ﺕ # ﻣﻮﺳﻢ _ ﺍﻟﺘﻮﻟﻴﺐ
# ﺟﻤﺎﻥ _ ﻓﺮﻳﺪ
# ﺍﻟﺠﺰﺀ 25_
ﻧﻀﺎﻝ ﻓﻲ ﺍﻟﻤﺴﺘﺸﻔﻰ ﺗﺘﻮﺍﻟﻲ ﻋﻠﻴﻪ ﺍﻟﺰﻳﺎﺭﺍﺕ ﺍﺻﺪﻗﺎﺀ ﻣﻌﺎﺭﻑ ﺑﻴﻦ ﺯﻣﻼﺀ ﻭﺷﺨﺼﻴﺎﺕ ﻣﻬﻤﻪ ..
ﺍﻟﺒﻨﺎﺕ ﻳﻮﻣﻴﺎ ﻋﻨﺪ ﺑﻮﻫﻢ ﻓﻲ ﺍﻟﻤﺴﺘﺸﻔﻰ ﺍﻣﺎ ﺣﻨﺎﻥ ﻣﻦ ﻳﻮﻣﻬﺎ ﻣﻌﺎﺵ ﺟﺖ .. ﻗﻌﺪﺕ ﻻﻫﻴﻪ ﺑﺨﺪﻣﺘﻬﺎ ..
ﻣﻌﺎﻭﻳﻪ ﻣﻌﺎﻣﻠﺘﻪ ﻣﻌﺎﻫﺎ ﺭﺟﻌﺖ ﺭﺳﻤﻴﻪ ﺍﻛﺜﺮ ﻣﻦ ﻗﺒﻞ ﻫﻲ ﻻﺣﻈﺖ ﺑﺲ ﻣﺎﺃﻫﺘﻤﺘﺶ ﻓﻲ ﺑﺎﻟﻬﺎ ﺳﺘﻴﻦ ﺣﺎﺟﻪ ﺗﻔﻜﺮ ﻓﻴﻬﺎ ..
ﻓﻲ ﺍﻟﻤﺴﺘﺸﻔﻰ ...
ﺭﻫﻒ ﻛﺎﻧﺖ ﻧﺎﺯﻟﻪ ﺗﺤﺖ ﺑﺘﺎﺧﺪ ﺣﺎﺟﻪ ﻣﻦ ﺍﻟﻜﺎﻓﺘﻴﺮﻳﺎ ...
ﻭﺍﻗﻔﻪ ﻭﻗﺪﺍﻣﻬﺎ ﺯﻭﺯ ﻃﺒﻴﺒﺎﺕ ﺍﻟﺒﺎﻳﻦ ﻳﺴﺘﻨﻮﺍ ﻓﻲ ﺍﻟﻄﻠﺐ ﻣﺘﺎﻋﻬﻢ ... ﻭﻛﺎﻧﻮﺍ ﻳﻬﺪﺭﺯﻭﺍ ...
: ﻳﻬﺒﻞ ﻳﺎﺑﻨﺘﻲ ﺧﻴﺎﻝ ﻓﻲ ﻛﻞ ﺷﻲ ﺑﺎﻟﺬﺍﺕ ﻋﻮﻳﻨﺎﺗﻪ ..
: ﻏﻴﺮ ﻣﺨﻄﻮﺑﻪ ﻛﺎﻥ ﻫﺬﺍ ﻣﺎﻓﻠﺘﺎﺵ .. ﺍﺧﺪﻣﻲ ﻉ ﺭﺍﺳﻚ ﻭﻃﻴﺤﻴﻪ ..
: ﺯﻋﻤﻪ ﻣﺶ ﻣﺮﺗﺒﻂ ..
: ﻻﺍﻻ ﺳﻨﻘﻮﻝ ..
: ﺍﺳﻨﺎﻡ ﺳﻨﻘﻞ ﻣﺘﺄﻛﺪﻩ
: ﻫﻮ ﺑﺮﻭﺣﻪ ﻗﺎﻟﻬﺎ ..
ﺿﺤﻜﺖ : ﻳﺎﺍﺍﺭﺑﻲ ...
ﺭﻫﻒ " ﻣﻌﻘﻮﻟﻪ ﻗﺎﻳﻞ ﺍﻧﻪ ﻣﺶ ﺧﺎﻃﺐ .. ﺑﺎﻫﻲ ﻋﻼﺵ "
ﺧﺪﺕ ﺍﻟﻄﻠﺐ ﻣﺘﺎﻋﻬﺎ ﻭﺭﻛﺒﺖ ﺑﻴﻪ ﻭﻛﻴﻒ ﻭﺻﻠﺖ ﻟﻘﺖ ﻣﻬﺎﺏ ﻭﻣﻌﺎﻩ ﺭﺍﺟﻞ ﻛﺒﻴﺮ ﻓﻲ ﺍﻟﻌﻤﺮ ... ﺷﺎﻓﻬﺎ ﻣﻬﺎﺏ ﻧﺎﺩﺍﻫﺎ ﺟﺎﺗﻪ ..
ﺭﻫﻒ : ﻣﺴﺎﺀ ﺍﻟﺨﻴﺮ ..
ﻣﻬﺎﺏ ﻭﺍﻟﺮﺍﺟﻞ : ﻣﺴﺎﺀ ﺍﻟﺨﻴﺮ ..
ﻣﻬﺎﺏ ﺑﺈﺑﺘﺴﺎﻣﻪ : ﺳﻠﻤﻲ ﻉ ﻋﻤﻚ ..
ﺭﻫﻒ ﺗﺤﺸﻤﺖ ﻭﺍﺑﺘﺴﻤﺖ ﻭﻣﺪﺕ ﻳﺪﻫﺎ : ﺍﻫﻼ ﻭﺳﻬﻼ ﻋﻤﻲ ﻛﻴﻒ ﺣﺎﻟﻚ ..
ﻋﺜﻤﺎﻥ ﺑﻮﻣﻬﺎﺏ : ﺍﻫﻼ ﻳﺎﺑﻨﺘﻲ ﺍﻟﺤﻤﺪ ﻟﻠﻪ .. ﻛﻴﻒ ﺣﺎﻟﻚ ﺍﻧﺘﻲ
ﺭﻫﻒ : ﺍﻟﺤﻤﺪ ﻟﻠﻪ ...
ﻋﺜﻤﺎﻥ : ﺍﻟﺤﻤﺪ ﻟﻠﻪ ﻉ ﺳﻼﻣﺔ ﺍﻟﻮﺍﻟﺪ
ﺭﻫﻒ : ﺍﻟﻠﻪ ﻳﺴﻠﻤﻚ ﻳﺎﺭﺏ ..
ﻣﻬﺎﺏ : ﻫﻴﺎ ﺣﻨﻰ ﻣﺎﺷﻴﻠﻪ ﺗﻌﺎﻟﻲ ﻣﻌﺎﻧﺎ ..
ﺭﻫﻒ : ﻫﻴﺎ .. ﻭﻣﺸﻮﺍ ﺍﻟﺜﻼﺗﻪ ﻣﻊ ﺑﻌﺾ ... ﻭﻳﻦ ﺧﺸﻮﺍ .. ﺗﻔﺎﺟﺌﺖ ﺭﻫﻒ ﺑﺄﺳﻨﺎﻡ ﻭﺑﻮﻩ ﻋﻨﺪ ﺑﻮﻫﺎ .. ﻭﻣﻬﺎﺏ ﺍﻟﻠﻲ ﺍﻧﺼﺪﻡ ﺭﻗﻴﺘﻠﻪ ﻫﻠﺒﻪ ..
ﻗﻌﺪﻭﺍ ﻭﺍﻗﻔﻴﻦ ﻳﻬﺪﺭﺯﻭﺍ ﻉ ﻧﻀﺎﻝ .. ﻭﺃﺳﻨﺎﻡ ﻣﺮﺓ ﻣﺮﺓ ﻳﺸﺒﺢ ﻟﺮﻫﻒ ﺗﻬﺪﺭﺯ ﻣﻊ ﻣﻬﺎﺏ ﻭﻗﻠﺒﻪ ﻭﺍﻟﻌﻪ ﻓﻴﻪ ﺍﻟﻨﺎﺭ ﻭﻣﺘﺤﺸﻢ ﻳﻄﻠﻊ ...
ﻣﻬﺎﺏ : ﺗﻌﺎﻟﻲ ﻧﻌﺮﻓﻚ ﻋﻠﻴﻬﺎ ..
ﺭﻫﻒ : ﺑﺎﻫﻲ ..
ﻣﻬﺎﺏ : ﻧﺴﺘﺄﺫﻥ ﺑﻨﺎﺧﺪ ﺭﻫﻒ ﻧﻌﺮﻓﻬﺎ ﻉ ﺧﺎﻟﺘﻲ ﺩﻛﺘﻮﺭﺓ ﻫﻨﻲ ..
ﻧﻀﺎﻝ ﺍﺑﺘﺴﻢ : ﻣﺎﻓﻴﺶ ﻣﺸﻜﻠﻪ ﺧﻄﻴﺒﺘﻚ ..
ﺍﺳﻨﺎﻡ ﺑﻴﻤﻮﺕ .. ﻭﺑﻮﻩ ﺷﺒﺤﻠﻪ ﻛﻴﻒ ﻳﺸﻮﻓﻠﻬﻢ ﻭﺷﺒﺢ ﻟﺮﻫﻒ ﻭﻣﻬﺎﺏ ..
ﻣﻬﺎﺏ ﺑﻀﺤﻜﻪ : ﻣﺎﻻ ﻧﺴﺘﺄﺫﻧﻮﻛﻢ .. ﻫﻴﺎ ﺭﻫﻒ ...
ﺭﻫﻒ : ﻋﻦ ﺇﺫﻧﻜﻢ .. ﻭﻃﻠﻌﻮﺍ ﻣﻊ ﺑﻌﺾ ..
ﻋﺜﻤﺎﻥ : ﻣﺎﺷﺎﺀ ﺍﻟﻠﻪ ﻋﻠﻴﻬﺎ ﺍﺧﻼﻕ ﻭﺍﺩﺏ ﻭﻧﻌﻢ ﺍﻟﺘﺮﺑﻴﻪ ..
ﻧﻀﺎﻝ ﺍﺑﺘﺴﻢ : ﺑﺎﺭﻙ ﺍﻟﻠﻪ ﻓﻴﻚ ..
ﻣﺠﺮﺑﻴﻦ ﻗﺒﻞ ﺷﻌﻮﺭ ﻟﻤﺎ ﺗﺤﺒﻮﺍ ﺣﺪ ﺣﺐ ﻣﺶ ﻋﺎﺩﻱ ﻭﻣﺎﻗﺪﺭﺗﻮﺵ ﺗﺒﻮﺣﻮﺍ ﻟﺴﺒﺐ ﺃﻭ ﻷﺧﺮ .. ﻭﻳﻜﻮﻥ ﻟﺤﺪ ﺗﺎﻧﻲ ﺗﺸﻮﻓﻮﻩ ﻛﻴﻒ ﻳﻀﺤﻚ ﻣﻌﺎﻩ ﻭﻳﻬﺪﺭﺯﻭﺍ ﻳﻘﺪﺭ ﻳﺎﺧﺪﻩ ﻣﻌﺎﻩ ﻭﻳﻦ ﻣﺎﻳﺒﻲ ﻷﻧﻪ ﻣﺴﻤﻮﺣﻠﻪ ﻷﻧﻪ ﻣﻠﻜﻪ .. ﻭﺍﻧﺖ ﺍﻟﻠﻲ ﺗﺤﺒﻪ ﺃﻛﺜﺮ ﻣﻦ ﺍﻱ ﺣﺪ ﻓﻲ ﺍﻟﺪﻧﻴﺎ ﻣﺎﺗﻤﻠﻜﺶ ﻓﻴﻪ ﺣﺘﻰ ﺣﻖ ﺍﻟﻨﻈﺮ ... ﻗﻬﺮﺓ ﻭﻭﺍﻋﺮﺓ ﻫﻠﺒﻪ ﺍﻟﻠﻲ ﻣﺠﺮﺏ ﻫﺎﻟﺸﻌﻮﺭ ﻫﻮ ﺑﺲ ﺍﻟﻠﻲ ﻳﻔﻬﻤﻪ ..
ﻣﻬﺎﺏ ﻋﺮﻑ ﺭﻫﻒ ﻉ ﺧﺎﻟﺘﻪ ﺍﻟﻠﻲ ﺍﻋﺠﺒﺖ ﺑﺮﻫﻒ ﻫﻠﺒﻪ ﻫﺪﺭﺯﻭﺍ ﺷﻮﻳﻪ ﺑﻌﺪﻳﻦ ﻣﺸﺖ ﻹﻥ ﻋﻨﺪﻫﺎ ﺣﺎﻻﺕ ...
ﺧﺪﻱ ﻣﻬﺎﺏ ﺭﻫﻒ ﻭﻗﻌﻤﺰ ﻫﻮ ﻭﻳﺎﻫﺎ ﺑﺮﺍ ..
ﻣﻬﺎﺏ : ﻭﻫﺎﺩﻭﺍ ﻳﺎﺳﺘﻲ ﻋﻼﻗﺎﺕ ﺍﻟﺤﺐ ﺍﻟﻠﻲ ﺩﺭﺗﻬﺎ ﻗﺒﻞ ..
ﺭﻫﻒ : ﻫﻬﻬﻬﻬﻪ ﺣﺐ ﻃﻔﻮﻟﻲ ..
ﻣﻬﺎﺏ ﺑﻀﺤﻜﻪ : ﻣﺸﺎﻋﺮ ﻭﻋﺸﻨﺎﻫﺎ .. ﺷﺒﺤﻠﻬﺎ .. ﻟﻜﻦ ﺍﻧﺘﻲ ﻋﻤﺮ ﻧﺒﻲ ﻧﻌﻴﺸﻪ ﻣﺶ ﻣﺸﺎﻋﺮ ﺑﺲ ..
ﺭﻫﻒ ﺗﺤﺸﻤﺖ : ﻣﻬﺎﺏ !!
ﻣﻬﺎﺏ : ﻫﻬﻬﻬﻬﻬﻬﻬﻪ
ﺍﺳﻨﺎﻡ ﻛﺎﻥ ﻃﺎﻟﻊ ﻳﺴﻘﺪ ﻓﻲ ﺑﻮﻩ ... ﺟﺖ ﻋﻴﻨﻪ ﻋﻠﻴﻬﻢ ﻛﻴﻒ ﻣﻬﺎﺏ ﻳﺘﻜﻠﻢ ﻭﻳﻀﺤﻚ ﻭﺭﻫﻒ ﻭﺍﺿﺢ ﺍﻧﻬﺎ ﻣﺘﺤﺸﻢ .. ﺑﻠﻊ ﺭﻳﻘﻪ ﻭﺗﻤﺎﻟﻚ ﻧﻔﺴﻪ ﺑﻮﻩ ﻛﺎﻥ ﻳﺸﻮﻓﻠﻬﻢ ﻭﻳﺸﻮﻓﻠﻪ ..
ﺭﺷﻴﺪ : ﻧﺼﻴﺐ ..
ﺍﺳﻨﺎﻡ ﺷﺒﺢ ﻟﺒﻮﻩ ﻭﺍﻏﺘﺼﺐ ﺃﺑﺘﺴﺎﻣﻪ ﻉ ﻭﺟﻬﻪ : ﺍﻳﻪ ... ﻳﻠﻼ ﻳﺎﺩﻛﺘﻮﺭ ﻣﺮﺿﺎﻙ ﻳﺴﺘﻨﻮﺍ ﻓﻴﻚ ..
ﺭﺷﻴﺪ : ﺣﺘﻰ ﺍﻧﺖ ﺍﻟﻬﻰ ﺑﺨﺪﻣﺘﻚ ﻭﺣﻴﺎﺗﻚ ..
ﺍﺳﻨﺎﻡ : ﺍﻥ ﺷﺎﺀ ﺍﻟﻠﻪ ...
ﻃﺒﻄﺐ ﺭﺷﻴﺪ ﻉ ﻛﺘﻒ ﻭﻟﺪﻩ ﻭﻣﺸﻲ ... ﻭﺃﺳﻨﺎﻡ ﻟﻒ ﺑﻴﻤﺸﻲ ﺑﺲ ﻣﺶ ﻗﺎﺩﺭ ﻣﺎﻳﺸﻮﻓﻠﻬﻤﺶ ﻭﻛﺄﻧﻪ ﻏﺎﻭﻱ ﻳﻌﺬﺏ ﻧﻔﺴﻪ .. ﺟﺖ ﻋﻴﻨﻪ ﻓﻌﻴﻦ ﺭﻫﻒ ﻏﻴﺮ ﻋﻴﻮﻧﻪ ﺍﻟﻘﺪﺍﻡ ﻭﺧﺶ ﺩﺍﺧﻞ ﻭﻣﻬﺎﺏ ﻻﺣﻆ
ﻣﻬﺎﺏ : ﺭﻫﻮﻓﻪ
ﺭﻫﻒ ﺷﺒﺤﺘﻠﻪ : ﻧﻌﻢ ..
ﻣﻬﺎﺏ : ﻋﻨﺪﻱ ﺭﺟﺎﺀ ﻟﻴﻚ ..
ﺭﻫﻒ : ﺷﻦ ﻫﻮ ..
ﻣﻬﺎﺏ : ﻋﻼﻗﺘﻚ ﺑﺄﺻﺪﻗﺎﺋﻚ ﺍﻟﺸﺒﺎﺏ ﺧﻔﻔﻲ ﻣﻨﻬﺎ ..
ﺭﻫﻒ : ﻗﺼﺪﻙ ﺍﺳﻨﺎﻡ ﻭﻟﺆﻱ ..
ﻣﻬﺎﺏ : ﻫﻤﺎ ﺍﻭﻏﻴﺮﻫﻢ .. ﻧﻔﻀﻞ ﺍﻧﻚ ﺗﻘﻄﻌﻴﻬﺎ .. ﺑﺲ ﻣﺎﻧﻘﺪﺭﺵ ﻧﺠﺒﺮﻙ ﻉ ﺷﻲ ﺯﻱ ﻫﺬﺍ .. ﺑﺲ ﺧﻔﻴﻔﻬﺎ ﻣﻦ ﺑﺎﺏ ﺍﻹﺣﺘﺮﺍﻡ ﻟﻴﺎ ..
ﺭﻫﻒ ﺗﻨﻬﺪﺕ : ﻫﻜﻲ ﻭﻻﻫﻜﻲ ﺧﻔﺖ ﺍﺻﻼ .. ﻭﺑﻌﺪﻳﻦ ﻣﺎﻋﻨﺪﻙ ﻋﻼﺵ ﺗﻐﺎﺭ ﻣﻨﻬﻢ ﻟﺆﻱ ﻭﻳﺤﺐ ﺻﺎﺣﺒﺘﻲ ﻭﺣﻴﺨﻄﺒﻬﺎ ﻋﻦ ﻗﺮﻳﺐ ﻭﺃﺳﻨﺎﻡ ﺧﺎﻃﺐ ..
ﺍﺗﻔﺎﺟﺄ ﻣﻬﺎﺏ : ﺧﺎﻃﺐ؟ !!
ﺭﻫﻒ : ﺍﻳﻪ ﻣﺎﺗﻌﺮﻓﺶ؟
ﻣﻬﺎﺏ : ﻣﻨﻚ ﻧﺴﻤﻊ ..
ﺭﻫﻒ : ﻣﺴﺘﻐﺮﺑﻪ ﻛﻴﻒ ﻣﺎﻗﺎﻟﺶ ﺍﻟﻴﻮﻡ ﺳﻤﻌﺖ ﺩﻛﺘﻮﺭﺍﺕ ﻳﺨﺪﻣﻮﺍ ﻫﻨﻲ ﻳﻬﺪﺭﺯﻭﺍ ﻋﻠﻴﻪ ﻗﺎﻟﻮﺍ ﺳﻨﻘﻞ ﻗﺎﻟﻮﺍ ﻗﺎﻟﻬﺎ ﺑﺮﻭﺣﻪ ..
ﻣﻬﺎﺏ ﺭﻓﻊ ﺣﺎﺟﺒﻪ ﻭﺍﺑﺘﺴﻢ ﺑﻤﻜﺮ : ﻣﻌﻨﺎﻫﺎ ﻫﻮ ﻣﻦ ﻫﺪﻳﻜﺎ ﺍﻟﻨﻮﻋﻴﻪ ..
ﺭﻫﻒ : ﻧﻮﻋﻴﻪ ﺷﻨﻮ؟ !!
ﻣﻬﺎﺏ : ﻫﺪﻭﻛﻢ ﺍﻟﺮﺟﺎﻟﻪ ﺍﻟﻠﻲ ﻣﺎﻳﺒﻮﺵ ﻳﺒﻴﻨﻮﺍ ﺍﻧﻬﻢ ﻣﺮﺗﺒﻄﻴﻦ ﺑﺶ ﻣﺎﻳﺨﺴﺮﻭﺵ ﺍﻟﻔﺎﻧﺰ ..
ﺭﻫﻒ : ﻣﺴﺘﺤﻴﻞ ﺍﺳﻨﺎﻡ ﻣﺶ ﻫﻜﻲ .
ﻣﻬﺎﺏ ﺍﺗﻜﻨﻄﺎ ﺑﺲ ﺗﻤﺎﻟﻚ ﻧﻔﺴﻪ : ﺍﻧﺘﻲ ﻃﻴﺒﻪ ﻳﺎﺭﻫﻒ .. ﻭﺗﺤﻜﻤﻲ ﻉ ﺍﻟﻨﺎﺱ ﺑﺤﺴﻦ ﺍﻟﻨﻴﻪ ﺍﻟﻠﻲ ﻋﻨﺪﻙ .. ﻓﺴﺮﻳﻠﻲ ﻛﻴﻒ ﻳﻜﻮﻥ ﺧﺎﻃﺐ ﻭﻳﻘﻮﻝ ﺍﻧﻪ ﻣﺶ ﻣﺮﺗﺒﻂ ﻭﻟﻠﺒﻨﺎﺕ ﺗﺤﺪﻳﺪﺍ؟ !
ﺭﻫﻒ ﺷﺒﻪ ﺍﻗﺘﻨﻌﺖ ﻭﺑﺄﺳﻒ : ﺻﺢ .. ﻣﺎﻓﻴﺶ ﺗﻔﺴﻴﺮ ﺗﺎﻧﻲ ... ﺷﺒﺤﺘﻠﻪ .. ﻭﺍﻧﺖ ﻣﺪﺍﻳﺮ ﺯﻳﻪ ..
ﻣﻬﺎﺏ ﺑﻀﺤﻜﻪ : ﺍﻧﻲ ﻧﻤﺸﻲ ﻭﻧﻘﻮﻝ ﻓﻴﻬﺎ ﻟﻠﻲ ﻧﻠﻘﺎﻩ ﻓﻲ ﻃﺮﻳﻘﻲ .. ﻗﺮﻳﺐ ﺣﺘﻰ ﻟﺒﺎﻟﻮﺍﺕ ﺍﻟﺸﻮﺍﺭﻉ ... ﺗﻌﺮﻓﻲ .. ﻗﺒﻞ ﻛﻨﺖ ﻧﺎﻭﻱ ﻧﺪﻳﺮﻟﻚ ﺑﻴﺎﻥ ﺧﻼﻝ ﻫﺎﻟﻔﺘﺮﺓ ..
ﺭﻫﻒ : ﺑﻴﺎﻥ؟ !!
ﻣﻬﺎﺏ : ﺍﻳﻪ ﻗﺒﻞ ﺍﻣﻲ ﺑﺘﻜﻠﻢ ﺍﻣﻚ ﻋﻠﻴﻪ .. ﺑﺲ ﺻﺎﺭ ﺍﻟﻠﻲ ﺻﺎﺭ ..
ﺭﻫﻒ : ﻣﺶ ﻻﺯﻡ ..
ﻣﻬﺎﺏ : ﺷﻨﻮ ﻫﻮ ﺍﻟﻠﻲ ﻣﺶ ﻻﺯﻡ ؟ ! ﻣﺎﺯﺍﻝ ﻉ ﺍﻟﻌﺮﺱ ﻗﺮﻳﺐ ﺳﻨﻪ ﻻﺯﻡ ﻧﺪﻳﺮﻟﻚ ﺑﻴﺎﻥ ﻳﻠﻴﻖ ﺑﻴﻚ ﻭﻧﻠﺒﺴﻚ ﺍﻹﺛﺒﺎﺕ ﻟﻤﻠﻜﻴﺘﻲ ﻓﻴﻚ ..
ﺭﻫﻒ ﺑﺄﺳﺘﻐﺮﺍﺏ : ﺍﺛﺒﺎﺕ ﻣﻠﻜﻴﺘﻚ ..
ﻣﻬﺎﺏ ﺑﻀﺤﻜﻪ : ﺍﻟﺪﺑﻠﻪ ..
ﺭﻫﻒ ﺿﺤﻜﺖ ..
ﻭﻫﻮ ﻳﺸﻮﻑ ﻓﻴﻬﻢ ﻣﻦ ﻓﻮﻕ ﻭﻳﺰﻳﺪ ﻳﻨﻘﻬﺮ .. ﻣﺶ ﻗﻠﺖ ﻏﺎﻭﻱ ﻳﻌﺬﺏ ﺭﻭﺣﻪ
***
ﺧﺸﺖ ﻟﻠﺸﺮﻛﻪ ﺑﻌﺪ ﻣﺎﻛﺎﻧﺖ ﻓﻲ ﻣﻮﻗﻊ ﺍﻟﻤﺸﺮﻭﻉ .. ﺭﻛﺒﺖ ﻟﻠﺪﻭﺭ ﺍﻟﺜﺎﻟﺖ .. ﻭﻫﻲ ﻣﺎﺷﻴﻪ ﺗﻼﻗﺖ ﻣﻊ ﺍﻟﺴﻜﺮﺗﻴﺮﻩ ..
ﺣﻨﺎﻥ : ﺍﻟﺴﻼﻡ ﻋﻠﻴﻜﻢ ..
ﻓﺎﺩﻳﻪ : ﻭﻋﻠﻴﻜﻢ ﺍﻟﺴﻼﻡ .. ﻣﻌﻠﻴﺸﻲ ﺑﺶ ﻣﻬﻨﺪﺳﻪ ﻣﺴﺘﻌﺠﻠﻪ ﻓﻲ ﺍﺟﺘﻤﺎﻉ ...
ﺣﻨﺎﻥ ﺍﺑﺘﺴﻤﺖ : ﺗﻤﺎﻡ .. ﻣﺸﺖ ﺍﻟﺴﻜﺮﺗﻴﺮﻩ ﺗﺠﺮﻱ .. ﻭﺣﻨﺎﻥ ﺧﺸﺖ ﻟﻤﻜﺘﺐ ﺍﻟﺴﻜﺮﺗﻴﺮﻩ ﻭﻗﻌﻤﺰﺕ ﺗﺴﺘﻨﻰ ...
ﻗﻌﺪﺕ ﺣﻮﺍﻟﻲ ﺳﺎﻋﻪ .. ﻭﺑﻌﺪﻫﺎ ﺷﺎﻓﺖ ﻣﻦ ﺣﺎﺟﺰ ﺍﻟﺰﺟﺎﺝ .. ﻣﻌﺎﻭﻳﻪ ﻃﻠﻊ ﻭﻭﺭﺍﻩ ﺍﻳﻤﻦ ﺑﻤﻠﻒ ﻳﺘﻨﺎﻗﺸﻮﺍ ﻭﻭﺭﺍﻫﻢ ﺇﻗﺒﺎﻝ ﻭﻣﺠﻤﻮﻋﻪ ﻣﻮﻇﻔﻴﻦ ...
ﺣﺴﺖ ﺍﻧﻪ ﻣﺸﻐﻮﻝ .. ﺟﺘﻬﺎ ﺍﻟﺴﻜﺮﺗﻴﺮﺓ ... ﺧﺸﺖ ﻟﻤﻜﺘﺒﻬﺎ ..
ﻓﺎﺩﻳﻪ : ﺍﺳﺘﻨﻴﺘﻲ ﻉ ﺍﻟﻔﺎﺿﻲ .. ﻣﺎﺷﻴﻴﻦ ﻟﻠﻮﺯﺍﺭﻩ ..
ﺣﻨﺎﻥ : ﺷﻜﻠﻪ ﻣﺸﻐﻮﻝ ﻫﻠﺒﻪ ...
ﻓﺎﺩﻳﻪ ﻗﻌﻤﺰﺕ : ﺍﻟﻴﻮﻡ ﻋﺎﻟﻤﻲ .. ﺟﺮﻱ ﻓﺠﺮﻱ .. ﻭﻏﻴﺮ ﻫﻜﻲ ﻓﻲ ﻣﻨﺪﻭﺑﻴﻦ ﻣﻦ ﺷﺮﻛﻪ ﺍﺟﻨﺒﻴﻪ ﺑﻴﺘﻌﺎﻗﺪ ﻣﻌﺎﻫﻢ ﺑﺨﺼﻮﺹ ﺍﻟﻜﻬﺮﺑﺎﺀ ﻟﻤﺸﺮﻭﻉ ﺍﻟﻤﻨﺘﺠﻊ ..
ﺣﻨﺎﻥ : ﻳﻌﻨﻲ ﺍﻣﺘﻰ ﻧﻘﺪﺭ ﻧﺸﻮﻓﻪ ..
ﻓﺎﺩﻳﻪ : ﺑﻌﺪ ﺍﻹﺟﺘﻤﺎﻉ ﺑﺎﻟﺸﺮﻛﻪ ﺍﻷﺟﻨﺒﻴﻪ .. ﻳﻌﻨﻲ ﺑﻌﺪ ﺗﻼﺗﻪ ﺳﺎﻋﺎﺕ ﻣﻦ ﺗﻮﺍ ...
ﺣﻨﺎﻥ ﻧﺎﺿﺖ : ﺗﻤﺎﻡ ﺧﻞ ﻧﻤﺸﻲ ﻧﻘﻀﻲ ﺍﺷﻐﺎﻝ ﻋﻨﺪﻱ ﻭﻧﻮﻟﻲ ...
ﻓﺎﺩﻳﻪ ﺑﺈﺑﺘﺴﺎﻣﻪ : ﻛﻮﻳﺲ ..
***
ﻓﻲ ﺍﻟﻤﺴﺘﺸﻔﻰ ..
ﻧﻀﺎﻝ ﻗﺎﻋﺪ ﺑﺮﻭﺣﻪ ﻳﻤﻀﻲ ﻓﻮﻗﺘﻪ ﺑﺎﻟﻘﺮﺍﺀﺓ .. ﻣﻘﻌﻤﺰ ﻉ ﺳﺮﻳﺮﻩ ﻭﻻﺑﺲ ﻧﻈﺮﺍﺗﻪ ﻭﻳﻘﺮﺍ ... ﻃﻖ ﺍﻟﺒﺎﺏ ...
ﻧﻀﺎﻝ : ﺧﺶ ..
ﺍﺳﺎﻣﻪ ﺑﺈﺑﺘﺴﺎﻣﻪ : ﺍﻟﺤﻤﺪ ﻟﻠﻪ ﺣﺎﻟﻚ ﺗﺤﺴﻦ ﻫﻠﺒﻪ ..
ﻧﻀﺎﻝ ﺻﻜﺮ ﺍﻟﻜﺘﺎﺏ : ﺑﺎﻫﻲ ﺍﻟﻠﻲ ﺟﻴﺖ .. ﺗﻌﺎﻟﻰ ..
ﺻﻜﺮ ﺍﺳﺎﻣﻪ ﺍﻟﺒﺎﺏ ﻭﺟﺎﻩ : ﺧﻴﺮ ..
ﻧﻀﺎﻝ : ﺍﺣﻜﻴﻠﻲ ﻋﻦ ﺣﺎﻟﺘﻲ ﺑﺼﺮﺍﺣﻪ ..
ﺍﺳﺎﻣﻪ ﺳﻜﺖ ..
ﻧﻀﺎﻝ : ﺍﺧﺮﺗﻬﺎ ﺣﻨﻌﺮﻑ ..
ﺍﺳﺎﻣﻪ : ﻗﻠﺒﻚ .. ﻣﺶ ﺯﻱ ﻗﺒﻞ ..
ﻧﻀﺎﻝ ﺍﺑﺘﺴﻢ ﺑﺘﻬﻜﻢ ..
ﺍﺳﺎﻣﻪ : ﺣﺘﺒﺪﺍ ﺗﺎﺧﺪﺍﺩﻭﻳﻪ .. ﻟﻴﻪ .. ﻭﺍﻟﻜﺒﺪ ﺟﺰﺀ ﺑﺴﻴﻂ ﻣﻨﻬﺎ ﺗﺤﻮﻝ ..
ﻧﻀﺎﻝ ﺍﺑﺘﺴﻢ : ﺍﻟﺤﻤﺪ ﻟﻠﻪ ﻉ ﻛﻞ ﺣﺎﻝ ..
ﺍﺳﺎﻣﻪ : ﻧﻀﺎﻝ ﻧﻘﺪﺭ ﻧﻌﺮﻑ ﺷﻦ ﺍﻟﻠﻲ ﻭﺻﻠﻚ ﻟﻬﺎﻟﺤﺎﻟﻪ .. ﻷﻥ ﺍﻟﺤﺎﺩﺙ ﻛﺎﻥ ﺳﺒﺒﻪ ﻓﻘﺪﺍﻧﻚ ﻟﻠﻮﻋﻲ ﺑﺴﺒﺐ ﺍﺯﺩﻳﺎﺩﻧﺒﻀﺎﺕ ﺍﻟﻘﻠﺐ .. ﺍﻟﻨﺎﺗﺠﻪ ﻋﻦ ﺍﻧﻔﻌﺎﻝ ﻗﻮﻱ ..
ﻧﻀﺎﻝ ﺷﺒﺢ ﻟﻠﺮﻭﺷﻦ ﻭﻗﻌﺪ ﺳﺎﻛﺖ ..
ﺍﺳﺎﻣﻪ ﺍﺑﺘﺴﻢ : ﺍﻭﻛﻲ ﻣﺎﻧﻘﺪﺭﺵ ﻧﻌﺮﻑ ﻳﻌﻨﻲ ..
ﻧﻀﺎﻝ ﺷﺒﺤﻠﻪ : ﻣﺶ ﺣﻨﺴﺘﻔﻴﺪ ﺷﻲ ﻟﻮ ﻋﺮﻓﺖ ﺍﻟﺴﺒﺐ ...
ﻃﻖ ﺍﻟﺒﺎﺏ ...
ﻧﻀﺎﻝ : ﺗﻔﻀﻞ ..
ﺍﻧﻔﺘﺢ ﺍﻟﺒﺎﺏ ﻭﺧﺸﺖ ... ﻭﻫﻮ ﻧﺒﺾ ﻗﻠﺒﻪ ﺗﺴﺎﺭﻉ .. ﻻ ﻗﻮﻟﻮﺍ ﻧﺒﻀﺎﺕ ﻗﻠﻮﺑﻬﻢ ﺗﺴﺎﺭﻋﺖ ..
ﺣﻨﺎﻥ : ﺍﻟﺴﻼﻡ ﻋﻠﻴﻜﻢ ..
ﺍﻟﺰﻭﺯ : ﻭﻋﻠﻴﻜﻢ ﺍﻟﺴﻼﻡ ..
ﺣﻨﺎﻥ : ﻛﻴﻒ ﺣﺎﻟﻚ ﺍﻟﻴﻮﻡ ..
ﻧﻀﺎﻝ : ﺍﻟﺤﻤﺪ ﻟﻠﻪ ..
ﺣﻨﺎﻥ : ﻗﻠﺘﻠﻪ ..
ﺍﺳﺎﻣﻪ ﻫﺰ ﺭﺍﺳﻪ ﺑﺈﻳﺠﺎﺏ ..
ﺣﻨﺎﻥ : ﺻﺎﻳﺮﻩ ﻣﻌﺎﻙ ﺣﺎﺟﻪ ﻓﻲ ﺍﻟﻌﻤﻞ؟
ﻧﻀﺎﻝ ﺍﺑﺘﺴﻢ : ﻻ ..
ﺣﻨﺎﻥ : ﺍﻟﺤﺎﺩﺙ ﺻﺎﺭﻟﻚ ﺑﺴﺒﺐ ﻓﻘﺪﺍﻧﻚ ﺍﻟﻮﻋﻲ ﺍﻛﻴﺪ ﻗﺎﻟﻚ ﺍﺳﺎﻣﻪ ﻋﻼﺵ ..
ﻧﻀﺎﻝ ﻫﺰ ﺭﺍﺳﻪ ﺑﺈﻳﺠﺎﺏ ...
ﺣﻨﺎﻥ : ﻳﻌﻨﻲ ﻣﺶ ﺣﺘﻘﻮﻝ ﺍﻟﺴﺒﺐ ..
ﻧﻀﺎﻝ ﺷﺒﺢ ﻷﺳﺎﻣﻪ : ﻣﻤﻜﻦ ﺷﻮﻳﻪ؟
ﺍﺳﺎﻣﻪ : ﺍﻭﻛﻲ .. ﺗﻮﺟﻪ ﻟﻠﺒﺎﺏ ﻭﻃﻠﻊ ..
ﻧﻀﺎﻝ ﻳﺸﺒﺤﻠﻬﺎ : ﺍﻧﺘﻲ ﺍﻟﺴﺒﺐ .
ﺣﻨﺎﻥ ﻏﻤﻀﺖ ﻋﻴﻮﻧﻬﺎ ﻭﻓﺘﺤﺘﻬﻢ ﺑﻀﺠﺮ ..
ﻧﻀﺎﻝ : ﺣﻨﺎﻥ ﻧﻄﻠﺐ ﻣﻨﻚ ﻃﻠﺐ ...
ﺣﻨﺎﻥ : ﺷﻦ ﻫﻮ ..
ﻧﻀﺎﻝ : ﺍﺟﻠﻲ ﻣﻮﺿﻮﻉ ﺍﻟﻄﻼﻕ ..
ﺣﻨﺎﻥ : ﻫﻬﻬﻬﻬﻬﻬﻪ
ﻧﻀﺎﻝ ﺑﻀﺤﻜﻪ : ﻋﻼﺵ ﺗﻀﺤﻜﻲ ..
ﺣﻨﺎﻥ : ﻧﻀﺎﻝ ... ﺍﺭﺟﻮﻙ ﻃﺎﻟﺖ ﻭﺑﺎﺧﺖ ﺍﻟﺤﻜﺎﻳﻪ ..
ﻧﻀﺎﻝ : ﺣﻨﻄﻠﻘﻚ ﺻﺪﻗﻴﻨﻲ ﺑﺲ ﻣﺶ ﺗﻮﺍ ..
ﺣﻨﺎﻥ : ﻻﺇﻟﻪ ﺇﻻ ﺍﻟﻠﻪ .. ﻧﻀﺎﻝ ﺧﻴﺮﻙ ﻣﻮﻟﻲ ﻫﻜﻲ ﺯﻱ ﺍﻟﻤﺮﺍﻫﻘﻴﻦ ..
ﻧﻀﺎﻝ ﺭﻓﻊ ﺣﻮﺍﺟﺒﻪ : ﺷﻜﺮﺍ ..
ﺣﻨﺎﻥ : ﻧﻀﺎﻝ ..
ﻧﻀﺎﻝ : ﺣﻨﺎﻥ ﺗﻮﺍ ﻣﺶ ﻣﻄﻠﻖ ..
ﺣﻨﺎﻥ : ﺧﻼﺹ .. ﺣﻨﺒﺪﺍ ﻓﻲ ﺍﺟﺮﺍﺀﺍﺕ ﺍﻟﻘﻀﻴﻪ ... ﻭﺗﻮﺟﻬﺖ ﻟﻠﺒﺎﺏ ﺑﺘﻄﻠﻊ ...
ﻧﻀﺎﻝ ﺯﺍﺩﺕ ﻧﺒﻀﺎﺕ ﻗﻠﺒﻪ : ﺣﻨﺎ .. ﻥ
ﺍﻟﺘﻔﺘﺖ ﻟﻘﺎﺗﻪ ﻳﺎﺧﺪ ﻓﻲ ﺍﻟﻨﻔﺲ ﺑﺎﻟﺴﻴﻒ : ﺃﺳﺎﺍﺍﺍﺍﺍﺍﺍﻣﻪ ...
ﺍﺳﺎﻣﻪ ﺟﺎﻫﺎ ﻳﺠﺮﻱ ﻭﺧﺸﻠﻪ : ﺣﻨﺎﻥ ﺍﻃﻠﻌﻲ ..
ﺣﻨﺎﻥ ﻃﻠﻌﺖ ﻭﻫﻲ ﺗﺮﻋﺶ .. ﻭﺷﻮﻳﻪ ﻭﺧﺸﻮﻟﻪ ﺍﻟﻤﻤﺮﺿﺎﺕ ﺑﻌﺪ ﻧﺪﺍﻫﻢ ﺍﺳﺎﻣﻪ ﻋﻦ ﻃﺮﻳﻖ ﺟﻬﺎﺯ ﺗﻨﺒﻴﻪ ...
ﺣﻨﺎﻥ ﺩﻣﻮﻋﻬﺎ ﻧﺰﻟﻮﺍ ﻭﺣﻄﺖ ﺭﺍﺳﻬﺎ ﺑﻴﻦ ﺍﻳﺪﻫﺎ ..
ﺷﻮﻳﻪ ﻭﻃﻠﻌﻮﺍ ﻣﻦ ﻋﻨﺪﻩ ..
ﺍﺳﺎﻣﻪ ﺟﺎﻫﺎ : ﺧﻼﺹ ﻫﻮ ﻛﻮﻳﺲ .. ﺑﺲ ﺷﻦ ﺍﻟﻠﻲ ﺻﺎﺭ ..
ﺣﻨﺎﻥ : ﺗﻨﺎﻗﺸﻨﺎ ﻧﻘﺎﺵ ﻋﺎﺩﻱ .. ﻣﺎﺗﻮﻗﻌﺘﺶ ﺍﻥ ﺣﺎﻟﺘﻪ ﻫﻜﻲ ﺑﻜﻞ ..
ﺍﺳﺎﻣﻪ : ﺧﻼﺹ ﺍﻫﺪﻱ ﻣﺎﺻﺎﺭ ﺷﻲ ..
ﻉ ﺟﻴﺔ ﻳﺎﺭﺍ ﺍﻟﻠﻲ ﻛﺎﻧﺖ ﻋﻨﺪﻫﺎ ﻣﺮﺍﻓﻌﻪ ﺣﻀﺮﺗﻬﺎ ﻭﻃﻮﻝ ﻟﻠﻤﺴﺘﺸﻔﻰ ﺷﺎﻓﺖ ﺣﻨﺎﻥ ﻭﺍﺳﺎﻣﻪ ..
ﻳﺎﺭﺍ ﺷﺒﺤﺘﻠﻬﺎ ﺑﺤﺪﻩ ﻭﺟﺖ ﺑﺘﺨﺶ ﻭﻗﻔﻬﺎ ﺍﺳﺎﻣﻪ ..
ﻳﺎﺭﺍ : ﺷﻦ ﻓﻲ ..
ﺍﺳﺎﻣﻪ : ﺧﻠﻴﻪ ﺗﻮﺍ ﺭﺍﻗﺪ ..
ﻳﺎﺭﺍ : ﺍﻳﻪ ﻭﺷﻦ ﺍﻟﻤﺸﻜﻠﻪ ...
ﺍﺳﺎﻣﻪ :: ﺗﻌﺐ ﺷﻮﻳﻪ ..
ﻳﺎﺭﺍ ﺑﺨﻮﻑ : ﺷﻦ ﺻﺎﺭﻟﻪ ..
ﺍﺳﺎﻣﻪ : ﺣﺎﺟﻪ ﻋﺮﺿﻴﻪ ﻭﻋﺪﺕ ...
ﻳﺎﺭﺍ ﺷﺒﺤﺖ ﻟﺤﻨﺎﻥ : ﺍﻧﺘﻲ ﺷﻦ ﺟﺎﺑﻚ ..
ﺣﻨﺎﻥ ﻏﻴﺮﺕ ﻋﻴﻮﻧﻬﺎ ﻟﻠﺠﻬﺔ ﺍﻟﺘﺎﻧﻴﻪ : ﺍﺳﺘﻐﻔﺮ ﺍﻟﻠﻪ ..
ﻳﺎﺭﺍ ﺑﺈﻧﻔﻌﺎﻝ : ﻟﻮ ﻋﻨﺪﻙ ﺫﺭﺓ ﻛﺮﺍﻣﻪ ﻣﻌﺎﺵ ﺗﺠﻴﻪ ﺑﻜﻞ ..
ﺣﻨﺎﻥ : ﻧﺴﺘﺄﺫﻥ ﺃﺳﺎﻣﻪ .. ﺍﻟﺴﻼﻡ ﻋﻠﻴﻜﻢ ﻭﻣﺸﺖ ..
ﺍﺳﺎﻣﻪ ﻗﻌﺪ ﻣﻌﺎﻫﺎ ﺑﻌﻴﻮﻧﻪ ﻟﻴﻦ ﺍﺧﺘﻔﺖ ﻭﺑﻌﺪﻳﻦ ﺷﺒﺢ ﻟﻴﺎﺭﺍ ﺑﺤﺪﻩ ﻭﻣﺸﻲ ...
ﻳﺎﺭﺍ ﺷﺒﺤﺘﻠﻪ ﺑﺮﻓﻌﻪ ﺣﺎﺟﺐ ﻭﻗﻌﻤﺰﺕ ﻉ ﺍﻟﻜﺮﺳﻲ ..
***
ﻭﻟﻮﺍ ﻣﻦ ﺍﺟﺘﻤﺎﻉ ﺍﻟﻮﺯﺍﺭﺓ .. ﻭﺧﺸﻮﺍ ﻟﻠﺸﺮﻛﻪ ... ﻃﻮﻝ ﻣﻌﺎﻭﻳﻪ ﺗﻮﺟﻪ ﻟﻤﻜﺘﺒﻪ ﻳﺠﻬﺰ ﻹﺟﺘﻤﺎﻋﻪ ﺍﻻﺧﻴﺮ ﺍﻟﻴﻮﻡ ﻭﻳﻌﺘﺒﺮ ﺍﻫﻢ ﺍﺟﺘﻤﺎﻉ ...
ﺷﻮﻳﻪ .. ﻭﺣﻨﺎﻥ ﺟﺖ ﻟﻠﺸﺮﻛﻪ ﺣﺘﻰ ﻫﻲ ﻣﺰﺍﺟﻬﺎ ﺗﻌﻜﺮ ﻭﺗﺒﻲ ﺗﺸﻐﻞ ﺭﻭﺣﻬﺎ ﺑﺄﻱ ﺷﻲ .. ﺭﻛﺒﺖ ﻓﻮﻕ ...
ﻓﻲ ﻧﻔﺲ ﺍﻟﻮﻗﺖ ..
ﻣﻌﺎﻭﻳﻪ ﻃﺎﻟﻊ ﺑﻔﻨﺠﺎﻥ ﻗﻬﻮﺗﻪ ﻣﻦ ﺍﻟﻤﻜﺘﺐ ﺑﻴﻤﺸﻲ ﻟﻘﺎﻋﺔ ﺍﻹﺟﺘﻤﺎﻋﺎﺕ ﺍﻟﻜﺒﻴﺮﻩ ...
ﻣﻌﺎﻭﻳﻪ : ﻻﺯﻡ ﻳﻮﺍﻓﻘﻮﺍ ...
ﺍﻳﻤﻦ : ﺣﺘﻤﺎ ..
ﻣﺎﺷﻴﻦ ﻓﻲ ﺍﻟﻤﻤﺮ ﻭﻛﺎﻥ ﻓﻲ ﻋﺎﻣﻞ ﻳﻨﻈﻒ .. ﻣﻦ ﺑﻌﺪ ﺍﻟﻠﻲ ﺻﺎﺭ ﺍﺧﺮ ﻣﺮﺓ ﺧﻠﻮﺍ ﻋﺎﻣﻠﻴﻦ ﺭﺟﺎﻟﻪ ﻳﻨﻈﻔﻮﺍ ﺍﻟﺪﻭﺭ ﺍﻟﺜﺎﻟﺚ ..
ﻣﻌﺎﻭﻳﻪ ﻣﺎﻛﺎﻧﺶ ﻣﺮﻛﺰ ﻭﺍﻟﺮﺍﺟﻞ ﻻﻫﻲ ﺑﻌﻤﻠﻪ ... ﻛﻴﻒ ﺟﺎﻱ ﺑﻴﻠﻒ ﻧﺎﺵ ﻣﻌﺎﻭﻳﻪ ﺗﺒﺰﻋﺖ ﺍﻟﻘﻬﻮﺓ ﻉ ﺟﺎﻛﺘﻪ ﻭﻃﺎﺡ ﺍﻟﻔﻨﺠﺎﻥ ﻟﻮﻃﺎ ...
ﻣﻌﺎﻭﻳﻪ ﺑﻌﺼﺒﻴﻪ ﺷﺪﻳﺪﻩ : ﻳﺎﺯﺯﺯﺯﻓﺖ ﻳﺎﺑﻬﻴﻢ .. ﺍﻋﻤﻰ ﻣﺎﺗﺸﻮﻓﺶ ...
ﺍﻟﺮﺍﺟﻞ ﻳﺮﻋﺶ : ﺍﻧﺎ ﺍﺳﻒ ... ﻣﺎﺷﻔﺖ ﺍﻧﺖ ..
ﻣﻌﺎﻭﻳﻪ ﻳﺸﺒﺢ ﻟﺠﺎﻛﺘﻪ : ﻛﻴﻒ ﻳﺼﻴﺮ ﺗﻮﺍ .
ﺍﻳﻤﻦ : ﻫﺪﻱ ﺷﻮﻳﻪ ..
ﻣﻌﺎﻭﻳﻪ : ﻛﻴﻴﻴﻒ ﻧﻬﺪﻱ !! ﺍﻹﺟﺘﻤﺎﻉ ﺑﻌﺪ 10 ﺩﻗﺎﻳﻖ ... ﺍﻟﺰﻓﺖ ﻫﺬﺍ ﻭﺟﻬﻪ ﻣﻌﺎﺵ ﻧﺒﻲ ﻧﺸﺐ .... ﺳﻜﺖ ﻟﻤﺎ ﺷﺎﻓﻬﺎ ﺗﺸﺒﺤﻠﻪ ..
ﻗﺪﻣﺖ ﻭﺣﺒﺖ ﺗﻤﺘﺺ ﻏﻀﺐ ﻣﻌﺎﻭﻳﻪ ﺑﻀﺤﻜﻪ : ﻣﻌﻨﺎﻫﺎ ﺍﺟﺘﻤﺎﻉ ﺍﻟﻴﻮﻡ ﺣﻴﺘﻢ ﺯﻱ ﻣﺎﺗﺒﻲ ... ﻳﻘﻮﻟﻮﺍ ﺍﻟﻘﻬﻮﺓ ﻟﻤﺎ ﺗﺘﺒﺰﻉ ﻓﺎﻝ ﺧﻴﺮ ..
ﺍﻳﻤﻦ ﺿﺤﻚ .. ﻭﻣﻌﺎﻭﻳﻪ ﻗﻌﺪ ﺳﺎﻛﺖ .. ﺑﻌﺪﻳﻦ ﻭﻻ ﻟﻤﻜﺘﺒﻪ ... ﻭﺍﻳﻤﻦ ﻟﺤﻘﻪ ..
ﺍﻟﻌﺎﻣﻞ : ﺍﻧﺎ ﻣﺎﻳﻘﺼﺪ .. ﻟﻴﺶ ﻳﻠﺰ ﺍﻧﺎ ..
ﺣﻨﺎﻥ : ﻛﻤﻞ ﺧﺪﻣﺘﻚ ﺇﻥ ﺷﺎﺀ ﺍﻟﻠﻪ ﻣﺶ ﺣﻴﻠﺰﻙ .. ﻭﺗﻮﺟﻬﺖ ﻟﻤﻜﺘﺒﻪ ..
ﻣﻌﺎﻭﻳﻪ ﻓﻲ ﻣﻜﺘﺒﻪ ﻭﺍﻗﻒ ﻭﺍﺻﻠﺘﻠﻪ ﻟﻮﻳﻦ ﻭﻳﻦ ..
ﺃﻗﺒﺎﻝ : ﺑﻬﻴﻢ ﻛﻴﻒ ﻳﺪﻳﺮ ﻫﻜﻲ ... ﺍﻳﻤﻦ ﺷﺒﺤﻠﻬﺎ ﺑﺈﺯﺩﺭﺍﺀ ..
ﺧﺸﺖ ﺣﻨﺎﻥ ﻭﻗﺪﻣﺘﻠﻪ : ﺗﺮﺍ ﻭﺭﻳﻨﻲ ... ﻗﻌﺪﺕ ﺗﺸﻮﻑ ﻓﻲ ﺍﻟﺠﺎﻛﻪ ﻟﻘﺖ ﺍﻟﻘﻬﻮﻩ ﺟﺎﻳﻪ ﻋﻠﻴﻬﺎ ﻫﻲ ﺑﺲ ... ﺗﺮﺍ ﺣﻮﻟﻬﺎ ..
ﻣﻌﺎﻭﻳﻪ ﻗﻌﺪ ﻳﺸﺒﺤﻠﻬﺎ : ﺷﻦ ﻫﻲ ..
ﺣﻨﺎﻥ : ﺍﺟﺎﻛﻪ ..
ﻣﻌﺎﻭﻳﻪ ﺷﺒﺤﻠﻬﺎ ﻭﺣﻮﻝ ﺍﺟﺎﻛﻪ .. ﺣﻨﺎﻥ ﺧﺪﺗﻬﺎ ﻣﻦ ﻳﺪﻩ ﻭﻗﻌﺪﺕ ﺗﺸﻮﻓﻠﻬﺎ ..
ﺣﻨﺎﻥ ﺑﺈﺑﺘﺴﺎﻣﻪ : ﺣﺎﺟﻪ ﺑﺴﻴﻄﻪ ... ﻛﺪﻩ ﺑﺎﻟﺼﺎﺑﻮﻥ ﻉ ﺍﻟﻴﺪ ﻳﻤﺸﻲ ﺍﻟﺤﺎﻝ
ﺇﻗﺒﺎﻝ ﺑﻐﻴﺾ : ﻋﺰﻳﺰﺗﻲ ﺗﻌﺮﻓﻲ ﺍﻟﺠﺎﻛﻪ ﻫﺎﺩﻱ ﻛﻢ ﺣﻘﻬﺎ ﻭﻣﻦ ﺍﻣﺎ ﻣﺎﺭﻛﻪ ﺍﻟﻠﻲ ﺗﺒﻲ ﺗﻜﺪﻳﻬﺎ ﻉ ﺍﻟﻴﺪ !! ﻭﺗﺎﻧﻲ ﺷﻲ ﻓﻲ ﺍﺟﺘﻤﺎﻉ ﻣﻬﻢ ﺑﻌﺪ ﺷﻮﻱ ﻭﻣﻬﻢ ﺟﺪﺍ ﻣﻊ ﻧﺎﺱ ﻣﻬﻤﻪ ﻛﻴﻒ ﺗﺒﻴﻪ ﻳﻄﻠﻊ ﻫﻜﻲ ..
ﺣﻨﺎﻥ : ﻭﻳﻦ ﺍﻟﻤﺸﻜﻠﻪ ﺩﺟﺎﻛﻪ ﺑﺲ ﺍﻟﻠﻲ ﺟﺖ ﻋﻠﻴﻬﺎ ﺍﻟﻘﻬﻮﺓ .. ﻭﺑﻌﺪﻳﻦ ﺷﻦ ﻓﻴﻬﺎ ﻟﻮ ﺣﻀﺮ ﺍﻹﺟﺘﻤﺎﻉ ﻫﻜﻲ .. ﺷﻜﻠﻪ ﻣﻨﺎﺳﺐ .. ﻭﺑﻌﺪﻳﻦ ﻣﺎﺍﺷﺎﺀ ﺍﻟﻠﻪ ﺍﻟﻘﺎﻟﺐ ﻏﺎﻟﺐ ".. ﺗﺒﻲ ﺗﻤﺘﺺ ﻏﻀﺒﻪ ﻹﻥ ﺍﻟﻔﺘﺮﺓ ﺍﻷﺧﻴﺮﻩ ﻣﻮﻟﻲ ﻋﺼﺒﻲ ﻭﻣﺎﻳﻨﻘﺮﺑﺶ "
ﻣﻌﺎﻭﻳﻪ ﻭﺟﻬﻪ ﻭﻻ ﺍﺣﻤﺮ ﻭﻗﻠﺒﻪ ﺑﻴﻄﻠﻊ ﻣﻦ ﺻﺪﺭﻩ ..
ﺣﻨﺎﻥ " ﺷﻦ ﺍﻟﻘﺎﻟﺐ ﻏﺎﻟﺐ ﻫﺎﺩﻱ ﺑﺎﻟﻐﺘﻲ ﻳﺎﺣﻨﺎﻥ ... ﺍﺳﺘﻐﻔﺮﺍﻟﻠﻪ "
ﺍﻗﺒﺎﻝ ﺗﺒﻲ ﺗﺸﺪﻫﺎ ﺗﻀﺮﺑﻬﺎ .. ﻭﺍﻳﻤﻦ ﺧﺪﻱ ﺍﻟﻜﻠﻤﻪ ﺑﺤﺴﻦ ﻧﻴﻪ ..
ﺍﻳﻤﻦ ﺑﻀﺤﻜﻪ : ﺻﺪﻗﺘﻲ Boss ﻣﻦ ﻟﻤﺎ ﻋﺮﻓﺘﻪ ﻭﻫﻮ ﻃﺮﻑ ﺧﻄﻴﺮ ..
ﺣﻨﺎﻥ ﻋﻴﻮﻧﻬﺎ ﻟﻮﻃﺎ ﻭﻣﻦ ﺍﻟﺨﺠﻞ ﺷﺪﺕ ﺟﺎﻛﻪ ﻓﻲ ﺣﻀﻨﻬﺎ ﺑﺎﻟﻘﻮﺓ ﻣﻌﺎﻭﻳﻪ ﻗﻌﺪ ﻳﺸﻮﻑ ﻟﺠﺎﻛﻪ ﻭﻗﺎﻝ ﻓﻲ ﻧﻔﺴﻪ " ﺧﻠﻴﺘﻴﻨﻲ ﻧﺘﻤﻨﻰ ﻟﻮ ﻧﻜﻮﻥ ﻋﺎﻣﻞ ﻧﻈﺎﻓﻪ .. ﻭﻻ ﺑﻴﺎﻉ ﻭﺭﺩ .. ﻭﻻ ﺑﺎﻗﻪ .. ﻭﺗﻮﺍ ﺣﺎﺳﺪ ﺍﻟﺠﺎﻛﻪ .. ﻳﺎﻋﻠﻴﻚ ﺣﺎﻟﻪ ﻭﺻﻠﺘﻨﻲ ﻟﻴﻬﺎ .."
ﻃﻖ ﺍﻟﺒﺎﺏ ﻭﺧﺸﺖ ﺍﻟﺴﻜﺮﺗﻴﺮﻩ : ﺍﺳﺘﺎﺩ ﻭﻓﺪ ﺷﺮﻛﺔ **** ﻭﺻﻞ ..
ﻣﻌﺎﻭﻳﻪ : ﺗﻤﺎﻡ ... ﻭﻃﻠﻊ .. ﺍﻳﻤﻦ ﺧﺪﻱ ﻣﻠﻔﺎﺕ ﻭﻃﻠﻊ ﻭﺭﺍﻩ ﻭﺍﻗﺒﺎﻝ ﺷﺒﺤﺖ ﻟﺤﻨﺎﻥ ﻣﻦ ﻓﻮﻕ ﻟﻠﻮﻃﺎ ﻭﻃﻠﻌﺖ ..
ﺣﻨﺎﻥ : ﺧﻴﺮﻫﺎ ﻫﺎﺩﻱ !!
***
ﻳﺎﺭﺍ ﻛﺎﻧﺖ ﻣﻘﻌﻤﺰﺓ ﺣﺪﺍ ﻧﻀﺎﻝ ﻭﺗﺸﺒﺤﻠﻪ ﻭﺩﻣﻮﻋﻬﺎ ﻣﻌﺒﻴﺎﺕ ﻋﻴﻮﻧﻬﺎ ﺳﻤﻌﺖ ﺻﻮﺕ ﻣﺴﺞ ﺟﺎﻱ ﻟﺘﻠﻴﻔﻮﻧﻬﺎ .. ﺷﺎﻓﺖﻩ ..
( ﺍﻟﺤﻤﺪ ﻟﻠﻪ ﻉ ﺳﻼﻣﺔ ﺍﻟﻤﻬﻨﺪﺱ ... )
ﻳﺎﺭﺍ " ﺍﻟﻠﻪ ﻻﻳﺴﻠﻢ ﻓﻴﻚ ﻭﻻ ﻋﻈﻤﻪ ..."
ﻓﺘﺢ ﻧﻀﺎﻝ ﻋﻴﻮﻧﻪ ﺷﺎﻓﺎﺗﻪ ﻗﺮﺑﺖ ﻣﻨﻪ : ﺣﺒﻴﺒﻲ ﺣﺎﻟﻚ ﺑﺎﻫﻲ ..
ﻧﻀﺎﻝ ﻳﺸﺒﺤﻠﻬﺎ : ﺍﻣﻢ .. ﺑﺎﻫﻲ ..
ﻳﺎﺭﺍ : ﺷﻦ ﺻﺎﺭﻟﻚ ﻃﻠﻌﺖ ﻭﺧﻠﻴﺘﻚ ﻛﻮﻳﺲ ..
ﻧﻀﺎﻝ : ﺗﻌﺒﺖ ﺷﻮﻳﻪ ﻭﺑﺲ ..
ﻳﺎﺭ ﻗﺮﺑﺖ ﻭﺣﻀﻨﺎﺗﻪ ﻭﺩﻣﻮﻋﻬﺎ ﻧﺰﻟﻮﺍ : ﻧﻀﺎﻝ ﻣﺎﻧﻘﺪﺭﺵ ﻧﻌﻴﺶ ﻣﻦ ﻏﻴﺮﻙ ﻧﺤﺒﻚ ﻣﻮﺕ ﻣﻮﺕ ﻳﺎﻧﻀﺎﻝ ...
ﻫﻮ ﻗﻠﺒﻪ ﻭﺟﻌﻪ ﻋﻠﻴﻬﺎ ﻭﺣﺲ ﺍﻧﻪ ﻇﻠﻤﻬﺎ ﺣﻂ ﺍﻳﺪﻩ ﻋﻠﻴﻬﺎ ﻭﻗﻌﺪ ﻳﻤﺸﻲ ﻓﻴﻬﺎ ﺑﺮﺍﺣﻪ .. ﻭﻫﻲ ﺍﺑﺘﺴﻤﺖ ...
***
ﺍﻧﺘﻬﻰ ﺍﻹﺟﺘﻤﺎﻉ ﻭﻃﻠﻊ ﻣﻨﻪ ﻭﻫﻮ ﻣﺮﺗﺎﺡ ﺗﻤﺖ ﺍﻹﺗﻔﺎﻗﻴﻪ ﻭﻭﻗﻌﻮﺍ ﺍﻟﻌﻘﻮﺩ ... ﻭﻫﻮ ﻃﺎﻟﻊ ﻭﺻﻰ ﺃﻳﻤﻦ ﻳﺸﺮﻑ ﺑﻨﻔﺴﻪ ﻉ ﺇﻗﺎﻣﺔ ﺍﻟﻮﻓﺪ ﻭﻳﺤﺠﺰﻟﻬﻢ ﻓﻲ ﻣﻄﻌﻢ ﺑﺶ ﻳﻌﺸﻴﻬﻢ ﺍﻟﻠﻴﻠﻪ ﻓﻴﻪ ﻋﺸﺎﺀ ﻋﻤﻞ ﻳﻌﻨﻲ ... ﺗﻮﺟﻪ ﻟﻤﻜﺘﺒﻪ ..
ﺍﻟﺴﻜﺮﺗﻴﺮﻩ : ﺃﺳﺘﺎﺫ ﺍﻟﺒﺶ ﻣﻬﻨﺪﺳﻪ ﺗﺴﺘﻨﻰ ﻓﻴﻚ ﺩﺍﺧﻞ ..
ﻣﻌﺎﻭﻳﻪ ﻫﺰ ﺭﺍﺳﻬﺎ ﺑﺈﻳﺠﺎﺏ ﻭﺧﺸﻠﻬﺎ .. ﻟﻘﺎﻫﺎ ﺗﺨﺪﻡ ﻉ ﺍﻟﻼﺏ ﺗﻮﺏ .. ﻫﻲ ﻟﻤﺎ ﺷﺎﻓﺎﺗﻪ ..
ﺣﻨﺎﻥ : ﺷﻦ ﺻﺎﺭ ﻣﻌﺎﻛﻢ ..
ﻣﻌﺎﻭﻳﻪ ﻗﺪﻣﻠﻬﺎ : ﻛﻠﻪ ﻣﺸﻲ ﺗﻤﺎﻡ ..
ﺣﻨﺎﻥ : ﺍﻟﺤﻤﺪ ﻟﻠﻪ ..
ﻣﻌﺎﻭﻳﻪ ﺍﺑﺘﺴﻢ : ﺍﻟﺤﻤﺪ ﻟﻠﻪ ..
ﺣﻨﺎﻥ ﺍﺑﺘﺴﻤﺖ : ﺗﻤﺎﻡ .. ﻭﻗﻌﺪﺕ ﺗﻨﺎﻗﺶ ﻓﻴﻪ ﻉ ﺑﻌﺾ ﺍﻷﻣﻮﺭ ﻭﻫﻮ ﻳﺴﻤﻌﻠﻬﺎ ﻉ ﻗﺪ ﻣﺎﻳﻘﺪﺭ ﻛﺎﻥ ﻳﻈﺎﻫﺮ ﻣﻌﺎﻫﺎ ﺑﺎﻟﺠﺪﻳﻪ ﺍﻟﺘﺎﻣﻪ .. ﻛﺎﻥ ﻳﻔﻜﺮ ﻓﺮﻭﺣﻪ ﻓﻜﻞ ﻭﻗﺖ ﺍﻧﻬﺎ ﻣﺮﺍﺓ ﻣﺘﺰﻭﺟﻪ .. ﻓﺪﺍﺧﻠﻪ ﺻﺮﺍﻉ ﻛﺒﻴﺮ ﺑﻴﻦ ﻋﻘﻠﻪ ﻭﻣﺸﺎﻋﺮﻩ ...
ﻣﻌﺎﻭﻳﻪ : ﺗﻤﺎﻡ .. ﺗﺼﺮﻓﻲ ﻣﻦ ﻏﻴﺮ ﻣﺎﺗﺮﺟﻌﻴﻠﻲ ﻭﺍﻧﺘﻲ ﺍﻷﺩﺭﻯ ...
ﺣﻨﺎﻥ ﻣﺴﺘﻐﺮﺑﻪ ﻓﻴﻪ ﺑﺲ ﻣﺎﻋﺪﻟﺘﺶ ﻫﻠﺒﻪ : ﺣﺎﺿﺮ ..
ﻣﻌﺎﻭﻳﻪ : ﺍﻟﻠﻴﻠﻪ ﻓﺎﺿﻴﻪ ..
ﺣﻨﺎﻥ ﺷﺒﺤﺘﻠﻪ ﺑﺈﺳﺘﻐﺮﺍﺏ : ﻋﻼﺵ ..
ﻣﻌﺎﻭﻳﻪ : ﺍﻟﻮﻓﺪ ﺍﻟﻠﻲ ﺟﻲ ﺍﻟﻴﻮﻡ ﻃﻠﺒﻮﺍ ﻳﺸﻮﻓﻮﻙ ﺑﺶ ﺗﺤﻜﻴﻠﻬﻢ ﺍﻛﺜﺮ ﻉ ﺗﺼﻤﻴﻢ ﻣﺨﻄﻂ ﺍﻟﻤﻨﺘﺠﻊ ... ﻋﺸﺎﺀ ﻋﻤﻞ
ﺣﻨﺎﻥ ﺗﻔﻜﺮ ﺑﻌﺪﻳﻦ ﻗﺎﻟﺖ : ﺍﻟﺴﺎﻋﻪ ﻛﻢ ..
ﻣﻌﺎﻭﻳﻪ : ...8
ﺣﻨﺎﻥ ﻗﻌﺪﺕ ﺗﻔﻜﺮ ﻭﻫﻮ ﻳﺸﻮﻓﻠﻬﺎ ... ﺑﻌﺪﻳﻦ ﺷﺒﺤﺘﻠﻪ : ﺗﻤﺎﻡ ..
ﻣﻌﺎﻭﻳﻪ : ﻛﻮﻳﺲ ..
ﺣﻨﺎﻥ ﻟﻤﺖ ﺣﺎﺟﺘﻬﺎ ﻭﺑﺘﻄﻠﻊ ﻭﻫﻮ ﻭﻣﺸﻲ ﻗﻌﻤﺰ ﻭﺭﺍ ﻣﻜﺘﺒﻪ .. ﻭﻳﺸﺒﺤﻠﻬﺎ ... ﻫﻲ ﻗﺎﻣﺖ ﻋﻴﻮﻧﻬﺎ ﻫﻮ ﻏﻴﺮ ﻋﻴﻮﻧﻪ ..
ﺣﻨﺎﻥ : ﺍﺣﻤﻢ .. ﺍﻟﺴﻼﻡ ﻋﻠﻴﻜﻢ ..
ﻣﻌﺎﻭﻳﻪ : ﻭﻳﻦ ﺍﺩﺟﺎﻛﻪ ..
ﺣﻨﺎﻥ ﺗﻠﻔﺘﺖ : ﻣﻌﻠﻘﻪ ﺟﻨﺒﻚ .. ﺗﻠﻔﺖ ﻣﻌﺎﻭﻳﻪ ﺟﻨﺒﻪ ﻟﻘﻲ ﺍﺩﺟﺎﻛﻪ ..
ﻣﻌﺎﻭﻳﻪ : ﺍﺣﻤﻢ ... ﺗﻘﺪﺭﻱ ﺗﺘﻔﻀﻠﻲ ..
ﺣﻨﺎﻥ ﻟﻔﺖ ﻭﻃﻠﻌﺖ ﺻﻜﺮﺕ ﺍﻟﺒﺎﺏ .. ﻭﻫﻮ ﺗﻨﻬﺪ ﻣﻦ ﻭﺳﻂ ﻗﻠﺒﻪ ..
ﻗﻌﺪ ﻳﺸﺒﺢ ﻟﻠﺪﺟﺎﻛﻪ ... ﻧﺎﺽ ﻭﻗﺪﻣﻠﻬﺎ .. ﺧﺪﺍﻫﺎ ﻗﻌﺪ ﻳﺘﻔﺤﺺ ﻓﻴﻬﺎ ﻟﻘﺎﻫﺎ ﻗﺎﻋﺪﻩ ﺯﻱ ﻣﺎﻫﻲ ﺍﺑﺘﺴﻢ ... ﺑﻌﺪﻳﻦ ﻗﺮﺑﻬﺎ ﻟﻴﻪ .. ﻗﻌﺪ ﻳﺸﻢ ﻓﻲ ﺭﻳﺤﺘﻬﺎ .. ﺷﻢ ﺭﻳﺤﻪ ﺗﺎﻧﻴﻪ ﻏﻴﺮ ﺭﻳﺤﺔ ﺍﻟﺒﺮﻓﺎﻥ ﻣﺘﺎﻋﻪ .. ﻫﻮ ﻣﻦ ﻟﻤﺎ ﻋﺮﻓﻬﺎ ﻣﺎﺷﻤﺶ ﻋﻠﻴﻬﺎ ﺭﻳﺤﺔ ﻋﻄﺮ .. ﺑﺶ ﻫﺎﻟﻤﺮﻩ ﺍﻟﺮﻳﺤﻪ ﺍﻟﺘﺎﻧﻴﻪ ﺍﻟﻠﻲ ﺷﻤﻬﺎ ﻛﺎﻧﺖ ﺭﻳﺤﻪ ﺣﻠﻮﺓ ﺑﺎﻟﻤﺮﺓ ﺭﻳﺤﺔ ﻭﺭﺩ ﻃﺒﻴﻌﻲ ... ﺍﺫﻛﺮ ﻟﻤﺎ ﻛﺎﻧﺖ ﺣﺎﺿﻨﻪ ﺍﺩﺟﺎﻛﻪ ﻭﺷﺎﺩﻩ ﻋﻠﻴﻬﺎ ... ﺗﺴﺎﺭﻋﺖ ﻧﺒﻀﺎﺕ ﻗﻠﺒﻪ .. ﺣﻀﻦ ﺍﺩﺟﺎﻛﻪ ﻭﻏﻤﺾ ﻋﻴﻮﻧﻪ .. ﻗﻌﺪ ﻫﺎﻳﻢ ﻭﻣﻨﻘﻄﻊ ﻋﻦ ﺍﻟﺪﻧﻴﺎ ﻓﻲ ﻫﺎﻟﻠﺤﻈﻪ .. ..
ﺍﻧﻘﻄﻌﺖ ﻫﺎﻟﻠﺤﻈﻪ ﺍﻟﺤﻠﻮﺓ ... ﻟﻤﺎ ﺧﺸﺖ ﺍﻗﺒﺎﻝ ﻋﻠﻴﻪ .. ﻫﻮ ﺍﻧﻔﺰﻉ ﻭﻧﺰﻝ ﺍﺩﺟﺎﻛﻪ ﻭﻗﻌﺪ ﻳﺸﺒﺤﻠﻬﺎ ﺑﻨﻈﺮﺓ ﺗﺨﻮﻑ ..
ﺍﻗﺒﺎﻝ ﻭﻗﻔﺖ ﺟﺎﻣﺪﻩ ﻣﺴﺘﻐﺮﺑﻪ ﻓﻴﻪ ﻭﺧﺎﻳﻔﻪ ﻣﻦ ﻧﻈﺮﺗﻪ ..
ﻣﻌﺎﻭﻳﻪ ﺑﻌﺼﺒﻴﻪ : ﻣﻦ ﺍﻣﺘﻰ ﺗﺨﺸﻲ ﻋﻠﻴﺎ ﻗﺒﻞ ﻻ ﻃﻘﻲ !!
ﺍﻗﺒﺎﻝ ﺑﺨﻮﻑ : ﻛﻨﺖ ﺑﻨﻘﻮﻟﻚ ﻉ ﺍﻟﻤﻜﺎﻥ ﺍﻟﻠﻲ ﺣﺠﺰﻧﺎﻩ ﻟﻌﺸﻲ ﺍﻟﻠﻴﻠﻪ ..
ﻣﻌﺎﻭﻳﻪ : ﻷﺧﺮ ﻣﺮﺓ ﺗﺨﺸﻲ ﻋﻠﻴﺎ ﻫﻜﻲ ﻣﺮﺓ ﺗﺎﻧﻴﻪ ﻳﺎﺇﻗﺒﺎﻝ ﺣﻨﺴﺘﻐﻨﻰ ﻋﻦ ﻭﺟﻮﺩﻙ ﻫﻨﻲ ... ﻗﺎﻋﺪ ﻧﻔﻮﺗﻠﻚ ﻭﻧﻌﺪﻱ ﻭﻛﻠﻪ ﻉ ﺧﺎﻃﺮ ﻋﻴﻮﻥ ﺍﻟﻤﺮﺣﻮﻡ ﺑﻮﻙ ... ﻟﻜﻦ ﻛﻞ ﺷﻲ ﻟﻴﻪ ﺣﺪ .. ﻭﺗﻮﺍ ﺍﻃﻠﻌﻲ ﺍﻗﻠﺒﻲ ﻭﺟﻬﻚ ...
ﺍﻗﺒﺎﻝ ﻗﺮﻳﺐ ﻣﺎﺗﺖ ﻣﻦ ﻛﻼﻣﻪ ﺍﻭﻝ ﻣﺮﻩ ﻳﻜﻮﻥ ﻗﺎﺳﻲ ﻋﻠﻴﻬﺎ ﻫﻜﻲ .. ﻃﻠﻌﺖ ﻭﺻﻜﺮﺕ ﺍﻟﺒﺎﺏ ﻭﻣﺸﺖ ﻟﻤﻜﺘﺒﻬﺎ ﺻﻜﺮﺍﺗﻪ ﻋﻠﻴﻬﺎ ﻭﻗﻌﺪﺕ ﺗﺒﻜﻲ ..
***
ﺭﻭﺣﺖ ﺣﻨﺎﻥ ﻟﻠﺤﻮﺵ ﻭﻫﻲ ﺗﻔﻜﺮ ﻓﻲ ﺣﻜﺎﻳﻪ ﺍﻟﻌﺸﻲ ..
ﻟﺒﻨﻰ : ﺍﻣﻤﻢ .. ﻳﻬﺒﻞ ..
ﺣﻨﺎﻥ : ﻟﺒﻨﻰ ﻗﻠﻨﺎ ﻭﻛﻠﻴﻪ ﻣﺶ ﺗﺎﻛﻠﻲ ﺍﻧﺘﻲ .. ﻫﺎﺗﻲ ﺟﺎﻱ ..
ﻟﺒﻨﻰ ﺑﻀﺤﻜﻪ : ﺧﻼﺹ ﺧﻼﺹ ﻭﺍﻟﻠﻪ ﺧﻼﺹ .
ﺣﻨﺎﻥ : ﺭﺍﻙ ﺣﻠﻔﺘﻲ ...
ﻟﺒﻨﻰ : ﻫﻬﻬﻬﻬﻬﻪ
ﺣﻨﺎﻥ : ﻭﻳﻦ ﺭﻫﻒ ..
ﻟﺒﻨﻰ : ﺻﻠﺖ ﺍﻟﻌﺼﺮ ﻭﺭﻗﺪﺕ ...
ﺣﻨﺎﻥ ﺗﻨﻬﺪﺕ : ﺍﻟﻠﻴﻠﻪ ﻋﻨﺪﻱ ﻋﻤﻞ ..
ﻟﺒﻨﻰ : ﻓﻲ ﺍﻟﻠﻴﻞ؟
ﺣﻨﺎﻥ : ﻋﺸﺎﺀ ﻋﻤﻞ ...
ﻟﺒﻨﻰ : ﺍﻫﺎ ...
ﺣﻨﺎﻥ : ﻓﻌﻴﻮﻧﻜﻢ ﻣﺤﻤﺪ .. ﻟﺒﻨﻰ ﺑﻀﺤﻜﻪ : ﺍﻛﻴﺪ ﻣﺎﻣﺎ ... ﻗﻮﻟﻴﻠﻲ ﺍﻣﺘﻰ ﺑﻴﺴﺎﻓﺮ ﺧﺎﻟﻮ ﻏﺪﻭﺓ ..
ﺣﻨﺎﻥ : ﺍﻟﻌﺸﻴﻪ ..
ﻟﺒﻨﻰ : ﺗﻌﻮﺩﻧﺎ ﻋﻠﻴﻪ ..
ﺣﻨﺎﻥ : ﺍﻥ ﺷﺎﺀ ﺍﻟﻠﻪ ﻣﺎﻳﻐﻴﺒﺶ ﺯﻱ ﻗﺒﻞ ﺑﺎﻟﺴﻨﻴﻦ ..
ﻟﺒﻨﻲ ﺑﺈﺑﺘﺴﺎﻣﻪ : ﻻ ﻫﺎﻟﻤﺮﻩ ﻣﺶ ﺣﻴﻐﻴﻴﺐ ﻫﻠﺒﻪ ﺍﻃﻤﻨﻲ ..
ﺣﻨﺎﻥ ﺑﻀﺤﻜﻪ : ﻭﻋﻼﺵ ...
ﻟﺒﻨﻰ : ﻫﻬﻬﻬﻪ ... ﻗﻠﺒﻪ ﻣﺶ ﺣﻴﻬﻨﻴﻪ ﻳﺎﺣﻨﺤﻦ ..
ﺣﻨﺎﻥ : ﻫﻬﻬﻬﻬﻬﻬﻬﻪ ... ﺷﻦ ﺍﻧﻄﺒﺎﻉ ﻣﻬﺎ ﻋﻨﻪ ..
ﻟﺒﻨﻰ : ﻋﺎﺟﺒﻬﺎ ﻫﻠﺒﻪ ... ﻭﺣﺘﻰ ﻫﻮ ﻣﻌﺠﺐ ﺑﻴﻬﺎ ﻫﻠﺒﻪ ..
ﺣﻨﺎﻥ : ﺇﻥ ﺷﺎﺀ ﺍﻟﻠﻪ ﺧﻴﺮ ..
ﻟﺒﻨﻰ : ﺯﻋﻤﻪ ﻟﻮﺻﺎﺭ ﺷﻲ ﺭﺳﻤﻲ ﺑﻮﻫﺎ ﺣﻴﻮﺍﻓﻖ؟
ﺣﻨﺎﻥ : ﻣﺶ ﻋﺎﺭﻓﻪ ...
ﻟﺒﻨﻰ : ﻫﻮ ﻛﻮﻳﺲ ﻣﻌﺎﻙ ﻓﺎﻟﺸﻐﻞ ..
ﺣﻨﺎﻥ ﺑﺈﺑﺘﺴﺎﻣﻪ : ﺍﻳﻪ ﻛﻮﻳﺲ ...
ﻟﺒﻨﻰ : ﻛﺎﻥ ﻏﻠﻂ ﻣﻌﺎﻙ ﻗﻮﻟﻴﻠﻲ ﺑﺶ ﻧﺤﺮﺵ ﻓﻴﻪ ﻣﻬﺎ ..
ﺣﻨﺎﻥ : ﻫﻬﻬﻬﻬﻬﻬﻬﻬﻬﻬﻬﻬﻬﻪﻩ
ﻣﺴﺎﺀﺍ ..
ﺍﻟﺴﺎﻋﻪ 7:55 ...
ﻣﻄﻌﻢ ﻣﻦ ﺍﻛﺒﺮ ﻭﺍﻓﻀﻞ ﻣﻄﺎﻋﻢ ﺍﻟﻌﺎﺻﻤﻪ ..
ﺍﻟﻤﻄﻌﻢ ﻛﺎﻥ ﻓﻴﻪ ﻃﺎﻭﻻﺕ ﺍﻟﺒﺮﺍ ﻭﺩﺍﺧﻞ ...
ﺍﻟﺒﺮﺍ ﻓﻲ ﻃﺎﻭﻟﻪ ﻃﻮﻳﻠﻪ ﺧﺎﺻﻪ ﻣﺘﺠﻬﺰﺓ ﻟﺰﺑﺎﻳﻦ ﻣﻬﻤﻴﻦ .. ﻛﺎﻥ ﻣﻘﻌﻤﺰﻳﻦ ﻋﻠﻴﻬﺎ .. ﻭﻛﺎﻧﻮﺍ ﻳﺘﺒﺎﺩﻟﻮﺍ ﻓﻲ ﺍﻃﺮﺍﻑ ﺍﻟﺤﺪﻳﺚ ...
ﻭﻫﻮ ﻛﺎﻥ ﻳﺴﺘﻨﻰ ﻓﻴﻬﺎ ﺑﺎﻟﺴﺎﻋﻪ ﻭﺍﻟﺪﻗﻴﻘﻪ ... ﺷﺒﺢ ﺍﻟﺴﺎﻋﻪ ﻟﻘﺎﻫﺎ 8 ﺗﻤﺎﻣﺎ ...
ﺃﻳﻤﻦ ﺑﺈﺑﺘﺴﺎﻣﻪ : ﺍﻫﻲ ﺟﺖ ...
ﺷﺒﺢ ﻟﻠﺠﻬﻪ ﺍﻟﻠﻲ ﻳﺸﺒﺤﻠﻬﺎ ﺃﻳﻤﻦ .. ﻓﺘﺢ ﻋﻴﻮﻧﻪ ﺑﺬﻫﻮﻝ .. ﻛﺎﻧﺖ ﻛﺎﻟﻌﺎﺩﻩ ﺑﻄﻠﺘﻬﺎ ﺗﺴﺮﻕ ﺍﻟﻌﻘﻮﻝ ... ﺍﻧﺎﻗﻪ .. ﻭﺣﻀﻮﺭ ﻗﻮﻱ .. ﺣﺘﻰ ﺍﻷﺟﺎﻧﺐ ﺍﻟﻠﻲ ﺷﺎﻓﻮﻫﺎ ﺑﺤﺠﺎﺑﻬﺎ ﻭﻟﺒﺴﻬﺎ ﺍﻟﻤﺤﺘﺸﻢ ﻟﻔﺘﺖ ﺍﻧﺘﺒﺎﻫﻬﻢ ﻫﻠﺒﻪ ..
ﺣﻨﺎﻥ ﻭﺯﻋﺖ ﻧﻈﺮﻫﺎ ﻉ ﺍﻟﻜﻞ ﺑﺈﺑﺘﺴﺎﻣﻪ : ﺍﻟﺴﻼﻡ ﻋﻠﻴﻜﻢ ...
ﺍﻷﺟﺎﻧﺐ ﺍﺑﺘﺴﻤﻮﺍ ﻭﺣﻴﻮﻫﺎ ﺑﺤﺮﻛﺔ ﺍﻟﺮﺍﺱ .. ﻭﺭﺋﻴﺴﻬﺎ ﻭﺯﻣﻼﺋﻬﺎ ﺭﺩﻭﺍ ﻋﻠﻴﻬﺎ : ﻭﻋﻠﻴﻜﻢ ﺍﻟﺴﻼﻡ ..
" ﻃﺒﻌﺎ ﺍﻟﺤﺪﻳﺚ ﻣﻊ ﺍﻷﺟﺎﻧﺐ ﺣﻴﻜﻮﻥ ﺑﺎﻹﻧﺠﻠﻴﺰﻱ ﻭﺍﻧﻲ ﺣﻨﺪﻳﺮﻩ ﺑﺎﻟﻔﺼﺤﻰ .."
ﻗﻌﻤﺰﺕ ﺣﻨﺎﻥ : ﻣﺴﺎﺀ ﺍﻟﺨﻴﺮ " ﺑﺎﻹﻧﺠﻠﻴﺰﻱ ..."
ﺭﺩﻭﺍ ﻋﻠﻴﻬﺎ : ﻣﺴﺎﺀ ﺍﻟﺨﻴﺮ ...
ﻣﻌﺎﻭﻳﻪ ﻭﻫﻮ ﻳﺸﻮﻓﻠﻬﺎ ﺑﺈﻋﺠﺎﺏ : ﺣﻨﺎﻥ ﺳﺎﻟﻢ .. ﺍﻟﻤﻬﻨﺪﺳﻪ ﺍﻟﺘﻲ ﺗﻌﺎﻭﻧﺎ ﻣﻌﻬﺎ ﻓﻲ ﻫﺬﺍ ﺍﻟﻤﺸﺮﻭﻉ ...
: ﺍﻫﻼ ﺑﻚ
: ﻓﺮﺻﺔ ﺳﻌﻴﺪﻩ ..
: ﻣﺮﺣﺒﺎ ..
ﺣﻨﺎﻥ ﺑﺈﺑﺘﺴﺎﻣﻪ : ﺷﻜﺮﺍ ﻟﻜﻢ ...
ﺑﺪﻭﺍ ﻳﺘﺠﺎﺫﺑﻮﺍ ﻓﻲ ﺃﻃﺮﺍﻑ ﺍﻟﺤﺪﻳﺚ ﺑﻤﻮﺍﺿﻴﻊ ﻋﺎﻣﻪ .. ﺑﻌﺪﻳﻦ ﺑﺪﻭﺍ ﻳﺘﻜﻠﻤﻮﺍ ﻓﻲ ﺍﻟﺸﻐﻞ .. ﻭﺣﻨﺎﻥ ﻛﺎﻧﺖ ﺗﺘﻜﻠﻢ ﺑﺜﻘﻪ ﻭﻋﻦ ﻋﻠﻢ .. ﻭﺍﻷﺟﺎﻧﺐ ﺃﻋﺠﺒﻮﺍ ﺟﺪﺍ ﺑﻴﻬﺎ .. ﻣﺮﺍﺓ ﻣﺤﺠﺒﻪ ﺻﺢ ﻣﻤﻜﻦ ﺍﻟﻤﻈﻬﺮ ﻳﻌﺒﺮ ﻋﻦ ﺍﻧﺴﺎﻧﻪ ﻣﺤﺎﻓﻈﻪ ﻭﻏﻴﺮ ﻣﺘﺤﺮﺭﺓ ﺍﻭ ﻣﻨﻐﻠﻘﻪ ..
ﻟﻜﻦ ﺍﻟﻠﻲ ﺯﻱ ﺣﻨﺎﻥ ﻳﺜﺒﺘﻮﺍ ﻟﻠﻜﻞ ﺇﻥ ﺍﻟﺘﺤﺮﺭ ﻭﺍﻻﻧﻔﺘﺎﺡ ﻓﻲ ﺍﻟﻌﻘﻞ .. ﻣﺶ ﻓﻲ ﺍﻟﺸﻜﻞ ﻭﺍﻟﻤﻈﻬﺮ ..
⚘ ﻣﻬﻤﺎ ﺍﻧﻔﺘﺤﻨﺎ ﻉ ﺍﻟﻌﺎﻟﻢ ﻻﺯﻡ ﻧﺤﺎﻓﻈﻮﺍ ﻉ ﻫﻮﻳﺘﻨﺎ ﻭﺛﻘﺎﻓﺘﻨﺎ .. ﻭﺗﻄﻮﺭﻧﺎ ﻳﻜﻮﻥ ﻓﻴﻤﺎ ﻳﻨﻔﻊ ﻓﻲ ﺍﻟﺠﻮﻫﺮ ﻣﺶ ﻓﻲ ﺳﻔﺎﺳﻒ ﺍﻷﻣﻮﺭ ..
ﺟﺎﺑﻮﺍ ﺍﻟﻌﺸﻲ ... ﻭﺑﺪﻭﺍ ﻳﺘﻌﺸﻮﺍ ﻭﺍﻧﺘﻘﻠﻮﺍ ﺍﻟﻀﻴﻮﻑ ﺑﺎﻟﺤﺪﻳﺚ ﻓﻲ ﻣﻮﺍﺿﻴﻊ ﺗﺎﻧﻴﻪ ﻓﻲ ﻣﺤﺎﻭﺭ ﻣﺘﻨﻮﻋﻪ .. ﺳﻴﺎﺳﻪ .. ﺛﻘﺎﻓﻪ .. ﺣﺘﻰ ﺍﻗﺘﺼﺎﺩ .. ﻭﻧﻘﺎﺵ ﺣﻨﺎﻥ ﻛﺎﻥ ﻳﺰﻳﺪ ﻳﻜﺒﺮ ﻓﻴﻬﺎ ﻓﻌﻴﻦ ﻣﻌﺎﻭﻳﻪ ﻭﻳﺰﻳﺪ ﺇﻋﺠﺎﺑﻪ ﺑﻬﺎ ﻭﻗﻠﺒﻪ ﻳﺰﻳﺪ ﻳﺤﺒﻬﺎ ﺃﻛﺜﺮ ﻭﺃﻛﺜﺮ ... ﻃﻮﻝ ﺍﻟﺘﻘﻌﻤﻴﺰﺓ ﻛﺎﻥ ﻉ ﺍﻋﺼﺎﺑﻪ .. ﻭﻫﻮ ﻳﺸﻮﻑ ﻓﻲ ﻧﻈﺮﺍﺕ ﺍﻹﻋﺠﺎﺏ ﺑﻴﻬﺎ .. ﻭﻳﺸﻮﻑ ﻓﻀﺤﻜﺘﻬﺎ ﻭﺍﺑﺘﺴﺎﻣﺘﻬﺎ ﺍﻟﻠﻲ ﺳﺎﻫﻞ ﺗﻄﻠﻊ ﻣﻨﻬﺎ ﻷﻱ ﺣﺪ ﺇﻻ ﻟﻴﻪ ﻫﻮ .. ﻭﻳﺴﺄﻝ ﻓﻨﻔﺴﻪ " ﻟﻬﺎﻟﺪﺭﺟﻪ ﻣﺶ ﻣﺘﻘﺒﻠﺘﻨﻲ "
ﺇﻗﺒﺎﻝ ﻛﺎﻧﺖ ﺣﺎﺿﺮﺓ ﻭﺑﺮﻏﻢ ﺍﻟﻠﻲ ﺩﺍﻳﺮﺍﺗﻪ ﻓﺮﻭﺣﻬﺎ .. ﻟﺒﺲ ﻭﺗﺴﺮﻳﺤﻪ ﻭﻣﻜﻴﺎﺝ ﺑﺲ ﻣﺎﻗﺪﺭﺗﺶ ﺗﺨﻠﻲ ﻣﻌﺎﻭﻳﻪ ﻳﻠﻤﺤﻬﺎ ﻭﻟﻮ ﺑﻄﺮﻑ ﻋﻴﻨﻪ .. ﻭﻫﺬﺍ ﻳﺰﻳﺪ ﺃﻛﺜﺮ ﻣﻦ ﺣﻘﺪﻫﺎ ﻉ ﺣﻨﺎﻥ ..
ﺟﻲ ﺍﻟﻮﻗﺖ ﺍﻟﻠﻲ ﺑﻴﺮﻭﺣﻮﺍ ﻭﺍﺣﺪ ﻣﻦ ﺍﻟﻀﻴﻮﻑ ﻗﺪﻡ ﻟﺤﻨﺎﻥ ...
: ﺳﻌﺪﺕ ﺟﺪﺍ ﺑﻤﻌﺮﻓﺘﻚ ﻭﺍﻟﺘﻌﺎﻣﻞ ﻣﻌﻚ .. ﻭﻣﺪ ﻳﺪﻩ ..
ﻣﻌﺎﻭﻳﻪ ﻭﺃﻳﻤﻦ ﻭﺇﻗﺒﺎﻝ ﻳﺘﺮﻗﺒﻮﺍ ﻓﻴﻬﺎ ﻛﻴﻒ ﺣﺘﺘﺼﺮﻑ .. ﻫﺬﺍ ﺿﻴﻒ ﺍﺟﻨﺒﻲ ﻏﺮﺑﻲ ﻣﺶ ﻋﺮﺑﻲ ... ﻭﺷﺮﻳﻚ ﻣﻬﻢ .. ﻭﺗﺼﺮﻓﺎﺗﻬﺎ ﻻﺯﻡ ﺗﻜﻮﻥ ﻣﺤﺴﻮﺑﻪ ..
ﻫﻲ ﺍﺑﺘﺴﻤﺖ ﻭﺭﻓﻌﺖ ﺍﻳﺪﻫﺎ ﺍﻟﻴﻤﻴﻦ ﺣﻄﺘﻬﺎ ﺃﻋﻠﻰ ﺻﺪﺭﻫﺎ ﻣﻦ ﺍﻟﺠﻬﺔ ﺍﻟﻴﺴﺮﻯ ﻭﻗﺎﻟﺖ : ﺍﻟﻤﻌﺬﺭﺓ ﻻﺍﺻﺎﻓﺢ ﺍﻟﺮﺟﺎﻝ ...
ﺍﻟﻀﻴﻒ ﻃﺒﻌﺎ ﻛﺎﻧﺖ ﺍﻟﻠﻘﻄﻪ ﻟﻴﻪ ﻣﺤﺮﺟﻪ ﺑﺲ ﺍﻷﻧﻄﺒﺎﻉ ﺍﻟﻠﻲ ﺧﺪﺍﻩ ﻉ ﺣﻨﺎﻥ ﺍﺛﻨﺎﺀ ﺍﻟﺤﺪﻳﺚ .. ﻭﻫﻴﺌﺘﻬﺎ ﺧﻼﻩ ﻳﺘﺄﻛﺪ ﺍﻧﻬﺎ ﺍﻧﺴﺎﻧﻪ ﻣﺤﺎﻓﻈﻪ ﻉ ﻫﻮﻳﺘﻬﺎ ﻭﺍﻥ ﺗﺼﺮﻓﻬﺎ ﻫﺬﺍ ﺟﺰﺀ ﻣﻦ ﺛﻘﺎﻓﺘﻬﺎ ﻭﺑﻴﺌﺘﻬﺎ .. ﺍﺣﺘﺮﻣﻬﺎ .. ﻭﺩﺍﺭ ﺑﻴﺪﻩ ﻧﻔﺲ ﺍﻟﺤﺮﻛﻪ ﺍﻟﻠﻲ ﺩﺍﺭﺗﻬﺎ ﻭﺍﺑﺘﺴﻢ ﻭﻗﺎﻝ : ﺍﻋﺘﺬﺭ ﻟﻚ .. ﻟﻢ ﺍﻛﻦ ﺃﻋﻠﻢ ..
ﺣﻨﺎﻥ ﺍﺑﺘﺴﻤﺖ : ﻻﺑﺄﺱ .. ﺱﻋﻴﺪﻩ ﺑﻤﻌﺮﻓﺘﻜﻢ ﻭﺍﻟﺘﻌﺎﻣﻞ ﻣﻌﺎﻛﻢ ..
ﺍﻷﺳﻠﻮﺏ ﺍﻟﺮﺍﻗﻲ ﺍﻟﻠﻲ ﻛﺎﻧﺖ ﺗﺘﻌﺎﻣﻞ ﺑﻴﻪ ﻳﺄﺳﺮ ﺍﻟﻠﻲ ﻗﺪﺍﻣﻬﺎ ﻭﻳﺨﻠﻴﻪ ﺭﻏﻤﺎ ﻋﻨﻪ ﻳﺤﺘﺮﻣﻬﺎ ..
ﺷﻮﻳﻪ ﻭﻃﻠﻌﻮﺍ ﻣﻦ ﺍﻟﻤﻄﻌﻢ ﻭﺍﻳﻤﻦ ﺭﺍﻓﻘﻬﻢ ﻟﻠﻔﻨﺪﻕ ﺍﻟﻠﻲ ﻗﺎﻋﺪﻳﻦ ﻓﻴﻪ ..
ﺣﻨﺎﻥ ﻃﺎﻟﻌﻪ ﻭﻣﻌﺎﻭﻳﻪ ﻭﺍﻗﻒ ﻉ ﺇﻗﺒﺎﻝ ﻭﻳﺸﻮﻓﻠﻬﺎ ..
ﻣﻌﺎﻭﻳﻪ ﺑﺈﺳﺘﻌﺠﺎﻝ : ﺗﻤﺎﻡ ... ﺗﺼﺒﺤﻲ ﻉ ﺧﻴﺮ ..
ﺍﻗﺒﺎﻝ ﺗﺸﺒﺤﻠﻪ ﻭﻫﻲ ﻓﻲ ﻗﻤﺔ ﻏﻴﻀﻬﺎ ﻣﺎﺷﻲ ﻻﺣﻘﻬﺎ ...
ﺣﻨﺎﻥ ﻭﺻﻠﺖ ﻓﺴﻴﺎﺭﺗﻬﺎ ..
" ﺑﺶ ﻣﻬﻨﺪﺳﻪ ..."
ﺣﻨﺎﻥ ﺍﻟﺘﻔﺘﺖ ... ﻣﻌﺎﻭﻳﻪ ﺟﻲ ﻭﻭﻗﻒ ﻗﺪﺍﻣﻬﺎ ..
ﺣﻨﺎﻥ : ﻧﻌﻢ ..
ﻣﻌﺎﻭﻳﻪ ﺣﻂ ﺍﻳﺪﻳﻪ ﻓﺠﻴﻮﺑﻪ ﻭﻗﻌﺪ ﻳﺸﺒﺤﻠﻬﺎ ..
ﻭﻫﻲ ﺍﺳﺘﻐﺮﺑﺖ ﻭﺗﺤﺸﻤﺖ ﻓﻲ ﻧﻔﺲ ﺍﻟﻮﻗﺖ : ﻧﻌﻢ .. ﺳﻴﺪ ﻣﻌﺎﻭﻳﻪ ..
ﻣﻌﺎﻭﻳﻪ ﺍﺑﺘﺴﻢ : ﺃﻧﻲ ﻋﻤﺮﻱ ﻣﺎﻛﻨﺖ ﺍﻧﺴﺎﻥ ﻓﻀﻮﻟﻲ .. ﺑﺲ ﺍﻧﺘﻲ ﺧﻠﻴﺘﻨﻲ ﻫﻜﻲ ..
ﺣﻨﺎﻥ ﺑﺈﺳﺘﻐﺮﺍﺏ : ﺷﻦ ﺗﻘﺼﺪ ...
ﻣﻌﺎﻭﻳﻪ : ﻣﻦ ﻟﻤﺎ ﻋﺮﻓﺘﻚ ﻭﻣﻊ ﻛﻞ ﺍﻟﻤﻮﺍﻗﻒ ﺍﻟﻠﻲ ﺍﺟﺘﻤﻌﺖ ﻓﻴﻬﺎ ﺑﻴﻚ .. ﻭﺍﻧﻲ ﻓﺒﺎﻟﻲ ﺳﺆﺍﻝ ﻭﺍﺣﺪ .. ﻣﻦ ﻭﻳﻦ ﻟﻴﻚ ﻫﺎﻟﺜﻘﻪ ﻭﺍﻟﺜﺒﺎﺕ؟
ﺣﻨﺎﻥ ﺿﺤﻜﺖ ...
ﻣﻌﺎﻭﻳﻪ ﺑﺈﺑﺘﺴﺎﻣﻪ : ﺑﺠﺪ ﻧﺴﺄﻝ ﻓﻴﻚ .. ﻓﺄﻛﺜﺮ ﻣﻦ ﻣﻮﻗﻒ ﻛﻨﺘﻲ ﺗﺘﺼﺮﻓﻲ ﻣﻌﺎﻱ ﻭﺗﺘﻜﻠﻤﻲ ﻭﻣﺶ ﻣﻔﻜﺮﻩ ﻓﺮﺩﺓ ﻓﻌﻠﻲ .. ﺍﻭﻟﻬﻢ ﻣﻮﻗﻔﻲ ﻣﻊ ﺑﻨﺘﻲ ﻣﻬﺎ .. ﺍﻭﻝ ﻣﺮﺓ ﺷﻔﺘﻚ ﻓﻴﻬﺎ .. ﻟﻤﺎ ﺍﺩﺧﻠﺘﻲ ﻣﺎﻓﻜﺮﺗﻴﺶ ﺷﻦ ﻣﻤﻜﻦ ﺗﻜﻮﻥ ﺭﺩﺓ ﻓﻌﻠﻲ ﻭﺍﻧﻲ ﺟﺎﻱ ﻣﺶ ﻧﺎﻭﻱ ﺧﻴﺮ .. ﻭﺗﺘﺒﻌﻬﺎ ﻫﻠﺒﻪ ﻣﻮﺍﻗﻒ ﺑﻴﻨﻲ ﻭﺑﻴﻨﻚ ﻭﺍﺟﻬﺘﻴﻨﻲ ﻓﻴﻬﺎ ﻭﻛﻨﺘﻲ ﻭﺍﺛﻘﻪ ﻣﻦ ﻧﻔﺴﻚ ﻭﺛﺎﺑﺘﻪ ﺑﺮﻏﻢ ﺭﺩﺓ ﻓﻌﻠﻲ ﺍﻟﻠﻲ ﻛﺎﻧﺖ ﻗﺎﺳﻴﻪ ﻓﺎﻟﻐﺎﻟﺐ ﺍﻭﺳﺎﺧﺮﺓ .. ﻭﺍﻟﻤﻮﻕﻑ ﺍﻷﺧﻴﺮ ﺍﻟﻠﻲ ﺻﺎﺭ ﻣﻊ ﺍﻟﻮﻓﺪ ﺍﻷﺟﻨﺒﻲ ﺧﻼﻧﻲ ﻧﺘﺠﺮﺃ ﻧﺮﺿﻲ ﻓﻀﻮﻟﻲ ﻭﻧﺴﺄﻟﻚ ﻛﻴﻒ ﺍﻧﺘﻲ ﻗﺎﺩﺭﻩ ﺗﻜﻮﻧﻲ ﺛﺎﺑﺘﻪ ﻭﻭﺍﺛﻘﻪ ﻣﻦ ﻧﻔﺴﻚ ﻟﻬﺎﻟﺤﺪ !! ؟
ﺣﻨﺎﻥ ﻭﺯﻋﺖ ﻧﻈﺮﻫﺎ ﻉ ﺍﻟﻤﻜﺎﻥ ﻭﺑﻌﺪﻳﻦ ﺷﺒﺤﺘﻠﻪ : ﻧﻜﺬﺏ ﻋﻠﻴﻚ ﻟﻮﻧﻘﻮﻟﻚ ﻓﻲ ﻛﻞ ﻣﻮﻗﻒ ﻭﺍﺟﻬﺘﻚ ﻓﻴﻪ ﻛﻨﺖ ﺛﺎﺑﺘﻪ ﻣﻦ ﺩﺍﺧﻞ ﺯﻱ ﻣﺎﺑﺪﺍ ﻟﻚ .. ﻛﻨﺖ ﻧﺨﺎﻑ .. ﺑﺲ ﻣﺎﻛﻨﺘﺶ ﻧﺨﻠﻲ ﻓﻲ ﺧﻮﻓﻲ ﻳﺘﻐﻠﺐ ﻋﻠﻴﺎ ﻷﻧﻲ ﻛﻨﺖ ﻧﻘﻮﻝ ﻓﻲ ﺍﻟﺤﻖ ﻭﺍﻟﺤﻖ ﻳﺒﻲ ﻣﻦ ﺻﺎﺣﺒﻪ ﻳﻜﻮﻥ ﺛﺎﺑﺖ ﺑﻜﻞ ﻗﻮﺗﻪ ... ﻭﻛﻨﺖ ﻧﺴﺘﻤﺪ ﻓﻲ ﻗﻮﺗﻲ ﻣﻦ ﺍﻟﺤﻖ ﻧﻔﺴﻪ ... ﺭﺑﻲ .. ﺍﻧﻲ ﻣﻦ ﺩﻭﻧﻪ ﻭﻻﺷﻲ .. ﻭﺍﺍﻟﻲ ﺷﻔﺘﻪ ﻓﻴﺎ ﻟﻮﻻ ﻋﻮﻧﻪ ﻫﻮ ﺍﻧﻲ ﻭﻻﺣﺎﺟﻪ ...
ﻣﻌﺎﻭﻳﻪ : ﻓﻲ ﻧﺎﺱ ﻫﻠﺒﻪ ﻓﻲ ﺍﻟﺪﻧﻴﺎ ﻗﻮﻳﻪ ﻭﻋﻼﻗﺘﻬﻢ ﺑﻴﻪ ﻣﺶ ﻗﻮﻳﻪ ﻭﻣﻤﻜﻦ ﻣﺎﻳﺆﻣﻨﻮﺵ ﺑﻴﻪ ﺍﺻﻼ؟ ..
ﺣﻨﺎﻥ ﺍﺑﺘﺴﻤﺖ : ﻫﻮ ﻳﻤﺪ ﺑﺎﻟﻘﻮﺓ ﺧﻠﻘﻪ ﻛﻠﻬﻢ ﺣﺘﻰ ﻟﻮ ﻛﺎﻧﻮﺍ ﻧﺎﻛﺮﻳﻦ ﻭﺟﻮﺩﻩ ﻭﺟﺎﺣﺪﻳﻦ ﻓﻀﻠﻪ .. ﺑﺲ ﺍﻟﻘﻮﺓ ﺍﻟﻠﻲ ﻳﻌﻄﻲ ﻓﻴﻬﺎ ﻟﻌﺒﺎﺩﻩ ﺍﻟﻤﻘﺮﺑﻴﻦ ﻟﻴﻪ ﺗﻔﺮﻕ ﻫﻠﺒﻪ ﻋﻦ ﺍﻟﻘﻮﺓ ﺍﻟﻠﻲ ﺗﻌﺮﻓﻬﺎ .. ﻗﻮﺓ ﺗﺨﻠﻲ ﺻﺎﺣﺒﻬﺎ ﻟﻮ ﻛﺎﻥ ﻣﻠﻮﺡ ﻓﻲ ﺍﻟﻨﺎﺭ ﻳﻜﻮﻥ ﻣﺮﺗﺎﺡ ﻣﻦ ﺩﺍﺧﻠﻪ ﻭﻭﺍﺛﻖ ﻓﻴﻪ .. ﺯﻱ ﺳﻴﺪﻧﺎ ﺍﺑﺮﺍﻫﻴﻢ ﺗﻌﺮﻑ ﻗﺼﺘﻪ ...
ﻣﻌﺎﻭﻳﻪ : ﺍﻣﺎ ﻗﺼﺔ ...
ﺣﻨﺎﻥ : ﻟﻤﺎ ﻭﻗﻒ ﻭﻭﺍﺟﻪ ﻗﻮﻣﻪ ﻭﺍﻫﻠﻪ ﻭﻫﻮ ﻭﻟﺪ 16 ﺳﻨﻪ ﺑﺤﻘﻴﻘﺔ ﻣﺎﻳﻌﺒﺪﻭﺍ ﻣﻦ ﺣﺠﺎﺭﺓ ﻭﺃﻭﺛﺎﻥ .. ﺍﻏﻠﺒﻬﻢ ﻭﻗﻔﻮﺍ ﺿﺪﻩ ﺣﺘﻰ ﻋﻤﻪ ﺍﻟﻠﻲ ﻛﺎﻥ ﻳﻌﺘﺒﺮ ﻓﻴﻪ ﺑﻮﻩ ... ﻭﺍﺟﻪ ﺣﺘﻰ ﺍﻟﺤﺎﻛﻢ ﺍﻟﻤﺘﺠﺒﺮ ﻭﺍﻟﻄﺎﻏﻲ ﻧﻤﺮﻭﺩ ... ﺍﻟﻠﻲ ﻟﻤﺎ ﻣﺎﻋﺠﺒﺎﺵ ﻛﻼﻣﻪ ﻭﺣﺲ ﺍﻧﻪ ﻳﺸﻜﻞ ﺧﻄﺮ ﻋﻠﻴﻪ .. ﻗﺮﺭ ﻳﺘﺨﻠﺺ ﻣﻨﻪ ﻭﺭﻣﺎﻩ ﻓﻨﺎﺭ ﻋﻈﻴﻤﻪ ..
ﺍﻫﻠﻪ ﺿﺪﻩ .. ﻗﻮﻣﻪ ﺿﺪﻩ .. ﻣﺎﺣﺪ ﻣﻌﺎﻩ ﺑﺲ ﺭﺑﻲ ﻛﺎﻥ ﻣﻌﺎﻩ ﻭﻫﻮ ﻋﺎﺭﻑ .. ﺍﻭﻝ ﻣﺎﻭﻟﻌﻮﺍ ﺗﺤﺘﻪ ﺍﻟﻨﺎﺭ ﻛﺎﻥ ﻣﺒﺘﺴﻢ .. ﻭﻫﻮ ﻋﺎﺭﻑ ﺍﻧﻪ ﺍﻷﻗﻮﻯ ﺣﺘﻰ ﻭﻫﻮ ﻓﻲ ﻫﺬﺍﻛﺎ ﺍﻟﻤﻮﻗﻒ ﻷﻥ ﺍﻟﻘﻮﻱ ﻣﻌﺎﻩ .. ﻭﺍﻟﻴﻘﻴﻦ ﻭﺍﻟﺜﻘﻪ ﻫﺎﺩﻱ .. ﺟﺰﺍﺋﻬﻢ ﺍﻥ ﺭﺑﻲ ﺧﻼ ﺍﻟﻨﺎﺭ ﺑﺮﺩ ﻭﺳﻼﻡ ﻋﻠﻴﻪ ....
ﻣﻌﺎﻭﻳﻪ ﻳﺴﻤﻊ ﻭﺍﻟﻜﻼﻡ ﻫﺬﺍ ﺍﻭﻝ ﻣﺮﺓ ﻳﺴﻤﻌﻪ ﻭﻳﻌﺮﻓﻪ ﻧﺴﻲ ﺍﻧﻪ ﻭﺍﻗﻒ ﻓﺎﻟﺸﺎﺭﻉ ﻭﺣﻨﺎﻥ ﻛﺬﻟﻚ ﺯﻳﻪ .. ﻛﺎﻧﺖ ﺗﻔﻜﺮ ﺗﻨﺘﻬﺰ ﻛﻞ ﻓﺮﺻﻪ ﺗﺤﺲ ﻓﻴﻬﺎ ﺍﻧﻬﺎ ﻣﻤﻜﻦ ﺗﺄﺛﺮ ﻓﻴﻪ ﺑﻴﻬﺎ ...
ﻣﻌﺎﻭﻳﻪ ﺍﺑﺘﺴﻢ : ﺍﻭﻝ ﻣﺮﺓ ﻧﺴﻤﻊ ﺑﻴﻬﺎ ..
ﺣﻨﺎﻥ : ﻣﺤﺘﺎﺝ ﺗﺴﻤﻊ ﺑﻬﻠﺒﻪ ﺣﺎﺟﺎﺕ .. ﺍﻃﻠﻊ ﻭﺍﻗﺮﺍ ﻓﻲ ﻛﻞ ﺷﻲ .. ﺍﻧﻔﺘﺢ ﺷﻮﻳﻪ ﻭﻣﺎﺗﻨﻐﻠﻘﺶ ﻉ ﻧﻔﺴﻚ ﺑﻨﻔﺲ ﺍﻷﻓﻜﺎﺭ .. ﻭﻟﻮ ﺗﺒﻲ ﻣﻨﻲ ﻣﺴﺎﻋﺪﻩ ﻣﺎﻋﻨﺪﻳﺶ ﻣﺸﻜﻠﻪ .. ﺿﺤﻜﺖ .. ﺍﻥﻱ ﻓﻲ ﺍﻟﺨﺪﻣﻪ ﻳﺎ ...Boss
ﻣﻌﺎﻭﻳﻪ ﻗﻠﺒﻪ ﻳﺪﻕ ﺑﻌﻨﻒ ﺷﺪﻳﺪ ﻓﻬﺪﻳﻜﺎ ﺍﻟﻠﺤﻈﻪ ﺃﻋﺪﺍﺩﺗﻪ ﺗﻌﻄﻠﺖ ﺗﻤﺎﻣﺎ ﻭﻋﻘﻠﻪ ﺍﻋﻠﻦ ﺍﺳﺘﺴﻼﻣﻪ ﻭﺗﻨﺤﻰ ﻋﻦ ﺍﻟﻘﻴﺎﺩﻩ .. ﻭﻣﺸﺎﻋﺮﻩ ﺳﻴﻄﺮﺕ ﻋﻠﻴﻪ ﺳﻴﻄﺮﺓ ﺗﺎﻣﻪ ﻭﻗﺎﻝ :
" ﺣﻨﺎﻥ ﺍﻧﺘﻲ ﻋﺎﺟﺒﺘﻴﻨﻲ ﻫﻠﺒﻪ .."
ﺣﻨﺎﻥ ﻓﺘﺤﺖ ﻋﻴﻮﻧﻬﺎ ﻉ ﻭﺳﻌﻬﻢ ﺑﺼﺪﻣﻪ ﻗﻠﺒﻬﺎ ﺻﺎﺑﺘﻪ ﺭﻋﺸﻪ ﻭﺣﺴﺖ ﺑﺸﻌﻮﺭ ﻏﺮﻳﺐ ﻣﺎﺣﺴﺘﺶ ﺑﻴﻪ ﻣﻦ ﺯﻣﺎﺍﺍﺍﺍﻥ ...
ﻃﻮﻝ ﻓﺘﺤﺖ ﺑﺎﺏ ﺳﻴﺎﺭﺗﻬﺎ ﻭﺭﻛﺒﺖ ﻭﺳﻜﺮﺗﻬﺎ ﻭﻫﻲ ﺗﺮﻋﺶ ..
ﺍﻣﺎ ﻫﻮ ﻓﺎﻕ ﻉ ﻧﻔﺴﻪ ﻭﻗﻌﺪ ﻳﺸﺒﺢ ﻟﺴﻴﺎﺭﺗﻬﺎ ﻛﻴﻒ ﺗﺘﺤﺮﻙ ﻭﻣﺸﺖ ﺑﺴﺮﻋﻪ .. ﻭﻣﺼﺪﻭﻡ ﻓﻨﻔﺴﻪ ﺻﺪﻣﻪ ﺷﺪﻳﺪﻩ ..
ﻟﻒ ﻭﻣﺸﻲ ﻭﻫﻮ ﻳﺒﻠﻊ ﻓﻲ ﺭﻳﻘﻪ ﻭﻳﻘﻮﻝ ﻓﻲ ﻧﻔﺴﻪ " ﺷﻦ ﺩﺭﺕ ﻳﺎﻏﺒﻲ .. ﻏﻠﻄﺖ ﻏﻠﻄﻪ ﻛﺒﻴﺮﺓ .. ﺻﻌﺐ ﺗﺘﺼﻠﺢ " ﺭﻛﺐ ﺳﻴﺎﺭﺗﻪ ..
ﻭﻗﺎﻝ ﻟﻠﺴﻮﺍﻕ ﺑﺤﺪﻩ : ﻃﻮﻝ ﻟﻠﻘﺼﺮ ..
ﻭﺗﺤﺮﻛﺖ ﺍﻟﺴﻴﺎﺭﺓ ...
... ﻳﺘﺒﻊ ....
٠٨ / ١١ / ٢٠٢٠ · Facebook for Android · ﺭﻭﺍﻳﺎﺕ ﺑك
