚ .. ﻋﻴﺶ ﺣﻴﺎﺗﻚ ﻭﺃﻧﺴﻰ ﺍﻟﻤﺎﺿﻲ ... ﻭﻣﺪﻟﻪ ﻃﺎﺳﺔ ﻭﺳﻜﻲ .. ﻭﻧﻌﻨﺸﻬﺎ ..
ﻣﻌﺎﻭﻳﻪ : ﺣﻮﻝ ﻋﻠﻴﺎ ﺍﻟﻌﻔﻦ ﻏﺎﺩﻱ ..
ﺿﺤﻚ ﻛﺮﻳﻢ : ﺑﺮﻏﻢ ﺍﻧﻚ ﺭﺍﺟﻞ ﻣﺘﺤﺮﺭ .. ﻟﻜﻦ ﻓﻴﻚ ﺩﻋﺸﻮﺷﻲ ﺻﻐﻴﺮ
ﻣﻌﺎﻭﻳﻪ : ﺗﻮ ﻛﺎﻥ ﻣﺎﻧﺸﺮﺑﺶ ﻓﻲ ﺍﻟﺴﻢ ﺍﻟﻬﺎﺭﻱ ﺍﻟﻠﻲ ﻳﺪﻣﺮ ﺍﻟﺼﺤﻪ ﻭﻳﺨﻠﻲ ﺍﻟﺒﻨﻲ ﺁﺩﻡ ﻳﻮﺻﻞ ﻟﻤﺮﺣﻠﻪ ﻳﻜﻮﻥ ﻓﻴﻬﺎ ﺍﺷﺒﻪ ﺑﺎﻟﺤﻴﻮﺍﻥ .. ﻧﻮﻟﻲ ﺩﻋﺸﻮﺷﻲ ﻓﻲ ﻧﻈﺮﻙ !!! ؟
ﻛﺮﻳﻢ : ﻫﻬﻬﻬﻬﻬﻬﻬﻬﻬﻬﻬﻬﻬﻬﻪ ... ﻻﺣﻆ ﺍﻧﻚ ﺳﺒﻴﺘﻨﻲ ﻭﺍﻧﻲ ﺑﻨﻔﻮﺗﻬﺎ ﺑﻤﺰﺍﺟﻲ ..
ﻣﻌﺎﻭﻳﻪ : ﻗﻠﺖ ﺍﻟﺤﻖ ..
ﻛﺮﻳﻢ : ﺑﺎﻩ ﻳﺎﺑﻮﺍﻟﺤﻖ ﺃﻧﺖ .. ﻋﻨﺪﻱ ﺯﻭﺍﺭ ﺣﻠﻮﻳﻦ ... ﻳﺎﺭﻳﺖ ﺗﻔﺎﺭﻕ ..
ﻣﻌﺎﻭﻳﻪ ﺑﻀﺤﻜﻪ : ﺍﻫﻮ ﻣﺴﻴﺒﻬﻮﻟﻚ ... ﻭﻧﺎﺽ ﻃﻠﻊ ﻣﻦ ﺣﺪﺍﻩ ﻭﻫﻮ ﻳﻬﺰ ﻓﻲ ﺭﺍﺳﻪ ﻳﻤﻴﻦ ﻭﻳﺴﺎﺭ ﻭﻳﻀﺤﻚ ...
ﻫﺪﻳﻜﺎ ﺍﻟﻠﻴﻠﻪ ﻓﺎﺗﺖ ﻉ ﺣﻨﺎﻥ ﺑﺼﻌﻮﺑﻪ ﺩﻣﻮﻋﻬﺎ ﺗﻨﺰﻝ ﻭﻗﻠﺒﻬﺎ ﻣﻘﺒﻮﺽ ﻭﻛﺒﺮ ﺍﻟﺸﻚ ﻓﻌﻘﻠﻬﺎ ﺍﻛﺜﺮ ﻭﺃﻛﺜﺮ ...
ﻳﺎﺭﺍ ﻃﻮﻝ ﻟﻴﻠﻬﺎ ﺷﺎﺩﻩ ﺗﻠﻴﻔﻮﻧﻬﺎ ﺗﺒﻲ ﺗﺘﺼﻞ ﻭﺗﺘﺮﺍﺟﻊ ﻭﻛﻼﻡ ﺻﺎﺣﺒﺘﻬﺎ ﻳﺘﺮﺩﺩ ﻓﻮﺫﻧﻬﺎ .. ﺑﺎﻟﺬﺍﺕ ﻛﻠﻤﺔ " ﻋﺸﻴﻘﻪ " ﻛﻞ ﻣﺎﺗﺬﻛﺮﻫﺎ ﺗﻀﺎﻳﻖ ﻭﺗﺴﻴﺐ ﺍﻟﺘﻠﻴﻔﻮﻥ .. ﺍﻟﺘﻔﺘﺖ ﺷﺒﺤﺖ ﻟﻮﻟﺪﻫﺎ ﺍﻟﻠﻲ ﺭﺍﻗﺪ ﻓﻲ ﺟﻨﺒﻬﺎ ﺍﺑﺘﺴﻤﺖ ﻭﺣﻀﻨﺎﺗﻪ ﻭﺗﺤﺎﻭﻝ ﺗﺮﻗﺪ ..
ﻧﻀﺎﻝ ﻃﻮﻝ ﻟﻴﻠﻪ ﻗﻀﺎﻩ ﻭﻫﻮ ﻳﻔﻜﺮ ... ﻟﻴﻦ ﻭﺃﺧﻴﺮﺍ ﻧﻬﺎﺋﻲ ﻻﺭﺟﻌﺔ ﻓﻴﻪ ...
***
ﺗﺎﻧﻲ ﻳﻮﻡ ...
ﻓﻲ ﻃﺮﻳﻘﻬﻢ ﻟﺤﻮﺵ ﺍﻫﻞ ﻧﻀﺎﻝ .. ﻭﻛﺎﻧﺖ ﺭﻫﻒ ﺗﺴﻮﻕ .. ﻃﻮﻝ ﺍﻟﻄﺮﻳﻖ ﻛﺎﻧﺖ ﺗﻀﺤﻚ ﻭﺗﺒﺼﺮ ﻫﻲ ﻭﺃﺧﺘﻬﺎ ﺍﻣﺎ ﺣﻨﺎﻥ ﻓﻜﺎﻧﺖ ﺳﺮﺣﺎﻧﻪ ﻭﻣﺶ ﻣﻌﺎﻫﻢ ﺑﻜﻞ .. ﻟﻴﻦ ﻭﺻﻠﻮﺍ ﻓﻲ ﺣﻮﺵ ﺍﻟﺠﺪ ...
ﺍﻫﻞ ﻧﻀﺎﻝ ..
ﺑﻮﻩ ﺟﺎﺑﺮ ... ﺍﻣﻪ ﻋﺎﺗﻜﻪ ... ﻭﻋﻨﺪﻩ ﺃﺥ ﻭﺃﺧﺖ ﺍﻟﺰﻭﺯ ﻣﺘﺰﻭﺟﻴﻦ ﻋﺎﻳﺸﻴﻦ ﻓﻲ ﺍﻟﺨﺎﺭﺝ ...
ﻋﺎﺗﻜﻪ ﻭﺟﺎﺑﺮ ﻳﺤﺒﻮﺍ ﺣﻨﺎﻥ ﻫﻠﺒﻪ .. ﺩﻳﻤﺎ ﺗﺘﺼﻞ ﺑﻴﻬﻢ ﻭﺗﻮﺍﺻﻞ ﻓﻴﻬﻢ ﺃﻛﺜﺮ ﻣﻦ ﻭﻟﺪﻫﻢ ﻧﻔﺴﻪ ...
ﺧﺸﻮﺍ ﻟﻠﺤﻮﺵ ﻭﺑﻌﺪ ﺳﻼﻡ ﻭﺍﺣﻀﺎﻥ ﻗﻌﺪﻭﺍ ﻳﻬﺪﺭﺯﻭﺍ ..
ﻟﺒﻨﻰ ﻓﻲ ﺣﻀﻦ ﺟﺪﻫﺎ : ﺍﺳﺘﺎﺣﺸﺘﻚ ﻫﻠﺒﻪ ..
ﺟﺎﺑﺮ : ﻛﺎﻥ ﺍﺳﺘﺎﺣﺸﺘﻨﻲ ﺭﺍﻙ ﺗﺴﺄﻟﻲ ﻋﻠﻴﺎ ...
ﻟﺒﻨﻰ ﺑﻀﺤﻜﻪ : ﺍﻟﻘﺮﺍﻳﻪ ﻳﺎﺟﺪﻭ ﺷﻐﻠﺘﻨﺎ ..
ﺟﺎﺑﺮ : ﺳﺒﻠﺔ ﺑﻮﻙ ﺍﻟﺨﺪﻣﻪ ﻳﺎﺑﻮﻱ ﺷﺎﻏﻠﺘﻨﻲ ..
ﻋﺎﺗﻜﻪ : ﺍﻣﺘﻰ ﻣﺮﻭﺡ ..
ﺣﻨﺎﻥ ﺑﺈﺑﺘﺴﺎﻣﻪ : ﺍﻟﻌﺸﻴﻪ ﺇﻥ ﺷﺎﺀ ﺍﻟﻠﻪ ..
ﺟﺎﺑﺮ : ﻫﻮ ﺧﺪﻣﺘﻪ ﻣﺶ ﻭﻟﺖ ﻫﻨﺎﻳﺎ ﻋﻼﺵ ﻣﺎﺯﺍﻝ ﻳﻤﺸﻲ ﻏﺎﺩﻱ ؟
ﺣﻨﺎﻥ : ﺇﺷﺮﺍﻑ ﻭﺣﺎﺟﺎﺕ ﺯﻱ ﻫﻜﻲ ...
ﻋﺎﺗﻜﻪ : ﺭﺑﻲ ﻳﻌﺎﻭﻧﻪ .. ﻫﺎﻩ ﺭﻫﻮﻓﻪ ﺷﻦ ﻣﺪﺍﻳﺮﻩ ﻓﻲ ﺍﻟﻘﺮﺍﻳﻪ ...
ﺭﻫﻒ ﺑﺈﺑﺘﺴﺎﻣﻪ : ﺍﻫﻮ ﺩﺍﺑﺴﻪ ﻓﻴﻬﺎ ..
ﻫﺪﺭﺯﻭﺍ ﻭﺑﻌﺪﻳﻦ ﻧﺎﺿﻮﺍ ﺩﺍﺭﻭ ﺍﻟﻐﺪﻱ ﻭﺗﻐﺪﻭﺍ ... ﺑﻌﺪ ﺍﻟﻌﺼﺮ ﺑﺪﻭ ﻳﻮﺗﻮﺍ ﻟﻠﻌﻴﺪ ﻣﻴﻼﺩ ..
ﺣﻨﺎﻥ ﻛﺎﻧﺖ ﺗﺮﺍﺟﻲ ﻓﻴﻪ ﻭﻫﻮ ﻋﻄﻞ ﺧﺎﻓﺖ ﺍﺗﺼﻠﺖ ﺑﻴﻪ ﻫﻠﺒﻪ ﻣﺎﺭﺩﺵ ﺯﺍﺩﺕ ﺧﺎﻓﺖ ... ﻟﻜﻦ ﻛﺎﻧﺖ ﺗﺒﻴﻦ ﺍﻧﻬﺎ ﻋﺎﺩﻳﻪ ﻗﺪﺍﻡ ﺃﻫﻠﻪ ... ﻟﻴﻦ ﺟﺘﻬﺎ ﺭﺳﺎﻟﻪ ﻛﺎﻧﺖ ﻣﻨﻪ ..
( ﻣﺎﺗﺴﺘﻨﻮﻧﻴﺶ ﺑﻨﺮﻭﺡ ﻓﻲ ﺍﻟﻠﻴﻞ ) ... ﺗﻔﺎﺟﺌﺖ ﺍﺗﺼﻠﺖ ﺑﻴﻪ ﻟﻘﺎﺗﻪ ﻣﻘﻔﻞ ... ﻋﻴﻮﻧﻬﺎ ﺗﻌﺒﻮﺍ ﺩﻣﻮﻉ ...
ﺍﻟﻠﻪ ﺃﻛﺒﺮ ﺍﻟﻠﻪ ﺃﻛﺒﺮ ...
ﻛﺎﻥ ﺁﺫﺍﻥ ﺍﻟﻤﻐﺮﺏ ...
ﺗﻌﻮﺫﺕ ﻣﻦ ﺍﻟﺸﻴﻄﺎﻥ ﻭﺧﺸﺖ ﺑﺶ ﺗﺼﻠﻲ ...
ﺍﻣﺎ ﻋﻨﺪﻩ ﻫﻮ .. ﻃﻠﻊ ﻣﻦ ﺍﻟﺠﺎﻣﻊ ﺑﻌﺪ ﺻﻠﻰ ﺍﻟﻤﻐﺮﺏ ﻭﺗﻮﺟﻪ ﻃﻮﻝ .. ﻟﺤﻮﺵ ﻳﺎﺭﺍ ... ﻛﺎﻥ ﻃﻮﻝ ﻃﺮﻳﻖ ﻣﺘﻠﻬﻒ ﺃﻣﺘﻰ ﻳﻮﺻﻞ .. ﻭﺻﻞ ﻟﻘﺎﻫﺎ ﻧﺎﺯﻟﻪ ﻣﻦ ﺍﻟﺴﻴﺎﺭﻩ ﻭﻣﻌﺎﻫﺎ ﻭﻟﺪﻫﺎ ﺍﺑﺘﺴﻢ .. ﻭﻧﺰﻝ ﻭﺳﻜﺮ ﺍﻟﺒﺎﺏ ﻭﺗﻮﺟﻬﻠﻬﻢ ..
ﻳﺎﺭﺍ ﺍﺩﺧﻞ ﻓﻲ ﻭﻟﺪﻫﺎ ﻟﻠﺤﻮﺵ ..
" ﻳﺎﺭﺍ "..
ﺣﻄﺖ ﺍﻳﺪﻫﺎ ﻉ ﻗﻠﺒﻬﺎ ﺍﻟﻠﻲ ﻳﺪﻕ ﺑﻘﻮﺓ ﻭﺍﻟﺘﻔﺘﺖ .. ﻋﻴﻮﻧﻬﺎ ﻟﻤﻌﻮﺍ ﻭﺍﺭﺗﺴﻤﺖ ﻉ ﻭﺟﻬﻬﺎ ﺍﺑﺘﺴﺎﻣﻪ ﺣﻠﻮﺓ ﻫﻠﺒﻪ ..
ﻫﻮ ﻳﺸﻮﻓﻠﻬﺎ ﺑﺤﺐ ﻭﺑﺸﻮﻕ ﻗﻌﺪﻭﺍ ﻳﺸﺒﺤﻮﺍ ﻟﺒﻌﻀﻬﻢ ﻫﻠﺒﻪ ...
ﺑﻌﺪﻳﻦ ﻫﻮ ﻗﺎﻝ : ﻛﻴﻒ ﺍﻟﺤﺎﻝ ..
ﻳﺎﺭﺍ ﺑﺼﻮﺕ ﻳﺪﻭﺏ ﻃﺎﻟﻊ : ﺗﻮﺍ ﻭﻟﻴﺖ ﻛﻮﻳﺴﻪ ..
ﻧﻀﺎﻝ ﻏﻤﺾ ﻋﻴﻮﻧﻪ ﻭﻓﺘﺤﻬﻢ ﺑﻌﺪﻳﻦ ﻗﺎﻝ ﺑﻠﻬﻔﻪ : ﻳﺎﺭﺍ ﻧﺒﻲ ﻧﻜﻠﻤﻚ ﻓﻲ ﻣﻮﺿﻮﻉ ﻣﻬﻢ ..
ﻫﻲ ﺍﺑﺘﺴﻤﺖ ﻭﻗﺎﻟﺖ : ﺍﺳﺘﻨﻰ ﻧﺪﺧﻞ ﺟﺒﺮ ... ﺩﺧﻠﺖ ﻭﻟﺪﻫﺎ ﺩﺍﺧﻞ ﻋﻄﺎﺗﻪ ﺍﻵﻳﺒﺎﺩ ﻳﻠﻬﻰ ﺑﻴﻪ ﻭﻃﻠﻌﺖ ﻟﻨﻀﺎﻝ .. ﻭﻗﻔﺖ ﻗﺪﺍﻣﻪ ﻭﻫﻲ ﻣﺮﺑﻌﻪ ﺍﻳﺪﻫﺎ ..
ﻳﺎﺭﺍ ﺑﻨﻈﺮﺓ ﺣﺐ ﻭﻫﻲ ﻣﻠﻬﻮﻓﻪ : ﺷﻦ ﻫﻮ ﺍﻟﻤﻮﺿﻮﻉ ﺍﻟﻠﻲ ﺗﺒﻴﻨﻲ ﻓﻴﻪ ..
ﻧﻀﺎﻝ ﻳﺸﺒﺢ ﻟﻌﻴﻮﻧﻬﺎ ﺑﻌﺪﻳﻦ ﺑﻠﻊ ﺭﻳﻘﻪ ﻭﻭﺯﻉ ﻧﻈﺮﻩ ﻉ ﺍﻟﻤﻜﺎﻥ ﻭﺭﺟﻊ ﻳﺸﻮﻓﻠﻬﺎ : ﻳﺎﺭﺍ ... ﺍﻧﻲ ﺇﻧﺴﺎﻥ ﻃﻮﻝ ﻋﻤﺮﻱ ﻣﺎﺷﻲ ﺻﺢ ﻻﻧﻌﺮﻑ ﻧﻠﻒ ﻭﻧﺪﻭﺭ ﻭﻻﻧﻌﺮﻑ ﻧﻜﻮﻥ ﺧﻮﺍﻥ ﻭﻻ ﻧﻘﻠﻞ ﻣﻦ ﺍﺣﺘﺮﺍﻡ ﺍﻱ ﺣﺪ ﻧﻌﺮﻓﻪ ...
ﻳﺎﺭﺍ ﺑﻌﺪﻡ ﻓﻬﻢ : ﺑﺎﻫﻲ !!
ﻧﻀﺎﻝ ﻗﺪﻣﻠﻬﺎ : ﻳﺎﺭﺍ ... ﻣﺮﺓ ﺳﺄﻟﺘﻴﻨﻲ .. ﺍﺫﺍ ﻛﻨﺘﻲ ﻣﻬﻤﻪ ﻋﻨﺪﻱ ﻭﻭﻗﺘﻬﺎ ﺟﺎﻭﺑﺘﻚ .. ﺗﻮﺍ ﻧﺒﻲ ﻧﺴﺄﻟﻚ ﻧﻔﺲ ﺍﻟﺴﺆﺍﻝ ﻭﻧﺒﻲ ﻧﻌﺮﻑ ﺇﺟﺎﺑﺘﻚ .. ﻳﺎﺭﺍ ﺍﻧﻲ ﻣﻬﻢ ﻋﻨﺪﻙ ..
ﻳﺎﺭﺍ ﻭﻫﻲ ﺗﺸﺒﺢ ﻟﻌﻴﻮﻧﻪ ﻭﻗﺎﻟﺖ ﺑﺼﻮﺕ ﻫﺎﺩﻱ : ﻓﻮﻕ ﻣﺎﺗﺘﺼﻮﺭ ...
ﻧﻀﺎﻝ ﺑﻠﻊ ﺭﻳﻘﻪ ﻭﻗﺮﺏ ﺃﻛﺜﺮ : ﻳﺎﺭﺍ ... ﺗﺘﺰﻭﺟﻴﻨﻲ ...
... ﻳﺘﺒﻊ
١٣ / ١٠ / ٢٠٢٠ · Facebook for Android · ﺭة
