ﺍﻟﺘﺎﻟﻲ
🔥
# ﻣﻮﺳﻢ _ ﺍﻟﺘﻮﻟﻴﺐ
# ﺟﻤﺎﻥ _ ﻓﺮﻳﺪ
# ﺍﻟﺠﺰﺀ 21_
ﺭﻭﺣﺖ ﻳﻮﻣﻬﺎ ﻣﻌﺼﺒﻪ ﻭﻣﻀﺎﻳﻘﻪ ﻭﺩﻣﻮﻋﻬﺎ ﻧﺰﻟﻮﺍ ﻋﻤﺮﻫﺎ ﻣﺎﺗﻌﺮﺿﺖ ﻟﻸﻫﺎﻧﻪ ﺑﺎﻟﺸﻜﻞ ﻫﺬﺍ ﻭﺯﻳﺎﺩﻩ ﻭﺳﻂ ﺍﻟﻨﺎﺱ .. ﻭﻻﻗﺪﺭﺕ ﺗﺮﺩ ﻭﻻﺗﺘﻜﻠﻢ ..
ﻭﺻﻠﺖ ﻟﻠﺤﻮﺵ ﻭﺧﺸﺖ ﻭﻫﻲ ﻣﺨﻨﻮﻗﻪ .. ﺗﻔﺎﺟﺌﺖ ﻟﻤﺎ ﺷﺎﻓﺖ ﺭﻫﻒ ﺷﺎﺩﻩ ﻣﺤﻤﺪ ﻭﺗﻼﻋﺐ ﻓﻴﻪ ﻫﻲ ﻭﻟﺒﻨﻰ ﻓﻲ ﻟﺤﻈﻪ ﻧﺴﺖ ﻛﻞ ﺷﻲ ..
ﺣﻨﺎﻥ ﺑﻀﺤﻜﻪ : ﺍﻟﺴﻼﻡ ﻋﻠﻴﻜﻢ .. ﺍﻟﻌﺴﻞ ﻋﻨﺪﻧﺎ ﻛﻴﻒ ﺻﺎﺭ .. ﻭﻗﺪﻣﺖ ﻭﺧﺪﺍﺗﻪ ﻣﻦ ﺭﻫﻒ ﻭﺑﺎﺳﺎﺗﻪ ..
ﺭﻫﻒ : ﻋﻤﻮ ﺃﺳﺎﻣﻪ ﺟﺎﺑﻪ ﻗﺒﻞ ﺷﻮﻳﻪ ﻗﺎﻝ ﺑﻴﺪﻫﻮﺭ ﺑﺄﻣﻪ ﻭﺍﺧﺘﻪ ﻗﺒﻞ ﻟﻴﺮﻭﺣﻮﺍ ﻭﺍﻟﻴﻮﻡ ﻛﻠﻪ ﺣﻴﻜﻮﻧﻮﺍ ﺑﺮﺍ ..
ﺣﻨﺎﻥ ﺿﻤﺎﺗﻪ : ﻳﺎﺭﻭﺣﻲ ﺍﻧﻲ ﺍﺳﺘﺎﺣﺸﺘﻚ ﻣﻮﺕ ..
ﻟﺒﻨﻰ ﺑﺰﻋﻞ : ﻣﺎﻣﺎ ﻣﺶ ﻣﻼﺣﻈﻪ ﺍﻧﻚ ﺧﻠﻴﺘﻴﻪ ﻳﺎﺧﺪ ﻣﻜﺎﻧﻲ
ﺣﻨﺎﻥ ﺑﻀﺤﻜﻪ : ﻫﺎﺩﺍ ﻛﻠﻲ ﻋﻠﻴﻜﻢ ﺍﻟﺠﻮ ﺍﻧﺘﻮﺍ ﺍﻟﺰﻭﺯ ..
ﺭﻫﻒ ﺑﻀﺤﻜﻪ : ﺍﻧﻲ ﻣﺎﻋﻨﺪﻳﺶ ﻣﺸﻜﻠﻪ ﻛﺎﻥ ﻛﻠﻲ ﻋﻠﻴﺎ ﺣﻤﻮﺩﻱ ﺍﻟﺠﻮ ﺍﻟﻤﻬﻢ ﺍﻟﻨﺎﺱ ﺍﻟﺘﺎﻧﻴﻪ ﺭﺍﺣﺖ ﻋﻠﻴﻬﻢ ...
ﻟﺒﻨﻰ : ﺑﺎﻟﻠﻪ
ﺭﻫﻒ : ﻭﺍﻟﻠﻪ
ﺣﻨﺎﻥ ﺑﻀﺤﻜﻪ : ﺧﻼﺹ ﺍﻧﺘﻲ ﻭﻳﺎﻫﺎ ... ﺧﻮﺩﻳﻪ ﺭﻫﻒ ﺧﻞ ﻧﺮﻛﺐ ﻧﺒﺪﻝ ﻭﻧﺠﻲ ... ﻭﻣﺸﺖ ﻣﻦ ﺣﺪﺍﻫﻢ ...
***
ﻣﺎﻩ ﺍﻧﺖ ﺗﻠﺒﺰ ﻫﻠﺒﻪ ..
ﺃﺳﻨﺎﻡ : ﺑﺎﻩ .. ﺷﻦ ﺍﻟﻠﻲ ﻳﺨﻠﻴﻚ ﻣﺘﺄﻛﺪ ﺍﻥ ﺭﻫﻒ ﻋﻨﺪﻫﺎ ﻣﺸﺎﻋﺮ ﺍﺗﺠﺎﻫﻲ ؟
ﻟﺆﻱ : ﻭﺍﺿﺢ ﺍﻟﺒﻨﺖ ﻣﺘﻐﻴﺮﻩ ﻫﻠﺒﻪ .. ﺑﺪﺕ ﺗﺘﺤﺸﻢ ﻣﻨﻚ ﻣﺶ ﻣﺮﻛﺰ؟
ﺃﺳﻨﺎﻡ ﺑﺘﻬﻜﻢ : ﺩﻟﻴﻞ ﺩﺍﻣﻎ ﻫﻠﺒﻪ ...
ﻟﺆﻱ : ﻣﺎﺗﻬﺰﺍﺵ ﺍﻟﺒﻨﺖ ﻣﺎﺗﺘﺤﺸﻤﺶ ﺇﻻ ﻣﻦ ﺍﻟﻮﻟﺪ ﺍﻟﻠﻲ ﺗﺤﺲ ﺍﺗﺠﺎﻫﻪ ﺑﺸﻲ ..
ﺍﺳﻨﺎﻡ : ﻳﺮﺣﻢ ﻭﺍﻟﺪﻳﻚ ﺃﺳﻜﺖ ...
ﻟﺆﻱ ﺑﻀﺤﻜﻪ : ﺑﺎﻩ ﺧﻠﻴﻚ ﻣﻨﻲ ﺍﻧﻲ ﺗﻘﻮﻯ ﺍﻗﺮﺑﻠﻬﺎ ﻣﻨﻲ ﻗﺎﻟﺘﻠﻲ ﺣﺴﻴﺖ ﺍﻧﻬﺎ ﻣﺘﻐﻴﺮﻩ .. ﺗﺴﺄﻝ ﻋﻠﻴﻚ ﻭﺗﻘﺼﻘﺺ ﻉ ﻣﻮﺿﻮﻉ ﻭﺍﺧﺮ ﻣﺮﺓ ﻛﺎﻧﺖ ﻣﻀﺎﻳﻘﻪ ﻫﻠﺒﻪ .. ﻭﺑﻌﺘﺖ ﻫﺪﻳﺘﻚ ﻣﻌﺎﻫﺎ ..
ﺍﺳﻨﺎﻡ ﺍﺗﻔﺎﺟﺄ : ﻳﺎﺑﻨﻲ ﺁﺩﻡ ﻣﻦ ﺍﻟﺼﺒﺢ ﻭﺍﻧﺖ ﺗﻔﺘﻔﺖ ﻭﻻﺟﺒﺖ ﺳﻴﺮﺓ ﺍﻟﻬﺪﻳﻪ .. ﻭﻳﻨﻬﺎ ..
ﻟﺆﻱ ﺑﻀﺤﻜﻪ : ﺍﻓﺘﺢ ﻗﺠﺮ ﺍﻟﺴﻴﺎﺭﻩ ".. ﻣﻘﻌﻤﺰﻳﻦ ﻓﻲ ﺳﻴﺎﺭﺓ ﻟﺆﻱ "
ﻓﺘﺢ ﺍﺳﻨﺎﻡ ﺍﻟﻘﺠﺮ ﻭﻃﻠﻊ ﺍﻟﻜﻴﺴﻪ ﻓﺘﺤﻬﺎ ﻭﻃﻠﻊ ﻣﻨﻬﺎ ﺑﺎﻛﻮ ﻛﺒﻴﺮ ﻛﺎﻥ ﻓﻴﻪ ﺳﺎﻋﻪ ﻭﻋﻄﺮ ﺍﻟﻨﻮﻉ ﺍﻟﻠﻲ ﻳﻔﻀﻠﻪ ﺍﺳﻨﺎﻡ ... ﻓﺮﺡ ﻣﻦ ﻭﺳﻂ ﻗﻠﺒﻪ ﻭﺍﺭﺗﺴﻤﺖ ﻉ ﻭﺟﻬﻪ ﺇﺑﺘﺴﺎﻣﻪ ﻋﺮﻳﻀﻪ ..
ﻟﺆﻱ : ﺟﺎﺑﺘﻠﻲ ﺳﺒﻴﺪﺭﻭ .. ﻭﺍﻧﻲ ﺍﻟﻠﻲ ﻭﺻﻴﺘﻬﺎ ﻋﻠﻴﻪ .. ﻭﺟﺎﺑﺖ ﻟﺘﻘﻮﻯ ﺣﺎﺟﻪ ﺣﺘﻰ ﻫﻲ ﻣﻮﺻﻴﺘﻬﺎ ﻋﻠﻴﻬﺎ .. ﻟﻜﻦ ﺍﻧﺖ ﻣﺎﻭﺻﻴﺖ ﻉ ﺷﻲ ﻭﻻﺩﻭﺭﺗﻬﺎ ﺍﺳﺎﺳﺎ ﻭﺷﻮﻑ ﺷﻦ ﺟﺎﺑﺘﻠﻚ ...
ﺍﺳﻨﺎﻡ : ﺷﻦ ﺗﻘﺼﺪ ..
ﻟﺆﻱ : ﺷﻦ ﻋﺪﺍﻙ ﻏﺒﺎﺋﻬﺎ ؟ﻳﺎﺑﻨﻲ ﺁﺩﻡ ﻣﻌﻨﺎﻫﺎ ﻛﺎﻧﺖ ﺗﻔﻜﺮ ﻓﻴﻚ ..
ﺍﺳﻨﺎﻡ ﺳﻜﺖ ﻭﻳﻔﻜﺮ ..
ﻟﺆﻱ : ﻣﻦ ﺍﻷﺧﻴﺮ .. ﻣﻬﺎﺏ ﻧﺎﻭﻱ ﻳﺨﻄﺒﻬﺎ ﻳﺎﺑﺮﻭ ﻏﻴﺮ ﻳﺘﺨﺮﺝ ﻳﻌﻨﻲ ﺑﻌﺪ ﺷﻬﺮﻳﻦ ... ﻭﺍﻟﻮﻟﺪ ﻋﻨﺪﻩ ﻗﺪﺭﺓ ﻗﻮﻳﻪ ﻉ ﺍﻷﻗﻨﺎﻉ .. ﻭﺣﻀﺮﺗﻚ ﺃﻛﺪﺗﻠﻬﺎ ﺧﺒﺮ ﺧﻄﻮﺑﺘﻚ .. ﻳﻌﻨﻲ ﻣﺮﺍﺕ ﺗﺮﺩﻫﺎﻟﻚ ﻭﺗﻨﺨﻄﺐ ﺣﺘﻰ ﻫﻲ ﺑﺠﺪ ﻣﺶ ﻟﻌﺐ ..
ﺍﺳﻨﺎﻡ ﺷﺒﺤﻠﻪ : ﻭﻣﻦ ﺍﻟﻠﻲ ﻃﻠﻊ ﺍﻹﺷﺎﻋﻪ ﺍﻟﺘﺎﻓﻬﻪ ﻫﺎﺩﻱ ..
ﻟﺆﻱ : ﻛﻨﺖ ﻧﺒﻲ ﻧﺨﺪﻣﻚ ﻟﻜﻦ ﺍﻧﺖ ﻟﺒﺰﺕ ﻛﺎﻟﻌﺎﺩﻩ .. ﺳﻴﻤﻮ ﺷﻮﻓﻠﻲ .. ﺍﻟﻴﻮﻡ ﻋﻴﺪ ﻣﻴﻼﺩﻫﺎ ﺗﺼﺮﻑ ...
ﺍﺳﻨﺎﻡ ﺷﺒﺤﻠﻪ ﻭﺷﺒﺢ ﺍﻟﻘﺪﺍﻡ ﻭﻗﻌﺪ ﻳﻔﻜﺮ ...
***
ﺑﻌﺪ ﺍﻟﻌﺼﺮ ..
ﺟﺮﺱ ﺍﻟﺤﻮﺵ ﻳﺮﻥ ...
ﻧﺎﺿﺖ ﺣﻨﺎﻥ .. ﺗﻮﺟﻬﺖ ﻟﻠﺒﺎﺏ ﺑﺶ ﺗﻔﺘﺤﻪ ... ﻓﺘﺤﺎﺗﻪ
: ﺍﻟﺴﻼﻡ ﻋﻠﻴﻜﻢ ..
ﺣﻨﺎﻥ : ﻭﻋﻠﻴﻜﻢ ﺍﻟﺴﻼﻡ ..
: ﺣﻮﺵ ﻧﻀﺎﻝ ﻋﻮﻥ ...
ﺣﻨﺎﻥ : ﺍﻳﻪ ... ﺗﻔﻀﻠﻮﺍ ...
ﺧﺸﻮﺍ ﺯﻭﺯ ﻧﺴﺎﻭﻳﻦ ﻛﺒﺎﺭ ﻳﺪﻭﺭﻭﺍ ﺑﻌﻴﻮﻧﻬﻢ ﻉ ﺍﻟﺤﻮﺵ ﺍﻟﻠﻲ ﻋﺠﺒﻬﻢ ﻫﻠﺒﻪ ..
ﺣﻨﺎﻥ ﺻﻜﺮﺕ ﺍﻟﺒﺎﺏ : ﺗﻔﻀﻠﻮﺍ ﺗﻔﻀﻠﻮﺍ .. ﻣﺸﺖ ﻭﻫﻤﺎ ﻭﺭﺍﻫﺎ ﻟﻠﺼﺎﻟﻪ ﺍﻟﻌﺮﺑﻴﻪ ... ﺗﻔﻀﻠﻮﺍ ... ﻗﻌﻤﺰﻭﺍ ﻫﻤﺎ ﺍﻟﺰﻭﺯ ...
: ﻳﺰﻳﺪ ﻓﻀﻠﻚ ...
ﻗﻌﻤﺰﺕ ﺣﻨﺎﻥ : ﺍﻫﻼ ﺑﻴﻜﻢ ...
: ﻭﺑﻴﻚ .. ﻛﻴﻒ ﺣﺎﻟﻜﻢ ..
ﺣﻨﺎﻥ : ﺍﻟﺤﻤﺪﻟﻠﻪ ... ﻭﺍﻧﺖﻡ ...
: ﺍﻟﺤﻤﺪ ﻟﻠﻪ ...
ﺣﻨﺎﻥ ﻧﺎﺿﺖ : ﺷﻦ ﺗﺤﺒﻮﺍ ﺗﺸﺮﺑﻮﺍ ...
: ﻗﻬﻮﺓ ﺍﻧﻲ ﻭﻳﺎﻫﺎ ﺳﺎﺩﻩ ﺗﻌﺮﻓﻲ ﻋﺎﺩ ﺍﻟﺴﻜﺮ ﻭﻫﻤﻪ ..
ﺣﻨﺎﻥ ﺑﻀﺤﻜﻪ : ﺭﺑﻲ ﻳﺸﻔﻴﻜﻢ ﻭﻳﺆﺟﺮﻛﻢ ... ﻋﻦ ﺍﺫﻧﻜﻢ ... ﻭﻣﺸﺖ ﻟﻠﻜﻮﺟﻴﻨﻪ ..
: ﻣﺎﺷﺎﺀ ﺍﻟﻠﻪ ﻛﻞ ﺷﻲ ﻳﻔﺘﺢ ﺍﻟﻨﻔﺲ ..
: ﻭﻟﺪﻙ ﻋﻨﺪﻩ ﺣﻖ ..
: ﻣﺎﺯﺍﻝ ﻟﻴﻦ ﻧﺸﻮﻓﻬﺎ ..
: ﻫﻬﻬﻬﻬﻬﻪ ... ﻳﺎﻛﺒﺪﻱ ﻣﻨﻚ ..
ﻭﺗﺖ ﺣﻨﺎﻥ ﺍﻟﻘﻬﻮﺓ ﻭﻣﻌﺎﻫﺎ ﺍﻟﺤﻠﻮ ﻭﺟﺘﻬﻢ ﺿﻴﻔﺘﻬﻢ ﻭﻗﻌﻤﺰﺕ ..
: ﻭﺍﻟﻠﻪ ﺷﻦ ﺑﻨﻘﻮﻟﻚ .. ﺣﻨﻲ ﺟﺎﻳﻴﻦ ﻭﻗﺎﺻﺪﻳﻦ ﺍﻟﺨﻴﺮ .. ﻭﺍﻧﺘﻢ ﺳﺄﻟﻨﺎ ﻋﻠﻴﻜﻢ ﻭﻣﺎﻓﻲ ﺣﺪ ﻣﺎﺷﻜﺮﺵ ﻓﻴﻜﻢ ﺍﻧﺘﻲ ﻭﺯﻭﺟﻚ ﻭﺑﻨﺎﺗﻚ ..
ﺣﻨﺎﻥ ﺑﺈﺑﺘﺴﺎﻣﻪ : ﺑﺎﺭﻙ ﺍﻟﻠﻪ ﻓﻴﻚ ﻭﻓﻴﻬﻢ ..
: ﻭﻓﻴﻚ ﺑﺎﺭﻙ ﺍﻟﻠﻪ .. ﺍﻧﻲ ﻭﻟﺪﻱ ﻃﺎﻟﺐ ﻓﻲ ﻛﻠﻴﻪ ﺍﻟﻄﺐ ﻭﺍﺧﺮﻫﺎﻟﻌﺎﻡ ﺑﻴﺘﺨﺮﺝ ﻭﻫﻮ ﻳﻌﺮﻑ ﺑﻨﺘﻚ ﺷﻜﺮﻟﻲ ﻓﻴﻬﺎ ﻭﻓﻲ ﺍﺧﻼﻗﻬﺎ ﻭﺗﻔﻮﻗﻬﺎ ﻭﻟﻴﻪ ﻣﺪﺓ ﻣﻜﻠﻤﻨﻲ ﻋﻠﻴﻬﺎ ﻭﺍﻟﻤﺪﺓ ﺍﻟﻠﻲ ﻓﺎﺗﺖ ﺣﺪﺩﻟﻲ ﻧﻬﺎﺭ ﻧﺠﻴﻜﻢ ﻓﻴﻪ ﻭﻛﺎﻥ ﻫﺎﻟﻴﻮﻡ .. ﻭﺍﻧﻲ ﺟﻴﺘﻜﻢ .. ﻧﻄﻠﺐ ﺑﻨﻴﺘﻜﻢ ﻟﻮﻟﺪﻱ ..
ﺣﻨﺎﻥ ﺣﺴﺖ ﺑﺸﻌﻮﺭ ﺣﻠﻮ ... ﺑﻨﺎﺗﻬﺎ ﻛﺒﺮﻭﺍ ﻭﺑﺪﻭﺍ ﻳﺨﻄﺒﻮﺍ ﻓﻴﻬﻢ ﻫﻲ ﻃﻮﻝ ﺟﻲ ﻓﻲ ﺑﺎﻟﻬﺎ ﺷﺨﺺ ﻭﺍﺣﺪ ...
: ﻭﻟﺪ ﺍﺧﺘﻲ ﺍﻟﻠﻬﻢ ﺑﺎﺭﻙ ﻋﻠﻴﻪ ﻣﺶ ﻷﻧﻪ ﻭﻟﺪ ﺍﺧﺘﻲ ﻟﻜﻦ ﺷﻬﺎﺩﻩ ﻗﺪﺍﻡ ﺭﺑﻲ ﺷﺎﺏ ﻣﺤﺘﺮﻡ ﻭﺧﻠﻮﻕ ﻭﺭﺍﺟﻞ ﺑﻤﻌﻨﻰ ﺍﻟﻜﻠﻤﻪ ﻭﻣﺎﻧﺎﻗﺼﺎﺗﻪ ﺣﺎﺟﻪ .. ﻭﺍﺧﺘﻲ ﺭﺑﻲ ﻓﺎﺗﺤﻬﺎ ﻋﻠﻴﻬﻢ ﻋﺮﻳﺲ ﻧﺘﻤﻨﺎﻩ ﻟﻜﻞ ﻏﺎﻟﻲ ﻭﻛﺎﻥ ﻋﻨﺪﻱ ﺑﻨﺎﺕ ﻣﺎﺧﻠﻴﺘﻪ ﻳﻄﻠﻊ ﺑﺮﺍ ..
ﺿﺤﻜﻮﺍ ﺍﻟﺜﻼﺛﻪ ..
ﺣﻨﺎﻥ : ﻭﺍﻟﻠﻪ ﺷﻦ ﺑﻨﻘﻮﻟﻚ ﻣﻮﺿﻮﻉ ﺯﻱ ﻫﺬﺍ ﻳﺒﻲ ﺷﻴﺮﺓ ﺑﻮﻫﺎ ﻭﺭﺍﻱ ﺍﻟﺒﻨﺖ ﺑﺎﻟﺪﺭﺟﻪ ﺍﻷﻭﻟﻰ ﻗﺒﻞ ﻛﻞ ﺷﻲ ..
: ﺍﻛﻴﺪ ﻫﺎﺩﻱ ﺣﺎﺟﻪ ﻣﻔﺮﻭﻍ ﻣﻨﻬﺎ ﺧﻮﺩﻭﺍ ﺭﺍﺣﺘﻜﻢ ...
ﺣﻨﺎﻥ : ﺇﻥ ﺷﺎﺀ ﺍﻟﻠﻪ ﺧﻴﺮ ..
: ﺁﺍﺍ .. ﻣﻌﻠﻴﺸﻲ ﻧﺒﻲ ﻧﺸﻮﻓﻬﺎ ﻉ ﻗﺪ ﻣﺎﺣﻜﺎﻟﻲ ﻋﻠﻴﻬﺎ ﻭﻟﺪﻱ ﺟﺎﻳﻪ ﻭﻣﺘﺸﻮﻗﻪ ﻟﺸﻮﻓﺘﻬﺎ ..
ﺣﻨﺎﻥ ﻧﺎﺿﺖ ﺑﺈﺑﺘﺴﺎﻣﻪ : ﻟﺤﻈﻪ ﺷﻮﻳﻪ ... ﻣﺸﺖ ﺣﻨﺎﻥ ﻉ ﺗﺮﻛﻴﻨﻪ ﻭﻛﻠﻤﺖ ﺭﻫﻒ ﺗﻠﺒﺲ ﻭﺗﻨﺰﻝ ... ﻭﻣﺎﻗﺎﻟﺘﺶ ﻋﻼﺵ .. ﺭﻫﻒ ﻭﻫﻲ ﻣﺴﺘﻐﺮﺑﻪ ﻃﻠﻌﺖ ﺣﻮﺍﻳﺠﻬﺎ ...
ﻟﺒﻨﻰ : ﺧﻄﺎﺑﻪ ﻭﺍﺿﺢ ..
ﺭﻫﻒ : ﻭﻭﻭﻙ ﻣﺸﻨﺎﻩ ﺍﻟﻤﻮﺿﻮﻉ ﻫﺬﺍ ..
ﻟﺒﻨﻰ ﺑﻀﺤﻜﻪ : ﺍﻟﺒﺴﻲ ﺑﺴﺮﻋﻪ .. ﻃﻠﻌﺖ ﻭﺳﻜﺮﺕ ﺍﻟﺒﺎﺏ .. ﻭﺭﻫﻒ ﺗﻠﺒﺲ ...
ﺷﻮﻳﻪ ﻭﻃﻠﻌﺖ ﻣﻦ ﺩﺍﺭﻫﺎ ﻭﻧﺰﻟﺖ ... ﻭﻗﻔﺖ ﺣﺪﺍ ﺍﻟﺼﺎﻟﻪ ﺷﻮﻳﻪ ﻭﺑﻌﺪﻳﻦ ﺧﺸﺖ ..
ﺭﻫﻒ : ﺍﻟﺴﻼﻡ ﻋﻠﻴﻜﻢ ..
ﺍﻟﺰﻭﺯ ﻋﻴﻮﻧﻬﻢ ﻓﻼﺷﺎﺕ .. ﺍﻧﺨﺒﻄﻮﺍ ﻓﻴﻬﺎ ﻃﻮﻝ ﻭﻋﺠﺒﺘﻬﻢ ﻉ ﺍﻵﺧﺮ .. ﺳﻠﻤﺖ ﻋﻠﻴﻬﻢ ﻭﺍﻟﺰﻭﺯ ﻣﺎﺑﻄﻠﻮﺵ ﻭﻫﻮ ﻳﻘﻮﻟﻮﺍ ﻣﺎﺷﺎﺀﺍﻟﻠﻪ ..
: ﺯﻱ ﻣﺎﻗﺎﻝ ﻭﺃﻛﺜﺮ ..
ﺗﺤﺸﻤﺖ ﺭﻫﻒ ..
: ﻭﺍﻟﻠﻪ ﻭﻟﻴﺪ ﺍﺧﺘﻲ ﻣﺎﻫﻮ ﻫﻮﻳﻦ ..
ﺭﻫﻒ ﺧﻼﺹ ﻗﺮﻳﺐ ﺗﺘﺒﺨﺮ ..
: ﺍﻧﺘﻲ ﺯﻣﻴﻠﺘﻪ ﻓﻲ ﺍﻟﺠﺎﻣﻌﻪ ﻭﺗﻌﺮﻓﻴﻪ ..
ﺭﻫﻒ ﺭﻓﻌﺖ ﻋﻴﻮﻧﻬﺎ ﻓﻴﻬﻢ ﻭﻫﻲ ﻣﺴﺘﻐﺮﺑﻪ ..
: ﻭﻟﺪﻱ ﻣﻬﺎﺏ ...
ﺭﻫﻒ ﺍﻧﺼﺪﻣﺖ ... ﻣﻬﺎﺏ ﺍﻟﻤﺪﻩ ﺍﻷﺧﻴﺮﻩ ﻣﻌﺎﺵ ﺟﺎﺏ ﺳﻴﺮﺓ ﺑﺎﻟﻤﻮﺿﻮﻉ ﻭﻳﺨﻲ ﻗﺎﻟﻠﻬﺎ ﺍﻧﺴﻲ ﺍﻟﻠﻲ ﻗﻠﺘﻬﻮﻟﻚ ﻭﺧﻠﻴﻨﺎ ﺻﺤﺎﺏ .. ﻛﻴﻒ ﺻﺎﺭ ﺗﻮﺍ؟ !!!
ﺣﻨﺎﻥ : ﺍﻫﺎ ﻣﺬﻛﺮﻩ ﻣﺮﺓ ﺗﻜﻠﻤﺖ ﻉ ﺯﻣﻴﻞ ﻟﻴﻬﺎ ﻳﺴﺎﻋﺪ ﻓﻴﻬﺎ ﻓﺎﻟﻘﺮﺍﻳﻪ ﺍﺳﻤﻪ ﻣﻬﺎﺏ .. ﻫﻮ ﻧﻔﺴﻪ ﻣﺎﻣﺎ ..
ﺭﻫﻒ ﻭﻫﻲ ﻣﺘﻔﺎﺟﺌﻪ : ﺍﻳﻪ ﻫﻮ ﻧﻔﺴﻪ ..
ﻧﺎﺿﻮﺍ ﻭﻧﺎﺿﺖ ﻣﻌﺎﻫﺎ ﺣﻨﺎﻥ ..
ﻗﺎﻟﺖ : ﺧﻮﺩﻭﺍ ﻭﻗﺘﻜﻢ ﻭﻓﻜﺮﻭﺍ ... ﻣﺪﺕ ﻟﺤﻨﺎﻥ ﻭﺭﻗﻪ .. ﻫﺎﺩﻱ ﻓﻴﻬﺎ ﺭﻗﻢ ﺍﻷﺭﺿﻲ ﻭﻧﻘﺎﻝ .. ﻧﺴﺘﻨﻮﺍ ﻓﺮﺩﻛﻢ .. ﻭﺇﻥ ﺷﺎﺀ ﺍﻟﻠﻪ ﺧﻴﺮ
ﺣﻨﺎﻥ ﺧﺪﺕ ﺍﻟﻮﺭﻗﻪ : ﺇﻥ ﺷﺎﺀ ﺍﻟﻠﻪ ﺧﻴﺮ
ﺳﻠﻤﻮﺍ ﻉ ﺑﻌﺾ ﻭﻃﻠﻌﻮﺍ ﻭﺳﻘﺪﺗﻬﻢ ﺣﻨﺎﻥ .. ﻭﻭﻟﺖ ﻟﺮﻫﻒ ﻭﻫﻲ ﻣﺘﻔﺎﺟﺌﻪ ﻓﺒﺎﻝ ﺣﻨﺎﻥ ﺍﻥ ﻫﺎﺩﻭﺍ ﺍﻫﻞ ﺍﺳﻨﺎﻡ .. ﻣﻨﻴﻦ ﻃﻠﻊ ﻣﻬﺎﺏ؟
ﺣﻨﺎﻥ : ﺗﻌﺮﻓﻲ؟
ﺭﻫﻒ : ﻻﻭﺍﻟﻠﻪ ﺯﻳﻲ ﺯﻳﻚ .. ﻣﺼﺪﻭﻣﻪ ﺍﻟﺤﻖ .. ﻫﻮ ﺻﺢ ﻣﺮﺓ ﻛﻠﻤﻨﻲ ﻓﻲ ﺍﻟﻤﻮﺿﻮﻉ ﻭﺍﻧﻲ ﺭﻓﻀﺖ ﻭﻫﻮﻗﺎﻟﻲ ﺍﻧﺴﻲ ﺍﻟﻤﻮﺿﻮﻉ .. ﻋﻼﺵ ﺩﺍﺭ ﻫﻜﻲ؟
ﺣﻨﺎﻥ : ﺷﻦ ﻧﻔﻬﻢ ﻣﻦ ﻛﻼﻣﻚ ...
ﺭﻫﻒ : ﺍﻛﻴﺪ ﻻ ﻣﺎﻣﺎ ﻣﺎﻧﺒﻴﺶ ..
ﺣﻨﺎﻥ : ﺍﻟﺴﺒﺐ .
ﺭﻫﻒ : ﻓﺒﺎﻟﻲ ﻗﺮﺍﻳﺘﻲ ﻭﺑﺲ ﻭﻧﺒﻲ ﻧﺨﺪﻡ ﺑﻌﺪ ﻧﺘﺨﺮﺝ ﻣﺴﺆﻭﻟﻴﺔ ﺍﻟﺰﻭﺍﺝ ﻣﺶ ﻣﺴﺘﻌﺪﻩ ﻟﻴﻬﺎ ﺑﻜﻞ ...
ﺣﻨﺎﻥ : ﺗﻤﺎﻡ ... ﻧﻔﻮﺕ ﻳﻮﻣﻴﻦ ﺗﻼﺗﻪ ﻭﻧﺮﺩ ﻋﻠﻴﻬﻢ ..
ﺭﻫﻒ : ﻛﻮﻳﺲ ...
***
ﻭﻋﻼﺵ ﻻ ..
ﻧﻀﺎﻝ : ﻣﺶ ﺿﺎﻣﻦ ﺭﺩﺕ ﻓﻌﻠﻬﻢ ..
ﻳﺎﺭﺍ : ﺍﻧﺖ ﻗﻮﻟﻠﻬﺎ ﻗﺒﻞ ﻃﺒﻌﺎ ﻣﺶ ﺣﻨﻤﺸﻲ ﻣﻨﻲ ﻟﻴﺎ ...
ﻧﻀﺎﻝ ﻳﺸﺒﺤﻠﻬﺎ ﻭﻳﻔﻜﺮ ... ﻣﻤﻜﻦ ﻟﻮ ﺣﻨﺎﻥ ﺷﺎﻓﺘﻬﺎ ﻣﻌﺎﻩ ﺗﻐﺎﺭ ﻭﺗﺮﺟﻊ ﻣﺸﺎﻋﺮﻫﺎ ﺍﺗﺠﺎﻫﻪ ﻣﻦ ﺟﺪﻳﺪ .. ﺍﺑﺘﺴﻢ ﻭﻗﺎﻝ .. ﻧﺠﺮﺑﻮﺍ ...
ﺧﺪﻱ ﺗﻠﻴﻔﻮﻧﻪ ﻭﺍﺗﺼﻞ ﺑﻴﻬﺎ ..
..
ﺣﻨﺎﻥ ﻛﺎﻧﺖ ﻣﺸﻐﻮﻟﻪ ﺑﺎﻟﺘﺤﻀﻴﺮ ﻟﻌﻴﺪ ﻣﻴﻼﺩ ﺭﻫﻒ ﻭﻃﺒﻌﺎ ﺭﻫﻒ ﻋﺎﺭﻓﻪ ﻣﺶ ﻣﻔﺎﺟﺄﺓ ﻳﻌﻨﻲ
ﺍﻟﻤﻬﻢ ﺭﻥ ﺗﻠﻴﻔﻮﻧﻬﺎ ﺷﺎﻓﺖ ﺍﻟﺸﺎﺷﻪ ﻟﻘﺎﺗﻪ ﻧﻀﺎﻝ ﻗﺎﻣﺘﻪ ﻭﺭﺩﺕ ..
ﺣﻨﺎﻥ : ﺍﻟﺴﻼﻡ ﻋﻠﻴﻜﻢ ..
ﻧﻀﺎﻝ : ﻭﻋﻠﻴﻜﻢ ﺍﻟﺴﻼﻡ .. ﻛﻴﻒ ﺍﻟﺤﺎﻝ ..
ﺣﻨﺎﻥ : ﺍﻟﺤﻤﺪ ﻟﻠﻪ .. ﻛﻴﻒ ﺣﺎﻟﻚ ﺍﻧﺖ ..
ﻧﻀﺎﻝ : ﺑﺨﻴﺮ ﺍﻟﺤﻤﺪ ﻟﻠﻪ .. ﺟﻬﺰﺗﻮﺍ ﻛﻞ ﺷﻲ ..
ﺣﻨﺎﻥ : ﺍﻳﻪ .. ﺍﻣﺘﻰ ﺑﺘﺠﻲ ...
ﻧﻀﺎﻝ : ﺑﻌﺪ ﺳﺎﻋﻪ ﻣﻦ ﺗﻮﺍ ..
ﺣﻨﺎﻥ : ﺑﻌﺪ ﺍﻟﻤﻐﺮﺏ ..
ﻧﻀﺎﻝ : ﺍﻳﻪ .. ﺑﻨﻘﻮﻟﻚ؟
ﺣﻨﺎﻥ : ﺷﻨﻮ ..
ﻧﻀﺎﻝ ﺷﺒﺢ ﻟﻴﺎﺭﺍ : ﺁﺍﺍ ﺯﻭﺟﺘﻲ ﺗﺒﻲ ﺗﺠﻲ ..
ﺣﻨﺎﻥ ﺍﺑﺘﺴﻤﺖ ﺗﻬﻜﻤﺎ ﻭﻗﻌﺪﺕ ﺳﺎﻛﺘﻪ ..
ﻧﻀﺎﻝ : ﻣﻤﻜﻦ ...
ﺣﻨﺎﻥ : ﺍﻫﻼ ﺑﻴﻚ ﻭﺑﻴﻬﺎ ..
ﻧﻀﺎﻝ ﺗﻔﺎﺟﺄ : ﺍﻛﻴﺪ؟
ﺣﻨﺎﻥ ﺑﻀﺤﻜﻪ : ﺧﻴﺮﻙ .. ﺍﻳﻪ ﺍﻛﻴﺪ ..
ﻧﻀﺎﻝ ﻫﺰ ﺭﺍﺳﻪ ﺑﺈﻳﺠﺎﺏ : ..OK ﻳﻠﻼ ﻧﺘﻼﻗﻮﺍ ..
ﺣﻨﺎﻥ : ﺍﻟﺴﻼﻡ ﻋﻠﻴﻜﻢ ..
ﻧﻀﺎﻝ : ﻭﻋﻠﻴﻜﻢ ﺍﻟﺴﻼﻡ .. ﻭﺻﻜﺮ ... ﺷﺒﺢ ﻟﻴﺎﺭﺍ .. ﻭﺍﻓﻘﺖ ..
ﻳﺎﺭﺍ ﺍﺑﺘﺴﻤﺖ ﺑﺨﺒﺚ : ﻛﻮﻳﺲ ..
***
ﻧﺎﺯﻟﻪ ﻣﻦ ﺩﺍﺭﻫﺎ ﺑﻌﺪ ﻟﺒﺴﺖ ﻭﺗﺄﻧﻘﺖ .. ﻗﺎﺑﻠﺖ ﺑﻮﻫﺎ ﻭﻫﻮ ﺧﺎﺵ ﻟﻠﻘﺼﺮ ..
ﻣﻌﺎﻭﻳﻪ : ﻃﺎﻟﻌﻪ؟
ﻣﻬﺎ ﺍﺑﺘﺴﻤﺖ : ﺍﻳﻪ .. ﺑﻨﻤﺸﻲ ﻟﺤﻮﺵ ﻟﺒﻨﻰ ﺻﺎﺣﺒﺘﻲ ﻋﻴﺪﻣﻴﻼﺩ ﺍﺧﺘﻬﺎ ﺍﻟﻴﻮﻡ ..
ﻣﻌﺎﻭﻳﻪ ﻗﻠﺒﻪ ﻳﺪﻕ ﺑﻌﻨﻒ : ﺑﺎﻫﻲ .. ﻗﺒﻞ 11 ﺗﻜﻮﻧﻲ ﻫﻨﻲ .
ﻣﻬﺎﺑﺮﺟﺎﺀ : 11:30 ..
ﻣﻌﺎﻭﻳﻪ ﻫﺰ ﺭﺍﺳﻪ ﺑﺈﻳﺠﺎﺏ ﻭﻗﺎﻝ : 11:30 ﻧﺸﻮﻓﻚ ﻫﻨﻲ ..
ﻣﻬﺎ : ﺣﺎﺿﺮ .. ﺑﺎﺳﺎﺗﻪ ﻣﻦ ﺧﺪﻩ ﻭﻃﻠﻌﺖ ..
ﻫﻮ ﺍﺫﻛﺮ ﺍﻟﻠﻲ ﺻﺎﺭ ﺍﻟﻴﻮﻡ ﺭﺟﻊ ﻗﻠﺒﻪ ﻭﺟﻌﻪ ﺗﻨﻬﺪ ﺑﺤﺮﻗﻪ ﻭﻣﺸﻲ ﺭﻛﺐ ﻟﺪﺍﺭﻩ ..
***
ﺷﻦ ﻫﻮﻭﻭﺍﺍﺍﺍ؟
ﺣﻨﺎﻥ : ﻭﻃﻲ ﺻﻮﺗﻚ ﺍﻟﺒﻨﺎﺕ ﻳﺴﻤﻌﻮﻙ .
ﻧﻴﺮﻭﺯ : ﺧﻞ ﻳﺴﻤﻌﻮﺍ .. ﻣﺼﺢ ﻭﺟﻬﻪ .. ﺑﻴﺠﻴﺒﻬﺎ ﻫﻨﻲ ﻓﻴﻮﻡ ﺯﻱ ﻫﺎﺩﺍ .. ﻳﺒﻲ ﻳﻨﻜﺪ ﻉ ﺍﻟﺒﻨﺖ ..
ﺣﻨﺎﻥ : ﻋﺎﺩﻱ ﻫﻤﺎ ﺷﺒﻪ ﺧﺪﻭﺍ ﻉ ﺍﻟﻮﺿﻊ ﻭﺗﻌﺮﻓﻮﺍ ﻋﻠﻴﻬﺎ ..
ﻧﻴﺮﻭﺯ : ﻭﻻﻭﺣﺪﻩ ﻓﻴﻬﻢ ﻃﺎﻳﻘﺘﻬﺎ .. ﺍﻧﻲ ﻣﺶ ﻋﺎﺭﻓﻪ ﻛﻴﻒ ﺗﻔﻜﺮﻱ؟ .
ﺣﻨﺎﻥ ﺷﺒﺤﺘﻠﻬﺎ : ﻧﻘﻮﻟﻚ ﻛﻴﻒ ﻧﻔﻜﺮ .. ﻧﺒﻲ ﻧﻀﺎﻝ ﻳﻔﻬﻢ ﺍﻧﻪ ﻣﺎﻳﻔﺮﻗﺶ ﻣﻌﺎﻱ ﻭﻣﻌﺶ ﻳﻌﻨﻴﻠﻲ ﺑﺶ ﻳﻘﺘﻨﻊ ﻳﻄﻠﻖ ﺑﻬﺪﻭﺀ ﺑﺪﻭﻥ ﻣﺸﺎﻛﻞ ﻭﻣﺤﺎﻛﻢ ..
ﻧﻴﺮﻭﺯ : ﻣﺎﺗﺨﺎﻓﻴﺶ ﻳﺴﻜﺮ ﺭﺍﺳﻪ ﺯﻳﺎﺩﻩ ﻟﻮ ﻟﻘﺎﻙ ﻣﺶ ﻣﺪﻭﺭﺓ ..
ﺣﻨﺎﻥ : ﻧﻀﺎﻝ ﻣﺶ ﻣﻦ ﺍﻟﻨﻮﻋﻴﻪ ﺍﻟﻠﻲ ﺗﺼﺮ .. ﻳﺠﺮﺏ ﻣﺮﻩ ﻣﺎﻧﻔﻌﺶ ﻳﻔﻮﺕ ﻣﺮﺓ ﻭﺣﺪﻩ ...
ﻧﻴﺮﻭﺯ : ﻣﺶ ﻋﺎﺭﻓﻪ ﻛﻴﻒ ﺑﻨﺘﺤﻤﻞ ﺷﻮﻓﺔ ﻓﻨﺰﻭﺯﺗﻬﺎ ...
ﺣﻨﺎﻥ ﺑﻀﺤﻜﻪ : ﺗﺤﻤﻠﻲ ﺗﺮﺑﺤﻲ ﻭﻓﻜﻴﻨﺎ ﻣﻦ ﺟﻮ ﺍﻟﺘﻠﻘﻴﺢ ﻣﺘﺎﻋﻚ ..
ﻧﻴﺮﻭﺯ ﺷﺒﺤﺘﻠﻬﺎ ﻉ ﺟﻨﺐ : ﺇﻳﻪ ﺇﻥ ﺷﺎﺀ ﺍﻟﻠﻪ ..
ﺣﻨﺎﻥ ﺷﺒﺤﺘﻠﻬﺎ ﺑﺸﻚ ﻭﻫﻲ ﺗﻀﺤﻚ ..
ﻃﺒﻌﺎ ﺍﻟﺠﻮ ﺭﺑﻴﻌﻲ ﻭﺣﻠﻮ ﻭﺍﻟﺤﻔﻠﻪ ﺟﻬﺰﻭﻫﺎ ﻓﻲ ﺍﻟﺠﻨﺎﻥ ...
ﻭﺻﻠﺖ ﻣﻬﺎ ... ﻭﺃﻭﻝ ﻣﺎﺧﺸﺖ ﺗﻘﺎﺑﻠﺖ ﺑﺮﺿﺎ ...
ﺭﺿﺎ : ﺍﻫﻼ ..
ﻣﻬﺎ ﺑﺨﺠﻞ : ﺍﻫﻼ ﺑﻴﻚ ..
ﺭﺿﺎ ﺍﺑﺘﺴﻢ؛ ﺗﻔﻀﻠﻲ ...
ﻣﻬﺎ ﻗﻌﺪﺕ ﺍﺩﻭﺭ ﺑﻌﻴﻮﻧﻬﺎ ﻑ ﺍﻟﺠﻨﺎﻥ ﻭﺗﺸﻮﻑ ﻓﻴﻪ ﻛﻴﻒ ﻣﺰﻳﻦ ﻭﻣﺠﻬﺰﻳﻨﻪ ... ﻃﺎﻭﻟﻪ ﻛﺒﻴﺮ .. ﻭﺯﻳﻨﻪ ﺣﻠﻮﺓ ﺑﺎﻟﻤﺮﺓ ..
ﺭﺿﺎ : ﺷﻦ ﺭﺍﻳﻚ ..
ﺍﻟﺘﻔﺘﺖ ﻣﻬﺎ ﻭﺷﺒﺤﺘﻠﻪ : ﺣﻠﻮ ﻫﻠﺒﻪ ..
ﺭﺿﺎ ﻭﻫﻮ ﻳﺸﻮﻑ ﻟﻌﻴﻮﻧﻬﺎ : ﻋﻴﻮﻧﻚ ﺍﻟﺤﻠﻮﺓ ..
ﻣﻬﺎ ﺗﺤﺸﻤﺖ ﻭﺧﺸﺖ ﻃﻮﻝ .. ﻭﻫﻮ ﺿﺤﻚ ﻋﻠﻴﻬﺎ ﻛﻴﻒ ﺧﺸﺖ ﺗﺠﺮﻱ ...
ﻭﻫﻲ ﺧﺎﺷﻪ ﺍﻧﻀﺮﺑﺖ ﻓﻲ ﻟﺒﻨﻰ ...
ﻟﺒﻨﻰ : ﺧﻴﺮﻙ ﺗﻘﻮﻝ ﻳﺠﺮﻭﺍ ﻭﺭﺍﻙ؟
ﻣﻬﺎ ﻗﻌﺪﺕ ﺗﺴﻠﻢ ﻋﻠﻴﻬﺎ ﻭﻫﻲ ﻣﺮﺗﺒﻜﻪ : ﻻﺷﻲ ...
ﻟﺒﻨﻲ ﺩﻓﺘﻬﺎ ﺷﻮﻳﻪ ﻭﻗﻌﺪﺕ ﺗﺸﻮﻑ ﺑﺮﺍ ﻟﻘﺖ ﺧﺎﻟﻬﺎ ﻭﺍﻗﻒ ﻳﻌﻠﻖ ﻓﻲ ﺍﻟﺰﻳﻨﻪ ﺷﺒﺤﺖ ﻟﻤﻬﺎ : ﺍﻫﺎ ﺷﻲ ﺻﺎﺭ ..
ﻣﻬﺎ : ﺍﺣﻤﻤﻢ ... ﻭﻳﻦ ﺭﻫﻒ .. ﻓﻮﻕ ﻭﻻ ﻣﺎﺷﻴﺘﻠﻬﺎ .. ﻭﻃﻮﻝ ﻣﺸﺖ ﺭﻛﺒﺖ ..
ﺷﻮﻳﻪ ﻭﻛﻠﻬﻢ ﻃﻠﻌﻮﺍ ﻟﺒﺮﺍ ﻭﺣﻨﺎﻥ ﻛﺎﻧﺖ ﺩﺍﺧﻞ ﺗﻮﺗﻲ ﻓﺮﻭﺣﻬﺎ ﻭﺗﻠﺒﺲ ﻓﺤﻤﻮﺩﻱ ..
ﺑﺮﺍ ..
ﺭﺿﺎ ﻭﻧﻴﺮﻭﺯ ﻭﺭﻫﻒ ﻭﻟﺒﻨﻰ ﻭﻣﻬﺎ ... ﺷﻮﻳﻪ ﻭﺧﺶ ﺃﺳﺎﻣﻪ ... ﻭﺳﻠﻤﻮﺍ ﻉ ﺑﻌﺾ ...
ﻧﻴﺮﻭﺯ : ﻛﺎﻥ ﺟﻮ ﻭﻳﻦ ﺍﻟﻤﺸﻜﻠﻪ ..
ﺃﺳﺎﻣﻪ : ﺗﺤﺸﻤﻮﺍ ﻗﺎﻟﻮﺍ ﻏﺪﻭﺓ ﻣﻌﺰﻭﻣﻴﻦ ﻋﻨﺪﻫﺎ .. ﺍﻟﻴﻮﻡ ﻭﻏﺪﻭﺓ ﻫﻠﺒﻪ ..
ﻧﻴﺮﻭﺯ : ﻭﺍﻟﻠﻪ ﻣﺎﻋﻨﺪﻫﻢ ﺣﻖ .. ﺣﻨﺎﻥ ﺑﺮﻭﺣﻬﺎ ﺣﺘﺰﻋﻞ ..
ﺍﺳﺎﻣﻪ : ﻣﺶ ﻣﺸﻜﻠﻪ ﻏﺪﻭﺓ ﻋﻨﺪﻫﺎ ...
ﻣﻬﺎ ﻛﺎﻧﺖ ﺗﺴﺮﻕ ﻓﻲ ﺍﻟﻨﻈﺮﺍﺕ ﻟﺮﺿﺎ ﻭﻫﻮ ﻳﺸﻮﻓﻠﻬﺎ .. ﻭﻟﺒﻨﻰ ﻣﺮﻛﺰﺓ ﻋﻠﻴﻬﻢ ..
ﻟﺒﻨﻰ ﻧﺨﺼﺖ ﻣﻬﺎ ﻭﻫﻤﺴﺘﻠﻬﺎ : ﻳﺎﻧﺎ ﻳﺎﺭﻭﺣﻲ ﻫﺎﻳﻤﻪ .. ﻣﻊ ﺍﻟﺴﻤﻮﺣﻲ ﻫﺎﻳﻤﻪ
ﻣﻬﺎ ﻭﺟﻬﻬﺎ ﻃﻤﺎﻃﻢ : ﻣﺒﺮﺩﻙ ﻟﺒﻨﻲ ..
ﻟﺒﻨﻰ ﻗﻌﺪﺕ ﺗﻀﺤﻚ .. ﻭﺭﺿﺎ ﺯﺍﺑﻂ ﺑﻨﺖ ﺍﺧﺘﻪ ﺗﻨﺎﺷﺐ ﻓﻴﻬﺎ ﺷﺎﺩ ﺿﺤﻜﺘﻪ ﻗﺪﺍﻡ ﺍﺳﺎﻣﻪ ﺍﻟﻠﻲ ﻛﺎﻥ ﻭﺍﻗﻒ ﻳﻬﺪﺭﺯ ﻋﻠﻴﻪ ...
ﺷﻮﻳﻪ ﻭﺧﺶ ﻧﻀﺎﻝ ﻭﻳﺎﺭﺍ ﻣﻌﺎﻩ ﻭﺷﺎﺩﻳﻦ ﻓﻲ ﺍﻳﺪﻳﻦ ﺑﻌﺾ ..
ﺍﻧﺼﺪﻣﺖ ﻟﺒﻨﻰ ﻟﻤﺎ ﺷﺎﻓﺘﻬﻢ ﻫﻲ ﺍﻭﻝ ﻣﻦ ﺟﺖ ﻋﻴﻨﻬﺎ ﻋﻠﻴﻬﻢ ..
ﻧﻀﺎﻝ : ﺍﻟﺴﻼﻡ ﻋﻠﻴﻜﻢ ..
ﺗﻠﻔﺘﻮﺍ ﻛﻠﻬﻢ ﺍﻧﺼﺪﻣﻮﺍ ﻣﺎﻋﺪﺍ ﻧﻴﺮﻭﺯ ﺍﻟﻠﻲ ﻛﺎﻧﺖ ﻋﺎﺭﻓﻪ ..
ﺭﺿﺎ ﻛﺎﻥ ﻳﺸﺒﺤﻠﻪ ﻑ ﺷﺒﺤﺎﺕ ﺳﻢ ... ﻭﻫﻮ ﺷﺎﻑ ﺷﺒﺤﺎﺗﻪ ﻫﺮﺏ ﻣﻨﻬﻢ ﻭﺧﺪﻱ ﻳﺎﺭﺍ ﻣﻦ ﻳﺪﻫﺎ ﻭﻗﺪﻡ ﻟﺮﻫﻒ ﻭﺣﻀﻨﻬﺎ ..
ﻧﻀﺎﻝ : ﻛﻞ ﻋﺎﻡ ﻭﺍﻧﺘﻲ ﺑﺨﻴﺮ ﺣﺒﻴﺒﺖ ﺑﺎﺑﺎ
ﺭﻫﻒ ﺣﻀﻨﺎﺗﻪ ﺑﺎﻟﺴﻴﻒ : ﺗﺴﻠﻢ ..
ﺑﻌﺪ ﻭﻣﺸﻲ ﺳﻠﻢ ﻉ ﺍﺳﺎﻣﻪ ﻭﻓﺎﺕ ﻧﻴﺮﻭﺯ ﺍﺍﻟﻠﻲ ﻋﺎﺭﻑ ﺍﻧﻬﺎ ﺣﺘﻘﻠﺐ ﻭﺟﻬﻬﺎ ﻋﻠﻴﻪ ..
ﻭﻣﺪ ﻳﺪﻩ ﺑﻴﺴﻠﻢ ﻉ ﺭﺿﺎ : ﻧﻮﺭﺕ ﺍﻟﺒﻼﺩ ..
ﺭﺿﺎ ﺷﺒﺢ ﻟﻴﺪﻩ ﻭﺷﺒﺢ ﻟﺒﻨﺎﺕ ﺍﺧﺘﻪ ﻉ ﺧﺎﻃﺮﻫﻢ ﻣﺪ ﻳﺪﻩ ﻭﺳﻠﻢ ﻋﻠﻴﻪ ﻭﻓﻴﺴﻊ ﻣﺎﺣﻮﻝ ﻳﺪﻩ .. ﻭﻣﺎﺑﺎﺵ ﻳﺮﺩ ﻋﻠﻴﻪ ..
ﻳﺎﺭﺍ ﺳﻠﻤﺖ ﻉ ﺭﻫﻒ ﻭﻣﺎﺑﺘﺶ ﺗﺴﻠﻢ ﻉ ﻟﺒﻨﻰ ﻋﺮﻓﺘﻬﺎ ﺣﺘﻬﺰﺑﻬﺎ .. ﺳﻠﻤﺖ ﻉ ﻣﻬﺎ ﻭﺑﻌﺪﻳﻦ ﻧﻴﺮﻭﺯ ... ﺍﻟﻠﻲ ﺷﺒﺤﺘﻠﻬﺎ ﻣﻦ ﻓﻮﻕ ﻟﻠﻮﻃﺎ ﻭﻳﺪﻭﺏ ﻣﺪﺗﻠﻬﺎ ﺭﻭﺱ ﺻﺒﺎﻋﻬﺎ ..
ﻧﻀﺎﻝ : ﻳﺎﺭﺍ ﺗﻌﺎﻟﻲ ﻧﻌﺮﻓﻚ .. ﺍﺳﺎﻣﻪ ﺻﺪﻳﻖ ﻣﻦ ﺯﻣﺎﻥ ..
ﻳﺎﺭﺍ ﺍﺑﺘﺴﻤﺖ ﻭﻣﺪﺕ ﻳﺪﻫﺎ : ﺍﻫﻼ ...
ﺍﺳﺎﻣﻪ ﺍﺑﺘﺴﻢ ﻭﺳﻠﻢ ﻋﻠﻴﻬﺎ : ﺍﻫﻼﺑﻴﻚ ..
ﺷﻮﻳﻪ ﻭﺍﻧﻔﺘﺢ ﺍﻟﺒﺎﺏ ﻭﺧﺶ ﺑﻮ ﻭﺃﻡ ﻧﻀﺎﻝ ... ﺍﻟﻠﻲ ﻟﻤﺎ ﺷﺎﻓﻬﻢ ﻓﺮﺡ .. ﺍﺳﺘﺎﺣﺸﻬﻢ ﻫﻠﺒﻪ ﻟﻴﻪ ﻣﺪﻩ ﻋﻠﻴﻬﻢ ﻣﻦ ﻟﻤﺎ ﺟﺎﻫﻢ ﻭﺑﻠﻐﻬﻢ ﺑﺰﻭﺍﺟﻪ ﺍﻟﺜﺎﻧﻲ ﻭﺻﺎﺭ ﺑﻴﻨﺎﺗﻬﻢ ﻣﺸﻜﻠﻪ ﻣﻌﺎﺵ ﻣﺸﺎﻟﻬﻢ ﻭﻛﺎﻥ ﻳﺴﺄﻝ ﻋﻠﻴﻬﻢ ﺑﺎﻟﺘﻠﻴﻔﻮﻥ ﻭﻫﻤﺎ ﻣﺮﺍﺕ ﻳﺮﺩﻭﺍ ﻭﻣﺮﺍﺕ ﻻ ..
ﻗﺪﻣﻮﺍ ﺟﺎﺑﺮ ﻭﻋﺎﺗﻜﻪ ﻭﻫﻤﺎ ﻳﺸﺒﺤﻮﺍ ﻟﻨﻀﺎﻝ ﻭﻳﺎﺭﺍ ﺍﻟﻠﻲ ﻛﺎﻧﺖ ﻻﺑﺴﻪ ﻗﻮﻧﻪ ﺟﻠﺪ ﺳﻮﺩﺍ ﻟﻠﺮﻛﺒﻪ ﻣﺤﺸﻴﻪ ﻓﻴﻬﺎ ﺑﻠﻮﺯﻩ ﺑﻴﻀﺎ ﻣﻔﺘﻮﺣﻪ ﺑﻄﻤﺘﻬﺎ ﺍﻟﻔﻮﻗﺎﻧﻴﻪ ﻭﺷﻌﺮﻫﺎ ﻛﺎﻥ ﻗﺼﻴﺮ ... ﻭﻓﻲ ﻭﺷﻢ ﻓﻲ ﺍﻋﻠﻰ ﺻﺪﺭﻫﺎ ﺗﺤﺖ ﺭﻗﺒﺘﻬﺎ ﺗﺤﺪﻳﺪﺍ ..
ﺟﺎﺑﺮ ﻭﻋﺎﺗﻜﻪ ﻣﻨﺼﺪﻣﻴﻦ ﻓﻲ ﺍﺧﺘﻴﺎﺭ ﻭﻟﺪﻫﻢ .. ﻏﻴﺮﻭﺍ ﻧﻈﺮﻫﻢ ﻟﺤﻔﻴﺪﺍﺗﻬﻢ ﺳﻠﻤﻮﺍ ﻋﻠﻴﻬﻢ ﻭﻉ ﺑﺎﻗﻲ ﺍﻟﺤﺎﺿﺮﻳﻦ ﻟﻴﻦ ﻭﺻﻠﻮﺍ ﻓﻲ ﻧﻀﺎﻝ
ﻧﻀﺎﻝ ﺑﺎﺱ ﻳﺪ ﺑﻮﻩ : ﻛﻴﻒ ﺣﺎﻟﻚ ﻳﺎﺑﻮﻱ ..
ﺟﺎﺑﺮ ﺑﺤﺪﻩ ﻭﻫﻮ ﻳﺸﻮﻑ ﻟﻴﺎﺭﺍ ﺑﻨﻈﺮﺓ ﺗﺨﻮﻑ : ﻛﻨﺖ ﻛﻮﻳﺲ ... ﻭﻃﻠﻖ ﻳﺪﻩ ﻭﻟﻰ ﺣﺪﺍ ﺣﻔﻴﺪﺍﺗﻪ ﻭﻻﻋﺒﺮ ﻳﺎﺭﺍ ﺍﻟﻠﻲ ﻗﺮﻳﺐ ﻣﺎﺗﺖ ﻣﻦ ﺍﻟﻠﻘﻄﻪ ..
ﻋﺎﺗﻜﻪ ﺳﻠﻤﺖ ﻉ ﻧﻀﺎﻝ ﺍﻟﻠﻲ ﻛﺎﻥ ﻣﺴﺘﺎﺀ ﻣﻦ ﺣﺮﻛﺔ ﺑﻮﻩ : ﻛﻴﻒ ﺣﺎﻟﻚ ﻭﻟﺪﻱ .. ﺧﻴﺮﻙ ﺿﺎﻋﻒ ﻭﻣﺴﻠﻮﻝ ﻫﻜﻲ .. ؟ !!
ﻧﻀﺎﻝ : ﺑﺎﻟﻌﻜﺲ ﻳﺎﺃﻣﻲ ﻭﺯﻧﻲ ﺯﺍﻳﺪ ..
ﻋﺎﺗﻜﻪ : ﺗﻲ ﻭﻳﻦ ﺯﺍﻳﺪ ﻓﺮﻗﺔ ﺣﺎﻟﻚ ... ﻣﺎﻛﻨﺘﺶ ﻫﻜﻲ ﺑﻜﻞ .. ﺍﻟﻠﻪ ﻏﺎﻟﺐ .. ﻭﺩﺍﺭﺕ ﺯﻱ ﻣﺎﺩﺍﺭ ﺭﺍﺟﻠﻬﺎ ﺑﺎﻟﺰﺑﻂ ﻭﻭﻣﺸﺖ ﺣﺪﺍﻩ ...
ﻳﺎﺭﺍ ﻋﻴﻮﻧﻬﺎ ﺗﻌﺒﻮﺍ ﺩﻣﻮﻉ ﻭﺍﻟﻜﻞ ﻛﺎﻧﻮﺍ ﻣﺮﻛﺰﻳﻦ ﻋﻠﻴﻬﺎ ...
ﻧﻀﺎﻝ ﻗﺮﺏ ﻟﻮﺫﻧﻬﺎ ﻭﻗﺎﻝ ﺑﻬﻤﺲ : ﻗﺘﻠﻚ ﻫﺬﺍ ﺍﻟﻠﻲ ﺑﻴﺼﻴﺮ ..
ﻳﺎﺭﺍ ﺍﻏﺘﺼﺒﺖ ﺍﺑﺘﺴﺎﻣﻪ ﻭﻗﺎﻟﺖ ﺑﺼﻮﺕ ﻳﺪﻭﺏ ﻃﺎﻟﻊ : ﻋﺎﺩﻱ ..
ﺟﺎﺑﺮ : ﻣﺎﻻ ﻭﻳﻦ ﺣﻨﺎﻥ ..
ﻧﻀﺎﻝ ﺭﻛﺰ ...
ﺭﻫﻒ : ﺗﺒﺪﻝ ﻭﺟﺎﻳﻪ ..
ﻧﻴﺮﻭﺯ ﺑﻀﺤﻜﻪ : ﺑﻨﺖ ﺣﻼﻝ ..
ﻛﻠﻬﻢ ﺷﺒﺤﻮﺍ ﻭﻳﻦ ﻣﺎﺗﺸﺒﺢ ﻧﻴﺮﻭﺯ ﻟﻘﻮﺍ ﺣﻨﺎﻥ ﻃﺎﻟﻌﻪ ﻭﻓﺤﻀﻨﻬﺎ ﻣﺤﻤﺪ .. ﻛﺎﻧﺖ ﺗﻬﺒﻞ ﻻﺑﺴﻪ ﻭﻣﺘﺄﻧﻘﻪ ﻭﻣﻠﺒﺴﻪ ﻣﺤﻤﺪ ﻟﺒﺴﻪ ﺣﻠﻮﺓ ﻭﺗﻠﻌﺐ ﻓﻴﻪ ﻭﺗﻀﺤﻚ ..
ﺍﻟﻌﻴﻮﻥ ﻣﺒﻬﻮﺭﺓ ... ﻭﻣﺶ ﻗﺎﺩﺭﻳﻦ ﻳﺤﻮﻟﻮﺍ ﻋﻴﻮﻧﻬﻢ ﻣﻦ ﻋﻠﻴﻬﺎ ﻻﻣﻦ ﻧﻀﺎﻝ ﻭﻻ ﺃﺳﺎﻣﻪ ..
ﺟﻤﺎﻝ ﺣﻨﺎﻥ ﻣﺶ ﺟﻤﺎﻝ ﻭﺟﻪ ﺑﺲ .. ﺟﻤﺎﻝ ﺭﻭﺡ .. ﻧﻴﻪ ﻃﻴﺒﻪ .. ﻗﻠﺐ ﺳﻠﻴﻢ ... ﺟﻤﺎﻝ ﻋﺒﺎﺩﻩ ﻭﺍﻳﻤﺎﻥ ﺣﻘﻴﻘﻲ ﺑﺎﻟﻠﻪ ..
ﻭﺯﻱ ﻣﺎﻗﻠﺖ ﻗﺒﻞ ﺭﺑﻲ ﻳﻌﻄﻲ ﺍﻟﻠﻲ ﻳﺤﺒﻬﻢ ﻗﺒﻮﻝ ... ﻭﻣﻦ ﻛﻞ ﺷﻲ ﺣﺴﻦ ..
ﻛﻞ ﺣﺪ ﻧﻴﺘﻪ ﺻﺎﻓﻴﻪ ﻭﻗﻠﺒﻪ ﺻﺎﻓﻲ ﺣﺘﻰ ﻟﻮ ﻣﺎﻛﺎﻧﺶ ﻳﻤﻠﻚ ﻭﺟﻪ ﺣﺴﻦ .. ﺟﻤﺎﻟﻪ ﺍﻟﺪﺍﺧﻠﻲ ﻳﻄﻠﻊ ﻋﻠﻴﻪ ﻭﻳﺨﻠﻴﻪ ﺍﺣﻠﻰ ﻣﻦ ﻫﻠﺒﻪ ﻧﺎﺱ ﻳﻤﻠﻜﻮﺍ ﺟﻤﺎﻝ ﻭﺟﻪ ﻓﺎﺗﻦ .. ﻟﻜﻦ ﻗﻠﻮﺑﻬﻢ ﻣﺮﻳﻀﻪ ﻭﻧﻮﺍﻳﺎﻫﻢ ﺳﻮﺩﺍ ﻣﺴﻮﺩﺓ ﻭﺟﻮﻫﻬﻢ ...
ﻳﺎﺭﺍ ﻛﺎﻧﺖ ﺗﺸﺒﺤﻠﻬﺎ ﻭﺑﺘﻤﻮﺕ ﻣﻦ ﻏﻴﺮﺗﻬﺎ ﺷﺎﻓﺖ ﺣﻨﺎﻥ ﻫﺎﻟﻤﺮﻩ ﺑﺤﺎﻝ ﻋﻜﺲ ﺣﺎﻟﻬﺎ ﺍﻟﻠﻲ ﺷﺎﻓﺘﻬﺎ ﺑﻴﻪ ﺃﻭﻝ ﻣﺮﻩ ... ﺷﺒﺤﺖ ﻟﻨﻀﺎﻝ ﻟﻘﺎﺗﻪ ﻫﺎﻳﻢ ﺑﻴﻬﺎ ﻭﻓﻌﻴﻮﻧﻪ ﻧﻈﺮﻩ ﻋﻤﺮﻫﺎ ﻣﺎﺷﺎﻓﺘﻬﺎ ﻓﻲ ﻋﻴﻮﻧﻪ ﻟﻴﻬﺎ ﻧﻈﺮﺓ ﻏﻴﺮ ...
ﻗﺪﻣﺖ ﺣﻨﺎﻥ ﻭﻗﺎﻟﺖ ﺑﺼﻮﺕ ﻃﻔﻮﻟﻲ : ﺷﻦ ﻻﻳﻜﻢ ... ﺻﻘﺢ ﺣﻠﻴﻜﻢ ﻭﻻ ...
ﻛﻠﻬﻢ ﺿﺤﻜﻮﺍ ...
ﻧﻴﺮﻭﺯ ﺑﻀﺤﻜﻪ : ﻋﺴﺴﺴﺴﻞ ﺍﻟﻠﻬﻢ ﺑﺎﺭﻙ ﻋﻠﻴﻜﻢ ...
ﻗﺪﻣﺖ ﺣﻨﺎﻥ ﺳﻠﻤﺖ ﻉ ﻋﻤﻬﺎ ﻭﻋﻤﺘﻬﺎ ﻭﻫﺪﺭﺯﺕ ﻋﻠﻴﻬﻢ ﻭﻫﻤﺎ ﻳﻠﻌﺒﻮﺍ ﻓﻤﺤﻤﺪ .. ﻋﻄﺎﺗﻪ ﺣﻨﺎﻥ ﻟﻌﺰﻭﺯﺗﻬﺎ ... ﻭﺷﺒﺢﺕ ﺟﻬﺔ ﺍﺳﺎﻣﻪ ﻭﻧﻀﺎﻝ ﻭﻳﺎﺭﺍ .. ﺟﺘﻬﻢ ...
ﺣﻨﺎﻥ ﺑﺄﺑﺘﺴﺎﻣﻪ : ﺍﻫﻼ ﺑﻴﻜﻢ ...
ﻧﻀﺎﻝ ﻭﻫﻮ ﻳﺸﻮﻓﻠﻬﺎ ﻣﺪ ﻳﺪﻩ : ﻛﻴﻒ ﺣﺎﻟﻚ ﺣﻨﺎﻥ ..
ﺣﻨﺎﻥ ﺷﺒﺤﺖ ﻟﻴﺪﻩ ﻭﺷﺒﺤﺖ ﻟﻴﺎﺭﺍ ﺍﻟﻠﻲ ﻛﺎﻧﺖ ﺑﺘﻤﻮﺕ ﻭﺩﻣﻮﻋﻬﺎ ﻓﻲ ﻣﺤﺠﺮ ﻋﻴﻨﻬﺎ .. ﺷﺒﺤﺘﻠﻪ ﻭﺳﻠﻤﺖ ﻋﻠﻴﻪ ﻭﻓﻴﺴﻊ ﺣﻮﻟﺖ ﻳﺪﻫﺎ ..
ﺷﺒﺤﺖ ﻟﻴﺎﺭﺍ : ﺍﻫﻼ ﺑﻴﻚ ..
ﻳﺎﺭﺍ ﺷﺒﺤﺘﻠﻬﺎ : ﺷﻜﺮﺍ ...
ﺍﺑﺘﺴﻤﺖ ﺣﻨﺎﻥ ﻣﺠﺎﻣﻠﻪ ﻭﺷﺎﻓﺖ ﻷﺳﺎﻣﻪ : ﻭﻳﻦ ﺧﺎﻟﺘﻲ ﺑﺪﻳﻌﻪ ﻭﻟﻴﻠﻴﺎﻥ ..
ﺍﺳﺎﻣﻪ ﺍﺑﺘﺴﻢ : ﺗﺤﺸﻤﻮﺍ ﻣﺎﺟﻮﺵ ..
ﺣﻨﺎﻥ : ﺗﺤﺸﻤﻮﺍ؟؟؟
ﺍﺳﺎﻣﻪ ﺑﻀﺤﻜﻪ : ﻗﺎﻟﻮﺍ ﻋﻴﺐ ﺍﻟﻴﻮﻡ ﻭﻏﺪﻭﺓ ﻋﻨﺪﻫﺎ؟
ﻧﻀﺎﻝ : ﻏﺪﻭﺓ !!.
ﺍﺳﺎﻣﻪ ﺷﺒﺤﻠﻪ ﻭﺍﺑﺘﺴﻢ : ﻏﺪﻭﺓ ﺇﻥ ﺷﺎﺀ ﺍﻟﻠﻪ ﺣﻨﺎﻥ ﻋﺎﺯﻣﻪ ﺍﻣﻲ ﻭﺍﺧﺘﻲ ﻉ ﺑﺎﺯﻳﻨﻬﺎ ﺍﻟﻠﻲ ﻣﺎﻳﺘﻘﺎﻭﻣﺶ .
ﻧﻀﺎﻝ ﺑﺮﻓﻌﺔ ﺣﺎﺟﺐ : ﻣﺎﻳﺘﻘﺎﻭﻣﺶ ﺻﺎﺭ !!
ﺍﺳﺎﻣﻪ ﺑﺈﺑﺘﺴﺎﻣﻪ ﻣﺴﺘﻔﺰﺓ : ﺗﻨﻜﺮ؟
ﻧﻀﺎﻝ ﺑﻨﻔﺲ ﺍﻹﺑﺘﺴﺎﻣﻪ : ﻣﺎﻧﻘﺪﺭﺵ .. ﺷﺒﺤﻠﻬﺎ .. ﻣﺎﻱﺗﻘﺎﻭﻣﺶ ..
ﻳﺎﺭﺍ ﻗﻌﺪﺕ ﺗﻔﺮﻙ ﻓﺈﻳﺪﻳﻬﺎ ﺑﺒﻌﺾ ..
ﻭﺣﻨﺎﻥ ﺗﺤﺸﻤﺖ ﻭﺗﻠﻔﺘﺖ ﻭﻗﺎﻟﺖ؛ﻫﻴﺎ ﺍﻟﺪﻧﻴﺎ ﻟﻴﻠﺖ ﻭﻳﻦ ﺍﻟﻄﻮﺭﻃﻪ ﻣﺘﺎﻋﻜﻢ ...
ﺭﺿﺎ : ﺷﻮﻳﻪ ﻭﺟﺎﻱ ...
ﻭﻟﺖ ﺣﻨﺎﻥ ﺣﺪﺍ ﻋﻤﻬﺎ ﻭﻋﻤﺘﻬﺎ ﻭﺧﺪﺕ ﻣﺤﻤﺪ ...
ﺷﻮﻳﻪ ﻭﻃﻠﻊ ﺭﺿﺎ ﺑﺎﻟﻄﻮﺭﻃﻪ ﺑﺸﻤﺎﻋﻴﻬﺎ ﻭﻋﻠﻴﻬﺎ " ﻫﺬﺍﻛﺎ ﺍﻟﻠﻲ ﺯﻱ ﻧﺠﻮﻡ ﺍﻟﻠﻴﻞ ﻏﻴﺮ ﺍﻛﺒﺮ ﺍﻛﻴﺪ ﻋﺮﻓﺘﻮﻩ "
ﺣﻄﻬﺎ ﻉ ﺍﻟﻄﺎﻭﻟﻪ ﻭﻗﺮﺑﻮﺍ ﻣﻨﻬﺎ ﺟﺖ ﺣﻨﺎﻥ ﺟﻨﺐ ﺭﻫﻒ .. ﻭﻧﻀﺎﻝ ﺣﺘﻰ ﻫﻮ ... ﻭﺑﺪﻭﺍ ﻳﻐﻨﻮﺍ ﻭﻳﺎﺭﺍ ﺗﺸﺒﺤﻠﻬﻢ .. ﺣﺎﺳﻪ ﻭﺟﻮﺩﻫﺎ ﻏﻠﻂ ﺑﻴﻨﺎﺗﻬﻢ ﻫﻲ ﻣﺶ ﻣﻨﻬﻢ ﻭﻻﺗﺸﺒﻬﻠﻬﻢ ﻭﻻﻫﻤﺎ ﻳﺸﺒﻬﻮﻟﻬﺎ ...
ﺑﺲ ﺗﻤﻨﺖ ﻟﻮ ﻛﺎﻧﺖ ﻣﻨﻬﻢ ﻭﺗﺸﺒﻬﻠﻬﻢ ...
ﻃﻔﺖ ﺍﻟﺸﻤﻊ .. ﺣﻀﻨﻬﺎ ﺑﻮﻫﺎ ﻭﺑﺎﺱ ﺭﺍﺳﻬﺎ ... ﻭﺑﺎﺳﺘﻬﺎ ﺍﻣﻬﺎ ... ﻭﻫﻲ ﻛﺎﻧﺖ ﻓﺮﺣﺎﻧﻪ ﻫﻠﺒﻪ ﻟﻮﺟﻮﺩﻫﻢ ﺟﻨﺒﻬﺎ ﺣﺘﻰ ﻟﻮ ﻛﺎﻧﻮﺍ ﻣﺶ ﺯﻱ ﻗﺒﻞ ...
ﺍﻷﺟﻮﺍﺀ ﻛﺎﻧﺖ ﻟﻄﻴﻔﻪ ﺑﺮﻏﻢ ﺷﻮﻳﻪ ﺗﻜﻬﺮﻳﺒﺎﺕ ﺑﻴﻦ ﻧﻴﺮﻭﺯ ﻣﻌﺎﻫﺎ ﻟﺒﻨﻰ ﻭﻳﺎﺭﺍ ...
ﻓﻲ ﺣﺪ ﺣﺐ ﻳﺴﺘﻐﻞ ﺍﻟﻔﺮﺻﻪ ﻭﻳﻘﺮﺏ ﻣﻦ ﺍﻟﻠﻲ ﻗﻠﺒﻪ ﻣﻨﺠﺬﺏ ﻟﻴﻪ ..
" ﺣﻠﻮ ﺍﻟﺠﻮ .."
ﻣﻬﺎ ﺍﺑﺘﺴﻤﺖ ﺑﺨﺠﻞ ﻭﻗﻠﺒﻬﺎ ﻳﺪﻕ : ﺍﻳﻪ .. ﺣﻠﻮ ..
ﺭﺿﺎ ﻳﺸﻮﻓﻠﻬﺎ ﻛﻴﻒ ﻣﺘﺤﺸﻤﻪ ﻭﻣﺎﺗﺸﺒﺤﻼﺵ : ﻗﺪﺍﺵ ﻟﻴﻚ ﺍﻧﺘﻲ ﻭﻟﺒﻨﻰ ﺻﺤﺎﺏ ..
ﻣﻬﺎ : ﺗﻼﺗﻪ ﺷﻬﻮﺭ ...
ﺭﺿﺎ ﺑﻀﺤﻜﻪ : ﺗﻮﻗﻌﺘﻚ ﺗﻘﻮﻟﻲ 3 ﺳﻨﻴﻦ ...
ﻣﻬﺎ ﺷﺒﺤﺘﻠﻬﺎ : ﺣﺒﻴﺘﻬﻢ ﺗﻘﻮﻝ ﻧﻌﺮﻓﻬﻢ ﻣﻦ ﺳﻨﻴﻦ ..
ﺭﺿﺎ : ﺣﺘﻰ ﻫﻤﺎ ﺣﺒﻮﻙ ...
ﻣﻬﺎ ﺗﺤﺸﻤﺖ ﻭﻃﻄﺖ ﺭﺍﺳﻬﺎ ﻟﻮﻃﺎ ..
ﺭﺿﺎ ﺿﺤﻚ : ﺧﻼﺹ ﺍﻟﻘﺮﺍﻳﻪ ﺑﻌﺪ ﻏﺪﻭﺓ ﺗﺒﺪﺍ ..
ﻣﻬﺎ ﺑﻀﺤﻜﻪ : ﻋﻼﺵ ﺍﻟﻨﻜﺪ ...
ﺭﺿﺎ : ﻫﻬﻬﻬﻬﻬﻬﻬﻬﻬﻬﻬﻬﻪ
ﺣﻨﺎﻥ ﻛﺎﻧﺖ ﺗﺸﻮﻓﻠﻬﻢ ﻭﻣﺒﺘﺴﻤﻪ ... ﻭﻳﺎﺭﺍ ﻛﺎﻧﺖ ﺗﺸﻮﻓﻠﻬﺎ ﻭﺑﺘﻤﻮﺕ ﻣﻦ ﺍﻟﻐﻴﺮﻩ .. ﻣﻦ ﺭﺍﺟﻠﻬﺎ ﺍﻟﻠﻲ ﺣﻦ ﻟﻤﺮﺗﻪ ﺍﻷﻭﻟﻰ ﻭﻓﻌﻴﻮﻧﻪ ﺷﻮﻕ ﻭﺍﺿﺢ ...
ﻓﺘﺤﺖ ﻟﺒﻨﻰ ﺍﻟﻤﻨﻈﻮﻣﻪ ﻭﻛﺎﻧﺖ ﻉ ﺍﻏﻨﻴﻪ ﻛﻞ ﺳﻨﺔ ﻭﺍﻧﺖ ﻃﻴﺐ .. ﻭﺑﺪﻭﺍ ﻳﻐﻨﻮﺍ ﻣﻌﺎﻫﺎ ﻭﻳﻀﺤﻜﻮﺍ .. ﻭﺣﻨﺎﻥ ﻛﺎﻧﺖ ﺗﺮﻗﺺ ﻓﻤﺤﻤﺪ ﻋﻠﻴﻬﺎ .. ﻭﺍﺳﺎﻣﻪ ﻳﻤﻠﻲ ﻓﻌﻴﻮﻧﻪ ﻣﻨﻬﻢ ..
ﺍﻷﺟﻮﺍﺀ ﺍﺳﺘﻤﺮﺕ ﺣﻠﻮﺓ ﻭﻣﺎﺣﺴﺘﺶ ﺭﻫﻒ ﺑﺄﻱ ﺷﻲ ﻧﺎﻗﺼﻬﺎ ﻓﻬﺎﻟﻴﻮﻡ ...
ﻧﻴﺮﻭﺯ : ﺍﻣﺘﻰ ﻧﺤﻄﻮﺍ ﺍﻟﻌﺸﻲ ..
ﺣﻨﺎﻥ : ﺷﻮﻳﻪ ﺗﺎﻧﻴﻪ ...
ﻣﺤﻤﺪ ﻛﺎﻥ ﻳﺒﻲ ﻳﺘﻼﺣﻖ ﺍﻟﻄﻮﺭﻃﻪ ﺑﺈﻳﺪﻳﻪ ﻭﺣﻨﺎﻥ ﺷﺪﺍﺗﻪ ﻟﻜﻦ ﻻﻫﻴﻪ ﻣﻊ ﻧﻴﺮﻭﺯ .. ﻭﺻﻞ ﻓﻴﻬﺎ ﻭﻗﻌﺪ ﻳﺒﻠﺒﺰ ...
ﻟﺒﻨﻰ ﺷﺎﻓﺎﺗﻪ : ﺣﻴﻴﻲ ﻣﺎﻣﺎ ﺷﻮﻓﻲ ﺣﻤﻮﺩﻱ ..
ﺣﻨﺎﻥ ﺷﺎﻓﺎﺗﻪ : ﻧﻬﺎﺍﺍﺍﺍﺭﻱ .. ﺑﻌﺪﺍﺗﻪ ﻭﻫﻮ ﻳﻔﺮﻓﺶ ﺑﺈﻳﺪﻳﻪ ﻉ ﺍﻟﻄﻮﺭﻃﻪ ﻭﻳﻨﺎﻏﻲ ﺑﺘﻜﺸﻴﺦ ...
ﻟﺒﻨﻰ : ﺭﻳﺘﻮﻩ ﺑﺪﻱ ﺑﺎﻟﺠﻮ ﻣﻦ ﺗﻮﺍ ...
ﻛﻠﻬﻢ ﺿﺤﻜﻮﺍ ... ﻉ ﺻﻮﺕ ﺿﺤﻜﻬﻢ ..
ﺍﻧﻔﺘﺢ ﺍﻟﺒﺎﺏ ﺑﺎﻟﺸﻮﻳﻪ .. ﺧﺶ ﻭﻗﻌﺪ ﻳﺸﻮﻓﻠﻬﻢ ﻛﻴﻒ ﻣﻠﺘﻤﻴﻦ ﻭﻳﻀﺤﻜﻮﺍ ... ﺟﺖ ﻋﻴﻮﻧﻪ ﻋﻠﻴﻬﺎ ﻭﻫﻲ ﺗﻤﺴﺢ ﻓﺎﻳﺪﻳﻦ ﻣﺤﻤﺪ ﻭﺗﻀﺤﻚ ... ﻛﺎﻧﺖ ﺣﻠﻮﺓ ﺑﺎﻟﻤﺮﺓ .. ﻭﻛﺎﻥ ﻟﻴﻬﺎ ﻧﻔﺲ ﺍﻟﺘﺄﺛﻴﺮ ﻉ ﻗﻠﺒﻪ ... ﻫﺬﺍ ﻭﻳﻦ ﺍﺭﺗﺎﺡ ﻟﻤﺎ ﺷﺎﻓﻬﺎ ﺗﻀﺤﻚ ... ﻏﻴﺮ ﻋﻴﻮﻧﻪ ﻟﺒﻨﺘﻪ ﺍﻟﻠﻲ ﻛﺎﻧﺖ ﺗﻀﺤﻚ ﻭﻓﻲ ﻗﻤﺔ ﺍﻟﺴﻌﺎﺩﻩ .. ﺍﻟﺴﻌﺎﺩﻩ ﺍﻟﻠﻲ ﻣﺎﻛﺎﻧﺘﺶ ﺗﻌﺮﻓﻬﺎ ﻗﺒﻞ ﻻﺗﻌﺮﻑ ﺣﻨﺎﻥ ﻭﺑﻨﺎﺗﻬﺎ ... ﻭﻻﻫﻮ ﻛﺎﻥ ﻋﺎﺭﻓﻬﺎ ﻗﺒﻞ ﻟﻴﺸﻮﻓﻬﺎ ..
ﺍﻟﻜﻞ ﻛﺎﻥ ﻣﻨﺸﻐﻞ ﻭﻣﺎﺣﺪ ﺭﻛﺰ ﻋﻠﻴﻪ ..
ﺍﻟﻮﺿﻊ ﻛﺎﻥ ﻛﺎﻟﺘﺎﻟﻲ ... ﺍﻭﻝ ﻣﺎ ﺗﺨﺸﻮﺍ ﻣﻦ ﺍﻟﺒﺎﺏ ﺍﻟﺮﺋﻴﺴﻲ ﻟﻠﺤﻮﺵ ﻓﻲ ﺟﻨﺎﻥ ﻛﺒﻴﺮ ﺷﻮﻳﻪ ﻉ ﺍﻳﻤﻴﻨﻪ ﺑﺎﻟﺰﺑﻂ ﻛﺎﻧﻮ ﺩﺍﻳﺮﻳﻦ ﺍﻟﺤﻔﻠﻪ ﻭﻛﺎﻥ ﻓﻲ ﻣﺴﺎﻓﻪ ﻻﺑﺄﺱ ﺑﻬﺎ ﻣﻦ ﺍﻟﺒﺎﺏ ﻟﻠﺠﻬﺔ ﺍﻟﻠﻲ ﻫﻤﺎ ﻓﻴﻬﺎ ...
ﺣﻨﺎﻥ ﻛﻤﻠﺖ ﻣﺴﺢ ﺍﻳﺪﻳﻦ ﻣﺤﻤﺪ ... ﻗﺎﻣﺖ ﺭﺍﺳﻬﺎ ﻭﻋﻴﻨﻬﺎ ﺟﺖ ﻓﻌﻴﻨﻪ ﻣﺒﺎﺷﺮﺓ .. ﺗﻼﺷﺖ ﺍﺑﺘﺴﺎﻣﺘﻬﺎ ﻭﻉ ﻭﺟﻬﻬﺎ ﻋﻼﻣﺎﺕ ﺍﻟﻤﻔﺎﺟﺄﺓ ...
ﻫﻮ ﻗﻌﺪ ﻳﺸﻮﻓﻠﻬﺎ ﻭﻳﺘﻤﻠﻰ ﻣﻨﻬﺎ ﻣﺴﺘﻐﻞ ﺣﺎﻟﺘﻬﺎ ﻭﻗﻌﺪ ﻳﺤﻜﻲ ﺑﻌﻴﻮﻧﻪ ﻟﻌﻴﻮﻧﻬﺎ ﻫﻠﺒﻪ ﻛﻼﻡ ﻭﻛﻼﻡ ...
" ﺑﺎﺑﺎ .."
ﻛﻠﻬﻢ ﺍﻟﺘﻔﺘﻮﺍ ﻟﻠﺒﺎﺏ ﺍﻭﻝ ﻣﺎﺳﻤﻌﻮﺍ ﻛﻠﻤﺘﻬﺎ .. ﺷﺎﻓﻮﻩ ..
ﻛﺎﻥ ﻻﺑﺲ ﺳﻮﺭﻳﻪ ﺑﻨﻔﺴﺠﻲ ﻏﺎﻣﻘﻪ ﺑﺲ ﻫﺎﻓﺖ ﻫﻠﺒﻪ ﺍﻟﻠﻮﻥ ﻓﻲ ﺍﻟﺴﻮﺭﻳﻪ ﺍﻟﻠﻲ ﻳﺸﻮﻓﻬﺎ ﻳﻘﻮﻝ ﺭﺻﺎﺻﻴﻪ .. ﻭﺳﺮﻭﺍﻝ ﺭﺻﺎﺻﻲ ..
ﻓﻴﺪﻩ ﺑﺎﻗﻪ ﻭﺭﺩ ﺗﻮﻟﻴﺐ ﺍﺑﻴﺾ ﻭﻓﻨﺼﻪ ﻭﺭﺩﺓ ﺗﻮﻟﻴﺐ ﻭﺣﺪﻩ ﻣﻮﻑ ﻭﻓﻴﺪﻩ ﺍﻟﺘﺎﻧﻴﻪ ﻛﻴﺴﻪ ﺗﺒﺎﻥ ﻣﺘﺎﻉ ﻫﺪﺍﻳﺎ ...
ﻗﻌﺪﻭﺍ ﻳﺸﻮﻓﻮﻟﻪ ﻭﻫﻮ ﺣﺲ ﺑﺒﻌﺾ ﺍﻹﺣﺮﺍﺝ ﺑﺲ ﻣﺎﺑﻴﻨﺶ ...
ﻧﻀﺎﻝ ﻳﺸﺒﺤﻠﻪ ﻭﻣﺼﺪﻭﻡ ﻭﻛﺎﻥ ﻳﻐﻠﻲ ﻏﻠﻲ ... ﻭﻳﺎﺭﺍ ﻣﺘﻔﺎﺟﺌﻪ ...
ﻭﺃﺳﺎﻣﻪ ﻭﺟﻬﻪ ﺍﻧﻘﻠﺐ ...
ﺣﻨﺎﻥ ﺗﺸﺒﺤﻠﻪ ﺧﺪﺕ ﻧﻔﺲ ﻋﻤﻴﻖ ﻭﻓﺎﺗﺖ ﻣﻦ ﺣﺪﺍ ﺍﻟﻄﺎﻭﻟﻪ ... ﻭﻗﺪﻣﺘﻠﻪ ﻭﻫﻮ ﻳﺸﻮﻓﻠﻬﺎ ﻛﻴﻒ ﺗﻘﺪﻣﻠﻪ ﺑﻠﻊ ﺭﻳﻘﻪ ﻭﻗﻠﺒﻪ ﻗﺮﻳﺐ ﻳﺸﻖ ﺻﺪﺭﻩ ﻣﻦ ﻗﻮﺓ ﺍﻟﺪﻕ ..
ﺣﻨﺎﻥ ﺑﺠﺪﻳﻪ : ﺍﻫﻼ ﺑﻴﻚ .. ﺗﻔﻀﻞ ...
ﻣﻌﺎﻭﻳﻪ : ﻋﺎﺭﻑ ﺭﻭﺣﻲ ﻗﻠﻠﺖ ﺫﻭﻕ ﻭﺟﻴﺖ ﻣﻦ ﻏﻴﺮ ﻋﺰﻭﻣﻪ ﺑﺲ ﻛﺎﻥ ﻻﺯﻡ ﻧﺠﻲ ...
ﻧﻀﺎﻝ ﺟﺎﻱ ﺑﻴﻤﺸﻴﻠﻪ ﻳﺎﺭﺍ ﺷﺪﺗﻠﻪ ﻳﺪﻩ ﻭﺗﺸﺒﺤﻠﻪ : ﺧﻮﻫﺎ ﻣﺎﺷﻲ ...
ﻫﻮ ﻗﻌﺪ ﻳﺸﺒﺢ ﻟﻴﺎﺭﺍ ﺑﺼﺪﻣﻪ ﻭﻏﻞ ﻓﻲ ﻧﻔﺲ ﺍﻟﻮﻗﺖ ..
ﺭﺿﺎ : ﻣﻨﻮ ﺣﻨﺎﻥ؟
ﺣﻨﺎﻥ ﺷﺒﺤﺖ ﻟﺨﻮﻫﺎ : ﻫﺬﺍ ﺍﻟﺴﻴﺪ ﻣﻌﺎﻭﻳﻪ ﻭﺍﻟﺪ ﻣﻬﺎ ﻭﻓﻨﻔﺲ ﺍﻟﻮﻗﺖ ﻧﺨﺪﻡ ﻣﻌﺎﻩ ﻉ ﻣﺸﺮﻭﻉ ﺟﺪﻳﺪ ﻟﻠﺸﺮﻛﻪ ﻣﺘﺎﻋﻪ .. ﺳﻴﺪ ﻣﻌﺎﻭﻳﻪ ﻫﺬﺍ ﺭﺿﺎ ﺧﻮﻱ
ﺭﺿﺎ ﺍﺑﺘﺴﻢ ﻭﻣﺪ ﻳﺪﻩ : ﺗﺸﺮﻓﺖ ﺑﻴﻚ ..
ﻣﻌﺎﻭﻳﻪ ﺳﻠﻢ ﻋﻠﻴﻪ : ﺍﻟﺸﺮﻑ ﻟﻴﺎ ..
ﺭﺿﺎ : ﻫﻴﺎ ﺗﻔﻀﻞ ..
ﻣﻌﺎﻭﻳﻪ ﺷﺒﺤﻠﻬﺎ ﺑﻌﺪﻳﻦ ﺷﺒﺤﻠﻪ ﻭﻗﺎﻟﺖ : ﻣﺎﺳﻤﺤﺘﻠﻴﺶ ﺻﺎﺣﺒﺔ ﺍﻟﻤﻜﺎﻥ ..
ﺣﻨﺎﻥ ﺷﺒﺤﺘﻠﻪ ﻫﻠﺒﻪ ﺑﻌﺪﻳﻦ ﻗﺎﻟﺖ : ﺗﻔﻀﻞ ...
ﺍﺑﺘﺴﻢ ﻣﻌﺎﻭﻳﻪ ﻭﺧﺶ ... ﺳﻠﻢ ﻋﻠﻴﻬﻢ ﺑﻌﺪ ﻣﺎﺣﻨﺎﻥ ﻋﺮﻓﺖ ﺑﻮ ﻭﺃﻡ ﻧﻀﺎﻝ ﺑﻴﻪ ... ﻟﻤﺎ ﻭﺻﻞ ﻓﻲ ﺃﺳﺎﻣﻪ ... ﺑﺎﻥ ﻉ ﻭﺟﻬﻪ ﺍﻧﻪ ﻣﻌﺼﺐ .. ﺷﺪ ﻉ ﻳﺪﻩ ﺑﻘﻮﺓ ﻟﻤﺎ ﺻﺎﻓﺤﻪ ... ﻭﺃﺳﺎﻣﻪ ﺍﺳﺘﻐﺮﺏ ﺍﻟﺤﺮﻛﻪ ..
ﺑﻌﺪﻳﻦ ﺳﻠﻢ ﻉ ﻧﻀﺎﻝ ﺍﻟﻠﻲ ﺷﺪ ﻫﻮ ﻉ ﻳﺪ ﻣﻌﺎﻭﻳﻪ ﻫﺎﻟﻤﺮﻩ ﺑﻘﻮﺓ ﻭﻣﻌﺎﻭﻳﻪ ﺍﺑﺘﺴﻢ ﺑﺒﺮﻭﺩ .. ﺳﻠﻢ ﻉ ﻳﺎﺭﺍ ...
ﻣﻌﺎﻭﻳﻪ : ﻛﻴﻒ ﺣﺎﻟﻚ ﻣﺪﺍﻡ ﻳﺎﺭﺍ ..
ﻳﺎﺭﺍ : ﺍﻟﺤﻤﺪ ﻟﻠﻪ ﻛﻴﻒ ﺣﺎﻟﻚ ﺍﻧﺖ ..
ﻣﻌﺎﻭﻳﻪ : ﺍﻟﺤﻤﺪ ﻟﻠﻪ ﺑﺨﻴﺮ ...
ﺣﻨﺎﻥ ﺗﺸﻮﻓﻠﻪ ﻭﻋﻴﻮﻧﻬﺎ ﻛﺎﻧﺖ ﻉ ﺍﻟﺒﺎﻗﻪ ﺣﻠﻮﻩ ﺑﺎﻟﻤﺮﻩ ... ﻭﺍﻟﻮﺭﺩﻩ ﺍﻟﻤﻮﻓﻴﻪ ﺟﺬﺑﺘﻬﺎ ﻟﻴﻦ ﺧﻼﺹ : ﻟﺒﻨﻰ ﻣﺎﻣﺎ ... ﺑﺮﻱ ﺧﻮﺩﻱ ﻣﻦ ﻋﻤﻚ ﻣﻌﺎﻭﻳﻪ ﺍﻟﺒﺎﻗﻪ ...
ﻟﺒﻨﻰ : ﺣﺎﺿﺮ .. ﻣﺸﺘﻠﻪ ... ﻭﺻﻠﺖ ﻓﻴﻪ .. ﺍﺳﻔﻪ ﻗﺎﻃﻌﺘﻜﻢ ﻋﻤﻮ ﻫﺎﺕ ﻋﻨﻚ ...
ﻣﻌﺎﻭﻳﻪ : ﻣﺎﺗﻌﺒﻴﺶ ﻧﻔﺴﻚ ﺑﻨﺘﻲ ... ﻫﺎﺩﻡ ﻧﺒﻲ ﻧﻌﻄﻴﻬﻢ ﺑﺮﻭﺣﻲ ﻷﺻﺤﺎﺑﻬﻢ ..
ﻟﺒﻨﻰ ﺭﻓﻌﺖ ﺣﻮﺍﺟﺒﻬﺎ : ﺍﻫﺎ ..
ﻧﻀﺎﻝ ﻳﺸﺒﺢ ﻟﻠﺘﻮﻟﻴﺐ ﻭﻳﺘﻤﻨﻰ ﻟﻮ ﺍﻟﻠﻲ ﻓﺒﺎﻟﻪ ﻣﺶ ﺻﺢ ..
ﺗﻠﻔﺖ ﻣﻌﺎﻭﻳﻪ ﻭﻫﻮ ﻳﺸﻮﻑ ﻟﺤﻨﺎﻥ ﺍﻟﻠﻲ ﻛﺎﻧﺖ ﺗﺸﺒﺤﻠﻪ ﻭﻟﻤﺎ ﺷﺒﺤﻠﻬﺎ ﻏﻴﺮﺕ ﻋﻴﻮﻧﻬﺎ ..
ﺣﻨﺎﻥ : ﺗﻌﺎﻟﻲ ﻧﻴﺮﻭﺯ ...
ﻧﻴﺮﻭﺯ ﺍﻟﻠﻲ ﻛﺎﻧﺖ ﺗﺮﺍﻗﺐ ﻓﻲ ﺍﻟﻮﺿﻊ ﻭﺷﺎﺩﻩ ﺿﺤﻜﺘﻬﺎ ﻋﺎﺟﺒﻬﺎ ﺍﻟﺠﻮ ... ﺟﺘﻬﺎ ﻭﻣﺸﻮﺍ ... ﻣﻌﺎﻭﻳﻪ ﻭﺯﻉ ﻧﻈﺮﻩ ﻋﻠﻴﻬﻢ ﻟﻘﺎﻫﻢ ﻻﻫﻴﻴﻦ .. ﻣﺸﻲ ﻭﺭﺍﻫﺎ ..
ﻧﻀﺎﻝ : ﻫﺬﺍ ﻭﻳﻦ ﻣﺎﺷﻲ ..
ﻳﺎﺭﺍ : ﻭﺍﻧﺖ ﺷﻦ ﺩﺧﻠﻚ ..
ﻧﻀﺎﻝ : ﻣﺎﺗﻜﺴﺮﻟﻴﺶ ﺭﻗﺒﺘﻲ ﻗﺎﻋﺪﻩ ﻉ ﺫﻣﺘﻲ ﺭﻩ ..
ﺷﺪﺕ ﻳﺪﻩ : ﻻﺯﻡ ﻃﻠﻌﻬﺎ ﻣﻦ ﺫﻣﺘﻚ ﺑﺶ ﻧﺮﺗﺎﺣﻮ ﻛﻠﻨﺎ ..
ﻧﻀﺎﻝ ﺳﻜﺖ ﻭﻫﻮ ﻓﻲ ﺣﺎﻟﺔ ﻏﻀﺐ ﺷﺪﻳﺪ .. ﻭﺃﺳﺎﻣﻪ ﻛﺎﻥ ﻣﺮﻛﺰ ﻋﻠﻴﻬﻢ ﻭﺣﺘﻰ ﻫﻮ ﻣﺶ ﺧﻴﺮ ﻣﻨﻪ " ﻣﻦ ﻫﻮ ﻫﺬﺍ ﺗﺎﻧﻲ ﻣﺮﺓ ﻳﺠﻲ ﻭﺑﺎﻳﻦ ﻋﻠﻴﻪ ﻣﻬﺘﻢ ﺑﻴﻬﺎ ... ﺍﻩ ﻳﺎﺃﺳﺎﻣﻪ ﺣﻈﻚ ﺩﻳﻤﺎ ﻣﺨﺎﻟﻔﻚ "
" ﺣﻨﺎﻥ .."
ﺣﻨﺎﻥ ﺗﻠﺨﺒﻄﺘﺖ ﻟﻤﺎ ﺳﻤﻌﺖ ﺍﺳﻤﻬﺎ ﻣﻨﻪ ﺍﻭﻝ ﻣﺮﺓ ﻳﻘﻮﻟﻪ ...
ﺍﻟﺘﻔﺘﺖ ﻫﻲ ﻭﻧﻴﺮﻭﺯ ...
ﻣﻌﺎﻭﻳﻪ : ﻣﻤﻜﻦ ﻧﺎﺧﺪ ﻣﻦ ﻭﻗﺘﻚ ﺷﻮﻳﻪ ..
ﺣﻨﺎﻥ ﺷﺒﺤﺘﻠﻪ ﻭﻧﺰﻟﺖ ﻋﻴﻮﻧﻬﺎ ﻟﻤﺤﻤﺪ ﻭﻫﻮ ﺭﺍﻗﺪ ﻓﺤﻀﻨﻬﺎ ..
ﻧﻴﺮﻭﺯ ﻭﻫﻲ ﺷﺎﺩﻩ ﺿﺤﻜﺘﻬﺎ : ﺍﻧﻲ ﺧﺎﺷﻪ ﻋﻦ ﺍﺫﻧﻜﻢ ... ﻭﺧﺸﺖ ..
ﺣﻨﺎﻥ ﺷﺒﺤﺘﻠﻪ : ﻧﻌﻢ ..
ﻣﻌﺎﻭﻳﻪ ﻣﺪﻟﻬﺎ ﺍﻟﺒﺎﻗﻪ : ﺗﻔﻀﻠﻲ ...
ﺣﻨﺎﻥ ﻗﻌﺪﺕ ﺗﺸﻮﻓﻠﻬﺎ : ﺍﻟﻤﻨﺎﺳﺒﻪ ..
ﻣﻌﺎﻭﻳﻪ ﺍﺑﺘﺴﻢ : ﺍﻋﺘﺬﺍﺭ ...
ﺣﻨﺎﻥ ﻧﺰﻟﺖ ﻋﻴﻮﻧﻬﺎ ﻭﺷﺒﺤﺖ ﻟﻤﺤﻤﺪ ﻭﻭﺍﺿﺢ ﺍﻧﻬﺎ ﺯﻋﻼﻧﻪ ...
ﻣﻌﺎﻭﻳﻪ " ﺧﺎﻃﺮﻱ .. ﻝﺍﻻ ﻫﻠﺒﻪ ﻫﻜﻲ ﻣﺎﺗﻘﻮﻻﺵ ﺣﺘﻰ ﺑﻴﻨﻚ ﻭﺑﻴﻦ ﻧﻔﺴﻚ ﺍﻟﻠﻲ ﺧﺎﻃﺮﻙ ﻓﻴﻪ ﺗﻮﺍ .." ﺿﺤﻚ ..
ﺣﻨﺎﻥ ﺷﺒﺤﺘﻠﻪ : ﺷﻦ ﻓﻲ ﻳﻀﺤﻚ ..
ﻣﻌﺎﻭﻳﻪ : ﺃﺳﻒ .. ﺃﺳﻒ .. ﻟﻮ ﺿﺎﻳﻘﺘﻚ ﺑﻀﺤﻜﺘﻲ ..
ﺣﻨﺎﻥ : ﺑﺲ؟ !!
ﻣﻌﺎﻭﻳﻪ ﺍﺑﺘﺴﻢ : ﻭﺍﺳﻒ ﻉ ﺍﻟﻠﻲ ﺻﺎﺭ ﺍﻟﻴﻮﻡ ..
ﺣﻨﺎﻥ ﺷﺒﺤﺘﻠﻪ ﺑﺠﺪﻳﻪ ﻭﻗﺎﻟﺖ : ﺍﻟﻠﻲ ﺻﺎﺭ ﺍﻟﻴﻮﻡ ﺍﻫﺎﻧﻪ ﻓﻮﺳﻂ ﺍﻟﻤﻮﻇﻔﻴﻦ ﺗﻜﻠﻤﻨﻲ ﺑﺎﻷﺳﻠﻮﺏ ﻫﺬﺍ ﻭﻛﺈﻧﻲ ﺧﺪﺍﻣﻪ ﻋﻨﺪﻙ .. ﻫﻮ ﺣﺘﻰ ﻣﻊ ﺍﻟﺨﺪﻡ ﺍﺳﻠﻮﺑﻚ ﻫﺬﺍ ﻏﻠﻂ ..
ﻣﻌﺎﻭﻳﻪ : ﻋﻨﺪﻙ ﺣﻖ ... ﻭﺍﻧﻲ ﺍﺳﻒ ﻭﻭﻋﺪ ﻣﻨﻲ ﻣﺶ ﺣﺘﺘﻜﺮﺭ .. ﺑﺲ ﻛﻨﺖ ﻣﻌﺼﺐ ﺷﻮﻳﻪ ﻭﺟﻮﻱ ﻣﻌﻜﺮ ..
ﺣﻨﺎﻥ : ﻣﺶ ﻣﺒﺮﺭ ..
ﻣﻌﺎﻭﻳﻪ ﺳﻜﺖ ﺑﻌﺪﻳﻦ ﻗﺎﻝ : ﻭﻋﺪﺗﻚ ﻣﺶ ﺣﻨﻜﺮﺭ ﻫﺎﻟﺘﺼﺮﻑ .. ﺍﻗﺒﻠﻲ ﺍﻋﺘﺬﺍﺭﻱ ... ﺍﺑﺘﺴﻢ ﻭﻗﺎﻝ .. ﻋﺪﻳﻬﺎ ...
ﻫﻲ ﺍﺑﺘﺴﻤﺖ ﻭﻭﻃﺖ ﻋﻴﻮﻧﻬﺎ ﻟﻮﻃﺎ ..
ﻣﻌﺎﻭﻳﻪ : ﺷﻨﻮ ﺗﺎﺧﺪﻳﻬﺎ ﻭﻻ ﻧﺮﻭﺡ ﺑﻴﻬﺎ ..
ﺣﻨﺎﻥ ﺑﻠﻬﻔﻪ : ﻻﻫﺎﺗﻬﺎ ..
ﻣﻌﺎﻭﻳﻪ ﺿﺤﻚ : ﺗﻮﻗﻌﺖ ﺗﻌﺠﺒﻚ ...
ﺣﻨﺎﻥ ﺧﺪﺕ ﺍﻟﺒﺎﻗﻪ ﺑﻴﺪﻫﺎ ﺍﻟﺘﺎﻧﻴﻪ ﻭﺣﻀﻨﺘﻬﺎ ﻣﻊ ﻣﺤﻤﺪ ﻃﺒﻌﺎ ﺑﺪﻭﻥ ﻗﺼﺪ
ﻣﻌﺎﻭﻳﻪ " ﻳﺎﺭﻳﺘﻨﻲ ﺑﺎﻗﺔ ﻓﻲ ﺍﻳﺪﻳﻚ .. ﻣﻌﺎﻭﻳﻪ ﺧﻴﺮﻙ !!! ؟؟ .."
ﻭﺟﻬﻪ ﻭﻻ ﺍﺣﻤﺮ ..
ﺣﻨﺎﻥ : ﺷﻜﺮﺍ .. ﻋﻦ ﺍﺫﻧﻚ ﻭﺧﺸﺖ ...
ﻫﻮ ﺗﻨﻬﺪ ﻭﺗﻠﻔﺖ ﺷﺒﺤﻠﻬﻢ ﻟﻘﺎﻫﻢ ﻳﺸﻮﻓﻮﻟﻪ ...
ﻋﻴﻨﻪ ﺟﺖ ﻓﻌﻴﻦ ﻧﻀﺎﻝ ﺗﺠﺎﻫﻠﻪ ﻭﻗﺪﻣﻠﻬﻢ .. ﻭﻣﺸﻲ ﻟﺮﻫﻒ ..
ﻣﻌﺎﻭﻳﻪ : ﺗﻔﻀﻠﻲ ﺑﻨﺘﻲ ..
ﺭﻫﻒ ﺧﺪﺗﻬﺎ ﻭﺍﺑﺘﺴﻤﺖ : ﺷﻜﺮﺍ ﻋﻤﻮ ﺟﻴﺘﻚ ﺳﺎﺩﻩ ..
ﻣﻌﺎﻭﻳﻪ : ﺍﻟﻌﻔﻮ ﺑﻨﺘﻲ ... ﻣﺎﻓﻲ ﺷﻲ ﻣﻦ ﻗﻴﻤﺘﻚ ...
ﺭﻫﻒ ﺍﺑﺘﺴﻤﺖ ..
ﻗﺮﺏ ﻣﻌﺎﻭﻳﻪ ﻣﻦ ﺑﻨﺘﻪ ﻭﻭﻗﻒ ﺣﺪﺍﻫﺎ ﻭﺣﻂ ﺍﻳﺪﻩ ﻉ ﻛﺘﻔﻬﺎ : ﺷﻦ ﺟﻮ ..
ﻣﻬﺎ ﺑﻀﺤﻜﻪ : ﺑﺸﻮﻓﺘﻚ ﺍﺣﻠﻮ ..
ﻣﻌﺎﻭﻳﻪ : ﻫﻬﻬﻬﻬﻬﻪ ..
ﻣﻬﺎ : ﺷﻨﻮ ﻳﺎﻣﻔﺎﺟﺂﺕ ﺍﻧﺖ ..
ﻣﻌﺎﻭﻳﻪ : ﺑﻨﺖ !
ﻣﻬﺎ : ﻫﻬﻬﻬﻬﻬﻬﻬﻬﻬﻪ ..
ﻣﻌﺎﻭﻳﻪ ﺍﺑﺘﺴﻢ ...
ﺷﻮﻳﻪ ﻭﻃﻠﻌﻮﺍ ﺍﻟﻌﺸﻲ ... ﻭﺍﻟﺠﻮ ﺑﻌﺾ ﺷﻲ ﺗﻜﻬﺮﺏ .. ﺑﺲ ﺗﻤﺖ ﺍﻟﻠﻴﻠﻪ ﻉ ﺧﻴﺮ ...
ﺭﻭﺣﻮﺍ ﺍﺏ ﻭﺍﻡ ﻧﻀﺎﻝ .. ﻭﻧﻴﺮﻭﺯ ﻭﺍﺳﺎﻣﻪ ﺑﻌﺪﻫﻢ ...
ﻳﺎﺭﺍ : ﻫﻴﺎ
ﻧﻀﺎﻝ : ﺷﻨﻮ ﺍﻟﻠﻲ ﻫﻴﺎ ﻭﻫﺬﺍ ﻣﺎﺭﻭﺣﺶ .. ﺧﻼﻫﺎ ﻭﻗﺪﻣﻠﻬﻢ ..
ﻧﻀﺎﻝ : ﺍﻟﻮﻗﺖ ﺗﺄﺧﺮ ..
ﻣﻌﺎﻭﻳﻪ ﺍﺑﺘﺴﻢ ﻉ ﺟﻨﺐ .. ﻭﺣﻨﺎﻥ ﻓﻬﻤﺖ ﻉ ﻧﻀﺎﻝ ..
ﻣﻌﺎﻭﻳﻪ : ﻫﻴﺎ ﺑﺎﺑﺎ ﻣﻬﺎ ..
ﻟﺒﻨﻰ ﻧﺨﺼﺖ ﻣﻬﺎ ﻭﻣﻬﺎ ﻧﺨﺼﺘﻬﺎ ...
ﻟﺒﻨﻰ : ﺁﺍﺍ .. ﻋﻤﻮ ﻣﻤﻜﻦ ﺗﺨﻠﻴﻬﺎ ﺗﺒﺎﺕ ﻣﻌﺎﻧﺎ ..
ﻣﻌﺎﻭﻳﻪ ﺷﺒﺢ ﻟﻤﻬﺎ ... ﻣﻬﺎ ﻋﻴﻮﻧﻬﺎ ﻟﻮﻃﺎ ..
ﺣﻨﺎﻥ : ﺧﻠﻴﻬﺎ ﺗﺒﺎﺕ ... ﻣﺴﺘﺎﺣﺸﺘﻪﺍ ﻫﻠﺒﻪ ﻭﺷﺒﺤﺖ ﻟﻤﻬﺎ ﻭﺿﺤﻜﺖ ﻭﻣﻬﺎ ﺍﺑﺘﺴﻤﺖ ..
ﻣﻌﺎﻭﻳﻪ ﺍﺑﺘﺴﻢ : ﺗﻤﺎﻡ .. ﻏﺪﻭﺓ ﺍﻟﻌﺸﻴﻪ ﻧﺒﻌﺘﻠﻚ ﻣﻦ ﻳﺮﻭﺡ ﺑﻴﻚ ..
ﻣﻬﺎ ﺍﺑﺘﺴﻤﺖ : ﺑﺎﻫﻲ ..
ﻣﻌﺎﻭﻳﻪ : ﻛﻞ ﻋﺎﻡ ﻭﺍﻧﺘﻲ ﺑﺨﻴﺮ ﺭﻫﻒ ﺑﻨﺘﻲ ﻭﻋﻘﺒﺎﻝ ﺍﻟﻤﻴﻪ ﺯﻱ ﻣﺎﻳﻘﻮﻟﻮﺍ ..
ﺭﻫﻒ : ﺗﺴﻠﻢ ﻋﻤﻮ ..
ﻣﻌﺎﻭﻳﻪ : ﺗﺼﺒﺤﻮﺍ ﻉ ﺧﻴﺮ .. ﻭﺷﺒﺢ ﻟﺤﻨﺎﻥ .. ﻭﻟﻒ ﻭﻣﺸﻲ ...
ﻫﻤﺎ ﺭﺩﻭﺍ ﻋﻠﻴﻪ ﻭﻧﻀﺎﻝ ﻗﻌﺪ ﻳﺸﺒﺤﻠﻪ ﻟﻴﻦ ﻃﻠﻊ ﻭﺷﺎﻑ ﻟﺤﻨﺎﻥ ﻭﻫﺰ ﺭﺍﺳﻪ ﺑﺘﻬﺪﻳﺪ ﻭﻫﻲ ﺗﺸﺒﺤﻠﻪ ﺑﺄﺳﺘﻐﺮﺍﺏ .. ﺧﺸﻮﺍ ﺍﻟﺒﻨﺎﺕ ﻣﻊ ﻣﻬﺎ ﺑﻌﺪ ﺳﻠﻤﻮﺍ ﻉ ﺑﻮﻫﻢ ..
ﻧﻀﺎﻝ : ﻳﺎﺭﺍ ﺍﺳﺒﻘﻴﻨﻲ ﻟﻠﺴﻴﺎﺭﺓ ...
ﻳﺎﺭﺍ ﺷﺒﺤﺘﻠﻪ ﺑﻐﻀﺐ ..
ﻧﻀﺎﻝ : ﻳﺎﺭﺍ ﺑﺮﻱ ... ﻳﺎﺭﺍ ﺗﻤﺎﻟﻜﺖ ﻧﻔﺴﻬﺎ ﻭﻣﺸﺖ ﻃﻠﻌﺖ ﺍﻣﺎ ﻫﻮﻗﺪﻡ ﻟﺤﻨﺎﻥ ﻭﻛﻴﻒ ﺟﺎﻱ ﺑﻴﺪﻭﻱ ..
ﺣﻨﺎﻥ : ﺧﻼﻝ ﺍﺳﺒﻮﻉ ﻟﻮ ﻣﺎﻃﻠﻘﺘﻨﻴﺶ ﺣﻨﺮﻓﻊ ﻗﻀﻴﻪ ..
ﻧﻀﺎﻝ ﺑﻴﻤﻮﺕ ﻭﻣﺶ ﻗﺎﺩﺭ ﻳﺘﺤﻤﻞ ﺍﺑﺘﺴﻢ ﺑﺴﺨﺮﻳﻪ : ﺍﻫﺎﺍﺍﺍ ... ﻣﺴﺘﻌﺠﻠﻪ ﺗﺒﻲ ﺗﺎﺧﺪﻱ ﺭﺍﺣﺘﻚ ..
ﺣﻨﺎﻥ ﻓﻜﺮﺕ ﺍﻟﻒ ﻣﺮﻩ ﻗﺒﻞ ﻟﺘﻤﺪ ﻳﺪﻫﺎ ﻭﺗﻌﻄﻴﻪ ﻛﻒ .. ﻭﻗﺎﻟﺖ ﻓﻲ ﻧﻔﺴﻬﺎ " ﺩﺍﻣﻬﺎ ﻭﺻﻠﺖ ﺑﻴﻪ ﻟﻬﻨﻲ ﺣﺘﻰ ﺍﻟﺮﺩ ﺑﺎﻟﻜﻼﻡ ﻣﺎﻳﺴﺘﻬﻼﺵ ﻣﺶ ﻧﻤﺪ ﻳﺪﻱ ﻭﻧﻀﺮﺑﻪ " ...
ﺷﺒﺤﺘﻠﻪ ﻣﻦ ﻓﻮﻕ ﻟﻠﻮﻃﺎ .. ﻭﻣﺸﺖ ﺧﺸﺖ ﻭﺻﻜﺮﺕ ﺍﻟﺒﺎﺏ ...
ﻫﻮ ﻗﺮﻳﺐ ﻳﻬﺒﻞ ﺯﻓﺮ ﺑﻘﻮﺓ ... ﻭﻟﻒ ﻭﻣﺸﻲ ﻃﻠﻊ
ﺭﻛﺐ ﺍﻟﺴﻴﺎﺭﻩ ﻭﻫﻮ ﺑﻴﻨﻔﺠﺮ ..
ﻳﺎﺭﺍ ﺑﻌﺼﺒﻴﻪ : ﺷﻦ ﻣﻌﻨﺎﻫﺎ ﺗﺼﺮﻓﺎﺗﻚ ﻫﺎﺩﻱ ..
ﻧﻀﺎﻝ ﺑﻐﻀﺐ ﻭﺻﻮﺕ ﻋﺎﻟﻲ : ﻳﺎﺍﺍﺍﺭﺍﺍﺍﺍﺍ .. ﺍﺱﻛﻜﺘﺘﺘﺘﺘﻲ ... ﺍﺻﺼﺺ
ﺻﺼﺼﺺ ...
ﻳﺎﺭﺍ ﺍﻧﺼﺪﻣﺖ ﻭﺳﻜﺘﺖ .. ﻭﻫﻮ ﺣﺮﻕ ﺍﻟﻌﺠﻞ ﻭﻃﺎﺭ ﺑﺎﻟﺴﻴﺎﺭﺓ ...
... ﻳﺘﺒﻊ ...
٢٣ / ١٠ / ٢٠٢٠ · Facebook for Android · ﺭﻭﺍﻳﺎ
