ﺕ ❤🔥
# ﻣﻮﺳﻢ _ ﺍﻟﺘﻮﻟﻴﺐ
# ﺟﻤﺎﻥ _ ﻓﺮﻳﺪ
# ﺍﻟﺠﺰﺀ 30
ﻛﺎﻧﺖ ﻓﻲ ﺍﻟﻤﻜﺘﺐ ﺍﻟﻬﻨﺪﺳﻲ ﺗﺮﺍﺟﻊ ﻓﻲ ﺍﻟﺘﺼﻤﻴﻢ ﻣﻊ ﺭﺋﻴﺴﻬﺎ ..
ﻣﻮﺳﻰ : ﻫﻜﻲ ﺗﻤﺎﻡ ..
ﺣﻨﺎﻥ : ﺍﻟﻤﺴﺎﻓﺎﺕ ﻣﺰﺑﻮﻃﻪ؟
ﻣﻮﺳﻰ : ﺑﻌﺪﻱ ﺷﻮﻳﻪ ﺑﻴﻦ ﺍﻷﻋﻤﺪﻩ ﻫﺎﺩﻱ ..
ﺣﻨﺎﻥ ﻗﻌﺪﺕ ﺗﺸﻮﻑ : ﺗﻤﺎﻡ ...
ﻣﻮﺳﻰ ﻭﻗﻒ ﻉ ﺣﻴﻠﻪ : ﻗﻄﻌﺘﻲ ﺷﻮﻁ ﻛﺒﻴﺮ ﻣﻌﺎﻫﻢ ..
ﺣﻨﺎﻥ : ﺍﻟﺤﻤﺪ ﻟﻠﻪ ..
ﻣﻮﺳﻰ : ﺍﻟﻤﺪﻩ ﺍﻟﺰﻣﻨﻴﻪ ﺍﻟﻤﺤﺪﺩ 3 ﺳﻨﻴﻦ ﻭﺍﻧﻲ ﻧﺘﻮﻗﻊ ﻳﻜﻤﻠﻮﺍ ﻓﻲ ﺍﻗﻞ ﻣﻦ ﻫﻜﻲ ..
ﺣﻨﺎﻥ : ﺇﻥ ﺷﺎﺀ ﺍﻟﻠﻪ ﻉ ﺍﻟﺨﻴﺮ ..
ﻣﻮﺳﻰ : ﺍﻟﻤﺪﻳﻨﻪ ﺍﻟﺴﻜﻨﻴﻪ ﺍﻟﻨﺎﺱ ﻣﺘﻬﺎﻓﺘﻪ ﻋﻠﻴﻬﺎ ﺑﺸﻜﻞ ﻏﻴﺮ ﻋﺎﺩﻱ ..
ﺣﻨﺎﻥ : ﺍﻳﻪ .. ﻻﺣﻈﺖ ﻫﺎﻟﺸﻲ ..
ﻣﻮﺳﻰ : ﻣﺎﺷﺎﺀﺍﻟﻠﻪ .. ﻣﻌﺎﻭﻳﻪ ﺍﻟﻬﺎﺩﻱ ﻣﺎﻳﺪﻳﺮﺵ ﻣﺸﺮﻭﻉ ﺍﻭ ﻳﺨﺶ ﻓﻲ ﻣﺸﺮﻭﻉ ﺇﻻ ﻭﻳﻨﺠﺢ ﻧﺠﺎﺡ ﺑﺎﻫﺮ ..
ﺣﻨﺎﻥ ﺍﺑﺘﺴﻤﺖ ..
ﻣﻮﺳﻰ : ﺑﻌﺪ ﺳﺎﻋﻪ ﺣﻨﻤﺸﻲ ﻏﺎﺩﻱ ﻭﻧﺒﻴﻚ ﺗﻤﺸﻲ ﻣﻌﺎﻱ .. ﻧﻜﻠﻤﻮﻩ ﻉ ﺍﻹﺿﺎﻓﺎﺕ ﺍﻟﻠﻲ ﺩﺭﻧﺎﻫﺎ ..
ﺣﻨﺎﻥ : ﺣﺎﺿﺮ ..
ﻣﻮﺳﻰ : ﺗﻘﺪﺭﻱ ﺗﺘﻔﻀﻠﻲ ..
ﺣﻨﺎﻥ ﺍﺑﺘﺴﻤﺖ ﻭﻟﻔﺖ ﻭﻃﻠﻌﺖ .. ﺗﻮﺟﻬﺖ ﻟﻠﻤﻜﺘﺐ ﻣﺘﺎﻋﻬﺎ ﺍﻟﻠﻲ ﻛﺎﻧﺖ ﻓﻴﻪ ﻧﺠﻼﺀ ﺑﺲ ﻭﻛﺎﻧﺖ ﺗﺸﺒﺤﻠﻬﺎ ﻭﺣﻨﺎﻥ ﻣﺶ ﻻﻫﻴﻪ ﺑﻴﻬﺎ ..
ﻧﺠﻼﺀ : ﺍﻟﺨﺪﻣﻪ ﻣﻊ ﺷﺮﻛﺎﺕ ﺍﻟﻬﺎﺩﻱ ﺗﺤﺴﺲ ﺍﻟﻤﻬﻨﺪﺱ ﺑﻘﻴﻤﺘﻪ ..
ﺣﻨﺎﻥ ﺗﻠﻔﺘﺖ ﻭﺷﺒﺤﺘﻠﻬﺎ : ﻛﻴﻒ ﻳﻌﻨﻲ ؟
ﻧﺠﻼﺀ : ﻳﻌﻨﻲ ﺗﺤﺴﻲ ﻓﻲ ﺭﻭﺣﻚ ﺗﺨﺪﻣﻲ ﻣﻊ ﻧﺎﺱ ﻓﺎﻫﻤﻪ ﺷﻦ ﺗﺒﻲ ﻭﻳﻌﻄﻮﻙ ﻗﺪﺭﻙ ﺑﺈﻧﻚ ﺗﺨﺪﻣﻲ ﻣﻌﺎﻫﻢ ﻣﺶ ﻋﻨﺪﻫﻢ ..
ﺣﻨﺎﻥ : ﺍﻫﺎ ... ﻛﻮﻳﺲ ..
ﻧﺠﻼﺀ " ﻣﻐﺮﻭﺭﺓ "...
***
ﺗﻠﻴﻔﻮﻥ ﻳﺮﻥ .. ﺗﺸﺒﺤﻠﻪ ﻭﻣﺎﺗﺒﻴﺶ ﺗﺮﺩ ..
ﻟﺒﻨﻰ : ﺧﻴﺮﻙ ﻣﺎﺗﺮﺩﻳﺶ ..
ﺭﻫﻒ : ﻣﺎﺧﺎﻃﺮﻳﺶ ..
ﻟﺒﻨﻰ : ﺭﻫﻒ ﺃ ...
ﺭﻫﻒ ﻗﺎﻃﻌﺘﻬﺎ : ﻟﺒﻨﻰ ﺑﺎﻟﻠﻪ ﻋﻠﻴﻚ ﺍﺳﻜﺘﻲ ..
ﻟﺒﻨﻰ : ﻻ ﻣﺶ ﺳﺎﻛﺘﻪ ﻣﺎﺗﺒﻴﺸﻲ ﺍﻓﺴﺨﻲ .. ﺍﻟﻠﻲ ﺍﻧﺘﻲ ﻓﻴﻪ ﻫﺬﺍ ﻋﺬﺍﺏ ..
ﺭﻫﻒ : ﺯﻱ ﺑﻌﻀﻪ ..
ﻟﺒﻨﻰ : ﺍﻧﺘﻲ ﺗﺒﻲ ﺗﻨﺴﻲ ﺃﺳﻨﺎﻡ ..
ﺭﻫﻒ ﺗﻜﻬﺮﺑﺖ؛ ﻟﺒﻨﻲ ﺑﺮﻱ ﺷﻮﻓﻲ ﻣﺤﻤﺪ ﺷﻦ ﻳﺪﻳﺮ ﻭﻣﺎﺩﺧﻠﻜﺶ ﺑﻴﺎ ..
ﻟﺒﻨﻰ : ﻣﺤﻤﺪ ﻳﺘﻔﺮﺝ ﻗﺪﺍﻣﻚ ﺍﻫﻮﺍ .. ﻭﺑﻨﺘﻜﻠﻢ ﻭﺣﺘﺴﻤﻌﻴﻨﻲ .. ﻭﺍﺿﺢ ﺍﻧﻚ ﻣﺶ ﻣﺘﻘﺒﻠﻪ ﻣﻬﺎﺏ ﺑﺘﺎﺗﺎ ﺍﻓﺴﺨﻲ ﻭﻟﻮ ﺗﺒﻲ ﺗﻨﺴﻲ ﺍﺳﻨﺎﻡ ﺍﻧﺴﻴﻪ ﺑﺄﻱ ﺷﻲ ﺗﺎﻧﻲ ﺇﻻ ﺍﻟﺤﺎﺟﻪ ﻫﺎﺩﻱ ..
ﺭﻫﻒ ﻣﻜﺒﻮﺗﻪ ﻭﺍﻧﻔﺠﺮﺕ ﻭﺑﺒﻜﻲ : ﻣﺎﻧﻘﺪﺭﺵ ﻣﺎﻧﻘﺪﺭﺵ .. ﻭﻳﻦ ﻣﺎﻧﻤﺸﻲ ﻧﻠﻘﺎﻩ ﻭﻗﻠﺒﻲ ﻳﻮﺟﻌﻨﻲ .. ﺍﺧﺮ ﻣﺮﺓ .. ﻟﻤﺎ ﻃﻠﻌﺖ ﻣﻊ ﻣﻬﺎﺏ .. ﺷﻔﺘﻪ ﻓﻲ ﻧﻔﺲ ﺍﻟﻤﻜﺎﻥ ﻣﻊ ﺧﻄﻴﺒﺘﻪ ﻳﻬﺪﺭﺯﻭﺍ ﻭﻳﻀﺤﻜﻮﺍ .. ﺣﺴﻴﺖ ﺑﻤﻮﺍﺱ ﺗﻘﻄﻊ ﻓﻲ ﻗﻠﺒﻲ .. ﻗﺮﻳﺐ ﻧﻀﺖ ﻗﺘﻠﺘﻬﺎ ﻭﻗﺘﻠﺘﻪ ﻭﻗﺘﻠﺖ ﺭﻭﺣﻲ .. ﻗﻌﺪﺕ ﺗﺒﻜﻲ
ﻟﺒﻨﻰ ﺩﻣﻮﻋﻬﺎ ﻧﺰﻟﻮﺍ ﻭﺷﺪﺕ ﺍﻳﺪﻳﻬﺎ : ﺧﻼﺹ ﺣﺒﻴﺒﺘﻲ ﺧﻼﺹ ..
ﺭﻫﻒ : ﻳﺎﺭﻳﺘﻜﻢ ﻣﺎﻗﻠﺘﻮﻟﻲ ﺍﻧﻪ ﻳﺤﺒﻚ ﻭﻭﻗﻀﺘﻮﻧﻲ ﻟﻤﺸﺎﻋﺮﻱ .. ﺍﻧﺘﻮﺍ ﻃﻠﻌﺘﻮﺍ ﻏﺎﻟﻄﻴﻦ .. ﻭﺍﻧﻲ ﻗﻌﺪﺕ ﻧﺘﻌﺬﺏ ...
ﻟﺒﻨﻰ ﺣﻀﻨﺘﻬﺎ : ﻛﻠﻪ ﻣﻨﻲ ﺍﻧﻲ ... ﺳﺎﻣﺤﻴﻨﻲ ﺧﻼﺹ ..
ﺭﻫﻒ : ﺑﻨﻤﻮﺕ ﻳﺎﻟﺒﻨﻲ ﻣﺶ ﻗﺎﺩﺭﻩ ﻧﺤﻮﻟﻪ ﻣﻦ ﺭﺍﺳﻲ ﻭﻣﻦ ﻗﻠﺒﻲ ﻣﺶ ﻗﺎﺩﺭﻩ ﻛﺮﻫﺖ ﻛﻞ ﺷﻲ ﻛﺮﻫﺖ ﻧﻔﺴﻲ ﻳﺎﻟﺒﻨﻰ ﻷﻧﻬﺎ ﺗﺤﺐ ﺣﺪ ﻣﺎﻳﻨﺪﺭﻳﺶ ﻋﻠﻴﻬﺎ .. ﺃﺍﺍﺍﺍﻩ ..
ﻟﺒﻨﻰ ﺯﺍﺩﺕ ﺣﻀﻨﺘﻬﺎ ﻭﺩﻣﻮﻋﻬﺎ ﻳﻨﺰﻟﻮﺍ : ﺧﻼﺹ ﻳﺎﻋﻤﺮﻱ ﺧﻼﺹ ...
ﻭﻣﺤﻤﺪ ﻛﺎﻥ ﻳﺸﺒﺤﻠﻬﻢ ﻛﻴﻒ ﻳﺒﻜﻮﺍ ﻭﻗﻌﺪ ﻳﺒﻜﻲ ﻣﻌﺎﻫﻢ .. ﻫﻤﺎ ﻏﺼﺐ ﻋﻨﻬﻢ ﺿﺤﻜﻮﺍ ﻓﻲ ﻋﺰ ﺑﻜﺎﻫﻢ ﻭﻧﺎﺿﺘﻠﻪ ﻟﺒﻨﻰ ﺗﺴﻜﺖ ﻓﻴﻪ ..
***
ﺍﻟﺴﺎﻋﻪ 11
ﻛﺎﻥ ﺍﻟﻤﻬﻨﺪﺱ ﻣﻮﺳﻰ ﻭﻣﻌﺎﻩ ﺣﻨﺎﻥ ﻓﻲ ﻣﻜﺘﺐ ﻣﻌﺎﻭﻳﻪ ﻳﺘﻨﺎﻗﺸﻮﺍ ﻣﻌﺎﻩ ﻉ ﺍﻟﻤﺸﺮﻭﻉ ..
ﻣﻌﺎﻭﻳﻪ : ﺍﻣﻢ ... ﻋﺠﺒﺘﻨﻲ ﺍﻹﺿﺎﻓﺎﺕ ﻫﺎﺩﻱ .. ﺣﻴﻜﻮﻥ ﻣﺘﻜﺎﻣﻞ ﻣﻦ ﻛﻞ ﺷﻲ ﻉ ﻫﻜﻲ ..
ﻣﻮﺳﻰ : ﺗﻤﺎﻡ ..
ﻣﻌﺎﻭﻳﻪ : ﻷﻭﻝ ﻣﺮﺓ ﻧﺘﻌﺎﻣﻞ ﻣﻊ ﻣﻜﺘﺐ ﻫﻨﺪﺳﻲ ﻟﻴﺒﻲ .. ﻭﺑﺼﺮﺍﺣﻪ ﻫﺎﻟﺨﻄﻮﺓ ﻣﺎﻛﺎﻧﺘﺶ ﻭﺍﺭﺩﺓ ﻓﻲ ﺑﺎﻟﻲ ﻧﻬﺎﺋﻲ .. ﻟﻴﻦ ﺳﻤﻌﺖ ﻋﻨﻜﻢ ﻭﻋﻦ ﺍﻣﻜﺎﻧﻴﺎﺗﻜﻢ
ﻣﻮﺳﻰ : ﺑﺎﺭﻙ ﺍﻟﻠﻪ ﻓﻴﻚ .. ﻭﺣﻨﻲ ﻟﻴﻨﺎ ﺍﻟﺸﺮﻑ ﻓﻲ ﺍﻟﺨﺪﻣﻪ ﻓﻲ ﻣﺸﺮﻭﻉ ﺍﻧﺖ ﺻﺎﺣﺒﻪ ..
ﻣﻌﺎﻭﻳﻪ ﺷﺒﺢ ﻟﺤﻨﺎﻥ ﺍﻟﻠﻲ ﻛﺎﻧﺖ ﺳﺎﻛﺘﻪ : ﻭﺍﻟﺒﺶ ﻣﻬﻨﺪﺳﻪ ﺷﻦ ﺭﺃﻳﻬﺎ ..
ﺣﻨﺎﻥ : ﻓﻲ ﺷﻨﻮ ..
ﻣﻌﺎﻭﻳﻪ : ﻣﺎﻛﻨﺘﻴﺶ ﻣﻌﺎﻧﺎ ..
ﺣﻨﺎﻥ : ﻻﻛﻨﺖ ﻣﻌﺎﻛﻢ .. ﺑﺲ ﺍﻟﻜﻼﻡ ﺍﻟﻠﻲ ﻗﺎﻝ ﺭﺋﻴﺴﻲ ﻫﻮ ﻛﻼﻣﻲ .
ﻣﻌﺎﻭﻳﻪ ﻣﻀﺎﻳﻖ ﻣﻦ ﺍﺳﻠﻮﺑﻬﺎ ﻣﻌﺎﻩ ﻛﺎﻥ ﺍﺳﺘﻜﺮﺍﺩ ﺍﻭ ﻻﻣﺒﺎﻻﻩ ﺍﻭ ﺭﺳﻤﻴﻪ ﺯﺍﻳﺪﻩ ﺍﻟﻤﻬﻢ ﻣﺘﺠﻨﺒﺎﺗﻪ ..
ﻣﻮﺳﻰ ﻧﺎﺽ : ﺗﻮﺍ ﻳﺎﺭﻳﺖ ﺗﺴﻤﺤﻠﻨﺎ ...
ﻣﻌﺎﻭﻳﻪ ﻧﺎﺽ : ﺷﺮﻓﺖ ﻳﺎﺑﺎﺵ ﻣﻬﻨﺪﺱ ..
ﻣﻮﺳﻰ : ﺑﻴﻚ ﺍﻛﺜﺮ .. ﻋﻦ ﺍﺫﻧﻚ .. ﻫﻴﺎ ﺣﻨﺎﻥ ..
ﻣﻌﺎﻭﻳﻪ : ﻻ ﻣﻌﻠﻴﺸﻲ ﻧﺒﻲ ﺍﻟﻤﻬﻨﺪﺳﻪ ﺷﻮﻳﻪ ..
ﺣﻨﺎﻥ ﻓﻨﺼﺖ ﻋﻴﻮﻧﻬﺎ ﻭﺍﺭﺗﺒﻜﺖ ..
ﻣﻮﺳﻰ ﺷﺒﺤﻠﻬﺎ : ﺗﻤﺎﻡ .. ﻧﺴﺘﻨﻰ ﻓﻴﻚ ..
ﺣﻨﺎﻥ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ﻭﻫﻲ ﻓﻲ ﻗﻤﺔ ﺍﻟﺘﻮﺗﺮ ..
ﻣﻮﺳﻰ ﻃﻠﻊ ﻭﺻﻜﺮ ﺍﻟﺒﺎﺏ ..
ﻣﻌﺎﻭﻳﻪ ﺷﺒﺢ ﻟﺤﻨﺎﻥ .. ﻭﻫﻲ ﻭﺍﻗﻔﻪ ﻣﺎﺗﺒﻴﺶ ﺗﺸﺒﺤﻠﻪ ..
ﻣﻌﺎﻭﻳﻪ ﻃﻠﻊ ﻣﻦ ﻣﻜﺘﺒﻪ ﻭﻭﻗﻒ ﻗﺪﺍﻣﻬﺎ : ﻋﻼﺵ ﺍﻟﻤﻌﺎﻣﻠﻪ ﻫﺎﺩﻱ ..
ﺣﻨﺎﻥ ﻣﻦ ﺩﺍﺧﻞ ﺣﺎﻟﺘﻬﺎ ﺣﺎﻟﻪ ﺑﺲ ﻣﺒﻴﻨﻪ ﺍﻟﻌﻜﺲ : ﺷﻦ ﺗﻘﺼﺪ؟ !
ﻣﻌﺎﻭﻳﻪ : ﺍﻧﺘﻲ ﻓﺎﻫﻤﻪ ﻋﻠﻴﺎ ﻛﻮﻳﺲ .. ﺍﻟﻠﻲ ﺑﺪﺭ ﻣﻨﻲ ﻋﺎﺭﻑ ﻏﻠﻂ ﻭﺍﻧﻲ ﻛﻨﺖ ﻣﺴﺘﻌﺪ ﻧﻌﺘﺬﺭ ﻭﻧﻘﻮﻟﻚ ﺍﻧﺴﻲ ﺍﻟﻠﻲ ﺳﻤﻌﺘﻴﻪ .. ﻟﻜﻦ ﺍﻧﺘﻲ ﻗﻄﻌﺘﻲ ﻓﻲ ﻣﺮﺓ ﻭﺣﺪﻩ ..
ﺣﻨﺎﻥ ﺷﺒﺤﺘﻠﻪ : ﻭﺍﻧﺖ ﺷﺎﻳﻒ ﺍﻟﻠﻲ ﻗﻠﺘﻪ ﻳﺘﻌﺪﺍ ﻋﺎﺩﻱ ﻭﻳﻔﻮﺕ .. ﻭﺗﻌﺘﺬﺭ ﻭﺗﻘﻮﻟﻲ ﺍﻧﺴﻲ ﺍﻟﻠﻲ ﺳﻤﻌﺘﻪ .. ﻟﻜﻦ ﻧﻴﺘﻚ ﺍﺗﺠﺎﻫﻲ ﻛﻴﻒ ﻧﻘﺪﺭ ﻧﺘﺠﺎﻫﻠﻬﺎ ..
ﻣﻌﺎﻭﻳﻪ : ﻣﺎﺗﻜﺒﺮﻳﻬﺎﺵ ..
ﺣﻨﺎﻥ : ﻋﻨﺪﻙ ﺍﻧﺖ ﺣﺎﺟﻪ ﻋﺎﺩﻳﻪ ﻭﻣﺶ ﻣﻬﻤﻪ .. ﺑﺲ ﻋﻨﺪﻱ ﺍﻧﻲ ﻏﻴﺮ .. ﺍﻧﺖ ﻳﺎﺳﻴﺪ ﻣﺎﺗﺘﻌﺎﻣﻠﺶ ﻣﻊ ﻭﺣﺪﻩ ﻣﻦ ﺍﻟﺒﻴﺌﻪ ﺍﻟﻠﻲ ﺍﻧﺖ ﻣﺘﻌﻮﺩ ﺗﺨﺎﻟﻄﻬﺎ .. ﺍﻟﻠﻲ ﻣﺎﻓﻴﻬﺎﺵ ﺿﻮﺍﺑﻂ ﻭﻻ ﺣﺪﻭﺩ ﺑﻴﻦ ﺍﻟﺮﺍﺟﻞ ﻭﺍﻟﻤﺮﺍﺓ ... ﺍﻟﻤﺸﻜﻠﻪ ﺍﻧﻲ ﻣﺮﺍﺓ ﻉ ﺫﻣﺔ ﺭﺍﺟﻞ ﻭﻫﺬﺍ ﺍﻟﻠﻲ ﺯﺍﺩ ﺍﻟﻄﻴﻦ ﺑﻠﻪ .. ﻛﻴﻒ ﺗﺒﻴﻨﻲ ﻧﺴﻤﻊ ﻛﻠﻤﻪ ﺯﻱ ﺍﻟﻠﻲ ﻗﻠﺘﻬﺎ ﻭﻧﻤﺸﻴﻬﺎ ﻋﺎﺩﻱ ..
ﻣﻌﺎﻭﻳﻪ : ﺍﻧﺘﻲ ﻣﻌﻘﺪﻩ ﻳﺎﺣﻨﺎﻥ ﻭﺗﻔﻜﻴﺮﻙ ﻗﺪﻳﻢ ﻭﺑﺎﻟﻲ ..
ﺣﻨﺎﻥ ﺍﺑﺘﺴﻤﺖ : ﻭﺍﻧﺖ ﻣﻨﺤﻞ ﻫﻠﺒﻪ ﻭﺗﻔﻜﻴﺮﻙ ﻣﺎﻳﻞ ﻟﻺﻧﺤﺮﺍﻑ ..
ﻣﻌﺎﻭﻳﻪ ﻋﺼﺐ : ﺍﻟﺰﻣﻲ ﺣﺪﻙ ..
ﺣﻨﺎﻥ : ﻟﻤﺎ ﺗﻠﺰﻣﻬﺎ ﺍﻧﺖ ﺍﻧﻲ ﺣﻨﻠﺰﻣﻬﺎ ... ﻭﻟﻮ ﺍﻧﺖ ﺗﺒﻲ ﺗﺨﻠﻖ ﻣﺸﻜﻠﻪ ﻣﻌﺎﻱ ﺑﺶ ﻧﺴﻴﺐ ﺍﻟﺨﺪﻣﻪ ﻣﻌﺎﻙ .. ﺍﺑﺪﺍ ﻣﺎﻋﻨﺪﻳﺶ ﻣﺸﻜﻠﻪ ﻭﻣﻦ ﻫﺎﻟﻠﺤﻈﻪ ﺍﻧﻲ ﻣﻌﺘﺬﺭﺓ ..
ﻣﻌﺎﻭﻳﻪ ﺭﻗﻴﺘﻠﻬﺎ ﻣﻨﻬﺎ ﻫﻠﺒﻪ : ﻳﻜﻮﻥ ﺍﺣﺴﻦ ..
ﺣﻨﺎﻥ ﻭﺟﻌﺘﻬﺎ ﺍﻟﻜﻠﻤﻪ ﺑﺲ ﺍﻇﺎﻫﺮﺕ ﺑﺎﻟﻌﻜﺲ : ﺗﻤﺎﻡ .... ﺍﻟﺴﻼﻡ ﻋﻠﻴﻜﻢ ... ﻭﺧﺪﺕ ﺷﻨﻄﺘﻬﺎ ﻭﻣﺸﺖ ﻣﻦ ﻗﺪﺍﻣﻪ ﻭﺧﻼﺗﻪ ﻳﻨﺤﺮﻕ ﻣﻦ ﺩﺍﺧﻞ ﻭﻗﻠﺒﻪ ﻳﺪﻕ ﺑﻌﻨﻒ ﺷﺪﻳﺪ ... ﻭﻳﻠﻮﻡ ﻓﻴﻪ ﻉ ﺍﻟﻠﻲ ﻗﺎﻟﻪ ... ﻭﻳﻘﻮﻝ ﺍﻟﺤﻘﻬﺎ .. ﺍﻟﺤﻘﻬﺎ ﺍﺭﺟﻮﻙ ﺍﻟﺤﻘﻬﺎ .. ﻭﻋﻘﻠﻪ ﻳﻘﻮﻟﻪ ﻣﺎﺗﺴﻤﻌﻼﺵ ﻫﺎﺩﻱ ﺍﻫﺎﻧﺎﺗﻚ ﻫﻠﺒﻪ ﻭﺍﻧﺖ ﻋﻤﺮﻙ ﻣﺎﺳﻤﺤﺖ ﻟﺤﺪ ﻳﻬﻴﻨﻚ ... ﻭﻃﺒﻌﺎ ﻷﻧﻪ ﻛﺎﻥ ﻣﻀﺎﻳﻖ ﻣﻨﻬﺎ ﺳﻤﻊ ﻟﻌﻘﻠﻪ ﻭﺧﻼ ﻗﻠﺒﻪ ﻳﻨﻌﺼﺮ ﻣﻦ ﺍﻷﻟﻢ ..
ﻣﺎﻫﻨﺎﺷﻲ ﻗﻠﺒﻪ ﻭﻻﺧﻼﻩ ﻳﺮﻛﺰ ﻓﻲ ﺧﺪﻣﺘﻪ .. ﺑﺲ ﻣﻊ ﻫﺬﺍ ﺣﺎﻭﻝ ﺟﻬﺪﻩ ﻳﺘﺠﺎﻫﻠﻪ ... ﻭﻗﻌﺪ ﻫﻜﻲ ﻟﻴﻦ ﺣﻞ ﺍﻟﻤﺴﺎﺀ ﻭﻃﻠﻊ ﻣﻦ ﺍﻟﺸﺮﻛﻪ .. ﻛﺎﻥ ﻳﺸﻮﻑ ﻓﻲ ﺃﻳﻤﻦ ﻳﺮﻛﺐ ﻓﻲ ﺳﻴﺎﺭﺗﻪ ﻭﻳﺘﻜﻠﻢ ﻓﻲ ﺍﻟﺘﻠﻴﻔﻮﻥ ﻭﻫﻮ ﻳﻀﺤﻚ .. ﻭﻋﻘﻠﻪ ﻗﻌﺪ ﻳﻮﺩﻱ ﻭﻳﺠﻴﺐ ..
ﺟﺎﺗﻪ ﺳﻴﺎﺭﺗﻪ ﻭﺭﻛﺐ .. ﻭﺗﺤﺮﻙ ﺑﻴﻪ ﺍﻟﺴﻮﺍﻕ .. ﻃﻮﻝ ﺍﻟﻄﺮﻳﻖ ﻭﻫﻮ ﻳﻔﻜﺮ ﻓﻲ ﺍﻟﻜﻼﻡ ﺍﺍﻟﻠﻲ ﺻﺎﺭ ﺑﻴﻨﻪ ﻭﺑﻴﻨﻬﺎ ﻭﻳﻠﻮﻡ ﻓﺮﻭﺣﻪ ﻉ ﺍﻟﻠﻲ ﻗﺎﻟﻪ ﻭﺩﺍﺭﻩ ... ﺑﺲ ﻳﻘﻮﻝ ﻓﻲ ﻧﻔﺴﻪ " ﻫﻲ ﻣﺶ ﻣﺘﻘﺒﻠﺘﻨﻲ ﺍﺳﺎﺳﺎ .. ﻋﻼﺵ ﺗﻌﺎﻣﻞ ﻓﻲ ﺍﻟﻜﻞ ﻣﻌﺎﻣﻠﻪ ﻛﻮﻳﺴﻪ ﺇﻻ ﺍﻧﻲ ﻣﻦ ﻗﺒﻞ ﺣﺘﻰ ﻣﺎﻧﻌﺒﺮﻟﻬﺎ ﻋﻦ ﺇﻋﺠﺎﺑﻲ ﺑﻴﻬﺎ !! ﺗﺸﻮﻑ ﻓﻴﺎ ﻛﺎﻓﺮ ﺷﻜﻠﻬﺎ .. ﺑﺲ ﺍﻧﻲ ﻣﺶ ﻫﻜﻲ .. ﺍﺍﺍﻩ .. ﻣﺎﻻ ﻟﻮ ﻋﺮﻓﺖ ﺣﻘﻴﻘﺔ ﻣﺸﺎﻋﺮﻱ ﺍﺗﺠﺎﻫﻬﺎ ﺷﻦ ﻛﺎﻧﺖ ﺩﺍﺭﺕ !!!"
ﻭﻓﻲ ﻣﻮﺟﻪ ﻫﺎﻷﻓﻜﺎﺭ ﺍﻟﻠﻲ ﺗﺎﺧﺪﻩ ﻭﺗﺠﻴﺒﻪ ﻣﺎﺍﺳﺘﺎﻗﻀﺶ ﺑﺮﻭﺣﻪ ﺇﻻ ﻭﺍﻟﺴﻮﺍﻕ ﻓﺎﺗﺢ ﺍﻟﺒﺎﺏ ﻭﻳﻘﻮﻟﻪ : ﺳﻴﺪ ﻣﻌﺎﻭﻳﻪ ﻭﺻﻠﻨﺎ ..
ﻣﻌﺎﻭﻳﻪ ﺗﻨﻬﺪ ﻭﻃﻠﻊ ﻣﻦ ﺍﻟﺴﻴﺎﺭﺓ .. ﺗﻮﺟﻪ ﻟﻠﻘﺼﺮ .. ﺭﻛﺐ ﺍﻟﺪﺭﻭﺝ ﻭﻓﺘﺢ ﺍﻟﺒﺎﺏ ﺟﺎﺗﻪ ﺍﻟﺨﺪﺍﻣﻪ ..
ﺍﻟﺨﺪﺍﻣﻪ : ﺍﺳﺘﺎﺫ ﻣﻌﺎﻭﻳﻪ ﺍﻷﻧﺴﻪ ﻣﻬﺎ ﻗﺎﻟﺖ ﺍﻭﻝ ﻣﺎﺗﻮﺻﻞ ﺗﺮﻛﺒﻠﻬﺎ ﻓﻮﻕ ..
ﻣﻌﺎﻭﻳﻪ ﺍﺳﺘﻐﺮﺏ : ﺗﻤﺎﻡ .. ﻣﺸﺖ ﺍﻟﺨﺪﺍﻣﻪ ﻭﻣﻌﺎﻭﻳﻪ ﺭﻛﺐ ﻓﻮﻕ ﺍﻭﻝ ﻣﺎﻭﺻﻞ ﻓﻲ ﺍﻟﺪﻭﺭ ﺍﻟﺘﺎﻧﻲ ﻟﻘﻲ ﺑﻨﺘﻪ ﻣﻘﻌﻤﺰﺓ ﻓﻲ ﺍﻟﺼﺎﻟﻮﻥ ﺍﻟﻠﻲ ﻑ ﺍﻟﺼﺎﻟﻪ ﻛﺎﻧﺖ ﺗﺸﺒﺤﻠﻪ ﻓﻲ ﺷﺒﺤﻪ ﻏﺮﻳﺒﻪ ﻭﻋﻴﻮﻧﻬﺎ ﺣﻤﺮ ﻣﻦ ﺍﻟﺒﻜﻲ .. ﻣﻊ ﺍﺳﺘﻐﺮﺍﺑﻪ ﺧﺎﻑ .. ﻗﺪﻣﻠﻬﺎ ..
ﻣﻌﺎﻭﻳﻪ : ﺧﻴﺮﻩ ﻭﺟﻬﻚ ﻫﻜﻲ ﺷﻦ ﺻﺎﻳﺮ ..
ﻣﻬﺎ ﺑﻨﺒﺮﺓ ﺣﺎﺩﻩ ﻭﻧﻈﺮﻩ ﺍﻛﺜﺮ ﺣﺪﻩ : ﻣﺎﻣﺎ .. ﻛﻴﻒ ﻣﺎﺗﺖ ..
ﻣﻌﺎﻭﻳﻪ ﺗﻘﻮﻝ ﻧﺰﻟﺖ ﻋﻠﻴﻪ ﺻﺎﻋﻘﻪ ﻟﻤﺎ ﺳﻤﻊ ﺳﺆﺍﻟﻬﺎ ﺗﺴﻠﻞ ﻟﻘﻠﺒﻪ ﺍﻟﺨﻮﻑ ﻭﻗﺎﻝ ﺑﻌﺪ ﺑﻠﻊ ﺭﻳﻘﻪ : ﺗﻌﺮﻓﻲ .. ﺣﺎﺩﺙ ..
ﻣﻬﺎ : ﻛﻴﻒ ﻛﺎﻥ ﺍﻟﺤﺎﺩﺙ ..
ﻣﻌﺎﻭﻳﻪ ﻣﺘﻮﺗﺮ ﻭﺧﺎﻳﻒ ﻭﺑﻌﺼﺒﻴﻪ ﻗﺎﻝ : ﻋﻼﺵ ﺗﺴﺄﻟﻲ ﻓﻬﺎﻷﺳﺌﻠﻪ ..
ﻣﻬﺎ ﻧﺎﺿﺖ ﻭﻗﺪﻣﺘﻠﻪ ﻭﻗﺎﻟﺖ : ﻣﺎﻣﺎ ﻛﻴﻒ ﻣﺎﺗﺖ ... ﻛﻴﻒ ﺩﺍﺭﺕ ﺍﻟﺤﺎﺩﺙ .. ﺟﺎﻭﺑﻨﻲ ﻭﻣﺎﺗﻜﺬﺑﺶ ﻋﻠﻴﺎ ...
ﻣﻌﺎﻭﻳﻪ : ﺑﻨﺖ ... ﺷﻦ ﺟﺎﻙ ﺍﺭﺟﻌﻲ ﻟﻌﻘﻠﻚ ﻭﺧﺸﻲ ﺍﺭﻗﺪﻱ ﻣﺶ ﻧﺎﻗﺼﻚ .. ﻭﻫﻮ ﺟﺎﻱ ﺑﻴﻤﺸﻲ ﻫﺎﺭﺏ ﻣﻨﻬﺎ .. ﺷﺪﺍﺗﻪ ﻣﻦ ﻳﺪﻩ ..
ﻣﻬﺎ ﻭﺩﻣﻮﻋﻬﺎ ﻳﻨﺰﻟﻮﺍ : ﻣﺎﻣﺎ ﺍﻧﺘﺤﺮﺕ ..
ﻣﻌﺎﻭﻳﻪ ﺍﻟﺪﻡ ﺟﻤﺪ ﻑ ﻋﺮﻭﻗﻪ ﻭﻣﺎﻗﺪﺭﺵ ﻳﺸﺒﺤﻠﻬﺎ ..
ﻣﻬﺎ ﺑﻌﻴﺎﻁ : ﻣﺎﻣﺎ ﻣﺎﺗﺖ ﻣﻨﺘﺤﺮﻩ .. ﻣﻨﺘﺤﺤﺤﺤﺮﻩ .. ﻭﺍﻧﺖ ﺍﻟﺴﺒﺐ ..
ﻣﻌﺎﻭﻳﻪ ﺍﻟﺨﻮﻑ ﺳﻴﻄﺮ ﻋﻠﻴﻪ .. ﺷﺒﺤﻠﻬﺎ ..
ﻣﻌﺎﻭﻳﻪ ﺑﻤﻼﻣﺢ ﺃﻟﻢ : ﻻﺍﺍ ﺍﻧﻲ ﻣﺎﺩﺧﻠﻴﺶ .. ﻣﺎﻟﻴﺶ ﺩﺧﻞ ﻫﻲ ﺗﺒﻲ ﺗﻤﻮﺕ ﻫﻲ ﺍﺧﺘﺎﺭﺕ ﺗﻤﻮﺕ ..
ﻣﻬﺎ ﺑﻌﻴﺎﻁ : ﻭﻋﻼﺵ ﺍﺧﺘﺎﺭﺕ ﺗﻤﻮﺕ .. ﻛﺎﻥ ﻣﺶ ﻣﻨﻚ ﺍﻧﺖ ﻭﻣﻦ ﻣﻌﺎﻣﻠﺘﻚ ﻟﻴﻬﺎ .. ﻣﻌﺎﻣﻠﺘﻚ ﺍﻟﻠﻲ ﻛﻨﺖ ﺗﻌﺎﻣﻞ ﻓﻴﺎ ﺑﻴﻬﺎ ﺍﻟﻠﻲ ﺧﻠﺘﻨﻲ ﻧﺘﻤﻨﻰ ﺍﻟﻤﻮﺕ ﺯﻳﻬﺎ ...
ﻣﻌﺎﻭﻳﻪ ﻗﻌﺪﺕ ﺗﻤﺮ ﻋﻠﻴﻪ ﻣﺸﺎﻫﺪ ﻣﻦ ﻫﺬﺍﻛﺎ ﺍﻟﻴﻮﻡ
< ﺧﻠﻴﺘﻨﻲ ﻧﺘﻤﻨﻰ ﺍﻟﻤﻮﻭﻭﺕ .. ﻧﺒﻲ ﻧﻤﻮﻭﻭﻭﺕ >>
ﻣﻌﺎﻭﻳﻪ ﻭﺩﻣﻮﻋﻪ ﻳﻨﺰﻟﻮﺍ : ﻫﻲ .. ﻫﻲ .. ﻫﻲ .. ﻫﻜﻲ ﺗﺒﻲ ﺍﻧﻲ ﻣﺎﺩﺧﻠﻴﺶ ﻣﺎﺩﺧﻠﻴﺶ ..
ﻣﻬﺎ ﺗﺒﻜﻲ ﺑﻬﺴﺘﻴﺮﻳﺎ : ﺣﺮﻣﺘﻨﻲ ﻣﻨﻬﺎ .. ﺍﻧﺖ ﻗﺘﻠﺘﻬﺎ ﻭﺣﺮﻣﺘﻨﻲ ﻣﻨﻬﺎ ..
ﻣﻌﺎﻭﻳﻪ ﺑﻌﻴﺎﻁ : ﻣﺎﺗﻘﻮﻟﻴﻴﻴﻴﺶ ﻗﺘﻠﺘﻬﺎ ﻣﻌﺎﺵ ﺗﻘﻮﻟﻴﻴﻴﻴﻬﺎ ..
ﺍﻟﺨﺪﻡ ﻛﻠﻬﻢ ﻛﺎﻧﻮ ﻓﻲ ﺍﻟﺪﺭﻭﺝ ﻭﻳﺴﻤﻌﻮﺍ ﻭﻣﺼﺪﻭﻣﻴﻦ ﻭﻣﺮﻳﻢ ﻛﺎﻧﺖ ﺗﺒﻜﻲ ﻷﻧﻬﺎ ﻗﺪﻳﻤﻪ ﻓﻲ ﺍﻟﻤﻜﺎﻥ ﻭﻛﺎﻧﺖ ﺷﺎﻫﺪﻩ ﻉ ﻫﺬﺍﻛﺎ ﺍﻟﻴﻮﻡ ..
ﻣﻬﺎ ﺑﻬﺴﺘﻴﺮﻳﺎ : ﻻ ﺍﻧﺖ .. ﻗﺘﻠﺘﻬﺎ ﺍﻧﺖ ..
ﻣﻌﺎﻭﻳﻪ ﻏﻤﺾ ﻋﻴﻮﻧﻪ ﺑﺸﺪﻩ : ﺍﺳﻜﺘﻲ ..
ﻣﻬﺎ : ﻳﺎﻋﺪﻳﻢ ﺍﻟﺮﺣﻤﻪ ﻳﺎﻟﻠﻲ ﻣﺎﺗﻌﺮﻓﺶ ﺭﺑﻲ ...
ﻣﻌﺎﻭﻳﻪ : ﺍﺳﻜﻜﻜﻜﻜﻜﺘﻲ .
ﻣﻬﺎ ﻭﻫﻲ ﺗﻌﻴﻂ : ﻭﻓﻮﻗﻬﺎ ﺟﺎﻳﺐ ﻫﺪﻳﻜﺎ ﺍﻟﻘﺬﺭﻩ ﻭﻣﺒﻴﺘﻬﺎ ﻣﻌﺎﻙ ﻓﻲ ﺍﻟﺤﻮﺵ ..
ﻣﻌﺎﻭﻳﻪ ﻓﺘﺢ ﻋﻴﻮﻧﻪ : ﺳﻜﺮﺭﺭﻱ ﻓﻤﻤﻤﻤﻚ .
ﻣﻬﺎﻗﻌﺪﺕ ﺗﺒﻜﻲ .. ﺑﻌﺪﻳﻦ ﺭﻓﻌﺖ ﻋﻴﻮﻧﻬﺎ ﻓﻴﻪ ﻭﻗﺎﻟﺖ : ﻉ ﻗﺪ ﻣﺎﺩﺭﺕ ﻓﻴﺎ ﺯﻣﺎﻥ ﻣﺎﻗﺪﺭﺗﺶ ﻧﻜﺮﻫﻚ .. ﺑﺲ ﺗﻮ ﺍﻧﻲ ﻛﺮﻫﺘﻚ .. ﻷﻧﻚ ﻗﺘﻠﺖ ﺍﻣﻲ ﻭﺣﺮﻣﺘﻨﻲ ﻣﻨﻬﺎ ﻧﻜﻜﻜﻜﻜﺮﻫﻚ ..
ﺿﺮﺑﻬﺎ ﻛﻒ ...
ﺳﻤﻌﻮﺍ ﺻﻮﺗﻪ ﺍﻟﺨﺪﻡ ﻭﺗﺄﻟﻤﻮﺍ ...
ﻣﻬﺎ ﻗﻌﺪﺕ ﺗﺸﺒﺤﻠﻪ .. ﻭﻫﻮ ﻳﺸﻮﻓﻠﻬﺎ ﺑﺼﺪﻣﻪ .. ﻫﻲ ﻣﺸﺖ ﺗﺠﺮﻱ ﻟﺪﺍﺭﻫﺎ .. ﻭﻫﻲ ﺗﺒﻜﻲ ﺑﻌﻴﺎﻁ ﻭﻫﻮ ﺍﺳﺘﺎﻗﺾ ﻭﻭﻣﺸﻲ ﻭﺭﺍﻫﺎ ﻳﺠﺮﻱ ..
ﺧﺸﺖ ﻣﻬﺎ ﺳﻜﺮﺕ ﻉ ﺭﻭﺣﻬﺎ ﺍﻟﺪﺍﺭ ﺑﺎﻟﻤﻔﺘﺎﺡ ﻭﻗﻌﺪﺕ ﺗﺒﻜﻲ ﻭﻣﻨﻬﺎﺭﻩ ...
ﺍﻱ ﻭﺣﺪﻩ ﻟﻤﺎﺗﻜﻮﻥ ﻓﻲ ﻣﻜﺎﻥ ﻣﻬﺎ ﻭﻋﺎﺷﺖ ﺍﻟﻠﻲ ﻋﺎﺷﺎﺗﻪ ﻓﻲ ﺳﻦ ﺻﻐﻴﺮ ﻭﻗﺎﻋﺪﻩ ﺗﻮﺍﺟﻪ ﻉ ﻗﺪ ﻣﺎﺗﻘﺪﺭ ﻭﺗﺘﻐﻠﺐ ﻉ ﺃﻻﻣﻬﺎ ﻭﺗﺤﺎﻭﻝ ﺗﻨﺴﻰ ﺍﻟﺤﺮﻣﺎﻥ ﺍﻟﻌﺎﻃﻔﻲ ﺍﻟﻠﻲ ﻛﺎﻧﺖ ﻋﺎﻳﺸﻪ ﻓﻴﻪ ﻟﻤﺎ ﺗﻮﺍﺟﻪ ﺣﻘﻴﻘﻪ ﺻﺎﺩﻣﻪ ﺯﻱ ﻫﺎﺩﻱ ﺣﺘﻨﻬﺎﺭ ﻭﻏﻴﺮ ﻫﻜﻲ ﻫﻲ ﻛﺎﻧﺖ ﺗﺸﻮﻑ ﻓﻲ ﺑﻮﻫﺎ ﻛﻞ ﻋﺎﺋﻠﺘﻬﺎ ﺣﺘﻰ ﻟﻤﺎ ﻛﺎﻥ ﺑﻌﻴﺪ ﻋﻨﻬﺎ ﻭﻟﻤﺎ ﺗﻐﻴﺮ ﻣﻌﺎﻫﺎ ﻛﺎﻧﺖ ﺗﺪﻋﻲ ﺭﺑﻬﺎ ﻟﻴﻞ ﻧﻬﺎﺭ ﺍﻥ ﺍﻟﻠﻲ ﻫﻲ ﻓﻴﻪ ﻳﺪﻭﻡ ﻭﻳﺰﻳﺪ .. ﺑﺲ ﺍﻟﻠﻲ ﻋﺮﻓﺎﺗﻪ ﻋﻦ ﺑﻮﻫﺎ ﻭﻭﺟﻮﺩ ﺍﻗﺒﺎﻝ ﻓﻲ ﺍﻟﺤﻮﺵ ﻟﻴﻠﻪ ﻛﺎﻣﻠﻪ ﺧﻼ ﻋﻘﻠﻬﺎ ﻳﺼﻮﺭﻟﻬﺎ ﻫﻠﺒﻪ ﺣﺎﺟﺎﺕ ﻭﻓﻮﻕ ﻣﻦ ﻫﻜﻲ ﻟﻤﺎ ﺿﺮﺑﻬﺎ ﺍﻟﺤﻜﺎﻳﻪ ﺍﺳﻮﺩﺕ ﻓﻲ ﻧﻈﺮﻫﺎ ﺑﺰﻳﺎﺩﻩ ... ﻭﺍﻟﺸﻴﻄﺎﻥ ﺍﻧﺘﻬﺰ ﺍﻟﻔﺮﺻﻪ ﻭﻛﺒﺮﻫﺎ ﻓﻲ ﺭﺍﺳﻬﺎ ﺍﻛﺜﺮ ﻭﺃﻛﺜﺮ ..
ﻣﻌﺎﻭﻳﻪ ﺑﺨﻮﻑ : ﻣﻬﺎ .. ﺑﺎﺑﺎ ﺍﻓﺘﺤﻲ .. ﺍﻧﻲ ﺍﺳﻒ .. ﺍﺳﻒ ..
ﻣﻬﺎ ﺑﻌﻴﺎﻁ : ﺍﺳﻜﻜﺖ ﻣﻌﺎﺵ ﻧﺒﻲ ﻧﺸﻮﻭﻭﻓﻚ ﻣﻌﺎﺵ ﻧﺒﻲ ﻧﺴﻤﻊ ﺣﺴﻚ ... ﻧﻜﺮﺭﺭﺭﻫﻚ ﻧﻜﺮﺭﺭﺭﻫﻚ ..
ﻣﺮﻳﻢ ﺟﺎﺗﻪ ..
ﻣﻌﺎﻭﻳﻪ ﻭﺩﻣﻮﻋﻪ ﺗﻨﺰﻝ : ﻣﺮﻳﻢ ﺍﻧﻲ ﻣﺶ ﻣﺮﺗﺎﺡ ﻳﺎﻣﺮﻳﻢ .. ﺣﺎﻭﻟﻲ ﻣﻌﺎﻫﺎ ..
ﻣﺮﻳﻢ ﻭﻫﻲ ﺗﺒﻜﻲ ﻭﺧﺎﻳﻔﻪ ﺍﻃﻖ ﺍﻟﺒﺎﺏ : ﺣﺒﻴﺒﺘﻲ ﻣﻬﺎ ﺍﻓﺘﺤﻲ ﻧﺒﻲ ﻧﻜﻠﻤﻚ ..
ﻣﻬﺎ : ﻣﺎﻧﺒﻲ ﻧﻜﻠﻠﻠﻠﻠﻢ ﺣﺪ ﺧﻠﻮﻭﻭﻭﻧﻲ ﺧﻠﻮﻭﻭﻭﻭﻧﻲ ..
ﻣﻌﺎﻭﻳﻪ ﻳﻀﺮﺏ ﺑﺈﻳﺪﻩ ﻉ ﺭﺍﺳﻪ ﺑﺎﻟﻘﻮﺓ ...
ﻭﻣﺮﻳﻢ ﺗﺸﺒﺤﻠﻪ ﻭﺧﺎﻳﻔﻪ : ﻳﺎﺑﻨﺘﻲ ﺑﻮﻙ ﺑﻴﻤﻮﺕ ﻣﻦ ﺧﻮﻓﻪ ﻋﻠﻴﻚ ..
ﻣﻬﺎ : ﻫﺬﺍﺍﺍﺍﺍﺍﺍ ﻣﺎﻳﺤﺴﺸﺶ ﺑﺤﺪ ﻭﻻﻳﺨﺎﺍﺍﻑ ﻋﻠﻰ ﺣﺪ ﻫﺬﺍﺍﺍﺍ ﻣﺎﻳﺤﺐ ﺣﺪﺩﺩﺩ
ﻣﻌﺎﻭﻳﻪ ﺗﻠﻔﺖ ﻉ ﺍﻟﺤﻴﻂ ﻭﻗﻌﺪ ﻳﻀﺮﺏ ﻓﻲ ﺭﺍﺳﻪ ..
ﻣﺮﻳﻢ ﺑﺼﺪﻣﻪ : ﺳﻴﺪ ﻣﻌﺎﻭﻳﻪ .. ﻃﻘﺖ ﻉ ﺍﻟﺒﺎﺏ .. ﻳﺎﺑﻨﺘﻲ ﺍﻓﺘﺤﻲ ﺣﺘﻘﺘﻠﻲ ﺑﻮﻙ ..
ﻣﻬﺎ ﺑﻬﺴﺘﻴﺮﻳﺎ : ﻫﺬﺍﻣﺎ ﻳﻤﻮﺗﺶ .. ﺍﻧﻲ ﺍﻟﻠﻲ ﺑﻨﻤﻮﺕ ﺍﻧﻲ
ﻣﻌﺎﻭﻳﻪ ﺳﻤﻊ ﻛﻠﻤﻪ ﺑﻨﻤﻮﺕ ﻭﻗﻌﺪﺕ ﺍﺷﺒﺎﺡ ﺍﻟﺬﻛﺮﻱ ﺍﻟﺴﻮﺩﺍ ﻧﺘﺨﻄﻒ ﻓﻴﻪ ..
< ﺍﻧﻲ ﺑﻨﻤﻮﻭﻭﺕ ﺑﻨﻤﻮﻭﻭﺕ >>...
ﻣﻌﺎﻭﻳﻪ ﺑﻌﺪ ﻣﺮﻳﻢ ﻭﻗﻌﺪ ﻳﻘﻮﻝ : ﻣﻬﺎ ﻳﺎﺑﺎﺑﺎ .. ﺍﺳﻤﻌﻴﻨﻲ .. ﺍﻧﻲ ﺗﻮ ﻧﺤﻜﻴﻠﻚ ﻛﻞ ﺷﻲ ...
ﻻﺭﺩ ..
ﻣﻌﺎﻭﻳﻪ ﺑﺨﻮﻑ : ﻣﻬﺎ ...
ﻻﺭﺩ ..
ﻣﺮﻳﻢ ﻃﻘﺖ ﺑﻘﻮﻩ : ﻣﻬﺎﺍﺍﺍ ...
ﻻﺭﺩ ..
ﻫﻮ ﻣﻌﺎﺵ ﻳﺸﻮﻑ ﻓﻲ ﺷﻲ .. ﻭﺧﺮ ﻭﻗﺪﻡ ﺑﺴﺮﻋﻪ ﻳﺤﺎﻭﻝ ﻳﻜﺴﺮ ﺍﻟﺒﺎﺏ ﺑﺲ ﻛﺎﻥ ﻧﺎﺳﻲ ﺍﻧﻲ ﺑﻴﺒﺎﻥ ﺍﻟﻐﺮﻑ ﻓﻲ ﻫﺎﻟﻘﺼﺮ ﻭﺃﻗﻔﺎﻟﻬﺎ ﻣﻦ ﺍﻗﻮﻯ ﻭﺍﻣﺘﻦ ﺍﻷﻧﻮﺍﻉ ...
ﻣﻌﺎﻭﻳﻪ ﻗﻌﺪ ﺯﻱ ﺍﻟﻤﺠﻨﻮﻥ ﻳﻘﺮﺑﻊ ﻓﻴﻪ ﺑﺲ ﺑﻼ ﻓﺎﻳﺪﻩ .. ﻭﻭﻣﺮﻳﻢ ﺗﺒﻜﻲ ﻭﻣﻨﻬﺎﺭﻩ . ﺷﻮﻳﻪ ﻭﺟﺘﻬﻢ ﻭﺣﺪﻩ ﻣﻦ ﺍﻟﺨﺪﻡ ..
ﺍﻟﺨﺪﺍﻣﻪ : ﺍﻟﺤﻘﻮﺍ ﺍﻵﻧﺴﻪ ﻣﻬﺎ ﺗﺒﻲ ﺗﻨﻘﺰ ﻣﻦ ﺍﻟﺒﻼﻛﻮﻧﻪ ..
ﻣﺮﻳﻢ ﺷﻬﻘﺖ ..
ﻭﻣﻌﺎﻭﻳﻪ ﻭﺩﻣﻮﻋﻪ ﻳﻨﺰﻟﻮﺍ : ﻻﺍﺍﺍﺍﺍﺍﺍﺍﺍﺍﺍﺍﺍﺍ
***
ﺗﻮ ﻧﺎﺧﺪ ﺍﺟﺎﺯﺓ ﻭﻧﻤﺸﻮﺍ ..
ﻟﺒﻨﻰ ﺑﻔﺮﺣﻪ : ﻧﺤﺒﺒﺒﺒﻚ .. ﺍﻣﻮﻭﻭﻭﻭﺍﺍﺍﺍﺍﻩ ..
ﺣﻨﺎﻥ : ﻫﻬﻬﻬﻬﻬﻬﻬﻬﻪ ... ﺷﺒﺤﺖ ﻟﺮﻫﻒ .. ﺷﻨﻮ ﻳﺎﺭﻫﻒ ﻣﺎﺗﺒﻴﺶ ﺗﺴﺎﻓﺮﻱ؟ !
ﺭﻫﻒ ﺍﺑﺘﺴﻤﺖ ﻣﺠﺎﻣﻠﻪ : ﻻ ﻧﺒﻲ .. ﻧﺒﻲ ﻧﻐﻴﺮ ﺟﻮ
ﺣﻨﺎﻥ ﺗﺸﺒﺤﻠﻬﺎ ﺑﻀﻴﻖ : ﻛﻮﻳﺲ ..
ﺭﻥ ﻣﻮﺑﺎﻳﻞ ﺣﻨﺎﻥ ..
ﺣﻨﺎﻥ : ﺑﺎﻟﻠﻪ ﻋﻠﻴﻚ ﻟﺒﻨﻰ ﺟﻴﺒﻬﻮﻟﻲ ﻣﻦ ﺍﻟﻜﻮﺟﻴﻨﻪ ..
ﻧﺎﺿﺖ ﻟﺒﻨﻰ ﻭﻣﺸﺖ ﺑﺘﺠﻴﺒﻪ ﺷﺎﻓﺖ ﺍﻹﺳﻢ ﺍﻟﻠﻲ ﻉ ﺍﻟﺸﺎﺷﻪ ﺗﻔﺎﺟﺌﺖ ﻭﺻﻠﺖ ﻑ ﺍﻣﻬﺎ .. ﻭﻣﺪﺗﻬﻮﻟﻬﺎ .. ﺣﻨﺎﻥ ﻟﻤﺎ ﺷﺎﻓﺖ ﺍﻹﺳﻢ ﺍﻧﺼﺪﻣﺖ .. ﻗﻌﺪﺕ ﺗﺸﺒﺢ ﻭﺧﻼﺹ .. ﻟﻴﻦ ﻓﺼﻞ ..
ﻟﺒﻨﻰ : ﻋﻼﺵ ﻣﺎﺭﺩﺗﻴﺶ ..
ﻛﻴﻒ ﺟﺖ ﺑﺘﺘﻜﻠﻢ ﺣﻨﺎﻥ ﺭﻥ ﻣﺮﺓ ﺗﺎﻧﻴﻪ ..
ﻟﺒﻨﻰ : ﺭﺩﻱ ﺍﻛﻴﺪ ﺷﻲ ﺿﺮﻭﺭﻱ ..
ﺣﻨﺎﻥ ﺷﺒﺤﺖ ﻟﺒﻨﺎﺗﻬﺎ ﻭﺑﺘﺮﺩﺩ ﻓﺘﺤﺖ ﺍﻟﺨﻂ : ﻧﻌﻢ ...
ﻣﻌﺎﻭﻳﻪ ﺑﻬﻠﻊ : ﺍﺭﺟﻮﻭﻙ ﺗﻌﺎﻟﻲ ﻣﺤﺘﺎﺟﻚ ...
ﺣﻨﺎﻥ ﻣﺎﺗﺖ ﻣﻦ ﺧﻮﻓﻬﺎ : ﺧﻴﺮﻙ ..
ﻣﻌﺎﻭﻳﻪ : ﻣﻬﺎﺍﺍ ﺑﻨﺘﻲ ﺗﺒﻲ ﺗﻤﻮﺕ ﻭﺗﻘﺘﻠﻨﻲ ﺑﺎﻟﺤﺴﺮﻩ ..
ﺣﻨﺎﻥ ﻓﺰﺕ ﻃﻮﻝ : ﺍﻧﻲ ﺟﺎﻳﻪ .. ﺻﻜﺮﺕ .. ﻭﻣﺸﺖ ﻃﻮﻝ ﻟﻠﺸﻤﺎﻋﻪ ﻟﺒﺴﺖ ﻋﺒﺎﻳﺘﻬﺎ ﻭﺣﻄﺖ ﻭﺷﺎﺣﻬﺎ ﻉ ﺭﺍﺳﻬﺎ ..
ﺍﻟﺒﻨﺎﺕ ﺧﺎﻓﻮﺍ ﻫﻠﺒﻪ ..
ﻟﺒﻨﻰ : ﻣﺎﻣﺎ ﺷﻦ ﻓﻲ ..
ﺣﻨﺎﻥ ﺷﺒﺤﺘﻠﻬﺎ ﻭﻣﺸﺖ ﺧﺪﺕ ﺍﻟﻤﻔﺎﺗﻴﺢ ﻭﻃﻠﻌﺖ ﻭﺻﻜﺮﺕ ﺍﻟﺒﺎﺏ ﻭﺭﺍﻫﺎ ..
ﺭﻫﻒ : ﻣﻨﻮ ﺍﻟﻠﻲ ﺍﺗﺼﻞ ..
ﻟﺒﻨﻰ ﻭﻫﻲ ﺗﺸﻮﻑ ﻟﻠﺒﺎﺏ ﻭﻗﻠﺒﻬﺎ ﻗﺎﺑﻀﻬﺎ : ﻋﻤﻲ ﻣﻌﺎﻭﻳﻪ ..
***
ﻛﺎﻧﻮﺍ ﺍﻟﺨﺪﻡ ﻭﺍﻗﻔﻴﻦ ﺑﺮﺍ ﻳﺸﻮﻓﻮﺍ ﻓﻴﻬﺎ ﻭﻫﻲ ﻭﺍﻗﻔﻪ ﻉ ﺣﺎﻓﺔ ﺍﻟﺘﺮﺍﺱ ﻭﺗﺸﺒﺢ ﺑﻨﻈﺮﺓ ﺻﺪﻣﻪ ﻣﻤﺰﻭﺟﻪ ﺑﺎﻷﻟﻢ .. ﺑﻴﻦ ﻋﻴﻮﻧﻬﺎ ﺣﻨﺎﻫﺎ ﺍﻟﻠﻲ ﻛﺎﻧﺖ ﻭﻳﻦ ﻣﺎﺗﺠﻲ ﺳﻴﺮﺓ ﺍﻣﻬﺎ ﺗﺒﻜﻲ ﺑﻘﻬﺮ .. ﻭﻛﻼﻡ ﺧﺎﻟﻬﺎ ﺍﺧﺮ ﻣﺮﻩ ﺍﻟﻠﻲ ﻗﺎﻟﻪ ﺑﻌﺪ ﻣﻮﺕ ﺣﻨﺎﻫﺎ .. ﺗﻮﺍ ﺑﺲ ﻓﻬﻤﺖ ﻣﻌﻨﺎﻩ .. ﻛﺮﻫﺖ ﺑﻮﻫﺎ ﻹﻧﻬﺎ ﺣﺮﻣﻬﺎ ﻣﻦ ﺍﻣﻬﺎ ﺍﻣﻬﺎ ﺍﻟﻠﻲ ﺍﺣﺘﺎﺟﺖ ﻭﺟﻮﺩﻫﺎ .. ﺍﻟﻠﻲ ﻛﺎﻧﺖ ﺗﺘﻤﻨﻰ ﺗﻜﻮﻥ ﻣﻌﺎﻫﺎ ﻓﻲ ﻛﻞ ﻣﺮﺣﻠﻪ ﻣﻦ ﻣﺮﺍﺣﻞ ﺣﻴﺎﺗﻬﺎ ﺑﻜﺖ ﻉ ﻓﻘﺪﺍﻧﻬﺎ ﻫﻠﺒﻪ ﻭﻫﻲ ﻣﺎﺷﺎﻓﺘﻬﺎﺵ ﻏﻴﺮ ﻓﻲ ﺍﻟﺼﻮﺭ ﻓﻘﻂ .. ﺍﻻﻡ ﻣﺴﺘﺤﻴﻞ ﺗﺘﻌﻮﺽ ﻭﻣﻜﺎﻧﻬﺎ ﺩﻳﻤﺎ ﻳﻘﻌﺪ ﻓﺎﺿﻲ ﻟﻮ ﻏﺎﺑﺖ ﻭﻣﺎﻳﻐﻨﻲ ﺣﺪ ﻋﻦ ﻭﺟﻮﺩﻫﺎ ﻣﻦ ﺍﻟﺒﺸﺮ ..
ﻓﻲ ﺍﻟﺼﺎﻟﻮﻥ ﻣﻌﺎﻭﻳﻪ ﻛﺎﻥ ﻣﻘﻌﻤﺰ ﻭﺣﺎﻁ ﺍﻳﺪﻳﻪ ﻉ ﻭﺫﺍﻧﻪ ﺍﺻﻮﺍﺕ ﻣﺘﺪﺍﺧﻠﻪ ﻛﺎﻥ ﻳﺴﻤﻊ ﻓﻴﻬﺎ ﻣﻦ ﺍﻟﻤﺎﺿﻲ ﻭﺍﻟﺤﺎﺿﺮ ﻭﺣﺎﻟﺘﻪ ﺑﺎﻟﻮﻳﻞ ..
ﺑﺎﺏ ﺍﻟﺪﺍﺭ ﻛﺎﻥ ﻭﺍﺣﺪ ﻣﻦ ﺭﺟﺎﻟﺘﻪ ﻳﺤﺎﻭﻝ ﻳﻔﺘﺤﻪ ﺑﻌﺪ ﺟﻬﺪ ﺍﻧﻔﺘﺢ ..
ﻧﺎﺽ ﻳﺠﺮﻱ ﻭﺧﺶ ﻭﻛﺎﻧﺖ ﺧﺎﺷﻪ ﻗﺒﻠﻪ ﻣﺮﻳﻢ ..
ﻣﺮﻳﻢ : ﻣﻬﺎ ... ﻣﺎﺩﻳﺮﻳﺶ ﻫﻜﻲ ﻳﺎﺑﻨﺘﻲ ...
ﻣﻬﺎ ﻭﻻ ﻛﻠﻤﻪ ..
ﻣﻌﺎﻭﻳﻪ ﻳﺸﻮﻓﻠﻬﺎ ﻭﺑﻴﻤﻮﺕ ﻣﻦ ﺧﻮﻓﻪ : ﻣﻬﺎ .. ﻣﺎﺩﻳﺮﻳﺶ .. ﻓﻴﺎ ﻫﻜﻲ ﻳﺎﺑﻨﺘﻲ ..
ﻣﻬﺎ : ﻣﺎﻧﺒﻴﺶ ﻧﺴﻤﻊ ﺻﻮﺗﻚ .. ﻃﻠﻌﻮﻩ ...
ﻣﻌﺎﻭﻳﻪ : ﺧﻼﺹ ﺧﻼﺹ .. ﺍﻧﻲ ﻃﺎﻟﻊ ﻃﺎﻟﻊ .. ﻭﻃﻠﻊ ﻣﻦ ﺍﻟﺪﺍﺭ .. ﺑﺲ ﻣﻬﺎ ﻣﺎﺗﺮﺍﺟﻌﺘﺶ .. ﺷﺒﺤﺖ ﻟﻮﻃﺎ ﻭﺩﻣﻮﻋﻬﺎ ﻧﺰﻟﻮﺍ .. ﺑﻌﺪﻳﻦ ﺷﺒﺤﺖ ﻓﻮﻕ .. ﻭﺗﺒﻜﻲ ﺑﺄﻟﻢ .. ﻣﺎﺗﺒﻴﺶ ﺗﺠﺮﻡ ﻓﻲ ﺣﻖ ﻧﻔﺴﻬﺎ ﺑﺲ ﺍﻟﺼﺪﻣﻪ ﻭﺍﻟﺤﺰﻥ ﺍﻟﻠﻲ ﻓﻲ ﺩﺍﺧﻠﻬﺎ ﻣﺴﻴﻄﺮﻳﻦ ﻋﻠﻴﻬﺎ ..
ﺣﻨﺎﻥ ﻭﺻﻠﺖ ﻟﻠﻘﺼﺮ ﻭﻫﻲ ﻣﺶ ﻋﺎﺭﻓﻪ ﻛﻴﻒ ﻭﺻﻠﺖ ﻓﻴﻪ .. ﻧﺰﻟﺖ ﻃﻮﻝ ﻭﻗﻔﺖ ﻗﺪﺍﻡ ﺍﻟﺒﻮﺍﺑﻪ ..
ﺣﻨﺎﻥ : ﺍﻧﻲ ﺟﺎﻳﻪ ﻫﻨﻲ .. ﺑﻄﻠﺐ .. ﺑﻄﻠﺐ ﻣﻦ ﻣﻌﺎﻭﻳﻪ
ﺩﺧﻠﻮﻫﺎ ﻃﻮﻝ ...
ﻭﻫﻲ ﺧﺸﺖ ﺗﺠﺮﻱ .. ﺗﻠﻘﺎﻫﺎ ﻭﺍﺣﺪ ﻣﻦ ﺭﺟﺎﻟﺘﻪ ...
: ﺍﻻﺳﺘﺎﺩﻩ ﺣﻨﺎﻥ ..
ﺣﻨﺎﻥ : ﺍﻳﻪ ..
: ﺗﻌﺎﻟﻲ ﻣﻌﺎﻱ ..
ﻣﺸﺖ ﻭﺭﺍﻩ ﻃﻮﻝ ﻭﺭﻛﺒﺖ ﺗﺠﺮﻱ ﻭﺧﺸﺖ ﻟﻠﻘﺼﺮ ﻟﻘﺖ ﻭﺣﺪﻩ ﻣﻦ ﺍﻟﺨﺪﻡ ..
ﺍﻟﺨﺪﺍﻣﻪ ﻭﻫﻲ ﺗﺒﻜﻲ : ﺗﻌﺎﻟﻲ .. ﺭﻓﻌﺘﻬﺎ ﻟﻠﺪﺭﻭﺝ ﻭﺭﻛﺒﺖ ﻭﺣﻨﺎﻥ ﻭﺭﺍﻫﺎ ..
ﺣﻨﺎﻥ : ﺷﻦ ﺻﺎﻳﺮ ﺑﺎﻟﺰﺑﻂ ..
ﺍﻟﺨﺪﺍﻣﻪ ﺑﺒﻜﻲ : ﺍﻷﻧﺴﻪ ﻣﻬﺎ ﺗﺒﻲ ﺗﻨﺘﺤﺮ ﻭﺍﻗﻔﻪ ﻓﻲ ﺑﻼﻛﻮﻧﺘﻬﺎ ﻭﺑﺘﻨﻘﺮ ..
ﺣﻨﺎﻥ ﻣﺎﺗﺖ ﻣﻦ ﺍﻟﺨﻮﻑ ﻭﺍﺫﻛﺮﺕ ﺍﻟﻤﺮﺓ ﺍﻷﻭﻟﻰ ﺍﻟﻠﻲ ﺣﺎﻭﻟﺖ ﻓﻴﻬﺎ ﻣﻬﺎ ﺍﻹﻧﺘﺤﺎﺭ ﻓﻲ ﺍﻟﻤﺪﺭﺳﻪ .. ﺑﺲ ﻫﺬﺍﻛﺎ ﺍﻟﻮﻗﺖ ﻛﺎﻧﺖ ﻧﻔﺴﻴﺘﻬﺎ ﺗﺎﻋﺒﻪ .. ﻋﻜﺲ ﺗﻮﺍ .. ﺷﻦ ﺍﻟﻠﻲ ﺻﺎﺭ ﻓﺠﺄﺓ ﺧﻼﻫﺎ ﺍﺩﻳﺮ ﻫﻜﻲ ..
ﻭﺻﻠﺖ ﻓﻮﻕ ﺭﻓﻌﺘﻬﺎ ﺟﻬﺔ ﺍﻟﺪﺍﺭ .. ﺍﻧﺼﺪﻣﺖ ﻟﻤﺎ ﺷﺎﻓﺖ ﻣﻌﺎﻭﻳﻪ ﻭﺍﻗﻒ ﻭﻋﺎﻃﻲ ﺑﻮﺟﻬﻪ ﻟﻠﺤﻴﻂ ﻭﻳﺒﻜﻲ .. ﺍﻭﻝ ﻣﺮﺓ ﺗﺸﻮﻓﻪ ﻳﺒﻜﻲ ...
ﺣﻨﺎﻥ : ﻭﻳﻨﻬﺎ؟
ﻣﻌﺎﻭﻳﻪ ﻟﻤﺎ ﺳﻤﻊ ﺻﻮﺗﻬﺎ ﺷﺒﺤﻠﻬﺎ : ﺣﻨﺎﻥ .. ﺑﻨﺘﻲ ... ﻭﻣﻌﺎﺵ ﻗﺪﺭ ﻳﺘﻜﻠﻢ ..
ﺣﻨﺎﻥ ﺍﻧﻮﺟﻌﺖ ﻋﻠﻴﻪ ﻫﻠﺒﻪ ﻗﺪﻣﺘﻠﻪ : ﺍﻫﺪﻯ .. ﺗﻤﺎﺳﻚ .. ﺍﻧﺖ ﻣﻌﺎﻭﻳﻪ .. ﻣﺸﺖ ﻭﺧﻼﺗﻪ ﻭﺧﺸﺖ ﻟﻠﺪﺍﺭ .. ﻭﻫﻮ ﻟﻤﺎ ﺳﻤﻊ ﻛﻼﻣﻬﺎ ﺗﺄﺛﺮ ﻫﻠﺒﻪ .. ﻭﻟﺤﻘﻬﺎ ﻭﻗﻌﺪ ﻭﺍﻗﻒ ﻓﻲ ﺍﻟﺒﺎﺏ ...
ﺣﻨﺎﻥ ﻗﻌﺪﺕ ﺗﺸﻮﻑ ﻟﻤﻬﺎ ﻛﻴﻒ ﻭﺍﻗﻔﻪ ﻭﺗﺒﻜﻲ ... ﺍﻟﻤﻮﻗﻒ ﻣﺨﻴﻒ ﻭﻣﺮﻋﺐ ... ﺟﺴﻤﻬﺎ ﺗﻘﺸﻌﺮ .. ﻭﻋﻴﻮﻧﻬﺎ ﺗﻌﺒﻮﺍ ﺩﻣﻮﻉ ...
ﺣﻨﺎﻥ " ﺍﻟﻠﻬﻢ ﺍﻧﻲ ﺍﺑﺮﺃ ﻣﻦ ﺣﻮﻟﻲ ﻭﻗﻮﺗﻲ ﻭﺍﻟﺠﺄ ﻟﺤﻮﻟﻚ ﻭﻗﻮﺗﻚ "..
ﻣﻬﺎ ﻏﻤﻀﺖ ﻋﻴﻮﻧﻬﺎ ﻗﺪﻣﺖ ﺑﺮﺟﻠﻬﺎ ﺷﻮﻳﻪ ... ﻛﻠﻬﻢ ﻋﻴﻄﻮﺍ ﻭﻣﻌﺎﻭﻳﻪ ﺍﺩﺭﻕ ﻭﻫﻮ ﻣﻔﻨﺺ ﺑﻌﻴﻮﻧﻪ ﻭﻗﻠﺒﻪ ﺑﻴﻮﻗﻒ ﺧﻼﺹ ..
ﺣﻨﺎﻥ : ﻭﻳﻦ ﻣﺎﺷﻴﻪ ﻳﺎﻣﻬﺎ ...
ﻣﻬﺎ ﻟﻤﺎ ﺳﻤﻌﺖ ﺻﻮﺗﻬﺎ ﻭﻗﻔﺖ ..
ﺣﻨﺎﻥ : ﻟﻤﺎ ﺗﻠﻮﺣﻲ ﻧﻔﺴﻚ ﻣﻦ ﻫﻨﻲ ﻭﻳﻦ ﺣﺘﻤﺸﻲ ... ﻓﻜﺮﺗﻲ ...
ﻣﻬﺎ ﻗﻌﺪﺕ ﺗﺴﻤﻊ ﻓﻴﻬﺎ ﻭﺩﻣﻮﻋﻬﺎ ﺗﻨﺰﻝ ..
ﺣﻨﺎﻥ : ﺭﺑﻲ ﻳﺤﺒﻚ .. ﻋﻼﺵ ﺗﺒﻲ ﺗﺨﺴﺮﻱ ﺣﺒﻪ .. ﺗﺒﻲ ﺗﺨﺴﺮﻳﻪ ﻋﺎﺩﻱ .. ﻣﺶ ﺍﻧﺘﻲ ﻗﻠﺘﻴﻠﻲ ﻧﺤﺒﻪ ﻭﻧﺒﻲ ﻧﺸﻮﻓﻪ ...
ﻣﻬﺎ ﺩﻣﻮﻋﻬﺎ ﻳﻨﺰﻟﻮﺍ ﺯﻱ ﺍﻟﻤﻄﺮ ..
ﺣﻨﺎﻥ : ﺗﺒﻲ ﺗﻘﻄﻌﻲ ﻗﻠﺐ ﺻﺎﺣﺒﺘﻚ ﻋﻠﻴﻚ .. ﻟﺒﻨﻰ ... ﺗﺬﻛﺮﻱ ﺷﻦ ﺩﺍﺭﺕ ﺑﺶ ﺗﺤﻤﻴﻚ ﻣﻦ ﻧﻔﺴﻚ ... ﺿﺤﻜﺖ ... ﻗﺎﻟﺘﻠﻲ ﻣﻬﺎ ﺳﻤﻴﻨﻪ ﻛﺴﺮﺗﻠﻲ ﻋﻈﺎﻣﻲ ﻟﻤﺎ ﻃﺎﺣﺖ ﻋﻠﻴﺎ ..
ﻣﻬﺎ ﺍﺫﻛﺮﺕ ﺍﻟﻤﻮﻗﻒ ﻭﻛﻼﻡ ﻟﺒﻨﻰ ﻭﺿﺤﻜﺖ ..
ﺣﻨﺎﻥ : ﺗﻘﻮﻟﻲ ﻣﺎﻣﺎ ﻣﻬﺎ ﻧﺤﺲ ﻓﻴﻬﺎ ﺍﻟﺘﻮﺃﻡ ﻣﺘﺎﻋﻲ ﻏﻴﺮ ﻣﻦ ﺑﻌﻴﺪ ..
ﻣﻬﺎ ﺿﺤﻜﺖ ﻣﺮﺓ ﺗﺎﻧﻴﻪ ..
ﺣﻨﺎﻥ : ﻭﺍﻧﻲ ﻳﺎﻭﺭﺩﺗﻲ ... ﺗﺒﻲ ﺗﻮﺟﻌﻴﻠﻲ ﻗﻠﺒﻲ ... ﺗﺒﻲ ﺗﻘﻬﺮﻳﻨﻲ ﻋﻠﻴﻚ .. ﺭﻩ ﺣﺘﻰ ﺍﻧﺘﻲ ﺑﻨﺘﻲ .. ﻭﻗﻌﺪﺕ ﺗﺒﻜﻲ ..
ﻣﻬﺎ ﺳﻤﻌﺖ ﺻﻮﺕ ﺑﻜﺎﻫﺎ .. ﺗﻠﻔﺘﺖ ﻭﺷﺎﻓﺘﻬﺎ ... ﺣﺴﺖ ﺑﺸﻌﻮﺭ ﻏﺮﻳﺐ ﺍﺗﺠﺎﻩ ﺣﻨﺎﻥ ... ﺷﻌﻮﺭ ﺍﻋﻤﻖ ﺑﻬﻠﺒﻪ ﻣﺶ ﺷﻌﻮﺭ ﺍﻟﺤﺐ ﺍﻟﻠﻲ ﺗﺤﺴﻪ ﺍﺗﺠﺎﻫﻬﺎ ... ﺑﺎﻟﺸﻮﻳﻪ ﻧﺰﻟﺖ .. ﻣﺮﻳﻢ ﻓﺮﺣﺖ ﻣﻦ ﻗﻠﺒﻬﺎ ﻭﺍﻟﺨﺪﻡ ﺍﻟﻠﻲ ﻛﺎﻧﻮ ﻳﺸﻮﻓﻮﺍ ﻣﻦ ﻟﻮﻃﺎ ﺗﻨﻔﺴﻮﺍ ﺑﺈﺭﺗﻴﺎﺡ ...
ﻭﺣﻨﺎﻥ ﻗﻌﺪﺕ ﺗﺸﺒﺤﻠﻬﺎ ﻭﻣﻬﺎ ﺗﺸﻮﻓﻠﻬﺎ ...
ﺣﻨﺎﻥ ﻓﺘﺤﺖ ﺍﻳﺪﻳﻬﺎ : ﺗﻌﺎﻟﻲ .. ﻳﺎﻣﺎﻣﺎ ..
ﻣﻬﺎ ﺳﻤﻌﺖ ﻛﻠﻤﻪ ﻣﺎﻣﺎ ﺑﻨﺒﺮﺓ ﺻﻮﺕ ﺣﻨﺎﻥ ﺍﻟﺤﻨﻮﻧﻪ .. ﻭﻣﺸﺘﻠﻬﺎ ﺗﺠﺮﻱ ﻭﺧﺸﺖ ﻓﻲ ﺣﻀﻨﻬﺎ ﻭﺣﻨﺎﻥ ﺣﻀﻨﺘﻬﺎ ﺑﻘﻮﺓ ﻭﺍﻟﺰﻭﺯ ﻳﺒﻜﻮﺍ ...
ﻭﻣﺮﻳﻢ ﺗﺄﺛﺮﺕ ﻫﻠﺒﻪ ﻭﺍﻟﺪﻣﻮﻉ ﺳﻴﻞ ..
ﻭﻫﻮ ﻛﺎﻥ ﻭﺍﻗﻒ ﻉ ﺍﻟﺒﺎﺏ ﻳﺸﻮﻓﻠﻬﻢ ﻭﻣﺒﺘﺴﻢ ﺑﺪﻣﻮﻉ ﺍﻟﻠﻲ ﺣﻔﺮﻭﺍ ﻃﺮﻳﻖ ﻉ ﺧﺪﻭﺩﻩ ...
ﻭﻗﺎﻝ ﺑﺼﻮﺕ ﻣﺮﻋﻮﺵ : ﺍﻟﺤﻤﻤﺪ .. ﻟﻠﻪ ..
***
ﻣﺎﺗﺒﻴﺶ ﺗﺮﺩ .. ﺑﻨﻤﻮﺕ ﻣﻦ ﺍﻟﺨﻮﻑ ..
ﺭﻫﻒ : ﺧﺎﻟﻮ ﻳﺘﺼﻞ .. ﺭﺩﺕ ﻋﻠﻴﻪ ..
ﺭﻫﻒ : ﺍﻟﻮ ﺧﺎﻟﻮ ..
ﺭﺿﺎ ﺑﻘﻠﻖ : ﺭﻫﻒ ﻣﻬﺎ ﺟﺘﻜﻢ ﺍﻟﻴﻮﻡ ..
ﺭﻫﻒ ﺷﺒﺤﺖ ﻟﻠﺒﻨﻰ : ﻻ ..
ﺭﺿﺎ : ﺗﺲ ... ﻧﺘﺼﻞ ﺑﻴﻬﺎ ﻣﻘﻔﻞ .. ﻭﺍﻟﻨﺖ ﻣﺼﻜﺮ ... ﺍﻭﻝ ﻣﺮﺓ ﺍﺩﻳﺮﻫﺎ ...
ﺭﻫﻒ ﺷﺒﺤﺖ ﻟﻠﺒﻨﻰ : ﻟﺒﻨﻰ ﻛﻠﻤﺎﺗﻚ ﻣﻬﺎ ﺍﻟﻴﻮﻡ ..
ﻟﺒﻨﻰ ﺑﺈﺳﺘﻐﺮﺍﺏ : ﻻ ...
ﺭﻫﻒ ﺧﺎﻓﺖ ...
ﺭﺿﺎ : ﺍﻣﻚ ﻭﻳﻦ ..
ﺭﻫﻒ : ﻣﺎﻣﺎ ﻣﻬﻨﺎﺵ ..
ﺭﺿﺎ ﺗﻔﺎﺟﺄ : ﻭﻳﻨﻬﺎ ﻓﻬﺎﻟﻮﻗﺖ ..
ﺭﻫﻒ : ﺍﺣﻤﻢ ... ﻣﺸﺖ ﻟﺨﺎﻟﺘﻲ ﻧﻴﺮﻭﺯ .. ﻣﺮﻳﻀﻪ ..
ﺭﺿﺎ ﻣﺎﻗﺘﻨﻌﺶ ﺑﺲ ﻣﺎﺑﺎﺵ ﻳﺼﺮ ﻉ ﺭﻫﻒ : ﺑﺎﻫﻲ .. ﺗﺴﻤﻌﻮﺍ ﺍﻱ ﺷﻲ ﻋﻦ ﻣﻬﺎ ﺍﺗﺼﻠﻮﺍ ﺑﻴﺎ ..
ﺭﻫﻒ : ﺇﻥ ﺷﺎﺀﺍﻟﻠﻪ ..
ﺭﺿﺎ : ﻣﻊ ﺍﻟﺴﻼﻣﻪ ..
ﺭﻫﻒ : ﺳﻼﻡ .. ﻭﺻﻜﺮﺕ ..
ﻟﺒﻨﻰ ﻗﺪﻣﺘﻠﻬﺎ : ﺷﻦ ﻓﻲ ..
ﺭﻫﻒ ﺗﺸﺒﺢ ﻟﻌﻴﻮﻥ ﺍﺧﺘﻬﺎ : ﺍﻣﻢ .. ﻗﺎﻟﻲ ﻳﻜﻠﻢ ﻓﻲ ﻣﻬﺎ ﺭﻗﻤﻬﺎ ﻣﻘﻔﻞ ﻭﺍﻟﻨﺖ ﻣﺼﻜﺮ ..
ﻟﺒﻨﻰ ﻣﺸﺖ ﻭﻳﻦ ﻣﺎﻓﻲ ﺗﻠﻴﻔﻮﻧﻬﺎ ﻭﻫﻲ ﺗﺮﻋﺶ ﺍﺗﺼﻠﺖ ﺑﻴﻬﺎ .. ﻣﻘﻔﻞ ... ﺩﻣﻮﻋﻬﺎ ﻧﺰﻟﻮﺍ ﻃﻮﻝ ..
***
ﻛﺎﻥ ﻣﺘﻤﺪﺩ ﻉ ﺍﻟﺼﺎﻟﻮﻥ ﻭﻣﻐﻤﺾ ﻋﻴﻮﻧﻪ ... ﻳﺤﺎﻭﻝ ﻳﺴﺘﺮﺧﻲ ...
ﻣﺮﻳﻢ ﻛﺎﻧﺖ ﺗﺸﺒﺤﻠﻪ ﺗﻨﻬﺪﺕ .. ﺑﻌﺪﻳﻦ ﻣﺸﺖ ﻧﺰﻟﺖ .. ﻟﻘﺖ ﺍﻟﺨﺪﺍﻣﺎﺕ ﻣﻘﻌﻤﺰﺍﺕ ﻳﻬﺪﺭﺯﻭﺍ ..
ﻣﺮﻳﻢ : ﺷﻦ ﺍﺩﻳﺮﻭﺍ ﻫﻨﻲ .. ﻫﻴﺎ ﺑﺮﻭﺍ ﻟﺪﺍﺭﻛﻢ ﻭﺍﺭﻗﺪﻭﺍ ﺍﻟﻮﻗﺖ ﺗﺄﺧﺮ ..
ﻧﺎﺿﻮﺍ ﻭﻳﺸﺒﺤﻮﻟﻬﺎ ..
ﻣﺮﻳﻢ : ﺧﻴﺮﻛﻢ؟ !
ﺷﺒﺤﻮﺍ ﻟﺒﻌﺾ ﻭﺍﻟﻤﺼﺮﻳﻪ ﺗﺸﺠﻌﺖ ﻭﻗﺎﻟﺖ : ﻫﻲ ﻣﻴﻦ ﺍﻟﺴﺖ ﺍﻟﻠﻲ ﻓﻮﺀ ﺩﻳﻪ ..
ﻣﺮﻳﻢ : ﻭﺍﻧﺘﻢ ﻣﺎﻟﻜﻢ ﺑﻴﻬﺎ .. ﻳﻠﻼ ... ﺗﺤﺮﻛﻮﺍ ﻣﻦ ﻫﻨﻲ ..
ﺍﻧﻔﺰﻋﻮﺍ ﻭﻣﺸﻮﺍ ﻃﻮﻝ .. ﻭﻣﺮﻳﻢ ﻫﺰﺕ ﺭﺍﺳﻬﺎ ﺍﻳﻤﻴﻦ ﻭﺍﻳﺴﺎﺭ ﻭﻣﺸﺖ ﻟﺪﺍﺭﻫﺎ ...
ﻓﻮﻕ ..
ﻓﻲ ﺩﺍﺭ ﻣﻬﺎ ..
ﻛﺎﻧﺖ ﺭﺍﻗﺪﻩ ﻉ ﺳﺮﻳﺮﻫﺎ ﻓﻲ ﺣﻀﻦ ﺣﻨﺎﻥ ... ﻭﺣﻨﺎﻥ ﺗﻘﺮﺍ ﻋﻠﻴﻬﺎ ..
ﻫﻮ ﻧﺎﺽ ﻣﻦ ﻉ ﺍﻟﻜﻨﺒﻪ ﻗﻌﻤﺰ ﺣﻂ ﺍﻳﺪﻩ ﻉ ﺟﺒﻬﺘﻪ ﻭﻗﻌﺪ ﻳﻔﺮﻙ ﻓﻴﻬﺎ ﻭﻫﻮ ﻣﻐﻤﺾ ﻋﻴﻮﻧﻪ ﻭﻳﺘﺄﻟﻢ ... ﺑﻌﺪﻳﻦ ﺣﻂ ﺍﻳﺪﻩ ﻉ ﺭﻛﺎﺑﻪ ﻭﻧﺎﺽ .. ﻣﺸﻲ ﺑﺼﻌﻮﺑﻪ ﺟﻬﺔ ﺩﺍﺭ ﺑﻨﺘﻪ ... ﺗﺮﺩﺩ ﻳﻔﺘﺢ ﺍﻟﺒﺎﺏ .. ﺑﺲ ﻓﻲ ﺍﻷﺧﻴﺮ ﺣﻂ ﺍﻳﺪﻩ ﻉ ﻣﻘﺒﺾ ﺍﻟﺒﺎﺏ ﻭﻓﺘﺢ ﺍﻟﺒﺎﺏ ﺑﺎﻟﺸﻮﻳﻪ .. ﻟﻘﻲ ﺣﻨﺎﻥ ﺣﺎﺿﻨﻪ ﻣﻬﺎ ﻭﺗﻘﺮﺍ ﻓﻲ ﺍﻟﻘﺮﺁﻥ ﻗﻌﺪ ﻳﺸﻮﻓﻠﻬﻢ ﻭﻓﺸﻌﻮﺭ ﺣﻠﻮ ﻫﻠﺒﻪ ﺣﺲ ﺑﻴﻪ ﺧﻼﻩ ﻳﺒﺘﺴﻢ ﺑﺮﺍﺣﻪ .. ﺳﻜﺮ ﺍﻟﺒﺎﺏ .. ﻭﻣﺸﻲ ﻟﺪﺍﺭﻩ .. ﺧﺶ ﺩﻭﺵ ﻭﻃﻮﻝ ﻫﻠﺒﻪ ﺗﺤﺖ ﺍﻟﻤﻴﻪ .. ﺑﻌﺪ ﻃﻠﻊ ﻟﺒﺲ ﺣﻮﺍﻳﺠﻪ .. ﻭﻃﻠﻊ ﻣﻦ ﺍﻟﺪﺍﺭ .. ﻭﻭﻻ ﻟﻠﺼﺎﻟﻮﻥ ﻭﺗﻤﺪﺩ ﻉ ﺍﻟﻜﻨﺒﻪ ﻣﻦ ﺟﺪﻳﺪ ﻭﻏﻤﺾ ﻋﻴﻮﻧﻪ ..
ﺣﻨﺎﻥ ﻃﻠﻌﺖ ﻣﻦ ﺍﻟﺪﺍﺭ ﺑﻌﺪ ﺗﺄﻛﺪﺕ ﺍﻥ ﻣﻬﺎ ﺭﻗﺪﺕ ﻭﻫﻴﺎ ﻣﺎﺷﻴﻪ ﻓﻲ ﺍﻟﻤﻤﺮ ﻭﻭﺻﻠﺖ ﻓﻲ ﺍﻟﺼﺎﻟﻪ ﻭﻗﻔﺖ ﻟﻤﺎ ﻟﻘﺎﺗﻪ ﻣﺘﻜﻲ ﻭﻣﻐﻤﺾ ﻋﻴﻮﻧﻪ ... ﺍﺫﻛﺮﺕ ﻣﻨﻈﺮﻩ ﻗﺒﻞ ﺷﻮﻳﻪ ﻭﺭﺟﻊ ﻗﻠﺒﻪ ﺗﻮﺟﻊ ﻋﻠﻴﻪ .. ﺍﻟﺮﺍﺟﻞ ﺍﻟﻤﺘﻜﺒﺮ ﺍﻟﻘﻮﻱ ﺍﻟﻘﺎﺳﻲ ﺣﺎﺩ ﺍﻟﻄﺒﺎﻉ .. ﻳﺒﻜﻲ ﻭﺧﺎﻳﻒ ﺯﻱ ﺍﻟﻄﻔﻞ ﺍﻟﺼﻐﻴﺮ .. ﺗﻨﻬﺪﺕ ..
ﺣﻨﺎﻥ : ﺍﺣﻤﻤﻢ ..
ﻣﻌﺎﻭﻳﻪ ﺳﻤﻊ ﺻﻮﺗﻬﺎ ﺷﺒﺤﻠﻬﺎ ﻭﻧﺎﺽ ﻗﻌﻤﺰ ...
ﺣﻨﺎﻥ : ﺍﺣﻤﻢ .. ﻫﻲ ﺗﻮﺍ ﺭﺍﻗﺪﻩ ..
ﻣﻌﺎﻭﻳﻪ ﻫﺰ ﺭﺍﺳﻪ ﺑﺈﻳﺠﺎﺏ ..
ﺣﻨﺎﻥ : ﻻﺯﻡ ﺍﻧﺮﻭﺡ ..
ﻣﻌﺎﻭﻳﻪ ﻧﺎﺽ ﻭﻗﺪﻣﻠﻬﺎ : ﻣﺶ ﺿﺎﻣﻦ ﺷﻦ ﺩﻳﺮ ﻟﻮﻧﺎﺿﺖ .. ﻭﺿﻌﻬﺎ ﺷﻔﺘﻴﻪ ﺑﻌﻴﻨﻚ ..
ﺣﻨﺎﻥ ﺗﺸﺒﺤﻠﻪ ﻭﺗﺮﺍﺟﻲ ﻓﻴﻪ ﻳﻜﻤﻞ ..
ﻣﻌﺎﻭﻳﻪ : ﺍﺣﻤﻢ .. ﻳﻌﻨﻲ .. ﻟﻮ .. ﺧﺪﻱ ﻧﻔﺲ .. ﻭﻭﺯﻉ ﻧﻈﺮﻩ ﻉ ﺍﻟﻤﻜﺎﻥ .. ﺍﺣﻤﻢ .. ﻳﻌﻨﻲ ﻟﻮ ﺗﻘﻌﺪﻱ ﻣﻌﺎﻫﺎ ﺍﻟﻠﻴﻠﻪ ..
ﺣﻨﺎﻥ ﺷﺒﺤﺖ ﻟﻮﻃﺎ ﻭﻗﻌﺪﺕ ﺗﻔﻜﺮ ﺑﻌﺪﻳﻦ ﺷﺒﺤﺘﻠﻪ : ﺑﺎﻫﻲ .. ﻣﻤﻜﻦ ﺗﺒﻌﺖ ﺣﺪ ﻳﺠﻴﺐ ﺑﻨﺎﺗﻲ ﻣﻦ ﺍﻟﺤﻮﺵ ﻳﺠﻮﺍ ﻳﺒﺎﺗﻮﺍ ﻣﻌﺎﻧﺎ ..
ﻣﻌﺎﻭﻳﻪ ﺍﺑﺘﺴﻢ : ﺣﺎﺿﺮ .. ﻭﻣﺸﻲ ﻣﻦ ﺣﺪﺍﻫﺎ ﻧﺰﻝ ﻟﻮﻃﺎ .. ﻭﻫﻲ ﺗﻨﻬﺪﺕ ﻭﺍﺗﺼﻠﺖ ﺑﺮﻫﻒ ..
...
ﻛﺎﻧﻮﺍ ﻣﻘﻌﻤﺰﺍﺕ ﻭﻣﺶ ﺟﺎﻳﻴﻬﻢ ﻧﻮﻡ ﻣﻦ ﺍﻟﺨﻮﻑ ﻭﻟﺒﻨﻰ ﺩﻣﻌﺘﻬﺎ ﻣﺎﺟﻔﺘﺶ ..
ﺭﻥ ﺗﻠﻴﻔﻮﻥ ﺭﻫﻒ ﺷﺎﻓﺎﺗﻪ ﻭﺭﺩﺕ ﻃﻮﻝ ...
ﺭﻫﻒ : ﻣﺎﻣﺎ
ﺣﻨﺎﻥ : ﺍﻳﻮﻩ ﺣﺒﻴﺒﺘﻲ ...
ﺭﻫﻒ : ﻭﻳﻨﻚ ﻳﺎﻣﺎﻣﺎ ﻭﻳﻦ ..
ﺣﻨﺎﻥ : ﺍﻫﺪﻱ ﺣﺒﻴﺒﺘﻲ .. ﺍﻧﻲ ﻋﻨﺪ ﻣﻬﺎ ..
ﺭﻫﻒ : ﺧﻴﺮﻫﺎ ..
ﺣﻨﺎﻥ : ﺑﻨﺘﻲ ﺗﻮﺍ ﺍﺳﻤﻌﻴﻨﻲ ... ﻭﺗﻲ ﺭﻭﺣﻚ ﺍﻧﺘﻲ ﻭﺍﺧﺘﻚ ﻭﺗﻮﺍ ﺣﻤﻮﺩﻱ ﻭﺩﻳﺮﻭﻟﻪ ﺷﻨﻄﻪ ﻓﻴﻬﺎ ﻛﻞ ﺣﺎﺟﺎﺗﻪ ... ﺗﻮﺍ ﺑﻴﺠﻴﻜﻢ ﺳﻮﺍﻕ ﻋﻤﻚ ﻣﻌﺎﻭﻳﻪ ﻳﺠﻴﺒﻜﻢ ﻫﻨﻲ .
ﺭﻫﻒ ﻣﺴﺘﻐﺮﺑﻪ ﻋﻠﻰ ﻣﺘﻔﺎﺟﺄﻩ : ﻣﺎﻣﺎ ﺷﻦ ﻓﻲ ..
ﺣﻨﺎﻥ : ﺗﻮ ﺗﺠﻮ ﻭﺗﻌﺮﻓﻮﺍ .. ﻫﻴﺎ ﻭﺗﻮﺍ ﺍﺭﻭﺍﺣﻜﻢ ... ﺍﻳﻪ ﻭﻣﺎﺗﻨﺴﻮﺵ ﺟﺮﺍﻱ ﺣﻤﻮﺩﻱ ..
ﺭﻫﻒ : ﻫﻬﻬﻬﻬﻬﻪ ... ﺑﺎﻫﻲ ..
ﺣﻨﺎﻥ ﺑﻀﺤﻜﻪ : ﻫﻴﺎ ﺍﻟﺴﻼﻡ ﻋﻠﻴﻜﻢ ..
ﺭﻫﻒ : ﻭﻋﻠﻴﻜﻢ ﺍﻟﺴﻼﻡ ... ﻭﺻﻜﺮﺕ ..
ﻟﺒﻨﻰ : ﺷﻦ ﻓﻲ ..
ﺭﻫﻒ : ﻛﻞ ﺍﻟﻠﻲ ﻓﻬﻤﺘﻪ ﺍﻥ ﺣﻨﻲ ﺍﻟﻠﻴﻠﻪ ﺑﻨﺒﺎﺗﻮ ﻓﻲ ﻗﺼﺮ ﻋﻤﻲ ﻣﻌﺎﻭﻳﻪ ..
ﻟﺒﻨﻲ ﺿﺤﻜﺖ ﺑﺈﺳﺘﻐﺮﺍﺏ ..
ﺭﻫﻒ ﺑﻀﺤﻜﻪ : ﻫﻴﺎ ﺑﺴﺮﻋﻪ .. ﺍﻩ ﺍﻳﻪ ﺣﻄﻲ ﺟﺮﺍﻱ ﺣﻤﻮﺩﻱ ﻓﻢ ﺍﻟﺒﺎﺏ ﺑﺶ ﻣﺎﻧﻨﺴﻮﺷﻲ ..
ﻟﺒﻨﻰ : ﻫﻬﻬﻬﻬﻬﻬﻬﻬﻬﻬﻬﻪ ..
***
ﺣﻨﺎﻥ ﺑﻌﺪ ﺻﻜﺮﺕ ﻗﻌﻤﺰﺕ ﻉ ﺍﻟﺼﺎﻟﻮﻥ .. ﻭﻣﻌﺎﻭﻳﻪ ﺟﻲ ...
ﻣﻌﺎﻭﻳﻪ : ﻧﺺ ﺳﺎﻋﻪ ﻭﻳﻜﻮﻧﻮﺍ ﻫﻨﻲ ..
ﺣﻨﺎﻥ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ..
ﻣﻌﺎﻭﻳﻪ ﻗﻌﻤﺰ ﻣﻘﺎﺑﻠﻬﺎ ﻗﻌﺪ ﻳﺸﺒﺤﻠﻬﺎ ﻭﻫﻲ ﺳﺮﺣﺎﻧﻪ : ﺍﺣﻤﻢ .. ﺍﺳﻒ ..
ﺣﻨﺎﻥ ﺷﺒﺤﺘﻠﻪ : ﻋﻠﻰ ﺷﻨﻮ ..
ﻣﻌﺎﻭﻳﻪ : ﻉ ﻛﻞ ﺷﻲ ..
ﺣﻨﺎﻥ ﺍﺑﺘﺴﻤﺖ ﻭﻫﺰﺕ ﺭﺍﺳﻬﺎ ﺑﺈﻳﺠﺎﺏ ..
ﻣﻌﺎﻭﻳﻪ ﻣﺶ ﻋﺎﺭﻑ ﺷﻦ ﻳﻘﻮﻝ ﻭﻗﻌﺪ ﺳﺎﻛﺖ ..
ﺣﻨﺎﻥ ﺷﺒﺤﺘﻠﻪ : ﺳﻴﺪ ﻣﻌﺎﻭﻳﻪ ..
ﻣﻌﺎﻭﻳﻪ ﺑﺈﻧﺘﺒﺎﻩ : ﺍﻣﻢ ..
ﺣﻨﺎﻥ : ﺷﻦ ﺍﻟﻠﻲ ﺻﺎﺭ ﺑﺎﻟﺰﺑﻂ ..
ﻣﻌﺎﻭﻳﻪ ﻭﺟﻬﻪ ﺍﻧﺨﻄﻒ ﻟﻮﻧﻪ ﻭﺣﺲ ﺑﻀﻴﻖ ﺷﺪﻳﺪ ﻓﺼﺪﺭﻩ ..
ﺣﻨﺎﻥ : ﺷﻜﻠﻲ ﺍﺩﺧﻠﺖ ﻓﺸﻲ ﺧﺎﺹ .. ﺍﺳﻔﻪ ..
ﻣﻌﺎﻭﻳﻪ ﺳﻜﺖ ﺷﻮﻳﻪ ﻭﺑﻠﻊ ﺭﻳﻘﻪ ﺑﻌﺪﻳﻦ ﻗﺎﻝ : ﺍﻧﻲ ﻧﺒﻲ ﻧﺘﻜﻠﻢ .. ﻧﺒﻲ ﺣﺪ ﻧﺤﻜﻴﻠﻪ ﻭﻧﻘﻮﻟﻪ ﻉ ﺍﻟﻬﻢ ﺍﻟﻠﻲ ﺷﺎﻳﻠﻪ ﻣﻦ ﺳﻨﻴﻦ .. ﻭﻣﺶ ﻗﺎﺩﺭ ﻧﺘﺨﻠﺺ ﻣﻨﻪ .. ﻭﺗﻌﺒﻨﻲ ﺗﻌﺒﻨﻲ ﻫﻠﺒﻪ ..
ﺣﻨﺎﻥ ﺗﺴﻤﻊ ﺑﺈﻧﺘﺒﺎﻩ ﻭﻣﺮﻛﺰﺓ ﻉ ﻣﻼﻣﺢ ﻭﺟﻬﻪ ﺍﻟﻠﻲ ﻛﻠﻬﺎ ﺃﻟﻢ ..
ﻣﻌﺎﻭﻳﻪ : ﺍﻧﻲ ﻃﻠﻌﺖ ﻣﻦ ﺍﻟﺒﻼﺩ ﻭﻛﺎﻥ ﻋﻤﺮﻱ ﻭﻗﺘﻬﺎ 17 ﺳﻨﻪ ﻃﻠﻌﺖ ﺑﺶ ﻧﻜﻤﻞ ﻗﺮﺍﻳﺘﻲ ﻭﻛﺎﻥ ﺷﺒﻪ ﻣﺘﺄﻣﻨﺘﻠﻲ ﺣﻴﺎﺓ ﻏﺎﺩﻱ .. ﻗﺮﻳﺖ ﻭﺗﻔﻮﻗﺖ ﻭﺍﺷﺘﻐﻠﺖ ﻭﻓﺘﺤﺖ ﻣﺸﺮﻭﻉ ﻭﺳﺎﻋﺪﻭﻧﻲ ﻓﻴﻪ ﻣﻌﺎﺭﻑ ﻋﻴﻠﺘﻲ ﺑﺮﺍ ﻭﻧﺠﺢ .. ﻭﻧﺠﺎﺡ ﻫﺎﻟﻤﺸﺮﻭﻉ ﺧﻼ ﻃﻤﻮﺣﻲ ﻳﻜﺒﺮ ﺍﻧﻲ ﻧﺪﻳﺮ ﻟﻨﻔﺴﻲ ﺍﺳﻢ ﻓﻲ ﻋﺎﻟﻢ ﺍﻟﺒﺰﻧﺲ ﻭﻧﺒﻨﻲ ﻛﻴﺎﻥ ﻟﻴﺎ ﻣﺴﺘﻘﻞ ﻋﻦ ﺑﻮﻱ ﻭﺍﺳﻤﻪ .. ﺗﻌﺮﻓﺖ ﻉ ﺭﺟﻞ ﺍﻋﻤﺎﻝ ﻣﻌﺮﻭﻑ ﻏﺎﺩﻱ ﻭﻃﺪﺕ ﻋﻼﻗﺘﻲ ﺑﻴﻪ ﺍﻛﺜﺮ ﻭﻫﻮ ﻛﺎﻥ ﻳﻘﺮﺏ ﻓﻴﺎ ﻟﻴﻪ ﺩﺧﻠﻨﻲ ﻟﺤﻮﺷﻪ ﻭﻋﺮﻓﻨﻲ ﻉ ﻋﻴﻠﺘﻪ .. ﺗﻨﻬﺪ .. ﻛﺎﻧﻮﺍ ﻋﻨﺪﻩ ﺑﻨﺖ ﻭﻟﺪ .. ﺍﺣﻤﻢ .. ﻛﻨﺖ ﻣﻼﺣﻆ ﻣﺤﺎﻭﻻﺕ ﺗﻘﺮﺏ ﺑﻨﺘﻪ ﻣﻨﻲ ﻭﺍﻫﺘﻤﺎﻣﻬﺎ ﺑﻴﺎ .. ﻭﺑﺼﺮﺍﺣﻪ ﻓﻮﻗﺘﻬﺎ ﻛﻨﺖ ﻣﺘﺠﺎﻫﻞ ﺗﻤﺎﻣﺎ ﻗﺼﺪﻫﺎ ﻭﻛﻨﺖ ﻧﺠﺎﻣﻞ ﻓﻴﻬﺎ ﺍﻭ ﻧﺴﺎﻳﺮ ﻓﻴﻬﺎ ﻣﺴﺎﻳﺮﻩ .. ﻣﻊ ﺍﻟﻮﻗﺖ ﺍﻫﺘﻤﺎﻣﻬﺎ ﺯﺍﺩ ﻟﻴﻦ ﻣﺮﺓ ﺍﻋﺘﺮﻓﺘﻠﻲ ﺑﺤﺒﻬﺎ .. ﻭﻋﺮﺿﺖ ﻋﻠﻴﺎ ﺍﻟﺰﻭﺍﺝ ..
ﺣﻨﺎﻥ ﺍﺑﺘﺴﻤﺖ ..
ﻣﻌﺎﻭﻳﻪ ﺍﺑﺘﺴﻢ ﺑﺄﻟﻢ ﻭﻛﻤﻞ : ﻓﻜﺮﺕ ﻓﻲ ﺍﻟﻤﻮﺿﻮﻉ ﺑﻌﻘﻠﻴﻪ ﺭﺟﻞ ﺍﻷﻋﻤﺎﻝ ﻓﻜﺮﺕ ﻓﻲ ﺍﻟﻤﻮﺿﻮﻉ ﻉ ﺍﻧﻪ .. ﺑﺰﻧﺲ .. ﺻﻔﻘﻪ .. ﻭﺍﻥ ﻋﺮﺿﻬﺎ ﻓﺮﺻﻪ ﻣﻬﻤﻪ ﺑﺎﻟﻨﺴﺒﻪ ﻟﻴﺎ ﻭﺣﺘﻜﺒﺮﻧﻲ ﺍﻛﺜﺮ .. ﻭﺍﻓﻘﺖ ﻉ ﻋﺮﺿﻬﺎ .. ﻭﻣﺸﻴﺖ ﻃﻠﺒﺘﻬﺎ ﻣﻦ ﺑﻮﻫﺎ ﺍﻟﻠﻲ ﻓﺮﺡ ﻫﻠﺒﻪ ﺑﻄﻠﺒﻲ ﻷﻧﻪ ﻛﺎﻥ ﻋﺎﺭﻑ ﻣﺸﺎﻋﺮ ﺑﻨﺘﻪ ﺍﺗﺠﺎﻫﻲ .. ﻭﺑﻨﺘﻪ ﺑﺎﻟﻨﺴﺒﻪ ﻟﻴﻪ ﺭﻭﺣﻪ ﻛﺎﻥ ﻳﺤﺒﻬﺎ ﺑﺸﻜﻞ ﻛﺒﻴﺮ ﺍﻛﺜﺮ ﺣﺘﻰ ﻣﻦ ﺧﻮﻫﺎ ﻭﻣﻔﻀﻠﻬﺎ ﻋﻠﻴﻪ ﻭﺣﺘﻰ ﺧﻮﻫﺎ ﻭﺍﻣﻬﺎ ﻛﺎﻧﻮﺍ ﻳﺤﺒﻮﻫﺎ ﺑﺠﻨﻮﻥ ﻭﻣﺪﻟﻌﻴﻨﻬﺎ ﻉ ﺍﻵﺧﺮ .. ﻭﺍﻧﻲ ﺷﻔﺖ ﻟﻬﺎﻟﺸﻲ ﺑﻨﻈﺮﺓ ﺗﺎﻧﻴﻪ .. ﻣﺼﻠﺤﻪ ﻭﺑﺲ .. ﺗﺰﻭﺟﺘﻬﺎ ﻭﺩﺍﺭﻭﻟﻬﺎ ﻋﺮﺱ ﺍﺳﻄﻮﺭﻱ ... ﻭﻗﻌﺪﻧﺎ ﻋﺎﻳﺸﻴﻦ ﻣﻊ ﺑﻌﺾ ﺑﺮﺍ ﻓﺘﺮﻩ .. ﻟﻴﻦ ﺳﻤﻌﺖ ﺑﻮﻓﺎﺓ ﺑﻮﻱ ﻭﺍﺗﺼﻞ ﺑﻴﺎ ﻣﺤﺎﻣﻴﻪ ﻭﻗﺎﻟﻲ ﻻﺯﻡ ﺍﻧﺮﻭﺡ ﺑﺶ ﻧﺴﺘﻠﻢ ﻛﻞ ﺷﻲ .. ﻭﻓﻌﻼ ﺭﻭﺣﺖ ﺍﻧﻲ ﻭﻳﺎﻫﺎ ﻭﻫﻲ ﺍﺑﺪﺍ ﻣﺎﺗﺮﺩﺩﺵ ﻓﻲ ﺍﻟﺠﻴﻪ ﻣﻌﺎﻱ .. ﻋﺸﻨﺎ ﻫﻨﻲ ﻭﺍﻧﻲ ﺍﻧﺸﻐﻠﺖ ﺍﻛﺜﺮ ﻭﺍﻛﺜﺮ .. ﻭﻛﻨﺖ ﻣﻬﻮﻭﺱ ﺑﺎﻟﺨﺪﻣﻪ ﻭﻓﺈﻧﻲ ﻧﺰﻳﺪ ﻧﻜﺒﺮ ﺍﺳﻤﻲ ﻭﻧﺒﻨﻲ ﺍﻹﻣﺒﺮﺍﻃﻮﺭﻳﻪ ﺍﻟﻜﺒﻴﺮﻩ ﺍﻟﻠﻲ ﻳﺎﻣﺎ ﺣﻠﻤﺖ ﺑﻴﻬﺎ .. ﻭﻭﻟﺖ ﻓﺤﻴﺎﺗﻲ ﻣﺠﺮﺩ ﻛﻤﺎﻟﻴﻪ ﻣﻦ ﻛﻤﺎﻟﻴﺎﺕ ﺣﻴﺎﺗﻲ ... ﻣﺎﺍﻧﺘﺒﻬﺘﺶ ﺍﺑﺪﺍ ﻟﻘﻠﺒﻬﺎ ﺍﻟﻠﻲ ﻛﻨﺖ ﻧﺠﺮﺡ ﻓﻴﻪ ﻭﻧﻜﺴﺮ ﻓﻴﻪ .. ﻓﺬﺑﻮﻟﻬﺎ ﻳﻮﻡ ﻋﻦ ﻳﻮﻡ ﻣﻦ ﺍﻫﻤﺎﻟﻲ ﻟﻴﻬﺎ ... ﻹﻧﻲ ﻣﺎﺣﺒﻴﺘﻬﺎﺵ ﻭﻻﻗﺪﺭﺕ ﻧﺤﺒﻬﺎ ﻭﺍﻧﻲ ﺍﺳﺎﺳﺎ ﻣﺎﻋﺮﻓﺘﺶ ﻧﺤﺐ ..
ﻟﻴﻦ ﻣﺮﺓ ﻓﺘﺤﺖ ﻣﻌﺎﻱ ﻣﻮﺿﻮﻉ ﺍﻷﻧﺠﺎﺏ ﺍﻟﻠﻲ ﻛﻨﺖ ﺭﺍﻓﻀﻪ ﻗﻄﻌﺎ ..
ﺣﻨﺎﻥ : ﻋﻼﺵ ..
ﻣﻌﺎﻭﻳﻪ ﺍﺑﺘﺴﻢ ﺑﺄﻟﻢ : ﻷﻧﻲ ﻣﺎﻧﺼﻠﺤﺶ ﻧﻜﻮﻥ ﺃﺏ .. ﻭﻗﻠﺘﻠﻬﺎ ﻫﺎﻟﻜﻼﻡ ﺑﺲ ﻗﺎﻟﺖ ﺗﺒﻲ ﺣﻘﻬﺎ ﻓﻲ ﺍﻷﻣﻮﻣﻪ .. ﺍﻧﻲ ﻗﻠﺘﻠﻬﺎ ﺗﺒﻲ ﺣﻘﻚ ﻓﻲ ﺍﻷﻣﻮﻣﻪ ﻧﻘﺪﺭ ﻧﻄﻠﻖ ﺳﺮﺍﺣﻚ ﻭﺣﻘﻚ ﺗﺎﺧﺪﻳﻪ ﻣﻊ ﻏﻴﺮﻱ .. ﺍﻧﺼﺪﻣﺖ ﻓﻴﻬﺎ ﻛﻴﻒ ﺍﻧﻬﺎﺭﺕ ﻭﻗﻌﺪﺕ ﺗﺘﺮﺟﻰ ﻓﻴﺎ ﺍﻧﻲ ﻣﺎﻧﺨﻠﻴﻬﺎﺵ ﻣﺎﻛﻨﺘﺶ ﻧﺤﺴﺎﺏ ﺍﻧﻬﺎ ﻟﻬﺎﻟﺤﺪ ﺗﺤﺒﻨﻲ ... ﻫﺬﺍﻛﺎ ﺍﻟﻴﻮﻡ ﺍﻧﻬﺰﻳﺖ ﻣﻦ ﺩﺍﺧﻞ ﻭﺣﺴﻴﺖ ﻧﻔﺴﻲ ﺍﻧﺴﺎﻥ ﺳﻲﺀ ﻭﺃﻧﺎﻧﻲ .. ﺑﺲ ﻗﻌﺪﺕ ﻣﺼﺮ ﺍﻧﻲ ﻣﺎﻧﺠﻴﺒﺶ ﺻﻐﺎﺭ ..
ﺣﻨﺎﻥ ﻋﻴﻮﻧﻬﺎ ﺩﻣﻌﻮﺍ ..
ﻣﻌﺎﻭﻳﻪ : ﺑﺸﻜﻞ ﺍﻭ ﺑﺄﺧﺮ ﺻﺎﺭ ﺍﻟﺤﻤﻞ .. ﺍﺣﻤﻢ .. ﻭﻣﻊ ﺍﻟﻮﻗﺖ ﺍﻧﺸﻐﻠﺖ ﺍﻛﺜﺮ .. ﺑﻤﺸﺎﺭﻳﻌﻲ ﻭﺻﻔﻘﺎﺗﻲ ﻭﻣﺎﺇﻟﻰ ﺫﻟﻚ .. ﻟﻴﻦ ﻓﻴﻮﻡ ﺧﺒﺮﺗﻨﻲ ﺧﺒﺮ ﺻﺪﻣﻨﻲ ﺍﻧﻬﺎ .. ﺣﺎﻣﻞ .. ﺍﻧﺠﻨﻴﺖ ﻋﻠﻴﻬﺎ ﻭﻣﺎﺧﻠﻴﺖ ﻣﺎﻗﻠﺘﻠﻬﺎ ﻭﺳﻴﺒﺘﻠﻬﺎ ﺍﻟﻘﺼﺮ ﺑﻜﺒﺮﻩ ﻭﺳﺎﻓﺮﺕ ﻭﻗﻠﺘﻠﻬﺎ ﺍﻥ ﻻﺯﻡ ﺗﺨﺘﺎﺭ ﺑﻴﻨﻲ ﻭﺑﻴﻦ ﺍﻟﻌﻴﻞ .. ﺳﺎﻓﺮﺕ ﻭﻣﺎﺃﻫﺘﻤﻴﺘﺶ ﺍﺑﺪﺍ ﺑﺤﺎﻟﻬﺎ ..
ﺣﻨﺎﻥ ﺩﻣﻮﻋﻬﺎ ﺑﺪﻭﺍ ﻳﻨﺰﻟﻮﺍ ...
ﻣﻌﺎﻭﻳﻪ ﻭﻃﺎ ﺭﺍﺳﻪ ﻭﻛﻤﻞ : ﺭﻭﺣﺖ ﺑﻌﺪ ﻋﺮﻓﺖ ﺍﻥ ﺍﻫﻠﻬﺎ ﺟﺎﻳﻴﻨﻬﺎ .. ﻭﻻﺯﻡ ﻧﻜﻮﻥ ﻣﻮﺟﻮﺩ .. ﻟﻘﻴﺖ ﺑﻄﻨﻬﺎ ﻛﺒﻴﺮﻩ .. ﻭﻋﺮﻓﺖ ﺍﻧﻬﺎ ﻓﺎﻟﺴﺎﺩﺱ .. ﺣﺎﻭﻟﺖ ﺗﻠﻴﻦ ﻗﻠﺒﻲ .. ﺑﺲ ﻗﻠﺒﻲ ﺯﺍﺩ ﻗﺴﻲ .. ﻭﻗﻠﺘﻠﻬﺎ ﺑﺒﺴﺎﻃﻪ .. ﺍﻥ ﻫﻲ ﻛﺬﺍﺑﻪ ﻓﺤﺒﻬﺎ ﻟﻴﺎ ﻷﻧﻬﺎ ﻟﻮ ﻛﺎﻧﺖ ﺗﺤﺒﻨﻲ ﺩﺍﺭﺕ ﺍﻟﻠﻲ ﻛﻨﺖ ﻧﺒﻴﻪ ..
ﺣﻨﺎﻥ ﺣﻄﺖ ﺍﻳﺪﻫﺎ ﻉ ﻋﻴﻮﻧﻬﺎ ﻭﺩﻣﻮﻋﻬﺎ ﻣﺎﻭﻗﻔﺘﺶ ..
ﻣﻌﺎﻭﻳﻪ : ﺍﺣﻤﻢ .. ﻗﻌﺪﺕ ﻣﺴﺘﻜﺮﺩﻫﺎ ... ﻟﻴﻦ ﺟﺎﺑﺖ .. ﺟﺎﺑﺖ ﻭﺍﻧﻲ ﻛﻨﺖ ﻣﺴﺎﻓﺮ .. ﺍﺗﺼﻞ ﺑﻴﺎ ﺑﻮﻫﺎ ﻭﻋﺎﺗﺒﻨﻲ ﺑﺲ ﺍﻧﻲ ﻛﻠﻤﺘﻪ ﺑﻔﻮﻗﻴﻪ ..
ﻣﻤﻜﻦ ﺍﻟﻜﺒﺮ ﻛﺎﻥ ﻭﺍﺧﺪﻧﻲ ﻭﻗﺘﻬﺎ ﻟﺪﺭﺟﺔ ﻧﺴﻴﺖ ﺍﻟﻠﻲ ﺩﺍﺭﻩ ﻣﻌﺎﻱ .. ﺑﻌﺪ ﻣﺪﺓ ﺭﻭﺣﺖ ... ﺣﻂ ﺍﻳﺪﻩ ﻉ ﺟﺒﻬﺘﻪ ﻭﻗﻌﺪ ﻳﻔﺮﻙ ﻓﻴﻬﺎ ... ﺭﻭﺣﺖ ﻭﺷﻔﺘﻬﺎ ﻛﺎﻧﺖ ﺣﺎﺑﺴﻪ ﺭﻭﺣﻬﺎ ﻭﻣﻨﻌﺰﻟﻪ ﻭﺧﺎﺷﻪ ﻓﻲ ﺣﺎﻟﺔ ﻛﺂﺑﻪ ﻭﻣﻬﺎ ﻛﺎﻧﺖ ﺗﻌﺎﻧﻲ ﻓﻴﻬﺎ ﻣﺮﻳﻢ
ﻗﺎﻡ ﺭﺍﺳﻪ ﻭﺩﻣﻮﻋﻪ ﻳﻨﺰﻟﻮﺍ : ﻟﻤﺎ ﺷﺎﻓﺘﻨﻲ ﺍﻧﻔﺠﺮﺕ ﻓﻴﺎ ﻛﺎﻧﺖ ﺩﺍﺳﻪ ﻓﻘﻠﺒﻬﺎ ﻫﻠﺒﻪ ﻭﻃﻠﻌﺎﺗﻪ ﻫﺬﺍﻛﺎ ﺍﻟﻴﻮﻡ .. ﻛﺎﻧﺖ ﻣﻬﺴﺘﺮﻩ ﻭﻣﺎﻗﺪﺭﺗﺶ ﻧﺘﺤﻜﻢ ﻓﻴﻬﺎ ..
ﻓﻼﺵ ﺑﺎﻙ ..
ﺳﺎﻣﻴﻪ ﻭﻫﻲ ﺗﻌﻴﻂ : ﺣﺮﺭﺍﺍﺍﺍﻡ ﻋﻠﻴﻚ ﻳﺎﻣﻌﺎﻭﻳﻪ ﺣﺴﺴﺲ ﺑﻴﺎﺍﺍ ..
ﻣﻌﺎﻭﻳﻪ : ﺳﺎﺍﺍﺍﺍﻣﻴﻪ .. ﻳﺎﺑﻨﺖ ﺍﻟﻨﺎﺱ ﺍﻓﻬﻤﻲ ﺍﻧﻲ ﻭﻳﺎﻙ ﺧﻼﺹ ﺻﻌﺐ .. ﻣﺴﺘﺤﻴﻴﻴﻞ ﻧﻜﻤﻠﻮﺍ ﻣﻊ ﺑﻌﺾ ... ﺍﻟﺤﻴﺎﺓ ﺑﻴﻨﺎﺗﻨﺎ ﻣﺴﺘﺤﻴﻠﻪ ..
ﺳﺎﻣﻴﻪ ﺍﻧﺼﻌﻘﺖ ﺑﺎﻟﻠﻲ ﺳﻤﻌﺎﺗﻪ ﺧﻼﺹ ﺍﺳﻮﺩﺕ ﺍﻟﺪﻧﻴﺎ ﻓﻌﻴﻮﻧﻬﺎ ... ﺩﻓﺎﺗﻪ ﻭﻃﻠﻌﺖ ﺗﺠﺮﻱ .. ﻫﻮ ﺍﺗﻔﺎﺟﺄ ﻓﺮﺩﺓ ﻓﻌﻠﻬﺎ ﻭﻟﺤﻘﻬﺎ .. ﻟﻘﺎﻫﺎ ﻭﺍﺧﺪﻩ ﻣﻔﺘﺎﺡ ﺍﻟﺴﻴﺎﺭﺓ ﻭﻃﺎﻟﻌﻪ ﺗﺠﺮﻱ .. ﺷﺒﻪ ﻓﻬﻢ ﺷﻦ ﺑﺪﻳﺮ .. ﻟﺤﻖ ﻋﻠﻴﻬﺎ ﻭﺷﺪﻫﺎ ..
ﻣﻌﺎﻭﻳﻪ : ﺷﻦ ﺑﺪﻳﺮﻱ ...
ﺳﺎﻣﻴﻪ ﺗﻌﻴﻂ : ﺧﻠﻴﻴﻴﻴﻴﻨﻲ ... ﺧﻠﻴﻴﻴﻴﻴﻨﻲ ...
ﻣﻌﺎﻭﻳﻪ : ﺑﻼ ﻫﺒﺎﻝ .. ﺍﻋﻘﻠﻲ ... ﺷﺪﻫﺎ ﻭﺿﺮﺑﻬﺎ ﻛﻒ ..
ﻫﻴﺎ ﺷﺪﺕ ﺧﺪﻫﺎ ﺑﻴﺪﻫﺎ ﻭﻗﻌﺪﺕ ﺗﺸﻮﻓﻠﻪ ﺑﺼﺪﻣﻪ ﻭﻫﻮ ﻗﻌﺪ ﻳﺸﺒﺤﻠﻬﺎ ﻭﻳﺘﻨﻔﺲ ﺑﻘﻮﺓ ... ﻫﻴﺎ ﺗﺒﺪﻟﺖ ﻣﻼﻣﺤﻬﺎ ﻟﻠﺒﺮﻭﺩ .. ﻭﻃﻮﻝ ﻃﻠﻌﺖ ﺗﺠﺮﻱ ﻭﻫﻮ ﻟﻠﺤﻈﻪ ﻛﺎﻥ ﻳﺒﻲ ﻳﻔﻮﺗﻬﺎ ﺍﺩﻳﺮ ﺍﻟﻠﻲ ﺑﺪﻳﺮﻩ ﺑﺲ ﻣﺎﻗﺪﺭﺵ .. ﻃﻠﻊ ﻭﺭﺍﻫﺎ ﻟﻘﺎﻫﺎ ﺭﻛﺒﺖ ﺍﻟﺴﻴﺎﺭﺓ ﻭﻃﺎﻟﻌﻪ ﻣﻦ ﺍﻟﻘﺼﺮ .. ﻃﻮﻝ ﻧﺰﻝ ﻳﺠﺮﻱ ﻭﺭﻛﺐ ﺍﻟﺴﻴﺎﺭﻩ ﻭﻃﻠﻊ ﻭﺭﺍﻫﺎ ﻳﺠﺮﻱ ﺑﺎﻟﺴﻴﺎﺭﻩ ... ﻫﻲ ﺗﺠﺮﻱ ﺑﺎﻟﺴﻴﺎﺭﺓ ﻭﻫﻮ ﻭﺭﺍﻫﺎ ﻭﻗﺮﻳﺐ ﻳﻬﺒﻞ ... ﺣﺲ ﺍﻥ ﺍﻟﻮﺿﻊ ﻃﻠﻊ ﻋﻦ ﺳﻴﻄﺮﺗﻪ ..
ﻃﻠﻌﻮﺍ ﻓﻲ ﻃﺮﻳﻖ ﻓﺎﺿﻴﻪ ﻭﻛﺎﻧﺖ ﻣﺎﺗﺸﻮﻑ ﻓﻲ ﺷﻲ ﻗﺪﺍﻣﻬﺎ ﺗﺠﺮﻱ ﻭﺧﻼﺹ .. ﻭﻫﻮ ﻭﺭﺍﻫﺎ ﻳﻜﻠﻜﺲ ﻳﻌﻴﻂ ﺑﻼﻓﺎﻳﺪﻩ ..
ﻋﻔﺲ ﻉ ﺍﻟﻔﺮﺍﻣﻞ ﺑﻘﻮﺓ ﻭﻗﻮﻯ ﺍﻟﺴﺮﻋﻪ ﻭﺗﺠﺎﻭﺯﻫﺎ ﻭﺟﻲ ﻗﺪﺍﻣﻬﺎ ...
ﻫﻲ ﻓﻬﺪﻳﻜﺎ ﺍﺍﻟﻠﺤﻈﻪ ﺍﺳﺘﺎﻗﻀﺖ ﺧﺎﻓﺖ ﻋﻠﻴﻪ ﻟﻮﺿﺮﺑﺎﺗﻪ ﺣﻴﺘﺄﺫﻯ ﺍﻛﺜﺮ ﻣﻨﻬﺎ ﻭﻣﻤﻜﻦ ﺗﺼﻴﺮﻟﻪ ﺣﺎﺟﻪ ﻣﺎﺗﺤﻤﻠﺘﺶ ﺷﺪﺕ ﻓﺮﻳﻨﻮ ﻭﻭﻗﻔﺖ ..
ﻧﺰﻝ ﻣﻦ ﺍﻟﺴﻴﺎﺭﺓ ﻃﻮﻝ ﻭﻣﺸﺎﻟﻬﺎ .. ﻟﻘﺎﻫﺎ ﺣﺎﻃﻪ ﺭﺍﺳﻬﺎ ﻉ ﺍﻟﺪﻭﻣﺎﻥ ﻭﺗﺒﻜﻲ ...
ﻣﻌﺎﻭﻳﻪ ﻓﺘﺢ ﺍﻟﺒﺎﺏ ﻭﻧﺰﻟﻬﺎ ﺑﻌﻨﻒ ﻭﻫﻮ ﺷﺎﺩﻫﺎ ﻣﻦ ﺩﺍﺭﻫﺎ : ﺗﺒﻲ ﺩﻳﺮﻟﻲ ﻣﺼﻴﺒﻪ ﻧﺎﻗﺺ ﻣﺎﻫﻮ .. ﻭﺣﺪﻩ ﻣﺮﻳﻀﻪ ...
ﻭﻫﻲ ﺗﺒﻜﻲ ﻭﻛﻼﻣﻪ ﻳﻨﺰﻝ ﻋﻠﻴﻬﺎ ﺳﻢ ... ﺣﻄﻬﺎ ﻓﻲ ﺍﻟﻜﺮﺳﻲ ﺍﻟﻠﻲ ﺟﻨﺐ ﻛﺮﺳﻲ ﺍﻟﺴﻮﺍﻕ ﻭﺭﻛﺐ ﻫﻮ ﻓﻤﻜﺎﻥ ﺍﻟﺴﻮﺍﻕ ﻭﺳﻜﺮ ﺍﻟﺴﻴﺎﺭﺓ ﻭﺷﻐﻠﻬﺎ ﻫﻲ ﻛﺎﻧﺖ ﺗﺸﻮﻓﻠﻪ ﺑﻨﻈﺮﺓ ﻏﺮﻳﺒﻪ ﻟﻴﻬﺎ ﻫﻠﺒﻪ ﺗﻔﺴﻴﺮﺍﺕ ..
ﻛﻴﻒ ﺟﺎﻱ ﺑﻴﺤﺮﻙ ﺍﻟﺴﻴﺎﺭﻩ ... ﺷﺪﺕ ﻣﻨﻪ ﺩﻭﻣﺎﻥ ﻭﺣﺮﻛﺎﺗﻪ ﻭﻋﻔﺴﺖ ﻉ ﻓﺮﺍﻣﻞ ﺑﻘﻮﺓ ...
ﻣﻌﺎﻭﻳﻪ ﺑﺼﺪﻣﻪ ﺷﺪﻳﺪﻩ : ﺳﺎﺍﺍﺍﺍﺍﻣﻴﻪ ..
ﺳﺎﻣﻴﻪ ﺑﻬﺴﻴﺘﻴﺮﻳﺎ : ﻧﺒﻲ ﻧﻤﻮﻭﻭﻭﺕ ... ﻭﺍﻧﺖ ﻣﻌﺎﺍﺍﺍﻱ ...
ﻣﻜﺎﻧﺶ ﻳﻘﺪﺭ ﻳﺪﻳﺮ ﺷﻲ .. ﻛﻞ ﺷﻲ ﻃﻠﻊ ﻋﻦ ﺍﻟﺴﻴﻄﺮﺓ ﻭﺳﻴﺎﺭﺗﻪ ﺍﻧﺼﺪﻣﺖ ﻓﻲ ﺳﻴﺎﺭﺗﻬﺎ ﺑﻘﻮﺓ ﻭﺧﺸﺖ ﻓﻴﻬﺎ ..
ﺍﻟﻮﻗﺖ ﺍﻟﺤﺎﺿﺮ .
ﺣﻨﺎﻥ ﺗﺒﻜﻲ ..
ﻣﻌﺎﻭﻳﻪ ﻛﻤﻞ ﻭﻫﻮ ﻳﺒﻜﻲ : ﺍﻧﻲ .. ﻏﺒﺖ ﻋﻦ ﺍﻟﻮﻋﻲ ﻭﺧﺸﻴﺖ ﻓﻲ ﻏﻴﺒﻮﺑﻪ ﻗﻌﺪﺕ ﻓﻴﻬﺎ ﻟﻤﺪﺓ ﺷﻬﺮ .. ﺍﻣﺎ ﻫﻲ ... ﻣﺎﺗﺖ ﻭﻗﺘﻲ ..
ﺑﺲ ﻭﺍﻟﻠﻪ ﺍﻟﻌﻈﻴﻢ ﺍﻟﻠﻲ ﺃﻭﻝ ﻣﺮﺓ ﻧﺤﻠﻒ ﺑﻴﻪ ﻓﺤﻴﺎﺗﻲ .. ﺍﻧﻲ ﻣﻜﻨﺘﺶ ﻧﺒﻲ ﻳﺼﻴﺮ ﻫﻜﻲ .. ﺍﻧﻲ ﻣﺎﻛﻨﺘﺶ ﻧﺒﻲ ﻧﻬﺎﻳﺘﻬﺎ ﻫﻜﻲ ﺗﻜﻮﻥ .. ﻣﺎﻛﻨﺘﺶ ﻧﺒﻲ ﻧﺤﺮﻡ ﻣﻬﺎ ﻣﻦ ﺍﻣﻬﺎ .. ﻭﺍﻧﻲ ﻭﺍﻟﻠﻪ ﻭﺍﻟﻠﻪ ﻧﺎﺩﻡ ﺍﺷﺪ ﺍﻟﻨﺪﻡ .. ﻧﺎﺩﻡ .. ﻧﺎﺍﺍﺩﻡ ﻫﻠﺒﻪ ...
ﻭﺑﺪﺕ ﺍﻟﺤﺎﻟﻪ ﺗﺠﻴﻪ ﺭﺍﺳﻪ ﻭﺟﻌﻪ ﻫﻠﺒﻪ ﻭﻗﻌﺪ ﻳﺮﻋﺶ ﻭﻳﻌﺮﻕ ﻣﻊ ﺑﻌﻀﻪ ﻭﺣﺲ ﺑﺒﺮﺩ ﺷﺪﻳﺪ ..
ﺣﻨﺎﻥ ﺧﺎﻓﺖ ﺳﺒﻖ ﻭﺷﺎﻓﺖ ﻫﺎﻟﺤﺎﻟﻪ ﻗﺒﻞ ﻫﻜﻲ ﻧﺎﺿﺖ : ﻭﻳﻦ ﺩﻭﺍﻙ ﻭﻳﻨﻪ ..
ﻣﻌﺎﻭﻳﻪ ﺳﻨﻮﻧﻪ ﻳﺼﻄﻜﻮﺍ ﻓﻲ ﺑﻌﺾ ﻭﻣﺶ ﻗﺎﺩﺭ ﻳﺘﻜﻠﻢ ..
ﺣﻨﺎﻥ ﺗﻠﺨﺒﻄﺖ ﻉ ﺍﻷﺧﺮ .. ﻗﻌﺪﺕ ﺗﺸﺒﺤﻠﻪ ﻭﺑﻌﺪﻳﻦ ﻣﺸﺖ ﺗﺠﺮﻱ ﻭﻫﻲ ﺗﺘﻠﻔﺖ ... ﻧﺰﻟﺖ ﺍﻟﺪﺭﻭﺝ ﻭﻗﻌﺪﺕ ﺗﻨﺎﺩﻱ ﺑﺄﻋﻠﻰ ﺻﻮﺗﻬﺎ : ﻣﺮﻳﻴﻴﻴﻴﻴﻢ ﻣﺮﻳﻴﻴﻴﻴﻴﻴﻴﻴﻴﻢ ....
ﻧﺎﺿﻮﺍ ﺍﻟﻠﻲ ﻓﻲ ﺍﻟﻘﺼﺮ .. ﻭﻣﺮﻳﻢ ﻧﺎﺿﺖ ﺗﺠﺮﻱ ﻃﻠﻌﺖ ﻣﻦ ﺩﺍﺭﻫﺎ ﻭﺟﺘﻬﺎ ..
ﺣﻨﺎﻥ ﺟﺒﺪﺗﻬﺎ ﻣﻦ ﻳﺪﻫﺎ : ﺗﻌﺎﻟﻲ ... ﻭﺷﺒﺤﺖ ﻟﻠﺨﺪﻡ .. ﻭﻗﺎﻟﺖ ﺑﺤﺪﻩ .. ﻣﺎﺣﺪ ﻳﺮﻛﺐ ﻓﻮﻕ ..
ﺭﻛﺒﻮﺍ ﻳﺠﺮﻭﺍ ﻭﺷﺎﻓﺎﺗﻪ ﻣﺮﻳﻢ .. ﻃﻮﻝ ﻣﺸﺖ ﺗﺠﺮﻱ ﻟﺪﺍﺭﻩ ﻭﺧﺸﺘﻠﻬﺎ ﻭﻃﻠﻌﺖ ﺩﻭﺍﻩ ﻣﻦ ﻣﻜﺎﻧﻪ ﻭﺟﺎﺗﻪ ﺑﻴﻪ ﺗﺠﺮﻱ ﻭﻣﻌﺎﻫﺎ ﺣﻨﺎﻥ ...
ﻣﺮﻳﻢ ﺑﺨﻮﻑ ﺷﺪﻳﺪ : ﺧﻮﺩ ﻫﺎﻙ ...
ﺑﺲ ﻫﻮ ﺳﻨﻮﻧﻪ ﻛﺎﻧﻮﺍ ﻣﻄﺒﻘﺎﺕ ﻉ ﺑﻌﺾ .. ﻭﻣﺶ ﻗﺎﺩﺭ ﻳﺘﺤﺮﻙ ﻣﻦ ﺍﻟﺮﻋﺸﻪ ..
ﻣﻌﺮﻓﻮﺵ ﺷﻦ ﻳﺪﻳﺮﻭﺍ ﺣﻨﺎﻥ ﺣﺴﺖ ﺍﻧﻬﺎ ﻻﺯﻡ ﺍﺩﻳﺮ ﺷﻲ ...
ﺣﻨﺎﻥ " ﻳﺎﺭﺏ ﻻﺗﺆﺍﺧﺬﻧﻲ "... ﺣﻄﺖ ﺍﻳﺪﻫﺎ ﻉ ﺭﺍﺳﻪ ﻭﺑﺪﺕ ﺗﻘﺮﺍ ﻓﻲ ﺍﻟﻘﺮﺁﻥ ﺑﻬﺪﻭﺀ ﻉ ﻗﺪ ﻣﺎﺗﻘﺪﺭ ...
ﻣﻌﺎﻭﻳﻪ ﻛﺎﻥ ﻳﺴﻤﻊ ﻓﻲ ﺍﻟﻘﺮﺁﻥ ﺑﺼﻮﺗﻬﺎ ... ﺷﻮﻳﻪ ﺷﻮﻳﻪ ﺍﺭﺗﺨﻲ .. ﻭﺳﻨﻮﻧﻪ ﺍﻧﻔﻜﻮﺍ ﻋﻦ ﺑﻌﺾ .. ﺣﻄﺘﻠﻪ ﻣﺮﻳﻢ ﺍﻟﺤﺒﻪ ﻓﻲ ﻓﻤﻪ ﻭﻫﻮ ﺑﻠﻌﻬﺎ ﻭﻏﻤﺾ ﻋﻴﻮﻧﻪ ﺑﺸﺪﺓ ...
ﺑﻌﺪﺕ ﺣﻨﺎﻥ .. ﻭﻣﺮﻳﻢ ﻧﺎﺿﺖ ﻭﺑﻌﺪﺕ ﺣﺘﻰ ﻫﻲ ... ﺭﻗﺪ ﻉ ﺍﻟﻜﻨﺒﻪ ﺍﻟﻠﻲ ﻛﺎﻥ ﻣﻘﻌﻤﺰ ﻋﻠﻴﻬﺎ ﻭﻛﺎﻥ ﻳﺤﺲ ﺑﺄﻧﻪ ﺻﻘﻌﺎﻥ ﻫﻠﺒﻪ ...
ﻣﺸﺖ ﻣﺮﻳﻢ ﺗﺠﻴﺒﻠﻪ ﺣﺎﺟﻪ ﺗﻐﻄﻴﻪ ﺑﻴﻬﺎ ... ﻭﺣﻨﺎﻥ ﺗﺸﻮﻓﻠﻪ ﻭﻗﻠﺒﻬﺎ ﻣﺘﻘﻄﻊ ﻋﻠﻴﻪ ﻭﺩﻣﻮﻋﻬﺎ ﻳﻨﺰﻟﻮﺍ ... ﻗﺪﺍﺵ ﻳﻌﺎﻧﻲ ﻗﺪﺍﺵ ﻣﺘﺤﻤﻞ ﻗﺪﺍﺵ ﺩﺱ ﻓﻲ ﻗﻠﺒﻪ .. ﻗﺪﺍﺵ ﻛﺎﻧﺖ ﺣﻴﺎﺗﻪ ﺻﻌﺒﻪ ﻭﺍﻥ ﺍﻟﻘﺴﻮﺓ ﺍﻟﻠﻲ ﻋﻨﺪﻩ ﻛﺎﻧﺖ ﻣﺤﺎﻭﻟﻪ ﻹﺧﻔﺎﺀ ﺍﻻﻻﻡ ﻭﺍﻟﺤﺰﻥ ﻟﻠﻲ ﻛﺎﻥ ﻋﺎﻳﺶ ﻓﺪﺍﺧﻠﻪ ..
ﺟﺎﺗﻪ ﻣﺮﻳﻢ ﻏﻄﺎﺗﻪ ﻭﻗﻌﺪﺕ ﺣﺪﺍﻩ ... ﻭﺣﻨﺎﻥ ﻗﻌﻤﺰﺕ ﻣﻌﺎﻫﺎ ..
ﻭﺻﻠﻮﺍ ﺍﻟﺒﻨﺎﺕ ﻟﻠﻘﺼﺮ ﺑﻌﺪ 10 ﺩﻗﺎﻳﻖ ﻣﻨﻲ ﺍﻟﻠﻲ ﺻﺎﺭ .. ﺭﻓﻌﺘﻬﻢ ﻣﺮﻳﻢ ﻷﻣﻬﻢ ﻭﻳﻦ ﻭﻧﺰﻟﺖ ﻭﻫﻤﺎ ﺟﻮﻫﺎ ﺷﺒﺤﻮﺍ ﻟﻤﻌﺎﻭﻳﻪ ﻛﻴﻒ ﺭﺍﻗﺪ ﻓﻲ ﺍﻟﺼﺎﻟﻮﻥ ..
ﻟﺒﻨﻰ ﻭﻫﻲ ﺷﺎﺩﺓ ﻣﺤﻤﺪ : ﻣﺎﻣﺎ ﺷﻦ ﺻﺎﻳﺮ ..
ﺣﻨﺎﻥ ﺧﺪﺕ ﻣﺤﻤﺪ : ﺑﺮﻭﺍ ﺧﺸﻮﺍ ﻟﻤﻬﺎ ... ﺷﻮﻳﻪ ﻭﺟﺎﻳﻪ ..
ﺭﻫﻒ ﻭﻟﺒﻨﻰ ﺷﺒﺤﻮﻟﻬﺎ ﺑﻌﺪﻳﻦ ﺷﺒﺤﻮﻟﻪ ﻭﻣﺸﻮﺍ ﻟﺪﺍﺭ ﻣﻬﺎ .. ﻫﻲ ﻭﻗﻔﺖ ﺷﻮﻳﻪ ﻭﺩﺍﺭﺕ ﻧﻈﺮﺓ ﺍﺧﻴﺮﻩ ﻉ ﻣﻌﺎﻭﻳﻪ ﻗﺒﻞ ﻟﺘﻤﺸﻲ ﻟﺪﺍﺭ ..
ﺍﻃﻤﻨﺖ ﺍﻧﻪ ﺭﺍﻗﺪ ﺑﻌﻤﻖ ﻭﻣﺸﺖ ... ﺣﻤﻮﺩﻱ ﻛﺎﻥ ﻳﺸﺪ ﻓﻲ ﺧﺸﻤﻬﺎ ﻭﻳﻠﻌﺐ ﻋﻠﻴﻬﺎ ﻭﻫﻲ ﺍﺑﺘﺴﻤﺖ ﻭﻗﻌﺪﺕ ﺗﻠﻌﺐ ﻣﻌﺎﻩ .. ﻟﻴﻦ ﺧﺸﺖ ﻟﻠﺪﺍﺭ ﻟﻘﺖ ﻣﻬﺎ ﻧﺎﺿﺖ ﻭﺍﻟﺒﻨﺎﺕ ﻳﺘﺒﺮﺩﻭﺍ ﻋﻠﻴﻬﺎ ﻭﻳﻨﺎﺷﺒﻮﺍ ﻓﻴﻬﺎ ﻭﻫﻲ ﺗﻀﺤﻚ .. ﺍﺑﺘﺴﻤﺖ ﻭﺍﺭﺗﺎﺣﺖ ﺍﻥ ﻣﻬﺎ ﻣﺎﻭﻋﺘﺶ ﺑﺎﻟﻠﻲ ﺻﺎﺭ ﻣﻊ ﺑﻮﻫﺎ ﻷﻥ ﺣﺎﻟﺘﻬﺎ ﻛﺎﻥ ﻣﻤﻜﻦ ﺗﺴﻮﺀ ...
ﻛﺎﻧﻮﺍ ﺭﺍﻗﺪﻳﻦ ﻣﻊ ﺑﻌﻀﻬﻢ ﻉ ﺍﻟﺴﺮﻳﺮ ﺑﺎﻟﻌﺮﺽ ...
ﺣﻨﺎﻥ ﺭﻗﺪﺕ ﻣﺤﻤﺪ ﻭﺗﺤﺎﻭﻝ ﺗﺮﻗﺪ .. ﺟﻨﺒﻬﺎ ﻟﺒﻨﻰ ﻭﻣﻬﺎ ﻭﺭﻫﻒ ..
ﻳﻬﺪﺭﺯﻭﺍ ﺑﻬﻤﺲ
ﻣﻬﺎ : ﺑﺪﺭ ﺍﻟﻤﻨﺼﻮﺭﻱ !!
ﻟﺒﻨﻰ ﺑﺈﺯﺩﺭﺍﺀ : ﺍﻳﻪ ...
ﺭﻫﻒ : ﻭﺍﻟﻠﻪ ﻫﻠﺒﻪ ﻳﺤﺴﺪﻭﻙ ﻉ ﺍﻟﻠﻲ ﺻﺎﺭ ﻟﻚ ﻣﻌﺎﻩ ..
ﻟﺒﻨﻰ : ﻫﺎﺩﻭﻛﻤﺎ ﺍﻟﻬﺎﻳﻔﺎﺕ ﻣﺶ ﺍﻧﻲ ..
ﻣﻬﺎ : ﺍﻧﻲ ﻣﺶ ﺑﺘﺎﻋﺖ ﺍﻟﻜﻼﻡ ﺩﻩ ..
ﺭﻫﻒ : ﺍﻧﺎ ﻛﻨﺖ ﻃﻮﻝ ﻋﻤﺮﻱ ﺟﺎﻣﺪﻩ ..
ﻟﺒﻨﻰ : ﻫﺎ ﻫﺎﻫﺎ
ﻣﻬﺎ ﻭﺭﻫﻒ :
ﺣﻨﺎﻥ : ﺍﺭﻗﺪﻭﺍ ﻳﺎﺍﺍﺳﺮ ..
ﺍﻟﺘﻼﺗﻪ .. :
ﺳﻜﺘﻮﺍ ﻭﺑﻌﺪﻳﻦ ﺷﺒﺤﻮﺍ ﻟﺒﻌﺾ ..
ﺭﻫﻒ ﺑﻬﻤﺲ ﺷﺪﻳﺪ : ﻣﺶ ﺟﺎﻳﻨﻲ ﻧﻮﻡ ..
ﻣﻬﺎ ﺑﻨﻔﺲ ﺍﻟﻨﺒﺮﻩ : ﺣﺘﻰ ﺍﻧﻲ ..
ﻟﺒﻨﻰ : ﻭﺍﻧﻲ ..
ﺣﻨﺎﻥ ﺍﻟﺘﻔﺖ ﻭﻗﻌﺪﺕ ﺗﻀﺮﺏ ﻓﻴﻬﻢ ﺑﺎﻟﻤﺨﺪﻩ : ﺍﺭﻗﺪﻭﺍ ﺍﺭﻗﺪﻭﺍ ﺍﺭﻗﺪﻭﺍ ...
ﺍﻟﺜﻼﺗﻪ ﻗﻌﺪﻭﺍ ﻳﻀﺤﻜﻮﺍ ﻭﻣﺤﻤﺪ ﺍﻧﻔﺰﻉ ﺣﻨﺎﻥ ﻛﺸﺨﺖ ﻋﻠﻴﻬﻢ ﻭﻗﻌﺪﺕ ﺗﺴﻜﺖ ﻓﻴﻪ ﻭﻫﻤﺎ ﻣﺎﺯﺍﻝ ﻳﻀﺤﻜﻮﺍ ..
ﻧﻄﻠﻌﻮﺍ ﺑﺮﺍ ﺍﻟﺪﺍﺭ ... ﻛﺎﻥ ﻭﺍﻗﻒ ﺣﺪﺍ ﺍﻟﺒﺎﺏ ﻭﻳﺴﻤﻊ ﻓﻲ ﺻﻮﺕ ﺿﺤﻜﻬﻢ .. ﻭﻳﻀﺤﻚ ﻭﻫﻮ ﻣﺶ ﻋﺎﺭﻑ ﺍﻟﺴﺒﺐ ..
ﺗﻨﻬﺪ ﺑﺮﺍﺣﻪ ﻭﻧﺰﻝ ﻟﻠﻤﻜﺎﻥ ﺍﻟﻮﺣﻴﺪ ﺍﻟﻠﻲ ﻳﺤﺒﻪ ﻓﻬﺎﻟﻘﺼﺮ ﺍﻟﻜﺒﻴﺮ .
ﻏﺮﻓﺔ ﺍﻟﺒﺎﻳﻨﻮ .. ﻏﺮﻓﺘﻪ ﺍﻟﺨﺎﺻﻪ .. ﻓﺘﺢ ﺍﻟﺒﺎﺏ ﻭﺧﺶ .. ﻭﻣﺸﻲ ﻧﺎﺣﻴﺔ ﺍﻟﺒﻴﺎﻧﻮ ... ﻓﺘﺢ ﺍﻟﻐﻄﺎ ﻭﻗﻌﺪ ﻳﺘﻤﻌﻦ ﻓﻴﻪ ﺑﻌﺪﻳﻦ ﺍﺑﺘﺴﻢ ﻭﺣﻂ ﺍﻳﺪﻳﻪ ﻋﻠﻴﻪ ﻭﺑﺪﺕ ﺻﻮﺍﺑﻌﻪ ﺗﻠﻌﺐ ﻉ ﺍﻟﻤﻔﺎﺗﻴﺤﻪ ﻭﺗﻌﺰﻑ ﻓﻲ ﺍﻟﺤﺎﻥ ﻣﺸﺎﻋﺮﻩ ﺍﻟﺤﻠﻮﺓ ﺍﻟﻠﻲ ﻛﺎﻥ ﻳﺤﺲ ﺑﻴﻬﺎ ... ﻳﻌﺰﻑ ﻭﻳﻌﺰﻑ ﻭﻛﺎﻧﺖ ﺍﻟﻤﻮﺳﻴﻘﻰ ﺣﻠﻮﻭﻭﻭﺓ ﺑﺎﻟﻤﺮﺓ
🀼
ﻓﻮﻕ ﻛﺎﻧﻮﺍ ﻳﺴﻤﻌﻮﺍ ﻣﻨﺴﺠﻤﻴﻦ ..
ﻟﺒﻨﻰ : ﻳﻬﺒﺒﺒﻞ ﻋﺰﻓﻪ ..
ﺭﻫﻒ : ﺣﻠﻮﻭﻭ ...
ﻣﻬﺎ : ﻫﻮ ﻳﺤﺐ ﻳﻌﺰﻑ ﻉ ﺍﻟﺒﻴﺎﻧﻮ ... ﻭﻋﻨﺪﻩ ﻣﻴﺰﺓ ﻟﻤﺎ ﻳﻌﺰﻑ ﺍﻻﻟﺤﺎﻥ ﺍﻟﻠﻲ ﻳﻌﺰﻓﻬﺎ ﻳﺄﻟﻔﻬﺎ ﻫﻮ ﻉ ﺣﺴﺐ ﺍﺣﺴﺎﺳﻪ ..
ﺣﻨﺎﻥ ﻋﺎﻃﻴﺘﻬﻢ ﺑﺎﻟﻈﻬﺮ ﻳﺤﺎﺳﺒﻮﻫﺎ ﺭﺍﻗﺪﻩ ﺑﺲ ﻛﺎﻧﺖ ﻧﺎﻳﻀﻪ ﻭﻣﺮﻛﺰﺓ ..
ﻟﺒﻨﻰ : ﺍﻟﻠﻪ !
ﻣﻬﺎ : ﺍﻳﻪ ﻭﻳﻨﺴﺎﻫﺎ ﺑﻌﺪ ﻣﺎﻳﻜﻤﻞ ﻋﺰﻑ ..
ﺭﻫﻒ : ﺳﺒﺤﺎﻥ ﺍﻟﻠﻪ ...
ﺣﻨﺎﻥ ﺍﺑﺘﺴﻤﺖ ﻭﻏﻤﻀﺖ ﻋﻴﻮﻧﻬﺎ ﻭﺗﺴﻤﻊ ﻓﻲ ﻋﺰﻓﻪ ﺍﻟﻠﻲ ﻛﺎﻥ ﻭﺍﺻﻞ ﻟﻤﺴﺎﻣﻊ ﻗﻠﺒﻬﺎ ﻗﺒﻞ ﻭﺫﺍﻧﻬﺎ ...
.... ﻳﺘﺒﻊ
