# ﻣﻮﺳﻢ _ ﺍﻟﺘﻮﻟﻴﺐ
# ﺟﻤﺎﻥ _ ﻓﺮﻳﺪ
# ﺍﻟﺠﺰﺀ 24_
ﺍﻟﺴﻼﻡ ﻋﻠﻴﻜﻢ ﻭﺭﺣﻤﺔ ﺍﻟﻠﻪ ﻭﺑﺮﻛﺎﺗﻪ ..
ﺍﻟﺴﻼﻡ ﻋﻠﻴﻜﻢ ﻭﺭﺣﻤﺔ ﺍﻟﻠﻪ ..
" ﺑﺎﺍﺍﺍﺍﺍﺍﺍﺍﺍﺍﺍﺑﺎﺍﺍﺍﺍﺍﺍﺍﺍﺍ "
ﻧﺎﺿﺖ ﻣﻦ ﻣﻦ ﻣﺼﻼﻫﺎ ﻃﻠﻌﺖ ﺗﺠﺮﻱ ﻣﻦ ﺍﻟﺪﺍﺭ ﻣﺘﻮﺟﻪ ﻟﺪﺍﺭ ﺑﻨﺎﺗﻬﺎ ﺍﻟﻠﻲ ﺟﻲ ﻣﻨﻬﺎ ﺍﻟﺼﻮﺕ ... ﻟﻘﺘﻬﻢ ﺍﻟﺰﻭﺯ ﻭﻫﻤﺎ ﻻﺑﺴﻴﻦ ﻣﺼﻠﻴﺎﺗﻬﻢ ﻳﺒﻜﻮﺍ ﺑﺎﻟﻌﺒﺮﺓ .. ﻭﻳﻘﻮﻟﻮﺍ " ﺑﺎﺑﺎ "..
ﺣﻨﺎﻥ ﺑﺨﻮﻑ ﺷﺪﻳﺪ : ﺧﻴﺮﻛﻢ ﺷﻦ ﻓﻲ ..
ﻟﺒﻨﻰ ﺗﺒﻜﻲ ﺑﻌﺒﺮﺗﻬﺎ ﺑﺘﻤﻮﺕ .. ﻭﺭﻫﻒ ﻫﻲ ﺍﻟﻠﻲ ﺭﺩﺕ ..
ﺭﻫﻒ ﺑﺒﻜﻲ : ﻣﺎﻣﺎ ... ﺑﺎﺑﺎ ... ﺩﺍﺭ ... ﺣﺎﺩﺙ ..
ﺣﻨﺎﻥ ﺍﻧﺼﺪﻣﺖ ﻭﻗﺮﺑﺖ ﻣﻦ ﺑﻨﺎﺗﻬﺎ : ﻛﻴﻴﻒ؟؟ﻣﻦ ﻗﺎﻟﻚ؟؟؟
ﺭﻫﻒ ﺑﺎﻟﻌﺒﺮﺓ : ﺗﻮﺍ ... ﺗﻮﺍ .. ﺍﺗﺼﻠﻮﺍ .. ﺑﻴﺎ .. ﻣﻦ ﺍﻟﻤﺴﺘﺶ .. ﻓﻰ ...
" ﺍﺧﺮ ﺭﻗﻢ ﺍﺗﺼﻞ ﺑﻴﻪ ﻧﻀﺎﻝ ﻛﺎﻥ ﺭﻗﻢ ﺭﻫﻒ " ...
ﺣﻨﺎﻥ ﺗﺸﺒﺢ ﻓﺒﻨﺎﺗﻬﺎ ﺍﻟﻠﻲ ﺑﻴﻤﻮﺗﻮﺍ ﻉ ﺑﻮﻫﻢ .. ﺣﻀﻨﺘﻬﻢ : ﺧﻼﺹ ﻳﺎﻣﺎﻣﺎ ﺍﻛﻴﺪ ﻛﻮﻳﺲ ﺑﺈﺫﻥ ﺍﻟﻠﻪ ﺣﻴﻜﻮﻥ ﻛﻮﻳﺲ ..
ﺷﻮﻳﻪ ﻭﺟﺎﻫﻢ ﺭﺿﺎ : ﺧﻴﺮﻛﻢ ﻋﻼﺵ ﺗﺒﻜﻮﺍ ...
ﻗﺎﻟﺘﻠﻪ ﺣﻨﺎﻥ ﻭﺧﺪﻭﺍ ﻣﻦ ﺭﻫﻒ ﺍﺳﻢ ﺍﻟﻤﺴﺘﺸﻔﻰ .. ﻭﻛﻠﻬﻢ ﻣﺸﻮﺍ ﺭﻓﻌﻬﻢ ﺭﺿﺎ ﻓﺴﻴﺎﺭﺗﻪ ...
ﻓﻲ ﺍﻟﻤﺴﺘﺸﻔﻰ ...
ﺃﺳﺎﻣﻪ ﻛﺎﻥ ﻭﺍﻗﻒ ﻳﺴﺘﻨﻰ .. ﻭﻳﺎﺭﺍ ﺣﺘﻰ ﻫﻲ ﻭ ﺗﺒﻜﻲ ﺑﺎﻟﻌﺒﺮﻩ ..
ﻃﻠﻊ ﺍﻟﺪﻛﺘﻮﺭ ﻭﻛﻠﻢ ﺍﺳﺎﻣﻪ ﻭﻣﺸﻲ ﺑﺴﺮﻋﻪ ..
ﺟﺎﺗﻪ ﻳﺎﺭﺍ ﺗﺠﺮﻱ : ﺷﻦ ﻗﺎﻟﻚ ..
ﺍﺳﺎﻣﻪ : ﺇﻥ ﺷﺎﺀ ﺍﻟﻠﻪ ﺧﻴﺮ ...
ﻳﺎﺭﺍ ﺑﻌﺼﺒﻴﻪ : ﻗﻮﻟﻲ ﺷﻦ ﻗﺎﻟﻚ ..
ﺍﺳﺎﻣﻪ : ﻗﺎﻝ ﺍﻥ ﻋﻨﺪﻩ ﺍﺻﺎﺑﻪ ﺑﻠﻴﻐﻪ ﻓﻲ ﺑﻄﻨﻪ ﺧﺸﺖ ﻓﻴﻬﺎ ﺣﺪﻳﺪﻩ ﻭﺗﻠﺰﻣﻪ ﻋﻤﻠﻴﻪ ...
ﻳﺎﺭﺍ ﺣﻄﺖ ﺍﻳﺪﻫﺎ ﻉ ﻓﻤﻪ ﺑﺼﺪﻣﻪ ﻭﺩﻣﻮﻋﻬﺎ ﺗﻨﺰﻝ ..
ﺍﺳﺎﻣﻪ : ﺍﺩﻋﻲ ﺭﺑﻲ ﻣﺎﺗﻜﻮﻧﺶ ﺍﺣﺸﺎﺋﻪ ﺍﻟﺪﺍﺧﻠﻴﻪ ﻣﻀﺮﺭﻩ ...
ﻳﺎﺭﺍ ﻣﺸﺖ ﺍﺗﻜﺖ ﻉ ﺍﻟﺤﻴﻂ ﻭﻫﻲ ﻓﺤﺎﻟﺔ ﺍﻧﻬﻴﺎﺭ ..
ﻉ ﺟﻴﻪ ﺣﻨﺎﻥ ﻭﺧﻮﻫﺎ ﻭﺑﻨﺎﺗﻬﺎ ...
ﺍﺳﺎﻣﻪ ﺍﺿﺎﻳﻖ ﻟﻤﺎ ﺷﺎﻑ ﺣﺎﻟﺘﻬﻢ ..
ﺣﻨﺎﻥ : ﺍﺳﺎﻣﻪ ﺷﻦ ﺻﺎﻳﺮ ﻗﻮﻟﻲ ...
ﺍﺳﺎﻣﻪ ﺷﺒﺢ ﻟﻠﺒﻨﺎﺕ : ﻣﺎﻓﻲ ﺷﻲ ﺧﻄﻴﺮ .. ﻳﺒﻲ ﻋﻤﻠﻴﻪ ﺑﺴﻴﻄﻪ ﺑﺲ .. ﺗﻌﺎﻟﻲ ﻣﻌﺎﻱ ﻟﻠﺪﻛﺘﻮﺭ ﻭﻫﻮ ﻳﻔﻬﻤﻚ ..
ﺣﻨﺎﻥ ﺣﺴﺖ ﺍﻥ ﻓﻲ ﺷﻲ ﺧﻄﻴﺮ .. ﺷﻮﻳﻪ ﻭﻃﻠﻌﻮﺍ ﻧﻀﺎﻝ ﻣﻦ ﺍﻟﻐﺮﻓﻪ ﺑﺶ ﻳﺮﻓﻌﻮﻩ ﻟﻠﻌﻤﻠﻴﺎﺕ .. ﺑﻨﺎﺗﻪ ﻭﻳﺎﺭﺍ ﻟﻤﺎ ﺷﺎﻓﻮﻩ ﻋﻴﻄﻮﺍ ﻭﺟﻬﻪ ﻛﻠﻪ ﻛﺪﻣﺎﺕ ﻭﺩﻣﻮﺍﺕ ﻭﺣﺎﻟﻪ .. ﻭﺣﻨﺎﻥ ﻭﺟﻌﻬﺎ ﻉ ﺍﻵﺧﺮ ...
ﺳﻤﻌﻮﺍ ﺻﻮﺕ ﺣﺎﺟﻪ ﺍﺭﺗﻄﻤﺖ ﻉ ﺍﻷﺭﺽ ﺷﺎﻓﻮﺍ ﻟﻤﺼﺪﺭ ﺍﻟﺼﻮﺕ ﻟﻘﻮﺍ ﻟﺒﻨﻰ ﻓﺎﻗﺪﻩ ﺍﻟﻮﻋﻲ ..
ﺣﻨﺎﻥ ﺑﻬﻠﻊ : ﺑﻨﺘﻲ !!!
***
ﺍﺗﻔﻀﻞ ﺍﻟﺌﻬﻮﺓ ﺣﻀﺮﺗﻚ ..
ﻣﻌﺎﻭﻳﻪ ﺧﺪﺍﻫﺎ ..
: ﺗﺆﻣﺮ ﺑﺤﺎﺟﻪ ﺗﺎﻧﻴﻪ ..
ﻣﻌﺎﻭﻳﻪ ﺷﺒﺤﻠﻬﺎ : ﺍﺳﻤﻌﻲ ... ﻛﻠﻤﻲ ﺍﻟﻠﻲ ﻣﻌﺎﻙ ﻛﻠﻬﻢ ﻳﺠﻮﻧﻲ ﻫﻨﻲ ..
ﺧﺎﻓﺖ : ﺣﺎﺿﺮ ﻳﺎﺳﻴﺪﻱ ... ﻭﻃﻠﻌﺖ ﻭﻫﻲ ﺗﺮﻋﺶ ..
ﻭﻫﻮ ﺷﺮﺏ ﺍﻟﻘﻬﻮﺓ ﻭﻣﺒﺘﺴﻢ ﻃﺒﻌﺎ ﻹﻧﻪ ﻳﻔﻜﺮ ﻓﻴﻬﺎ
ﺷﻮﻳﻪ ﻭﺟﻮﻩ ﺍﻟﺨﺪﺍﻣﺎﺕ ﻭﻗﻔﻮﺍ ﻗﺪﺍﻣﻪ ﺟﻨﺐ ﺑﻌﺾ ...
ﺣﻂ ﻣﻌﺎﻭﻳﻪ ﺍﻟﻔﻨﺠﺎﻥ ﻭﻧﺎﺽ ﻗﺪﻣﻠﻬﻢ : ﺍﺣﻤﻢ ... ﻣﺮﺗﺎﺣﻴﻦ ﻓﻲ ﺧﺪﻣﺘﻜﻢ ﻫﻨﻲ ..
ﺷﺒﺤﻮﺍ ﻟﺒﻌﻀﻬﻢ ﻭﻣﺘﻔﺎﺟﺌﻴﻦ ﺑﺎﻟﺴﺆﺍﻝ ..
ﺭﺩﺕ ﻛﺒﻴﺮﺗﻬﻢ ...
: ﺍﻳﻪ ﻳﺎﺳﻴﺪﻱ ﻣﺮﺗﺎﺣﻴﻦ ﺑﺮﺷﻪ ..
ﻣﻌﺎﻭﻳﻪ : ﻣﺎﺗﺨﺎﻓﻮﺵ ﺟﺎﻭﺑﻮﺍ ﺑﺼﺮﺍﺣﻪ ..
ﻭﺣﺪﻩ ﺗﺎﻧﻴﻪ ﺭﺩﺕ : ﺍﻧﻲ ﺍﻟﺨﺪﻣﻪ ﻫﻨﻲ ﻣﺮﻳﺤﺘﻨﻲ ..
: ﻭﺍﻧﺎ ﻛﻤﺎﻥ ﻭﺍﻟﻠﻪ ..
: ﻳﺎﺳﻴﺪﻱ ﺍﻟﻜﻞ ﻣﺮﺗﺎﺣﻴﻦ ﻭﺑﺎﻟﺼﺮﺍﺣﻪ ﺟﺎﻭﺑﻨﺎﻙ ..
ﻣﻌﺎﻭﻳﻪ : ﺗﻤﺎﻡ ... ﻣﻦ ﻓﻴﻜﻢ ﺧﺎﻃﺮﻫﺎ ﺗﺮﻭﺡ ﻟﻨﺎﺳﻬﺎ ﺗﺰﻭﺭﻫﻢ ﻭﺗﻮﻟﻲ ..
ﺍﻟﻤﺼﺮﻳﻪ ﻭﺍﻟﺘﻮﻧﺴﻴﻪ ﻭﺍﻟﻤﻐﺮﺑﻴﻪ ﻋﻴﻮﻧﻬﻢ ﺗﻌﺒﻮﺍ ﺩﻣﻮﻉ ...
ﻣﻌﺎﻭﻳﻪ ﻻﺣﻆ : ﻣﻦ ﻏﺪﻭﺓ ﺟﻬﺰﻭﺍ ﺍﻧﻔﺴﻜﻢ ﺣﻨﺠﺰﻟﻜﻢ .. ﻭﺍﻃﻤﻨﻮﺍ ﻣﺮﺗﺒﺎﺗﻜﻢ ﻣﺎﺷﻴﻪ ...
ﺍﻟﺜﻼﺗﻪ ﻓﺮﺣﻮﺍ ﻣﻦ ﻗﻠﺒﻬﻢ .. ﻭﺍﻟﻤﺼﺮﻳﻪ ﻗﺎﻟﺖ : ﺭﺑﻨﺎ ﻳﺠﺒﺮ ﺑﺨﺎﻃﺮﻙ ﻭﻳﺰﻳﺪﻙ ﻣﻦ ﻧﻌﻴﻤﻮﺍ .. ﻭﻳﻨﻮﻟﻚ ﺍﻟﻠﻲ ﺑﺒﺎﻟﻚ ..
ﻓﺮﺡ ﺑﺎﻟﺪﻋﻮﺓ ﺍﻷﺧﻴﺮﻩ ﻭﻓﻲ ﻧﻔﺴﻪ ﻗﺎﻝ " ﺁﻣﻴﻦ "
ﻣﻌﺎﻭﻳﻪ : ﻭﺗﻮﺍ ﺑﺮﻭﺍ ﻛﻤﻠﻮﺍ ﺷﻐﻠﻜﻢ .. ﻭﻣﺸﻮﺍ ﻭﻫﻤﺎ ﻓﺮﺣﻨﺎﺕ ﻭﻫﻮ ﺣﺲ ﺑﺸﻌﻮﺭ ﺣﻠﻮ ﻫﻠﺒﻪ ﻹﻧﻪ ﻛﺎﻥ ﺳﺒﺐ ﻓﻲ ﻓﺮﺣﺘﻬﻢ ..
***
ﺍﻟﺪﻛﺘﻮﺭ : ﺍﻧﻬﻴﺎﺭ ﻋﺼﺒﻲ ..
ﺣﻨﺎﻥ ﺑﺼﺪﻣﻪ : ﺍﻧﻬﻴﺎﺭ ﻋﺼﺒﻲ !!!!
ﺍﻟﺪﻛﺘﻮﺭ : ﺣﺎﻟﻴﺎ ﻫﻲ ﺭﺍﻗﺪﻩ ﻭﺣﺘﻔﻴﻖ ﺑﻌﺪ ﺳﺎﻋﺘﻴﻦ ﺍﻭﺗﻼﺛﻪ .. ﻻﺑﺎﺱ ﺇﻥ ﺷﺎﺀ ﺍﻟﻠﻪ ﻭﻣﺸﻲ ..
ﺣﻨﺎﻥ ﻣﺼﺪﻭﻣﻪ ﺗﻜﻠﻢ ﻓﻲ ﺭﻫﻒ : ﺍﻧﻬﻴﺎﺭ ﻋﺼﺒﻲ ﻣﺮﺓ ﻭﺣﺪﻩ !!!
ﺭﻫﻒ ﺑﺒﻜﻲ : ﺗﻌﺮﻓﻴﻬﺎ ﻗﺪﺍﺵ ﺗﺤﺐ ﺑﺎﺑﺎ ..
ﺣﻨﺎﻥ ﺣﻄﺖ ﺍﻳﺪﻫﺎ ﻉ ﺟﺒﻬﺘﻬﺎ ﻭﺩﻣﻮﻋﻬﺎ ﻧﺰﻟﻮﺍ ..
ﺭﻫﻒ ﺷﺪﺗﻬﺎ : ﻣﺎﻣﺎ ﺗﻌﺎﻟﻲ ﻗﻌﻤﺰﻱ ... ﻣﺸﺖ ﺣﻨﺎﻥ ﻣﻊ ﺑﻨﺘﻬﺎ ﺑﺎﻟﺴﻴﻒ ﻭﻗﻌﻤﺰﺕ ﻭﻫﻲ ﻓﻲ ﺣﺎﻟﻪ ..
ﺭﻫﻒ : ﻧﺠﻴﺒﻠﻚ ﻣﻴﻪ ..
ﺣﻨﺎﻥ : ﺗﺲ .. ﺑﺮﻱ ﺍﻃﻤﻨﻲ ﻉ ﺑﻮﻙ ...
ﺭﻫﻒ : ﺧﺸﺸﻮﻩ ﺍﻟﻌﻤﻠﻴﻪ ...
ﺣﻨﺎﻥ : ﺑﺮﻱ ﺷﻮﻓﻲ ﺷﻦ ﺻﺎﺭ ﻓﻴﻪ ..
ﺭﻫﻒ ﻭﻫﻲ ﺗﺮﺷﻒ : ﺣﺎﺿﺮ ...
ﻣﺸﺖ ﺭﻫﻒ ... ﻭﻛﺎﻧﺖ ﺣﺎﻟﺘﻬﺎ ﺍﻟﻨﻔﺴﻴﻪ ﻣﺪﻣﺮﻩ ﻣﺶ ﻣﻨﺘﺒﻬﻪ ﻭﻻﻣﺮﻛﺰﻩ ﻓﻲ ﺣﺎﺟﻪ ﻟﻴﻦ ﺍﻧﺨﺒﻄﺖ ﻓﻴﻪ .. ﻗﺎﻣﺖ ﻋﻴﻮﻧﻬﺎ ﻭﻗﻌﺪﺕ ﺗﺸﺒﺤﻠﻪ ﺑﻨﻈﺮﺓ ﺣﺰﻳﻨﻪ ﻭﺧﺎﻳﻔﻪ ..
ﺍﺳﻨﺎﻡ ﺑﺨﻮﻑ : ﺭﻫﻒ ﺧﻴﺮﻙ ..
ﺭﻫﻒ ﻓﻤﻬﺎ ﺗﻘﻮﺱ ﻭﺩﻣﻮﻋﻬﺎ ﻧﺰﻟﻮﺍ ﺑﻌﺪﻳﻦ ﺣﻄﺖ ﺍﻳﺪﻳﻬﺎ ﻉ ﻭﺟﻬﻬﺎ ﻭﻗﻌﺪﺕ ﺗﺒﻜﻲ ﺑﺎﻟﺼﻮﺕ ..
ﺍﺳﻨﺎﻡ ﻣﺎﺕ ﻣﻦ ﺍﻟﺨﻮﻑ : ﺭﻫﻒ .. ﺍﻫﺪﻱ ﺑﺲ ﻓﻬﻤﻴﻨﻲ .. ﺷﻦ ﺻﺎﺭ ...
ﺭﻫﻒ ﺣﻮﻟﺖ ﺍﻳﺪﻫﺎ ﻭﻗﺎﻟﺖ : ﺑﺎﺑﺎ ... ﺩﺍﺭ .. ﺣﺎﺩﺙ ..
ﺍﺳﻨﺎﻡ ﺍﻧﺼﺪﻡ : ﺷﻦ ﺻﺎﺭ ﻓﻴﻪ ..
ﺭﻫﻒ : ﻓﻲ .. ﺍﻟﻌﻤﻠﻴﺎﺕ ...
ﺍﺳﻨﺎﻡ : ﻻﺣﻮﻝ ﻭﻻﻗﻮﺓ ﺇﻻ ﺑﺎﻟﻠﻪ .. ﺑﺎﻫﻲ ﻭﻳﻦ ﻣﺎﺷﻴﻪ ﺍﻧﺘﻲ ﺗﻮﺍ ..
ﺭﻫﻒ : ﻟﺒﺎﺑﺎ .. ﻓﻲ ﺍﻟﻌﻤﻠﻴﺎﺕ ..
ﺍﺳﻨﺎﻡ : ﺑﺎﻫﻲ ﺗﻌﺎﻟﻲ ... ﺣﻂ ﺍﻳﺪﻩ ﻭﺭﺍ ﻇﻬﺮﻫﺎ ﻳﺪﻭﺏ ﻻﻣﺲ ﻇﻬﺮﻫﺎ ﻭﺭﻓﻌﻬﺎ ﻟﻐﺮﻓﺔ ﺍﻟﻌﻤﻠﻴﺎﺕ ﺍﻟﻠﻲ ﻓﻴﻬﺎ ﺑﻮﻫﺎ ...
ﺍﺳﻨﺎﻡ ﻗﻠﺒﻪ ﻳﺘﻘﻄﻊ ﻋﻠﻴﻬﺎ : ﺍﺩﻋﻴﻠﻪ ﺭﻫﻒ .. ﻣﺤﺘﺎﺝ ﻟﻠﺪﻋﺎﺀ ﺗﻮﺍ ..
ﺭﻫﻒ : ﻳﺎﺍﺍﺭﺏ ..
ﺍﺳﻨﺎﻡ : ﺣﻴﻨﻮﺽ ﻣﻨﻬﺎ ﺑﺈﺫﻥ ﺍﻟﻠﻪ ...
ﺭﻫﻒ : ﺇﻥ ﺷﺎﺀ ﺍﻟﻠﻪ ... ﻭﺻﻠﻬﺎ ﻏﺎﺩﻱ ﻭﻟﻘﻲ ﻳﺎﺭﺍ ﻭﺍﺳﺎﻣﻪ ﻭﺭﺿﺎ ..
ﺍﺳﺎﻣﻪ : ﺍﺳﻨﺎﻡ؟
ﺍﺳﻨﺎﻡ : ﺩﻛﺘﻮﺭ .. ﺷﻦ ﺻﺎﺭ ﻓﻌﻤﻲ ﻧﻀﺎﻝ ..
ﺍﺳﺎﻣﻪ ﺷﺒﺢ ﻟﺮﻫﻒ : ﻗﺎﻋﺪ ﻓﻲ ﺍﻟﻌﻤﻠﻴﻪ ...
ﺭﺿﺎ ﺟﻲ ﻟﺮﻫﻒ : ﺷﻦ ﺣﺎﻝ ﻟﺒﻨﻰ ..
ﺭﻫﻒ : ﺍﻧﻬﻴﺎﺭ ﻋﺼﺒﻲ ..
ﺭﺿﺎ ﺑﺄﺳﻒ : ﺗﺲ ...
ﺍﺳﺎﻣﻪ ﺧﺪﻱ ﺍﺳﻨﺎﻡ ﻉ ﺗﺮﻛﻴﻨﻪ : ﻋﻼﺵ ﺟﺎﻳﺒﻬﺎ ..
ﺍﺳﻨﺎﻡ : ﻫﻲ ﺗﺒﻲ ﺗﻄﻤﻦ ﻋﻠﻴﻪ .. ﺍﺳﺎﺳﺎ ﻛﺎﻧﺖ ﺟﺎﻳﻪ ﻫﻨﻲ ﻭﺍﻧﻲ ﺗﻼﻗﻴﺖ ﺑﻴﻬﺎ ﺻﺪﻓﻪ ... ﺷﻦ ﺻﺎﺭ ﻓﺒﻮﻫﺎ ...
ﺍﺳﺎﻣﻪ : ﺍﻟﻌﻤﻠﻴﻪ ﺻﻌﺒﻪ ﺷﻮﻳﻪ ﺍﻟﻜﺒﺪ ﺟﺰﺀ ﺑﺴﻴﻂ ﻣﻨﻬﺎ ﺗﺤﻮﻝ ..
ﺍﺳﻨﺎﻡ ﺍﻧﺼﺪﻡ ..
ﺍﺳﺎﻣﻪ : ﻭﺟﺪﺍﺭ ﺍﻟﻤﻌﺪﻩ ﺗﻤﺰﻕ ﺷﻮﻳﻪ .. ﺍﻟﺤﻤﺪ ﻟﻠﻪ ﺍﻟﻠﻲ ﺟﺖ ﻉ ﻫﻜﻲ ..
ﺭﺿﺎ : ﺍﻧﻲ ﻣﺎﺷﻲ ﻷﻣﻚ ..
ﺭﻫﻒ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ﻭﺭﺿﺎ ﻣﺸﻲ ..
ﻗﻌﺪﻭﺍ ﻳﺴﺘﻨﻮﺍ ﻭﻳﺴﺘﻨﻮﺍ ... ﻟﻴﻦ ﻃﻠﻊ ﺍﻟﺪﻛﺘﻮﺭ ...
ﻛﻠﻬﻢ ﻣﺸﻮﻟﻪ ..
ﺍﺳﺎﻣﻪ : ﻫﺎﻩ ﺩﻛﺘﻮﺭ ..
ﺍﻟﺪﻛﺘﻮﺭ : ﺍﻟﺤﻤﺪ ﻟﻠﻪ ﺍﻟﻌﻤﻠﻴﻪ ﻧﺎﺟﺤﻪ ﻭﻗﺪﺭﻧﺎ ﻧﻨﻘﺬﻭﺍ ﺍﻟﻮﺿﻊ .. ﻫﻮﺣﺎﻟﻴﺎ ﺣﻴﻄﻠﻊ ﻣﻦ ﻫﻨﻲ ﻟﻠﻌﻨﺎﻳﻪ .. ﻭﺭﺑﻚ ﻳﻜﻤﻠﻪ ﺑﺎﻟﺸﻔﺎﺀ ..
ﻳﺎﺭﺍ ﺑﺒﻜﻲ : ﻳﻌﻨﻲ ﻳﺎﺩﻛﺘﻮﺭ ﻣﺎﻓﻴﺶ ﺧﻄﺮ ﻋﻠﻴﻪ ..
ﺍﻟﺪﻛﺘﻮﺭ : ﺣﺎﻟﻴﺎ ﻻ .. ﺑﺲ ﻻﺯﻡ ﻳﻘﻌﺪ ﺗﺤﺖ ﺍﻟﻤﺮﺍﻗﺒﻪ .. ﺩﻛﺘﻮﺭ ﺍﺳﺎﻣﻪ ﻣﻤﻜﻦ ﺷﻮﻳﻪ ...
ﺍﺳﺎﻣﻪ : ﺑﺎﻫﻲ .. ﺷﺒﺢ ﻟﺮﻫﻒ .. ﺍﻃﻤﻨﻲ ﺭﻫﻒ ﺑﻨﺘﻲ ﺑﺎﺑﺎ ﺍﺣﺴﻦ ﺗﻮﺍ .. ﻭﻟﻒ ﻣﺸﻲ ﻣﻊ ﺍﻟﺪﻛﺘﻮﺭ ..
ﺍﺳﻨﺎﻡ : ﻫﺎﻩ ﺷﻔﺘﻲ ﺣﺎﻟﻪ ﺑﺎﻫﻲ .. ﻣﻌﺎﺵ ﺗﺒﻜﻲ ﺍﺭﺟﻮﻙ ..
ﻳﺎﺭﺍ ﺷﺒﺤﺘﻠﻪ ﺍﺑﺘﺴﻤﺖ ﻣﻦ ﺑﻴﻦ ﺩﻣﻮﻋﻬﺎ .. ﻧﻈﺮﺍﺗﻪ ﻟﺮﻫﻒ ﻛﻠﻬﺎ ﺣﺐ ... ﻭﺧﻮﻑ ﻋﻠﻴﻬﺎ " ﺣﺘﻰ ﻳﺎﺭﺍ ﻻﺣﻈﺖ ﻣﻦ ﺍﻭﻝ ﻧﻈﺮﻩ ﻭﺭﻫﻒ ﺳﻨﻴﻦ ﻣﺎﻻﺣﻈﺖ ﺷﻲ "...
ﺭﻫﻒ ﺍﺑﺘﺴﻤﺖ : ﺑﻨﻤﺸﻲ ﻧﺸﻮﻑ ﻟﺒﻨﻰ ..
ﺍﺳﻨﺎﻡ : ﺑﺎﻫﻲ ﺗﻌﺎﻟﻲ ... ﻭﻣﺸﻮﺍ ﻣﻊ ﺑﻌﺾ ..
ﺍﻣﺎ ﻳﺎﺭﺍ ﻗﻌﺪﺕ ﻭﺍﻗﻔﻪ ﻣﺘﻜﻴﻪ ﻉ ﺍﻟﺤﻴﻂ ﻭﻣﺮﺑﻌﻪ ﺍﻳﺪﻫﺎ ﻭﺗﺸﺒﺢ ﻓﻮﻕ .. ﻭﺩﻣﻮﻋﻬﺎ ﻳﻨﺰﻟﻮﺍ ...
ﻧﻴﺮﻭﺯ : ﻻﺣﻮﻝ ﻭﻻﻗﻮﺓ ﺇﻻ ﺑﺎﻟﻠﻪ ..
ﺣﻨﺎﻥ ﺑﺒﻜﻲ : ﺍﻟﺒﻨﺖ ﻛﺎﻧﺖ ﺗﻜﺘﻢ ﻓﻲ ﻗﻠﺒﻬﺎ ﻭﺍﻟﻠﻲ ﺩﻳﺮ ﻓﻴﻪ ﻣﻊ ﺑﻮﻫﺎ ﻏﺼﺐ ﻋﻨﻬﺎ ﺯﻋﻼﻧﻪ ﻉ ﺧﺎﻃﺮﻱ .. ﺻﻐﻴﺮﻩ ﻣﺎﺯﺍﻝ .. ﺣﺮﺍﻡ ﻳﺼﻴﺮ ﻓﻴﻬﺎ ﻫﻜﻲ .. ﺍﻟﻠﻪ ﻳﺴﺎﻣﺤﻪ ﻭﺧﻼﺹ .. ﺍﻟﻠﻪ ﻳﺴﺎﻣﺤﻪ ..
ﺭﺿﺎ ﻳﺸﻮﻑ ﻷﺧﺘﻪ ﻭﻣﻘﻬﻮﺭ ﻋﻠﻲ ﺣﺎﻟﻬﺎ ...
ﺷﻮﻳﻪ ﻭﺟﺖ ﺭﻫﻒ ﻭﻣﻌﺎﻫﺎ ﺍﺳﻨﺎﻡ ..
ﺭﻫﻒ ﻟﻤﺎ ﺷﺎﻓﺖ ﺍﻣﻬﺎ ﺗﺒﻜﻲ ﺟﺘﻬﺎ ﺗﺠﺮﻱ : ﺧﻴﺮﻙ ﻣﺎﻣﺎ ..
ﺣﻨﺎﻥ : ﺷﻦ ﺻﺎﺭ ﻓﻲ ﺑﺎﺑﺎ ..
ﺭﻫﻒ : ﻋﻤﻠﻴﺘﻪ ﻧﺠﺤﺖ ﻭﻭﺿﻌﻪ ﻣﺴﺘﻘﺮ ﻭﻣﺎﻓﻴﺶ ﺧﻄﺮ ﻋﻠﻴﻪ ﻫﻜﻲ ﻗﺎﻝ ﺍﻟﺪﻛﺘﻮﺭ ...
ﺣﻨﺎﻥ : ﺍﻟﺤﻤﺪ ﻟﻠﻪ ...
ﺭﻫﻒ : ﺷﻦ ﺻﺎﺭ ﻓﻲ ﻟﺒﻨﻰ ﻓﺎﻗﺖ ..
ﺣﻨﺎﻥ : ﻓﺎﻓﺖ ﻭﻗﻌﺪﺕ ﺗﺒﻜﻲ ﺑﻬﺴﺘﻴﺮﻳﻪ ﺍﺿﻄﺮﻭﺍ ﻳﻌﻄﻮﻫﺎ ﻣﻨﻮﻡ ..
ﺭﻫﻒ : ﻳﺎﺍﺍﺭﺑﻲ ..
ﺣﻨﺎﻥ ﺷﺪﺕ ﻳﺪﻫﺎ : ﻗﻌﻤﺰﻱ ﻳﺎﺑﻨﺘﻲ ﺣﺘﻮﻟﻲ ﻛﻮﻳﺴﻪ ﺑﻌﻮﻥ ﺍﻟﻠﻪ ..
ﻗﻌﻤﺰﺕ ﺭﻫﻒ ﻭﺣﻨﺎﻥ ﺷﺎﻓﺖ ﺍﺳﻨﺎﻡ ..
ﺍﺳﻨﺎﻡ : ﺇﻥ ﺷﺎﺀ ﺍﻟﻠﻪ ﻻﺑﺎﺱ ﻉ ﻋﻤﻲ ﻧﻀﺎﻝ ﻭﻟﺒﻨﻰ ..
ﺣﻨﺎﻥ : ﻻﻳﻮﺭﻳﻚ ﺑﺎﺱ ﻭﻟﺪﻱ ...
ﺭﺿﺎ : ﺭﻫﻒ ﺣﺒﻴﺒﺘﻲ ﻧﻮﺿﻲ ﻧﺮﻭﺡ ﺑﻴﻚ ﺣﺎﺳﻚ ﺗﺎﻋﺒﻪ ..
ﺭﻫﻒ : ﻻﻻ ﻣﺎﻓﻴﺎ ﺷﻲ ﻧﺒﻲ ﻧﻘﻌﺪ ..
ﺍﺳﻨﺎﻡ : ﺣﺘﻰ ﺍﻧﻲ ﻻﺣﻈﺖ ﻭﺟﻬﻬﺎ ﺷﺎﺣﺐ ..
ﺭﻫﻒ ﺷﺒﺤﺘﻠﻪ ..
ﺣﻨﺎﻥ : ﻣﺎﻣﺎ ﺗﺒﻴﻨﻲ ﻧﺮﺿﻰ ﻋﻠﻴﻚ ﺭﻭﺣﻲ ..
ﺭﻫﻒ : ﻣﺎﻣﺎ !!
ﺣﻨﺎﻥ : ﺍﺳﻤﻌﻲ ﺍﻟﻜﻼﻡ ..
ﻧﻴﺮﻭﺯ : ﺗﻮ ﻧﺮﻭﺡ ﻣﻌﺎﻛﻢ ...
ﺣﻨﺎﻥ : ﻳﺎﺭﻳﺖ ﻧﻴﺮﻭﺯ ﺗﻘﻌﺪﻱ ﺣﺪﺍﻫﺎ ..
ﺭﻫﻒ : ﻣﺎﻣﺎﺍﻥ ...
ﺣﻨﺎﻥ ﺑﺤﺰﻡ : ﺭﻫﻒ ..
ﺭﻫﻒ ﺑﻀﻴﻖ : ﺣﺎﺿﺮ ...
ﺧﺎﺵ ﻟﻠﻤﺴﺘﺸﻔﻰ ﻋﻨﺪﻩ ﺩﻳﻮﺗﻲ .. ﻟﻤﺎ ﺧﺶ ﺍﺗﻔﺎﺟﺄ ﻭﻳﻦ ﺷﺎﻑ ﺧﻄﻴﺒﺘﻪ ﻭﺍﺳﻨﺎﻡ ﻣﻌﺎﻫﺎ .. ﺗﻌﺼﺐ ﻉ ﺍﻵﺧﺮ .. ﻭﻗﺪﻡ ..
ﻣﻬﺎﺏ : ﺍﻟﺴﻼﻡ ﻋﻠﻴﻜﻢ .. ﺧﻴﺮ ﺇﻥ ﺷﺎﺀ ﺍﻟﻠﻪ ..
ﺍﺳﻨﺎﻡ ﻭﺟﻬﻪ ﺗﻐﻴﺮ ﻭﺭﻗﻴﺘﻠﻪ ..
ﺭﺿﺎ : ﻋﻔﻮﺍ ﻣﻦ ﺍﻧﺖ؟
ﻣﻬﺎﺏ : ﺍﻧﻲ ﺧﻄﻴﺐ ﺭﻫﻒ ..
ﻧﻴﺮﻭﺯ : ﻣﻬﺎﺏ ..
ﻣﻬﺎﺏ : ﺍﻳﻪ ..
ﺃﺳﻨﺎﻡ ﻣﺶ ﻗﺎﺩﺭ ﻳﺘﺤﻤﻞ : ﺍﻧﻲ ﻧﺴﺘﺄﺫﻥ .. ﺇﻥ ﺷﺎﺀ ﺍﻟﻠﻪ ﻻﺑﺎﺱ ﻉ ﻋﻤﻲ ﻧﻀﺎﻝ ... ﻭﻣﺸﻲ .. ﻭﺭﻫﻒ ﻣﻌﺎﻩ ﺑﻌﻴﻮﻧﻬﺎ ﻭﻣﻬﺎﺏ ﻳﺸﺒﺤﻠﻪ ﺑﺤﺪﻩ ... ﻭﺷﺒﺢ ﻟﺮﻫﻒ ﻭﻗﺎﻝ : ﺧﻴﺮﻩ ﻋﻤﻲ ﺷﻦ ﺻﺎﻳﺮﻟﻪ ..
ﺭﺿﺎ : ﺩﺍﺭ ﺣﺎﺩﺙ ﻭﻣﺎﻻﺵ ﻧﺺ ﺳﺎﻋﻪ ﻃﺎﻟﻊ ﻣﻦ ﺍﻟﻌﻤﻠﻴﻪ ..
ﻣﻬﺎﺏ : ﻭﺷﻦ ﺣﺎﻟﻪ ﺗﻮﺍ ..
ﺭﺿﺎ : ﺍﻟﺪﻛﺘﻮﺭ ﻗﺎﻝ ﻭﺿﻌﻪ ﻣﺴﺘﻘﺮ .. ﻭﻣﺎﻓﻴﺶ ﺧﻄﺮ ﻋﻠﻴﻪ .. ﻏﻴﺮ ﻗﺎﻋﺪ ﻓﻲ ﺍﻟﻌﻨﺎﻳﻪ ..
ﻣﻬﺎﺏ : ﻻﺣﻮﻝ ﻭﻻﻗﻮﺓ ﺇﻻ ﺑﺎﻟﻠﻪ .. ﻛﻴﻒ ﺣﺎﻟﻚ ﺭﻫﻒ ..
ﺭﻫﻒ ﺑﺼﻮﺕ ﻳﺪﻭﺏ ﻃﺎﻟﻊ : ﺍﻟﺤﻤﺪ ﻟﻠﻪ ...
ﺭﺿﺎ : ﺑﻨﺮﻭﺡ ﺑﻴﻬﺎ ﺗﻮﺍ ﺑﺶ ﺗﺮﺗﺎﺡ .. ﻋﻦ ﺍﺫﻧﻚ ..
ﻣﻬﺎﺏ : ﺗﻤﺎﻡ ﻭﺇﻥ ﺷﺎﺀ ﺍﻟﻠﻪ ﻻﺑﺎﺱ .. ﺗﺒﻮﺍ ﺷﻲ ﺍﻧﻲ ﺣﺎﺿﺮ ..
ﻧﻴﺮﻭﺯ : ﻋﻤﺘﻚ ﺣﻨﺎﻥ ﻓﻮﻕ ﺑﺮﻭﺣﻬﺎ ﺷﻮﻓﻬﺎ ﻣﺮﺓ ﻣﺮﺓ
ﻣﻬﺎﺏ ﺍﺑﺘﺴﻢ : ﺣﺎﺿﺮ ..
ﻣﺸﻮﺍ ﺭﻭﺣﻮﺍ ...
ﻭﻣﻬﺎﺏ ﻟﻒ ﺑﻴﻤﺸﻲ ﺷﺒﺢ ﺍﺳﻨﺎﻡ ﻭﺍﻗﻒ ﺩﺍﻳﺮ ﺭﻭﺣﻪ ﻻﻫﻲ ﺑﻤﻠﻒ ﻗﺪﻣﻠﻪ ...
ﻣﻬﺎﺏ : ﺩﻛﺘﻮﺭ ..
ﺍﺳﻨﺎﻡ ﻗﺎﻡ ﻋﻴﻮﻧﻪ ﻭﺷﺒﺤﻠﻪ ﺑﺤﺪﻩ : ﺧﻴﺮ ..
ﻣﻬﺎﺏ ﺑﺈﺑﺘﺴﺎﻣﻪ : ﺍﺣﻤﻢ .. ﺍﻧﻲ ﺧﻄﺒﺖ ﺭﻫﻒ ﺗﻌﺮﻑ ..
ﺍﺳﻨﺎﻡ ﻗﻠﺒﻪ ﺍﻧﺘﺨﺺ ﺑﺲ ﺍﻇﺎﻫﺮ ﺑﺎﻟﺒﺮﻭﺩ : ﻧﻌﺮﻑ ..
ﻣﻬﺎﺏ : ﻭﻫﻲ ﻭﺍﻓﻘﺖ ﺗﻌﺮﻑ ...
ﺍﺳﻨﺎﻡ ﺑﺤﺪﻩ : ﻧﻌﺮﻑ ..
ﻣﻬﺎﺏ : ﻭﺩﺭﺕ ﻓﻀﺎﻧﻴﻪ ﻭﺗﻤﻴﺖ ﻓﻴﻬﺎ ﺗﻌﺮﻑ ...
ﺍﺳﻨﺎﻡ : ﺷﻦ ﺗﺒﻲ ﺍﺧﻠﺺ ..
ﻣﻬﺎﺏ ﺑﻀﺤﻜﻪ ﻣﺘﻬﻜﻤﻪ : ﺍﻳﻮﺍﺍﻩ ﻫﺬﺍ ﺍﻟﺴﺆﺍﻝ ... ﺷﺒﺤﻠﻪ ﺑﺤﺪﻩ .
ﺭﻫﻒ ﺧﻄﻴﺒﺘﻲ ﻭﻧﺤﺒﻬﺎ ﻭﻧﻐﻴﺮ ﻋﻠﻴﻬﺎ ﻓﻴﺎﺭﻳﺖ ﻟﻤﺎ ﺗﺸﻮﻓﻬﺎ ﻣﺮﺓ ﺗﺎﻧﻴﻪ ﺍﺩﻳﺮ ﺍﻟﺤﻮﻟﻪ ﻭﺗﻔﻮﺗﻬﺎ ﺗﻤﺎﻡ ...
ﺍﺳﻨﺎﻡ ﻗﻌﺪ ﻳﺸﺒﺤﻠﻪ ﺑﻨﻈﺮﺓ ﻏﻞ ﻭﺧﺎﻃﺮ ﻓﺒﺎﻟﻪ ﻳﻌﻄﻴﻪ ﻃﺮﻳﺤﻪ ﻳﻜﺴﺮﻩ ..
ﻭﻣﻬﺎﺏ ﻗﺎﻳﻢ ﺣﺎﺟﺒﻪ ﻭﻳﺸﻮﻓﻠﻪ ﺑﺈﺳﺘﻔﺰﺍﺯ : ﻣﻔﻬﻮﻡ .. ﻳﺎ ﺩﻭﻙ ..
ﺍﺳﻨﺎﻡ ﺷﺒﺤﻠﻪ ﺑﻨﻈﺮﺓ ﻫﺰﻭﺓ ﻭﻣﺸﻲ ﻣﻦ ﺣﺪﺍﻩ ﺑﻌﺪ ﺧﺒﻂ ﺑﻜﺘﻔﻪ ﻛﺘﻒ ﻣﻬﺎﺏ ﻗﺼﺪﺍ ..
ﻣﻬﺎﺏ ﻗﻌﺪ ﻳﺸﻮﻓﻠﻪ ﺑﻐﻞ " ﺗﻮﻧﻮﺭﻳﻚ ﻟﻤﺎ ﻧﺤﺮﻣﻚ ﺷﻮﻓﺘﻬﺎ "...
ﻃﻮﻝ ﺍﻟﻠﻴﻞ ﺣﻨﺎﻥ ﻧﺎﻳﻀﻪ ﻭﺗﺸﻮﻑ ﻟﻠﺒﻨﻰ ﻭﺧﺎﻳﻔﻪ ﻋﻠﻴﻬﺎ ..
ﺭﻛﺰﺕ ﺍﻧﺘﺒﺎﻫﻬﺎ ﻋﻠﻴﻬﺎ ﻟﻤﺎ ﺷﺎﻓﺘﻬﺎ ﺗﻔﺘﺢ ﻓﻌﻴﻮﻧﻬﺎ ...
ﻟﺒﻨﻰ ﻓﺎﻗﺖ ﻭﻗﻌﺪﺕ ﺗﺸﻮﻑ ﺣﻮﺍﻟﻴﻬﺎ ﺷﻮﻳﻪ ﻭﺍﺳﺘﻮﻋﺒﺖ ﻫﻲ ﻭﻳﻦ ﻭﺍﺫﻛﺮﺕ ﺍﻟﻠﻲ ﺻﺎﺭ ﻧﺰﻟﻮﺍ ﺩﻣﻮﻋﻬﺎ ﻭﻗﺎﻟﺖ : ﺑﺎ .. ﺑﺎ ..
ﻗﺪﻣﺘﻠﻬﺎ ﺣﻨﺎﻥ : ﻣﺎﻣﺎ ﺣﺒﻴﺒﺘﻲ ..
ﻟﺒﻨﻰ ﺷﺒﺤﺘﻠﻬﺎ : ﻣﺎﻣﺎ ﺑﺎﺑﺎ ﻳﺎﻣﺎﻣﺎ ﺑﺎﺑﺎ ...
ﺣﻨﺎﻥ : ﺍﻃﻤﻨﻲ ﺣﺒﻴﺒﺘﻲ ﺑﺎﺑﺎ ﺣﺎﻟﻪ ﺑﺎﻫﻲ ..
ﻟﺒﻨﻰ ﺑﺒﻜﻲ : ﺣﻘﻪ ﻣﺎﻣﺎ ﻣﺎﺩﺭﻗﻴﺶ ﻋﻠﻴﺎ ﻗﻮﻟﻴﻠﻲ ﺍﻟﺤﻖ
ﺣﻨﺎﻥ ﺩﻣﻮﻋﻬﺎ ﻧﺰﻟﻮﺍ : ﻭﺍﻟﻠﻪ ﻳﺎﻣﺎﻣﺎ ﺑﺎﺑﺎ ﻛﻮﻳﺲ ..
ﻟﺒﻨﻰ ﻗﻌﺪﺕ ﺗﺒﻜﻲ ﻭﺣﻨﺎﻥ ﺣﻀﻨﺘﻬﺎ : ﺍﺷﺶ ﻣﺎﻣﺎ ﺧﻼﺹ ﺣﺒﻴﺒﺘﻲ
ﻟﺒﻨﻰ ﺑﺒﻜﻲ : ﺧﻔﺖ ﻳﺎﻣﺎﻣﺎ .. ﺧﻔﺖ ﺗﺼﻴﺮ ﺣﺎﺟﻪ ﻟﺒﺎﺑﺎ ﻭﻫﻮ ﺯﻋﻼﻥ ﻣﻨﻲ ﻭﻗﻌﺪﺕ ﺗﺒﻜﻲ ..
ﺯﺍﺩﺕ ﺣﻨﺎﻥ ﺣﻀﻨﺘﻬﺎ ﻭﺩﻣﻮﻋﻬﺎ ﻳﻨﺰﻟﻮﺍ : ﺣﺒﻴﺒﺘﻲ .. ﺑﺎﺑﺎ ﻳﻤﻮﺕ ﻓﻴﻚ ﻭﻣﺎﻳﺰﻋﻠﺶ ﻣﻨﻚ ﺑﻜﻞ .. ﻭﺗﻮﺍ ﻟﻤﺎ ﻳﻔﻴﻖ ﻫﻮ ﻳﻘﻮﻟﻚ ﻫﻜﻲ ﺑﺮﻭﺣﻪ ..
ﻟﺒﻨﻰ ﺯﺍﺩﺕ ﺣﻀﻨﺖ ﺃﻣﻬﺎ ﻭﺣﻨﺎﻥ ﺗﻬﺪﻱ ﻓﻴﻬﺎ
ﻳﺎﺭﺍ ﻣﺎﺑﺘﺶ ﺗﺮﻭﺡ ﺑﻜﻞ ﻭﻗﻌﺪﺕ ﺑﺎﻳﺘﻪ ﻓﻲ ﻣﻤﺮ ﺍﻟﻌﻨﺎﻳﻪ ﺗﺄﻛﺪﺕ ﺍﻛﺜﺮ ﻭﺍﻛﺜﺮ ﺍﻧﻬﺎ ﻣﺎﺗﻘﺪﺭﺵ ﺗﻌﻴﺶ ﻣﻦ ﻏﻴﺮﻩ ﻭﻟﻮ ﺗﺼﻴﺮﻟﻪ ﺣﺎﺟﻪ ﻣﺶ ﺣﺘﺘﺤﻤﻞ ﻭﺗﻠﺤﻘﻪ .. ﻃﻮﻝ ﻟﻴﻠﻬﺎ ﺗﺒﻜﻲ ﻭﻗﻠﺒﻬﺎ ﻣﻔﻄﻮﺭ ﻋﻠﻴﻪ
ﻣﻦ ﺍﻟﺤﺰﻥ ...
ﺍﻟﻴﻮﻡ ﺍﻟﻠﻲ ﺑﻌﺪﻩ ...
ﻣﻬﺎ ﺍﺳﺘﻐﺮﺑﺖ ﻣﻦ ﺭﺿﺎ ﺍﻟﻠﻲ ﻣﺎﺍﺗﺼﻠﺶ ﺑﻴﻬﺎ ﺑﻜﻞ ﻓﻲ ﺍﻟﻠﻴﻞ .. ﻭﺍﻧﺸﻐﻠﺖ ﻟﻤﺎ ﻏﺎﺑﺖ ﻟﺒﻨﻰ ﻉ ﺍﻟﻤﺪﺭﺳﻪ ﻭﺣﺴﺖ ﺍﻥ ﻓﻲ ﺷﻲ .. ﺭﺍﺟﺖ ﻟﻴﻦ ﺟﺖ ﺍﻹﺳﺘﺮﺍﺣﻪ ..
ﻃﻠﻌﺖ ﺗﻠﻴﻔﻮﻧﻬﺎ ﻭﺍﺗﺼﻠﺖ ﺑﻠﺒﻨﻰ ﻣﻘﻔﻞ ﻛﻠﻤﺖ ﺭﻫﻒ ﻣﻘﻔﻞ .. ﺣﻨﺎﻥ ﻣﺎﺗﺮﺩﺵ .. ﺍﺗﺼﻠﺖ ﺑﺮﺿﺎ ﺭﺩ ..
ﻣﻬﺎ ﺑﺨﻮﻑ : ﺍﻟﻮ ...
ﺭﺿﺎ : ﺻﺒﺎﺡ ﺍﻟﺨﻴﺮ ﻣﻬﺎ ..
ﻣﻬﺎ : ﺻﺒﺎﺡ ﺍﻟﺨﻴﺮ .. ﺭﺿﺎ ﺻﺎﻳﺮ ﺷﻲ .. ﻟﺒﻨﻰ ﻏﺎﻳﺒﻪ ﺍﺗﺼﻠﺖ ﺑﻴﻬﻢ ﻫﻲ ﺭﻫﻒ ﻣﺼﻜﺮﻳﻦ ﺗﻠﻴﻔﻮﻧﺎﺗﻬﻢ ﻭﺧﺎﻟﺘﻲ ﺣﻨﺎﻥ ﻣﺎﺗﺮﺩﺵ ..
ﺭﺿﺎ ﺍﺑﺘﺴﻢ ﻟﻤﺎ ﺳﻤﻊ ﻧﺒﺮﺓ ﺻﻮﺗﻬﺎ ﺍﻟﺨﺎﻳﻔﻪ ﻭﺗﻨﻬﺪ : ﻋﻤﻚ ﻧﻀﺎﻝ ﺩﺍﺭ ﺣﺎﺩﺙ ﺃﻣﺲ ...
ﻣﻬﺎ ﺷﻬﻘﺖ : ﺑﺎﻫﻲ ﺷﻦ ﺻﺎﺭﻟﻪ ..
ﺭﺿﺎ : ﻗﺎﻋﺪ ﻓﻲ ﺍﻟﻌﻨﺎﻳﻪ ..
ﻣﻬﺎ ﺩﻣﻌﻮﺍ ﻋﻴﻮﻧﻬﺎ : ﺷﻦ ﺣﺎﻝ ﻟﺒﻨﻰ ..
ﺭﺿﺎ : ﺗﻌﺒﺖ ﻫﻠﺒﻪ ﻭﺭﻗﺪﺕ ﻓﻲ ﺍﻟﻤﺴﺘﺸﻔﻰ ..
ﻣﻬﺎ ﻗﻌﺪﺕ ﺗﺒﻜﻲ ...
ﺭﺿﺎ ﺗﻠﺨﺒﻂ : ﻣﻬﺎ ﺗﺒﻜﻲ ؟
ﻣﻬﺎ : ﻧﺒﻲ ﻧﻤﺸﻴﻠﻬﺎ ﺑﻌﺪ ﺍﻟﻤﺪﺭﺳﻪ .. ﻓﺄﻣﺎ ﻣﺴﺘﺸﻔﻰ ..
ﺭﺿﺎ : ******
ﻣﻬﺎ : ﺑﺎﻫﻲ ﻭﺻﻜﺮﺕ ﻋﻠﻴﻪ .. ﻭﻗﻌﺪﺕ ﺗﺒﻜﻲ
ﺭﺿﺎ : ﻣﻬﺎ .. ﺍﻟﻮ .. ﺍﻟﻮ .. ﺷﺎﻑ ﺍﻟﺘﻠﻴﻔﻮﻥ ﻟﻘﺎﻫﺎ ﺻﻜﺮﺕ .. ﺿﺤﻚ ..
***
ﻓﻲ ﺍﻟﻤﺴﺘﺸﻔﻰ ..
ﻟﺒﻨﻰ : ﺧﻼﺹ ﻣﺎﻣﺎ ﻣﻌﺎﺵ ﻧﺒﻲ .. ﻧﺒﻴﻚ ﺗﺮﻓﻌﻴﻨﻲ ﻟﺒﺎﺑﺎ ..
ﺣﻨﺎﻥ : ﻛﻮﻟﻲ ﻫﺎﺩﻱ ﻗﺒﻞ ..
ﻟﺒﻨﻰ ﺍﺑﺘﺴﻤﺖ ﺑﻤﻠﻞ : ﻫﺎﺍﺍﻩ .. ﻭﻓﺘﺤﺖ ﻓﻤﻬﺎ .. ﺣﻨﺎﻥ ﺿﺤﻜﺖ ﻭﻭﻛﻠﺘﻬﺎ ..
ﺧﺸﻮﺍ ﺭﻫﻒ ﻭﻧﻴﺮﻭﺯ ..
ﻧﻴﺮﻭﺯﺑﻀﺤﻜﻪ : ﺍﺵ ﺍﺵ ﺍﺵ .. ﺍﻟﻴﻮﻡ ﺣﻠﻮﻳﻦ ﻭﻧﻬﺒﻠﻮﺍ ﻭﻣﺎﻣﺎ ﺩﻟﻊ ﻓﻴﻨﺎ ..
ﺿﺤﻜﻮﺍ ﻛﻠﻬﻢ ..
ﺭﻫﻒ ﻗﺪﻣﺖ ﻷﺧﺘﻬﺎ : ﺷﻦ ﺣﺎﻟﻚ ﻟﺒﻮﻧﺘﻲ ... ﻭﺑﺎﺳﺘﻬﺎ ..
ﻟﺒﻨﻰ ﺍﺑﺘﺴﻤﺖ : ﻛﻮﻳﺴﻪ ﺍﻟﺤﻤﺪ ﻟﻠﻪ .. ﻣﺎﻓﻴﺶ ﺟﺪﻳﺪ ﻉ ﺑﺎﺑﺎ ..
ﺭﻫﻒ ﺷﺒﺤﺖ ﻷﻣﻬﺎ ﺑﻌﺪﻳﻦ ﺷﺒﺤﺘﻠﻬﺎ : ﻗﺎﻋﺪ ﻓﻲ ﺍﻟﻌﻨﺎﻳﻪ ..
ﻟﺒﻨﻰ : ﻳﻌﻨﻲ ﻣﺎﻧﺎﺿﺶ ..
ﻧﻴﺮﻭﺯ : ﺗﻮ ﻳﻨﻮﺽ ﺣﺒﻴﺒﺘﻲ ﺇﻥ ﺷﺎﺀ ﺍﻟﻠﻪ ...
ﺣﻨﺎﻥ : ﺟﺒﺘﻲ ﺗﻠﻴﻔﻮﻧﻲ ﺭﻫﻒ ..
ﺭﻫﻒ : ﺍﻳﻪ .. ﻃﻠﻌﺎﺗﻪ ﻣﻦ ﺷﻨﻄﺘﻬﺎ .. ﻫﺎﻛﻲ ..
ﺧﺪﺍﺗﻪ ﺣﻨﺎﻥ ﻭﺷﺎﻓﺖ ﺍﻟﻤﻜﺎﻟﻤﺎﺕ ﻟﻘﺘﻬﻢ ﻣﻦ ﻣﻬﺎ ﻭﺁﻣﻨﻪ ... ﺍﺗﺼﻠﺖ ﺑﺂﻣﻨﻪ ﺍﻷﻭﻝ .. ﺭﺩﺕ
ﺣﻨﺎﻥ : ﺍﻟﺴﻼﻡ ﻋﻠﻴﻜﻢ
ﺁﻣﻨﻪ : ﻭﻋﻠﻴﻜﻢ ﺍﻟﺴﻼﻡ .. ﻭﻳﻨﻚ ﺍﻟﻴﻮﻡ ﺍﺳﺘﺎﺫ ﻣﻌﺎﻭﻳﻪ ﻳﺴﺄﻝ ﻋﻠﻴﻚ ﻭﻣﻌﺼﺐ ..
ﺣﻨﺎﻥ ﺣﻄﺖ ﺍﻳﺪﻫﺎ ﻉ ﺟﺒﻬﺘﻬﺎ : ﺍﺳﺘﻐﻔﺮ ﺍﻟﻠﻪ .. ﺁﻣﻨﻪ ﺍﻧﻲ ﺻﺎﻳﺮﻟﻲ ﻇﺮﻑ .. ﺭﺍﺟﻠﻲ ﺩﺍﻳﺮ ﺣﺎﺩﺙ ﻭﺑﻨﺘﻲ ﺗﻌﺒﺎﻧﻪ ﻭﺍﻧﻲ ﻣﻦ ﺃﻣﺲ ﻓﻲ ﺍﻟﻤﺴﺘﺸﻔﻰ ﻭﺗﻠﻴﻔﻮﻧﻲ ﻣﺶ ﻣﻌﺎﻱ ..
ﺁﻣﻨﻪ : ﻻﺣﻮﻝ ﻭﻻﻗﻮﺓ ﺇﻻ ﺑﺎﻟﻠﻪ ... ﺭﺑﻲ ﻳﻨﻮﺿﻬﻢ ﺳﺎﻟﻤﻴﻦ .. ﺗﻤﺎﻡ ﺣﻨﺎﻥ ﺗﻮ ﻧﻘﻮﻟﻪ ...
ﺣﻨﺎﻥ : ﺻﺤﻴﺘﻲ ﺁﻣﻨﻪ .. ﻧﺴﺘﺄﺫﻥ ..
ﺁﻣﻨﻪ : ﺑﺎﻫﻲ .. ﻣﻊ ﺍﻟﺴﻼﻣﻪ ..
ﺣﻨﺎﻥ : ﻓﻲ ﺍﻣﺎﻥ ﺍﻟﻠﻪ ﻭﺻﻜﺮﺕ .. ﻭﺍﺗﺼﻠﺖ ﺑﻤﻬﺎ ﺑﺲ ﻣﺎﺭﺩﺗﺶ ...
ﺗﻨﻬﺪﺕ ﻭﻭﻟﺖ ﺧﺸﺖ ﻟﺒﻨﺘﻬﺎ ...
ﻓﻲ ﺍﻟﺸﺮﻛﻪ ..
ﺁﻣﻨﻪ ﻣﺸﺖ ﻟﻤﻜﺘﺐ ﻣﻌﺎﻭﻳﻪ .. ﺧﺸﺘﻠﻪ ﻭﻛﺎﻥ ﻋﻨﺪﻩ ﺃﻳﻤﻦ ﻭﻗﺘﻬﺎ ..
ﺁﻣﻨﻪ : ﺍﺳﺘﺎﺫ ﻣﻌﺎﻭﻳﻪ .. ﺗﻮﺍ ﻛﻠﻤﺘﻨﻲ ﺍﻟﻤﻬﻨﺪﺳﻪ ..
ﻣﻌﺎﻭﻳﻪ ﻗﻠﺒﻪ ﻳﺪﻕ
ﻛﻤﻠﺖ ﺁﻣﻨﻪ : ﻭﻗﺎﻟﺖ ﺍﻥ ﻋﻨﺪﻫﺎ ﻇﺮﻭﻑ ...
ﻣﻌﺎﻭﻳﻪ : ﻇﺮﻭﻑ ﺷﻨﻮ ...
ﺁﻣﻨﻪ : ﺯﻭﺟﻬﺎ ﻣﺪﺍﻳﺮ ﺣﺎﺩﺙ ﻭﺑﻨﺘﻬﺎ ﻓﻲ ﺍﻟﻤﺴﺘﺸﻔﻰ ..
ﻣﻌﺎﻭﻳﻪ ﺻﺪﻣﻪ ﺍﻟﺨﺒﺮ ﻭﺍﻛﺜﺮ ﻛﻠﻤﻪ ﺭﻧﺖ ﻓﻲ ﻭﺫﻧﻪ " ﺯﻭﺟﻬﺎ " ﻳﻌﻨﻲ ﻫﻲ ﻗﺎﻋﺪﻩ ﻣﻌﺎﻩ ﺗﻮﺍ ...
ﻭﺍﻳﻤﻦ ﺣﺘﻰ ﻫﻮ ﺣﺲ ﺑﺎﻟﻀﻴﻖ ..
ﻣﻌﺎﻭﻳﻪ : ﺑﺎﻫﻲ ﺑﺮﻱ ﺗﻮﺍ ..
ﺁﻣﻨﻪ ﺣﻴﺎﺗﻪ ﻭﻃﻠﻌﺖ ..
ﺃﻳﻤﻦ : ﻧﺤﺴﺎﺑﻬﺎ ﻣﻄﻠﻘﻪ ..
ﻣﻌﺎﻭﻳﻪ ﻭﻫﻮ ﻣﺤﺮﻭﻕ ﻗﺎﻝ : ﻻ ﻗﺎﻋﺪﻩ ﻣﺘﺰﻭﺟﻪ .. ﻉ ﺫﻣﺔ ﺭﺍﺟﻞ ...
ﺃﻳﻤﻦ ﺳﻜﺖ ..
***
ﺧﻔﺖ ﻋﻠﻴﻚ ﻫﻠﺒﻪ ..
ﻟﺒﻨﻰ ﺑﻀﺤﻜﻪ : ﺍﻧﻲ ﻗﻮﻳﻪ ﻣﺎﺗﺨﺎﻓﻴﺶ ﻋﻠﻴﺎ ..
ﻣﻬﺎ ﺑﻀﺤﻜﻪ : ﺣﻤﺎﺭﺓ ...
ﺣﻨﺎﻥ ﺗﺸﻮﻑ ﻟﻤﻬﺎ ﻛﻴﻒ ﺣﺎﺿﻨﻪ ﻟﺒﻨﻰ ﻭﻟﺒﻨﻰ ﺗﻀﺤﻚ .. ﺍﺑﺘﺴﻤﺖ ..
ﻟﺒﻨﻰ : ﻗﺘﻠﺘﻴﻨﻲ ﺧﻼﺹ ﺑﻌﺪﻱ ..
ﻣﻬﺎ ﺑﻌﺪﺕ ﻭﻫﻲ ﺗﻀﺤﻚ ..
ﻟﺒﻨﻰ ﺷﺒﺤﺖ ﻷﻣﻬﺎ : ﻣﺎﻣﺎ ﻧﺒﻲ ﻧﻤﺸﻲ ﻟﺒﺎﺑﺎ ..
ﺣﻨﺎﻥ ﺗﻨﻬﺪﺕ : ﺭﻫﻒ ﻋﻨﺪﻩ ..
ﻟﺒﻨﻰ : ﻣﺎﻣﺎ ﺍﻧﻲ ﻧﺒﻲ ﻧﻤﺸﻴﻠﻪ ..
ﺣﻨﺎﻥ : ﺑﺲ ﺍﻧﺘﻲ ﻗﺎﻋﺪﻩ ﺗﻌﺒﺎﻧﻪ ..
ﻟﺒﻨﻰ ﺑﻀﺠﺮ : ﻣﺎﻣﺎ ﻣﺎﻓﻴﺎ ﺷﻲ ﺑﺎﻟﻠﻪ ﻋﻠﻴﻚ ﺍﺭﻓﻌﻴﻨﻲ ﻟﺒﺎﺑﺎ
ﺣﻨﺎﻥ ﺍﺳﺘﺴﻠﻤﺖ : ﺑﺎﻫﻲ ..
ﻭﺻﻠﺖ ﺣﻨﺎﻥ ﻟﺒﻨﻰ ﻭﻳﻦ ﻣﺎﻓﻲ ﺑﻮﻫﺎ ... ﻭﻛﺎﻧﻮﺍ ﻛﻠﻬﻢ ﻏﺎﺩﻱ ..
ﻟﺒﻨﻰ ﺍﻭﻝ ﻣﺎﻭﺻﻠﺖ ﺩﻣﻮﻋﻬﺎ ﻧﺰﻟﻮﺍ ...
ﺣﻨﺎﻥ : ﺍﺳﻤﻌﻲ ﺑﺪﻳﺮﻱ ﻫﻜﻲ ﺑﻨﺮﺩﻙ ﻣﻦ ﻭﻳﻦ ﻣﺎﺟﺒﺘﻚ ...
ﻟﺒﻨﻰ ﺣﺎﻭﻟﺖ ﺗﺘﻤﺎﺳﻚ : ﺧﻼﺹ ﻣﺎﻣﺎ ..
ﻳﺎﺭﺍ ﻛﺎﻧﺖ ﺗﺸﺒﺢ ﻟﺤﻨﺎﻥ ﻭﺣﻨﺎﻥ ﻗﺎﻣﺖ ﻋﻴﻮﻧﻬﺎ ﺷﺎﻓﺘﻬﺎ ﻏﻴﺮﺕ ﻋﻴﻮﻧﻬﺎ ﻃﻮﻝ ..
ﻗﻌﺪﻭﺍ ﻳﺴﺘﻨﻮﺍ ﺣﺪﺍ ﻏﺮﻓﺔ ﺍﻟﻌﻨﺎﻳﻪ ﻭﺍﻟﺒﻨﺎﺕ ﻳﺪﻋﻮﺍ ﻟﺒﻮﻫﻢ ...
ﺍﺳﺘﻤﺮ ﺍﻟﺤﺎﻝ ﻫﺬﺍ ﻟﻌﻨﺪ ﺍﻟﻌﺼﺮ ...
ﻃﻠﻊ ﻣﻦ ﻋﻨﺪﻩ ﺍﻟﺪﻛﺘﻮﺭ ..
ﺍﻟﺪﻛﺘﻮﺭ : ﻓﺎﻕ ﺷﻮﻳﻪ ﺑﺲ ﺭﺟﻊ ﻓﻘﺪ ﺍﻟﻮﻋﻲ ﻭﻫﺬﺍ ﻃﺒﻴﻌﻲ ﺟﺪﺍ ﻣﻦ ﻫﻨﻲ ﻟﻐﺪﻭﺓ ﺍﻥ ﺷﺎﺀ ﺍﻟﻠﻪ ﺣﻴﻔﻴﻖ ﺗﻤﺎﻣﺎ ﻭﻳﻜﻮﻥ ﺍﺣﺴﻦ .. ﺑﺲ ﻻﺯﻡ ﻳﻘﻌﺪ ﻓﻲ ﺍﻟﻌﻨﺎﻳﻪ ﻟﻴﻦ ﻳﻔﻴﻖ ... ﻭﺇﻥ ﺷﺎﺀ ﺍﻟﻠﻪ ﻻﺑﺎﺱ ﻋﻠﻴﻪ ..
ﻳﺎﺭﺍ : ﺩﻛﺘﻮﺭ ﻧﻘﺪﺭ ﻧﺨﺸﻠﻪ ..
ﺍﻟﺪﻛﺘﻮﺭ : ﻣﻤﻜﻦ ﺑﺲ ﻣﺶ ﺃﻛﺜﺮ ﻣﻦ 5 ﺩﻗﺎﻳﻖ ﻣﺤﺴﻮﺑﻪ ..
ﻳﺎﺭﺍ : ﺑﺎﻫﻲ ﻏﻴﺮ ﻧﺸﻮﻓﻪ ﺑﺲ ..
ﺍﻟﺪﻛﺘﻮﺭ ﺷﺒﺢ ﻟﻠﻤﻤﺮﺿﻪ : ﺍﺭﻓﻌﻮﻫﺎ ﺗﻠﺒﺲ ﻭﺩﺧﻠﻮﻫﺎ ..
ﺍﻟﻤﻤﺮﺿﻪ ﺣﺎﺿﺮ ..
ﻟﺒﻨﻰ ﺍﺿﺎﻳﻘﺖ : ﺣﺘﻰ ﺍﻧﻲ ﻧﺒﻲ ﻧﺨﺶ ..
ﺍﻟﺪﻛﺘﻮﺭ : ﺷﺨﺺ ﻭﺍﺣﺪ ﺑﺲ ..
ﺣﻨﺎﻥ ﺷﺪﺕ ﻉ ﺍﻳﺪ ﻟﺒﻨﻰ : ﻣﺶ ﻻﺯﻡ ﺗﺨﺸﻲ ﺗﻮﺍ ﺣﺒﻴﺒﺘﻲ .. ﻏﺪﻭﺓ ﺍﻥ ﺷﺎﺀ ﺍﻟﻠﻪ ﺑﺎﺑﺎ ﻳﻔﻴﻖ ﻭﺗﻘﻌﺪﻱ ﻣﻌﺎﻩ ﻟﻴﻦ ﺗﺸﺒﻌﻲ ﻣﻨﻪ ..
ﻟﺒﻨﻰ : ﻣﺎ ..
ﺣﻨﺎﻥ ﻓﻨﺼﺖ ﻓﻴﻬﺎ .. ﻟﺒﻨﻰ ﺳﻜﺘﺖ
ﺍﻟﺪﻛﺘﻮﺭ : ﻫﺎﻩ ﺷﻦ ﻗﺮﺭﺗﻮﺍ ..
ﺣﻨﺎﻥ : ﺑﻨﺘﻲ ﻣﺶ ﺧﺎﺷﻪ ..
ﺍﻟﺪﻛﺘﻮﺭ : ﺧﻼﺹ ﺗﻔﻀﻠﻲ ﻳﺎﻣﺪﺍﻡ ... ﻳﺎﺭﺍ ﻣﺸﺖ ﻣﻊ ﺍﻟﻤﻤﺮﺿﻪ ..
ﻧﻴﺮﻭﺯ ﻣﺸﺖ ﻟﺤﻨﺎﻥ : ﺍﺩﻳﺮﻱ ﻓﻲ ﺣﺎﺟﺎﺕ ﺗﻜﺴﺮ ﺍﻟﻜﺮﺍﻳﻢ ..
ﺣﻨﺎﻥ ﺷﺒﺤﺘﻠﻬﺎ ﻉ ﺟﻨﺐ ﻭﺳﻜﺘﺖ ﻭﺭﻫﻒ ﺗﻀﺤﻚ ..
***
ﺩﺭﺱ ﺑﻴﻪ ﺍﻟﺴﻮﺍﻕ ﻓﻲ ﺗﺮﻛﻴﻨﻪ ﺳﻔﺮﺗﺢ .. ﻧﺰﻝ ﻭﻗﻌﺪ ﻳﻤﺸﻲ ﺑﺮﻭﺣﻪ ﻭﻳﺘﻤﻨﻰ ﺍﻟﻄﺮﻳﻖ ﺗﻄﻮﻝ ﺑﺶ ﻳﻤﺸﻲ ﺃﻛﺜﺮ ﻭﺃﻛﺜﺮ ... ﺣﺎﺳﺲ ﺭﻭﺣﻪ ﻛﺄﻧﻪ ﺯﻱ ﺍﻟﻌﻄﺸﺎﻥ ﻭﺿﺎﻣﻲ ﻣﻦ ﺳﻨﻴﻦ ﻳﻤﺸﻲ ﻓﻲ ﺻﺤﺮﺍ ﻭﻳﻦ ﻟﻘﻲ ﻗﺪﺍﻣﻪ ﺑﻴﺮ ﻣﻴﻪ ﻓﺮﺡ ﺑﻴﻪ ﻭﻳﻦ ﻗﺮﺏ ﻣﻨﻪ ﻟﻘﺎﻩ ﻣﺤﺎﻭﻁ ﺑﺎﻟﻨﺎﺭ ..
ﻧﺎﺭ ﺗﺤﺮﻕ ﻓﻲ ﻗﻠﺒﻪ ﺍﻟﻠﻲ ﺣﺐ ﻭﺃﻭﻝ ﻣﺮﻩ ﻳﺤﺐ ﻭﻳﻌﺮﻑ ﻣﻌﻨﻰ ﺍﻟﺤﺐ ﻭﻳﻠﻴﻦ ﻭﻳﺤﺐ ﺍﻟﺤﻴﺎﺓ ﺑﻄﺮﻳﻘﻪ ﻣﺨﺘﻠﻔﻪ ... ﻗﺎﻟﻬﺎ ﻗﺒﻞ ﻧﺠﻮﻡ ﺍﻟﺴﻤﻲ ﺍﻗﺮﺑﻠﻲ ﻣﻨﻬﺎ ... ﻓﻲ ﻟﺤﻈﻪ ﻟﻘﻲ ﺭﻭﺣﻪ ﻭﺍﺻﻞ ﻓﻲ ﺟﺎﻣﻊ ﺍﻵﺫﺍﻥ ﺁﺫﻥ ﻟﺼﻼﺓ ﺍﻟﻤﻐﺮﺏ .. ﻏﻤﺾ ﻋﻴﻮﻧﻪ ﻭﻗﻌﺪ ﻳﺴﻤﻊ .. ﻭﻛﺎﻥ ﻓﻲ ﺷﻌﻮﺭ ﻏﺮﻳﺐ ﻳﺤﺲ ﺑﻴﻪ ﻟﻴﻦ ﺗﻢ ﺑﻌﺪﻳﻦ ﺭﻓﻊ ﻋﻴﻮﻧﻪ ﻓﻮﻕ ﻭﻗﺎﻝ .: ﺃﻧﺖ ﻋﻄﻴﺘﻲ ﻫﻠﺒﻪ ﺣﺎﺟﺎﺕ ﺑﺪﻭﻥ ﻣﺎﻧﺴﺄﻟﻚ ﻭﺣﺮﻣﺘﻨﻲ ﻣﻦ ﺣﺎﺟﺎﺕ ﺑﺲ ﻣﺎﻃﻠﺒﺘﻬﺎﺵ ﻣﻨﻚ ... ﻫﺎﻟﻤﺮﺓ ﺍﻧﻲ ﻧﺒﻲ ﻧﻄﻠﺐ ﻣﻨﻚ ﻃﻠﺐ ﻭﺍﺣﺪ .. ﻻ ﺍﻧﻲ ﻧﺘﺮﺟﺎﻙ ﻭﻧﺘﻮﺳﻞ ﻟﻴﻚ ﻭﺍﻭﻝ ﻣﺮﻩ
ﻧﺴﺄﻟﻚ ﺗﻌﻄﻴﻨﻲ ﺣﺎﺟﻪ ﻓﻲ ﺣﻴﺎﺗﻲ .. ﺧﻠﻴﻬﺎ ﻟﻴﺎ .. ﻋﻄﻴﻬﺎﻟﻲ .. ﺍﺭﺟﻮﻙ .. ﺧﻠﻴﻬﺎ ﻟﻴﺎ ...
ﻧﺰﻝ ﻋﻴﻮﻧﻪ ﻭﻗﻌﺪ ﻳﺸﺒﺢ ﻟﻠﻨﺎﺱ ﺍﻟﻠﻲ ﻣﺎﺷﻴﻪ ﺗﺼﻠﻲ .. ﻭﻟﻘﻲ ﺍﻟﺴﻮﺍﻕ ﻣﺘﺎﻋﻪ ﻣﺎﺷﻲ ﺣﺘﻰ ﻫﻮ ... ﻗﻌﻤﺰ ﻉ ﺭﺷﺎﺩﻩ ﻗﺮﻳﺒﻪ .. ﻣﻦ ﺍﻟﺠﺎﻣﻊ ... ﻗﻌﺪ ﻳﺴﻤﻊ ﻓﻲ ﺍﻟﺼﻼﻩ ﻣﻦ ﺍﻟﻤﻜﺒﺮ ... ﻳﺴﻤﻊ ﻓﻲ ﺍﻟﻔﺎﺗﺤﻪ ﻭﻫﻮ ﻛﺎﻥ ﻳﻌﺮﻓﻬﺎ ﺑﺲ ﺳﻤﻌﻬﺎ ﻭﻛﺄﻧﻪ ﺍﻭﻝ ﻣﺮﺓ ﻳﺴﻤﻌﻬﺎ .. ﺣﺲ ﺑﻜﻞ ﺣﺮﻑ ﻓﻴﻬﺎ .. ﻗﺮﻱ ﺍﻹﻣﺎﻡ ﺳﻮﺭﺓ ﺑﻌﺪﻫﺎ ﻟﻌﻨﺪ ﻭﺻﻞ ﻓﻲ ﺁﻳﻪ
◇ ﺭﺟﺎﻝ ﻻﺗﻠﻬﻴﻬﻢ ﺗﺠﺎﺭﺓ ﻭﻻﺑﻴﻊ ﻋﻦ ﺫﻛﺮ ﺍﻟﻠﻪ ﻭﺇﻗﺎﻡ ﺍﻟﺼﻼﺓ ﻭﺇﻳﺘﺎﺀ ﺍﻟﺰﻛﺎﺓ ﻳﺨﺎﻓﻮﻥ ﻳﻮﻣﺎ ﺗﺘﻘﻠﺐ ﻓﻴﻪ ﺍﻟﻘﻠﻮﺏ ﻭﺍﻷﺑﺼﺎﺭ ○ ﻟﻴﺠﺰﻳﻬﻢ ﺍﻟﻠﻪ ﺍﺣﺴﻦ ﻣﺎﻋﻤﻠﻮﺍ ﻭﻳﺰﻳﺪﻫﻢ ﻣﻦ ﻓﻀﻠﻪ ﻭﺍﻟﻠﻪ ﻳﺮﺯﻕ ﻣﻦ ﻳﺸﺎﺀ ﺑﻐﻴﺮ ﺣﺴﺎﺏ ○◇
ﺍﻵﻳﻪ ﻫﺎﺩﻱ ﺭﻛﺰ ﻓﻴﻬﺎ ﺑﻘﻠﺒﻪ ﻭﻋﻘﻠﻪ ﻭﺣﺴﻬﺎ ﺯﻱ ﺍﻟﺮﺳﺎﻟﻪ ﻟﻴﻪ ..
ﻗﻌﺪ ﻣﺴﺘﻤﺮ ﻓﻲ ﺍﻟﺴﻤﺎﻉ ﻟﻴﻦ ﺟﺖ ﺭﻛﻌﻪ ﺍﻟﺘﺎﻧﻴﻪ ﻭﺳﻤﻌﺖ ﺍﻟﻔﺎﺗﺤﻪ ﻣﻦ ﺟﺪﻳﺪ ﺑﻘﻠﺒﻪ ﻛﺬﻟﻚ ... ﻗﺮﻱ ﺍﻹﻣﺎﻡ ﺳﻮﺭﺓ ﺑﻌﺪﻫﺎ ﻭﻭﺻﻞ ﻓﻲ ﺁﻳﺔ
◇ ﻭﺍﻟﻠﻴﻞ ﺇﺫﺍ ﻋﺴﻌﺲ ○ ﻭﺍﻟﺼﺒﺢ ﺇﺫﺍ ﺗﻨﻔﺲ ○ ﺇﻧﻪ ﻟﻘﻮﻝ ﺭﺳﻮﻝ ﻛﺮﻳﻢ ○ ﺫﻱ ﻗﻮﺓ ﻋﻨﺪ ﺫﻱ ﺍﻟﻌﺮﺵ ﻣﻜﻴﻦ ○ ﻣﻄﺎﻉ ﺛﻢ ﺃﻣﻴﻦ ○ ﻭﻣﺎﺑﺼﺎﺣﺒﻜﻢ ﺑﻤﺠﻨﻮﻥ ○ ﻭﻟﻘﺪ ﺭﺁﻩ ﺑﺎﻷﻓﻖ ﺍﻟﻤﺒﻴﻦ ○ ﻣﺎﻫﻮ ﻋﻦ ﺍﻟﻐﻴﺐ ﺑﻀﻨﻴﻦ ○ ﻭﻣﺎﻫﻮ ﺑﻘﻮﻝ ﺷﻴﻄﺎﻥ ﺭﺟﻴﻢ ○
ﺇﻥ ﻫﻮ ﺇﻻ ﺫﻛﺮ ﻟﻠﻌﺎﻟﻤﻴﻦ ○ ﻟﻤﻦ ﺷﺎﺀ ﻣﻨﻜﻢ ﺃﻥ ﻳﺴﺘﻘﻴﻢ ○ ﻭﻣﺎﺗﺸﺎﺀﻭﻥ ﺇﻻ ﺍﻥ ﻳﺸﺎﺀ ﺍﻟﻠﻪ ﺭﺏ ﺍﻟﻌﺎﻟﻤﻴﻦ ◇
ﺁﻳﺎﺕ ﺗﺨﺶ ﻟﻘﻠﺒﻪ ﻗﺒﻞ ﻭﺫﺍﻧﻪ ﻭﻳﺤﺲ ﺑﻴﻬﺎ ﻭﻛﺄﻧﻪ ﺭﺑﻲ ﻳﺒﻌﺘﻠﻪ ﻓﻲ ﺭﺳﺎﺋﻞ ﻟﻴﻪ ﻫﻮ ﺗﺤﺪﻳﺪﺍ ..
⚘ ﻳﻮﻣﻴﺎ ﺭﺑﻲ ﻳﺒﻌﺘﻠﻨﺎ ﺭﺳﺎﺋﻞ ﻓﻲ ﻣﻮﻗﻒ ﻓﻲ ﻗﺼﻪ ﻓﻲ ﺍﻳﻪ ﻓﻲ ﺩﻋﺎﺀ ﺭﺳﺎﺋﻞ ﺗﺒﻲ ﻗﻠﺐ ﺑﺼﻴﺮ ﻳﺸﻮﻓﻬﺎ ﺍﻟﻘﻠﺐ ﺍﻟﻐﺎﻓﻞ ﺑﺲ ﺍﻟﻠﻲ ﻣﺎﻳﺸﻮﻓﻬﺎﺵ .. ﻣﺤﺘﺎﺟﻴﻦ ﻧﺘﻤﻌﻨﻮﺍ ﻫﻠﺒﻪ ﻓﻲ ﺍﻷﺣﺪﺍﺙ ﺍﻟﻠﻲ ﺗﺼﻴﺮ ﻭﻛﻞ ﺷﻲ ﺗﺸﻮﻓﻪ ﻋﻴﻮﻧﺎ ﻭﻳﺴﻤﻌﻮﻩ ﻭﺫﺍﻧﺎ ﺣﺘﻤﺎ ﺣﻨﻠﻘﻮﺍ ﺭﺳﺎﻟﻪ ﻣﻨﻪ ﺳﺒﺤﺎﻧﻪ ..
ﺗﻤﺖ ﺍﻟﺼﻼﺓ ﻭﺍﻟﻨﺎﺱ ﺑﺪﺕ ﺗﺮﻭﺡ .. ﻣﻌﺎﻭﻳﻪ ﻧﺎﺽ ﻭﻗﻌﺪ ﻳﺮﺍﻗﺐ ﻓﻴﻬﻢ ... ﻛﺎﻥ ﻋﻨﺪﻩ ﻓﻀﻮﻝ ﻳﺸﻮﻑ ﺍﻹﻣﺎﻡ .. ﻭﻓﻌﻼ ﻃﻠﻊ ﺍﻷﻣﺎﻡ ﻭﻟﻘﻲ ﺍﻟﻨﺎﺱ ﻣﺤﺎﻭﻃﻪ ﺑﻴﻪ ﻭﻳﺴﻠﻤﻮﺍ ﻛﺎﻥ ﺭﺍﺟﻞ ﻛﺒﻴﺮ ﻓﻲ ﺍﻟﺴﻦ ﻭﻳﺒﺎﻥ ﻋﻠﻴﻪ ﺍﻟﻮﺭﻉ ﻭﺍﻟﺤﻜﻤﻪ ﺍﺭﺗﺎﺣﻠﻪ ﻣﻌﺎﻭﻳﻪ .. ﻭﻫﻮ ﻓﻠﺤﻈﻪ ﻗﺎﻡ ﻋﻴﻨﻪ ﻭﺷﺎﻓﻪ .. ﺍﺑﺘﺴﻢ ﻭﻣﻌﺎﻭﻳﻪ ﺭﺩﻟﻪ ﺍﻹﺑﺘﺴﺎﻣﻪ ﺑﻌﺪﻳﻦ ﻟﻒ ﻭﻣﺸﻲ ﻟﻤﺎ ﺷﺎﻑ ﺳﻮﺍﻗﻪ ﺟﺎﻱ ..
***
ﻓﻲ ﻧﻔﺲ ﺍﻟﻮﻗﺖ ..
ﺧﺸﺖ ﻳﺎﺭﺍ ﻟﻐﺮﻓﺔ ﺍﻟﻌﻨﺎﻳﻪ ... ﻟﻤﺎ ﺷﺎﻓﺘﻪ ﺑﺤﺎﻟﺘﻪ ﺍﻟﻠﻲ ﻫﻮ ﻓﻴﻬﺎ ﻗﻠﺒﻬﺎ ﺗﻘﻄﻊ ﻋﻠﻴﻪ ... ﻗﺮﺑﺖ ﻭﺷﺪﺕ ﻳﺪﻩ ﻭﻗﻌﺪﺕ ﺗﺒﻜﻲ ... ﺗﺘﺄﻣﻞ ﻓﻲ ﻣﻼﻣﺤﻪ ﺍﻟﺮﺍﻗﺪﻩ ﻭﺗﻘﻮﻝ : ﻋﻤﺮﻱ ﻣﺎﺣﺒﻴﺖ ﺭﺍﺟﻞ ﻓﻲ ﺍﻟﺪﻧﻴﺎ ﻏﻴﺮﻙ .. ﺣﺘﻰ ﺑﻮﻱ ﻣﺎﻛﻨﺘﺶ ﻧﺤﺒﻪ .. ﺍﻧﺖ ﺍﻟﺮﺍﺟﻞ ﺍﻟﻮﺣﻴﺪ ﺍﻟﻠﻲ ﺣﺒﻴﺘﻪ ﻷﻧﻚ ﺍﻧﻈﻒ ﺭﺍﺟﻞ ﻭﺍﺭﻗﻰ ﺭﺍﺟﻞ ﻗﺎﺑﻠﺘﻪ ... ﺑﺮﻏﻢ ﺍﻧﻲ ﻣﺠﺮﻭﺣﻪ ﻣﻨﻚ ﺑﺲ ﻣﺴﺘﺤﻴﻞ ﻧﺴﻠﻢ ﻭﻧﺨﻠﻴﻚ ﺣﻨﺤﺎﺭﺏ ﺑﺶ ﺗﻜﻮﻥ ﻟﻴﺎ ﺑﺮﻭﺣﻲ .. ﻧﺤﺒﻚ ﻧﻀﺎﻝ ﻧﻤﻮﺕ ﻓﻴﻚ ...
ﺍﻟﻤﻤﺮﺿﻪ : ﻣﻌﻠﻴﺸﻲ ﺧﻼﺹ ﺍﻃﻠﻌﻲ ..
ﻳﺎﺭﺍ ﻃﻠﻘﺖ ﺍﻳﺪﻩ ﺑﺎﻟﺴﻴﻒ .. ﻭﻃﻠﻌﺖ ﻭﻫﻲ ﺗﺒﻜﻲ ﻭﻣﺎﺗﺒﻴﺶ ﺗﺴﻴﺒﻪ ...
ﺧﺪﺕ ﺣﻨﺎﻥ ﻟﺒﻨﻰ ﻭﺭﺩﺗﻬﺎ ﻟﺪﺍﺭﻫﺎ ﻭﺭﻫﻒ ﻣﺮﻭﺣﻪ ﻫﻲ ﻧﻴﺮﻭﺯ ﻭﻫﻲ ﻣﺎﺷﻴﻪ ﻟﻤﺤﺖ ﺍﺳﻨﺎﻡ ﻭﺍﻗﻒ ﻉ ﺩﻛﺘﻮﺭﺓ ﻭﻳﻬﺪﺭﺯﻭﺍ ﻭﻳﻀﺤﻜﻮﺍ .. ﺍﺿﺎﻳﻘﺖ ﻫﻠﺒﻪ ﺑﻌﺪﻳﻦ ﻗﺎﻟﺖ ﻟﻨﻔﺴﻬﺎ " ﺷﻔﺘﻴﻪ ﻭﺍﻗﻒ ﻉ ﺩﻛﺘﻮﺭﺓ ﻭﺍﺿﺎﻳﻘﺘﻲ ﻫﻜﻲ .. ﻣﺎﻻ ﻛﺎﻥ ﺭﻳﺘﻴﻪ ﻣﻊ ﺧﻄﻴﺒﺘﻪ ﺷﻦ ﻳﺼﻴﺮ ﻓﻴﻚ .. ﺭﻫﻒ ﺍﺳﺘﺎﻗﻀﻲ ﻟﻨﻔﺴﻚ "..
ﺍﺳﻨﺎﻡ ﺷﺎﻓﻬﺎ ﺑﺲ ﺩﺍﺭ ﺭﻭﺣﻪ ﻣﺎﺷﺎﻓﻬﺎﺵ ﻣﺠﺮﺩ ﻋﻄﺖ ﺑﻈﻬﺮﻫﺎ ﺗﻠﻔﺖ ﻭﻗﻌﺪ ﻳﺸﻮﻓﻠﻬﺎ ﻭﻳﺎﺭﻳﺘﻪ ﻣﺎﺗﻠﻔﺖ ... ﻟﻘﻲ ﻣﻬﺎﺏ ﺟﺎﻱ ﻭﻭﻗﻒ ﻋﻠﻴﻬﻢ
ﻣﻬﺎﺏ : ﻛﻴﻒ ﺣﺎﻟﻜﻢ ..
ﻧﻴﺮﻭﺯ ﺑﺈﺑﺘﺴﺎﻣﻪ : ﺍﻟﺤﻤﺪ ﻟﻠﻪ ...
ﺭﻫﻒ : ﺍﻟﺤﻤﺪ ﻟﻠﻪ ..
ﻣﻬﺎﺏ : ﺳﺄﻟﺖ ﻉ ﺣﺎﻟﺔ ﻋﻤﻲ ﺍﻣﻮﺭﻩ ﺗﻤﺎﻡ ﻭﺑﻌﺪ ﻣﺎﻳﻘﻌﺪﻓﺘﺮﻩ ﻫﻨﻲ ﻭﻳﻄﻠﻊ ﻣﺤﺘﺎﺝ ﻳﺴﺘﻤﺮ ﻉ ﻛﻮﺭﺳﺎﺕ ﺃﺩﻭﻳﺔ ﻭﻳﻮﻟﻲ ﺍﺣﺴﻦ ﻣﻦ ﻗﺒﻞ ..
ﺭﻫﻒ : ﻣﺘﺄﻛﺪ؟
ﻣﻬﺎﺏ ﺑﻀﺤﻜﻪ : ﺍﻳﻪ ﻣﺘﺄﻛﺪ ﺗﻤﺎﻣﺎ ..
ﺭﻫﻒ : ﺍﻟﺤﻤﺪ ﻟﻠﻪ ...
ﻧﻴﺮﻭﺯ ﺑﻀﺤﻜﻪ : ﺑﻌﺪ ﺇﺫﻥ ﺍﻟﺪﻛﺘﻮﺭ ﻻﺯﻡ ﻧﺮﻭﺣﻮﺍ ﺍﻟﻮﻗﺖ ﺗﺄﺧﺮ .
ﻣﻬﺎﺏ ﺿﺤﻚ ﺑﺈﺣﺮﺍﺝ : ﺍﻭﻛﻲ ﺗﺼﺒﺤﻮﺍ ﻉ ﺧﻴﺮ ..
ﻧﻴﺮﻭﺯ ﻭﺭﻫﻒ : ﻭﺃﻧﺖ ﻣﻦ ﺍﻫﻠﻪ ..
ﺧﺶ ﻣﻬﺎﺏ ﻭﻫﻤﺎ ﻃﻠﻌﻮﺍ ...
ﺍﺳﻨﺎﻡ ﺍﻟﻠﻲ ﻛﺎﻥ ﻳﺸﻮﻓﻠﻬﻢ ﻗﺎﻝ " ﻣﻌﻘﻮﻟﻪ ﻳﺨﻠﻴﻬﻢ ﻳﺮﻭﺣﻮﺍ ﺑﺮﻭﺣﻬﻢ ﻓﻲ ﻫﺎﻟﻮﻗﺖ !!"...
ﺧﺶ ﺍﺳﻨﺎﻡ .. ﺣﻮﻝ ﺍﻟﻴﻮﻧﻴﻔﻮﺭﻡ .. ﻭﻃﻠﻊ ﻳﺠﺮﻱ .. ﻟﺤﻖ ﻉ ﺳﻴﺎﺭﺗﻬﻢ ﻛﻴﻒ ﺑﺎﺩﻳﻪ ﺗﺘﺤﺮﻙ .. ﺭﻛﺐ ﺳﻴﺎﺭﺗﻪ ﺷﻐﻠﻬﺎ ﻭﻣﺸﻲ ﻭﺭﺍﻫﻢ ... ﻭﺻﻠﻬﻢ ﻟﻠﺤﻮﺵ ﻭﺍﻃﻤﻦ ﻋﻠﻴﻬﻢ ﻭﻭﻻ ﻟﻠﻤﺴﺘﺸﻔﻰ ...
ﺗﺎﻧﻲ ﻳﻮﻡ
10:30 ﺻﺒﺎﺣﺎ ...
ﻃﻠﻌﺖ ﺍﻟﻤﻤﺮﺿﻪ ﻣﻦ ﺣﺠﺮﺓ ﺍﻟﻌﻨﺎﻳﻪ ..
ﺍﻟﻤﻮﺟﻮﺩﻳﻦ ﻭﻗﺘﻬﺎ ﻳﺎﺭﺍ ﻭﺣﻨﺎﻥ ﻭﺑﻨﺎﺗﻬﺎ .. ﻭﺃﺳﺎﻣﻪ ..
ﺍﻟﻤﻤﺮﺿﻪ : ﺍﻟﻤﺮﻳﺾ ﻓﺎﻕ ﺍﻟﺤﻤﺪ ﻟﻠﻪ ﻉ ﺳﻼﻣﺘﻪ ..
ﻓﺮﺣﻮﺍ ﻳﺎﺭﺍ ﻭﺍﻟﺒﻨﺎﺕ ﻗﺮﻳﺐ ﻃﺎﺭﻭﺍ .. ﻭﺣﻨﺎﻥ ﺍﺭﺗﺎﺣﺖ ..
ﺍﺳﺎﻣﻪ ﺑﺈﺑﺘﺴﺎﻣﻪ : ﻫﻴﺎ ﺗﻌﺎﻟﻮﺍ ﺗﻮ ﺑﻴﻨﺰﻟﻮﻩ ﻟﻮﻃﺎ ...
ﻣﺸﻮﺍ ﻣﻊ ﺍﺳﺎﻣﻪ .. ﻭﻫﻤﺎ ﻧﺰﻟﻮﺍ ﻧﻀﺎﻝ ﺗﺤﺖ ﻓﻲ ﺣﺠﺮﺓ ﻋﺎﺩﻳﻪ ..
ﺣﻨﺎﻥ : ﻳﻌﻨﻲ ﺗﻮﺍ ﻗﺪﺍﺵ ﺑﻴﻘﻌﺪ ﻓﻲ ﺍﻟﻤﺴﺘﺸﻔﻰ ..
ﻳﺎﺭﺍ ﺷﻘﻠﺒﺖ ﻋﻴﻮﻧﻬﺎ ﻣﺶ ﻋﺎﺟﺒﻬﺎ ..
ﺍﺳﺎﻣﻪ : ﻟﻴﻦ ﻳﻜﻤﻞ ﻛﻮﺭﺱ ﻋﻼﺝ ﻓﻲ ﺍﻟﻤﺴﺘﺸﻔﻰ ﻗﺒﻞ ﻭﺟﺮﺣﻪ ﻳﻠﺘﺌﻢ ﺷﻮﻳﻪ ..
ﺣﻨﺎﻥ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ...
ﻧﺰﻟﻮﺍ ﻟﻮﻃﺎ ﻭﺭﻓﻌﻬﻢ ﺍﺳﺎﻣﻪ ﻟﻠﺤﺠﺮﺓ ﺍﻟﻠﻲ ﺣﻄﻮﺍ ﻓﻴﻬﺎ ﻧﻀﺎﻝ ..
ﺍﻟﺪﻛﺘﻮﺭ ﻃﻠﻊ ﻣﻦ ﻋﻨﺪﻩ : ﻭﺍﺿﺢ ﺍﻧﻪ ﺭﺍﺟﻞ ﻗﻮﻱ ..
ﻳﺎﺭﺍ ﺍﺑﺘﺴﻤﺖ ..
ﺭﻫﻒ : ﻧﻘﺪﺭﻭﺍ ﻧﺨﺸﻮﻟﻪ ..
ﺍﻟﺪﻛﺘﻮﺭ : ﻳﻄﻠﻌﻮﺍ ﺍﻟﻤﻤﺮﺿﺎﺕ ﺗﻮﺍ .. ﻭﺗﺨﺸﻮﺍ ﺑﺲ ﻳﺎﻟﻴﺖ ﻣﺎﺍﻃﻮﻟﻮﺵ .. ﺍﻟﺤﻤﺪ ﺍﻟﻠﻪ ﻉ ﺳﻼﻣﺘﻪ ..
ﺭﺩﻭﺍ ﻋﻠﻴﻪ : ﺍﻟﻠﻪ ﻳﺴﻠﻤﻚ .. ﺍﺑﺘﺴﻢ ﺍﻟﺪﻛﺘﻮﺭ ﻭﻣﺸﻲ ...
ﺷﻮﻳﻪ ﻭﻃﻠﻌﻮﺍ ﺍﻟﻤﻤﺮﺿﺎﺕ ..
ﺭﻫﻒ : ﻫﻴﺎ ﻟﺒﻨﻰ ..
ﻟﺒﻨﻰ : ﻣﺎﻣﺎ ﺗﻌﺎﻟﻲ ﻣﻌﺎﻧﺎ ..
ﺣﻨﺎﻥ ﺷﺒﺤﺖ ﻟﻴﺎﺭﺍ ﺍﻟﻠﻲ ﻛﺎﻧﺖ ﺗﺸﻮﻓﻠﻬﺎ ﺑﺤﺪﻩ : ﺧﺸﻮﺍ ﺍﻧﺘﻢ ﻣﺎﻣﺎ ﺑﻌﺪﻳﻦ ﺗﻮ ﻧﺨﺶ ﻣﺎﻧﺪﻳﺮﻭﻻﺵ ﺯﺣﻤﻪ ﻣﻦ ﺍﻭﻟﻬﺎ ..
ﺧﺸﺖ ﻳﺎﺭﺍ .. ﻭﻫﻤﺎ ﺍﺿﺎﻳﻘﻮﺍ ﻭﺧﺸﻮﺍ ﺑﻌﺪﻫﺎ ﻭﻫﻲ ﻗﻌﺪﺕ ﺑﺮﺍ ..
ﺍﻭﻝ ﻣﺎﺳﻤﻊ ﺍﻟﺒﺎﺏ ﺍﻧﻔﺘﺢ ﻟﻒ ﺑﺮﺍﺳﻪ ﺟﻬﺔ ﺍﻟﺒﺎﺏ ﺍﺑﺘﺴﻢ ﻟﻤﺎ ﺷﺎﻑ ﺑﻨﺎﺗﻪ ... ﻗﺪﻣﻮﻟﻪ .. ﻭﺷﺪﻭﺍ ﺍﻳﺪﻩ ﻫﻤﺎ ﺍﻟﺰﻭﺯ ..
ﻟﺒﻨﻰ ﺩﻣﻮﻋﻬﺎ ﻧﺰﻟﻮﺍ : ﺑﺎﺑﺎ ﺣﺒﻴﺒﻲ ﺳﺎﻣﺤﻨﻲ .. ﺍﻧﻲ ﻧﺤﺒﻚ ﻧﺤﺒﻚ ﻫﻠﺒﻪ ..
ﻧﻀﺎﻝ ﺍﺑﺘﺴﻢ ﻭﺑﺼﻮﺕ ﺗﺎﻋﺐ : ﻳﺎ .. ﺭﻳﺖ .. ﺩﺭﺕ .. ﺍﻟﺤﺎﺩﺙ .. ﻣﻦ ﺯﻣﺎﻥ
ﺿﺤﻜﺖ ﻟﺒﻨﻰ ﻣﻦ ﺑﻴﻦ ﺩﻣﻮﻋﻬﺎ : ﺍﻟﺤﻤﺪ ﻟﻠﻪ ﺍﻟﻠﻲ ﻧﺠﺎﻙ ﻭﺣﻔﻈﻚ ﻟﻴﻨﺎ ..
ﺍﺑﺘﺴﻢ ...
ﺭﻫﻒ : ﺣﺒﻴﺒﻲ ﻣﺘﻨﺎ ﻣﻦ ﺍﻟﺨﻮﻑ ﻋﻠﻴﻚ ..
ﻧﻀﺎﻝ : ﺍﺳﻒ .. ﻳﺎﺑﺎﺑﺎ .. ﻣﺎﻛﻨﺘﺶ ... ﻧﺒﻴﻜﻢ ﺗﺨﺎﻓﻮﺍ ... ﻫﻜﻲ
ﻧﺰﻟﺖ ﺭﻫﻒ ﺭﺍﺳﻬﺎ ﻭﺑﺎﺳﺖ ﻳﺪﻩ ﻭﻟﺒﻨﻰ ﺑﻌﺪﻫﺎ ..
ﻗﺪﻣﺖ ﻳﺎﺭﺍ : ﺍﻟﺤﻤﺪ ﻟﻠﻪ ﻉ ﺳﻼﻣﺘﻚ ..
ﻧﻀﺎﻝ ﺍﺑﺘﺴﻢ : ﺍﻟﻠﻪ .. ﻳﺴﻠﻤﻚ ..
ﺷﺒﺢ ﻟﺒﻨﺎﺗﻪ ﻭﻗﺎﻝ : ﺍﻣﻜﻢ .. ﻣﺎﺟﺘﺶ ..
ﻟﺒﻨﻰ : ﻗﺎﻋﺪﻩ ﺑﺮﺍ ..
ﻧﻀﺎﻝ ﺑﺈﺳﺘﻴﺎﺀ : ﻋﻼﺵ .. ﻣﺎﺧﺸﺘﺶ ..
ﺭﻫﻒ : ﻗﺎﻟﺖ ﻣﺎﺗﺒﻴﻬﺎﺵ ﺗﺰﺣﻢ ﻋﻠﻴﻚ ..
ﻧﻀﺎﻝ ﺍﺑﺘﺴﻢ ﺗﻬﻜﻤﺎ : ﺗﺰﺣﻢ .. ﻋﻠﻴﺎ !! ﻧﺎﺩﻭﻫﺎ ...
ﻳﺎﺭﺍ ﺭﺑﻌﺖ ﺍﻳﺪﻳﻬﺎ ﻭﺭﻓﻌﺖ ﺣﺎﺟﺒﻬﺎ ﻭﻫﻲ ﺑﺘﺘﻔﺠﺮ ..
ﻃﻠﻌﺖ ﻟﺒﻨﻰ ﻧﺎﺩﺕ ﺃﻣﻬﺎ .. ﻭﺣﻨﺎﻥ ﺧﺸﺖ ..
ﺃﻭﻝ ﻣﺎﺷﺎﻓﻬﺎ ﺍﺑﺘﺴﻢ ﺍﺑﺘﺴﺎﻣﻪ ﻣﻦ ﻭﺳﻂ ﻗﻠﺒﻪ ﻭﻛﺎﻧﺖ ﺣﻠﻮﺓ ﻫﻠﺒﻪ ..
ﺣﻨﺎﻥ : ﺍﻟﺤﻤﺪ ﻟﻠﻪ ﻉ ﺳﻼﻣﺘﻚ ..
ﻧﻀﺎﻝ ﻭﻫﻮ ﻳﺸﻮﻓﻠﻬﺎ ﺑﻨﻈﺮﺓ ﺷﻮﻕ : ﺍﻟﻠﻪ .. ﻳﺴﻠﻤﻚ ..
ﻳﺎﺭﺍ ﺗﺒﻲ ﺍﺩﻳﺮ ﺍﻱ ﺷﻲ ﻣﻦ ﻏﻴﻈﻬﺎ : ﺣﺒﻴﺒﻲ ﻣﺮﺗﺎﺡ ﻓﻲ ﺭﻗﺪﺗﻚ ..
ﻧﻀﺎﻝ ﺷﺒﺤﻠﻬﺎ : ﺍﻳﻪ ..
ﻳﺎﺭﺍ ﺍﺑﺘﺴﻤﺖ : ﻛﻮﻳﺲ ... ﻭﻗﺮﺑﺖ ﺑﺎﺳﺎﺗﻪ ﻣﻦ ﺧﺪﻩ .. ﺍﻟﺤﻤﺪ ﻟﻠﻪ ﺍﻟﻠﻲ ﺭﺟﻌﺘﻠﻲ ..
ﺭﻫﻒ ﻭﻟﺒﻨﻲ ﻳﺸﺒﺤﻮﻟﻬﺎ ﻭﻛﺎﻥ ﻳﻠﻘﻮﺍ ﻳﻨﻘﺰﻭﺍ ﻋﻠﻴﻬﺎ ﻳﺮﻳﺸﻮﻫﺎ .. ﺑﻴﻨﻤﺎ ﺣﻨﺎﻥ ﺣﺴﺖ ﻭﺟﻮﺩﻫﺎ ﻣﺎﻻﺵ ﻣﻌﻨﻰ ..
ﺣﻨﺎﻥ ﺍﺑﺘﺴﻤﺖ : ﻣﺎﺗﺸﻮﻑ ﺑﺎﺱ .. ﻋﻦ ﺍﺫﻧﻚ ... ﻭﻃﻠﻌﺖ ﻭﺳﻜﺮﺕ ﺍﻟﺒﺎﺏ ..
ﻧﻀﺎﻝ ﻳﺸﺒﺢ ﻟﻠﺒﺎﺏ ﺑﻘﻬﺮﻩ ... ﻭﺧﻄﺮﺕ ﻋﻠﻴﻬﺎ ﺫﻛﺮﻯ ﻣﻦ ﺍﻟﻤﺎﺿﻲ ﺍﻟﻠﻲ ﻳﺘﻤﻨﻰ ﻟﻮ ﻳﺮﺟﻊ ..
ﻓﻼﺵ ﺑﺎﻙ ..
ﻛﺎﻥ ﺭﺍﻗﺪ ﻓﻲ ﻏﺮﻓﺔ ﻓﻲ ﻣﺴﺘﺸﻔﻰ ﺧﺸﻬﺎ ﺍﺛﺮ ﺣﺎﻟﺔ ﺗﺴﻤﻢ ...
ﻓﺘﺢ ﻋﻴﻮﻧﻪ ﻧﺰﻝ ﻋﻴﻮﻧﻪ ﻉ ﺻﺪﺭﻩ ﻟﻘﺎﻫﺎ ﺭﺍﻗﺪﻩ ﻉ ﺻﺪﺭﻩ .. ﺍﺑﺘﺴﻢ .. ﻭﻓﻴﻘﻬﺎ ...
ﻧﻀﺎﻝ : ﺣﻨﺎﻥ .. ﺣﺒﻴﺒﻲ ...
ﺣﻨﺎﻥ ﻓﺎﻗﺖ ﻣﻔﺰﻭﻋﻪ : ﺧﻴﺮﻙ ﺣﺒﻴﺒﻲ ...
ﻧﻀﺎﻝ ﺍﺑﺘﺴﻢ : ﻣﺎﻓﻴﺎ ﺷﻲ ... ﺍﻧﺘﻲ ﻃﻮﻝ ﻟﻴﻞ ﻗﻌﺪﺗﻲ ﺭﺍﻗﺪﻩ ﻫﻜﻲ ..
ﺣﻨﺎﻥ : ﻣﺎﺻﺎﺭﻟﻲ ﺷﻲ .. ﺍﺑﺘﺴﻤﺖ .. ﺑﺎﻟﻌﻜﺲ ﺃﺣﻠﻰ ﻧﻮﻣﻪ ..
ﻧﻀﺎﻝ ﻗﻌﺪ ﻳﺸﺒﺤﻠﻬﺎ ﻭﻳﺘﺄﻣﻞ ﻓﻲ ﻭﺟﻬﻬﺎ ﺍﻟﺨﺠﻮﻝ ..
ﺣﻨﺎﻥ : ﺍﻟﻤﻬﻢ ﺗﻮﺍ ﺍﻧﺖ ﺣﺎﻟﻚ ﺑﺎﻫﻲ ...
ﻧﻀﺎﻝ : ﺗﺲ ...
ﺣﻨﺎﻥ ﺑﺨﻮﻑ : ﻋﻼﺵ ﺷﻦ ﺗﺤﺲ ..
ﻧﻀﺎﻝ : ﻧﺤﺲ ﺑﺎﻟﺸﻮﻕ ..
ﺣﻨﺎﻥ ﺑﻀﺤﻜﻪ ﺿﺮﺑﺎﺗﻪ ﻉ ﺻﺪﺭﻩ : ﺧﻠﻌﺘﻨﻲ ..
ﻧﻀﺎﻝ : ﻧﺘﻜﻠﻢ ﺟﺪﻳﺎﺕ .. ﻋﻄﻴﻨﻲ ﺑﻮﺳﻪ ﻳﻮﻟﻲ ﺣﺎﻟﻲ ﺑﺎﻫﻲ ..
ﺣﻨﺎﻥ ﻭﺟﻬﻬﺎ ﻃﻤﺎﻃﻢ : ﻧﻀﺎﺍﺍﺍﻝ ..
ﻧﻀﺎﻝ : ﻫﻴﺎ ﺣﺒﻴﺒﻚ ﻣﺸﺘﺎﻕ .. ﻛﻠﻬﺎ ﺑﻮﺳﻪ ﺧﻔﻴﻔﻪ ﻟﻄﻴﻔﻪ ..
ﺣﻨﺎﻥ ﺿﺤﻜﺖ ﻭﻣﺪﺗﻠﻪ ﺧﺪﺗﻬﺎ ﺑﺎﺳﻪ .. ﺑﻌﺪﻳﻦ : ﺑﺲ ﻫﺎﺩﻱ ﻣﻔﻌﻮﻟﻬﺎ ﻣﺶ ﺳﺮﻳﻊ ..
ﺣﻨﺎﻥ : ﻧﻀﺎﺍﻝ ﻋﻴﺐ ﻋﺎﺩ ﻣﺶ ﻓﺤﻮﺷﻨﺎ ﺭﻩ ..
ﻧﻀﺎﻝ : ﻫﺬﺍ ﻏﻴﺮ ﻋﺎﻳﺸﻪ ﻋﻤﺮﻙ ﻛﻠﻪ ﺑﻴﻦ ﺍﻷﻟﻤﺎﻥ ﻭﺗﺸﻮﻓﻲ ﻓﻴﻬﻢ ﺷﻦ ﻳﺪﻳﺮﻭﺍ ﻓﻲ ﺍﻟﺸﺎﺭﻉ ...
ﺣﻨﺎﻥ ﺑﺈﺑﺘﺴﺎﻣﻪ : ﻟﻜﻨﻲ ﻣﺶ ﺍﻟﻤﺎﻧﻴﻪ ..
ﻧﻀﺎﻝ ﺗﻨﻬﺪ : ﺑﺎﻩ ﻳﺎﻭﺩﻱ ﻣﻌﺎﺵ ﻧﺒﻲ ﺷﻲ .. ﺧﻠﻴﻨﻲ ﺇﻥ ﺷﺎﺀ ﺍﻟﻠﻪ ﻧﻨﻔﻠﻖ ...
ﺣﻨﺎﻥ ﺿﺤﻜﺖ ﻭﻗﺮﺑﺖ ﺑﺎﺳﺎﺗﻪ ﺑﺴﺮﻋﻪ ﻭﺑﻌﺪﺕ ..
ﻧﻀﺎﻝ ﺑﻀﺤﻜﻪ : ﺍﺣﺒﻚ ﻳﺎﻭﺭﺩ " ﺑﺎﻟﻤﺼﺮﻱ ﻗﺎﻟﻬﺎ "...
ﺍﻟﻮﻗﺖ ﺍﻟﺤﺎﺿﺮ ..
ﻧﻀﺎﻝ : ﺍﻃﻠﻌﻮﺍ ﺑﻨﺮﻗﺪ ..
ﺭﻫﻒ ﻭﻟﺒﻨﻰ ﺭﻛﺰﻭﺍ ﻋﻠﻴﻪ ﻛﻴﻒ ﺍﺿﺎﻳﻖ ﻟﻤﺎ ﺍﻣﻬﻢ ﻃﻠﻌﺖ ...
ﺑﺎﺳﺖ ﺭﻫﻒ ﺭﺍﺳﻪ ﻭﺑﻌﺪﻫﺎ ﻟﺒﻨﻰ ﻭﻃﻠﻌﻮﺍ ..
ﻧﻀﺎﻝ ﻏﻤﺾ ﻋﻴﻮﻧﻪ ... ﻳﺎﺭﺍ ﻗﺮﻳﺐ ﺗﻤﻮﺕ ﻣﻦ ﻏﻴﺮﺗﻬﺎ ﻭﻣﻦ ﺍﻟﺤﺎﻝ ﺍﻟﻠﻲ ﻧﻀﺎﻝ ﻓﻴﻪ ... ﺗﻤﺎﻟﻜﺖ ﻧﻔﺴﻬﺎ ﻭﻃﻠﻌﺖ ...
ﺑﻤﺠﺮﺩ ﻃﻠﻌﺖ ﻧﻀﺎﻝ ﻓﺘﺢ ﻋﻴﻮﻧﻪ ... ﻭﺳﻤﺢ ﻟﺪﻣﻌﺔ ﻋﻴﻨﻪ ﺍﻟﻠﻲ ﺣﺒﺴﻬﺎ ﻫﻠﺒﻪ ﺗﻨﺰﻝ .. ﺩﻣﻌﺔ ﻧﺪﻡ ... ﻭﺗﻔﻴﺪ ﺑﺈﻳﻪ ﻳﺎﻧﺪﻡ ...
***
ﺍﻧﺖ ﺷﻦ ﺗﻘﻮﻝ !!
ﺍﺳﺎﻣﻪ : ﻫﻮ ﻫﺬﺍ ﺳﺒﺐ ﺍﻟﺤﺎﺩﺙ .. ﻗﻠﺐ ﻧﻀﺎﻝ ﻣﻌﺎﺵ ﻳﺘﺤﻤﻞ ﺍﻹﻧﻔﻌﺎﻻﺕ ﺍﻟﺰﺍﻳﺪﻩ ....
ﺧﻄﺮﺕ ﻋﻠﻴﻬﺎ ﻋﺎﺋﺸﻪ ﻭﺩﻣﻌﺘﻬﺎ ﻧﺰﻟﺖ ﻭﻗﺎﻟﺖ : ﺻﺎﺭﻟﻪ ﺯﻱ ﻋﺎﺋﺸﻪ ..
ﺍﺳﺎﻣﻪ ﺑﻠﻊ ﺭﻳﻘﻪ ﺑﺄﻟﻢ ﻭﻗﺎﻝ : ﺍﻟﻠﻪ ﻳﺮﺣﻤﻬﺎ ..
ﺣﻨﺎﻥ : ﻣﻌﻘﻮﻟﻪ ﻳﻜﻮﻥ ﺻﺎﻳﺮ ﻣﻌﺎﻩ ﺷﻲ ﻓﻲ ﺍﻟﻌﻤﻞ ...
ﺍﺳﺎﻣﻪ : ﺍﻟﻠﻪ ﺍﻋﻠﻢ .. ﻧﻮﻋﻴﺘﻪ ﻛﺘﻮﻡ ﻣﺎﻳﺪﻭﻳﺶ ﻓﻲ ﻣﺸﺎﻛﻠﻪ ﺍﻟﺨﺎﺻﻪ ﺇﻻ ﻣﻊ ﻭﺍﺋﻞ ...
ﺣﻨﺎﻥ ﺗﻨﻬﺪﺕ : ﺍﺳﺘﻐﻔﺮ ﺍﻟﻠﻪ ﺍﻟﻌﻈﻴﻢ ﻭﺧﻼﺹ ...
ﺟﺖ ﻣﻤﺮﺿﻪ : ﺩﻛﺘﻮﺭ ﺍﺳﺎﻣﻪ ﻳﺒﻮﻙ ﻓﻲ ﺍﻟﻌﻤﻠﻴﺎﺕ ..
ﺍﺳﺎﻣﻪ : ﺗﻮﺍ ﻋﻨﺪﻱ ﻋﻤﻠﻴﻪ ﺑﻌﺪﻳﻦ ﻧﺤﻜﻮﺍ ﺍﻛﺜﺮ ..
ﺣﻨﺎﻥ ﻫﺰﺕ ﺭﺍﺳﻬﺎ ﺑﺈﻳﺠﺎﺏ .. ﻭﺗﻠﻔﺘﺖ ﺍﻟﻘﺪﺍﻡ ﻭﻗﻌﻤﺰﺕ ﻉ ﻛﺮﺳﻲ ﻓﻲ ﺣﺪﻳﻘﺔ ﺍﻟﻤﺴﺘﺸﻔﻰ ﻭﺳﺮﺣﺖ ﺑﺄﻓﻜﺎﺭﻫﺎ .." ﺍﻟﻠﻪ ﻳﺴﺎﻣﺤﻚ ﻳﺎﻧﻀﺎﻝ ﺍﻧﺖ ﻭﺻﻠﺘﻨﺎ ﻟﻬﻨﻲ ... ﺑﺲ ﺍﻟﺤﻤﺪ ﻟﻠﻪ ﻉ ﻛﻞ ﺣﺎﻝ ﻓﻲ ﺍﻟﻨﻬﺎﻳﻪ ﻣﻘﺪﺭ ﻭﻣﻜﺘﻮﺏ "... ﻧﺎﺿﺖ .. ﻭﺟﺖ ﺑﺘﺨﺶ ﺍﻧﺨﺒﻄﺖ ﻓﻲ ﺷﺨﺺ ﻭﻳﻦ ﻗﺎﻣﺖ ﻋﻴﻮﻧﻬﺎ ﺭﻓﻌﺖ ﺣﻮﺍﺟﺒﻬﺎ ﻓﻮﻕ ..
" ﻣﻤﻜﻦ ﻧﻜﻠﻤﻚ ﺷﻮﻳﻪ "
ﺣﻨﺎﻥ : ﺗﻔﻀﻠﻲ ..
ﻣﺸﺖ ﺍﻟﻘﺪﺍﻡ ﻭﺣﻨﺎﻥ ﻟﺤﻘﺘﻬﺎ ..
ﻭﻗﻔﺖ ﻭﺭﺑﻌﺖ ﺍﻳﺪﻳﻬﺎ ﻭﺣﻨﺎﻥ ﻭﻗﻔﺖ ﻣﻘﺎﺑﻠﺘﻬﺎ ﻭﺣﺎﻃﻪ ﺍﻳﺪﻳﻬﺎ ﻓﺠﻴﻮﺏ ﺟﺎﻛﺘﻬﺎ ...
ﺣﻨﺎﻥ : ﻧﺴﻤﻊ ﻓﻴﻚ ..
ﻳﺎﺭﺍ ﺑﺮﻓﻌﺔ ﺣﺎﺟﺐ : ﺍﻟﺠﻮ ﺍﻟﻠﻲ ﺩﻳﺮﻱ ﻓﻴﻪ ﻳﻤﺸﻲ ﻉ ﺍﻟﻨﺎﺱ ﻛﻠﻬﺎ ﻟﻜﻦ ﻋﻠﻴﺎ ﺍﻧﻲ ﻻ .. ﻭﺍﺳﻠﻮﺑﻚ ﺍﻟﻤﺘﺨﻠﻒ ﺍﻟﻠﻲ ﺗﺤﺎﻭﻟﻲ ﺗﺮﺩﻱ ﺑﻴﻪ ﻧﻀﺎﻝ ﺍﻧﻲ ﻋﺎﺭﻓﺘﻪ ﻛﻮﻳﺲ .. ﻷﻥ ﻧﻤﺎﺫﺟﻚ ﻣﺎﺭﻳﻦ ﻋﻠﻴﺎ ﻫﻠﺒﻪ .. ﻟﻬﺬﺍ ﻧﻘﻮﻟﻚ .. ﺍﻧﺘﻲ ﺗﻌﺒﻲ ﻓﺮﻭﺣﻚ ﻉ ﺍﻟﻔﺎﺿﻲ ﻭﻣﺶ ﺣﺘﺴﺘﻔﻴﺪﻱ ﺷﻲ .. ﻧﻀﺎﻝ ﻣﺶ ﺣﻴﻮﻟﻴﻠﻚ ﻷﻧﻪ ﺑﻠﺴﺎﻧﻪ ﻗﺎﻟﻬﺎ ﺍﻧﺘﻲ ﻣﻌﺎﺵ ﻓﻴﻚ ﺷﻲ ﻳﻠﻔﺘﻠﻪ ﺍﻧﺘﺒﺎﻫﻪ ﻷﻧﻚ ﻣﺮﺍﺓ ﻋﺎﺩﻳﻪ ﺟﺪﺍ ﺟﺪﺍ .. ﻭﻣﺶ ﺣﻴﺸﻮﻓﻚ ﻏﻴﺮ ﻫﻜﻲ .. ﻟﻬﺬﺍ ﺳﻴﺒﻚ ﻭﻫﺠﺮﻙ .. ﻭﻟﻮﻻ ﺍﻧﻚ ﻃﻠﺒﺘﻲ ﺗﻘﻌﺪﻱ ﻉ ﺫﻣﺘﻪ ﺭﺍﻙ ﻃﻠﻴﻘﺘﻪ ﺗﻮﺍ .. ﻛﻞ ﻫﻤﻪ ﺑﻨﺎﺗﻪ ﻭﺑﺲ ﻭ ﺣﻀﺮﺗﻚ ﺗﺴﺘﺨﺪﻣﻲ ﻓﻴﻬﻢ ﺑﺶ ﺗﺮﺩﻳﻪ .. ﻭﺍﻧﻲ ﺍﻟﻠﻲ ﻋﺎﺭﻓﻪ ﺟﻮﻙ ﺍﻟﺮﺧﻴﺺ ﻫﺬﺍ ﻛﻮﻳﺲ ... ﻣﺎﺗﻌﺒﻴﺶ ﺭﻭﺣﻚ ﺯﻱ ﻣﺎﻗﺘﻠﻚ ﻣﺶ ﺣﻴﺠﻴﺐ ﻧﺘﻴﺠﻪ ..
ﺣﻨﺎﻥ ﺍﺑﺘﺴﻤﺖ : ﻛﻮﻳﺲ .. ﺑﺎﻩ ﺍﻧﺘﻲ ﻋﻼﺵ ﺟﺎﻳﻪ ﺗﻘﻮﻟﻴﻠﻲ ﻓﻬﺎﻟﻜﻼﻡ ...
ﻳﺎﺭﺍ ﺳﻜﺘﺖ ﻭﻣﻌﺎﺵ ﻋﺮﻓﺖ ﺷﻦ ﺗﻘﻮﻝ ..
ﺣﻨﺎﻥ ﻗﺪﻣﺘﻠﻬﺎ : ﺍﻧﺘﻲ ﻗﻠﺘﻴﻬﺎ ﺑﺮﻭﺣﻚ ﺳﻴﺒﻨﻲ ﻭﻫﺠﺮﻧﻲ ﻭﻗﺎﻋﺪ ﻋﻨﺪﻙ ﺍﻧﺘﻲ .. ﺍﻧﺘﻲ ﺍﻟﻠﻲ ﻓﻀﻠﻚ ﻋﻠﻴﺎ .. ﻣﺎﺗﺘﺼﺮﻓﻴﺶ ﺗﺼﺮﻓﺎﺕ ﺗﺒﻴﻦ ﺍﻟﻌﻜﺲ ..
ﻳﺎﺭﺍ : ﻛﺎﻥ ﺣﻴﻄﻠﻘﻚ ﺍﻷﺳﺒﻮﻉ ﻫﺬﺍ ﻟﻮﻻ ﺍﻟﻠﻲ ﺻﺎﺭ ﻣﻌﺎﻩ ..
ﺣﻨﺎﻥ : ﻋﺎﺭﻓﻪ .. ﺍﻧﻲ ﺍﻟﻠﻲ ﻃﻠﺒﺖ ﻣﻨﻪ ﻳﻄﻠﻘﻨﻲ ﻓﻬﺎﻷﺳﺒﻮﻉ ﻭﻉ ﻓﻜﺮﺓ ﻫﺎﺩﻱ ﺗﺎﻟﺖ ﻣﺮﺓ ﻧﻄﻠﺐ ﻓﻴﻬﺎ ﻣﻨﻪ ﺍﻟﻄﻼﻕ .. ﻭﻗﺘﻠﻪ ﻟﻮ ﻣﻄﻠﻘﺶ ﺑﺮﺿﺎﻩ .. ﺣﻨﺮﻓﻊ ﻗﻀﻴﻪ .. ﻭﻫﻮ ﻳﻤﺎﻃﻞ ..
ﻳﺎﺭﺍ ﺍﻧﺼﺪﻣﺖ ﺑﺲ ﺑﻴﻨﺖ ﺍﻟﻌﻜﺲ ﻭﻗﺎﻟﺖ : ﻫﻬﻬﻬﻬﻪ ﻫﺬﺍ ﺟﺰﺀ ﻣﻦ ﺍﻟﺠﻮ ﺍﻟﺮﺧﻴﺺ ﺍﻟﻠﻲ ﺩﻳﺮﻱ ﻓﻴﻪ ﺑﺶ ﻳﺸﺪ ﻓﻴﻚ ﺍﻛﺜﺮ ... ﺣﺼﻴﻠﻮ ... ﻭﺍﺧﺮ ﻛﻼﻣﻲ ﺍﻧﻲ ﻣﺶ ﺣﻨﺘﻨﺎﺯﻝ ﻋﻦ ﻧﻀﺎﻝ ﻣﻬﻤﺎ ﺻﺎﺭ ﻭﻻ ﻧﺨﻠﻴﻪ ... ﺣﻄﻴﻬﺎ ﻓﺮﺍﺳﻚ ... ﻭﻟﻔﺖ ﻭﺧﺸﺖ ..
ﻭﺣﻨﺎﻥ ﻗﻌﺪﺕ ﺗﻀﺤﻚ ﺑﻌﺪﻳﻦ ﻗﺎﻟﺖ : ﺷﺮ ﺍﻟﺒﻠﻴﺔ ﻣﺎﻳﻀﺤﻚ ... ﻭﺧﺸﺖ ﺩﺍﺧﻞ ...
... ﻳﺘﺒﻊ
٠٨ / ١١ / ٢٠٢٠ · Facebook for Android · ﺭك
